พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

     [๙๖๑]   ตตฺถ   กตเม  จตฺตาโร  อาสวา  กามาสโว  ภวาสโว
ทิฏฺฐาสโว   อวิชฺชาสโว   ฯ   ตตฺถ   กตโม  กามาสโว  โย  กาเมสุ
กามจฺฉนฺโท    ฯเปฯ    กามชฺโฌสานํ   อยํ   วุจฺจติ   กามาสโว   ฯ
ตตฺถ   กตโม   ภวาสโว   โย  ภเวสุ  ภวจฺฉนฺโท  ฯเปฯ  ภวชฺโฌสานํ
อยํ   วุจฺจติ   ภวาสโว  ฯ  ตตฺถ  กตโม  ทิฏฺฐาสโว  สสฺสโต  โลโกติ
วา   ฯเปฯ   เนว   โหติ   น  น  โหติ  ตถาคโต  ปรมฺมรณาติ  วา
ยา   เอวรูปา   ทิฏฺฐิ   ทิฏฺฐิคตํ   ฯเปฯ  วิปริเยสคฺคาโห  อยํ  วุจฺจติ
ทิฏฺฐาสโว    สพฺพาปิ    มิจฺฉาทิฏฺฐิ    ทิฏฺฐาสโว   ฯ   ตตฺถ   กตโม
อวิชฺชาสโว   ทุกฺเข   อญฺญาณํ   ฯเปฯ   อวิชฺชาลงฺคี  โมโห  อกุสลมูลํ
อยํ วุจฺจติ อวิชฺชาสโว ฯ อิเม จตฺตาโร อาสวา ฯ
     [๙๖๒]   ตตฺถ   กตเม   จตฺตาโร   คนฺถา  อภิชฺฌา  กายคนฺโถ
พฺยาปาโท   กายคนฺโถ   สีลพฺพตปรามาโส  กายคนฺโถ  อิทํสจฺจาภินิเวโส
กายคนฺโถ    ฯ   ตตฺถ   กตโม   อภิชฺฌา   กายคนฺโถ   โย   ราโค
สาราโค   ฯเปฯ   อภิชฺฌา   โลโภ   อกุสลมูลํ   อยํ  วุจฺจติ  อภิชฺฌา
กายคนฺโถ   ฯ   ตตฺถ   กตโม   พฺยาปาโท   กายคนฺโถ   อนตฺถํ  เม
อจรีติ    ฯเปฯ    จณฺฑิกฺกํ   อสฺสุโรโป   อนตฺตมนตา   จิตฺตสฺส   อยํ
วุจฺจติ   พฺยาปาโท   กายคนฺโถ   ฯ   ตตฺถ   กตโม  สีลพฺพตปรามาโส
กายคนฺโถ   อิโต   พหิทฺธา   สมณพฺราหฺมณานํ   สีเลน   สุทฺธิ   วเตน
สุทฺธิ   สีลพฺพเตน   สุทฺธีติ   ยา   เอวรูปา   ทิฏฺฐิ   ทิฏฺฐิคตํ   ฯเปฯ
วิปริเยสคฺคาโห   อยํ   วุจฺจติ   สีลพฺพตปรามาโส  กายคนฺโถ  ฯ  ตตฺถ
กตโม   อิทํสจฺจาภินิเวโส   กายคนฺโถ   สสฺสโต  โลโก  อิทเมว  สจฺจํ
โมฆมญฺญนฺติ    วา   อสสฺสโต   โลโก   อิทเมว   สจฺจํ   โมฆมญฺญนฺติ
วา   ฯเปฯ   เนว  โหติ  น  น  โหติ  ตถาคโต  ปรมฺมรณา  อิทเมว
สจฺจํ    โมฆมญฺญนฺติ   วา   ยา   เอวรูปา   ทิฏฺฐิ   ทิฏฺฐิคตํ   ฯเปฯ
วิปริเยสคฺคาโห    อยํ    วุจฺจติ    อิทํสจฺจาภินิเวโส   กายคนฺโถ   ฯ
ฐเปตฺวา     สีลพฺพตปรามาสํ     กายคนฺถํ     สพฺพาปิ     มิจฺฉาทิฏฺฐิ
อิทํสจฺจาภินิเวโส กายคนฺโถ ฯ อิเม จตฺตาโร คนฺถา ฯ
     [๙๖๓]   ตตฺถ  กตเม  จตฺตาโร โอฆา ฯเปฯ โยคา ฯเปฯ จตฺตาริ
อุปาทานานิ       กามุปาทานํ       ทิฏฺฐุปาทานํ       สีลพฺพตุปาทานํ
อตฺตวาทุปาทานํ    ฯ    ตตฺถ    กตมํ    กามุปาทานํ   โย   กาเมสุ
กามจฺฉนฺโท   ฯเปฯ   กามชฺโฌสานํ  อิทํ  วุจฺจติ  กามุปาทานํ  ฯ  ตตฺถ
กตมํ   ทิฏฺฐุปาทานํ   นตฺถิ   ทินฺนํ   นตฺถิ   ยิฏฺฐํ   ฯเปฯ  เย  อิมญฺจ
โลกํ   ปรญฺจ   โลกํ   สยํ   อภิญฺญา   สจฺฉิกตฺวา   ปเวเทนฺตีติ   ยา
เอวรูปา    ทิฏฺฐิ    ทิฏฺฐิคตํ   ฯเปฯ   วิปริเยสคฺคาโห   อิทํ   วุจฺจติ
ทิฏฺฐุปาทานํ    ฯ    ฐเปตฺวา    สีลพฺพตุปาทานญฺจ   อตฺตวาทุปาทานญฺจ
สพฺพาปิ มิจฺฉาทิฏฺฐิ ทิฏฺฐุปาทานํ ฯ
     {๙๖๓.๑}   ตตฺถ    กตมํ    สีลพฺพตุปาทานํ    อิโต   พหิทฺธา
สมณพฺราหฺมณานํ     สีเลน     สุทฺธิ     วเตน    สุทฺธิ    สีลพฺพเตน
สุทฺธีติ    ยา    เอวรูปา   ทิฏฺฐิ   ทิฏฺฐิคตํ   ฯเปฯ   วิปริเยสคฺคาโห
อิทํ   วุจฺจติ   สีลพฺพตุปาทานํ   ฯ   ตตฺถ   กตมํ  อตฺตวาทุปาทานํ  อิธ
อสฺสุตวา    ปุถุชฺชโน    อริยานํ    อทสฺสาวี   อริยธมฺมสฺส   อโกวิโท
อริยธมฺเม   อวินีโต   สปฺปุริสานํ   อทสฺสาวี   สปฺปุริสธมฺมสฺส  อโกวิโท
สปฺปุริสธมฺเม    อวินีโต    รูปํ   อตฺตโต   สมนุปสฺสติ   รูปวนฺตํ   วา
อตฺตานํ   อตฺตนิ   วา   รูปํ   รูปสฺมึ   วา   อตฺตานํ   เวทนํ  ฯเปฯ
สญฺญํ    ฯเปฯ    สงฺขาเร    ฯเปฯ   วิญฺญาณํ   อตฺตโต   สมนุปสฺสติ
วิญฺญาณวนฺตํ    วา    อตฺตานํ    อตฺตนิ    วา   วิญฺญาณํ   วิญฺญาณสฺมึ
วา   อตฺตานํ   ยา   เอวรูปา  ทิฏฺฐิ  ทิฏฺฐิคตํ  ฯเปฯ  วิปริเยสคฺคาโห
อิทํ วุจฺจติ อตฺตวาทุปาทานํ อิมานิ จตฺตาริ อุปาทานานิ ฯ
     [๙๖๔]   ตตฺถ   กตเม   จตฺตาโร   ตณฺหุปฺปาทา  จีวรเหตุ  วา
ภิกฺขุโน    ตณฺหา    อุปฺปชฺชมานา    อุปฺปชฺชติ    ปิณฺฑปาตเหตุ    วา
ภิกฺขุโน   ตณฺหา   อุปฺปชฺชมานา   อุปฺปชฺชติ  เสนาสนเหตุ  วา  ภิกฺขุโน
ตณฺหา    อุปฺปชฺชมานา    อุปฺปชฺชติ    อิติภวาภวเหตุ    วา   ภิกฺขุโน
ตณฺหา อุปฺปชฺชมานา อุปฺปชฺชติ อิเม จตฺตาโร ตณฺหุปฺปาทา ฯ
     [๙๖๕]   ตตฺถ   กตมานิ  จตฺตาริ  อคติคมนานิ  ฉนฺทาคตึ  คจฺฉติ
โทสาคตึ   คจฺฉติ   โมหาคตึ   คจฺฉติ   ภยาคตึ  คจฺฉติ  ยา  เอวรูปา
อคติ    อคติคมนํ   ฉนฺทคมนํ   วคฺคคมนํ   วาริคมนํ   อิมานิ   จตฺตาริ
อคติคมนานิ ฯ
     [๙๖๖]   ตตฺถ   กตเม   จตฺตาโร  วิปริเยสา  อนิจฺเจ  นิจฺจนฺติ
สญฺญาวิปริเยโส    จิตฺตวิปริเยโส    ทิฏฺฐิวิปริเยโส    ทุกฺเข    สุขนฺติ
สญฺญาวิปริเยโส    จิตฺตวิปริเยโส    ทิฏฺฐิวิปริเยโส   อนตฺตนิ   อตฺตาติ
สญฺญาวิปริเยโส    จิตฺตวิปริเยโส    ทิฏฺฐิวิปริเยโส    อสุเภ    สุภนฺติ
สญฺญาวิปริเยโส    จิตฺตวิปริเยโส    ทิฏฺฐิวิปริเยโส    อิเม   จตฺตาโร
วิปริเยสา ฯ
     [๙๖๗]   ตตฺถ  กตเม  จตฺตาโร อนริยโวหารา อทิฏฺเฐ ทิฏฺฐวาทิตา
อสุเต   สุตวาทิตา  อมุเต  มุตวาทิตา  อวิญฺญาเต  วิญฺญาตวาทิตา  อิเม
จตฺตาโร อนริยโวหารา ฯ
     [๙๖๘]   ตตฺถ  กตเม  อปเรปิ  จตฺตาโร  อนริยโวหารา  ทิฏฺเฐ
อทิฏฺฐวาทิตา    สุเต    อสุตวาทิตา    มุเต   อมุตวาทิตา   วิญฺญาเต
อวิญฺญาตวาทิตา อิเม จตฺตาโร อนริยโวหารา ฯ
     [๙๖๙]   ตตฺถ   กตมานิ   จตฺตาริ   ทุจฺจริตานิ   ปาณาติปาโต
อทินฺนาทานํ     กาเมสุมิจฺฉาจาโร     มุสาวาโท    อิมานิ    จตฺตาริ
ทุจฺจริตานิ ฯ
     [๙๗๐]   ตตฺถ  กตมานิ  อปรานิปิ  จตฺตาริ  ทุจฺจริตานิ  มุสาวาโท
ปิสุณา    วาจา    ผรุสา    วาจา   สมฺผปฺปลาโป   อิมานิ   จตฺตาริ
ทุจฺจริตานิ ฯ
     [๙๗๑]   ตตฺถ   กตมานิ   จตฺตาริ   ภยานิ   ชาติภยํ   ชราภยํ
พฺยาธิภยํ มรณภยํ อิมานิ จตฺตาริ ภยานิ ฯ
     [๙๗๒]   ตตฺถ   กตมานิ   อปรานิปิ   จตฺตาริ   ภยานิ  ราชภยํ
โจรภยํ อคฺคิภยํ อุทกภยํ อิมานิ จตฺตาริ ภยานิ ฯ
     [๙๗๓]   ตตฺถ   กตมานิ   อปรานิปิ   จตฺตาริ   ภยานิ   อูมิภยํ
กุมฺภิลภยํ อาวฏฺฏภยํ สุสุกาภยํ อิมานิ จตฺตาริ ภยานิ ฯ
     [๙๗๔]   ตตฺถ  กตมานิ  อปรานิปิ  จตฺตาริ  ภยานิ  อตฺตานุวาทภยํ
ปรานุวาทภยํ ทณฺฑภยํ ทุคฺคติภยํ อิมานิ จตฺตาริ ภยานิ ฯ
     [๙๗๕]   ตตฺถ   กตมา   จตสฺโส   ทิฏฺฐิโย   สยํกตํ  สุขทุกฺขนฺติ
สจฺจโต    เถตโต    ทิฏฺฐิ   อุปฺปชฺชติ   ปรกตํ   สุขทุกฺขนฺติ   สจฺจโต
เถตโต   ทิฏฺฐิ   อุปฺปชฺชติ   สยํกตญฺจ   ปรกตญฺจ   สุขทุกฺขนฺติ  สจฺจโต
เถตโต   ทิฏฺฐิ   อุปฺปชฺชติ  อสยํกตํ  อปรกตํ  อธิจฺจสมุปฺปนฺนํ  สุขทุกฺขนฺติ
สจฺจโต เถตโต ทิฏฺฐิ อุปฺปชฺชติ อิมา จตสฺโส ทิฏฺฐิโย ฯ
                                       จตุกฺกํ ฯ
     [๙๗๖]   ตตฺถ    กตมานิ    ปญฺโจรมฺภาคิยานิ    สญฺโญชนานิ
สกฺกายทิฏฺฐิ    วิจิกิจฺฉา    สีลพฺพตปรามาโส   กามจฺฉนฺโท   พฺยาปาโท
อิมานิ ปญฺโจรมฺภาคิยานิ สญฺโญชนานิ ฯ
     [๙๗๗]   ตตฺถ  กตมานิ  ปญฺจุทฺธมฺภาคิยานิ  สญฺโญชนานิ  รูปราโค
อรูปราโค    มาโน    อุทฺธจฺจํ    อวิชฺชา   อิมานิ   ปญฺจุทฺธมฺภาคิยานิ
สญฺโญชนานิ ฯ
     [๙๗๘]   ตตฺถ    กตมานิ   ปญฺจ   มจฺฉริยานิ   อาวาสมจฺฉริยํ
กุลมจฺฉริยํ    ลาภมจฺฉริยํ    วณฺณมจฺฉริยํ   ธมฺมมจฺฉริยํ   อิมานิ   ปญฺจ
มจฺฉริยานิ ฯ
     [๙๗๙]   ตตฺถ   กตเม   ปญฺจ   สงฺคา   ราคสงฺโค  โทสสงฺโค
โมหสงฺโค มานสงฺโค ทิฏฺฐิสงฺโค อิเม ปญฺจ สงฺคา ฯ
     [๙๘๐]   ตตฺถ   กตเม   ปญฺจ   สลฺลา   ราคสลฺลํ   โทสสลฺลํ
โมหสลฺลํ มานสลฺลํ ทิฏฺฐิสลฺลํ อิเม ปญฺจ สลฺลา ฯ
     [๙๘๑]   ตตฺถ  กตเม  ปญฺจ  เจโตขิลา  สตฺถริ  กงฺขติ  วิจิกิจฺฉติ
นาธิมุจฺจติ    น    สมฺปสีทติ   ธมฺเม   กงฺขติ   วิจิกิจฺฉติ   นาธิมุจฺจติ
น   สมฺปสีทติ   สงฺเฆ   กงฺขติ   วิจิกิจฺฉติ   นาธิมุจฺจติ   น  สมฺปสีทติ
สิกฺขาย   กงฺขติ   วิจิกิจฺฉติ   นาธิมุจฺจติ   น   สมฺปสีทติ  สพฺรหฺมจารีสุ
กุปิโต    โหติ    อนตฺตมโน    อาหตจิตฺโต   ขิลชาโต   อิเม   ปญฺจ
เจโตขิลา ฯ
     [๙๘๒]   ตตฺถ  กตเม  ปญฺจ  เจตโส  วินิพนฺธา  กาเม อวีตราโค
โหติ    อวิคตจฺฉนฺโท    อวิคตเปโม    อวิคตปิปาโส    อวิคตปริฬาโห
อวิคตตณฺโห    กาเย   อวีตราโค   โหติ   อวิคตจฺฉนฺโท   อวิคตเปโม
อวิคตปิปาโส   อวิคตปริฬาโห   อวิคตตณฺโห   รูเป   อวีตราโค   โหติ
อวิคตจฺฉนฺโท   อวิคตเปโม   อวิคตปิปาโส   อวิคตปริฬาโห  อวิคตตณฺโห
ยาวทตฺถํ    อุทราวเทหกํ    ภุญฺชิตฺวา    เสยฺยสุขํ   ปสฺสสุขํ   มิทฺธสุขํ
อนุยุตฺโต    วิหรติ   อญฺญตรํ   เทวกายํ   ปณิธาย   พฺรหฺมจริยํ   จรติ
อิมินาหํ  สีเลน  วา  วเตน  วา  ตเปน  วา  พฺรหฺมจริเยน  วา เทโว
วา ภวิสฺสามิ เทวญฺญตโร วาติ อิเม ปญฺจ เจตโส วินิพนฺธา ฯ
     [๙๘๓]   ตตฺถ    กตมานิ   ปญฺจ   นีวรณานิ   กามจฺฉนฺทนีวรณํ
พฺยาปาทนีวรณํ           ถีนมิทฺธนีวรณํ           อุทฺธจฺจกุกฺกุจฺจนีวรณํ
วิจิกิจฺฉานีวรณํ อิมานิ ปญฺจ นีวรณานิ ฯ
     [๙๘๔]   ตตฺถ   กตมานิ   ปญฺจ   กมฺมานิ  อานนฺตริกานิ  มาตา
ชีวิตา  โวโรปิตา  โหติ  ปิตา  ชีวิตา  โวโรปิโต  โหติ  อรหา  ชีวิตา
โวโรปิโต   โหติ   ทุฏฺเฐน   จิตฺเตน   ตถาคตสฺส   โลหิตํ   อุปฺปาทิตํ
โหติ สงฺโฆ ภินฺโน โหติ อิมานิ ปญฺจ กมฺมานิ อานนฺตริกานิ ฯ
     [๙๘๕]   ตตฺถ   กตมา   ปญฺจ   ทิฏฺฐิโย   สญฺญี   อตฺตา  โหติ
อโรโค    ปรมฺมรณาติ   อิตฺเถเก   อภิวทนฺติ   อสญฺญี   อตฺตา   โหติ
อโรโค     ปรมฺมรณาติ     อิตฺเถเก     อภิวทนฺติ    เนวสญฺญีนาสญฺญี
อตฺตา    โหติ    อโรโค   ปรมฺมรณาติ   อิตฺเถเก   อภิวทนฺติ   สโต
วา     ปน     สตฺตสฺส    อุจฺเฉทํ    วินาสํ    วิภวํ    ปญฺญาเปนฺติ
ทิฏฺฐธมฺมนิพฺพานํ วา ปเนเก อภิวทนฺติ อิมา ปญฺจ ทิฏฺฐิโย ฯ
     [๙๘๖]   ตตฺถ   กตเม  ปญฺจ  เวรา  ปาณาติปาโต  อทินฺนาทานํ
กาเมสุ    มิจฺฉาจาโร    มุสาวาโท   สุราเมรยมชฺชปมาทฏฺฐานํ   อิเม
ปญฺจ เวรา ฯ
     [๙๘๗]   ตตฺถ   กตเม   ปญฺจ   พฺยสนา  ญาติพฺยสนํ  โภคพฺยสนํ
โรคพฺยสนํ สีลพฺยสนํ ทิฏฺฐิพฺยสนํ  อิเม ปญฺจ พฺยสนา ฯ
     [๙๘๘]   ตตฺถ   กตเม   ปญฺจ   อกฺขนฺติยา   อาทีนวา   พหุโน
ชนสฺส    อปฺปิโย    โหติ   อมนาโป   เวรพหุโล   โหติ   วชฺชพหุโล
สมฺมูฬฺโห   กาลํ   กโรติ   กายสฺส   เภทา  ปรมฺมรณา  อปายํ  ทุคฺคตึ
วินิปาตํ นิรยํ อุปปชฺชติ อิเม ปญฺจ อกฺขนฺติยา อาทีนวา ฯ
     [๙๘๙]   ตตฺถ   กตมานิ   ปญฺจ   ภยานิ  อาชีวกภยํ  อสิโลกภยํ
ปริสสารชฺชภยํ มรณภยํ ทุคฺคติภยํ อิมานิ ปญฺจ ภยานิ ฯ
     [๙๙๐]   ตตฺถ  กตเม  ปญฺจ  ทิฏฺฐธมฺมนิพฺพานวาทา  ฯ  อิเธกจฺโจ
สมโณ   วา   พฺราหฺมโณ   วา   เอวํวาที  โหติ  เอวํทิฏฺฐิ  ยโต  โข
โภ   อยํ   อตฺตา  ปญฺจหิ  กามคุเณหิ  สมปฺปิโต  สมงฺคิภูโต  ปริจาเรติ
เอตฺตาวตา   โข   โภ  อยํ  อตฺตา  ปรมทิฏฺฐธมฺมนิพฺพานปฺปตฺโต  โหตีติ
อิตฺเถเก    สโต    สตฺตสฺส    ปรมทิฏฺฐธมฺมนิพฺพานํ   ปญฺญาเปนฺติ   ฯ
ตมญฺโญ   เอวมาห   อตฺถิ   โข   โภ  เอโส  อตฺตา  ยํ  ตฺวํ  วเทสิ
เนโส   นตฺถีติ   วทามิ   โน   จ  โข  โภ  อยํ  อตฺตา  เอตฺตาวตา
ปรมทิฏฺฐธมฺมนิพฺพานปฺปตฺโต    โหติ    ตํ    กิสฺส   เหตุ   กามา   หิ
โภ    อนิจฺจา    ทุกฺขา   วิปริณามธมฺมา   เตสํ   วิปริณามญฺญถาภาวา
อุปฺปชฺชนฺติ    โสกปริเทวทุกฺขโทมนสฺสุปายาสา   ยโต   โข   โภ   อยํ
อตฺตา   วิวิจฺเจว   กาเมหิ   ฯเปฯ   ปฐมํ   ฌานํ  อุปสมฺปชฺช  วิหรติ
เอตฺตาวตา   โข   โภ  อยํ  อตฺตา  ปรมทิฏฺฐธมฺมนิพฺพานปฺปตฺโต  โหตีติ
อิตฺเถเก สโต สตฺตสฺส ปรมทิฏฺฐธมฺมนิพฺพานํ ปญฺญาเปนฺติ ฯ
     {๙๙๐.๑}   ตมญฺโญ  เอวมาห  อตฺถิ  โข  โภ เอโส อตฺตา ยํ ตฺวํ
วเทสิ  เนโส  นตฺถีติ  วทามิ  โน  จ  โข  โภ  อยํ อตฺตา เอตฺตาวตา
ปรมทิฏฺฐธมฺมนิพฺพานปฺปตฺโต    โหติ   ตํ   กิสฺส   เหตุ   ยเทว   ตตฺถ
วิตกฺกิตํ   วิจาริตํ   เอเตน  เอตํ  โอฬาริกํ  อกฺขายติ  ยโต  โข  โภ
อยํ   อตฺตา   วิตกฺกวิจารานํ   วูปสมา  ฯเปฯ  ทุติยํ  ฌานํ  อุปสมฺปชฺช
วิหรติ   เอตฺตาวตา   โข  โภ  อยํ  อตฺตา  ปรมทิฏฺฐธมฺมนิพฺพานปฺปตฺโต
โหตีติ   อิตฺเถเก   สโต  สตฺตสฺส  ปรมทิฏฺฐธมฺมนิพฺพานํ  ปญฺญาเปนฺติ  ฯ
ตมญฺโญ   เอวมาห   อตฺถิ   โข   โภ  เอโส  อตฺตา  ยํ  ตฺวํ  วเทสิ
เนโส   นตฺถีติ   วทามิ   โน   จ  โข  โภ  อยํ  อตฺตา  เอตฺตาวตา
ปรมทิฏฺฐธมฺมนิพฺพานปฺปตฺโต    โหติ   ตํ   กิสฺส   เหตุ   ยเทว   ตตฺถ
ปีติคตํ   เจตโส   อุพฺพิลาวิตํ  เอเตน  เอตํ  โอฬาริกํ  อกฺขายติ  ยโต
โข  โภ  อยํ  อตฺตา  ปีติยา  จ  วิราคา  ฯเปฯ  ตติยํ ฌานํ อุปสมฺปชฺช
วิหรติ   เอตฺตาวตา   โข  โภ  อยํ  อตฺตา  ปรมทิฏฺฐธมฺมนิพฺพานปฺปตฺโต
โหตีติ อิตฺเถเก สโต สตฺตสฺส ปรมทิฏฺฐธมฺมนิพฺพานํ ปญฺญาเปนฺติ ฯ
     {๙๙๐.๒}   ตมญฺโญ  เอวมาห  อตฺถิ  โข  โภ เอโส อตฺตา ยํ ตฺวํ
วเทสิ  เนโส  นตฺถีติ  วทามิ  โน  จ  โข  โภ  อยํ อตฺตา เอตฺตาวตา
ปรมทิฏฺฐธมฺมนิพฺพานปฺปตฺโต    โหติ   ตํ   กิสฺส   เหตุ   ยเทว   ตตฺถ
สุขํ   เจตโส  อาโภโค  เอเตน  เอตํ  โอฬาริกํ  อกฺขายติ  ยโต  โข
โภ   อยํ  อตฺตา  สุขสฺส  จ  ปหานา  ฯเปฯ  จตุตฺถํ  ฌานํ  อุปสมฺปชฺช
วิหรติ   เอตฺตาวตา   โข  โภ  อยํ  อตฺตา  ปรมทิฏฺฐธมฺมนิพฺพานปฺปตฺโต
โหตีติ   อิตฺเถเก   สโต  สตฺตสฺส  ปรมทิฏฺฐธมฺมนิพฺพานํ  ปญฺญาเปนฺติ  ฯ
อิเม ปญฺจ ทิฏฺฐธมฺมนิพฺพานวาทา ฯ
                                      ปญฺจกํ ฯ
     [๙๙๑]   ตตฺถ   กตมานิ  ฉ  วิวาทมูลานิ  โกโธ  มกฺโข  อิสฺสา
สาเถยฺยํ ปาปิจฺฉตา สนฺทิฏฺฐิปรามาสิตา อิมานิ ฉ วิวาทมูลานิ ฯ
     [๙๙๒]   ตตฺถ  กตเม  ฉ  ฉนฺทราคา  เคหสิตา  ธมฺมา มนาปิเกสุ
รูเปสุ  เคหสิโต  ราโค  สาราโค  ฯเปฯ  จิตฺตสฺส  สาราโค มนาปิเกสุ
สทฺเทสุ    ฯเปฯ   มนาปิเกสุ   คนฺเธสุ   ฯเปฯ   มนาปิเกสุ   รเสสุ
ฯเปฯ   มนาปิเกสุ   โผฏฺฐพฺเพสุ  ฯเปฯ  มนาปิเกสุ  ธมฺเมสุ  เคหสิโต
ราโค   สาราโค   ฯเปฯ   จิตฺตสฺส   สาราโค   อิเม  ฉ  ฉนฺทราคา
เคหสิตา ธมฺมา ฯ
     [๙๙๓]   ตตฺถ   กตมานิ   ฉ   วิโรธวตฺถูนิ  อมนาปิเกสุ  รูเปสุ
จิตฺตสฺส   อาฆาโต   ปฏิฆาโต  ฯเปฯ  จณฺฑิกฺกํ  อสฺสุโรโป  อนตฺตมนตา
จิตฺตสฺส   อมนาปิเกสุ   สทฺเทสุ   ฯเปฯ   อมนาปิเกสุ  คนฺเธสุ  ฯเปฯ
อมนาปิเกสุ  รเสสุ  ฯเปฯ  อมนาปิเกสุ  โผฏฺฐพฺเพสุ  ฯเปฯ อมนาปิเกสุ
ธมฺเมสุ   จิตฺตสฺส   อาฆาโต   ปฏิฆาโต   ฯเปฯ   จณฺฑิกฺกํ  อสฺสุโรโป
อนตฺตมนตา จิตฺตสฺส อิมานิ ฉ วิโรธวตฺถูนิ ฯ
     [๙๙๔]   ตตฺถ   กตเม   ฉ   ตณฺหากายา  รูปตณฺหา  สทฺทตณฺหา
คนฺธตณฺหา     รสตณฺหา    โผฏฺฐพฺพตณฺหา    ธมฺมตณฺหา    อิเม    ฉ
ตณฺหากายา ฯ
     [๙๙๕]   ตตฺถ   กตเม   ฉ  อคารวา  สตฺถริ  อคารโว  วิหรติ
อปฺปฏิสฺโส   ธมฺเม   ฯเปฯ  สงฺเฆ  ฯเปฯ  สิกฺขาย  ฯเปฯ  อปฺปมาเท
ฯเปฯ ปฏิสนฺถาเร อคารโว วิหรติ อปฺปฏิสฺโส อิเม ฉ อคารวา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๕๐๔-๕๑๔.
https://84000.org/tipitaka/read/pali_item.php?book=35&item=961&items=35
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=961&items=35&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=961&items=35
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=961&items=35
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=961
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35