ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
                                     ตติยํ สีวลิตฺเถราปทานํ (๕๔๓)
     [๑๓๓]   |๑๓๓.๕๔| ปทุมุตฺตโร นาม ชิโน   สพฺพธมฺเมสุ จกฺขุมา
                       อิโต สตสหสฺสมฺหิ          กปฺเป อุปฺปชฺชิ นายโก ฯ
      |๑๓๓.๕๕| สีลนฺตสฺส อสงฺเขยฺยํ        สมาธิ วชิรูปโม
                       อสงฺเขยฺยํ ญาณวรํ          วิมุตฺติ จ อโนปมา ฯ
      |๑๓๓.๕๖| มนุชามรุนาคานํ ๑-        พฺรหฺมานญฺจ สมาคเม
                       สมณพฺราหฺมณากิณฺเณ   ธมฺมํ เทเสสิ นายโก ฯ
      |๑๓๓.๕๗| สสาวกํ มหาลาภึ            ปุญฺญวนฺตํ ชุตินฺธรํ
                       ฐเปสิ เอตทคฺคมฺหิ          ปริสาสุ วิสารโท ฯ
      |๑๓๓.๕๘| ตทาหํ ขตฺติโย อาสึ         นคเร หํสสวฺหเย
                       สุตฺวา ชินสฺส ตํ วากฺยํ      สาวกสฺส คุณํ พหุํ ฯ
      |๑๓๓.๕๙| นิมนฺตยิตฺวา สตฺตาหํ       โภชยิตฺวา สสาวกํ
                       มหาทานํ ททิตฺวาน        ตํ ฐานํ อภิปตฺถยึ ฯ
      |๑๓๓.๖๐| ตทา มํ วินตํ ปาเท          ทิสฺวาน ปุริสาสโภ
                       สเรน มหตา ธีโร            อิมํ วจนมพฺรวิ ฯ
      |๑๓๓.๖๑| ตโต ชินสฺส วจนํ             โสตุกามา มหาชนา
                       เทวตา อถ คนฺธพฺพา ๒-  พฺรหฺมาโน ๓- จ มหิทฺธิกา ฯ
      |๑๓๓.๖๒| สมณพฺราหฺมณา เจว      นมสฺสึสุ กตญฺชลี
                       นโม เต ปุริสาชญฺญ        นโม เต ปุริสุตฺตม ฯ
@เชิงอรรถ:  ม. ยุ. มนุชามรนาคานํ ฯ  ม. ยุ. เทวทานวคนฺธพฺพา ฯ  ยุ. พฺรหฺมุนา ฯ
      |๑๓๓.๖๓| ขตฺติเยน มหาทานํ          ทินฺนํ สตฺตาหกาธิกํ ๑-
                       โสตุกามา ผลํ ตสฺส         พฺยากโรหิ มหามุนิ ฯ
      |๑๓๓.๖๔| ตโต อโวจ ภควา             สุณาถ มม ภาสิตํ
                       อปฺปเมยฺยมฺหิ พุทฺธมฺหิ    สสงฺฆมฺหิ ปติฏฺฐิตา ๒- ฯ
      |๑๓๓.๖๕| ทกฺขิณาทาย ๓- โก วตฺตา  อปฺปเมยฺยผลา หิ สา
                       อปิเจส มหาโภโค            ฐานํ ปตฺเถติ อุตฺตมํ ฯ
      |๑๓๓.๖๖| ลาภี วิปุลลาภานํ            ยถา ภิกฺขุ สุทสฺสโน
                       ตถาหมฺปิ ภเวยฺยนฺติ        ลจฺฉเสตํ อนาคเต ฯ
      |๑๓๓.๖๗| สตสหสฺเส อิโต กปฺเป      โอกฺกากกุลสมฺภโว
                       โคตโม นาม นาเมน        สตฺถา โลเก ภวิสฺสติ ฯ
      |๑๓๓.๖๘| ตสฺส ธมฺเมสุ ทายาโท      โอรโส ธมฺมนิมฺมิโต
                       สีวลี นาม นาเมน           เหสฺสติ สตฺถุสาวโก ฯ
      |๑๓๓.๖๙| เตน กมฺเมน สุกเตน        เจตนาปณิธีหิ จ
                       ชหิตฺวา มานุสํ เทหํ         ตาวตึสํ อคญฺฉหํ ฯ
      |๑๓๓.๗๐| เอกนวุเต อิโต กปฺเป        วิปสฺสี โลกนายโก
                       อุปฺปชฺชิ จารุนยโน ๔-     สพฺพธมฺมวิปสฺสโก ฯ
      |๑๓๓.๗๑| ตทาหํ พนฺธุมติยา          กุลสฺสญฺญตรสฺส จ
                       ทยิโต วุฏฺฐิโต ๕- เจว      อาสึ กมฺมนฺตพฺยาวโฏ ๖- ฯ
      |๑๓๓.๗๒| ตทา อญฺญตโร ปุคฺโค ๗-  วิปสฺสิสฺส มเหสิโน
                       ปริเวณํ ๘- อกาเรสิ         มหนฺตมิติ วิสฺสุตํ
@เชิงอรรถ:  ม. สตฺตาหิกมฺปิ โว ฯ ยุ. สตตาหิกํ วิโภ ฯ  ยุ. สงฺฆมฺหิ สุปฺปติฏฺฐิตา ฯ
@ ม. ทกฺขิณา ตาย ฯ  ม. จารุทสฺสโน ฯ  ม. ปสฺสิโต ฯ ยุ. ปตฺถิโต ฯ
@ ม. กมฺมนฺตวาวโฏ ฯ  ม. ยุ. ปูโค ฯ  ม. ปริเวสํ ฯ
      |๑๓๓.๗๓| นิฏฺฐิเต จ มหาทานํ        ททุํ ขชฺชกสญฺญุตํ
                       นวํ ทธึ มธุญฺเจว            วิจินํ เนว อทฺทสุํ ฯ
      |๑๓๓.๗๔| ตทาหนฺตํ ๑- คเหตฺวาน   นวทธึ มธุมฺปิจ
                       กมฺมสามิฆรํ คจฺฉึ          ตเมสนฺตา ๒- มมทฺทสุํ ฯ
      |๑๓๓.๗๕| สหสฺสมปิ ทตฺวาน          นาลภิตฺถ ๓- สตทฺวยํ
                       ตโตหเมว จินฺเตสึ           เนตํ เหสฺสติ โอรกํ ฯ
      |๑๓๓.๗๖| ยถา อิเม ชนา สพฺเพ      สกฺกโรนฺติ ตถาคตํ
                       อหมฺปิ การํ กริสฺสามิ      สสงฺเฆ โลกนายเก ฯ
      |๑๓๓.๗๗| ตทาหเมว เนตฺวาน ๔-    ทธึ มธุญฺจ เอกโต
                       มทฺทิตฺวา โลกนาถสฺส     สสงฺฆสฺส อทาสหํ ฯ
      |๑๓๓.๗๘| เตน กมฺเมน สุกเตน        เจตนาปณิธีหิ จ
                       ชหิตฺวา มานุสํ เทหํ         ตาวตึสํ อคญฺฉหํ ฯ
      |๑๓๓.๗๙| ปุนาหํ พาราณสิยํ           ราชา หุตฺวา มหายโส
                       สตฺตุกสฺส ตทา ทุฏฺโฐ ๕-  ทฺวารโรธํ อการยึ ฯ
      |๑๓๓.๘๐| ตทา ตปสฺสิโน รุทฺธา       เอกาหํ รกฺขิตา อหุํ
                       ตโต ตสฺส วิปาเกน         ปาปิฏฺฐํ ๖- นิรยํ ภุสํ ฯ
      |๑๓๓.๘๑| ปจฺฉิเม จ ภเว ทานิ         ชาโตหํ โลกิเย ปุเร
                       สุปฺปวาสาว ๗- เม มาตา   มหาลิลิจฺฉวิ เม ปิตา ฯ
      |๑๓๓.๘๒| ขตฺติเย ปุญฺญกมฺเมน     ทฺวารโรธสฺส วาหสา
                       สตฺตวสฺสานิ นิวสึ           มาตุกุจฺฉิมฺหิ ทุกฺขิโต ฯ
@เชิงอรรถ:  ยุ. ตทาภตฺตํ ฯ  ยุ. ตเมสนฺตํ ตมทฺทสุํ ฯ  ม. นาลภึสุ จ ตํทฺวยํ ฯ
@ ม. ยุ. ตทาหเมวํ จินฺเตตฺวา ฯ  ยุ. พุทฺโธ ฯ  ม. ปาปตึ ฯ ยุ. ปาปตฺตํ ฯ
@ ม. ยุ. จ ฯ
      |๑๓๓.๘๓| สตฺตาหํ ทฺวารมุโฬฺหหํ     มหาทุกฺขสมปฺปิโต
                       มาตา เม ฉนฺททาเนน     เอวํ อาสิ สุทุกฺขิตา ฯ
      |๑๓๓.๘๔| สุวตฺถิโตหํ นิกฺขนฺโต        พุทฺเธน อนุกมฺปิโต
                       นิกฺขนฺตทิวเสเยว            ปพฺพชึ อนคาริยํ ฯ
      |๑๓๓.๘๕| อุปชฺฌาโย สารีปุตฺโต เม  โมคฺคลฺลาโน มหิทฺธิโก
                       เกเส โอโรปยนฺโต เม      อนุสาสิ มหามติ ฯ
      |๑๓๓.๘๖| เกเสสุ ฉิชฺชมาเนสุ          อรหตฺตํ อปาปุณึ
                       เทวา นาคา มนุสฺสา จ    ปจฺจเย อุปเนนฺติ เม ฯ
      |๑๓๓.๘๗| ปทุมุตฺตรนามญฺจ           วิปสฺสิญฺจ วินายกํ
                       ยํ ปูชยึ ปมุทิโต              ปจฺจเยหิ วิเสสโต ฯ
      |๑๓๓.๘๘| ตโต เตสํ วิเสเสน            กมฺมานํ วิปุลุตฺตมํ
                       ลาภํ ลภามิ สพฺพตฺถ      วเน คาเม ชเล ถเล ฯ
      |๑๓๓.๘๙| เรวตํ ทสฺสนตฺถาย           ยทา ยาติ วินายโก
                       ตึสภิกฺขุสหสฺเสหิ            สห โลกคฺคนายโก ฯ
      |๑๓๓.๙๐| ตทา เทโวปนีเตหิ            มมตฺถาย มหามติ
                       ปจฺจเยหิ มหาวีโร           สสงฺโฆ โลกนายโก ฯ
      |๑๓๓.๙๑| อุปฏฺฐิโต มยา พุทฺโธ       คนฺตฺวา เรวตมทฺทส
                       ตโต เชตวนํ คนฺตฺวา        เอตทคฺเค ฐเปสิ มํ ฯ
      |๑๓๓.๙๒| ลาภีนํ สีวลี อคฺโค           มม สิสฺเสสุ ภิกฺขโว
                       สพฺพโลกหิโต สตฺถา       กิตฺตยิ ปริสาสุ มํ ฯ
      |๑๓๓.๙๓| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา     วิหรามิ อนาสโว ฯ
      |๑๓๓.๙๔| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
      |๑๓๓.๙๕| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
           อิตฺถํ สุทํ อายสฺมา สีวลี เถโร อิมา คาถาโย อภาสิตฺถาติ ฯ
                                     สีวลิตฺเถรสฺส อปทานํ สมตฺตํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๒๒๕-๒๒๙. https://84000.org/tipitaka/read/pali_item.php?book=33.1&item=133&items=1              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=33.1&item=133&items=1&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=33.1&item=133&items=1              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=133&items=1              ศึกษาอรรถกถานี้ได้ที่ :- https://84000.org/tipitaka/attha/attha.php?b=33.1&i=133              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]