ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๕ ภาษาบาลี อักษรไทย พระสุตตันตปิฎกเล่มที่ ๗ สุตฺต. สํ. สคาถวคฺโค
     [๘๓๘]   เอวมฺเม   สุตํ   เอกํ   สมยํ  ภควา  อาฬวิยํ  วิหรติ
อาฬวกสฺส   ยกฺขสฺส   ภวเน   ฯ   อถ   โข  อาฬวโก  ยกฺโข  เยน
ภควา    เตนุปสงฺกมิ    อุปสงฺกมิตฺวา    ภควนฺตํ   เอตทโวจ   นิกฺขม
สมณาติ   ฯ   สาธาวุโสติ   ภควา   นิกฺขมิ   ฯ   ปวิส   สมณาติ  ฯ
สาธาวุโสติ  ภควา  ปาวิสิ  ฯ  ทุติยมฺปิ  โข  อาฬวโก  ยกฺโข  ภควนฺตํ
เอตทโวจ   นิกฺขม   สมณาติ  ฯ  สาธาวุโสติ  ภควา  นิกฺขมิ  ฯ  ปวิส
สมณาติ   ฯ   สาธาวุโสติ   ภควา  ปาวิสิ  ฯ  ตติยมฺปิ  โข  อาฬวโก
ยกฺโข   ภควนฺตํ   เอตทโวจ   นิกฺขม  สมณาติ  ฯ  สาธาวุโสติ  ภควา
นิกฺขมิ ฯ ปวิส สมณาติ ฯ สาธาวุโสติ ภควา ปาวิสิ ฯ
     [๘๓๙]   จตุตฺถมฺปิ   โข   อาฬวโก  ยกฺโข  ภควนฺตํ  เอตทโวจ
นิกฺขม   สมณาติ   ฯ   น  ขฺวาหํ  อาวุโส  นิกฺขมิสฺสามิ  ยนฺเต  กรณียํ
ตํ  กโรหีติ  ฯ  ปญฺหํ  ตํ  สมณ  ปุจฺฉิสฺสามิ  สเจ  เม  น  พฺยากริสฺสสิ
จิตฺตํ  วา  เต  ขิปิสฺสามิ  หทยํ วา เต ผาเลสฺสามิ ปาเทสุ วา คเหตฺวา
ปารคงฺคาย  ขิปิสฺสามีติ  ฯ  น  ขฺวาหนฺตํ อาวุโส ปสฺสามิ สเทวเก โลเก
สมารเก    สพฺรหฺมเก    สสฺสมณพฺราหฺมณิยา    ปชาย   สเทวมนุสฺสาย
โย  เม  จิตฺตํ  วา  ขิเปยฺย  หทยํ  วา  ผาเลยฺย ปาเทสุ วา คเหตฺวา
ปารคงฺคาย ขิเปยฺย อปิจ ตฺวํ อาวุโส ปุจฺฉ ยทากงฺขสีติ ฯ
     [๘๔๐]   กึสูธ วิตฺตํ ปุริสสฺส เสฏฺฐํ
                      กึสุ สุจิณฺณํ สุขมาวหาติ
                      กึสุ หเว สาธุตรํ รสานํ
                      กถํชีวึ ๑- ชีวิตมาหุ เสฏฺฐนฺติ ฯ
     [๘๔๑]   สทฺธีธ วิตฺตํ ปุริสสฺส เสฏฺฐํ
                      ธมฺโม สุจิณฺโณ สุขมาวหาติ
                      สจฺจํ หเว สาธุตรํ รสานํ
                      ปญฺญาชีวึ ชีวิตมาหุ เสฏฺฐนฺติ ฯ
     [๘๔๒]   กถํสุ ตรติ โอฆํ                กถํสุ ตรติ อณฺณวํ
               กถํสุ ทุกฺขมจฺเจติ              กถํสุ ปริสุชฺฌตีติ ฯ
     [๘๔๓]   สทฺธาย ตรติ โอฆํ            อปฺปมาเทน อณฺณวํ
               วิริเยน ทุกฺขมจฺเจติ           ปญฺญาย ปริสุชฺฌตีติ ฯ
     [๘๔๔]   กถํสุ ลภเต ปญฺญํ             กถํสุ วินฺทเต ธนํ
               กถํสุ กิตฺตึ ปปฺโปติ           กถํ มิตฺตานิ คนฺถติ
               อสฺมา โลกา ปรํ โลกํ        กถํ เปจฺจ น โสจตีติ ฯ
     [๘๔๕]   สทฺทหาโน อรหตํ            ธมฺมํ นิพฺพานปตฺติยา
@เชิงอรรถ:  ฆตฺวาวคฺคสฺส วิตฺตสุตฺเต กถํชีวีติ ... ปญฺญาชีวีติ ทิสฺสนฺติ ฯ
               สุสฺสูสํ ๑- ลภเต ปญฺญํ      อปฺปมตฺโต วิจกฺขโณ
               ปฏิรูปการี ธุรวา               อุฏฺฐาตา วินฺทเต ธนํ
               สจฺเจน กิตฺตึ ปปฺโปติ       ททํ มิตฺตานิ คนฺถติ
               ยสฺเสเต จตุโร ธมฺมา         สทฺธสฺส ฆรเมสิโน
               สจฺจํ ธมฺโม ธิติ จาโค        ส เว เปจฺจ น โสจติ
               อิงฺฆ อญฺเญปิ ปุจฺฉสฺสุ      ปุถู สมณพฺราหฺมเณ
               ยทิ สจฺจา ทมา จาคา         ขนฺตฺยา ภิยฺโยธ วิชฺชตีติ ฯ
     [๘๔๖]   กถํ นุทานิ ปุจฺเฉยฺยํ           ปุถู สมณพฺราหฺมเณ
               โยหํ อชฺช ปชานามิ          โย อตฺโถ สมฺปรายิโก
               อตฺถาย วต เม พุทฺโธ        วาสายาฬวิมาคมา ๒-
               โยหํ อชฺช ปชานามิ          ยตฺถ ทินฺนํ มหปฺผลํ
               โส อหํ วิจริสฺสามิ             คามา คามํ ปุรา ปุรํ
               นมสฺสมาโน สมฺพุทฺธํ       ธมฺมสฺส จ สุธมฺมตนฺติ ฯ
                              ยกฺขสํยุตฺตํ สมตฺตํ ฯ
                                     ตสฺสุทฺทานํ
         อินฺทโก สกฺกสูจิ จ                 มณิภทฺโท จ สานุ จ
         ปิยงฺกรปุนพฺพสุ                     สุทตฺโต จ เทฺว สุกฺกา จีรา
         อาฬวเกน ทฺวาทสาติ ฯ
                     ------------
@เชิงอรรถ:  ยุ. สุสฺสูสา ลภเต ปญฺญา ฯ  ยุ. ...วิมาคโต ฯ
                                 สกฺกสํยุตฺตํ
                             ปฐมวคฺโค ปฐโม
                                   ----------
                               ปฐมํ สุวีรสุตฺตํ



             เนื้อความพระไตรปิฎกฉบับภาษาบาลีอักษรไทย เล่มที่ ๑๕ หน้าที่ ๓๑๔-๓๑๗. http://84000.org/tipitaka/pali/pali_item_s.php?book=15&item=838&items=9&modeTY=2&mode=bracket              อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/pali/pali_item_s.php?book=15&item=838&items=9&modeTY=2              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=15&item=838&items=9&modeTY=2&mode=bracket              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=15&item=838&items=9&modeTY=2&mode=bracket              ศึกษาอรรถกถานี้ได้ที่ :- http://84000.org/tipitaka/attha/attha.php?b=15&i=838              The Pali Atthakatha in Thai :- http://84000.org/tipitaka/atthapali/read_th.php?B=11&A=7749              The Pali Atthakatha in Roman :- http://84000.org/tipitaka/atthapali/read_rm.php?B=11&A=7749              สารบัญพระไตรปิฎกเล่มที่ ๑๕ http://84000.org/tipitaka/read/?index_15

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :