พระไตรปิฎกเล่มที่ ๓๔ ภาษาบาลี อักษรไทย
พระอภิธรรมปิฎกเล่มที่ ๑ อภิ. ธมฺมสงฺคณิ

     [๖๙๒]   ตตฺถ  กตเม  ตโย  อพฺยากตเหตู  กุสลานํ  วา  ธมฺมานํ
วิปากโต   กิริยาพฺยากเตสุ   วา   ธมฺเมสุ   อโลโภ  อโทโส  อโมโห
อิเม ตโย อพฺยากตเหตู ฯ
     [๖๙๓]   ตตฺถ  กตเม  นว  กามาวจรเหตู  ตโย  กุสลเหตู  ตโย
อกุสลเหตู   ตโย   อพฺยากตเหตู   อิเม  นว  กามาวจรเหตู  ฯ  ตตฺถ
กตเม   ฉ   รูปาวจรเหตู   ตโย  กุสลเหตู  ตโย  อพฺยากตเหตู  อิเม
ฉ   รูปาวจรเหตู  ฯ  ตตฺถ  กตเม  ฉ  อรูปาวจรเหตู  ตโย  กุสลเหตู
ตโย อพฺยากตเหตู อิเม ฉ อรูปาวจรเหตู ฯ
     [๖๙๔]   ตตฺถ  กตเม  ฉ  อปริยาปนฺนเหตู  ตโย  กุสลเหตู  ตโย
อพฺยากตเหตู   อิเม   ฉ   อปริยาปนฺนเหตู   ฯ   ตตฺถ   กตเม  ตโย
กุสลเหตู   อโลโภ   อโทโส   อโมโห  ฯ  ตตฺถ  กตโม  อโลโภ  โย
อโลโภ   อลุพฺภนา   อลุพฺภิตตฺตํ   อสาราโค  อสารชฺชนา  อสารชฺชิตตฺตํ
อนภิชฺฌา   อโลโภ   กุสลมูลํ   อยํ   วุจฺจติ  อโลโภ  ฯ  ตตฺถ  กตโม
อโทโส    โย    อโทโส   อทูสนา   อทูสิตตฺตํ   ฯเปฯ   อพฺยาปาโท
อพฺยาปชฺโช   อโทโส   กุลสมูลํ  อยํ  วุจฺจติ  อโทโส  ฯ  ตตฺถ  กตโม
อโมโห    ทุกฺเข    ญาณํ    ทุกฺขสมุทเย   ญาณํ   ทุกฺขนิโรเธ   ญาณํ
ทุกฺขนิโรธคามินิยา    ปฏิปทาย    ญาณํ    ปุพฺพนฺเต   ญาณํ   อปรนฺเต
ญาณํ      ปุพฺพนฺตาปรนฺเต      ญาณํ     อิทปฺปจฺจยตาปฏิจฺจสมุปฺปนฺเนสุ
ธมฺเมสุ   ญาณํ   ยา   เอวรูปา   ปญฺญา   ปชานนา   วิจโย  ปวิจโย
ธมฺมวิจโย     สลฺลกฺขณา     อุปลกฺขณา     ปจฺจุปลกฺขณา     ปณฺฑิจฺจํ
โกสลฺลํ    เนปุญฺญํ    เวภพฺยา    จินฺตา    อุปปริกฺขา   ภูรี   เมธา
ปริณายิกา    วิปสฺสนา    สมฺปชญฺญํ    ปโตโท    ปญฺญา    ปญฺญินฺทฺริยํ
ปญฺญาพลํ   ปญฺญาสตฺถํ   ปญฺญาปาสาโท   ปญฺญาอาโลโก   ปญฺญาโอภาโส
ปญฺญาปชฺโชโต         ปญฺญารตนํ         อโมโห        ธมฺมวิจโย
สมฺมาทิฏฺฐิ    ธมฺมวิจยสมฺโพชฺฌงฺโค    มคฺคงฺคํ    มคฺคปริยาปนฺนํ    อยํ
วุจฺจติ   อโมโห   ฯ   อิเม   ตโย  กุสลเหตู  ฯ  ตตฺถ  กตเม  ตโย
อพฺยากตเหตู   กุสลานํ   ธมฺมานํ   วิปากโต  อโลโภ  อโทโส  อโมโห
อิเม ตโย อพฺยากตเหตู ฯ อิเม ฉ อปริยาปนฺนเหตู ฯ
                                       อิเม ธมฺมา เหตู ฯ
     [๖๙๕]   กตเม  ธมฺมา  นเหตู  เต  ธมฺเม  ฐเปตฺวา  อวเสสา
กุสลากุสลาพฺยากตา    ธมฺมา    กามาวจรา   รูปาวจรา   อรูปาวจรา
อปริยาปนฺนา     เวทนากฺขนฺโธ    ฯเปฯ    วิญฺญาณกฺขนฺโธ    สพฺพญฺจ
รูปํ อสงฺขตา จ ธาตุ อิเม ธมฺมา นเหตู ฯ
     [๖๙๖]   กตเม   ธมฺมา   สเหตุกา  เตหิ  ธมฺเมหิ  เย  ธมฺมา
สเหตุกา    เวทนากฺขนฺโธ    ฯเปฯ    วิญฺญาณกฺขนฺโธ   อิเม   ธมฺมา
สเหตุกา   ฯ   กตเม   ธมฺมา   อเหตุกา  เตหิ  ธมฺเมหิ  เย  ธมฺมา
อเหตุกา    เวทนากฺขนฺโธ    ฯเปฯ    วิญฺญาณกฺขนฺโธ   สพฺพญฺจ   รูปํ
อสงฺขตา จ ธาตุ อิเม ธมฺมา อเหตุกา ฯ
     [๖๙๗]   กตเม  ธมฺมา  เหตุสมฺปยุตฺตา  เตหิ  ธมฺเมหิ  เย ธมฺมา
สมฺปยุตฺตา    เวทนากฺขนฺโธ    ฯเปฯ   วิญฺญาณกฺขนฺโธ   อิเม   ธมฺมา
เหตุสมฺปยุตฺตา   ฯ   กตเม  ธมฺมา  เหตุวิปฺปยุตฺตา  เตหิ  ธมฺเมหิ  เย
ธมฺมา   วิปฺปยุตฺตา   เวทนากฺขนฺโธ   ฯเปฯ   วิญฺญาณกฺขนฺโธ   สพฺพญฺจ
รูปํ อสงฺขตา จ ธาตุ อิเม ธมฺมา เหตุวิปฺปยุตฺตา ฯ
     [๖๙๘]   กตเม   ธมฺมา   เหตูเจวสเหตุกาจ   โลโภ   โมเหน
เหตุเจวสเหตุโกจ       โมโห       โลเภน      เหตุเจวสเหตุโกจ
โทโส    โมเหน    เหตุเจวสเหตุโกจ   โมโห   โทเสน   เหตุเจว-
สเหตุโกจ    อโลโภ    อโทโส   อโมโห   เต   อญฺญมญฺญํ   เหตู-
เจวสเหตุกาจ    อิเม    ธมฺมา    เหตูเจวสเหตุกาจ    ฯ   กตเม
ธมฺมา   สเหตุกาเจวนจเหตู   เตหิ   ธมฺเมหิ   เย   ธมฺมา  สเหตุกา
เต   ธมฺเม   ฐเปตฺวา   เวทนากฺขนฺโธ   ฯเปฯ  วิญฺญาณกฺขนฺโธ  อิเม
ธมฺมา สเหตุกาเจวนจเหตู ฯ
     [๖๙๙]   กตเม    ธมฺมา    เหตูเจวเหตุสมฺปยุตฺตาจ    โลโภ
โมเหน     เหตุเจวเหตุสมฺปยุตฺโตจ    โมโห    โลเภน    เหตุเจว-
เหตุสมฺปยุตฺโตจ      โทโส      โมเหน     เหตุเจวเหตุสมฺปยุตฺโตจ
โมโห     โทเสน     เหตุเจวเหตุสมฺปยุตฺโตจ     อโลโภ    อโทโส
อโมโห      เต      อญฺญมญฺญํ     เหตูเจวเหตุสมฺปยุตฺตาจ     อิเม
ธมฺมา   เหตูเจวเหตุสมฺปยุตฺตาจ   ฯ   กตเม   ธมฺมา  เหตุสมฺปยุตฺตา-
เจวนจเหตู   เตหิ   ธมฺเมหิ   เย   ธมฺมา   สมฺปยุตฺตา  เต  ธมฺเม
ฐเปตฺวา    เวทนากฺขนฺโธ    ฯเปฯ    วิญฺญาณกฺขนฺโธ   อิเม   ธมฺมา
เหตุสมฺปยุตฺตาเจวนจเหตู ฯ
     [๗๐๐]   กตเม  ธมฺมา  นเหตู  สเหตุกา  เตหิ ธมฺเมหิ เย ธมฺมา
นเหตู    สเหตุกา    เวทนากฺขนฺโธ    ฯเปฯ   วิญฺญาณกฺขนฺโธ   อิเม
ธมฺมา   นเหตู   สเหตุกา   ฯ  กตเม  ธมฺมา  นเหตู  อเหตุกา  เตหิ
ธมฺเมหิ    เย    ธมฺมา   นเหตู   อเหตุกา   เวทนากฺขนฺโธ   ฯเปฯ
วิญฺญาณกฺขนฺโธ   สพฺพญฺจ   รูปํ   อสงฺขตา   จ   ธาตุ   อิเม   ธมฺมา
นเหตู อเหตุกา ฯ
                                            ---------
     [๗๐๑]   กตเม   ธมฺมา   สปฺปจฺจยา   ปญฺจกฺขนฺธา   รูปกฺขนฺโธ
เวทนากฺขนฺโธ    สญฺญากฺขนฺโธ   สงฺขารกฺขนฺโธ   วิญฺญาณกฺขนฺโธ   อิเม
ธมฺมา   สปฺปจฺจยา   ฯ   กตเม   ธมฺมา   อปฺปจฺจยา  อสงฺขตา  ธาตุ
อิเม ธมฺมา อปฺปจฺจยา ฯ
     [๗๐๒]   กตเม   ธมฺมา  สงฺขตา  เยว  เต  ธมฺมา  สปฺปจฺจยา
เตว   เต   ธมฺมา   สงฺขตา  ฯ  กตเม  ธมฺมา  อสงฺขตา  โย  เอว
โส ธมฺโม อปฺปจฺจโย โส เอว โส ธมฺโม อสงฺขโต ฯ
     [๗๐๓]   กตเม   ธมฺมา   สนิทสฺสนา   รูปายตนํ   อิเม  ธมฺมา
สนิทสฺสนา    ฯ    กตเม    ธมฺมา   อนิทสฺสนา   จกฺขายตนํ   ฯเปฯ
โผฏฺฐพฺพายตนํ     เวทนากฺขนฺโธ     ฯเปฯ    วิญฺญาณกฺขนฺโธ    ยญฺจ
รูปํ   อนิทสฺสนํ   อปฺปฏิฆํ   ธมฺมายตนปริยาปนฺนํ   อสงฺขตา   จ   ธาตุ
อิเม ธมฺมา อนิทสฺสนา ฯ
     [๗๐๔]   กตเม  ธมฺมา  สปฺปฏิฆา  จกฺขายตนํ ฯเปฯ โผฏฺฐพฺพายตนํ
อิเม     ธมฺมา     สปฺปฏิฆา     ฯ    กตเม    ธมฺมา    อปฺปฏิฆา
เวทนากฺขนฺโธ   ฯเปฯ   วิญฺญาณกฺขนฺโธ   ยญฺจ  รูปํ  อนิทสฺสนํ  อปฺปฏิฆํ
ธมฺมายตนปริยาปนฺนํ อสงฺขตา จ ธาตุ อิเม ธมฺมา อปฺปฏิฆา ฯ
     [๗๐๕]   กตเม  ธมฺมา  รูปิโน  จตฺตาโร  จ  มหาภูตา  จตุนฺนํ จ
มหาภูตานํ   อุปาทาย   รูปํ   อิเม   ธมฺมา  รูปิโน  ฯ  กตเม  ธมฺมา
อรูปิโน    เวทนากฺขนฺโธ    ฯเปฯ    วิญฺญาณกฺขนฺโธ    อสงฺขตา   จ
ธาตุ อิเม ธมฺมา อรูปิโน ฯ
     [๗๐๖]   กตเม   ธมฺมา   โลกิยา  สาสวา  กุสลากุสลาพฺยากตา
ธมฺมา    กามาวจรา    รูปาวจรา   อรูปาวจรา   รูปกฺขนฺโธ   ฯเปฯ
วิญฺญาณกฺขนฺโธ   อิเม   ธมฺมา   โลกิยา  ฯ  กตเม  ธมฺมา  โลกุตฺตรา
อปริยาปนฺนา   มคฺคา   จ   มคฺคผลานิ   จ  อสงฺขตา  จ  ธาตุ  อิเม
ธมฺมา โลกุตฺตรา ฯ
     [๗๐๗]   กตเม   ธมฺมา  เกนจิวิญฺเญยฺยา  เกนจินวิญฺเญยฺยา  เย
เต   ธมฺมา   จกฺขุวิญฺเญยฺยา  น  เต  ธมฺมา  โสตวิญฺเญยฺยา  เย  วา
ปน   เต   ธมฺมา  โสตวิญฺเญยฺยา  น  เต  ธมฺมา  จกฺขุวิญฺเญยฺยา  เย
เต   ธมฺมา   จกฺขุวิญฺเญยฺยา   น   เต   ธมฺมา   ฆานวิญฺเญยฺยา  เย
วา   ปน   เต  ธมฺมา  ฆานวิญฺเญยฺยา  น  เต  ธมฺมา  จกฺขุวิญฺเญยฺยา
เย   เต  ธมฺมา  จกฺขุวิญฺเญยฺยา  น  เต  ธมฺมา  ชิวฺหาวิญฺเญยฺยา  เย
วา   ปน  เต  ธมฺมา  ชิวฺหาวิญฺเญยฺยา  น  เต  ธมฺมา  จกฺขุวิญฺเญยฺยา
เย   เต   ธมฺมา  จกฺขุวิญฺเญยฺยา  น  เต  ธมฺมา  กายวิญฺเญยฺยา  เย
วา ปน เต ธมฺมา กายวิญฺเญยฺยา น เต ธมฺมา จกฺขุวิญฺเญยฺยา
     {๗๐๗.๑}   เย เต ธมฺมา โสตวิญฺเญยฺยา น เต ธมฺมา ฆานวิญฺเญยฺยา
เย  วา  ปน  เต  ธมฺมา  ฆานวิญฺเญยฺยา  น  เต ธมฺมา โสตวิญฺเญยฺยา
เย   เต  ธมฺมา  โสตวิญฺเญยฺยา  น  เต  ธมฺมา  ชิวฺหาวิญฺเญยฺยา  เย
วา   ปน  เต  ธมฺมา  ชิวฺหาวิญฺเญยฺยา  น  เต  ธมฺมา  โสตวิญฺเญยฺยา
เย   เต   ธมฺมา  โสตวิญฺเญยฺยา  น  เต  ธมฺมา  กายวิญฺเญยฺยา  เย
วา   ปน   เต  ธมฺมา  กายวิญฺเญยฺยา  น  เต  ธมฺมา  โสตวิญฺเญยฺยา
เย   เต   ธมฺมา  โสตวิญฺเญยฺยา  น  เต  ธมฺมา  จกฺขุวิญฺเญยฺยา  เย
วา ปน เต ธมฺมา จกฺขุวิญฺเญยฺยา น เต ธมฺมา โสตวิญฺเญยฺยา
     {๗๐๗.๒}   เย เต ธมฺมา ฆานวิญฺเญยฺยา น เต ธมฺมา ชิวฺหาวิญฺเญยฺยา
เย  วา  ปน  เต  ธมฺมา  ชิวฺหาวิญฺเญยฺยา  น เต ธมฺมา ฆานวิญฺเญยฺยา
เย   เต   ธมฺมา  ฆานวิญฺเญยฺยา  น  เต  ธมฺมา  กายวิญฺเญยฺยา  เย
วา   ปน   เต  ธมฺมา  กายวิญฺเญยฺยา  น  เต  ธมฺมา  ฆานวิญฺเญยฺยา
เย   เต   ธมฺมา  ฆานวิญฺเญยฺยา  น  เต  ธมฺมา  จกฺขุวิญฺเญยฺยา  เย
วา ปน เต ธมฺมา จกฺขุวิญฺเญยฺยา น เต ธมฺมา ฆานวิญฺเญยฺยา
     {๗๐๗.๓}   เย เต ธมฺมา ฆานวิญฺเญยฺยา น เต ธมฺมา โสตวิญฺเญยฺยา
เย  วา  ปน  เต  ธมฺมา  โสตวิญฺเญยฺยา  น  เต ธมฺมา ฆานวิญฺเญยฺยา
เย   เต  ธมฺมา  ชิวฺหาวิญฺเญยฺยา  น  เต  ธมฺมา  กายวิญฺเญยฺยา  เย
วา   ปน  เต  ธมฺมา  กายวิญฺเญยฺยา  น  เต  ธมฺมา  ชิวฺหาวิญฺเญยฺยา
เย   เต  ธมฺมา  ชิวฺหาวิญฺเญยฺยา  น  เต  ธมฺมา  จกฺขุวิญฺเญยฺยา  เย
วา   ปน  เต  ธมฺมา  จกฺขุวิญฺเญยฺยา  น  เต  ธมฺมา  ชิวฺหาวิญฺเญยฺยา
เย   เต  ธมฺมา  ชิวฺหาวิญฺเญยฺยา  น  เต  ธมฺมา  โสตวิญฺเญยฺยา  เย
วา   ปน  เต  ธมฺมา  โสตวิญฺเญยฺยา  น  เต  ธมฺมา  ชิวฺหาวิญฺเญยฺยา
เย เต ธมฺมา ชิวฺหาวิญฺเญยฺยา น เต ธมฺมา ฆานวิญฺเญยฺยา
     {๗๐๗.๔}   เย  วา  ปน  เต  ธมฺมา ฆานวิญฺเญยฺยา น เต ธมฺมา
ชิวฺหาวิญฺเญยฺยา   เย   เต   ธมฺมา   กายวิญฺเญยฺยา   น  เต  ธมฺมา
จกฺขุวิญฺเญยฺยา  เย  วา  ปน  เต  ธมฺมา  จกฺขุวิญฺเญยฺยา  น เต ธมฺมา
กายวิญฺเญยฺยา   เย   เต   ธมฺมา   กายวิญฺเญยฺยา   น   เต  ธมฺมา
โสตวิญฺเญยฺยา  เย  วา  ปน  เต  ธมฺมา  โสตวิญฺเญยฺยา  น เต ธมฺมา
กายวิญฺเญยฺยา   เย   เต   ธมฺมา   กายวิญฺเญยฺยา   น   เต  ธมฺมา
ฆานวิญฺเญยฺยา  เย  วา  ปน  เต  ธมฺมา  ฆานวิญฺเญยฺยา  น เต ธมฺมา
กายวิญฺเญยฺยา   เย   เต   ธมฺมา   กายวิญฺเญยฺยา   น   เต  ธมฺมา
ชิวฺหาวิญฺเญยฺยา  เย  วา  ปน  เต  ธมฺมา ชิวฺหาวิญฺเญยฺยา น เต ธมฺมา
กายวิญฺเญยฺยา อิเม ธมฺมา เกนจิวิญฺเญยฺยา เกนจินวิญฺเญยฺยา ฯ
     [๗๐๘]   กตเม   ธมฺมา  อาสวา  จตฺตาโร  อาสวา  กามาสโว
ภวาสโว ทิฏฺฐาสโว อวิชฺชาสโว ฯ
     [๗๐๙]   ตตฺถ   กตโม   กามาสโว   โย  กาเมสุ  กามจฺฉนฺโท
กามราโค     กามนนฺที     กามตณฺหา    กามสิเนโห    กามปริฬาโห
กามมุจฺฉา กามชฺโฌสานํ อยํ วุจฺจติ กามาสโว ฯ
     [๗๑๐]   ตตฺถ  กตโม  ภวาสโว  โย  ภเวสุ  ภวจฺฉนฺโท ภวราโค
ภวนนฺที      ภวตณฺหา      ภวสิเนโห      ภวปริฬาโห     ภวมุจฺฉา
ภวชฺโฌสานํ อยํ วุจฺจติ ภวาสโว ฯ
     [๗๑๑]   ตตฺถ   กตโม   ทิฏฺฐาสโว   สสฺสโต   โลโกติ   วา
อสสฺสโต   โลโกติ  วา  อนฺตวา  โลโกติ  วา  อนนฺตวา  โลโกติ  วา
ตํ   ชีวํ   ตํ   สรีรนฺติ   วา   อญฺญํ   ชีวํ  อญฺญํ  สรีรนฺติ  วา  โหติ
ตถาคโต   ปรมฺมรณาติ   วา   น   โหติ   ตถาคโต  ปรมฺมรณาติ  วา
โหติ   จ   น   จ   โหติ   ตถาคโต   ปรมฺมรณาติ  วา  เนว  โหติ
น   น   โหติ   ตถาคโต   ปรมฺมรณาติ   วา   ยา   เอวรูปา  ทิฏฺฐิ
ทิฏฺฐิคตํ    ทิฏฺฐิคหนํ    ทิฏฺฐิกนฺตาโร   ทิฏฺฐิวิสูกายิกํ   ทิฏฺฐิวิปฺผนฺทิตํ
ทิฏฺฐิสญฺโญชนํ   คาโห   ปฏิคฺคาโห   อภินิเวโส   ปรามาโส   กุมฺมคฺโค
มิจฺฉาปโถ      มิจฺฉตฺตํ      ติตฺถายตนํ      วิปริเยสคฺคาโห     อยํ
วุจฺจติ ทิฏฺฐาสโว ฯ สพฺพาปิ มิจฺฉาทิฏฺฐิ ทิฏฺฐาสโว ฯ
     [๗๑๒]   ตตฺถ  กตโม  อวิชฺชาสโว  ทุกฺเข  อญฺญาณํ  ทุกฺขสมุทเย
อญฺญาณํ     ทุกฺขนิโรเธ     อญฺญาณํ    ทุกฺขนิโรธคามินิยา    ปฏิปทาย
อญฺญาณํ    ปุพฺพนฺเต    อญฺญาณํ   อปรนฺเต   อญฺญาณํ   ปุพฺพนฺตาปรนฺเต
อญฺญาณํ       อิทปฺปจฺจยตาปฏิจฺจสมุปฺปนฺเนสุ      ธมฺเมสุ      อญฺญาณํ
ยํ     เอวรูปํ     อญฺญาณํ     อทสฺสนํ     อนภิสมโย     อนนุโพโธ
อสมฺโพโธ    อปฺปฏิเวโธ   อสงฺคาหนา   อปริโยคาหนา   อสมเปกฺขนา
อปฺปจฺจเวกฺขณา     อปฺปจฺจกฺขกมฺมํ    ทุมฺเมชฺฌํ    พาลฺยํ    อสมฺปชญฺญํ
โมโห    ปโมโห    สมฺโมโห    อวิชฺชา    อวิชฺโชโฆ   อวิชฺชาโยโค
อวิชฺชานุสโย    อวิชฺชาปริยุฏฺฐานํ    อวิชฺชาลงฺคี    โมโห    อกุสลมูลํ
อยํ วุจฺจติ อวิชฺชาสโว ฯ
                                     อิเม ธมฺมา อาสวา ฯ
     [๗๑๓]   กตเม  ธมฺมา  โนอาสวา  เต  ธมฺเม ฐเปตฺวา อวเสสา
กุสลากุสลาพฺยากตา    ธมฺมา    กามาวจรา   รูปาวจรา   อรูปาวจรา
อปริยาปนฺนา     เวทนากฺขนฺโธ    ฯเปฯ    วิญฺญาณกฺขนฺโธ    สพฺพญฺจ
รูปํ อสงฺขตา จ ธาตุ อิเม ธมฺมา โนอาสวา ฯ
     [๗๑๔]   กตเม   ธมฺมา   สาสวา  สาสวา  กุสลากุสลาพฺยากตา
ธมฺมา    กามาวจรา    รูปาวจรา   อรูปาวจรา   รูปกฺขนฺโธ   ฯเปฯ
วิญฺญาณกฺขนฺโธ   อิเม   ธมฺมา   สาสวา   ฯ  กตเม  ธมฺมา  อนาสวา
อปริยาปนฺนา   มคฺคา   จ   มคฺคผลานิ   จ  อสงฺขตา  จ  ธาตุ  อิเม
ธมฺมา อนาสวา ฯ
     [๗๑๕]   กตเม   ธมฺมา   อาสวสมฺปยุตฺตา   เตหิ  ธมฺเมหิ  เย
ธมฺมา    สมฺปยุตฺตา    เวทนากฺขนฺโธ   ฯเปฯ   วิญฺญาณกฺขนฺโธ   อิเม
ธมฺมา   อาสวสมฺปยุตฺตา   ฯ   กตเม   ธมฺมา   อาสววิปฺปยุตฺตา  เตหิ
ธมฺเมหิ   เย  ธมฺมา  วิปฺปยุตฺตา  เวทนากฺขนฺโธ  ฯเปฯ  วิญฺญาณกฺขนฺโธ
สพฺพญฺจ รูปํ อสงฺขตา จ ธาตุ อิเม ธมฺมา อาสววิปฺปยุตฺตา ฯ
     [๗๑๖]   กตเม   ธมฺมา   อาสวาเจวสาสวาจ  เตเยว  อาสวา
อาสวาเจวสาสวาจ    ฯ    กตเม    ธมฺมา    สาสวาเจวโนจอาสวา
เตหิ   ธมฺเมหิ   เย  ธมฺมา  สาสวา  เต  ธมฺเม  ฐเปตฺวา  อวเสสา
สาสวา  กุสลากุสลาพฺยากตา  ธมฺมา  กามาวจรา  รูปาวจรา อรูปาวจรา
รูปกฺขนฺโธ ฯเปฯ วิญฺญาณกฺขนฺโธ อิเม ธมฺมา สาสวาเจวโนจอาสวา ฯ
     [๗๑๗]   กตเม   ธมฺมา  อาสวาเจวอาสวสมฺปยุตฺตาจ  กามาสโว
อวิชฺชาสเวน         อาสโวเจวอาสวสมฺปยุตฺโตจ         อวิชฺชาสโว
กามาสเวน    อาสโวเจวอาสวสมฺปยุตฺโตจ    ภวาสโว    อวิชฺชาสเวน
อาสโวเจวอาสวสมฺปยุตฺโตจ          อวิชฺชาสโว          ภวาสเวน
อาสโวเจวอาสวสมฺปยุตฺโตจ          ทิฏฺฐาสโว         อวิชฺชาสเวน
อาสโวเจวอาสวสมฺปยุตฺโตจ     อวิชฺชาสโว    ทิฏฺฐาสเวน    อาสโว-
เจวอาสวสมฺปยุตฺโตจ   อิเม   ธมฺมา   อาสวาเจวอาสวสมฺปยุตฺตาจ  ฯ
กตเม        ธมฺมา       อาสวสมฺปยุตฺตาเจวโนจอาสวา       เตหิ
ธมฺเมหิ   เย  ธมฺมา  สมฺปยุตฺตา  เต  ธมฺเม  ฐเปตฺวา  เวทนากฺขนฺโธ
ฯเปฯ วิญฺญาณกฺขนฺโธ อิเม ธมฺมา อาสวสมฺปยุตฺตาเจวโนจอาสวา ฯ
     [๗๑๘]   กตเม  ธมฺมา  อาสววิปฺปยุตฺตา  สาสวา  เตหิ  ธมฺเมหิ
เย  ธมฺมา  วิปฺปยุตฺตา  สาสวา  กุสลากุสลาพฺยากตา  ธมฺมา กามาวจรา
รูปาวจรา    อรูปาวจรา   รูปกฺขนฺโธ   ฯเปฯ   วิญฺญาณกฺขนฺโธ   อิเม
ธมฺมา   อาสววิปฺปยุตฺตา   สาสวา   ฯ  กตเม  ธมฺมา  อาสววิปฺปยุตฺตา
อนาสวา   อปริยาปนฺนา   มคฺคา   จ   มคฺคผลานิ   จ   อสงฺขตา  จ
ธาตุ อิเม ธมฺมา อาสววิปฺปยุตฺตา อนาสวา ฯ
                                          ------------
     [๗๑๙]   กตเม  ธมฺมา สญฺโญชนา ทส สญฺโญชนานิ กามราคสญฺโญชนํ
ปฏิฆสญฺโญชนํ      มานสญฺโญชนํ     ทิฏฺฐิสญฺโญชนํ     วิจิกิจฺฉาสญฺโญชนํ
สีลพฺพตปรามาสสญฺโญชนํ         ภวราคสญฺโญชนํ        อิสฺสาสญฺโญชนํ
มจฺฉริยสญฺโญชนํ อวิชฺชาสญฺโญชนํ ฯ
     [๗๒๐]   ตตฺถ  กตมํ  กามราคสญฺโญชนํ  โย  กาเมสุ  กามจฺฉนฺโท
กามราโค   กามนนฺที  กามตณฺหา  กามสิเนโห  กามปริฬาโห  กามมุจฺฉา
กามชฺโฌสานํ อิทํ วุจฺจติ กามราคสญฺโญชนํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๔ หน้าที่ ๒๗๔-๒๘๔.
https://84000.org/tipitaka/read/pali_item.php?book=34&item=692&items=29
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=34&item=692&items=29&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=34&item=692&items=29
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=34&item=692&items=29
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=34&i=692
             สารบัญพระไตรปิฎกเล่มที่ ๓๔
https://84000.org/tipitaka/read/?index_34
https://84000.org/tipitaka/english/?index_34