[๙] นีวรณา ธมฺมา โนนีวรณา ธมฺมา นีวรณิยา ธมฺมา
อนีวรณิยา ธมฺมา นีวรณสมฺปยุตฺตา ธมฺมา นีวรณวิปฺปยุตฺตา ธมฺมา
นีวรณาเจว ธมฺมา นีวรณิยาจ นีวรณิยาเจว ธมฺมา โนจนีวรณา
นีวรณาเจว ธมฺมา นีวรณสมฺปยุตฺตาจ นีวรณสมฺปยุตฺตาเจว ธมฺมา
โนจนีวรณา นีวรณวิปฺปยุตฺตา โข ปน ธมฺมา นีวรณิยาปิ
อนีวรณิยาปิ ฯ
นีวรณโคจฺฉกํ ฯ
[๑๐] ปรามาสา ธมฺมา โนปรามาสา ธมฺมา ปรามฏฺฐา ธมฺมา
อปรามฏฺฐา ธมฺมา ปรามาสสมฺปยุตฺตา ธมฺมา ปรามาสวิปฺปยุตฺตา
ธมฺมา ปรามาสาเจว ธมฺมา ปรามฏฺฐาจ ปรามฏฺฐาเจว ธมฺมา
โนจปรามาสา ปรามาสวิปฺปยุตฺตา โข ปน ธมฺมา ปรามฏฺฐาปิ
อปรามฏฺฐาปิ ฯ
ปรามาสโคจฺฉกํ ฯ
[๑๑] สารมฺมณา ธมฺมา อนารมฺมณา ธมฺมา จิตฺตา ธมฺมา
โนจิตฺตา ธมฺมา เจตสิกา ธมฺมา อเจตสิกา ธมฺมา จิตฺตสมฺปยุตฺตา
ธมฺมา จิตฺตวิปฺปยุตฺตา ธมฺมา จิตฺตสํสฏฺฐา ธมฺมา จิตฺตวิสํสฏฺฐา
ธมฺมา จิตฺตสมุฏฺฐานา ธมฺมา โนจิตฺตสมุฏฺฐานา ธมฺมา จิตฺตสหภุโน
ธมฺมา โนจิตฺตสหภุโน ธมฺมา จิตฺตานุปริวตฺติโน ธมฺมา
โนจิตฺตานุปริวตฺติโน ธมฺมา จิตฺตสํสฏฺฐสมุฏฺฐานา ธมฺมา
โนจิตฺตสํสฏฺฐสมุฏฺฐานา ธมฺมา จิตฺตสํสฏฺฐสมุฏฺฐานสหภุโน ธมฺมา
โนจิตฺตสํสฏฺฐสมุฏฺฐานสหภุโน ธมฺมา จิตฺตสํสฏฺฐสมุฏฺฐานานุปริวตฺติโน
ธมฺมา โนจิตฺตสํสฏฺฐสมุฏฺฐานานุปริวตฺติโน ธมฺมา อชฺฌตฺติกา
ธมฺมา พาหิรา ธมฺมา อุปาทา ธมฺมา โนอุปาทา ธมฺมา
อุปาทินฺนา ธมฺมา อนุปาทินฺนา ธมฺมา ฯ
มหนฺตรทุกํ ฯ
[๑๒] อุปาทานา ธมฺมา โนอุปาทานา ธมฺมา อุปาทานิยา ธมฺมา
อนุปาทานิยา ธมฺมา อุปาทานสมฺปยุตฺตา ธมฺมา อุปาทานวิปฺปยุตฺตา
ธมฺมา อุปาทานเจว ธมฺมา อุปาทานิยาจ อุปาทานิยาเจว ธมฺมา
โนจอุปาทานา อุปาทานาเจว ธมฺมา อุปาทานสมฺปยุตฺตาจ
อุปาทานสมฺปยุตฺตาเจว ธมฺมา โนจอุปาทานา อุปาทานวิปฺปยุตฺตา
โข ปน ธมฺมา อุปาทานิยาปิ อนุปาทานิยาปิ ฯ
อุปาทานโคจฺฉกํ ฯ
[๑๓] กิเลสา ธมฺมา โนกิเลสา ธมฺมา สงฺกิเลสิกา ธมฺมา
อสงฺกิเลสิกา ธมฺมา สงฺกิลิฏฺฐา ธมฺมา อสงฺกิลิฏฺฐา ธมฺมา
กิเลสสมฺปยุตฺตา ธมฺมา กิเลสวิปฺปยุตฺตา ธมฺมา กิเลสาเจว ธมฺมา
สงฺกิเลสิกาจ สงฺกิเลสิกาเจว ธมฺมา โนจกิเลสา กิเลสาเจว ธมฺมา
สงฺกิลิฏฺฐาจ สงฺกิลิฏฺฐาเจว ธมฺมา โนจกิเลสา กิเลสาเจว ธมฺมา
กิเลสสมฺปยุตฺตาจ กิเลสสมฺปยุตฺตาเจว ธมฺมา โนจกิเลสา กิเลสวิปฺปยุตฺตา
โข ปน ธมฺมา สงฺกิเลสิกาปิ อสงฺกิเลสิกาปิ ฯ
กิเลสโคจฺฉกํ ฯ
[๑๔] ทสฺสเนนปหาตพฺพา ธมฺมา นทสฺสเนนปหาตพฺพา ธมฺมา
ภาวนายปหาตพฺพา ธมฺมา นภาวนายปหาตพฺพา ธมฺมา ทสฺสเนน-
ปหาตพฺพเหตุกา ธมฺมา นทสฺสเนนปหาตพฺพเหตุกา ธมฺมา
ภาวนายปหาตพฺพเหตุกา ธมฺมา นภาวนายปหาตพฺพเหตุกา ธมฺมา
สวิตกฺกา ธมฺมา อวิตกฺกา ธมฺมา สวิจารา ธมฺมา อวิจารา ธมฺมา
สปฺปีติกา ธมฺมา อปฺปีติกา ธมฺมา ปีติสหคตา ธมฺมา นปีติสหคตา
ธมฺมา สุขสหคตา ธมฺมา นสุขสหคตา ธมฺมา อุเปกฺขาสหคตา
ธมฺมา นอุเปกฺขาสหคตา ธมฺมา กามาวจรา ธมฺมา นกามาวจรา
ธมฺมา รูปาวจรา ธมฺมา นรูปาวจรา ธมฺมา อรูปาวจรา ธมฺมา
นอรูปาวจรา ธมฺมา ปริยาปนฺนา ธมฺมา อปริยาปนฺนา ธมฺมา
นิยฺยานิกา ธมฺมา อนิยฺยานิกา ธมฺมา นิยตา ธมฺมา อนิยตา ธมฺมา
สอุตฺตรา ธมฺมา อนุตฺตรา ธมฺมา สรณา ธมฺมา อรณา ธมฺมา ฯ
ปิฏฺฐิทุกํ ฯ
อภิธมฺมมาติกา ฯ
[๑๕] วิชฺชาภาคิโน ธมฺมา อวิชฺชาภาคิโน ธมฺมา วิชฺชูปมา
ธมฺมา วชิรูปมา ธมฺมา พาลา ธมฺมา ปณฺฑิตา ธมฺมา กณฺหา
ธมฺมา สุกฺกา ธมฺมา ตปนิยา ธมฺมา อตปนิยา ธมฺมา อธิวจนา
ธมฺมา อธิวจนปถา ธมฺมา นิรุตฺติ ธมฺมา นิรุตฺติปถา ธมฺมา
ปญฺญตฺติ ธมฺมา ปญฺญตฺติปถา ธมฺมา นามญฺจ รูปญฺจ อวิชฺชา จ
ภวตณฺหา จ ภวทิฏฺฐิ จ วิภวทิฏฺฐิ จ สสฺสตทิฏฺฐิ จ อุจฺเฉททิฏฺฐิ จ
อนฺตวาทิฏฺฐิ จ อนนฺตวาทิฏฺฐิ จ ปุพฺพนฺตานุทิฏฺฐิ จ
อปรนฺตานุทิฏฺฐิ จ อหิริกญฺจ อโนตฺตปฺปญฺจ หิริ จ โอตฺตปฺปญฺจ
โทวจสฺสตา จ ปาปมิตฺตตา จ โสวจสฺสตา จ กลฺยาณมิตฺตตา จ
อาปตฺติกุสลตา จ อาปตฺติวุฏฺฐานกุสลตา จ สมาปตฺติกุสลตา จ
สมาปตฺติวุฏฺฐานกุสลตา จ ธาตุกุสลตา จ มนสิการกุสลตา
จ อายตนกุสลตา จ ปฏิจฺจสมุปฺปาทกุสลตา จ ฐานกุสลตา
จ อฏฺฐานกุสลตา จ อาชฺชโว จ มทฺทโว จ ขนฺติ จ
โสรจฺจญฺจ สาขลฺยญฺจ ปฏิสนฺถาโร จ อินฺทฺริเยสุอคุตฺตทฺวารตา จ
โภชเน อมตฺตญฺญุตา จ อินฺทฺริเยสุ คุตฺตทฺวารตา จ โภชเน
มตฺตญฺญุตา จ มุฏฺฐสจฺจญฺจ อสมฺปชญฺญญฺจ สติ จ สมฺปชญฺญญฺจ
ปฏิสงฺขานพลญฺจ ภาวนาพลญฺจ สมโถ จ วิปสฺสนา จ
สมถนิมิตฺตญฺจ ปคฺคาหนิมิตฺตญฺจ ปคฺคาโหจ อวิกฺเขโปจ
สีลวิปตฺติ จ ทิฏฺฐิวิปตฺติ จ สีลสมฺปทา จ ทิฏฺฐิสมฺปทา จ สีลวิสุทฺธิ จ
ทิฏฺฐิวิสุทฺธิ จ ทิฏฺฐิวิสุทฺธิ โข ปน ยถาทิฏฺฐิสฺส จ ปธานํ
สํเวโค จ สํเวชนิเยสุ ฐาเนสุ สํวิคฺคสฺส จ โยนิโส ปธานํ อสนฺตุฏฺฐตา
จ กุสเลสุ ธมฺเมสุ อปฺปฏิวานิตา จ ปธานสฺมึ วิชฺชา จ วิมุตฺติ จ
ขเย ญาณํ อนุปฺปาเท ญาณนฺติ ฯ
สุตฺตนฺตมาติกา ฯ
มาติกา นิฏฺฐิตา
-------
จิตฺตุปฺปาทกณฺฑํ
ปทภาชนียํ
[๑๖] กตเม ธมฺมา กุสลา ยสฺมึ สมเย กามาวจรํ กุสลํ
จิตฺตํ อุปฺปนฺนํ โหติ โสมนสฺสสหคตํ ญาณสมฺปยุตฺตํ รูปารมฺมณํ
วา สทฺทารมฺมณํ วา คนฺธารมฺมณํ วา รสารมฺมณํ วา โผฏฺฐพฺพารมฺมณํ
วา ธมฺมารมฺมณํ วา ยํ ยํ วา ปนารพฺภ ตสฺมึ สมเย
ผสฺโส โหติ เวทนา โหติ สญฺญา โหติ เจตนา โหติ จิตฺตํ โหติ
วิตกฺโก โหติ วิจาโร โหติ ปีติ โหติ สุขํ โหติ จิตฺตสฺเสกคฺคตา
โหติ สทฺธินฺทฺริยํ โหติ วิริยินฺทฺริยํ โหติ สตินฺทฺริยํ โหติ สมาธินฺทฺริยํ
โหติ ปญฺญินฺทฺริยํ โหติ มนินฺทฺริยํ โหติ โสมนสฺสินฺทฺริยํ โหติ
ชีวิตินฺทฺริยํ โหติ สมฺมาทิฏฺฐิ โหติ สมฺมาสงฺกปฺโป โหติ สมฺมาวายาโม
โหติ สมฺมาสติ โหติ สมฺมาสมาธิ โหติ สทฺธาพลํ โหติ
วิริยพลํ โหติ สติพลํ โหติ สมาธิพลํ โหติ ปญฺญาพลํ โหติ
หิรีพลํ โหติ โอตฺตปฺปพลํ โหติ อโลโภ โหติ อโทโส โหติ
อโมโห โหติ อนภิชฺฌา โหติ อพฺยาปาโท โหติ สมฺมาทิฏฺฐิ
โหติ หิรี โหติ โอตฺตปฺปํ โหติ กายปฺปสฺสทฺธิ โหติ จิตฺตปฺปสฺสทฺธิ
โหติ กายลหุตา โหติ จิตฺตลหุตา โหติ กายมุทุตา โหติ
จิตฺตมุทุตา โหติ กายกมฺมญฺญตา โหติ จิตฺตกมฺมญฺญตา โหติ
กายปาคุญฺญตา โหติ จิตฺตปาคุญฺญตา โหติ กายุชุกตา โหติ
จิตฺตุชุกตา โหติ สติ โหติ สมฺปชญฺญํ โหติ สมโถ โหติ
วิปสฺสนา โหติ ปคฺคาโห โหติ อวิกฺเขโป โหติ เย วา ปน
ตสฺมึ สมเย อญฺเญปิ อตฺถิ ปฏิจฺจสมุปฺปนฺนา อรูปิโน ธมฺมา
อิเม ธมฺมา กุสลา ฯ
เนื้อความพระไตรปิฎกฉบับภาษาบาลีอักษรไทย เล่มที่ ๓๔ หน้าที่ ๔-๑๐.
https://84000.org/tipitaka/read/pali_item.php?book=34&item=9&items=8
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=34&item=9&items=8&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=34&item=9&items=8
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=34&item=9&items=8
ศึกษาอรรถกถานี้ได้ที่ :-
https://84000.org/tipitaka/attha/attha.php?b=34&i=9
สารบัญพระไตรปิฎกเล่มที่ ๓๔
https://84000.org/tipitaka/read/?index_34
https://84000.org/tipitaka/english/?index_34
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
