ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๖ ภาษาบาลี อักษรไทย พระสุตตันตปิฎกเล่มที่ ๘ สุตฺต. สํ. นิทานวคฺโค
     [๑]   เอวมฺเม   สุตํ   เอกํ   สมยํ   ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา    เอตทโวจ   ปฏิจฺจสมุปฺปาทํ   โว   ภิกฺขเว   เทสิสฺสามิ   ตํ
สุณาถ   สาธุกํ   มนสิกโรถ   ภาสิสฺสามีติ  ฯ  เอวํ  ภนฺเตติ  โข  เต
ภิกฺขู ภควโต ปจฺจสฺโสสุํ ฯ
     [๒]   ภควา   เอตทโวจ   กตโม  จ  ภิกฺขเว  ปฏิจฺจสมุปฺปาโท
อวิชฺชาปจฺจยา     ภิกฺขเว     สงฺขารา     สงฺขารปจฺจยา    วิญฺญาณํ
วิญฺญาณปจฺจยา    นามรูปํ   นามรูปปจฺจยา   สฬายตนํ   สฬายตนปจฺจยา
ผสฺโส      ผสฺสปจฺจยา      เวทนา      เวทนาปจฺจยา      ตณฺหา
ตณฺหาปจฺจยา     อุปาทานํ     อุปาทานปจฺจยา     ภโว    ภวปจฺจยา
ชาติ     ชาติปจฺจยา     ชรามรณํ     โสกปริเทวทุกฺขโทมนสฺสุปายาสา
สมฺภวนฺติ   ฯ   เอวเมตสฺส  เกวลสฺส  ทุกฺขกฺขนฺธสฺส  สมุทโย  โหติ  ฯ
อยํ วุจฺจติ ภิกฺขเว ปฏิจฺจสมุปฺปาโท ฯ
     [๓]   อวิชฺชาย    เตฺวว   อเสสวิราคนิโรธา   สงฺขารนิโรโธ
สงฺขารนิโรธา     วิญฺญาณนิโรโธ     วิญฺญาณนิโรธา     นามรูปนิโรโธ
นามรูปนิโรธา      สฬายตนนิโรโธ     สฬายตนนิโรธา    ผสฺสนิโรโธ
ผสฺสนิโรธา   เวทนานิโรโธ  เวทนานิโรธา  ตณฺหานิโรโธ  ตณฺหานิโรธา
อุปาทานนิโรโธ   อุปาทานนิโรธา   ภวนิโรโธ   ภวนิโรธา  ชาตินิโรโธ
ชาตินิโรธา   ชรามรณํ   โสกปริเทวทุกฺขโทมนสฺสุปายาสา   นิรุชฺฌนฺติ  ฯ
เอวเมตสฺส   เกวลสฺส   ทุกฺขกฺขนฺธสฺส   นิโรโธ   โหตีติ  ฯ  อิทมโวจ
ภควา    อตฺตมนา    เต   ภิกฺขู   ภควโต   ภาสิตํ   อภินนฺทุนฺติ   ฯ
ปฐมํ ฯ
     [๔]   สาวตฺถิยํ  วิหรติ  ...  ปฏิจฺจสมุปาทํ โว ภิกฺขเว เทสิสฺสามิ
วิภชิสฺสามิ   ตํ   สุณาถ   สาธุกํ   มนสิกโรถ   ภาสิสฺสามีติ   ฯ  เอวํ
ภนฺเตติ โข เต ภิกฺขู ภควโต ปจฺจสฺโสสุํ ฯ
     [๕]   ภควา   เอตทโวจ   กตโม  จ  ภิกฺขเว  ปฏิจฺจสมุปฺปาโท
อวิชฺชาปจฺจยา     ภิกฺขเว     สงฺขารา     สงฺขารปจฺจยา    วิญฺญาณํ
วิญฺญาณปจฺจยา    นามรูปํ   นามรูปปจฺจยา   สฬายตนํ   สฬายตนปจฺจยา
ผสฺโส      ผสฺสปจฺจยา      เวทนา      เวทนาปจฺจยา      ตณฺหา
ตณฺหาปจฺจยา     อุปาทานํ     อุปาทานปจฺจยา     ภโว    ภวปจฺจยา
ชาติ     ชาติปจฺจยา     ชรามรณํ     โสกปริเทวทุกฺขโทมนสฺสุปายาสา
สมฺภวนฺติ ฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๖]   กตมญฺจ  ภิกฺขเว  ชรามรณํ  ฯ  ยา  เตสํ  เตสํ  สตฺตานํ
ตมฺหิ   ตมฺหิ   สตฺตนิกาเย  ชรา  ชีรณตา  ขณฺฑิจฺจํ  ปาลิจฺจํ  วลิตฺตจตา
อายุโน   สํหานิ   อินฺทฺริยานํ  ปริปาโก  อยํ  วุจฺจติ  ชรา  ฯ  กตมญฺจ
ภิกฺขเว  มรณํ  ๑-  ยา  ๒- เตสํ เตสํ สตฺตานํ ตมฺหา ตมฺหา สตฺตนิกายา
จุติ  จวนตา  เภโท  อนฺตรธานํ  มจฺจุ  มรณํ  กาลกิริยา  ขนฺธานํ เภโท
กเฬวรสฺส  นิกฺเขโป  ชีวิตินฺทฺริยสฺส  อุปจฺเฉโท  ๓-  อิทํ  วุจฺจติ มรณํ ฯ
อิติ อยญฺจ ชรา อิทํ จ มรณํ อิทํ วุจฺจติ ภิกฺขเว ชรามรณํ ฯ
     [๗]   กตมา  จ  ภิกฺขเว  ชาติ  ฯ  ยา  เตสํ เตสํ สตฺตานํ ตมฺหิ
ตมฺหิ   สตฺตนิกาเย   ชาติ   สญฺชาติ   โอกฺกนฺติ   นิพฺพตฺติ   อภินิพฺพตฺติ
ขนฺธานํ ปาตุภาโว อายตนานํ ปฏิลาโภ อยํ วุจฺจติ ภิกฺขเว ชาติ ฯ
     [๘]   กตโม   จ   ภิกฺขเว   ภโว  ฯ  ตโยเม  ภิกฺขเว  ภวา
กามภโว รูปภโว อรูปภโว อยํ วุจฺจติ ภิกฺขเว ภโว ฯ
     [๙]   กตมญฺจ    ภิกฺขเว    อุปาทานํ   จตฺตารีมานิ   ภิกฺขเว
อุปาทานานิ       กามุปาทานํ       ทิฏฺฐุปาทานํ      สีลพฺพตฺตุปาทานํ
อตฺตวาทุปาทานํ อิทํ วุจฺจติ ภิกฺขเว อุปาทานํ ฯ
     [๑๐]   กตมา  จ  ภิกฺขเว  ตณฺหา  ฯ  ฉยิเม ภิกฺขเว ตณฺหากายา
รูปตณฺหา     สทฺทตณฺหา     คนฺธตณฺหา     รสตณฺหา    โผฏฺฐพฺพตณฺหา
ธมฺมตณฺหา อยํ วุจฺจติ ภิกฺขเว ตณฺหา ฯ
@เชิงอรรถ:  ม. ยุ. อิทํ ปาฐตฺยํ นตฺถิ ฯ     ยุ. ยํ ฯ    ม. ยุ. อิทํ ปาฐทฺวยํ นตฺถิ ฯ
@ ม. ยุ. อยํ ปาโฐ นตฺถิ ฯ
     [๑๑]   กตมา  จ  ภิกฺขเว  เวทนา ฯ ฉยิเม ภิกฺขเว เวทนากายา
จกฺขุสมฺผสฺสชา    เวทนา    โสตสมฺผสฺสชา    เวทนา   ฆานสมฺผสฺสชา
เวทนา  ชิวฺหาสมฺผสฺสชา  เวทนา  กายสมฺผสฺสชา  เวทนา มโนสมฺผสฺสชา
เวทนา อยํ วุจฺจติ ภิกฺขเว เวทนา ฯ
     [๑๒]   กตโม  จ  ภิกฺขเว  ผสฺโส  ฯ  ฉยิเม  ภิกฺขเว ผสฺสกายา
จกฺขุสมฺผสฺโส      โสตสมฺผสฺโส      ฆานสมฺผสฺโส      ชิวฺหาสมฺผสฺโส
กายสมฺผสฺโส มโนสมฺผสฺโส อยํ วุจฺจติ ภิกฺขเว ผสฺโส ฯ
     [๑๓]   กตมญฺจ   ภิกฺขเว  สฬายตนํ  ฯ  จกฺขฺวายตนํ  โสตายตนํ
ฆานายตนํ   ชิวฺหายตนํ   กายายตนํ   มนายตนํ   อิทํ   วุจฺจติ  ภิกฺขเว
สฬายตนํ ฯ
     [๑๔]   กตมญฺจ   ภิกฺขเว  นามรูปํ  ฯ  เวทนา  สญฺญา  เจตนา
ผสฺโส    มนสิกาโร   อิทํ   วุจฺจติ   นามํ   ฯ   จตฺตาโร   มหาภูตา
จตุนฺนญฺจ    มหาภูตานํ    อุปาทายรูปํ   อิทํ   วุจฺจติ   รูปํ   ฯ   อิติ
อิทญฺจ นามํ อิทญฺจ รูปํ อิทํ วุจฺจติ ภิกฺขเว นามรูปํ ฯ
     [๑๕]   กตมญฺจ  ภิกฺขเว  วิญฺญาณํ  ฉยิเม  ภิกฺขเว  วิญฺญาณกายา
จกฺขุวิญฺญาณํ        โสตวิญฺญาณํ       ฆานวิญฺญาณํ       ชิวฺหาวิญฺญาณํ
กายวิญฺญาณํ มโนวิญฺญาณํ อิทํ วุจฺจติ ภิกฺขเว วิญฺญาณํ ฯ
     [๑๖]   กตเม  จ  ภิกฺขเว  สงฺขารา  ตโยเม  ภิกฺขเว  สงฺขารา
กายสงฺขาโร    วจีสงฺขาโร   จิตฺตสงฺขาโร   อิเม   วุจฺจนฺติ   ภิกฺขเว
สงฺขารา ฯ
     [๑๗]   กตมา   จ   ภิกฺขเว  อวิชฺชา  ยํ  โข  ภิกฺขเว  ทุกฺเข
อญฺญาณํ      ทุกฺขสมุทเย      อญฺญาณํ      ทุกฺขนิโรเธ      อญฺญาณํ
ทุกฺขนิโรธคามินิยา    ปฏิปทาย    อญฺญาณํ    อยํ    วุจฺจติ    ภิกฺขเว
อวิชฺชา  ฯ  อิติ  โข  ภิกฺขเว  อวิชฺชาปจฺจยา  สงฺขารา  สงฺขารปจฺจยา
วิญฺญาณํ ฯเปฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๘]   อวิชฺชาย   เตฺวว   อเสสวิราคนิโรธา   สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ ทุติยํ ฯ
     [๑๙]   สาวตฺถิยํ   วิหรติ   ...   มิจฺฉาปฏิปทญฺจ  โว  ภิกฺขเว
เทสิสฺสามิ     สมฺมาปฏิปทญฺจ     ตํ    สุณาถ    สาธุกํ    มนสิกโรถ
ภาสิสฺสามีติ ฯ เอวํ ภนฺเตติ โข เต ภิกฺขู ภควโต ปจฺจสฺโสสุํ ฯ
     [๒๐]   ภควา   เอตทโวจ   กตมา   จ  ภิกฺขเว  มิจฺฉาปฏิปทา
อวิชฺชาปจฺจยา   ภิกฺขเว   สงฺขารา   สงฺขารปจฺจยา   วิญฺญาณํ   ฯเปฯ
เอวเมตสฺส  เกวลสฺส  ทุกฺขกฺขนฺธสฺส  สมุทโย  โหติ  ๑-  ฯ  อยํ วุจฺจติ
ภิกฺขเว มิจฺฉาปฏิปทา ฯ
     [๒๑]   กตมา   จ   ภิกฺขเว   สมฺมาปฏิปทา   อวิชฺชาย  เตฺวว
อเสสวิราคนิโรธา    สงฺขารนิโรโธ    สงฺขารนิโรธา    วิญฺญาณนิโรโธ
ฯเปฯ   เอวเมตสฺส   เกวลสฺส   ทุกฺขกฺขนฺธสฺส  นิโรโธ  โหติ  ฯ  อยํ
วุจฺจติ ภิกฺขเว สมฺมาปฏิปทาติ ฯ ตติยํ ฯ
     [๒๒]   สาวตฺถิยํ  วิหรติ  ...  วิปสฺสิสฺส  ภิกฺขเว ภควโต อรหโต
@เชิงอรรถ:  ยุ. อิติสทฺโท ทิสฺสติ ฯ
สมฺมาสมฺพุทฺธสฺส    ปุพฺเพว   สมฺโพธา   อนภิสมฺพุทฺธสฺส   โพธิสตฺตสฺเสว
สโต  เอตทโหสิ  กิจฺฉํ  วตายํ  โลโก  อาปนฺโน  ชายติ  จ  ชิยฺยติ  จ
มิยฺยติ   จ  จวติ  จ  อุปปชฺชติ  จ  อถ  จ  ปนิมสฺส  ทุกฺขสฺส  นิสฺสรณํ
นปฺปชานาติ   ชรามรณสฺส   กุทสฺสุ  ๑-  นาม  อิมสฺส  ทุกฺขสฺส  นิสฺสรณํ
ปญฺญายิสฺสติ ชรามรณสฺสาติ ฯ
     [๒๓]   อถ   โข   ภิกฺขเว   วิปสฺสิสฺส  โพธิสตฺตสฺส  เอตทโหสิ
กิมฺหิ   นุ   โข   สติ   ชรามรณํ   โหติ   กึปจฺจยา   ชรามรณนฺติ  ฯ
อถ   โข   ภิกฺขเว   วิปสฺสิสฺส   โพธิสตฺตสฺส   โยนิโสมนสิการา   อหุ
ปญฺญาย   อภิสมโย   ชาติยา   โข   สติ  ชรามรณํ  โหติ  ชาติปจฺจยา
ชรามรณนฺติ ฯ
     {๒๓.๑}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  สติ  ชาติ  โหติ  กึปจฺจยา  ชาตีติ  ฯ  อถ  โข ภิกฺขเว
วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย   อภิสมโย
ภเว โข สติ ชาติ โหติ ภวปจฺจยา ชาตีติ ฯ
     {๒๓.๒}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  สติ  ภโว  โหติ  กึปจฺจยา  ภโวติ  ฯ  อถ  โข ภิกฺขเว
วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย   อภิสมโย
อุปาทาเน โข สติ ภโว โหติ อุปาทานปจฺจยา ภโวติ ฯ
     {๒๓.๓}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ   นุ   โข   สติ   อุปาทานํ   โหติ   กึปจฺจยา   อุปาทานนฺติ  ฯ
อถ    โข    ภิกฺขเว    วิปสฺสิสฺส    โพธิสตฺตสฺส    โยนิโสมนสิการา
อหุ       ปญฺญาย       อภิสมโย       ตณฺหาย      โข      สติ
@เชิงอรรถ:  ม. กุทาสฺส ฯ เอวมุปริปิ ฯ
อุปาทานํ โหติ ตณฺหาปจฺจยา อุปาทานนฺติ ฯ
     {๒๓.๔}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  สติ  ตณฺหา  โหติ  กึปจฺจยา ตณฺหาติ ฯ อถ โข ภิกฺขเว วิปสฺสิสฺส
โพธิสตฺตสฺส    โยนิโสมนสิการา   อหุ   ปญฺญาย   อภิสมโย   เวทนาย
โข สติ ตณฺหา โหติ เวทนาปจฺจยา ตณฺหาติ ฯ
     {๒๓.๕}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  สติ  เวทนา โหติ กึปจฺจยา เวทนาติ ฯ อถ โข ภิกฺขเว วิปสฺสิสฺส
โพธิสตฺตสฺส  โยนิโสมนสิการา  อหุ  ปญฺญาย  อภิสมโย  ผสฺเส  โข  สติ
เวทนา โหติ ผสฺสปจฺจยา เวทนาติ ฯ
     {๒๓.๖}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  สติ  ผสฺโส  โหติ  กึปจฺจยา ผสฺโสติ ฯ อถ โข ภิกฺขเว วิปสฺสิสฺส
โพธิสตฺตสฺส   โยนิโสมนสิการา   อหุ   ปญฺญาย   อภิสมโย   สฬายตเน
โข สติ ผสฺโส โหติ สฬายตนปจฺจยา ผสฺโสติ ฯ
     {๒๓.๗}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  สติ  สฬายตนํ  โหติ  กึปจฺจยา  สฬายตนนฺติ  ฯ อถ โข ภิกฺขเว
วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย   อภิสมโย
นามรูเป โข สติ สฬายตนํ โหติ นามรูปปจฺจยา สฬายตนนฺติ ฯ
     {๒๓.๘}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ   นุ   โข   สติ   นามรูปํ  โหติ  กึปจฺจยา  นามรูปนฺติ  ฯ   อถ
โข      ภิกฺขเว      วิปสฺสิสฺส     โพธิสตฺตสฺส     โยนิโสมนสิการา
อหุ     ปญฺญาย     อภิสมโย     วิญฺญาเณ    โข    สติ    นามรูปํ
โหติ วิญฺญาณปจฺจยา นามรูปนฺติ ฯ
     {๒๓.๙}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  สติ  วิญฺญาณํ  โหติ กึปจฺจยา วิญฺญาณนฺติ ฯ อถ โข ภิกฺขเว
วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย   อภิสมโย
สงฺขาเร โข สติ วิญฺญาณํ โหติ สงฺขารปจฺจยา วิญฺญาณนฺติ ฯ
     {๒๓.๑๐}   อถ  โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  สติ  สงฺขารา  โหนฺติ  กึปจฺจยา  สงฺขาราติ  ฯ  อถ โข
ภิกฺขเว    วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย
อภิสมโย อวิชฺชาย โข สติ สงฺขารา โหนฺติ อวิชฺชาปจฺจยา สงฺขาราติ ฯ
     {๒๓.๑๑}   อิติ   หิทํ   อวิชฺชาปจฺจยา  สงฺขารา  สงฺขารปจฺจยา
วิญฺญาณํ  ฯเปฯ  เอวเมตสฺส  เกวลสฺส  ทุกฺขกฺขนฺธสฺส  สมุทโย  โหติ  ฯ
สมุทโย  สมุทโยติ  โข  ภิกฺขเว  วิปสฺสิสฺส โพธิสตฺตสฺส ปุพฺเพ อนนุสฺสุเตสุ
ธมฺเมสุ   จกฺขุํ   อุทปาทิ   ญาณํ   อุทปาทิ   ปญฺญา   อุทปาทิ   วิชฺชา
อุทปาทิ อาโลโก อุทปาทิ ฯ
     [๒๔]   อถ   โข   ภิกฺขเว   วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  ชรามรณํ  น โหติ กิสฺส นิโรธา ชรามรณนิโรโธติ ฯ
อถ   โข   ภิกฺขเว   วิปสฺสิสฺส   โพธิสตฺตสฺส   โยนิโสมนสิการา   อหุ
ปญฺญาย    อภิสมโย    ชาติยา    โข   อสติ   ชรามรณํ   น   โหติ
ชาตินิโรธา ชรามรณนิโรโธติ ฯ
     {๒๔.๑}   อถ     โข     ภิกฺขเว     วิปสฺสิสฺส     โพธิสตฺตสฺส
เอตทโหสิ      กิมฺหิ      นุ      โข      อสติ      ชาติ     น
โหติ   กิสฺส   นิโรธา   ชาตินิโรโธติ  ฯ  อถ  โข  ภิกฺขเว  วิปสฺสิสฺส
โพธิสตฺตสฺส      โยนิโสมนสิการา      อหุ     ปญฺญาย     อภิสมโย
ภเว โข อสติ ชาติ น โหติ ภวนิโรธา ชาตินิโรโธติ [๑]- ฯ
     {๒๔.๒}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  ภโว  น  โหติ กิสฺส นิโรธา ภวนิโรโธติ ฯ อถ โข
ภิกฺขเว    วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย
อภิสมโย อุปาทาเน โข อสติ ภโว น โหติ อุปาทานนิโรธา ภวนิโรโธติ ฯ
     {๒๔.๓}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  อุปาทานํ  น โหติ กิสฺส นิโรธา อุปาทานนิโรโธติ ฯ
อถ   โข   ภิกฺขเว   วิปสฺสิสฺส   โพธิสตฺตสฺส   โยนิโสมนสิการา   อหุ
ปญฺญาย    อภิสมโย    ตณฺหาย    โข   อสติ   อุปาทานํ   น   โหติ
ตณฺหานิโรธา อุปาทานนิโรโธติ ฯ
     {๒๔.๔}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  ตณฺหา  น  โหติ  กิสฺส  นิโรธา  ตณฺหานิโรโธติ ฯ
อถ  โข  ภิกฺขเว  วิปสฺสิสฺส  โพธิสตฺตสฺส  โยนิโสมนสิการา  อหุ ปญฺญาย
อภิสมโย เวทนาย โข อสติ ตณฺหา น โหติ เวทนานิโรธา ตณฺหานิโรโธติ ฯ
     {๒๔.๕}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  เวทนา  น  โหติ  กิสฺส นิโรธา เวทนานิโรโธติ ฯ
อถ    โข    ภิกฺขเว    วิปสฺสิสฺส    โพธิสตฺตสฺส    โยนิโสมนสิการา
อหุ   ปญฺญาย   อภิสมโย   ผสฺเส   โข   อสติ   เวทนา   น   โหติ
@เชิงอรรถ:  ยุ. โหติ ฯ
ผสฺสนิโรธา เวทนานิโรโธติ ฯ
     {๒๔.๖}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  อสติ ผสฺโส น โหติ กิสฺส นิโรธา ผสฺสนิโรโธติ ฯ อถ โข ภิกฺขเว
วิปสฺสิสฺส    โพธิสตฺตสฺส   โยนิโสมนสิการา   อหุ   ปญฺญาย   อภิสมโย
สฬายตเน โข อสติ ผสฺโส น โหติ สฬายตนนิโรธา ผสฺสนิโรโธติ ฯ
     {๒๔.๗}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  อสติ  สฬายตนํ  น  โหติ  กิสฺส นิโรธา สฬายตนนิโรโธติ ฯ อถ
โข   ภิกฺขเว   วิปสฺสิสฺส   โพธิสตฺตสฺส  โยนิโสมนสิการา  อหุ  ปญฺญาย
อภิสมโย   นามรูเป   โข   อสติ   สฬายตนํ  น  โหติ  นามรูปนิโรธา
สฬายตนนิโรโธติ ฯ
     {๒๔.๘}   อถ   โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  นามรูปํ  น  โหติ  กิสฺส นิโรธา นามรูปนิโรโธติ ฯ
อถ   โข   ภิกฺขเว   วิปสฺสิสฺส   โพธิสตฺตสฺส   โยนิโสมนสิการา   อหุ
ปญฺญาย    อภิสมโย    วิญฺญาเณ    โข   อสติ   นามรูปํ   น   โหติ
วิญฺญาณนิโรธา นามรูปนิโรโธติ ฯ
     {๒๔.๙}   อถ  โข  ภิกฺขเว  วิปสฺสิสฺส โพธิสตฺตสฺส เอตทโหสิ กิมฺหิ
นุ  โข  อสติ  วิญฺญาณํ  น  โหติ  กิสฺส  นิโรธา  วิญฺญาณนิโรโธติ ฯ อถ
โข   ภิกฺขเว   วิปสฺสิสฺส   โพธิสตฺตสฺส  โยนิโสมนสิการา  อหุ  ปญฺญาย
อภิสมโย   สงฺขาเร  ๑-  โข  อสติ  วิญฺญาณํ  น  โหติ  สงฺขารนิโรธา
วิญฺญาณนิโรโธติ ฯ
     {๒๔.๑๐}   อถ  โข  ภิกฺขเว  วิปสฺสิสฺส  โพธิสตฺตสฺส  เอตทโหสิ
กิมฺหิ  นุ  โข  อสติ  สงฺขารา  น โหนฺติ กิสฺส นิโรธา สงฺขารนิโรโธติ ฯ
@เชิงอรรถ:  ม. ยุ. สงฺขาเรสุ ฯ
อถ   โข   ภิกฺขเว   วิปสฺสิสฺส   โพธิสตฺตสฺส   โยนิโสมนสิการา   อหุ
ปญฺญาย    อภิสมโย   อวิชฺชาย   โข   อสติ   สงฺขารา   น   โหนฺติ
อวิชฺชานิโรธา สงฺขารนิโรโธติ ฯ
     {๒๔.๑๑}   อิติ  หีทํ  อวิชฺชานิโรธา  สงฺขารนิโรโธ สงฺขารนิโรธา
วิญฺญาณนิโรโธ   ฯเปฯ   เอวเมตสฺส   เกวลสฺส  ทุกฺขกฺขนฺธสฺส  นิโรโธ
โหติ  ๑-  ฯ  นิโรโธ  นิโรโธติ โข ภิกฺขเว วิปสฺสิสฺส โพธิสตฺตสฺส ปุพฺเพ
อนนุสฺสุเตสุ   ธมฺเมสุ   จกฺขุํ   อุทปาทิ   ญาณํ  อุปาทิ  ปญฺญา  อุทปาทิ
วิชฺชา อุปาทิ อาโลโก อุทปาทีติ ฯ จตุตฺถํ ฯ
     [๒๕]   สตฺตนฺนํปิ  พุทฺธานํ  เอวํ  วิตฺถาเรตพฺโพ  ๒-  ฯ   สิขิสฺส
ภิกฺขเว   ภควโต   อรหโต  สมฺมาสมฺพุทฺธสฺส  ...  เวสฺสภุสฺส  ภิกฺขเว
ภควโต   อรหโต   สมฺมาสมฺพุทฺธสฺส  ...  กกุสนฺธสฺส  ภิกฺขเว  ภควโต
อรหโต  สมฺมาสมฺพุทฺธสฺส  ...  โกนาคมนสฺส  ภิกฺขเว  ภควโต  อรหโต
สมฺมาสมฺพุทฺธสฺส    ...    กสฺสปสฺส    ภิกฺขเว    ภควโต    อรหโต
สมฺมาสมฺพุทฺธสฺส ... ฯ
     [๒๖]   ปุพฺเพว    เม    ภิกฺขเว   สมฺโพธา   อนภิสมฺพุทฺธสฺส
โพธิสตฺตสฺเสว   สโต   เอตทโหสิ   กิจฺฉํ   วตายํ   โลโก   อาปนฺโน
ชายติ  จ  ชิยฺยติ  จ  มิยฺยติ  จ  จวติ  จ  อุปปชฺชติ  จ อถ จ ปนิมสฺส
ทุกฺขสฺส     นิสฺสรณํ     นปฺปชานาติ    ชรามรณสฺส    กุทสฺสุ    นาม
อิมสฺส ทุกฺขสฺส นิสฺสรณํ ปญฺญายิสฺสติ ชรามรณสฺสาติ ฯ
     {๒๖.๑}   ตสฺส     มยฺหํ     ภิกฺขเว    เอตทโหสิ    กิมฺหิ
นุ       โข       สติ       ชรามรณํ       โหติ       กึปจฺจยา
@เชิงอรรถ:  ม. อิติสทฺโท ทิสฺสติ ฯ     ยุ. เปยฺยาโล ฯ
ชรามรณนฺติ   ฯ   ตสฺส  มยฺหํ  ภิกฺขเว  โยนิโสมนสิการา  อหุ  ปญฺญาย
อภิสมโย    ชาติยา    โข    สติ    ชรามรณํ    โหติ   ชาติปจฺจยา
ชรามรณนฺติ   ฯ   ตสฺส   มยฺหํ   ภิกฺขเว   เอตทโหสิ   กิมฺหิ  นุ  โข
สติ  ชาติ  โหติ ฯเปฯ ภโว ... อุปาทานํ ... ตณฺหา ... เวทนา ...
ผสฺโส  ...  สฬายตนํ  ...  นามรูปํ ... วิญฺญาณํ ... สงฺขารา โหนฺติ
กึปจฺจยา   สงฺขาราติ   ฯ   ตสฺส   มยฺหํ   ภิกฺขเว   โยนิโสมนสิการา
อหุ    ปญฺญาย   อภิสมโย   อวิชฺชาย   โข   สติ   สงฺขารา   โหนฺติ
อวิชฺชาปจฺจยา สงฺขาราติ ฯ
     {๒๖.๒}   อิติ  หิทํ  อวิชฺชาปจฺจยา สงฺขารา สงฺขารปจฺจยา วิญฺญาณํ
ฯเปฯ  เอวเมตสฺส  เกวลสฺส  ทุกฺขกฺขนฺธสฺส  สมุทโย  โหติ  ฯ  สมุทโย
สมุทโยติ  โข  เม  ภิกฺขเว  ปุพฺเพ  อนนุสฺสุเตสุ  ธมฺเมสุ  จกฺขุํ อุทปาทิ
ญาณํ อุทปาทิ ปญฺญา อุทปาทิ วิชฺชา อุทปาทิ อาโลโก อุทปาทิ ฯ
     [๒๗]   ตสฺส   มยฺหํ   ภิกฺขเว  เอตทโหสิ  กิมฺหิ  นุ  โข  อสติ
ชรามรณํ   น   โหติ   กิสฺส   นิโรธา   ชรามรณนิโรโธติ   ฯ   ตสฺส
มยฺหํ   ภิกฺขเว   โยนิโสมนสิการา   อหุ   ปญฺญาย   อภิสมโย  ชาติยา
โข   อสติ   ชรามรณํ   น   โหติ   ชาตินิโรธา  ชรามรณนิโรโธติ  ฯ
ตสฺส   มยฺหํ   ภิกฺขเว   เอตทโหสิ   กิมฺหิ   นุ   โข  อสติ  ชาติ  น
โหติ ฯเปฯ ภโว ... อุปาทานํ ... ตณฺหา ... เวทนา ... ผสฺโส ...
สฬายตนํ  ...  นามรูปํ  ...  วิญฺญาณํ  ...  สงฺขารา  น โหนฺติ กิสฺส
นิโรธา   สงฺขารนิโรโธติ   ฯ   ตสฺส  มยฺหํ  ภิกฺขเว  โยนิโสมนสิการา
อหุ   ปญฺญาย   อภิสมโย   อวิชฺชาย   โข  อสติ  สงฺขารา  น  โหนฺติ
อวิชฺชานิโรธา สงฺขารนิโรโธติ ฯ
     {๒๗.๑}   อิติ  หิทํ  อวิชฺชานิโรธา  สงฺขารนิโรโธ  สงฺขารนิโรธา
วิญฺญาณนิโรโธ   ฯเปฯ   เอวเมตสฺส   เกวลสฺส  ทุกฺขกฺขนฺธสฺส  นิโรโธ
โหติ  ฯ  นิโรโธ  นิโรโธติ  โข  เม ภิกฺขเว ปุพฺเพ อนนุสฺสุเตสุ ธมฺเมสุ
จกฺขุํ   อุทปาทิ   ญาณํ   อุทปาทิ   ปญฺญา   อุทปาทิ   วิชฺชา   อุทปาทิ
อาโลโก อุทปาทีติ ฯ ทสมํ ฯ
                    พุทฺธวคฺโค ปฐโม ฯ
                     ตสฺส อุทฺทานํ ภวติ
               เทสนาวิภงฺคํ ปฏิปทญฺจ ๑-
               วิปสฺสี สิขี จ เวสฺสภู
               กกุสนฺโธ โกนาคมโน จ ๒- กสฺสโป
               มหาสกฺยมุนี ๓- จ โคตโมติ ๔- ฯ
                     ------------
@เชิงอรรถ:  ม. เทสนาวิภงฺคปฏิปทา จ ฯ ยุ. ... ปฏิปทา จ ฯ     ม. ยุ. จสทฺโท นตฺถิ  ฯ
@ ม. ยุ. มหาสกฺยมุนิ ฯ     ยุ. โคตมนฺติ ฯ
                    อาหารวคฺโค ทุติโย
     [๒๘]   เอวมฺเม   สุตํ   เอกํ   สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส  อาราเม  ฯ  จตฺตาโรเม  ภิกฺขเว  อาหารา
ภูตานํ   วา   สตฺตานํ   ฐิติยา  สมฺภเวสีนํ  วา  อนุคฺคหาย  ฯ  กตเม
จตฺตาโร   ฯ   กวฬีกาโร  ๑-  อาหาโร  โอฬาริโก  วา  สุขุโม  วา
ผสฺโส    ทุติโย    มโนสญฺเจตนา    ตติยา    วิญฺญาณํ    จตุตฺถํ   ฯ
อิเม   โข   ภิกฺขเว  จตฺตาโร  อาหารา  ภูตานํ  วา  สตฺตานํ  ฐิติยา
สมฺภเวสีนํ วา อนุคฺคหาย ฯ
     [๒๙]   อิเม  จ  ๒- ภิกฺขเว จตฺตาโร อาหารา กึนิทานา กึสมุทยา
กึชาติกา    กึปภวา   ฯ   อิเม   จตฺตาโร   อาหารา   ตณฺหานิทานา
ตณฺหาสมุทยา   ตณฺหาชาติกา   ตณฺหาปภวา   ฯ   ตณฺหา  จายํ  ภิกฺขเว
กึนิทานา   กึสมุทยา   กึชาติกา   กึปภวา   ฯ   ตณฺหา  เวทนานิทานา
เวทนาสมุทยา  เวทนาชาติกา  เวทนาปภวา  ฯ  เวทนา  จายํ  ภิกฺขเว
กึนิทานา   กึสมุทยา   กึชาติกา   กึปภวา   ฯ   เวทนา   ผสฺสนิทานา
ผสฺสสมุทยา    ผสฺสชาติกา   ผสฺสปภวา   ฯ   ผสฺโส   จายํ   ภิกฺขเว
กึนิทาโน   กึสมุทโย   กึชาติโก   กึปภโว   ฯ  ผสฺโส  สฬายตนนิทาโน
สฬายตนสมุทโย    สฬายตนชาติโก   สฬายตนปภโว   ฯ   สฬายตนญฺจิทํ
ภิกฺขเว   กึนิทานํ  กึสมุทยํ  กึชาติกํ  กึปภวํ  ฯ  สฬายตนํ  นามรูปนิทานํ
นามรูปสมุทยํ   นามรูปชาติกํ   นามรูปปภวํ   ฯ   นามรูปญฺจิทํ   ภิกฺขเว
@เชิงอรรถ:  ม. กพฬีกาโร ฯ ยุ. กพฬึกาโร ฯ เอวมุปริปิ ฯ     ม. จสทฺโท นตฺถิ ฯ
กึนิทานํ    กึสมุทยํ    กึชาติกํ    กึปภวํ   ฯ   นามรูปํ   วิญฺญาณนิทานํ
วิญฺญาณสมุทยํ     วิญฺญาณชาติกํ     วิญฺญาณเปภวํ     ฯ    วิญฺญาณญฺจิทํ
ภิกฺขเว   กึนิทานํ   กึสมุทยํ  กึชาติกํ  กึปภวํ  ฯ  วิญฺญาณํ  สงฺขารนิทานํ
สงฺขารสมุทยํ    สงฺขารชาติกํ    สงฺขารปภวํ    ฯ    สงฺขารา   จิเม
ภิกฺขเว    กึนิทานา    กึสมุทยา   กึชาติกา   กึปภวา   ฯ   สงฺขารา
อวิชฺชานิทานา อวิชฺชาสมุทยา อวิชฺชาชาติกา อวิชฺชาปภวา ฯ
     {๒๙.๑}   อิติ  โข  ภิกฺขเว อวิชฺชาปจฺจยา สงฺขารา สงฺขารปจฺจยา
วิญฺญาณํ ฯเปฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๓๐]   อวิชฺชาย   เตฺวว   อเสสวิราคนิโรธา   สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ ปฐมํ ฯ
     [๓๑]   สาวตฺถิยํ  วิหรติ  ... จตฺตาโรเม ภิกฺขเว อาหารา ภูตานํ
วา  สตฺตานํ  ฐิติยา  สมฺภเวสีนํ  วา  อนุคฺคหาย  ฯ  กตเม จตฺตาโร ฯ
กวฬีกาโร   อาหาโร   โอฬาริโก   วา   สุขุโม   วา  ผสฺโส  ทุติโย
มโนสญฺเจตนา   ตติยา   วิญฺญาณํ   จตุตฺถํ   ฯ   อิเม   โข   ภิกฺขเว
จตฺตาโร   อาหารา   ภูตานํ   วา   สตฺตานํ   ฐิติยา  สมฺภเวสีนํ  วา
อนุคฺคหายาติ ฯ
     [๓๒]   เอวํ  วุตฺเต  อายสฺมา  โมลิยผคฺคุโน  ภควนฺตํ  เอตทโวจ
โก   นุ   โข   ภนฺเต   วิญฺญาณาหารํ   อาหาเรตีติ   ฯ  โน  กลฺโล
ปโญฺหติ   ภควา   อโวจ   อาหาเรตีติ   อหํ   น  วทามิ  อาหาเรตีติ
จาหํ    วเทยฺยํ   ตตฺรสฺส   กลฺโล   ปโญฺห   โก   นุ   โข   ภนฺเต
อาหาเรตีติ    เอวญฺจาหํ    น    วทามิ   เอวํ   มํ   อวทนฺตํ   โย
เอวํ    ปุจฺเฉยฺย   กิสฺส   นุ   โข   ภนฺเต   วิญฺญาณาหาโรติ   เอส
กลฺโล     ปโญฺห     ตตฺร     กลฺลํ    เวยฺยากรณํ    วิญฺญาณาหาโร
อายตึ  ปุนพฺภวาภินิพฺพตฺติยา [๑]- ตสฺมึ ภูเต สติ สฬายตนํ สฬายตนปจฺจยา
ผสฺโสติ ฯ
     [๓๓]   โก   นุ   โข  ภนฺเต  ผุสตีติ  ฯ  โน  กลฺโล  ปโญฺหติ
ภควา   อโวจ   ผุสตีติ   อหํ   น   วทามิ   ผุสตีติ   จาหํ   วเทยฺยํ
ตตฺรสฺส   กลฺโล   ปโญฺห   โก   นุ   โข   ภนฺเต  ผุสตีติ  เอวญฺจาหํ
น   วทามิ   เอวํ   มํ   อวทนฺตํ   โย   เอวํ   ปุจฺเฉยฺย   กึปจฺจยา
นุ    โข    ภนฺเต   ผสฺโสติ   เอส   กลฺโล   ปโญฺห   ตตฺร   กลฺลํ
เวยฺยากรณํ สฬายตนปจฺจยา ผสฺโส ผสฺสปจฺจยา เวทนาติ ฯ
     [๓๔]   โก  นุ  โข  ภนฺเต  เวทยตีติ  ๒-  ฯ โน กลฺโล ปญฺโหติ
ภควา   อโวจ   เวทยตีติ   อหํ   น  วทามิ  เวทยตีติ  จาหํ  วเทยฺยํ
ตตฺรสฺส   กลฺโล   ปโญฺห   โก   นุ  โข  ภนฺเต  เวทยตีติ  เอวญฺจาหํ
น   วทามิ   เอวํ   มํ   อวทนฺตํ   โย   เอวํ   ปุจฺเฉยฺย   กึปจฺจยา
นุ    โข   ภนฺเต   เวทนาติ   เอส   กลฺโล   ปโญฺห   ตตฺร   กลฺลํ
เวยฺยากรณํ ผสฺสปจฺจยา เวทนา เวทนาปจฺจยา ตณฺหาติ ฯ
     [๓๕]   โก  นุ  โข  ภนฺเต  ตณฺหียตีติ  ๓-  ฯ โน กลฺโล ปโญฺหติ
ภควา    อโวจ    ตณฺหียตีติ    อหํ    น   วทามิ   ตณฺหียตีติ   จาหํ
@เชิงอรรถ:  ม. ยุ. ปจฺจโย ฯ  ยุ. เวทิยตีติ ฯ เอวมุปริปิ ฯ
@ ม. ยุ. ตสฺสตีติ ฯ เอวมุปริปิ ฯ
วเทยฺยํ   ตตฺรสฺส   กลฺโล   ปโญฺห   โก   นุ   โข  ภนฺเต  ตณฺหียตีติ
เอวญฺจาหํ   น   วทามิ   เอวํ   มํ   อวทนฺตํ   โย   เอวํ  ปุจฺเฉยฺย
กึ    ปจฺจยา    นุ   โข   ภนฺเต   ตณฺหาติ   เอส   กลฺโล   ปโญฺห
ตตฺร    กลฺลํ    เวยฺยากรณํ    เวทนาปจฺจยา   ตณฺหา   ตณฺหาปจฺจยา
อุปาทานนฺติ ฯ
     [๓๖]   โก  นุ  โข  ภนฺเต  อุปาทิยตีติ  ฯ  โน  กลฺโล  ปโญฺหติ
ภควา    อโวจ    อุปาทิยตีติ   อหํ   น   วทามิ   อุปาทิยตีติ   จาหํ
วเทยฺยํ   ตตฺรสฺส   กลฺโล   ปโญฺห   โก   นุ  โข  ภนฺเต  อุปาทิยตีติ
เอวญฺจาหํ   น   วทามิ   เอวํ   มํ   อวทนฺตํ   โย   เอวํ  ปุจฺเฉยฺย
กึปจฺจยา    นุ    โข   ภนฺเต   อุปาทานนฺติ   เอส   กลฺโล   ปโญฺห
ตตฺร   กลฺลํ   เวยฺยากรณํ   ตณฺหาปจฺจยา   อุปาทานํ   อุปาทานปจฺจยา
ภโวติ      ฯเปฯ      เอวเมตสฺส      เกวลสฺส      ทุกฺขกฺขนฺธสฺส
สมุทโย โหติ ฯ
     [๓๗]   ฉนฺนํ   เตฺวว   ผคฺคุน  ผสฺสายตนานํ  อเสสวิราคนิโรธา
ผสฺสนิโรโธ   ผสฺสนิโรธา   เวทนานิโรโธ  เวทนานิโรธา  ตณฺหานิโรโธ
ตณฺหานิโรธา      อุปาทานนิโรโธ      อุปาทานนิโรธา     ภวนิโรโธ
ภวนิโรธา    ชาตินิโรโธ    ชาตินิโรธา   ชรามรณํ   โสกปริเทวทุกฺข-
โทมนสฺสุปายาสา      นิรุชฺฌนฺติ     ฯ     เอวเมตสฺส     เกวลสฺส
ทุกฺขกฺขนฺธสฺส นิโรโธ โหตีติ ฯ ทุติยํ ฯ
     [๓๘]   สาวตฺถิยํ  วิหรติ  ...  เย  หิ  เกจิ  ภิกฺขเว สมณา วา
พฺราหฺมณา   วา   ชรามรณํ   นปฺปชานนฺติ   ชรามรณสมุทยํ  นปฺปชานนฺติ
ชรามรณนิโรธํ          นปฺปชานนฺติ         ชรามรณนิโรธคามินีปฏิปทํ
นปฺปชานนฺติ   ฯ  ชาตึ  ฯเปฯ  ภวํ  ...  อุปาทานํ  ...  ตณฺหํ  ...
เวทนํ  ... ผสฺสํ ... สฬายตนํ ... นามรูปํ ... วิญฺญาณํ ... สงฺขาเร
นปฺปชานนฺติ    สงฺขารสมุทยํ   นปฺปชานนฺติ   สงฺขารนิโรธํ   นปฺปชานนฺติ
สงฺขารนิโรธคามินีปฏิปทํ   นปฺปชานนฺติ   ฯ   น  เมเต  ภิกฺขเว  สมณา
วา   พฺราหฺมณา   วา   สมเณสุ   วา   สมณสมฺมตา  พฺราหฺมเณสุ  วา
พฺราหฺมณสมฺมตา   น   จ   ปน   เต   อายสฺมนฺโต   สามญฺญตฺถํ   วา
พฺราหฺมญฺญตฺถํ   ๑-   วา   ทิฏฺเฐว   ธมฺเม   สยํ  อภิญฺญา  สจฺฉิกตฺวา
อุปสมฺปชฺช วิหรนฺติ ฯ
     [๓๙]   เย  จ  โข  เกจิ  ภิกฺขเว  สมณา  วา  พฺราหฺมณา  วา
ชรามรณํ     ปชานนฺติ    ชรามรณสมุทยํ    ปชานนฺติ    ชรามรณนิโรธํ
ปชานนฺติ    ชรามรณนิโรธคามินีปฏิปทํ    ปชานนฺติ   ฯ   ชาตึ   ฯเปฯ
ภวํ ... อุปาทานํ ... ตณฺหํ ... เวทนํ ... ผสฺสํ ... สฬายตนํ ... นามรูปํ
...   วิญฺญาณํ   ...   สงฺขาเร   ปชานนฺติ   สงฺขารสมุทยํ  ปชานนฺติ
สงฺขารนิโรธํ    ปชานนฺติ    สงฺขารนิโรธคามินีปฏิปทํ    ปชานนฺติ    ฯ
เต  โขเม  ภิกฺขเว  สมณา  วา พฺราหฺมณา วา สมเณสุ เจว สมณสมฺมตา
พฺราหฺมเณสุ   จ   พฺราหฺมณสมฺมตา  เต  จ  ปนายสฺมนฺโต  สามญฺญตฺถญฺจ
พฺราหฺมญฺญตฺถญฺจ   ทิฏฺเฐว   ธมฺเม  สยํ  อภิญฺญา  สจฺฉิกตฺวา  อุปสมฺปชฺช
วิหรนฺตีติ ฯ ตติยํ ฯ
@เชิงอรรถ:  ม. ยุ. พฺรหฺมญฺญตฺถํ ฯ เอวมุปริปิ ฯ
     [๔๐]   สาวตฺถิยํ  วิหรติ  ...  เย  หิ  เกจิ  ภิกฺขเว สมณา วา
พฺราหฺมณา   วา   อิเม   ธมฺเม   นปฺปชานนฺติ  อิเมสํ  ธมฺมานํ  สมุทยํ
นปฺปชานนฺติ   อิเมสํ   ธมฺมานํ   นิโรธํ   นปฺปชานนฺติ   อิเมสํ  ธมฺมานํ
นิโรธคามินีปฏิปทํ    นปฺปชานนฺติ    ฯ    กตเม   ธมฺเม   นปฺปชานนฺติ
กตเมสํ    ธมฺมานํ   สมุทยํ   นปฺปชานนฺติ   กตเมสํ   ธมฺมานํ   นิโรธํ
นปฺปชานนฺติ กตเมสํ ธมฺมานํ นิโรธคามินีปฏิปทํ นปฺปชานนฺติ ฯ
     {๔๐.๑}   ชรามรณํ   นปฺปชานนฺติ   ชรามรณสมุทยํ   นปฺปชานนฺติ
ชรามรณนิโรธํ          นปฺปชานนฺติ         ชรามรณนิโรธคามินีปฏิปทํ
นปฺปชานนฺติ  ฯ ชาตึ ฯเปฯ ภวํ ... อุปาทานํ ... ตณฺหํ ... เวทนํ ...
ผสฺสํ  ... สฬายตนํ ... นามรูปํ ... วิญฺญาณํ ... สงฺขาเร นปฺปชานนฺติ
สงฺขารสมุทยํ       นปฺปชานนฺติ       สงฺขารนิโรธํ       นปฺปชานนฺติ
สงฺขารนิโรธคามินีปฏิปทํ   นปฺปชานนฺติ   ฯ   อิเม   ธมฺเม  นปฺปชานนฺติ
อิเมสํ    ธมฺมานํ    สมุทยํ    นปฺปชานนฺติ   อิเมสํ   ธมฺมานํ   นิโรธํ
นปฺปชานนฺติ    อิเมสํ    ธมฺมานํ   นิโรธคามินีปฏิปทํ   นปฺปชานนฺติ   ฯ
น  เมเต  ภิกฺขเว  สมณา  วา  พฺราหฺมณา  วา สมเณสุ วา สมณสมฺมตา
พฺราหฺมเณสุ   วา   พฺราหฺมณสมฺมตา   น   จ   ปน   เต  อายสฺมนฺโต
สามญฺญตฺถํ   วา   พฺราหฺมญฺญตฺถํ   วา   ทิฏฺเฐว   ธมฺเม  สยํ  อภิญฺญา
สจฺฉิกตฺวา อุปสมฺปชฺช วิหรนฺติ ฯ
     [๔๑]   เย  จ  โข  เกจิ  ภิกฺขเว  สมณา  วา  พฺราหฺมณา  วา
อิเม   ธมฺเม   ปชานนฺติ   อิเมสํ   ธมฺมานํ   สมุทยํ  ปชานนฺติ  อิเมสํ
ธมฺมานํ    นิโรธํ    ปชานนฺติ    อิเมสํ    ธมฺมานํ   นิโรธคามินีปฏิปทํ
ปชานนฺติ   ฯ   กตเม   ธมฺเม   ปชานนฺติ   กตเมสํ   ธมฺมานํ  สมุทยํ
ปชานนฺติ    กตเมสํ   ธมฺมานํ   นิโรธํ   ปชานนฺติ   กตเมสํ   ธมฺมานํ
นิโรธคามินีปฏิปทํ   ปชานนฺติ   ฯ   ชรามรณํ   ปชานนฺติ  ชรามรณสมุทยํ
ปชานนฺติ     ชรามรณนิโรธํ     ปชานนฺติ     ชรามรณนิโรธคามินีปฏิปทํ
ปชานนฺติ  ฯ  ชาตึ  ฯเปฯ ภวํ ... อุปาทานํ ... ตณฺหํ ... เวทนํ ...
ผสฺสํ  ...  สฬายตนํ  ... นามรูปํ ... วิญฺญาณํ ... สงฺขาเร ปชานนฺติ
สงฺขารสมุทยํ    ปชานนฺติ    สงฺขารนิโรธํ    ปชานนฺติ   สงฺขารนิโรธ-
คามินีปฏิปทํ   ปชานนฺติ   ฯ   อิเม  ธมฺเม  ปชานนฺติ  อิเมสํ  ธมฺมานํ
สมุทยํ   ปชานนฺติ   อิเมสํ   ธมฺมานํ  นิโรธํ  ปชานนฺติ  อิเมสํ  ธมฺมานํ
นิโรธคามินีปฏิปทํ   ปชานนฺติ   ฯ   เต   โขเม   ภิกฺขเว  สมณา  วา
พฺราหฺมณา    วา    สมเณสุ    เจว   สมณสมฺมตา   พฺราหฺมเณสุ   จ
พฺราหฺมณสมฺมตา      เต      จ      ปนายสฺมนฺโต     สามญฺญตฺถญฺจ
พฺราหฺมญฺญตฺถญฺจ     ทิฏฺเฐว    ธมฺเม    สยํ    อภิญฺญา    สจฺฉิกตฺวา
อุปสมฺปชฺช วิหรนฺตีติ ฯ จตุตฺถํ ฯ
     [๔๒]   สาวตฺถิยํ  วิหรติ  ... อถ โข อายสฺมา กจฺจานโคตฺโต ๑-
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทิ   ฯ  เอกมนฺตํ  นิสินฺโน  โข  อายสฺมา  กจฺจานโคตฺโต
ภควนฺตํ    เอตทโวจ    สมฺมาทิฏฺฐิ    สมฺมาทิฏฺฐีติ    ภนฺเต    วุจฺจติ
กิตฺตาวตา นุ โข ภนฺเต สมฺมาทิฏฺฐิ โหตีติ ฯ
@เชิงอรรถ:  ยุ. กจฺจายนโคตฺโต ฯ เอวมุปริปิ ฯ
     [๔๓]   ทฺวยนิสฺสิโต   โขยํ   กจฺจาน   ๑-   โลโก  เยภุยฺเยน
อตฺถิตญฺเจว   นตฺถิตญฺจ   ฯ  โลกสมุทยํ  จ  ๒-  โข  กจฺจาน  ยถาภูตํ
สมฺมปฺปญฺญาย   ปสฺสโต   ยา   โลเก   นตฺถิตา   สา   น   โหติ  ฯ
โลกนิโรธํ    โข    กจฺจาน   ยถาภูตํ   สมฺมปฺปญฺญาย   ปสฺสโต   ยา
โลเก   อตฺถิตา   สา  น  โหติ  ฯ  อุปายุปาทานาภินิเวสวินิพนฺโธ  ๓-
ขฺวายํ   กจฺจาน   โลโก   เยภุยฺเยน   ตญฺจายํ  อุปายุปาทานํ  เจตโส
อธิฏฺฐานํ   อภินิเวสานุสยํ   น  อุเปติ  น  อุปาทิยติ  นาธิฏฺฐาติ  อตฺตา
เมติ    ฯ    ทุกฺขเมว    อุปฺปชฺชมานํ   อุปฺปชฺชติ   ทุกฺขํ   นิรุชฺฌมานํ
นิรุชฺฌตีติ   น   กงฺขติ   น   วิจิกิจฺฉติ   ฯ  อปรปฺปจฺจยา  ญาณเมวสฺส
เอตฺถ โหติ ฯ เอตฺตาวตา โข กจฺจาน สมฺมาทิฏฺฐิ โหติ ฯ
     [๔๔]   สพฺพมตฺถีติ  โข  กจฺจาน  อยเมโก  อนฺโต  สพฺพํ  นตฺถีติ
อยํ   ทุติโย   อนฺโต  ฯ  เอเต  เต  กจฺจาน  อุโภ  อนฺเต  อนุปคมฺม
มชฺเฌน    ตถาคโต    ธมฺมํ    เทเสติ    อวิชฺชาปจฺจยา    สงฺขารา
สงฺขารปจฺจยา   วิญฺญาณํ   ฯเปฯ   เอวเมตสฺส  เกวลสฺส  ทุกฺขกฺขนฺธสฺส
สมุทโย   โหติ  ฯ  อวิชฺชาย  เตฺวว  อเสสวิราคนิโรธา  สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ ปญฺจมํ ฯ
     [๔๕]   สาวตฺถิยํ  วิหรติ  ...  อถ โข อญฺญตโร ภิกฺขุ เยน ภควา
เตนุปสงฺกมิ     อุปสงฺกมิตฺวา     ภควนฺตํ    อภิวาเทตฺวา    เอกมนฺตํ
นิสีทิ   ฯ   เอกมนฺตํ   นิสินฺโน   โข   โส  ภิกฺขุ  ภควนฺตํ  เอตทโวจ
@เชิงอรรถ:  ยุ. กจฺจายน ฯ เอวมุปริปิ ฯ    ม. ยุ. จสทฺโท นตฺถิ ฯ  ม. อุปยุปา ... ฯ
ธมฺมกถิโก   ธมฺมกถิโกติ   ภนฺเต   วุจฺจติ   กิตฺตาวตา  นุ  โข  ภนฺเต
ธมฺมกถิโก โหตีติ ฯ
     [๔๖]   ชรามรณสฺส   เจ   ภิกฺขุ  นิพฺพิทาย  วิราคาย  นิโรธาย
ธมฺมํ   เทเสติ   ธมฺมกถิโก   ภิกฺขูติ   อลํ   วจนาย   ฯ  ชรามรณสฺส
เจ    ภิกฺขุ    นิพฺพิทาย    วิราคาย    นิโรธาย    ปฏิปนฺโน   โหติ
ธมฺมานุธมฺมปฏิปนฺโน   ภิกฺขูติ   อลํ  วจนาย  ฯ  ชรามรณสฺส  เจ  ภิกฺขุ
นิพฺพิทา  วิราคา  นิโรธา  อนุปาทา  วิมุตฺโต โหติ ทิฏฺฐธมฺมนิพฺพานปฺปตฺโต
ภิกฺขูติ อลํ วจนาย ฯ
     {๔๖.๑}   ชาติยา เจ ภิกฺขุ ฯเปฯ ภวสฺส เจ ภิกฺขุ ... อุปาทานสฺส
เจ  ภิกฺขุ ... ตณฺหาย เจ ภิกฺขุ ... เวทนาย เจ ภิกฺขุ ... ผสฺสสฺส เจ
ภิกฺขุ  ... สฬายตนสฺส เจ ภิกฺขุ ... นามรูปสฺส เจ ภิกฺขุ ... วิญฺญาณสฺส
เจ  ภิกฺขุ  ...  สงฺขารานญฺเจ  ภิกฺขุ  ... อวิชฺชาย เจ ภิกฺขุ นิพฺพิทาย
วิราคาย  นิโรธาย  ธมฺมํ  เทเสติ  ธมฺมกถิโก  ภิกฺขูติ  อลํ  วจนาย  ฯ
อวิชฺชาย   เจ   ภิกฺขุ   นิพฺพิทาย  วิราคาย  นิโรธาย  ปฏิปนฺโน  โหติ
ธมฺมานุธมฺมปฏิปนฺโน  ภิกฺขูติ  อลํ  วจนาย  ฯ  อวิชฺชาย เจ ภิกฺขุ นิพฺพิทา
วิราคา   นิโรธา   อนุปาทา   วิมุตฺโต   โหติ   ทิฏฺฐธมฺมนิพฺพานปฺปตฺโต
ภิกฺขูติ อลํ วจนายาติ ฯ ฉฏฺฐํ ฯ
     [๔๗]   เอวมฺเม  สุตํ  เอกํ  สมยํ ภควา ราชคเห วิหรติ เวฬุวเน
กลนฺทกนิวาเป    ฯ    อถ   โข   ภควา   ปุพฺพณฺหสมยํ   นิวาเสตฺวา
ปตฺตจีวรมาทาย  ราชคเห  ๑-  ปิณฺฑาย  ปาวิสิ  ฯ  อทฺทสา โข อเจโล
@เชิงอรรถ:  ม. ยุ. ราชคหํ ฯ
กสฺสโป    ภควนฺตํ    ทูรโตว    อาคจฺฉนฺตํ   ทิสฺวาน   เยน   ภควา
เตนุปสงฺกมิ    อุปสงฺกมิตฺวา    ภควตา    สทฺธึ   สมฺโมทิ   สมฺโมทนียํ
กถํ สาราณียํ วีติสาเรตฺวา เอกมนฺตํ อฏฺฐาสิ ฯ
     [๔๘]   เอกมนฺตํ  ฐิโต  โข  อเจโล  กสฺสโป  ภควนฺตํ เอตทโวจ
ปุจฺเฉยฺยาม   มยํ  ภวนฺตํ  โคตมํ  กญฺจิเทว  ๑-  เทสํ  สเจ  โน  ภวํ
โคตโม   โอกาสํ   กโรติ    ปญฺหสฺส   เวยฺยากรณายาติ   ฯ  อกาโล
โข    ตาว   กสฺสป   ปญฺหสฺส   อนฺตรฆรํ   ปวิฏฺฐมฺหาติ   ฯ   ทุติยํปิ
โข    อเจโล    กสฺสโป    ภควนฺตํ   เอตทโวจ   ปุจฺเฉยฺยาม   มยํ
ภวนฺตํ   โคตมํ   กญฺจิเทว   เทสํ   สเจ   โน  ภวํ  โคตโม  โอกาสํ
กโรติ   ปญฺหสฺส   เวยฺยากรณายาติ   ฯ   อกาโล   โข  ตาว  กสฺสป
ปญฺหสฺส     อนฺตรฆรํ    ปวิฏฺฐมฺหาติ    ฯ    ตติยํปิ    โข    ฯเปฯ
ปวิฏฺฐมฺหาติ ฯ
     [๔๙]   เอวํ   วุตฺเต  อเจโล  กสฺสโป  ภควนฺตํ  เอตทโวจ  น
โข   ปน   มยํ   ภวนฺตํ   โคตมํ   พหุเทว   ปุจฺฉิตุกามาติ   ฯ  ปุจฺฉ
กสฺสป   ยทากงฺขสีติ   ฯ  กึ  นุ  โข  โภ  โคตม  สยํกตํ  ทุกฺขนฺติ  ฯ
มา   เหวํ   กสฺสปาติ  ภควา  อโวจ  ฯ  กึ  ปน  โภ  โคตม  ปรกตํ
ทุกฺขนฺติ   ฯ   มา   เหวํ   กสฺสปาติ   ภควา  อโวจ  ฯ  กึ  นุ  โข
โภ   โคตม   สยํกตญฺจ   ปรกตญฺจ   ทุกฺขนฺติ  ฯ  มา  เหวํ  กสฺสปาติ
ภควา   อโวจ   ฯ   กึ  ปน  โภ  โคตม  อสยํการํ  อปรการํ  อธิจฺจ
สมุปฺปนฺนํ   ทุกฺขนฺติ   ฯ   มา   เหวํ  กสฺสปาติ  ภควา  อโวจ  ฯ  กึ
@เชิงอรรถ:  ยุ. กิญฺจิเทว ฯ เอวมุปริปิ ฯ
นุ   โข   โภ  โคตม  นตฺถิ  ทุกฺขนฺติ  ฯ  น  โข  กสฺสป  นตฺถิ  ทุกฺขํ
อตฺถิ   โข   กสฺสป   ทุกฺขนฺติ   ฯ   เตนหิ   ภวํ   โคตโม  ทุกฺขํ  น
ชานาติ   น   ปสฺสตีติ   ฯ   น  ขฺวาหํ  กสฺสป  ทุกฺขํ  น  ชานามิ  น
ปสฺสามิ   ชานามิ   ขฺวาหํ   กสฺสป   ทุกฺขํ   ปสฺสามิ   ขฺวาหํ   กสฺสป
ทุกฺขนฺติ ฯ
     {๔๙.๑}   กึ  นุ  โข  โภ โคตม สยํกตํ ทุกฺขนฺติ อิติ ปุฏฺโฐ สมาโน
มา   เหวํ   กสฺสปาติ   วเทสิ   กึ  ปน  โภ  โคตม  ปรกตํ  ทุกฺขนฺติ
อิติ   ปุฏฺโฐ   สมาโน   มา  เหวํ  กสฺสปาติ  วเทสิ  กึ  นุ  โข  โภ
โคตม   สยํกตญฺจ   ปรกตญฺจ   ทุกฺขนฺติ   อิติ   ปุฏฺโฐ   สมาโน   มา
เหวํ   กสฺสปาติ   วเทสิ   กึ   ปน   โภ  โคตม  อสยํการํ  อปรการํ
อธิจฺจ    สมุปฺปนฺนํ    ทุกฺขนฺติ    อิติ   ปุฏฺโฐ   สมาโน   มา   เหวํ
กสฺสปาติ   วเทสิ  กึ  นุ  โข  โภ  โคตม  นตฺถิ  ทุกฺขนฺติ  อิติ  ปุฏฺโฐ
สมาโน   น   โข   กสฺสป   นตฺถิ   ทุกฺขํ  อตฺถิ  โข  กสฺสป  ทุกฺขนฺติ
วเทสิ   เตนหิ   ภวํ   โคตโม   ทุกฺขํ   น  ชานาติ  น  ปสฺสตีติ  อิติ
ปุฏฺโฐ   สมาโน   น   ขฺวาหํ   กสฺสป  ทุกฺขํ  น  ชานามิ  น  ปสฺสามิ
ชานามิ   ขฺวาหํ   กสฺสป   ทุกฺขํ   ปสฺสามิ   ขฺวาหํ   กสฺสป   ทุกฺขนฺติ
วเทสิ   อาจิกฺขตุ   จ   เม   ภนฺเต   ภควา  ทุกฺขํ  เทเสตุ  จ  เม
ภนฺเต ภควา ทุกฺขนฺติ ฯ
     [๕๐]   โส  กโรติ  โส  ปฏิสํเวทยตีติ  โข  กสฺสป  อาทิโต สโต
สยํกตํ   ทุกฺขนฺติ   อิติ   วทํ   สสฺสตํ  เอตํ  ปเรติ  ฯ  อญฺโญ  กโรติ
อญฺโญ   ปฏิสํเวทยตีติ   โข   กสฺสป   เวทนาภิตุนฺนสฺส   สโต   ปรกตํ
ทุกฺขนฺติ  อิติ  วทํ  อุจฺเฉทํ  เอตํ  ปเรติ  ฯ  เอเต  เต  กสฺสป  อุโภ
อนฺเต   อนุปคมฺม   มชฺเฌน   ตถาคโต   ธมฺมํ  เทเสติ  อวิชฺชาปจฺจยา
สงฺขารา    สงฺขารปจฺจยา   วิญฺญาณํ   ฯเปฯ   เอวเมตสฺส   เกวลสฺส
ทุกฺขกฺขนฺธสฺส   สมุทโย   โหติ  ฯ  อวิชฺชาย  เตฺวว  อเสสวิราคนิโรธา
สงฺขารนิโรโธ    สงฺขารนิโรธา   วิญฺญาณนิโรโธ   ฯเปฯ   เอวเมตสฺส
เกวลสฺส ทุกฺขกฺขนฺธสฺส นิโรโธ โหตีติ ฯ
     [๕๑]   เอวํ   วุตฺเต   อเจโล   กสฺสโป   ภควนฺตํ  เอตทโวจ
อภิกฺกนฺตํ   ภนฺเต   อภิกฺกนฺตํ   ภนฺเต   เสยฺยถาปิ   ภนฺเต   นิกฺกุชฺชิตํ
วา   อุกฺกุชฺเชยฺย   ฯเปฯ  จกฺขุมนฺโต  รูปานิ  ทกฺขนฺตีติ  ๑-  เอวเมว
ภควตา   อเนกปริยาเยน   ธมฺโม   ปกาสิโต  เอสาหํ  ภนฺเต  ภควนฺตํ
สรณํ   คจฺฉามิ   ธมฺมญฺจ   ภิกฺขุสงฺฆญฺจ   ลเภยฺยาหํ   ภนฺเต   ภควโต
สนฺติเก ปพฺพชฺชํ ลเภยฺยํ อุปสมฺปทนฺติ  ฯ
     {๕๑.๑}   โย   โข  กสฺสป  อญฺญติตฺถิยปุพฺโพ  อิมสฺมึ  ธมฺมวินเย
อากงฺขติ   ปพฺพชฺชํ  อากงฺขติ  อุปสมฺปทํ  โส  จตฺตาโร  มาเส  ปริวสติ
จตุนฺนํ   มาสานํ   อจฺจเยน   ปริวุตฺถปริวาสํ   ๒-  อารทฺธจิตฺตา  ภิกฺขู
อากงฺขมานา   ๓-   ปพฺพาเชนฺติ   อุปสมฺปาเทนฺติ   ภิกฺขุภาวาย   อปิจ
มยา ปุคฺคลเวมตฺตตา วินีตาติ ๔- ฯ
     {๕๑.๒}   สเจ ภนฺเต อญฺญติตฺถิยปุพฺพา อิมสฺมึ ธมฺมวินเย อากงฺขนฺตา
ปพฺพชฺชํ   อากงฺขนฺตา   อุปสมฺปทํ   จตฺตาโร   มาเส  ปริวสนฺติ  จตุนฺนํ
มาสานํ   อจฺจเยน   ปริวุตฺถปริวาเส  อารทฺธจิตฺตา  ภิกฺขู  อากงฺขมานา
ปพฺพาเชนฺติ    อุปสมฺปาเทนฺติ    ภิกฺขุภาวาย   อหํ   จตฺตาริ   วสฺสานิ
@เชิงอรรถ:  ยุ. ทกฺขินฺตีติ ฯ เอวมุปริปิ ฯ    ๒-๓ ม. อิทํ ปาฐทฺวยํ นตฺถิ ฯ เอวมุปริปิ ฯ
@ ม. ยุ. วิทิตาติ ฯ
ปริวสิสฺสามิ   จตุนฺนํ   วสฺสานํ   อจฺจเยน  ปริวุตฺถปริวาสํ  อารทฺธจิตฺตา
ภิกฺขู ปพฺพาเชนฺตุ อุปสมฺปาเทนฺตุ ภิกฺขุภาวายาติ ฯ
     [๕๒]   อลตฺถ  โข  อเจโล  กสฺสโป  ภควโต  สนฺติเก  ปพฺพชฺชํ
อลตฺถ    อุปสมฺปทํ    ฯ    อจิรูปสมฺปนฺโน   จ   ปนายสฺมา   กสฺสโป
เอโก   วูปกฏฺโฐ   อปฺปมตฺโต  อาตาปี  ปหิตตฺโต  วิหรนฺโต  นจิรสฺเสว
ยสฺสตฺถาย    กุลปุตฺตา    สมฺมเทว   อคารสฺมา   อนคาริยํ   ปพฺพชนฺติ
ตทนุตฺตรํ    พฺรหฺมจริยปริโยสานํ    ทิฏฺเฐว    ธมฺเม    สยํ   อภิญฺญา
สจฺฉิกตฺวา   อุปสมฺปชฺช   วิหาสิ   ขีณา   ชาติ   วุสิตํ  พฺรหฺมจริยํ  กตํ
กรณียํ    นาปรํ    อิตฺถตฺตายาติ    อพฺภญฺญาสิ    ฯ    อญฺญตโร   จ
ปนายสฺมา กสฺสโป อรหํ อโหสีติ ฯ สตฺตมํ ฯ
     [๕๓]   สาวตฺถิยํ  วิหรติ  ...  อถ โข ติมฺพรุกฺโข ๑- ปริพฺพาชโก
เยน   ภควา   เตนุปสงฺกมิ   อุปสงฺกมิตฺวา   ภควตา   สทฺธึ   สมฺโมทิ
สมฺโมทนียํ กถํ สาราณียํ วีติสาเรตฺวา เอกมนฺตํ นิสีทิ ฯ
     [๕๔]   เอกมนฺตํ  นิสินฺโน  โข  ติมฺพรุกฺโข  ปริพฺพาชโก  ภควนฺตํ
เอตทโวจ   กึ   นุ   โข   โภ   โคตม   สยํกตํ  สุขทุกฺขนฺติ  ฯ  มา
เหวํ   ติมฺพรุกฺขาติ   ภควา   อโวจ   ฯ  กึ  ปน  โภ  โคตม  ปรกตํ
สุขทุกฺขนฺติ   ฯ  มา  เหวํ  ติมฺพรุกฺขาติ  ภควา  อโวจ  ฯ  กึ  นุ  โข
โภ    โคตม    สยํกตญฺจ    ปรกตญฺจ   สุขทุกฺขนฺติ   ฯ   มา   เหวํ
ติมฺพรุกฺขาติ  ภควา  อโวจ  ฯ  กึ  ปน  โภ  โคตม  อสยํการํ อปรการํ
อธิจฺจ   สมุปฺปนฺนํ   สุขทุกฺขนฺติ   ฯ   มา   เหวํ   ติมฺพรุกฺขาติ  ภควา
@เชิงอรรถ:  ม. ยุ. ติมฺพรุโก ฯ เอวมุปริปิ ฯ
อโวจ   ฯ   กึ   นุ   โข  โภ  โคตม  นตฺถิ  สุขทุกฺขนฺติ  ฯ  น  โข
ติมฺพรุกฺข    นตฺถิ   สุขทุกฺขํ   อตฺถิ   โข   ติมฺพรุกฺข   สุขทุกฺขนฺติ   ฯ
เตนหิ   ภวํ  โคตโม  สุขทุกฺขํ  น  ชานาติ  น  ปสฺสตีติ  ฯ  น  ขฺวาหํ
ติมฺพรุกฺข   สุขทุกฺขํ  น  ชานามิ  น  ปสฺสามิ  ชานามิ  ขฺวาหํ  ติมฺพรุกฺข
สุขทุกฺขํ ปสฺสามิ ขฺวาหํ ติมฺพรุกฺข สุขทุกฺขนฺติ ฯ
     {๕๔.๑}   กึ  นุ  โข  โภ  โคตม  สยํกตํ  สุขทุกฺขนฺติ  อิติ ปุฏฺโฐ
สมาโน   มา   เหวํ  ติมฺพรุกฺขาติ  วเทสิ  กึ  ปน  โภ  โคตม  ปรกตํ
สุขทุกฺขนฺติ  อิติ  ปุฏฺโฐ  สมาโน  มา  เหวํ  ติมฺพรุกฺขาติ  วเทสิ  กึ  นุ
โข   โภ  โคตม  สยํกตญฺจ  ปรกตญฺจ  สุขทุกฺขนฺติ  อิติ  ปุฏฺโฐ  สมาโน
มา   เหวํ   ติมฺพรุกฺขาติ   วเทสิ   กึ   ปน   โภ   โคตม  อสยํการํ
อปรการํ   อธิจฺจ   สมุปฺปนฺนํ   สุขทุกฺขนฺติ   อิติ   ปุฏฺโฐ  สมาโน  มา
เหวํ   ติมฺพรุกฺขาติ   วเทสิ  กึ  นุ  โข  โภ  โคตม  นตฺถิ  สุขทุกฺขนฺติ
อิติ   ปุฏฺโฐ   สมาโน   น   โข  ติมฺพรุกฺข  นตฺถิ  สุขทุกฺขํ  อตฺถิ  โข
ติมฺพรุกฺข    สุขทุกฺขนฺติ    วเทสิ    เตนหิ    ภวํ   โคตโม   สุขทุกฺขํ
น   ชานาติ   น   ปสฺสตีติ  อิติ  ปุฏฺโฐ  สมาโน  น  ขฺวาหํ  ติมฺพรุกฺข
สุขทุกฺขํ   น   ชานามิ  น  ปสฺสามิ  ชานามิ  ขฺวาหํ  ติมฺพรุกฺข  สุขทุกฺขํ
ปสฺสามิ   ขฺวาหํ   ติมฺพรุกฺข  สุขทุกฺขนฺติ  วเทสิ  อาจิกฺขตุ  จ  เม  ภวํ
โคตโม สุขทุกฺขํ เทเสตุ จ เม ภวํ โคตโม สุขทุกฺขนฺติ ฯ
     [๕๕]   สา  เวทนา  โส  เวทยตีติ  โข  ติมฺพรุกฺข  อาทิโต สโต
สยํกตํ  สุขทุกฺขนฺติ  เอวญฺจาหํ  ๑-  น  วทามิ  ฯ  อญฺญา เวทนา อญฺโญ
@เชิงอรรถ:  ม. ยุ. เอวมฺปาหํ ฯ เอวมุปริปิ ฯ
เวทยตีติ   โข   ติมฺพรุกฺข   เวทนาภิตุนฺนสฺส   สโต  ปรกตํ  สุขทุกฺขนฺติ
เอวญฺจาหํ  น  วทามิ  ฯ  เอเต  เต  ติมฺพรุกฺข  อุโภ  อนฺเต อนุปคมฺม
มชฺเฌน  ตถาคโต  ธมฺมํ  เทเสติ  อวิชฺชาปจฺจยา สงฺขารา สงฺขารปจฺจยา
วิญฺญาณํ      ฯเปฯ      เอวเมตสฺส      เกวลสฺส     ทุกฺขกฺขนฺธสฺส
สมุทโย   โหติ  ฯ  อวิชฺชาย  เตฺวว  อเสสวิราคนิโรธา  สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ
     [๕๖]   เอวํ  วุตฺเต  ติมฺพรุกฺโข  ปริพฺพาชโก  ภควนฺตํ  เอตทโวจ
อภิกฺกนฺตํ    โภ   โคตม   อภิกฺกนฺตํ   โภ   โคตม   ฯเปฯ   เอสาหํ
ภนฺเต    ภวนฺตํ    โคตมํ    สรณํ    คจฺฉามิ   ธมฺมญฺจ   ภิกฺขุสงฺฆญฺจ
อุปาสกํ    มํ    ภวํ    โคตโม    ธาเรตุ    อชฺชตคฺเค    ปาณุเปตํ
สรณงฺคตนฺติ ฯ อฏฺฐมํ ฯ
     [๕๗]   สาวตฺถิยํ  วิหรติ  ...  อวิชฺชานีวรณสฺส  ภิกฺขเว  พาลสฺส
ตณฺหาย   สํยุตฺตสฺส   ๑-   เอวมยํ   กาโย  สมุทาคโต  อิติ  อยญฺเจว
กาโย   พหิทฺธา   จ   นามรูปํ   อิตฺเถตํ   ทฺวยํ  ทฺวยํ  ปฏิจฺจ  ผสฺโส
สเฬวายตนานิ   เยหิ   ผุฏฺโฐ   พาโล   สุขทุกฺขํ  ปฏิสํเวทยติ  เอเตสํ
วา   อญฺญตเรน   ฯ   อวิชฺชานีวรณสฺส   ภิกฺขเว   ปณฺฑิตสฺส   ตณฺหาย
สํยุตฺตสฺส   เอวมยํ   กาโย  สมุทาคโต  อิติ  อยญฺเจว  กาโย  พหิทฺธา
จ   นามรูปํ  อิตฺเถตํ  ทฺวยํ  ทฺวยํ  ปฏิจฺจ  ผสฺโส  สเฬวายตนานิ  เยหิ
ผุฏฺโฐ ปณฺฑิโต สุขทุกฺขํ ปฏิสํเวทยติ เอเตสํ วา อญฺญตเรน ฯ
@เชิงอรรถ:  ม. ยุ. สมฺปยุตฺตสฺส ฯ เอวมุปริปิ ฯ
     [๕๘]   ตตฺร  ภิกฺขเว โก วิเสโส โก อธิปฺปายโส ๑- กินฺนานากรณํ
ปณฺฑิตสฺส   พาเลนาติ  ฯ  ภควํมูลกา  โน  ภนฺเต  ธมฺมา  ภควํเนตฺติกา
ภควํปฏิสรณา    สาธุ    วต    เม    ภนฺเต   ภควนฺตํเยว   ปฏิภาตุ
เอตสฺส   ภาสิตสฺส   อตฺโถ   ภควโต   สุตฺวา  ภิกฺขู  ธาเรสฺสนฺตีติ  ฯ
เตนหิ   ภิกฺขเว   สุณาถ   สาธุกํ   มนสิกโรถ   ภาสิสฺสามีติ  ฯ  เอวํ
ภนฺเตติ โข เต ภิกฺขู ภควโต ปจฺจสฺโสสุํ ฯ
     [๕๙]   ภควา  เอตทโวจ  ยาย  จ  ภิกฺขเว  อวิชฺชาย  นิวุตสฺส
พาลสฺส   ยาย   จ   ตณฺหาย   สํยุตฺตสฺส  อยํ  กาโย  สมุทาคโต  สา
เจว   อวิชฺชา   พาลสฺส   อปฺปหีนา   สา   จ  ตณฺหา  อปริกฺขีณา  ตํ
กิสฺส   เหตุ   น   หิ   ภิกฺขเว   พาโล   อจริ   พฺรหฺมจริยํ   สมฺมา
ทุกฺขกฺขยาย   ตสฺมา   พาโล   กายสฺส   เภทา   กายูปโค  โหติ  โส
กายูปโค   สมาโน   น   ปริมุจฺจติ   ชาติยา  ชราย  มรเณน  โสเกหิ
ปริเทเวหิ   ทุกฺเขหิ  โทมนสฺเสหิ  อุปายาเสหิ  น  ปริมุจฺจติ  ทุกฺขสฺมาติ
วทามิ ฯ
     {๕๙.๑}   ยาย  จ  ภิกฺขเว  อวิชฺชาย  นิวุตสฺส  ปณฺฑิตสฺส ยาย จ
ตณฺหาย   สํยุตฺตสฺส   อยํ   กาโย   สมุทาคโต   สา   เจว   อวิชฺชา
ปณฺฑิตสฺส   ปหีนา   สา   จ   ตณฺหา  ปริกฺขีณา  ตํ  กิสฺส  เหตุ  อจริ
ภิกฺขเว   ปณฺฑิโต   พฺรหฺมจริยํ   สมฺมา   ทุกฺขกฺขยาย   ตสฺมา  ปณฺฑิโต
กายสฺส    เภทา   น   กายูปโค   โหติ   โส   อกายูปโค   สมาโน
ปริมุจฺจติ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ    อุปายาเสหิ   ปริมุจฺจติ   ทุกฺขสฺมาติ   วทามิ   ฯ   อยํ
@เชิงอรรถ:  ยุ. อธิปฺปาโย ฯ เอวมุปริปิ ฯ
โข   ภิกฺขเว   วิเสโส   อยํ   อธิปฺปายโส   อิทนฺนานากรณํ  ปณฺฑิตสฺส
พาเลน ยทิทํ พฺรหฺมจริยวาโสติ ฯ นวมํ ฯ
     [๖๐]   สาวตฺถิยํ   วิหรติ  ...  ปฏิจฺจสมุปฺปาทญฺจ  โว  ภิกฺขเว
เทเสสฺสามิ    ปฏิจฺจสมุปฺปนฺเน    จ    ธมฺเม    ตํ   สุณาถ   สาธุกํ
มนสิกโรถ   ภาสิสฺสามีติ   ฯ   เอวํ  ภนฺเตติ  โข  เต  ภิกฺขู  ภควโต
ปจฺจสฺโสสุํ ฯ
     [๖๑]   ภควา   เอตทโวจ  กตโม  จ  ภิกฺขเว  ปฏิจฺจสมุปฺปาโท
ชาติปจฺจยา   ภิกฺขเว   ชรามรณํ  อุปฺปาทา  วา  ตถาคตานํ  อนุปฺปาทา
วา    ตถาคตานํ    ฐิตาว   สา   ธาตุ   ธมฺมฏฺฐิตตา   ธมฺมนิยามตา
อิทปฺปจฺจยตา   ตํ   ตถาคโต   อภิสมฺพุชฺฌติ   อภิสเมติ   อภิสมฺพุชฺฌิตฺวา
อภิสเมตฺวา  อาจิกฺขติ  เทเสติ  ปญฺญเปติ  ๑-  ปฏฺฐเปติ  วิวรติ  วิภชติ
อุตฺตานีกโรติ   ปสฺสถาติ   จาห   ฯ   ชาติปจฺจยา   ภิกฺขเว  ชรามรณํ
ฯเปฯ  ภวปจฺจยา  ภิกฺขเว  ชาติ ... อุปาทานปจฺจยา ภิกฺขเว ภโว ...
ตณฺหาปจฺจยา  ภิกฺขเว  อุปาทานํ  ... เวทนาปจฺจยา ภิกฺขเว ตณฺหา ...
ผสฺสปจฺจยา  ภิกฺขเว  เวทนา  ...  สฬายตนปจฺจยา ภิกฺขเว ผสฺโส ...
นามรูปปจฺจยา    ภิกฺขเว   สฬายตนํ   ...   วิญฺญาณปจฺจยา   ภิกฺขเว
นามรูปํ  ...  สงฺขารปจฺจยา ภิกฺขเว วิญฺญาณํ ... อวิชฺชาปจฺจยา ภิกฺขเว
สงฺขารา   อุปฺปาทา   วา   ตถาคตานํ   อนุปฺปาทา   วา   ตถาคตานํ
ฐิตาว    สา   ธาตุ   ธมฺมฏฺฐิตตา   ธมฺมนิยามตา   อิทปฺปจฺจยตา   ตํ
ตถาคโต     อภิสมฺพุชฺฌติ    อภิสเมติ    อภิสมฺพุชฺฌิตฺวา    อภิสเมตฺวา
@เชิงอรรถ:  ม. ยุ. ปญฺญาเปติ ฯ เอวมุปริปิ ฯ
อาจิกฺขติ   เทเสติ   ปญฺญเปติ   ปฏฺฐเปติ  วิวรติ  วิภชติ  อุตฺตานีกโรติ
ปสฺสถาติ   จาห   ฯ   อวิชฺชาปจฺจยา  ภิกฺขเว  สงฺขารา  ฯ  อิติ  โข
ภิกฺขเว    ยา   ตตฺร   ตถตา   อวิตถตา   อนญฺญถตา   อิทปฺปจฺจยตา
อยํ วุจฺจติ ภิกฺขเว ปฏิจฺจสมุปฺปาโท ฯ
     [๖๒]   กตเม   จ   ภิกฺขเว  ปฏิจฺจสมุปฺปนฺนา  ธมฺมา  ชรามรณํ
ภิกฺขเว   อนิจฺจํ   สงฺขตํ   ปฏิจฺจสมุปฺปนฺนํ  ขยธมฺมํ  วยธมฺมํ  วิราคธมฺมํ
นิโรธธมฺมํ   ฯ   ชาติ   ภิกฺขเว   อนิจฺจา   สงฺขตา   ปฏิจฺจสมุปฺปนฺนา
ขยธมฺมา     วยธมฺมา     วิราคธมฺมา     นิโรธธมฺมา    ฯ    ภโว
ภิกฺขเว    อนิจฺโจ    สงฺขโต   ปฏิจฺจสมุปฺปนฺโน   ขยธมฺโม   วยธมฺโม
วิราคธมฺโม    นิโรธธมฺโม   ฯ   อุปาทานํ   ภิกฺขเว   ฯเปฯ   ตณฺหา
ภิกฺขเว  ...  เวทนา  ภิกฺขเว  ...  ผสฺโส  ภิกฺขเว  ...  สฬายตนํ
ภิกฺขเว  ...  นามรูปํ  ภิกฺขเว  ...  วิญฺญาณํ  ภิกฺขเว ...  สงฺขารา
ภิกฺขเว  ...  อวิชฺชา  ภิกฺขเว อนิจฺจา สงฺขตา ปฏิจฺจสมุปฺปนฺนา ขยธมฺมา
วยธมฺมา    วิราคธมฺมา   นิโรธธมฺมา   ฯ   อิเม   วุจฺจนฺติ   ภิกฺขเว
ปฏิจฺจสมุปฺปนฺนา ธมฺมา ฯ
     [๖๓]   ยโต  โข  ภิกฺขเว  อริยสาวกสฺส  อยญฺจ  ปฏิจฺจสมุปฺปาโท
อิเม   จ   ปฏิจฺจสมุปฺปนฺนา   ธมฺมา   ยถาภูตํ   สมฺมปฺปญฺญาย  สุทิฏฺฐา
โหนฺติ   โสว   ๑-   ปุพฺพนฺตํ   วา   อุปธาวิสฺสติ   อโหสึ  นุ  ขฺวาหํ
อตีตมทฺธานํ   นนุ   โข   อโหสึ   อตีตมทฺธานํ   กึ   นุ   โข  อโหสึ
อตีตมทฺธานํ   กถํ   นุ   โข   อโหสึ   อตีตมทฺธานํ   กึ   หุตฺวา   กึ
@เชิงอรรถ:  ม. ยุ. โส วต ฯ
อโหสึ    นุ    ขฺวาหํ    อตีตมทฺธานนฺติ   อปรนฺตํ   วา   อุปธาวิสฺสติ
ภวิสฺสามิ    นุ    ขฺวาหํ    อนาคตมทฺธานํ    นนุ    โข    ภวิสฺสามิ
อนาคตมทฺธานํ   กึ   นุ   โข   ภวิสฺสามิ  อนาคตมทฺธานํ  กถํ  นุ  โข
ภวิสฺสามิ    อนาคตมทฺธานํ   กึ   หุตฺวา   กึ   ภวิสฺสามิ   นุ   ขฺวาหํ
อนาคตมทฺธานนฺติ    เอตรหิ    วา    ปจฺจุปฺปนฺนํ    อทฺธานํ   อชฺฌตฺตํ
กถํกถี   ภวิสฺสติ   อหํ   นุ   โขสฺมิ   โน   นุ  โขสฺมิ  กึ  นุ  โขสฺมิ
กถํ  นุ  โขสฺมิ  อยํ  นุ  โข  สตฺโต  กุโต  อาคโต  โส  กุหึ คามี ๑-
ภวิสฺสตีติ   เนตํ   ฐานํ   วิชฺชติ   ตํ   กิสฺส  เหตุ  ตถา  หิ  ภิกฺขเว
อริยสาวกสฺส    อยญฺจ   ปฏิจฺจสมุปฺปาโท   อิเม   จ   ปฏิจฺจสมุปฺปนฺนา
ธมฺมา ยถาภูตํ สมฺมปฺปญฺญาย สุทิฏฺฐาติ ฯ ทสมํ ฯ
                    อาหารวคฺโค ทุติโย ฯ
                       ตสฺส อุทฺทานํ
         อาหารผคฺคุนญฺเจว ๒-       เทฺว จ สมณพฺราหฺมณา
         กจฺจานโคตฺตํ ๓- ธมฺมกถิกํ    อเจลํ ติมฺพรุกฺเขน จ
         พาลปณฺฑิตญฺเจว ๔-         ทสโม ปจฺจเยน จาติ ฯ
                     ------------
@เชิงอรรถ:  ม. คมิสฺสตีติ ฯ    ม. ยุ. อาหารํ ผคฺคุโน เจว ฯ     ยุ. กจฺจายนโคตฺโต ฯ
@ ม. พาลปณฺฑิตโต เจว ฯ ยุ. พาเลน ปณฺฑิโต เจว ฯ
                     ทสพลวคฺโค ตติโย
     [๖๔]   สาวตฺถิยํ  วิหรติ  ...  ทสพลสมนฺนาคโต ภิกฺขเว ตถาคโต
จตูหิ   จ   เวสารชฺเชหิ  สมนฺนาคโต  อาสภณฺฐานํ  ปฏิชานาติ  ปริสาสุ
สีหนาทํ   นทติ   พฺรหฺมจกฺกํ   ปวตฺเตติ  อิติ  รูปํ  อิติ  รูปสฺส  สมุทโย
อิติ   รูปสฺส   อตฺถงฺคโม   อิติ   เวทนา  อิติ  เวทนาย  สมุทโย  อิติ
เวทนาย    อตฺถงฺคโม   อิติ   สญฺญา   อิติ   สญฺญาย   สมุทโย   อิติ
สญฺญาย   อตฺถงฺคโม   อิติ   สงฺขารา   อิติ   สงฺขารานํ  สมุทโย  อิติ
สงฺขารานํ    อตฺถงฺคโม    อิติ   วิญฺญาณํ   อิติ   วิญฺญาณสฺส   สมุทโย
อิติ    วิญฺญาณสฺส    อตฺถงฺคโม    อิติ    อิมสฺมึ    สติ   อิทํ   โหติ
อิมสฺสุปฺปาทา   อิทํ   อุปฺปชฺชติ   อิมสฺมึ   อสติ   อิทํ  น  โหติ  อิมสฺส
นิโรธา   อิทํ   นิรุชฺฌติ  ยทิทํ  อวิชฺชาปจฺจยา  สงฺขารา  สงฺขารปจฺจยา
วิญฺญาณํ      ฯเปฯ      เอวเมตสฺส      เกวลสฺส     ทุกฺขกฺขนฺธสฺส
สมุทโย   โหติ  ฯ  อวิชฺชาย  เตฺวว  อเสสวิราคนิโรธา  สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ ปฐมํ ฯ
     [๖๕]   สาวตฺถิยํ  วิหรติ  ...  ทสพลสมนฺนาคโต ภิกฺขเว ตถาคโต
จตูหิ   จ   เวสารชฺเชหิ  สมนฺนาคโต  อาสภณฺฐานํ  ปฏิชานาติ  ปริสาสุ
สีหนาทํ   นทติ   พฺรหฺมจกฺกํ   ปวตฺเตติ  อิติ  รูปํ  อิติ  รูปสฺส  สมุทโย
อิติ   รูปสฺส   อตฺถงฺคโม   อิติ   เวทนา  อิติ  เวทนาย  สมุทโย  อิติ
เวทนาย    อตฺถงฺคโม   อิติ   สญฺญา   อิติ   สญฺญาย   สมุทโย   อิติ
สญฺญาย   อตฺถงฺคโม   อิติ   สงฺขารา   อิติ   สงฺขารานํ  สมุทโย  อิติ
สงฺขารานํ    อตฺถงฺคโม    อิติ   วิญฺญาณํ   อิติ   วิญฺญาณสฺส   สมุทโย
อิติ    วิญฺญาณสฺส    อตฺถงฺคโม    อิติ    อิมสฺมึ    สติ   อิทํ   โหติ
อิมสฺสุปฺปาทา   อิทํ   อุปฺปชฺชติ   อิมสฺมึ   อสติ   อิทํ  น  โหติ  อิมสฺส
นิโรธา   อิทํ   นิรุชฺฌติ  ยทิทํ  อวิชฺชาปจฺจยา  สงฺขารา  สงฺขารปจฺจยา
วิญฺญาณํ      ฯเปฯ      เอวเมตสฺส      เกวลสฺส     ทุกฺขกฺขนฺธสฺส
สมุทโย   โหติ  ฯ  อวิชฺชาย  เตฺวว  อเสสวิราคนิโรธา  สงฺขารนิโรโธ
สงฺขารนิโรธา     วิญฺญาณนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหติ ฯ
     [๖๖]   เอวํ  สฺวากฺขาโต  ภิกฺขเว  มยา  ธมฺโม  อุตฺตาโน วิวโฏ
ปกาสิโต   ฉินฺนปิโลติโก   ฯ   เอวํ   สฺวากฺขาเต  โข  ภิกฺขเว  มยา
ธมฺเม     อุตฺตาเน    วิวเฏ    ปกาสิเต    ฉินฺนปิโลติเก    อลเมว
สทฺธาปพฺพชิเตน   กุลปุตฺเตน  วิริยํ  อารภิตุํ  กามํ  ตโจ  จ  นหารุ  จ
อฏฺฐิ   จ   อวสิสฺสตุ   สรีเร   อุปสุสฺสตุ  มํสโลหิตํ  ยนฺตํ  ปุริสถาเมน
ปุริสวิริเยน   ปุริสปรกฺกเมน  ปตฺตพฺพํ  น  ตํ  อปาปุณิตฺวา  ปุริสสฺส  ๑-
วิริยสฺส สณฺฐานํ ภวิสฺสตีติ ฯ
     {๖๖.๑}   ทุกฺขํ   ภิกฺขเว   กุสีโต   วิหรติ  โวกิณฺโณ  ปาปเกหิ
อกุสเลหิ   ธมฺเมหิ   มหนฺตญฺจ   สทตฺถํ   ปริหาเปติ   ฯ  อารทฺธวิริโย
จ    โข    ภิกฺขเว   สุขํ   วิหรติ   ปวิวิตฺโต   ปาปเกหิ   อกุสเลหิ
ธมฺเมหิ     มหนฺตญฺจ     สทตฺถํ     ปริปูเรติ    ฯ    น    ภิกฺขเว
@เชิงอรรถ:  ม. ยุ. อยํ ปาโฐ นตฺถิ ฯ
หีเนน   อคฺคสฺส   ปตฺติ  โหติ  อคฺเคน  จ  โข  [๑]-  อคฺคสฺส  ปตฺติ
โหติ ฯ มณฺฑเปยฺยมิทํ ภิกฺขเว พฺรหฺมจริยํ สตฺถา สมฺมุขีภูโต ฯ
     [๖๗]   ตสฺมาติห   ภิกฺขเว   วิริยํ  อารภถ  อปฺปตฺตสฺส  ปตฺติยา
อนธิคตสฺส    อธิคมาย   อสจฺฉิกตสฺส   สจฺฉิกิริยาย   เอวํ   โน   อยํ
อมฺหากํ   ปพฺพชฺชา   อวํกตา   ๒-  อวญฺฌา  ภวิสฺสติ  สผลา  สอุทฺรยา
เยสํ  ๓-  มยํ  ปริภุญฺชาม จีวรปิณฺฑปาตเสนาสนคิลานปจฺจยเภสชฺชปริกฺขารํ
เตสํ    เต    การา    อเมฺหสุ   มหปฺผลา   ภวิสฺสนฺติ   มหานิสํสาติ
เอวํ   หิ   โว   ภิกฺขเว   สิกฺขิตพฺพํ   ฯ   อตฺตตฺถํ  วา  หิ  ภิกฺขเว
สมฺปสฺสมาเนน  อลเมว  อปฺปมาเทน  สมฺปาเทตุํ  ฯ ปรตฺถํ วา หิ ภิกฺขเว
สมฺปสฺสมาเนน   อลเมว   อปฺปมาเทน  สมฺปาเทตุํ  ฯ  อุภยตฺถํ  วา  หิ
ภิกฺขเว สมฺปสฺสมาเนน อลเมว อปฺปมาเทน สมฺปาเทตุนฺติ ฯ ทุติยํ ฯ
     [๖๘]   สาวตฺถิยํ  วิหรติ  ...  ชานโตหํ ภิกฺขเว ปสฺสโต อาสวานํ
ขยํ   วทามิ   โน   อชานโต   โน   อปสฺสโต   ฯ   กิญฺจ   ภิกฺขเว
ชานโต   กึ  ปสฺสโต  อาสวานํ  ขโย  โหติ  ฯ  อิติ  รูปํ  อิติ  รูปสฺส
สมุทโย    อิติ   รูปสฺส   อตฺถงฺคโม   ฯเปฯ   อิติ   เวทนา   ฯเปฯ
อิติ   สญฺญา   ฯเปฯ   อิติ   สงฺขารา   ฯเปฯ   อิติ   วิญฺญาณํ   อิติ
วิญฺญาณสฺส   สมุทโย   อิติ   วิญฺญาณสฺส   อตฺถงฺคโมติ   ฯ   เอวํ  โข
ภิกฺขเว ชานโต เอวํ ปสฺสโต อาสวานํ ขโย โหติ ฯ
     [๖๙]   ยมฺปิ  ตํ  ภิกฺขเว  ขยสฺมึ  ขเย  ญาณํ  ตมฺปิ  ๔- สอุปนิสํ
วทามิ   โน  อนุปนิสํ  ฯ  กา  จ  ภิกฺขเว  ขเย  ญาณสฺส  อุปนิสา  ฯ
@เชิงอรรถ:  ม. ยุ. ภิกฺขเว ฯ    ม. ยุ. อยํ ปาโฐ นตฺถิ ฯ     ม. เยสญฺจ ฯ ยุ. เยสญฺหิ ฯ
@ ยุ. ตํ ฯ
วิมุตฺตีติสฺส   วจนียํ   ฯ  วิมุตฺติมฺปหํ  ๑-  ภิกฺขเว  สอุปนิสํ  วทามิ  โน
อนุปนิสํ  ฯ  กา  จ  ภิกฺขเว  วิมุตฺติยา  อุปนิสา ฯ วิราโคติสฺส วจนียํ ฯ
วิราคมฺปหํ   ภิกฺขเว   สอุปนิสํ   วทามิ   โน   อนุปนิสํ   ฯ   กา  จ
ภิกฺขเว   วิราคสฺส   อุปนิสา   ฯ   นิพฺพิทาติสฺส  วจนียํ  ฯ  นิพฺพิทมฺปหํ
ภิกฺขเว    สอุปนิสํ   วทามิ   โน   อนุปนิสํ   ฯ   กา   จ   ภิกฺขเว
นิพฺพิทาย     อุปนิสา     ฯ    ยถาภูตญาณทสฺสนนฺติสฺส    วจนียํ    ฯ
ยถาภูตญาณทสฺสนมฺปหํ   ภิกฺขเว   สอุปนิสํ   วทามิ   โน   อนุปนิสํ   ฯ
กา    จ    ภิกฺขเว   ยถาภูตญาณทสฺสนสฺส   อุปนิสา   ฯ   สมาธีติสฺส
วจนียํ ฯ สมาธิมฺปหํ ภิกฺขเว สอุปนิสํ วทามิ โน อนุปนิสํ ฯ
     {๖๙.๑}   กา  จ  ภิกฺขเว  สมาธิสฺส อุปนิสา ฯ สุขนฺติสฺส วจนียํ ฯ
สุขมฺปหํ  ภิกฺขเว  สอุปนิสํ  วทามิ  โน  อนุปนิสํ  ฯ กา จ ภิกฺขเว สุขสฺส
อุปนิสา   ฯ   ปสฺสทฺธีติสฺส   วจนียํ   ฯ  ปสฺสทฺธิมฺปหํ  ภิกฺขเว  สอุปนิสํ
วทามิ   โน   อนุปนิสํ   ฯ   กา  จ  ภิกฺขเว  ปสฺสทฺธิยา  อุปนิสา  ฯ
ปีตีติสฺส  วจนียํ  ฯ  ปีติมฺปหํ  ภิกฺขเว  สอุปนิสํ  วทามิ   โน  อนุปนิสํ ฯ
กา  จ  ภิกฺขเว  ปีติยา  อุปนิสา  ฯ  ปามุชฺชนฺติสฺส วจนียํ ฯ ปามุชฺชมฺปหํ
ภิกฺขเว    สอุปนิสํ   วทามิ   โน   อนุปนิสํ   ฯ   กา   จ   ภิกฺขเว
ปามุชฺชสฺส   อุปนิสา   ฯ   สทฺธาติสฺส   วจนียํ   ฯ  สทฺธมฺปหํ  ภิกฺขเว
สอุปนิสํ วทามิ โน อนุปนิสํ ฯ
     {๖๙.๒}   กา   จ   ภิกฺขเว   สทฺธาย  อุปนิสา  ฯ  ทุกฺขนฺติสฺส
วจนียํ   ฯ   ทุกฺขมฺปหํ   ภิกฺขเว   สอุปนิสํ   วทามิ   โน  อนุปนิสํ  ฯ
กา    จ   ภิกฺขเว   ทุกฺขสฺส   อุปนิสา   ฯ   ชาตีติสฺส   วจนียํ   ฯ
@เชิงอรรถ:  ม. ยุ. วิมุตฺติมฺปาหํ ฯ เอวมีทิเสสุ ปเทสุ ฯ
ชาติมฺปหํ   ภิกฺขเว   สอุปนิสํ   วทามิ   โน   อนุปนิสํ   ฯ   กา   จ
ภิกฺขเว   ชาติยา   อุปนิสา  ฯ  ภโวติสฺส  วจนียํ  ฯ  ภวมฺปหํ  ภิกฺขเว
สอุปนิสํ  วทามิ  โน  อนุปนิสํ  ฯ  กา  จ  ภิกฺขเว  ภวสฺส  อุปนิสา  ฯ
อุปาทานนฺติสฺส   วจนียํ   ฯ   อุปาทานมฺปหํ   ภิกฺขเว   สอุปนิสํ  วทามิ
โน  อนุปนิสํ  ฯ  กา  จ  ภิกฺขเว  อุปาทานสฺส  อุปนิสา  ฯ  ตณฺหาติสฺส
วจนียํ ฯ ตณฺหมฺปหํ ภิกฺขเว สอุปนิสํ วทามิ โน อนุปนิสํ ฯ
     {๖๙.๓}   กา  จ  ภิกฺขเว  ตณฺหาย  อุปนิสา ฯ เวทนาติสฺส วจนียํ
ฯเปฯ  ผสฺโสติสฺส  วจนียํ  ...  สฬายตนนฺติสฺส วจนียํ ... นามรูปนฺติสฺส
วจนียํ   ...   วิญฺญาณนฺติสฺส   วจนียํ   ...  สงฺขาราติสฺส  วจนียํ  ฯ
สงฺขาเรปหํ  ภิกฺขเว  สอุปนิเส  วทามิ  โน  อนุปนิเส  ฯ กา จ ภิกฺขเว
สงฺขารานํ อุปนิสา ฯ อวิชฺชาติสฺส วจนียํ ฯ
     {๖๙.๔}   อิติ โข ภิกฺขเว อวิชฺชูปนิสา สงฺขารา สงฺขารูปนิสํ วิญฺญาณํ
วิญฺญาณูปนิสํ     นามรูปํ     นามรูปูปนิสํ    สฬายตนํ    สฬายตนูปนิโส
ผสฺโส   ผสฺสูปนิสา   เวทนา   เวทนูปนิสา  ตณฺหา  ตณฺหูปนิสํ  อุปาทานํ
อุปาทานูปนิโส   ภโว   ภวูปนิสา   ชาติ   ชาตูปนิสํ   ทุกฺขํ  ทุกฺขูปนิสา
สทฺธา   สทฺธูปนิสํ   ปามุชฺชํ   ปามุชฺชูปนิสา   ปีติ   ปีตูปนิสา   ปสฺสทฺธิ
ปสฺสทฺธูปนิสํ    สุขํ   สุขูปนิโส   สมาธิ   สมาธูปนิสํ   ยถาภูตญาณทสฺสนํ
ยถาภูตญาณทสฺสนูปนิสา    นิพฺพิทา   นิพฺพิทูปนิโส   วิราโค   วิราคูปนิสา
วิมุตฺติ วิมุตฺตูปนิสํ ขเย ญาณํ ฯ
     [๗๐]   เสยฺยถาปิ   ภิกฺขเว  อุปริ  ปพฺพเต  ถุลฺลผุสิตเก  เทเว
วสฺสนฺเต    ตํ    อุทกํ   ยถานินฺนํ   ปวตฺตมานํ   ปพฺพตกนฺทรปทรสาขา
ปริปูเรติ   ปพฺพตกนฺทรปทรสาขา   ปริปูรา   กุสฺสุพฺเภ   ๑-  ปริปูเรนฺติ
กุสฺสุพฺภา    ปริปูรา   มหาโสพฺเภ   ปริปูเรนฺติ   มหาโสพฺภา   ปริปูรา
กุนฺนทิโย    ปริปูเรนฺติ    กุนฺนทิโย   ปริปูรา   มหานทิโย   ปริปูเรนฺติ
มหานทิโย  ปริปูรา  มหาสมุทฺทํ  [๒]-  ปริปูเรนฺติ  เอวเมว โข ภิกฺขเว
อวิชฺชูปนิสา     สงฺขารา     สงฺขารูปนิสํ     วิญฺญาณํ     วิญฺญาณูปนิสํ
นามรูปํ      นามรูปูปนิสํ      สฬายตนํ     สฬายตนูปนิโส     ผสฺโส
ผสฺสูปนิสา    เวทนา    เวทนูปนิสา    ตณฺหา    ตณฺหูปนิสํ   อุปาทานํ
อุปาทานูปนิโส     ภโว     ภวูปนิสา     ชาติ     ชาตูปนิสํ    ทุกฺขํ
ทุกฺขูปนิสา     สทฺธา     สทฺธูปนิสํ    ปามุชฺชํ    ปามุชฺชูปนิสา    ปีติ
ปีตูปนิสา     ปสฺสทฺธิ     ปสฺสทฺธูปนิสํ     สุขํ     สุขูปนิโส    สมาธิ
สมาธูปนิสํ     ยถาภูตญาณทสฺสนํ     ยถาภูตญาณทสฺสนูปนิสา     นิพฺพิทา
นิพฺพิทูปนิโส    วิราโค    วิราคูปนิสา    วิมุตฺติ    วิมุตฺตูปนิสํ    ขเย
ญาณนฺติ ฯ ตติยํ ฯ
     [๗๑]   ราชคเห  วิหรติ เวฬุวเน ... อถ โข อายสฺมา สารีปุตฺโต
ปุพฺพณฺหสมยํ     นิวาเสตฺวา     ปตฺตจีวรมาทาย    ราชคหํ    ปิณฺฑาย
ปาวิสิ   ฯ   อถ   โข   อายสฺมโต  สารีปุตฺตสฺส  เอตทโหสิ  อติปฺปโค
โข   ตาว   ราชคเห   ปิณฺฑาย   จริตุํ  ยนฺนูนาหํ  เยน  อญฺญติตฺถิยานํ
ปริพฺพาชกานํ   อาราโม   เตนุปสงฺกเมยฺยนฺติ   ฯ   อถ  โข  อายสฺมา
สารีปุตฺโต   เยน   อญฺญติตฺถิยานํ   ปริพฺพาชกานํ  อาราโม  เตนุปสงฺกมิ
@เชิงอรรถ:  ม. กุโสพฺเภ ฯ ยุ. กุสพฺเภ ฯ เอวมุปริปิ ฯ    ยุ. สาครํ ฯ
อุปสงฺกมิตฺวา    เตหิ    อญฺญติตฺถิเยหิ   ปริพฺพาชเกหิ   สทฺธึ   สมฺโมทิ
สมฺโมทนียํ กถํ สาราณียํ วีติสาเรตฺวา เอกมนฺตํ นิสีทิ ฯ
     [๗๒]   เอกมนฺตํ  นิสินฺนํ  โข  อายสฺมนฺตํ สารีปุตฺตํ เต อญฺญติตฺถิยา
ปริพฺพาชกา      เอตทโวจุํ      สนฺตาวุโส      สารีปุตฺต     เอเก
สมณพฺราหฺมณา    กมฺมวาทา    สยํกตํ   ทุกฺขํ   ปญฺญเปนฺติ   ฯ   สนฺติ
ปนาวุโส    สารีปุตฺต    เอเก    สมณพฺราหฺมณา   กมฺมวาทา   ปรกตํ
ทุกฺขํ   ปญฺญเปนฺติ   ฯ   สนฺตาวุโส   สารีปุตฺต   เอเก  สมณพฺราหฺมณา
กมฺมวาทา    สยํกตญฺจ    ปรกตญฺจ    ทุกฺขํ    ปญฺญเปนฺติ   ฯ   สนฺติ
ปนาวุโส    สารีปุตฺต   เอเก   สมณพฺราหฺมณา   กมฺมวาทา   อสยํการํ
อปรการํ   อธิจฺจ   สมุปฺปนฺนํ   ทุกฺขํ   ปญฺญเปนฺติ   ฯ   อิธ  ปนาวุโส
สารีปุตฺต   สมโณ   โคตโม   กึวาที   กิมกฺขายี  กถํ  พฺยากรมานา  จ
มยํ   วุตฺตวาทิโน   เจว   สมณสฺส   โคตมสฺส   อสฺสาม  น  จ  สมณํ
โคตมํ   อภูเตน   อพฺภาจิกฺเขยฺยาม   ธมฺมสฺส  จานุธมฺมํ  พฺยากเรยฺยาม
น จ โกจิ สหธมฺมิโก วาทานุปาโต คารยฺหํ ฐานํ อาคจฺเฉยฺยาติ ฯ
     [๗๓]   ปฏิจฺจสมุปฺปนฺนํ   โข   อาวุโส  ทุกฺขํ  วุตฺตํ  ภควตา  กึ
ปฏิจฺจ   ผสฺสํ   ปฏิจฺจ   อิติ   วทํ  วุตฺตวาที  เจว  ภควโต  อสฺส  น
จ   ภควนฺตํ   อภูเตน   อพฺภาจิกฺเขยฺย  ธมฺมสฺส  จานุธมฺมํ  พฺยากเรยฺย
น จ โกจิ สหธมฺมิโก วาทานุปาโต คารยฺหํ ฐานํ อาคจฺเฉยฺย ฯ
     {๗๓.๑}   ตตฺราวุโส  เย  เต  สมณพฺราหฺมณา  กมฺมวาทา  สยํกตํ
ทุกฺขํ   ปญฺญเปนฺติ  ตทปิ  ผสฺสปจฺจยา  ฯ  เยปิ  เต  ฯเปฯ  เยปิ  เต
ฯเปฯ   เยปิ   เต   สมณพฺราหฺมณา   กมฺมวาทา   อสยํการํ  อปรการํ
อธิจฺจ สมุปฺปนฺนํ ทุกฺขํ ปญฺญเปนฺติ ตทปิ ผสฺสปจฺจยา ฯ
     {๗๓.๒}   ตตฺราวุโส  เย  เต  สมณพฺราหฺมณา  กมฺมวาทา  สยํกตํ
ทุกฺขํ   ปญฺญเปนฺติ  เต  วต  อญฺญตฺร  ผสฺสา  ปฏิสํเวทยนฺตีติ  ๑-  เนตํ
ฐานํ   วิชฺชติ   ฯ  เยปิ  เต  สมณพฺราหฺมณา  กมฺมวาทา  ปรกตํ  ทุกฺขํ
ปญฺญเปนฺติ  เต  วต  อญฺญตฺร  ผสฺสา  ปฏิสํเวทยนฺตีติ เนตํ ฐานํ วิชฺชติ ฯ
เยปิ   เต   สมณพฺราหฺมณา   กมฺมวาทา   สยํกตญฺจ   ปรกตญฺจ   ทุกฺขํ
ปญฺญเปนฺติ   เต   วต   อญฺญตฺร   ผสฺสา   ปฏิสํเวทยนฺตีติ  เนตํ  ฐานํ
วิชฺชติ   ฯ   เยปิ  เต  สมณพฺราหฺมณา  กมฺมวาทา  อสยํการํ  อปรการํ
อธิจฺจ    สมุปฺปนฺนํ   ทุกฺขํ   ปญฺญเปนฺติ   เต   วต   อญฺญตฺร   ผสฺสา
ปฏิสํเวทยนฺตีติ เนตํ ฐานํ วิชฺชตีติ ฯ
     [๗๔]   อสฺโสสิ  โข  อายสฺมา  อานนฺโท  อายสฺมโต สารีปุตฺตสฺส
เตหิ   อญฺญติตฺถิเยหิ   ปริพฺพาชเกหิ   สทฺธึ   อิมํ  กถาสลฺลาปํ  ฯ  อถ
โข   อายสฺมา   อานนฺโท   ราชคเห   ปิณฺฑาย   จริตฺวา   ปจฺฉาภตฺตํ
ปิณฺฑปาตปฏิกฺกนฺโต     เยน     ภควา    เตนุปสงฺกมิ    อุปสงฺกมิตฺวา
ภควนฺตํ   อภีวาเทตฺวา   เอกมนฺตํ   นิสีทิ   ฯ  เอกมนฺตํ  นิสินฺโน  โข
อายสฺมา    อานนฺโท    ยาวตโก    อายสฺมโต    สารีปุตฺตสฺส   เตหิ
อญฺญติตฺถิเยหิ    ปริพฺพาชเกหิ    สทฺธึ    อโหสิ    กถาสลฺลาโป    ตํ
สพฺพํ ภควโต อาโรเจสิ ฯ
     [๗๕]   สาธุ  สาธุ  อานนฺท  ยถาตํ  สารีปุตฺโต  จ  ๒-  สมฺมา
@เชิงอรรถ:  ม. ยุ. ปฏิสํเวทิสฺสนฺตีติ ฯ เอวมุปริปิ ฯ    ม. ยุ. จสทฺโท นตฺถิ ฯ
@เอวมีทิเสสุ ฐาเนสุ ฯ
พฺยากรมาโน    พฺยากเรยฺย    ฯ    ปฏิจฺจสมุปฺปนฺนํ    โข    อานนฺท
ทุกฺขํ   วุตฺตํ  มยา  กึ  ปฏิจฺจ  ผสฺสํ  ปฏิจฺจ  อิติ  วทํ  วุตฺตวาที  เจว
เม   อสฺส   น   จ   มํ   อภูเตน  อพฺภาจิกฺเขยฺย  ธมฺมสฺส  จานุธมฺมํ
พฺยากเรยฺย   น   จ   โกจิ   สหธมฺมิโก  วาทานุปาโต  คารยฺหํ  ฐานํ
อาคจฺเฉยฺย   ฯ   ตตฺรานนฺท   เย   เต   สมณพฺราหฺมณา   กมฺมวาทา
สยํกตํ   ทุกฺขํ   ปญฺญเปนฺติ   ตทปิ   ผสฺสปจฺจยา  ฯ  เยปิ  เต  ฯเปฯ
เยปิ   เต   ฯเปฯ   เยปิ   เต  สมณพฺราหฺมณา  กมฺมวาทา  อสยํการํ
อปรการํ      อธิจฺจ     สมุปฺปนฺนํ     ทุกฺขํ     ปญฺญเปนฺติ     ตทปิ
ผสฺสปจฺจยา ฯ
     {๗๕.๑}   ตตฺรานนฺท  เยปิ  เต  สมณพฺราหฺมณา  กมฺมวาทา สยํกตํ
ทุกฺขํ  ปญฺญเปนฺติ  เต  วต  อญฺญตฺร  ผสฺสา  ปฏิสํเวทยนฺตีติ  เนตํ  ฐานํ
วิชฺชติ  ฯ  เยปิ  เต  ฯเปฯ  เยปิ  เต  ฯเปฯ เยปิ เต สมณพฺราหฺมณา
กมฺมวาทา   อสยํการํ   อปรการํ   อธิจฺจ   สมุปฺปนฺนํ  ทุกฺขํ  ปญฺญเปนฺติ
เต วต อญฺญตฺร ผสฺสา ปฏิสํเวทยนฺตีติ เนตํ ฐานํ วิชฺชติ ฯ
     [๗๖]   เอกมิทาหํ   อานนฺท   สมยํ   อิเธว  ราชคเห  วิหรามิ
เวฬุวเน    กลนฺทกนิวาเป   ฯ   อถ   ขฺวาหํ   อานนฺท   ปุพฺพณฺหสมยํ
นิวาเสตฺวา   ปตฺตจีวรมาทาย   ราชคหํ  ๑-  ปิณฺฑาย  ปาวิสึ  ฯ  ตสฺส
มยฺหํ   อานนฺท   เอตทโหสิ   อติปฺปโค   โข  ตาว  ราชคเห  ปิณฺฑาย
จริตุํ    ยนฺนูนาหํ    เยน    อญฺญติตฺถิยานํ    ปริพฺพาชกานํ   อาราโม
เตนุปสงฺกเมยฺยนฺติ ฯ
     {๗๖.๑}   อถ  ขฺวาหํ  อานนฺท  เยน  อญฺญติตฺถิยานํ  ปริพฺพาชกานํ
อาราโม     เตนุปสงฺกมึ     อุปสงฺกมิตฺวา     เตหิ     อญฺญติตฺถิเยหิ
@เชิงอรรถ:  ยุ. ราชคเห ฯ
ปริพฺพาชเกหิ     สทฺธึ     สมฺโมทึ     สมฺโมทนียํ    กถํ    สาราณียํ
วีติสาเรตฺวา   เอกมนฺตํ   นิสีทึ  ฯ  เอกมนฺตํ  นิสินฺนํ  โข  มํ  อานนฺท
เต    อญฺญติตฺถิยา    ปริพฺพาชกา    เอตทโวจุํ    สนฺตาวุโส   โคตม
เอเก    สมณพฺราหฺมณา    กมฺมวาทา    สยํกตํ    ทุกฺขํ    ปญฺญเปนฺติ
สนฺติ   ปนาวุโส   โคตม   เอเก   สมณพฺราหฺมณา   กมฺมวาทา  ปรกตํ
ทุกฺขํ    ปญฺญเปนฺติ    สนฺตาวุโส    โคตม    เอเก    สมณพฺราหฺมณา
กมฺมวาทา     สยํกตญฺจ     ปรกตญฺจ     ทุกฺขํ    ปญฺญเปนฺติ    สนฺติ
ปนาวุโส    โคตม    เอเก    สมณพฺราหฺมณา   กมฺมวาทา   อสยํการํ
อปรการํ   อธิจฺจ   สมุปฺปนฺนํ  ทุกฺขํ  ปญฺญเปนฺติ  ฯ  อิธ  โน  อายสฺมา
โคตโม   กึวาที   กิมกฺขายี   กถํ   พฺยากรมานา  จ  มยํ  วุตฺตวาทิโน
เจว   อายสฺมโต   โคตมสฺส   อสฺสาม   น   จ   อายสฺมนฺตํ   โคตมํ
อภูเตน    อพฺภาจิกฺเขยฺยาม   ธมฺมสฺส   จานุธมฺมํ   พฺยากเรยฺยาม   น
จ โกจิ สหธมฺมิโก วาทานุปาโต คารยฺหํ ฐานํ อาคจฺเฉยฺยาติ ฯ
     {๗๖.๒}   เอวํ  วุตฺตาหํ  อานนฺท  เต  อญฺญติตฺถิเย  ปริพฺพาชเก
เอตทโวจํ   ปฏิจฺจสมุปฺปนฺนํ  โข  อาวุโส  ทุกฺขํ  วุตฺตํ  มยา  กึ  ปฏิจฺจ
ผสฺสํ  ปฏิจฺจ  อิติ  วทํ  วุตฺตวาที  เจว  เม  อสฺส  น  จ  มํ  อภูเตน
อพฺภาจิกฺเขยฺย    ธมฺมสฺส    จานุธมฺมํ    พฺยากเรยฺย   น   จ   โกจิ
สหธมฺมิโก    วาทานุปาโต    คารยฺหํ   ฐานํ   อาคจฺเฉยฺย   ๑-   ฯ
ตตฺราวุโส    เย    เต   สมณพฺราหฺมณา   กมฺมวาทา   สยํกตํ   ทุกฺขํ
ปญฺญเปนฺติ   ตทปิ   ผสฺสปจฺจยา   ฯ   เยปิ   เต   ฯเปฯ  เยปิ  เต
@เชิงอรรถ:  ม. ยุ. อิติสทฺโท ทิสฺสติ ฯ
ฯเปฯ   เยปิ   เต   สมณพฺราหฺมณา   กมฺมวาทา   อสยํการํ  อปรการํ
อธิจฺจ   สมุปฺปนฺนํ   ทุกฺขํ  ปญฺญเปนฺติ  ตทปิ  ผสฺสปจฺจยา  ฯ  ตตฺราวุโส
เย    เต    สมณพฺราหฺมณา   กมฺมวาทา   สยํกตํ   ทุกฺขํ   ปญฺญเปนฺติ
เต   วต   อญฺญตฺร   ผสฺสา   ปฏิสํเวทยนฺตีติ   เนตํ  ฐานํ  วิชฺชติ  ฯ
เยปิ   เต   ฯเปฯ   เยปิ   เต   ฯเปฯ   เยปิ  เต  สมณพฺราหฺมณา
กมฺมวาทา     อสยํการํ     อปรการํ     อธิจฺจ    สมุปฺปนฺนํ    ทุกฺขํ
ปญฺญเปนฺติ   เต   วต   อญฺญตฺร   ผสฺสา   ปฏิสํเวทยนฺตีติ  เนตํ  ฐานํ
วิชฺชตีติ ฯ
     [๗๗]   อจฺฉริยํ  ภนฺเต  อพฺภูตํ  ภนฺเต  ยตฺร  หิ  นาม  เอเกน
ปเทน   สพฺโพ   อตฺโถ   วุตฺโต   ภวิสฺสติ   สิยา   นุ   โข   ภนฺเต
เอเสวตฺโถ  วิตฺถาเรน  วุจฺจมาโน  คมฺภีโร  เจว  อสฺส  คมฺภีราวภาโส
จาติ ฯ เตนหานนฺท ตญฺเญเวตฺถ ปฏิภาตูติ ฯ
     [๗๘]   สเจ  มํ  ภนฺเต  เอวํ  ปุจฺเฉยฺยุํ  ชรามรณํ อาวุโส อานนฺท
กึนิทานํ  กึสมุทยํ  กึชาติกํ  กึปภวนฺติ  ฯ  เอวํ  ปุฏฺโฐ  ๑-  อหํ  ภนฺเต
เอวํ   พฺยากเรยฺยํ   ชรามรณํ   โข   อาวุโส   ชาตินิทานํ  ชาติสมุทยํ
ชาติชาติกํ    ชาติปฺปภวนฺติ   ฯ   เอวํ   ปุฏฺโฐ   อหํ   ภนฺเต   เอวํ
พฺยากเรยฺยํ ฯ
     {๗๘.๑}   สเจ  มํ  ภนฺเต  เอวํ  ปุจฺเฉยฺยุํ ชาติ ปนาวุโส อานนฺท
กึนิทานา   กึสมุทยา  กึชาติกา  กึปภวาติ  ฯ  เอวํ  ปุฏฺโฐ  อหํ  ภนฺเต
เอวํ    พฺยากเรยฺยํ    ชาติ   โข   อาวุโส   ภวนิทานา   ภวสมุทยา
ภวชาติกา    ภวปฺปภวาติ    ฯ   เอวํ   ปุฏฺโฐ   อหํ   ภนฺเต   เอวํ
@เชิงอรรถ:  ม. ปุฏฺโฐหํ ฯ ยุ. ปุฏฺฐาหมฺภนฺเต ฯ เอวมุปริปิ ฯ
พฺยากเรยฺยํ ฯ
     {๗๘.๒}   สเจ  มํ  ภนฺเต  เอวํ  ปุจฺเฉยฺยุํ ภโว ปนาวุโส อานนฺท
กึนิทาโน   กึสมุทโย  กึชาติโก  กึปภโวติ  ฯ  เอวํ  ปุฏฺโฐ  อหํ  ภนฺเต
เอวํ  พฺยากเรยฺยํ  ภโว  โข  อาวุโส  อุปาทานนิทาโน  อุปาทานสมุทโย
อุปาทานชาติโก   อุปาทานปฺปภโวติ  ฯ  เอวํ  ปุฏฺโฐ  อหํ  ภนฺเต  เอวํ
พฺยากเรยฺยํ ฯ
     {๗๘.๓}   สเจ  มํ  ภนฺเต เอวํ ปุจฺเฉยฺยุํ อุปาทานํ ปนาวุโส ฯเปฯ
ตณฺหา  ปนาวุโส  ฯเปฯ  เวทนา  ปนาวุโส  ฯเปฯ  สเจ มํ ภนฺเต เอวํ
ปุจฺเฉยฺยุํ   ผสฺโส   ปนาวุโส   อานนฺท   กึนิทาโน  กึสมุทโย  กึชาติโก
กึปภโวติ  ฯ  เอวํ  ปุฏฺโฐ อหํ ภนฺเต เอวํ พฺยากเรยฺยํ ผสฺโส โข อาวุโส
สฬายตนนิทาโน           สฬายตนสมุทโย           สฬายตนชาติโก
สฬายตนปฺปภโว  ๑-  ฉนฺนํ เตฺวว อาวุโส ผสฺสายตนานํ อเสสวิราคนิโรธา
ผสฺสนิโรโธ   ผสฺสนิโรธา   เวทนานิโรโธ  เวทนานิโรธา  ตณฺหานิโรโธ
ตณฺหานิโรธา   อุปาทานนิโรโธ   อุปาทานนิโรธา  ภวนิโรโธ  ภวนิโรธา
ชาตินิโรโธ    ชาตินิโรธา   ชรามรณํ   โสกปริเทวทุกฺขโทมนสฺสุปายาสา
นิรุชฺฌนฺติ   ฯ  เอวเมตสฺส  เกวลสฺส  ทุกฺขกฺขนฺธสฺส  นิโรโธ  โหตีติ  ฯ
เอวํ ปุฏฺโฐ อหํ ภนฺเต เอวํ พฺยากเรยฺยนฺติ ฯ จตุตฺถํ ฯ
     [๗๙]   สาวตฺถิยํ  วิหรติ  ... อถ โข อายสฺมา ภูมิโช สายณฺหสมยํ
ปฏิสลฺลานา     วุฏฺฐิโต     เยนายสฺมา     สารีปุตฺโต    เตนุปสงฺกมิ
อุปสงฺกมิตฺวา    อายสฺมตา   สารีปุตฺเตน   สทฺธึ   สมฺโมทิ   สมฺโมทนียํ
กถํ   สาราณียํ   วีติสาเรตฺวา   เอกมนฺตํ  นีสีทิ  ฯ  เอกมนฺตํ  นิสินฺโน
@เชิงอรรถ:  ม. ยุ. อิติสทฺโท ทิสฺสติ ฯ
โข   อายสฺมา   ภูมิโช   อายสฺมนฺตํ   สารีปุตฺตํ  เอตทโวจ  สนฺตาวุโส
สารีปุตฺต    เอเก    สมณพฺราหฺมณา    กมฺมวาทา    สยํกตํ   สุขทุกฺขํ
ปญฺญเปนฺติ    สนฺติ    ปนาวุโส    สารีปุตฺต    เอเก   สมณพฺราหฺมณา
กมฺมวาทาปรกตํ    สุขทุกฺขํ    ปญฺญเปนฺติ   สนฺตาวุโส   ๑-   สารีปุตฺต
เอเก    สมณพฺราหฺมณา    กมฺมวาทา   สยํกตญฺจ   ปรกตญฺจ   สุขทุกฺขํ
ปญฺญเปนฺติ  สนฺติ  ปนาวุโส  สารีปุตฺต  เอเก  สมณพฺราหฺมณา  กมฺมวาทา
อสยํการํ    อปรการํ    อธิจฺจ   สมุปฺปนฺนํ   สุขทุกฺขํ   ปญฺญเปนฺติ   ฯ
อิธ  โน  อาวุโส  สารีปุตฺต  ภควา  กึวาที  กิมกฺขายี  กถํ พฺยากรมานา
จ   มยํ   วุตฺตวาทิโน   เจว   ภควโต   อสฺสาม   น   จ   ภควนฺตํ
อภูเตน    อพฺภาจิกฺเขยฺยาม   ธมฺมสฺส   จานุธมฺมํ   พฺยากเรยฺยาม   น
จ โกจิ สหธมฺมิโก วาทานุปาโต คารยฺหํ ฐานํ อาคจฺเฉยฺยาติ ฯ
     [๘๐]   ปฏิจฺจสมุปฺปนฺนํ   โข   อาวุโส   สุขทุกฺขํ  วุตฺตํ  ภควตา
กึ   ปฏิจฺจ   ผสฺสํ   ปฏิจฺจ   อิติ  วทํ  วุตฺตวาที  เจว  ภควโต  อสฺส
น    จ    ภควนฺตํ    อภูเตน    อพฺภาจิกฺเขยฺย   ธมฺมสฺส   จานุธมฺมํ
พฺยากเรยฺย   น   จ   โกจิ   สหธมฺมิโก  วาทานุปาโต  คารยฺหํ  ฐานํ
อาคจฺเฉยฺย   ฯ   ตตฺราวุโส   เย   เต   สมณพฺราหฺมณา   กมฺมวาทา
สยํกตํ   สุขทุกฺขํ   ปญฺญเปนฺติ  ตทปิ  ผสฺสปจฺจยา  ฯ  เยปิ  เต  ฯเปฯ
เยปิ   เต   ฯเปฯ   เยปิ   เต  สมณพฺราหฺมณา  กมฺมวาทา  อสยํการํ
อปรการํ   อธิจฺจ  สมุปฺปนฺนํ  สุขทุกฺขํ  ปญฺญเปนฺติ  ตทปิ  ผสฺสปจฺจยา  ฯ
ตตฺราวุโส     เย     เต     สมณพฺราหฺมณา    กมฺมวาทา    สยํกตํ
@เชิงอรรถ:  ยุ. สนฺติ ปนาวุโส ฯ
สุขทุกฺขํ    ปญฺญเปนฺติ    เต   วต   อญฺญตฺร   ผสฺสา   ปฏิสํเวทยนฺตีติ
เนตํ  ฐานํ  วิชฺชติ  ฯ  เยปิ  เต  ฯเปฯ  เยปิ  เต  ฯเปฯ  เยปิ เต
สมณพฺราหฺมณา    กมฺมวาทา   อสยํการํ   อปรการํ   อธิจฺจ   สมุปฺปนฺนํ
สุขทุกฺขํ    ปญฺญเปนฺติ    เต   วต   อญฺญตฺร   ผสฺสา   ปฏิสํเวทยนฺตีติ
เนตํ ฐานํ วิชฺชตีติ ฯ
     [๘๑]   อสฺโสสิ  โข  อายสฺมา  อานนฺโท  อายสฺมโต  สารีปุตฺตสฺส
อายสฺมตา   ภูมิเชน   สทฺธึ   อิมํ  กถาสลฺลาปํ  ฯ  อถ  โข  อายสฺมา
อานนฺโท    เยน    ภควา    เตนุปสงฺกมิ    อุปสงฺกมิตฺวา    ภควนฺตํ
อภิวาเทตฺวา   เอกมนฺตํ   นิสีทิ   ฯ  เอกมนฺตํ  นิสินฺโน  โข  อายสฺมา
อานนฺโท    ยาวตโก   อายสฺมโต   สารีปุตฺตสฺส   อายสฺมตา   ภูมิเชน
สทฺธึ อโหสิ กถาสลฺลาโป ตํ สพฺพํ ภควโต อาโรเจสิ ฯ
     [๘๒]   สาธุ    สาธุ   อานนฺท   ยถาตํ  สารีปุตฺโต  จ  สมฺมา
พฺยากรมาโน    พฺยากเรยฺย    ฯ    ปฏิจฺจสมุปฺปนฺนํ    โข    อานนฺท
สุขทุกฺขํ   วุตฺตํ   มยา   กึ   ปฏิจฺจ  ผสฺสํ  ปฏิจฺจ  อิติ  วทํ  วุตฺตวาที
เจว  เม  อสฺส  น  จ  มํ  อภูเตน  อพฺภาจิกฺเขยฺย  ธมฺมสฺส  จานุธมฺมํ
พฺยากเรยฺย   น   จ   โกจิ   สหธมฺมิโก  วาทานุปาโต  คารยฺหํ  ฐานํ
อาคจฺเฉยฺย ฯ
     {๘๒.๑}   ตตฺรานนฺท  เย  เต  สมณพฺราหฺมณา  กมฺมวาทา  สยํกตํ
สุขทุกฺขํ  ปญฺญเปนฺติ  ตทปิ  ผสฺสปจฺจยา  ฯ  เยปิ  เต  ฯเปฯ  เยปิ เต
ฯเปฯ   เยปิ   เต   สมณพฺราหฺมณา   กมฺมวาทา   อสยํการํ  อปรการํ
อธิจฺจ สมุปฺปนฺนํ สุขทุกฺขํ ปญฺญเปนฺติ ตทปิ ผสฺสปจฺจยา ฯ
     {๘๒.๒}   ตตฺรานนฺท   เย   เต   สมณพฺราหฺมณา   กมฺมวาทา
สยํกตํ   สุขทุกฺขํ   ปญฺญเปนฺติ  เต  วต  อญฺญตฺร  ผสฺสา  ปฏิสํเวทยนฺตีติ
เนตํ  ฐานํ  วิชฺชติ  ฯ  เยปิ  เต  ฯเปฯ  เยปิ  เต  ฯเปฯ  เยปิ เต
สมณพฺราหฺมณา    กมฺมวาทา   อสยํการํ   อปรการํ   อธิจฺจ   สมุปฺปนฺนํ
สุขทุกฺขํ    ปญฺญเปนฺติ    เต   วต   อญฺญตฺร   ผสฺสา   ปฏิสํเวทยนฺตีติ
เนตํ ฐานํ วิชฺชติ ฯ
     [๘๓]   กาเย   วา  หานนฺท  สติ  กายสญฺเจตนาเหตุ  อุปฺปชฺชติ
อชฺฌตฺตํ    สุขทุกฺขํ   วาจายํ   วา   หานนฺท   สติ   วจีสญฺเจตนาเหตุ
อุปฺปชฺชติ     อชฺฌตฺตํ     สุขทุกฺขํ     มเน    วา    หานนฺท    สติ
มโนสญฺเจตนาเหตุ   อุปฺปชฺชติ   อชฺฌตฺตํ   สุขทุกฺขํ   ฯ  อวิชฺชาปจฺจยาว
สามํ  วา  ตํ  อานนฺท  กายสงฺขารํ อภิสงฺขโรติ ยํปจฺจยายตํ ๑- อุปฺปชฺชติ
อชฺฌตฺตํ  สุขทุกฺขํ  ฯ  ปเร วายตํ ๒- อานนฺท กายสงฺขารํ อภิสงฺขโรติ ๓-
ยํปจฺจยายตํ   อุปฺปชฺชติ   อชฺฌตฺตํ   สุขทุกฺขํ   ฯ   สมฺปชาโน   วา  ตํ
อานนฺท   กายสงฺขารํ   อภิสงฺขโรติ   ยํปจฺจยายตํ   อุปฺปชฺชติ   อชฺฌตฺตํ
สุขทุกฺขํ   ฯ   อสมฺปชาโน   วา  ตํ  อานนฺท  กายสงฺขารํ  อภิสงฺขโรติ
ยํปจฺจยายตํ   อุปฺปชฺชติ   อชฺฌตฺตํ   สุขทุกฺขํ  ฯ  สามํ  วา  ตํ  อานนฺท
วจีสงฺขารํ   อภิสงฺขโรติ   ยํปจฺจยายตํ   อุปฺปชฺชติ  อชฺฌตฺตํ  สุขทุกฺขํ  ฯ
@เชิงอรรถ:  ม. ยุ. ยํ ปจฺจยาสฺส ตํ ฯ เอวมุปริปิ ฯ    ม. ปเร วา ตํ ฯ ยุ. ปเร วาสฺส
@ตํ ฯ เอวมุปริปิ ฯ    ม. ยุ. อภิสงฺขโรนฺติ ฯ
ปเร    วายตํ    อานนฺท    วจีสงฺขารํ    อภิสงฺขโรติ    ยํปจฺจยายตํ
อุปฺปชฺชติ   อชฺฌตฺตํ   สุขทุกฺขํ   ฯ  สมฺปชาโน  วา  ตํ  อานนฺท  ฯเปฯ
อสมฺปชาโน   วา   ตํ   อานนฺท   วจีสงฺขารํ  อภิสงฺขโรติ  ยํปจฺจยายตํ
อุปฺปชฺชติ   อชฺฌตฺตํ   สุขทุกฺขํ   ฯ  สามํ  วา  ตํ  อานนฺท  มโนสงฺขารํ
อภิสงฺขโรติ    ยํปจฺจยายตํ   อุปฺปชฺชติ   อชฺฌตฺตํ   สุขทุกฺขํ   ฯ   ปเร
วายตํ    อานนฺท   มโนสงฺขารํ   อภิสงฺขโรติ   ยํปจฺจยายตํ   อุปฺปชฺชติ
อชฺฌตฺตํ   สุขทุกฺขํ  ฯ  สมฺปชาโน  วา  ตํ  อานนฺท  ฯเปฯ  อสมฺปชาโน
วา   ตํ   อานนฺท   มโนสงฺขารํ   อภิสงฺขโรติ   ยํปจฺจยายตํ  อุปฺปชฺชติ
อชฺฌตฺตํ สุขทุกฺขํ ฯ อิเมสุ อานนฺท [๑]- ธมฺเมสุ อวิชฺชา อนุปติตา ฯ
     [๘๔]   อวิชฺชาย  เตฺวว  อานนฺท  อเสสวิราคนิโรธา  โส  กาโย
น   โหติ   ยํปจฺจยายตํ   อุปฺปชฺชติ   อชฺฌตฺตํ  สุขทุกฺขํ  ฯ  สา  วาจา
น   โหติ   ยํปจฺจยายตํ   อุปฺปชฺชติ   อชฺฌตฺตํ   สุขทุกฺขํ  ฯ  โส  มโน
น  โหติ  ยํปจฺจยายตํ  อุปฺปชฺชติ  อชฺฌตฺตํ  สุขทุกฺขํ  ฯ  เขตฺตํ  วา  ๒-
น  โหติ  ฯ  วตฺถุํ  วา  ๓-  น  โหติ  ฯ  อายตนํ  วา ๔- น โหติ ฯ
อธิกรณํ   ตํ   วา   ๕-   น   โหติ   ยํปจฺจยายตํ  อุปฺปชฺชติ  อชฺฌตฺตํ
สุขทุกฺขนฺติ ฯ ปญฺจมํ ฯ
     [๘๕]   สาวตฺถิยํ วิหรติ ... อถ โข อายสฺมา อุปวาโณ เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ
     [๘๖]   เอกมนฺตํ   นิสินฺโน   โข   อายสฺมา  อุปวาโณ  ภควนฺตํ
@เชิงอรรถ:  ยุ. ฉสุ ฯ ๒-๓-๔ ม. ยุ. ตํ ฯ     ม. ยุ. วาสทฺโท นตฺถิ ฯ
เอตทโวจ   สนฺติ   ปน   ๑-   ภนฺเต   เอเก  สมณพฺราหฺมณา  สยํกตํ
ทุกฺขํ    ปญฺญเปนฺติ    สนฺติ    ปน    ภนฺเต   เอเก   สมณพฺราหฺมณา
ปรกตํ   ทุกฺขํ   ปญฺญเปนฺติ   สนฺติ   ปน  ภนฺเต  เอเก  สมณพฺราหฺมณา
สยํกตญฺจ        ปรกตญฺจ        ทุกฺขํ       ปญฺญเปนฺติ       สนฺติ
ปน    ภนฺเต   เอเก   สมณพฺราหฺมณา   อสยํการํ   อปรการํ   อธิจฺจ
สมุปฺปนฺนํ   ทุกฺขํ   ปญฺญเปนฺติ   ฯ   อิธ   โน   ภนฺเต  ภควา  กึวาที
กิมกฺขายี   กถํ   พฺยากรมานา   จ   มยํ   วุตฺตวาทิโน  เจว  ภควโต
อสฺสาม    น    จ    ภควนฺตํ   อภูเตน   อพฺภาจิกฺเขยฺยาม   ธมฺมสฺส
จานุธมฺมํ   พฺยากเรยฺยาม   น   จ   โกจิ   สหธมฺมิโก   วาทานุปาโต
คารยฺหํ ฐานํ อาคจฺเฉยฺยาติ ฯ
     [๘๗]   ปฏิจฺจสมุปฺปนฺนํ   โข   อุปวาณ   ทุกฺขํ   วุตฺตํ  มยา  กึ
ปฏิจฺจ   ผสฺสํ   ปฏิจฺจ   อิติ   วทํ  วุตฺตวาที  เจว  เม  อสฺส  น  จ
มํ    อภูเตน   อพฺภาจิกฺเขยฺย   ธมฺมสฺส   จานุธมฺมํ   พฺยากเรยฺย   น
จ โกจิ สหธมฺมิโก วาทานุปาโต คารยฺหํ ฐานํ อาคจฺเฉยฺย ฯ
     {๘๗.๑}   ตตฺรูปวาณ   เย   เต   สมณพฺราหฺมณา  สยํกตํ  ทุกฺขํ
ปญฺญเปนฺติ  ตทปิ  ผสฺสปจฺจยา  ฯ  เยปิ  เต ฯเปฯ เยปิ เต ฯเปฯ เยปิ
เต   สมณพฺราหฺมณา   อสยํการํ   อปรการํ   อธิจฺจ   สมุปฺปนฺนํ   ทุกฺขํ
ปญฺญเปนฺติ ตทปิ ผสฺสปจฺจยา ฯ
     {๘๗.๒}   ตตฺรูปวาณ    เย    เต    สมณพฺราหฺมณา   สยํกตํ
ทุกฺขํ       ปญฺญเปนฺติ       เต      วต      อญฺญตฺร      ผสฺสา
@เชิงอรรถ:  สพฺพวาเรสุ สนฺติ หีติ ปาฐทฺวเยน ภวิตพฺพํ ฯ
ปฏิสํเวทยนฺตีติ   เนตํ   ฐานํ   วิชฺชติ   ฯ   เยปิ   เต  ฯเปฯ  เยปิ
เต   ฯเปฯ   เยปิ   เต   สมณพฺราหฺมณา  อสยํการํ  อปรการํ  อธิจฺจ
สมุปฺปนฺนํ     ทุกฺขํ     ปญฺญเปนฺติ    เต    วต    อญฺญตฺร    ผสฺสา
ปฏิสํเวทยนฺตีติ เนตํ ฐานํ วิชฺชตีติ ฯ ฉฏฺฐํ ฯ
     [๘๘]   สาวตฺถิยํ  วิหรติ  ...  อวิชฺชาปจฺจยา  ภิกฺขเว  สงฺขารา
สงฺขารปจฺจยา   วิญฺญาณํ   ฯเปฯ   เอวเมตสฺส  เกวลสฺส  ทุกฺขกฺขนฺธสฺส
สมุทโย โหติ ฯ
     [๘๙]   กตมญฺจ  ภิกฺขเว  ชรามรณํ  ฯ  ยา  เตสํ  เตสํ  สตฺตานํ
ตมฺหิ   ตมฺหิ   สตฺตนิกาเย  ชรา  ชีรณตา  ขณฺฑิจฺจํ  ปาลิจฺจํ  วลิตฺตจตา
อายุโน  สํหานิ  อินฺทฺริยานํ  ปริปาโก  อยํ  วุจฺจติ  ชรา  ฯ  ยา  เตสํ
เตสํ   สตฺตานํ   ตมฺหา   ตมฺหา   สตฺตนิกายา   จุติ   จวนตา  เภโท
อนฺตรธานํ    มจฺจุ   มรณํ   กาลกิริยา   ขนฺธานํ   เภโท   กเฬวรสฺส
นิกฺเขโป   ชีวิตินฺทฺริยสฺส   อุปจฺเฉโท   ๑-  อิทํ  วุจฺจติ  มรณํ  ฯ  อิติ
อยญฺจ  ชรา  อิทญฺจ  มรณํ  อิทํ  วุจฺจติ  ภิกฺขเว ชรามรณํ ฯ ชาติสมุทยา
ชรามรณสมุทโย    ชาตินิโรธา    ชรามรณนิโรโธ    อยเมว    อริโย
อฏฺฐงฺคิโก     มคฺโค     ชรามรณนิโรธคามินี     ปฏิปทา    เสยฺยถีทํ
สมฺมาทิฏฺฐิ       สมฺมาสงฺกปฺโป       สมฺมาวาจา      สมฺมากมฺมนฺโต
สมฺมาอาชีโว สมฺมาวายาโม สมฺมาสติ สมฺมาสมาธิ ฯ
     {๘๙.๑}   กตมา  จ  ภิกฺขเว  ชาติ  ฯเปฯ  กตโม  จ  ภิกฺขเว
ภโว   ...   กตมญฺจ   ภิกฺขเว   อุปาทานํ  ...  กตมา  จ  ภิกฺขเว
ตณฺหา    ...   กตมา   จ   ภิกฺขเว   เวทนา   ...   กตโม   จ
@เชิงอรรถ:  ม. ยุ. อิทํ ปาฐทฺวยํ นตฺถิ ฯ เอวมุปริปิ ฯ
ภิกฺขเว  ผสฺโส  ...  กตมญฺจ  ภิกฺขเว  สฬายตนํ  ... กตมญฺจ ภิกฺขเว
นามรูปํ  ...  กตมญฺจ  ภิกฺขเว  วิญฺญาณํ ... กตเม จ ภิกฺขเว สงฺขารา
ตโยเม   ภิกฺขเว   สงฺขารา   กายสงฺขาโร  วจีสงฺขาโร  จิตฺตสงฺขาโร
อิเม   วุจฺจนฺติ   ภิกฺขเว   สงฺขารา  ฯ  อวิชฺชาสมุทยา  สงฺขารสมุทโย
อวิชฺชานิโรธา   สงฺขารนิโรโธ   อยเมว   อริโย   อฏฺฐงฺคิโก   มคฺโค
สงฺขารนิโรธคามินี     ปฏิปทา     เสยฺยถีทํ     สมฺมาทิฏฺฐิ     ฯเปฯ
สมฺมาสมาธิ ฯ
     [๙๐]   ยโต  โข  ภิกฺขเว  อริยสาวโก เอวํ ปจฺจยํ ปชานาติ เอวํ
ปจฺจยสมุทยํ     ปชานาติ    เอวํ    ปจฺจยนิโรธํ    ปชานาติ    เอวํ
ปจฺจยนิโรธคามินึ    ปฏิปทํ    ปชานาติ    ฯ   อยํ   วุจฺจติ   ภิกฺขเว
อริยสาวโก    ทิฏฺฐิสมฺปนฺโน    อิติปิ   ทสฺสนสมฺปนฺโน   อิติปิ   อาคโต
อิมํ   สทฺธมฺมํ   อิติปิ   ปสฺสติ   อิมํ  สทฺธมฺมํ  อิติปิ  เสกฺเขน  ญาเณน
สมนฺนาคโต   อิติปิ   เสกฺขาย   วิชฺชาย   สมนฺนาคโต  อิติปิ  ธมฺมโสตํ
สมาปนฺโน     อิติปิ    อริโย    นิพฺเพธิกปญฺโญ    อิติปิ    อมตทฺวารํ
อาหจฺจ ติฏฺฐติ อิติปีติ ฯ สตฺตมํ ฯ
     [๙๑]   สาวตฺถิยํ  วิหรติ  ...  ตตฺร  โข  ฯเปฯ  อิธ  ภิกฺขเว
ภิกฺขุ   ชรามรณํ   ปชานาติ   ชรามรณสมุทยํ   ปชานาติ  ชรามรณนิโรธํ
ปชานาติ   ชรามรณนิโรธคามินึ   ปฏิปทํ   ปชานาติ  ฯ  ชาตึ  ปชานาติ
ฯเปฯ  ภวํ  ปชานาติ  ...  อุปาทานํ ปชานาติ ... ตณฺหํ ปชานาติ ...
เวทนํ  ปชานาติ ... ผสฺสํ ปชานาติ ... สฬายตนํ ปชานาติ ... นามรูปํ
ปชานาติ  ...  วิญฺญาณํ  ปชานาติ  ... สงฺขาเร ปชานาติ สงฺขารสมุทยํ
ปชานาติ     สงฺขารนิโรธํ    ปชานาติ    สงฺขารนิโรธคามินึ    ปฏิปทํ
ปชานาติ ฯ
     [๙๒]   กตมญฺจ  ภิกฺขเว  ชรามรณํ  ฯ  ยา  เตสํ  เตสํ  สตฺตานํ
ตมฺหิ   ตมฺหิ  สตฺตนิกาเย  ชรา  ชีรณตา  ขณฺฑิจฺจํ  ปาลิจฺจํ  ปาลิตฺตจตา
อายุโน  สํหานิ  อินฺทฺริยานํ  ปริปาโก  อยํ  วุจฺจติ  ชรา  ฯ  ยา  เตสํ
เตสํ   สตฺตานํ   ตมฺหา   ตมฺหา   สตฺตนิกายา   จุติ   จวนตา  เภโท
อนฺตรธานํ    มจฺจุ   มรณํ   กาลกิริยา   ขนฺธานํ   เภโท   กเฬวรสฺส
นิกฺเขโป   ชีวิตินฺทฺริยสฺส   อุปจฺเฉโท   อิทํ   วุจฺจติ   มรณํ   ฯ   อิติ
อยญฺจ   ชรา   อิทญฺจ   มรณํ   อิทํ   วุจฺจติ   ภิกฺขเว   ชรามรณํ  ฯ
ชาติสมุทยา   ชรามรณสมุทโย   ชาตินิโรธา   ชรามรณนิโรโธ   อยเมว
อริโย   อฏฺฐงฺคิโก   มคฺโค   ชรามรณนิโรธคามินี   ปฏิปทา   เสยฺยถีทํ
สมฺมาทิฏฺฐิ ฯเปฯ สมฺมาสมาธิ ฯ
     {๙๒.๑}   กตมญฺจ  ภิกฺขเว ชาติ ฯเปฯ กตโม จ ภิกฺขเว ภโว ...
กตมญฺจ  ภิกฺขเว อุปาทานํ ... กตมา จ ภิกฺขเว ตณฺหา ... เวทนา ...
ผสฺโส  ...  สฬายตนํ  ... นามรูปํ ... วิญฺญาณํ ... กตเม จ ภิกฺขเว
สงฺขารา  ตโยเม ภิกฺขเว สงฺขารา กายสงฺขาโร วจีสงฺขาโร จิตฺตสงฺขาโร
อิเม   วุจฺจนฺติ   ภิกฺขเว   สงฺขารา  ฯ  อวิชฺชาสมุทยา  สงฺขารสมุทโย
อวิชฺชานิโรธา   สงฺขารนิโรโธ   อยเมว   อริโย   อฏฺฐงฺคิโก   มคฺโค
สงฺขารนิโรธคามินี ปฏิปทา เสยฺยถีทํ สมฺมาทิฏฺฐิ ฯเปฯ สมฺมาสมาธิ ฯ
     [๙๓]   ยโต  โข  ภิกฺขเว  ภิกฺขุ  เอวํ  ชรามรณํ  ปชานาติ เอวํ
ชรามรณสมุทยํ    ปชานาติ    เอวํ   ชรามรณนิโรธํ   ปชานาติ   เอวํ
ชรามรณนิโรธคามินึ   ปฏิปทํ   ปชานาติ   ฯเปฯ  เอวํ  ชาตึ  ปชานาติ
ฯเปฯ ภวํ ... อุปาทานํ ... ตณฺหํ ... เวทนํ ... ผสฺสํ ... สฬายตนํ ...
นามรูปํ  ...  วิญฺญาณํ  ...  เอวํ สงฺขาเร ปชานาติ เอวํ สงฺขารสมุทยํ
ปชานาติ   เอวํ   สงฺขารนิโรธํ   ปชานาติ   เอวํ   สงฺขารนิโรธคามินึ
ปฏิปทํ   ปชานาติ   ฯ  อยํ  วุจฺจติ  ภิกฺขเว  ภิกฺขุ  ทิฏฺฐิสมฺปนฺโน  อิติปิ
ทสฺสนสมฺปนฺโน   อิติปิ   อาคโต   อิมํ   สทฺธมฺมํ   อิติปิ   ปสฺสติ   อิมํ
สทฺธมฺมํ    อิติปิ   เสกฺเขน   ญาเณน   สมนฺนาคโต   อิติปิ   เสกฺขาย
วิชฺชาย    สมนฺนาคโต   อิติปิ   ธมฺมโสตํ   สมาปนฺโน   อิติปิ   อริโย
นิพฺเพธิกปญฺโญ    อิติปิ    อมตทฺวารํ    อาหจฺจ   ติฏฺฐติ   อิติปีติ   ฯ
อฏฺฐมํ ฯ
     [๙๔]   สาวตฺถิยํ  วิหรติ  ... ตตฺร โข ฯเปฯ เย หิ เกจิ ภิกฺขเว
สมณา   วา   พฺราหฺมณา  วา  ชรามรณํ  น  ปริชานนฺติ  ชรามรณสมุทยํ
น   ปริชานนฺติ   ชรามรณนิโรธํ   น   ปริชานนฺติ   ชรามรณนิโรธคามินึ
ปฏิปทํ  น  ปริชานนฺติ ฯ ชาตึ น ปริชานนฺติ ฯเปฯ ภวํ ... อุปาทานํ ...
ตณฺหํ  ...  เวทนํ  ...  ผสฺสํ ... สฬายตนํ ... นามรูปํ ... วิญฺญาณํ
...    สงฺขาเร    น    ปริชานนฺติ   สงฺขารสมุทยํ   น   ปริชานนฺติ
สงฺขารนิโรธํ    น    ปริชานนฺติ    สงฺขารนิโรธคามินึ    ปฏิปทํ    น
ปริชานนฺติ  ฯ  น  เมเต  ภิกฺขเว  สมณา  วา  พฺราหฺมณา  วา สมเณสุ
วา    สมณสมฺมตา    พฺราหฺมเณสุ    วา    พฺราหฺมณสมฺมตา   น   จ
ปเนเต   อายสฺมนฺโต   สามญฺญตฺถํ   วา   พฺราหฺมญฺญตฺถํ   วา  ทิฏฺเฐว
ธมฺเม สยํ อภิญฺญา สจฺฉิกตฺวา อุปสมฺปชฺช วิหรนฺติ ฯ
     [๙๕]   เย  จ โข เกจิ ภิกฺขเว สมณา วา พฺราหฺมณา วา ชรามรณํ
ปริชานนฺติ    ชรามรณสมุทยํ    ปริชานนฺติ   ชรามรณนิโรธํ   ปริชานนฺติ
ชรามรณนิโรธคามินึ    ปฏิปทํ    ปริชานนฺติ    ฯ    ชาตึ   ปริชานนฺติ
ฯเปฯ ภวํ ... อุปาทานํ ... ตณฺหํ ... เวทนํ ... ผสฺสํ ... สฬายตนํ ...
นามรูปํ  ...  วิญฺญาณํ  ... สงฺขาเร ปริชานนฺติ สงฺขารสมุทยํ ปริชานนฺติ
สงฺขารนิโรธํ   ปริชานนฺติ   สงฺขารนิโรธคามินึ   ปฏิปทํ   ปริชานนฺติ  ฯ
เต   โขเม   ภิกฺขเว   สมณา   วา   พฺราหฺมณา  วา  สมเณสุ  เจว
สมณสมฺมตา   พฺราหฺมเณสุ   จ   พฺราหฺมณสมฺมตา  เต  จ  ปนายสฺมนฺโต
สามญฺญตฺถญฺจ    พฺราหฺมญฺญตฺถญฺจ    ทิฏฺเฐว    ธมฺเม    สยํ   อภิญฺญา
สจฺฉิกตฺวา อุปสมฺปชฺช วิหรนฺตีติ ฯ นวมํ ฯ
     [๙๖]   สาวตฺถิยํ  วิหรติ  ... ตตฺร โข ฯเปฯ เย หิ เกจิ ภิกฺขเว
สมณา   วา   พฺราหฺมณา   วา   ชรามรณํ  นปฺปชานนฺติ  ชรามรณสมุทยํ
นปฺปชานนฺติ     ชรามรณนิโรธํ     นปฺปชานนฺติ     ชรามรณนิโรธคามินึ
ปฏิปทํ    นปฺปชานนฺติ    เต   วต   ชรามรณํ   สมติกฺกมฺม   ฐสฺสนฺตีติ
เนตํ  ฐานํ  วิชฺชติ  ฯ  ชาตึ  นปฺปชานนฺติ  ฯเปฯ  ภวํ  ...  อุปาทานํ
... ตณฺหํ ... เวทนํ ... ผสฺสํ ... สฬายตนํ ... นามรูปํ ... วิญฺญาณํ
...   สงฺขาเร   นปฺปชานนฺติ  สงฺขารสมุทยํ  นปฺปชานนฺติ  สงฺขารนิโรธํ
นปฺปชานนฺติ        สงฺขารนิโรธคามินึ       ปฏิปทํ       นปฺปชานนฺติ
เต วต สงฺขาเร สมติกฺกมฺม ฐสฺสนฺตีติ เนตํ ฐานํ วิชฺชติ ฯ
     [๙๗]   เย  จ  โข  เกจิ  ภิกฺขเว  สมณา  วา  พฺราหฺมณา  วา
ชรามรณํ     ปชานนฺติ    ชรามรณสมุทยํ    ปชานนฺติ    ชรามรณนิโรธํ
ปชานนฺติ   ชรามรณนิโรธคามินึ   ปฏิปทํ   ปชานนฺติ  เต  วต  ชรามรณํ
สมติกฺกมฺม  ฐสฺสนฺตีติ  ฐานเมตํ  วิชฺชติ  ฯ  ชาตึ  ปชานนฺติ  ฯเปฯ  ภวํ
... อุปาทานํ ...  ตณฺหํ ...  เวทนํ ...  ผสฺสํ ...  สฬายตนํ ... นามรูปํ
...    วิญฺญาณํ   ...    สงฺขาเร  ปชานนฺติ  สงฺขารสมุทยํ  ปชานนฺติ
สงฺขารนิโรธํ   ปชานนฺติ   สงฺขารนิโรธคามินึ   ปฏิปทํ   ปชานนฺติ   เต
วต สงฺขาเร สมติกฺกมฺม ฐสฺสนฺตีติ ฐานเมตํ *- วิชฺชตีติ ฯ ทสมํ ฯ
                    ทสพลวคฺโค ตติโย ฯ
                       ตสฺส อุทฺทานํ
         เทฺว ทสพลา อุปนิสา จ      อญฺญติตฺถิยภูมิโช ๑-
         อุปวาโณ ปจฺจโย ภิกฺขุ       เทฺว จ สมณพฺราหฺมณาติ ฯ
                       ----------
@เชิงอรรถ:  ยุ. อญฺญติตฺถิยา ภูมิชํ ฯ
@* มีการแก้ไขคำ ฐาเมตํ เป็น ฐานเมตํ
                  กฬารขตฺติยวคฺโค จตุตฺโถ
     [๙๘]   เอกํ  สมยํ  ภควา  สาวตฺถิยํ  วิหรติ ... ตตฺร โข ภควา
อายสฺมนฺตํ    สารีปุตฺตํ    อามนฺเตสิ   วุตฺตมิทํ   สารีปุตฺต   ปารายเน
อชิตปเญฺห
         เย จ สงฺขาตธมฺมาเส       เย จ เสกฺขา ปุถู อิธ
         เตสมฺเม นิปโก อิริยํ        ปุฏฺโฐ จ ๑- พฺรูหิ มาริสาติ
อิมสฺส   นุ   โข   สารีปุตฺต   สงฺขิตฺเตน   ภาสิตสฺส   กถํ  วิตฺถาเรน
อตฺโถ ทฏฺฐพฺโพติ ฯ
     [๙๙]   เอวํ   วุตฺเต   อายสฺมา   สารีปุตฺโต  ตุณฺหี  อโหสิ  ฯ
ทุติยมฺปิ    โข    ภควา   อายสฺมนฺตํ   สารีปุตฺตํ   อามนฺเตสิ   ฯเปฯ
ทุติยมฺปิ   โข   อายสฺมา   สารีปุตฺโต   ตุณฺหี  อโหสิ  ฯ  ตติยมฺปิ  โข
ภควา    อายสฺมนฺตํ    สารีปุตฺตํ    อามนฺเตสิ    วุตฺตมิทํ    สารีปุตฺต
ปารายเน อชิตปเญฺห
         เย จ สงฺขาตธมฺมาเส        เย จ เสกฺขา ปุถู อิธ
         เตสมฺเม นิปโก อิริยํ        ปุฏฺโฐ จ พฺรูหิ มาริสาติ
อิมสฺส   นุ   โข   สารีปุตฺต   สงฺขิตฺเตน   ภาสิตสฺส   กถํ  วิตฺถาเรน
อตฺโถ  ทฏฺฐพฺโพติ  ฯ  เอวํ  วุตฺเต  ๒- ตติยมฺปิ โข อายสฺมา สารีปุตฺโต
ตุณฺหี อโหสิ ฯ
     [๑๐๐]   ภูตมิทนฺติ   สารีปุตฺต   ปสฺสสีติ   ฯ   ภูตมิทนฺติ  ภนฺเต
@เชิงอรรถ:  ม. จสทฺโท นตฺถิ ฯ ยุ. เม ฯ เอวมุปริปิ ฯ    ม. ยุ. อิทํ ปาฐทฺวยํ นตฺถิ ฯ
ยถาภูตํ    สมฺมปฺปญฺญาย    ปสฺสติ   ภูตมิทนฺติ   ยถาภูตํ   สมฺมปฺปญฺญาย
ทิสฺวา    ภูตสฺส    นิพฺพิทาย   วิราคาย   นิโรธาย   ปฏิปนฺโน   โหติ
ตทาหารา    สมฺภวนฺติ    ยถาภูตํ   สมฺมปฺปญฺญาย   ปสฺสติ   ตทาหารา
สมฺภวนฺติ   ยถาภูตํ   สมฺมปฺปญฺญาย   ทิสฺวา   อาหารสมฺภวสฺส  นิพฺพิทาย
วิราคาย   นิโรธาย   ปฏิปนฺโน   โหติ   ตทาหารนิโรธา   ยํ  ภูตํ  ตํ
นิโรธธมฺมนฺติ     ยถาภูตํ    สมฺมปฺปญฺญาย    ปสฺสติ    ตทาหารนิโรธา
ยํ   ภูตํ  ตํ  นิโรธธมฺมนฺติ  ยถาภูตํ  สมฺมปฺปญฺญาย  ทิสฺวา  นิโรธธมฺมสฺส
นิพฺพิทาย    วิราคาย    นิโรธาย    ปฏิปนฺโน    โหติ    ฯ    เอวํ
โข ภนฺเต เสกฺโข โหติ ฯ
     [๑๐๑]   กถญฺจ   ภนฺเต   สงฺขาตธมฺโม   โหติ   ฯ   ภูตมิทนฺติ
ภนฺเต     ยถาภูตํ     สมฺมปฺปญฺญาย    ปสฺสติ    ภูตมิทนฺติ    ยถาภูตํ
สมฺมปฺปญฺญาย   ทิสฺวา   ภูตสฺส   นิพฺพิทา   วิราคา   นิโรธา  อนุปาทา
วิมุตฺโต    โหติ    ตทาหารา    สมฺภวนฺติ    ยถาภูตํ    สมฺมปฺปญฺญาย
ปสฺสติ    ตทาหารา    สมฺภวนฺติ    ยถาภูตํ    สมฺมปฺปญฺญาย    ทิสฺวา
อาหารสมฺภวสฺส   นิพฺพิทา   วิราคา   นิโรธา  อนุปาทา  วิมุตฺโต  โหติ
ตทาหารนิโรธา   ยํ   ภูตํ   ตํ   นิโรธธมฺมนฺติ   ยถาภูตํ  สมฺมปฺปญฺญาย
ปสฺสติ  ตทาหารนิโรธา  ยํ  ภูตํ  ตํ  นิโรธธมฺมนฺติ  ยถาภูตํ สมฺมปฺปญฺญาย
ทิสฺวา   นิโรธธมฺมสฺส   นิพฺพิทา   วิราคา   นิโรธา  อนุปาทา  วิมุตฺโต
โหติ  ฯ  เอวํ  โข  ภนฺเต  สงฺขาตธมฺโม  โหติ  ฯ อิติ โข ภนฺเต ยํ ตํ
วุตฺตํ ปารายเน อชิตปเญฺห
         เย จ สงฺขาตธมฺมาเส       เย จ เสกฺขา ปุถู อิธ
         เตสมฺเม นิปโก อิริยํ        ปุฏฺโฐ จ พฺรูหิ มาริสาติ
อิมสฺส   โขหํ   ภนฺเต   สงฺขิตฺเตน   ภาสิตสฺส  เอวํ  วิตฺถาเรน  อตฺถํ
อาชานามีติ ฯ
     [๑๐๒]   สาธุ   สาธุ   สารีปุตฺต   ภูตมิทนฺติ  สารีปุตฺต  ยถาภูตํ
สมฺมปฺปญฺญาย    ปสฺสติ    ภูตมิทนฺติ    ยถาภูตํ   สมฺมปฺปญฺญาย   ทิสฺวา
ภูตสฺส   นิพฺพิทาย   วิราคาย   นิโรธาย   ปฏิปนฺโน   โหติ  ตทาหารา
สมฺภวนฺติ    ยถาภูตํ    สมฺมปฺปญฺญาย    ปสฺสติ   ตทาหารา   สมฺภวนฺติ
ยถาภูตํ   สมฺมปฺปญฺญาย   ทิสฺวา   อาหารสมฺภวสฺส   นิพฺพิทาย  วิราคาย
นิโรธาย   ปฏิปนฺโน   โหติ  ตทาหารนิโรธา  ยํ  ภูตํ  ตํ  นิโรธธมฺมนฺติ
ยถาภูตํ  สมฺมปฺปญฺญาย  ปสฺสติ  ตทาหารนิโรธา  ยํ  ภูตํ  ตํ นิโรธธมฺมนฺติ
ยถาภูตํ      สมฺมปฺปญฺญาย      ทิสฺวา     นิโรธธมฺมสฺส     นิพฺพิทาย
วิราคาย   นิโรธาย  ปฏิปนฺโน  โหติ  ฯ  เอวํ  โข  สารีปุตฺต  เสกฺโข
โหติ ฯ
     [๑๐๓]   กถญฺจ   สารีปุตฺต   สงฺขาตธมฺโม   โหติ  ฯ  ภูตมิทนฺติ
สารีปุตฺต     ยถาภูตํ    สมฺมปฺปญฺญาย    ปสฺสติ    ภูตมิทนฺติ   ยถาภูตํ
สมฺมปฺปญฺญาย   ทิสฺวา   ภูตสฺส   นิพฺพิทา   วิราคา   นิโรธา  อนุปาทา
วิมุตฺโต    โหติ    ตทาหารา    สมฺภวนฺติ    ยถาภูตํ    สมฺมปฺปญฺญาย
ปสฺสติ    ตทาหารา    สมฺภวนฺติ    ยถาภูตํ    สมฺมปฺปญฺญาย    ทิสฺวา
อาหารสมฺภวสฺส   นิพฺพิทา   วิราคา   นิโรธา  อนุปาทา  วิมุตฺโต  โหติ
ตทาหารนิโรธา   ยํ   ภูตํ   ตํ   นิโรธธมฺมนฺติ   ยถาภูตํ  สมฺมปฺปญฺญาย
ปสฺสติ    ตทาหารนิโรธา    ยํ    ภูตํ    ตํ   นิโรธธมฺมนฺติ   ยถาภูตํ
สมฺมปฺปญฺญาย    ทิสฺวา    นิโรธธมฺมสฺส    นิพฺพิทา   วิราคา   นิโรธา
อนุปาทา   วิมุตฺโต   โหติ   ฯ   เอวํ   โข   สารีปุตฺต  สงฺขาตธมฺโม
โหติ ฯ อิติ โข สารีปุตฺต ยํ ตํ วุตฺตํ ปารายเน อชิตปเญฺห
         เย จ สงฺขาตธมฺมาเส       เย จ เสกฺขา ปุถู อิธ
         เตสมฺเม นิปโก อิริยํ        ปุฏฺโฐ จ พฺรูหิ มาริสาติ
อิมสฺส   โข   สารีปุตฺต  สงฺขิตฺเตน  ภาสิตสฺส  เอวํ  วิตฺถาเรน  อตฺโถ
ทฏฺฐพฺโพติ ฯ ปฐมํ ฯ
     [๑๐๔]   สาวตฺถิยํ   วิหรติ  ...  อถ  โข  กฬารขตฺติโย  ภิกฺขุ
เยนายสฺมา    สารีปุตฺโต    เตนุปสงฺกมิ    อุปสงฺกมิตฺวา    อายสฺมตา
สารีปุตฺเตน   สทฺธึ   สมฺโมทิ   สมฺโมทนียํ  กถํ  สาราณียํ  วีติสาเรตฺวา
เอกมนฺตํ   นิสีทิ   ฯ   เอกมนฺตํ   นิสินฺโน   โข   กฬารขตฺติโย  ภิกฺขุ
อายสฺมนฺตํ   สารีปุตฺตํ   เอตทโวจ   โมลิยผคฺคุโน   อาวุโส   สารีปุตฺต
ภิกฺขุ   สิกฺขํ   ปจฺจกฺขาย  หีนายาวตฺโตติ  นห  ๑-  นูน  โส  อายสฺมา
อิมสฺมึ     ธมฺมวินเย    อสฺสาสมลตฺถาติ    เตนหายสฺมา    สารีปุตฺโต
อิมสฺมึ  ธมฺมวินเย  อสฺสาสมฺปตฺโตติ  ฯ  น  ขฺวาหํ  อาวุโส  กงฺขามีติ ฯ
อายตึ ปนาวุโสติ ฯ น ขฺวาหํ อาวุโส วิจิกิจฺฉามีติ ฯ
     [๑๐๕]   อถ   โข   กฬารขตฺติโย   ภิกฺขุ   อุฏฺฐายาสนา  เยน
ภควา   เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา  เอกมนฺตํ
@เชิงอรรถ:  ม. ยุ. นหิ ฯ
นิสีทิ   ฯ   เอกมนฺตํ   นิสินฺโน   โข   กฬารขตฺติโย   ภิกฺขุ   ภควนฺตํ
เอตทโวจ    อายสฺมตา    ภนฺเต    สารีปุตฺเตน    อญฺญา   พฺยากตา
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานามีติ   ฯ   อถ   โข   ภควา   อญฺญตรํ  ภิกฺขุํ  อามนฺเตสิ  เอหิ
ตฺวํ   ภิกฺขุ   มม   วจเนน   สารีปุตฺตํ  อามนฺเตหิ  สตฺถา  ตํ  อาวุโส
สารีปุตฺต   อามนฺเตตีติ   ฯ   เอวํ   ภนฺเตติ  โข  โส  ภิกฺขุ  ภควโต
ปฏิสฺสุตฺวา    เยนายสฺมา    สารีปุตฺโต    เตนุปสงฺกมิ    อุปสงฺกมิตฺวา
อายสฺมนฺตํ    สารีปุตฺตํ   เอตทโวจ   สตฺถา   ตํ   อาวุโส   สารีปุตฺต
อามนฺเตตีติ    ฯ   เอวมาวุโสติ   โข   อายสฺมา   สารีปุตฺโต   ตสฺส
ภิกฺขุโน    ปฏิสฺสุตฺวา    เยน    ภควา    เตนุปสงฺกมิ   อุปสงฺกมิตฺวา
ภควนฺตํ อภิวาเทตฺวา เอกมนฺตํ นิสีทิ ฯ
     [๑๐๖]   เอกมนฺตํ   นิสินฺนํ   โข   อายสฺมนฺตํ  สารีปุตฺตํ  ภควา
เอตทโวจ   สจฺจํ   กิร   ตยา   สารีปุตฺต   อญฺญา   พฺยากตา   ขีณา
ชาติ    วุสิตํ    พฺรหฺมจริยํ    กตํ    กรณียํ    นาปรํ   อิตฺถตฺตายาติ
ปชานามีติ   ฯ   น   โข  ภนฺเต  เอเตหิ  ปเทหิ  เอเตหิ  พฺยญฺชเนหิ
อตฺโถ  จ  ๑-  วุตฺโตติ  ฯ  เยนเกนจิปิ  สารีปุตฺต  ปริยาเยน กุลปุตฺโต
อญฺญํ   พฺยากโรติ   อถ   โข   พฺยากตํ   พฺยากตโต   ทฏฺฐพฺพนฺติ   ฯ
นนุ   อหมฺปิ   ภนฺเต   เอวํ   วทามิ  น  โข  ภนฺเต  เอเตหิ  ปเทหิ
เอเตหิ  พฺยญฺชเนหิ  อตฺโถ  จ  ๒-  วุตฺโตติ  ฯ  สเจ ตํ สารีปุตฺต เอวํ
ปุจฺเฉยฺยุํ   กถํ   ชานตา   ปน  ตยา  อาวุโส  สารีปุตฺต  กถํ  ปสฺสตา
@เชิงอรรถ: ๑-๒ ม. ยุ. จสทฺโท นตฺถิ ฯ
อญฺญา    พฺยากตา    ขีณา   ชาติ   วุสิตํ   พฺรหฺมจริยํ   กตํ   กรณียํ
นาปรํ    อิตฺถตฺตายาติ    ปชานามีติ   เอวํ   ปุฏฺโฐ   ตฺวํ   สารีปุตฺต
กินฺติ   พฺยากเรยฺยาสีติ   ฯ   สเจ   มํ   ภนฺเต  เอวํ  ปุจฺเฉยฺยุํ  กถํ
ชานตา   ปน  ตยา  อาวุโส  สารีปุตฺต  กถํ  ปสฺสตา  อญฺญา  พฺยากตา
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานามีติ   เอวํ   ปุฏฺโฐหํ   ภนฺเต   เอวํ  พฺยากเรยฺยํ  ยํนิทานาวุโส
ชาติ   ตสฺส   นิทานสฺส   สงฺขยา  ๑-  ขีณสฺมึ  [๒]-  ขีณมิติ  วิทิตฺวา
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานามีติ เอวํ ปุฏฺโฐหํ ภนฺเต เอวํ พฺยากเรยฺยนฺติ ฯ
     [๑๐๗]   สเจ  ปน  ตํ  สารีปุตฺต  เอวํ  ปุจฺเฉยฺยุํ  ชาติ ปนาวุโส
สารีปุตฺต   กึนิทานา   กึสมุทยา   กึชาติกา   กึปภวาติ   เอวํ   ปุฏฺโฐ
ตฺวํ   สารีปุตฺต   กินฺติ   พฺยากเรยฺยาสีติ   ฯ   สเจ  มํ  ภนฺเต  เอวํ
ปุจฺเฉยฺยุํ      ชาติ    ปนาวุโส    สารีปุตฺต    กึนิทานา    กึสมุทยา
กึชาติกา   กึปภวาติ   เอวํ   ปุฏฺโฐหํ  ภนฺเต  เอวํ  พฺยากเรยฺยํ  ชาติ
โข    อาวุโส    ภวนิทานา    ภวสมุทยา    ภวชาติกา   ภวปฺปภวาติ
เอวํ ปุฏฺโฐหํ ภนฺเต เอวํ พฺยากเรยฺยนฺติ ฯ
     [๑๐๘]   สเจ  ปน  ตํ  สารีปุตฺต  เอวํ  ปุจฺเฉยฺยุํ  ภโว ปนาวุโส
สารีปุตฺต   กึนิทาโน   กึสมุทโย   กึชาติโก   กึปภโวติ   เอวํ   ปุฏฺโฐ
ตฺวํ   สารีปุตฺต   กินฺติ   พฺยากเรยฺยาสีติ   ฯ   สเจ  มํ  ภนฺเต  เอวํ
ปุจฺเฉยฺยุํ   ภโว   ปนาวุโส   สารีปุตฺต   กึนิทาโน  กึสมุทโย  กึชาติโก
@เชิงอรรถ:  ม. ยุ. ขยา ฯ     ม. ขีณามฺหีติ วิทิตํ ฯ ยุ. ขีณมีติ วิทิตํ ฯ
กึปภโวติ   เอวํ   ปุฏฺโฐหํ   ภนฺเต   เอวํ   พฺยากเรยฺยํ   ภโว   โข
อาวุโส      อุปาทานนิทาโน      อุปาทานสมุทโย     อุปาทานชาติโก
อุปาทานปฺปภโวติ เอวํ ปุฏฺโฐหํ ภนฺเต เอวํ พฺยากเรยฺยนฺติ ฯ
     [๑๐๙]   สเจ   ปน   ตํ   สารีปุตฺต  เอวํ  ปุจฺเฉยฺยุํ  อุปาทานํ
ปนาวุโส   สารีปุตฺต   กึนิทานํ   ฯเปฯ   กึปภวนฺติ   เอวํ  ปุฏฺโฐ  ตฺวํ
สารีปุตฺต   กินฺติ  พฺยากเรยฺยาสีติ  ฯ  สเจ  มํ  ภนฺเต  เอวํ  ปุจฺเฉยฺยุํ
อุปาทานํ    ปนาวุโส   สารีปุตฺต   กึนิทานํ   ฯเปฯ   กึปภวนฺติ   เอวํ
ปุฏฺโฐหํ    ภนฺเต    เอวํ    พฺยากเรยฺยํ    อุปาทานํ   โข   อาวุโส
ตณฺหานิทานํ     ฯเปฯ     ตณฺหาปภวนฺติ    เอวํ    ปุฏฺโฐหํ    ภนฺเต
เอวํ พฺยากเรยฺยนฺติ ฯ
     [๑๑๐]   สเจ   ปน   ตํ   สารีปุตฺต   เอวํ   ปุจฺเฉยฺยุํ  ตณฺหา
ปนาวุโส    สารีปุตฺต    กึนิทานา    กึสมุทยา    กึชาติกา   กึปภวาติ
เอวํ  ปุฏฺโฐ  ตฺวํ  สารีปุตฺต  กินฺติ  พฺยากเรยฺยาสีติ  ฯ  สเจ  มํ ภนฺเต
เอวํ   ปุจฺเฉยฺยุํ   ตณฺหา   ปนาวุโส   สารีปุตฺต   กึนิทานา   กึสมุทยา
กึชาติกา   กึปภวาติ   เอวํ  ปุฏฺโฐหํ  ภนฺเต  เอวํ  พฺยากเรยฺยํ  ตณฺหา
โข     อาวุโส     เวทนานิทานา    เวทนาสมุทยา    เวทนาชาติกา
เวทนาปภวาติ เอวํ ปุฏฺโฐหํ ภนฺเต เอวํ พฺยากเรยฺยนฺติ ฯ
     [๑๑๑]   สเจ  ปน  ตํ  สารีปุตฺต  เอวํ ปุจฺเฉยฺยุํ เวทนา ปนาวุโส
สารีปุตฺต   กึนิทานา   ฯเปฯ   กึปภวาติ   เอวํ  ปุฏฺโฐ  ตฺวํ  สารีปุตฺต
กินฺติ   พฺยากเรยฺยาสีติ   ฯ  สเจ  มํ  ภนฺเต  เอวํ  ปุจฺเฉยฺยุํ  เวทนา
ปนาวุโส    สารีปุตฺต   กึนิทานา   ฯเปฯ   กึปภวาติ   เอวํ   ปุฏฺโฐหํ
ภนฺเต   เอวํ   พฺยากเรยฺยํ  เวทนา  โข  อาวุโส  ผสฺสนิทานา  ฯเปฯ
ผสฺสปฺปภวาติ เอวํ ปุฏฺโฐหํ ภนฺเต เอวํ พฺยากเรยฺยนฺติ ฯ
     [๑๑๒]   สเจ  ปน  ตํ  สารีปุตฺต  เอวํ  ปุจฺเฉยฺยุํ  กถํ  ชานโต
ปน   เต   อาวุโส  สารีปุตฺต  กถํ  ปสฺสโต  ยา  เวทนาสุ  นนฺทิ  สา
น   อุปฏฺฐาสีติ  เอวํ  ปุฏฺโฐ  ตฺวํ  สารีปุตฺต  กินฺติ  พฺยากเรยฺยาสีติ  ฯ
สเจ   มํ   ภนฺเต   เอวํ   ปุจฺเฉยฺยุํ  กถํ  ชานโต  ปน  เต  อาวุโส
สารีปุตฺต   กถํ   ปสฺสโต   ยา   เวทนาสุ   นนฺทิ  สา  น  อุปฏฺฐาสีติ
เอวํ   ปุฏฺโฐ   อหํ   ภนฺเต   เอวํ   พฺยากเรยฺยํ   ติสฺโส  โข  อิมา
อาวุโส   เวทนา   กตมา   ติสฺโส   สุขา   เวทนา   ทุกฺขา  เวทนา
อทุกฺขมสุขา   เวทนา   อิมา   โข   อาวุโส  ติสฺโส  เวทนา  อนิจฺจา
ยทนิจฺจํ   ตํ   ทุกฺขนฺติ  วิทิตํ  ยา  เวทนาสุ  นนฺทิ  สา  น  อุปฏฺฐาสีติ
เอวํ ปุฏฺโฐ อหํ ภนฺเต เอวํ พฺยากเรยฺยนฺติ ฯ
     [๑๑๓]   สาธุ  สาธุ  สารีปุตฺต  อยมฺปิ  โข  สารีปุตฺต  ปริยาโย
เอตสฺเสว    อตฺถสฺส   สงฺขิตฺเตน   เวยฺยากรณาย   ยงฺกิญฺจิ   เวทยิตํ
ตํ  ทุกฺขสฺมินฺติ  สเจ  ปน  ตํ  สารีปุตฺต  เอวํ  ปุจฺเฉยฺยุํ  กถํ  วิโมกฺขา
ปน   ตยา   อาวุโส   สารีปุตฺต   อญฺญา  พฺยากตา  ขีณา  ชาติ  วุสิตํ
พฺรหฺมจริยํ    กตํ   กรณียํ   นาปรํ   อิตฺถตฺตายาติ   ปชานามีติ   เอวํ
ปุฏฺโฐ   ตฺวํ   สารีปุตฺต   กินฺติ   พฺยากเรยฺยาสีติ  ฯ  สเจ  มํ  ภนฺเต
เอวํ   ปุจฺเฉยฺยุํ   กถํ  วิโมกฺขา  ปน  ตยา  อาวุโส  สารีปุตฺต  อญฺญา
พฺยากตา    ขีณา    ชาติ   วุสิตํ   พฺรหฺมจริยํ   กตํ   กรณียํ   นาปรํ
อิตฺถตฺตายาติ   ปชานามีติ  เอวํ  ปุฏฺโฐ  อหํ  ภนฺเต  เอวํ  พฺยากเรยฺยํ
อชฺฌตฺตวิโมกฺขา   ขฺวาหํ   อาวุโส  สพฺพุปาทานกฺขยา  ตถาสโต  วิหรามิ
ยถาสตํ    วิหรนฺตํ   อาสวา   นานุสฺสวนฺติ   อตฺตานญฺจ   นาวชานามีติ
เอวํ ปุฏฺโฐ อหํ ภนฺเต เอวํ พฺยากเรยฺยนฺติ ฯ
     [๑๑๔]   สาธุ  สาธุ  สารีปุตฺต  อยมฺปิ  ๑- โข สารีปุตฺต ปริยาโย
เอตสฺเสว   อตฺถสฺส   สงฺขิตฺเตน  เวยฺยากรณาย  เย  อาสวา  สมเณน
วุตฺตา   เตสฺวาหํ   น  กงฺขามิ  เต  เม  ปหีนาติ  น  วิจิกิจฺฉามีติ  ฯ
อิทมโวจ ภควา อิทํ วตฺวาน สุคโต อุฏฺฐายาสนา วิหารํ ปาวิสิ ฯ
     [๑๑๕]   ตตฺร  โข  อายสฺมา  สารีปุตฺโต  อจิรปกฺกนฺตสฺส  ภควโต
ภิกฺขู   อามนฺเตสิ   ปุพฺเพ   อปฺปฏิสํวิทิตํ   มํ   อาวุโส   ภควา  ปฐมํ
ปญฺหํ    อปุจฺฉิ   ตสฺส   เม   อโหสิ   ทนฺธายิตตฺตํ   ยโต   จ   โข
เม   อาวุโส   ภควา   ปฐมํ   ปญฺหํ   อนุโมทิ   ตสฺส  มยฺหํ  อาวุโส
เอตทโหสิ   ทิวสญฺเจปิ   มํ   ภควา   เอตมตฺถํ  ปุจฺเฉยฺย  อญฺญมญฺเญหิ
ปเทหิ    อญฺญมญฺเญหิ    ปริยาเยหิ    ทิวสํปหํ    ภควโต    เอตมตฺถํ
พฺยากเรยฺยํ     อญฺญมญฺเญหิ     ปเทหิ     อญฺญมญฺเญหิ     ปริยาเยหิ
รตฺตึ   เจปิ   มํ   ภควา   เอตมตฺถํ   ปุจฺเฉยฺย   อญฺญมญฺเญหิ  ปเทหิ
อญฺญมญฺเญหิ   ปริยาเยหิ   รตฺตึปหํ  ๒-  ภควโต  เอตมตฺถํ  พฺยากเรยฺยํ
อญฺญมญฺเญหิ     ปเทหิ     อญฺญมญฺเญหิ    ปริยาเยหิ    รตฺตินฺทิวญฺเจปิ
มํ   ภควา   เอตมตฺถํ   ปุจฺเฉยฺย   อญฺญมญฺเญหิ   ปเทหิ   อญฺญมญฺเญหิ
@เชิงอรรถ:  ยุ. ปิสทฺโท นตฺถี ฯ    ม. รตฺติมฺปาหํ ฯ เอวมุปริปิ ฯ
ปริยาเยหิ      รตฺตินฺทิวํปหํ     ภควโต     เอตมตฺถํ     พฺยากเรยฺยํ
อญฺญมญฺเญหิ    ปเทหิ    อญฺญมญฺเญหิ   ปริยาเยหิ   เทฺว   รตฺตินฺทิวานิ
เจปิ   มํ   ภควา   เอตมตฺถํ   ปุจฺเฉยฺย  ฯเปฯ  เทฺว  รตฺตินฺทิวานิปหํ
ภควโต   เอตมตฺถํ   พฺยากเรยฺยํ   ฯเปฯ   ตีณิ  รตฺตินฺทิวานิ  เจปิ  มํ
ภควา    เอตมตฺถํ   ปุจฺเฉยฺย   ...   ตีณิ   รตฺตินฺทิวานิปหํ   ภควโต
เอตมตฺถํ  พฺยากเรยฺยํ  ...  จตฺตาริ  รตฺตินฺทิวานิ  เจปิ ภควา เอตมตฺถํ
ปุจฺเฉยฺย  ...  จตฺตาริ  รตฺตินฺทิวานิปหํ  ภควโต  เอตมตฺถํ  พฺยากเรยฺยํ
...  ปญฺจ  รตฺตินฺทิวานิ  เจปิ  มํ  ภควา  เอตมตฺถํ ปุจฺเฉยฺย ... ปญฺจ
รตฺตินฺทิวานิปหํ   ภควโต   เอตมตฺถํ  พฺยากเรยฺยํ  ...  ฉ  รตฺตินฺทิวานิ
เจปิ  มํ  ภควา  เอตมตฺถํ  ปุจฺเฉยฺย  ...  ฉ  รตฺตินฺทิวานิปหํ  ภควโต
เอตมตฺถํ  พฺยากเรยฺยํ  ...  สตฺต  รตฺตินฺทิวานิ  เจปิ มํ ภควา เอตมตฺถํ
ปุจฺเฉยฺย    อญฺญมญฺเญหิ    ปเทหิ    อญฺญมญฺเญหิ    ปริยาเยหิ   สตฺต
รตฺตินฺทิวานิปหํ     ภควโต     เอตมตฺถํ    พฺยากเรยฺยํ    อญฺญมญฺเญหิ
ปเทหิ อญฺญมญฺเญหิ ปริยาเยหีติ ฯ
     [๑๑๖]   อถ  โข  กฬารขตฺติโย  ภิกฺขุ  อุฏฺฐายาสนา  เยน ภควา
เตนุปสงฺกมิ   อุปสงฺกมิตฺวา   ภควนฺตํ  อภิวาเทตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข   กฬารขตฺติโย   ภิกฺขุ   ภควนฺตํ   เอตทโวจ
อายสฺมตา     ภนฺเต     สารีปุตฺเตน    สีหนาโท    นทิโต    ปุพฺเพ
อปฺปฏิสํวิทิตํ   มํ   อาวุโส   ภควา   ปฐมํ   ปญฺหํ   อปุจฺฉิ  ตสฺส  เม
อโหสิ   ทนฺธายิตตฺตํ   ยโต  จ  โข  เม  อาวุโส  ภควา  ปฐมํ  ปญฺหํ
อนุโมทิ   ตสฺส   มยฺหํ   อาวุโส   เอตทโหสิ   ทิวสญฺเจปิ   มํ  ภควา
เอตมตฺถํ    ปุจฺเฉยฺย   อญฺญมญฺเญหิ   ปเทหิ   อญฺญมญฺเญหิ   ปริยาเยหิ
ทิวสํปหํ    ภควโต    เอตมตฺถํ    พฺยากเรยฺยํ    อญฺญมญฺเญหิ   ปเทหิ
อญฺญมญฺเญหิ   ปริยาเยหิ   รตฺตึ   เจปิ   ฯเปฯ   รตฺตินฺทิวํ   เจปิ  มํ
ภควา  ...  เทฺว รตฺตินฺทิวานิ เจปิ มํ ภควา ... ตีณิ ... จตฺตาริ ...
ปญฺจ   ...   ฉ  ...  สตฺต  รตฺตินฺทิวานิ  เจปิ  มํ  ภควา  เอตมตฺถํ
ปุจฺเฉยฺย    อญฺญมญฺเญหิ    ปเทหิ    อญฺญมญฺเญหิ    ปริยาเยหิ   สตฺต
รตฺตินฺทิวานิปหํ     ภควโต     เอตมตฺถํ    พฺยากเรยฺยํ    อญฺญมญฺเญหิ
ปเทหิ อญฺญมญฺเญหิ ปริยาเยหีติ ฯ
     [๑๑๗]   สา  หิ  ภิกฺขุ  สารีปุตฺตสฺส  ธมฺมธาตุ  สุปฏิวิทฺธา  ยสฺสา
ธมฺมธาตุยา    สุปฏิวิทฺธตฺตา   ทิวสญฺเจปหํ   ๑-   สารีปุตฺตํ   เอตมตฺถํ
ปุจฺเฉยฺยํ    อญฺญมญฺเญหิ    ปเทหิ   อญฺญมญฺเญหิ   ปริยาเยหิ   ทิวสมฺปิ
เม    สารีปุตฺโต    เอตมตฺถํ    พฺยากเรยฺย    อญฺญมญฺเญหิ    ปเทหิ
อญฺญมญฺเญหิ   ปริยาเยหิ   รตฺตึ   เจปหํ  สารีปุตฺตํ  เอตมตฺถํ  ปุจฺเฉยฺยํ
อญฺญมญฺเญหิ     ปเทหิ     อญฺญมญฺเญหิ    ปริยาเยหิ    รตฺตึปิ    เม
สารีปุตฺโต   เอตมตฺถํ   พฺยากเรยฺย   ฯเปฯ  รตฺตินฺทิวญฺเจปหํ  สารีปุตฺตํ
เอตมตฺถํ   ปุจฺเฉยฺยํ   ...   รตฺตินฺทิวมฺปิ   เม   สารีปุตฺโต  เอตมตฺถํ
พฺยากเรยฺย ... เทฺว รตฺตินฺทิวานิ เจปหํ สารีปุตฺตํ เอตมตฺถํ ปุจฺเฉยฺยํ ...
เทฺว   รตฺตินฺทิวานิปิ  เม  สารีปุตฺโต  เอตมตฺถํ  พฺยากเรยฺย  ...  ตีณิ
รตฺตินฺทิวานิ    เจปหํ    สารีปุตฺตํ   เอตมตฺถํ   ปุจฺเฉยฺยํ   ...   ตีณิ
@เชิงอรรถ:  ม. ทิวสํ เจปาหํ ฯ เอวมุปริปิ ฯ
รตฺตินฺทิวานิปิ   เม   สารีปุตฺโต   เอตมตฺถํ  พฺยากเรยฺย  ...  จตฺตาริ
รตฺตินฺทิวานิ   เจปหํ   สารีปุตฺตํ   เอตมตฺถํ   ปุจฺเฉยฺยํ   ...  จตฺตาริ
รตฺตินฺทิวานิปิ   เม   สารีปุตฺโต   เอตมตฺถํ   พฺยากเรยฺย   ...  ปญฺจ
รตฺตินฺทิวานิ    เจปหํ   สารีปุตฺตํ   เอตมตฺถํ   ปุจฺเฉยฺยํ   ...   ปญฺจ
รตฺตินฺทิวานิปิ  เม  สารีปุตฺโต  เอตมตฺถํ  พฺยากเรยฺย ... ฉ รตฺตินฺทิวานิ
เจปหํ   สารีปุตฺตํ   เอตมตฺถํ   ปุจฺเฉยฺยํ   ...  ฉ  รตฺตินฺทิวานิปิ  เม
สารีปุตฺโต   เอตมตฺถํ   พฺยากเรยฺย   ...   สตฺต  รตฺตินฺทิวานิ  เจปหํ
สารีปุตฺตํ    เอตมตฺถํ    ปุจฺเฉยฺยํ   อญฺญมญฺเญหิ   ปเทหิ   อญฺญมญฺเญหิ
ปริยาเยหิ   สตฺต  รตฺตินฺทิวานิปิ  เม  สารีปุตฺโต  เอตมตฺถํ  พฺยากเรยฺย
อญฺญมญฺเญหิ ปเทหิ อญฺญมญฺเญหิ ปริยาเยหีติ ฯ ทุติยํ ฯ
     [๑๑๘]   สาวตฺถิยํ  วิหรติ  ... จตุจตฺตาฬีสํ โว ภิกฺขเว ญาณวตฺถูนิ
เทเสสฺสามิ  ตํ  สุณาถ  สาธุกํ  มนสิกโรถ  ภาสิสฺสามีติ  ฯ เอวํ ภนฺเตติ
โข เต ภิกฺขู ภควโต ปจฺจสฺโสสุํ ฯ
     [๑๑๙]   ภควา  เอตทโวจ  กตมานิ  จ  ๑-  ภิกฺขเว จตุจตฺตาฬีสํ
ญาณวตฺถูนิ   ชรามรเณ   ญาณํ   ชรามรณสมุทเย  ญาณํ  ชรามรณนิโรเธ
ญาณํ    ชรามรณนิโรธคามินิยา    ปฏิปทาย    ญาณํ    ชาติยา   ญาณํ
ชาติสมุทเย     ญาณํ     ชาตินิโรเธ     ญาณํ     ชาตินิโรธคามินิยา
ปฏิปทาย   ญาณํ   ภเว   ญาณํ   ภวสมุทเย   ญาณํ   ภวนิโรเธ  ญาณํ
ภวนิโรธคามินิยา    ปฏิปทาย   ญาณํ  อุปาทาเน  ญาณํ  อุปาทานสมุทเย
ญาณํ        อุปาทานนิโรเธ       ญาณํ       อุปาทานนิโรธคามินิยา
@เชิงอรรถ:  ม. จสทฺโท นตฺถิ ฯ
ปฏิปทาย   ญาณํ   ตณฺหาย   ญาณํ   ตณฺหาสมุทเย   ญาณํ  ตณฺหานิโรเธ
ญาณํ    ตณฺหานิโรธคามินิยา    ปฏิปทาย    ญาณํ    เวทนาย    ญาณํ
เวทนาสมุทเย    ญาณํ    เวทนานิโรเธ   ญาณํ   เวทนานิโรธคามินิยา
ปฏิปทาย   ญาณํ  ผสฺเส  ญาณํ  ...  สฬายตเน  ญาณํ  ...  นามรูเป
ญาณํ   ...   วิญฺญาเณ   ญาณํ  ...  สงฺขาเรสุ  ญาณํ  สงฺขารสมุทเย
ญาณํ     สงฺขารนิโรเธ     ญาณํ    สงฺขารนิโรธคามินิยา    ปฏิปทาย
ญาณํ อิมานิ วุจฺจนฺติ ภิกฺขเว จตุจตฺตาฬีสํ ญาณวตฺถูนิ ฯ
     [๑๒๐]   กตมญฺจ  ภิกฺขเว  ชรามรณํ  ฯ  ยา  เตสํ  เตสํ สตฺตานํ
ตมฺหิ   ตมฺหิ   สตฺตนิกาเย  ชรา  ชีรณตา  ขณฺฑิจฺจํ  ปาลิจฺจํ  วลิตฺตจตา
อายุโน   สํหานิ   อินฺทฺริยานํ   ปริปาโก   อยํ   วุจฺจติ  ชรา  ฯ  ยา
เตสํ   เตสํ  สตฺตานํ  ตมฺหา  ตมฺหา  สตฺตนิกายา  จุติ  จวนตา  เภโท
อนฺตรธานํ    มจฺจุ   มรณํ   กาลกิริยา   ขนฺธานํ   เภโท   กเฬวรสฺส
นิกฺเขโป   ชีวิตินฺทฺริยสฺส   อุปจฺเฉโท   อิทํ   วุจฺจติ   มรณํ   ฯ   อิติ
อยญฺจ   ชรา   อิทญฺจ   มรณํ   อิทํ   วุจฺจติ   ภิกฺขเว   ชรามรณํ  ฯ
ชาติสมุทยา      ชรามรณสมุทโย      ชาตินิโรธา     ชรามรณนิโรโธ
อยเมว    อริโย   อฏฺฐงฺคิโก   มคฺโค   ชรามรณนิโรธคามินี   ปฏิปทา
เสยฺยถีทํ สมฺมาทิฏฺฐิ ฯเปฯ สมฺมาสมาธิ ฯ
     [๑๒๑]   ยโต  โข  ภิกฺขเว  อริยสาวโก  เอวํ ชรามรณํ ปชานาติ
เอวํ    ชรามรณสมุทยํ    ปชานาติ   เอวํ   ชรามรณนิโรธํ   ปชานาติ
เอวํ    ชรามรณนิโรธคามินึ    ปฏิปทํ    ปชานาติ    อิทมสฺส   ธมฺเม
ญาณํ   ฯ   โส  อิมินา  ธมฺเมน  ทิฏฺเฐน  วิทิเตน  อกาลิเกน  ปตฺเตน
ปริโยคาเฬฺหน อตีตานาคเต นยํ เนติ ฯ
     {๑๒๑.๑}   เย  โข  เกจิ  อตีตมทฺธานํ  สมณา วา พฺราหฺมณา วา
ชรามรณํ     อพฺภญฺญํสุ    ชรามรณสมุทยํ    อพฺภญฺญํสุ    ชรามรณนิโรธํ
อพฺภญฺญํสุ    ชรามรณนิโรธคามินึ    ปฏิปทํ    อพฺภญฺญํสุ    สพฺเพ   เต
เอวเมว อพฺภญฺญํสุ เสยฺยถาปิหํ เอตรหิ ฯ
     {๑๒๑.๒}   เยปิ  หิ  เกจิ อนาคตมทฺธานํ สมณา วา พฺราหฺมณา วา
ชรามรณํ   อภิชานิสฺสนฺติ   ชรามรณสมุทยํ   อภิชานิสฺสนฺติ  ชรามรณนิโรธํ
อภิชานิสฺสนฺติ   ชรามรณนิโรธคามินึ   ปฏิปทํ   อภิชานิสฺสนฺติ  สพฺเพ  เต
เอวเมว อภิชานิสฺสนฺติ เสยฺยถาปิหํ เอตรหีติ ฯ อิทมสฺส อนฺวเย ญาณํ ฯ
     [๑๒๒]   ยโต  โข  ภิกฺขเว  อริยสาวกสฺส  อิมานิ  เทฺว  ญาณานิ
ปริสุทฺธานิ   โหนฺติ  ปริโยทาตานิ  ธมฺเม  ญาณญฺจ  อนฺวเย  ญาณญฺจ  ฯ
อยํ   วุจฺจติ   ภิกฺขเว  อริยสาวโก  ทิฏฺฐิสมฺปนฺโน  อิติปิ  ทสฺสนสมฺปนฺโน
อิติปิ  อาคโต  อิมํ  สทฺธมฺมํ  อิติปิ  ปสฺสติ  อิมํ  สทฺธมฺมํ  อิติปิ เสกฺเขน
ญาเณน    สมนฺนาคโต    อิติปิ    เสกฺขาย    วิชฺชาย    สมนฺนาคโต
อิติปิ    ธมฺมโสตํ   สมาปนฺโน   อิติปิ   อริโย   นิพฺเพธิกปญฺโญ   อิติปิ
อมตทฺวารํ อาหจฺจ ติฏฺฐติ อิติปีติ ฯ
     [๑๒๓]   กตมา   จ  ภิกฺขเว  ชาติ  ฯเปฯ  กตโม  จ  ภิกฺขเว
ภโว  ...  กตมญฺจ  ภิกฺขเว อุปาทานํ ... กตมา จ ภิกฺขเว ตณฺหา ...
กตมา  จ  ภิกฺขเว  เวทนา  ...  กตโม จ ภิกฺขเว ผสฺโส ... กตมญฺจ
ภิกฺขเว  สฬายตนํ  ...  กตมญฺจ  ภิกฺขเว  นามรูปํ ... กตมญฺจ ภิกฺขเว
วิญฺญาณํ  ...  กตเม  จ  ภิกฺขเว  สงฺขารา  ตโยเม  ภิกฺขเว สงฺขารา
กายสงฺขาโร    วจีสงฺขาโร   จิตฺตสงฺขาโร   อิเม   วุจฺจนฺติ   ภิกฺขเว
สงฺขารา     ฯ     อวิชฺชาสมุทยา    สงฺขารสมุทโย    อวิชฺชานิโรธา
สงฺขารนิโรโธ   อยเมว   อริโย  อฏฺฐงฺคิโก  มคฺโค  สงฺขารนิโรธคามินี
ปฏิปทา เสยฺยถีทํ สมฺมาทิฏฺฐิ ฯเปฯ สมฺมาสมาธิ ฯ
     [๑๒๔]   ยโต  โข  ภิกฺขเว  อริยสาวโก  เอวํ สงฺขาเร ปชานาติ
เอวํ   สงฺขารสมุทยํ   ปชานาติ   เอวํ   สงฺขารนิโรธํ  ปชานาติ  เอวํ
สงฺขารนิโรธคามินึ    ปฏิปทํ   ปชานาติ   อิทมสฺส   ธมฺเม   ญาณํ   ฯ
โส    อิมินา    ธมฺเมน    ทิฏฺเฐน    วิทิเตน   อกาลิเกน   ปตฺเตน
ปริโยคาเฬฺหน อตีตานาคเต นยํ เนติ ฯ
     {๑๒๔.๑}   เย  โข  เกจิ  อตีตมทฺธานํ  สมณา วา พฺราหฺมณา วา
สงฺขาเร     อพฺภญฺญํสุ     สงฺขารสมุทยํ     อพฺภญฺญํสุ    สงฺขารนิโรธํ
อพฺภญฺญํสุ    สงฺขารนิโรธคามินึ    ปฏิปทํ    อพฺภญฺญํสุ    สพฺเพ    เต
เอวเมว อพฺภญฺญํสุ เสยฺยถาปิหํ เอตรหิ ฯ
     {๑๒๔.๒}   เยปิ  หิ  เกจิ  อนาคตมทฺธานํ  สมณา  วา พฺราหฺมณา
วา   สงฺขาเร  อภิชานิสฺสนฺติ  สงฺขารสมุทยํ  อภิชานิสฺสนฺติ  สงฺขารนิโรธํ
อภิชานิสฺสนฺติ    สงฺขารนิโรธคามินึ    ปฏิปทํ    อภิชานิสฺสนฺติ    สพฺเพ
เต   เอวเมว   อภิชานิสฺสนฺติ   เสยฺยถาปิหํ   เอตรหีติ   ฯ   อิทมสฺส
อนฺวเย ญาณํ ฯ
     [๑๒๕]   ยโต  โข  ภิกฺขเว  อริยสาวกสฺส  อิมานิ  เทฺว  ญาณานิ
ปริสุทฺธานิ     โหนฺติ    ปริโยทาตานิ    ธมฺเม    ญาณญฺจ    อนฺวเย
ญาณญฺจ    ฯ    อยํ    วุจฺจติ   ภิกฺขเว   อริยสาวโก   ทิฏฺฐิสมฺปนฺโน
อิติปิ    ทสฺสนสมฺปนฺโน    อิติปิ    อาคโต    อิมํ    สทฺธมฺมํ    อิติปิ
ปสฺสติ    อิมํ    สทฺธมฺมํ    อิติปิ    เสกฺเขน   ญาเณน   สมนฺนาคโต
อิติปิ   เสกฺขาย   วิชฺชาย   สมนฺนาคโต   อิติปิ   ธมฺมโสตํ  สมาปนฺโน
อิติปิ    อริโย   นิพฺเพธิกปญฺโญ   อิติปิ   อมตทฺวารํ   อาหจฺจ   ติฏฺฐติ
อิติปีติ ฯ ตติยํ ฯ
     [๑๒๖]   สาวตฺถิยํ   วิหรติ   ...   สตฺตสตฺตริ   โว   ภิกฺขเว
ญาณวตฺถูนิ     เทเสสฺสามิ     ตํ     สุณาถ     สาธุกํ    มนสิกโรถ
ภาสิสฺสามีติ ฯ เอวํ ภนฺเตติ โข เต ภิกฺขู ภควโต ปจฺจสฺโสสุํ ฯ
     [๑๒๗]   ภควา  เอตทโวจ  กตมานิ  จ  ๑-  ภิกฺขเว  สตฺตสตฺตริ
ญาณวตฺถูนิ     ชาติปจฺจยา    ชรามรณนฺติ    ญาณํ    อสติ    ชาติยา
นตฺถิ     ชรามรณนฺติ     ญาณํ     อตีตมฺปิ    อทฺธานํ    ชาติปจฺจยา
ชรามรณนฺติ    ญาณํ    อสติ    ชาติยา    นตฺถิ   ชรามรณนฺติ   ญาณํ
อนาคตมฺปิ   อทฺธานํ   ชาติปจฺจยา   ชรามรณนฺติ   ญาณํ  อสติ  ชาติยา
นตฺถิ    ชรามรณนฺติ    ญาณํ    ยมฺปิสฺส    ตํ    ธมฺมฏฺฐิติญาณํ   ตมฺปิ
ขยธมฺมํ   วยธมฺมํ   วิราคธมฺมํ   นิโรธธมฺมนฺติ   ญาณํ   ฯ   ภวปจฺจยา
ชาตีติ  ญาณํ  ฯเปฯ  อุปาทานปจฺจยา  ภโวติ  ญาณํ  ...  ตณฺหาปจฺจยา
อุปาทานนฺติ    ญาณํ    ...   เวทนาปจฺจยา   ตณฺหาติ   ญาณํ   ...
ผสฺสปจฺจยา  เวทนาติ  ญาณํ  ...  สฬายตนปจฺจยา  ผสฺโสติ  ญาณํ ...
@เชิงอรรถ:  ม. จสทฺโท นตฺถิ ฯ
นามรูปปจฺจยา   สฬายตนนฺติ   ญาณํ   ...   วิญฺญาณปจฺจยา  นามรูปนฺติ
ญาณํ   ...   สงฺขารปจฺจยา   วิญฺญาณนฺติ   ญาณํ  ...  อวิชฺชาปจฺจยา
สงฺขาราติ    ญาณํ    อสติ    อวิชฺชาย    นตฺถิ    สงฺขาราติ   ญาณํ
อตีตมฺปิ   อทฺธานํ   อวิชฺชาปจฺจยา   สงฺขาราติ   ญาณํ  อสติ  อวิชฺชาย
นตฺถิ    สงฺขาราติ    ญาณํ    อนาคตมฺปิ    อทฺธานํ    อวิชฺชาปจฺจยา
สงฺขาราติ    ญาณํ    อสติ    อวิชฺชาย    นตฺถิ    สงฺขาราติ   ญาณํ
ยมฺปิสฺส    ตํ    ธมฺมฏฺฐิติญาณํ   ตมฺปิ   ขยธมฺมํ   วยธมฺมํ   วิราคธมฺมํ
นิโรธธมฺมนฺติ    ญาณํ    ฯ    อิมานิ   วุจฺจนฺติ   ภิกฺขเว   สตฺตสตฺตริ
ญาณวตฺถูนีติ ฯ จตุตฺถํ ฯ
     [๑๒๘]   สาวตฺถิยํ  วิหรติ  ...  อวิชฺชาปจฺจยา  ภิกฺขเว สงฺขารา
สงฺขารปจฺจยา      วิญฺญาณํ      ฯเปฯ     เอวเมตสฺส     เกวลสฺส
ทุกฺขกฺขนฺธสฺส สมุทโย โหติติ ฯ
     [๑๒๙]   เอวํ   วุตฺเต   อญฺญตโร   ภิกฺขุ   ภควนฺตํ  เอตทโวจ
กตมํ   นุ   โข   ภนฺเต   ชรามรณํ   กสฺส  จ  ปนิทํ  ชรามรณนฺติ  ฯ
โน   กลฺโล   ปโญฺหติ   ภควา   อโวจ   กตมํ   ชรามรณํ   กสฺส  จ
ปนิทํ   ชรามรณนฺติ   อิติ   วา   ภิกฺขุ   โย  วเทยฺย  อญฺญํ  ชรามรณํ
อญฺญสฺส   จ   ปนิทํ   ชรามรณนฺติ   อิติ   วา   ภิกฺขุ   โย   วเทยฺย
อุภยเมตํ   เอกตฺถํ   พฺยญฺชนเมว   นานํ  ฯ  ตํ  ชีวํ  ตํ  สรีรนฺติ  วา
ภิกฺขุ   ทิฏฺฐิยา   สติ   พฺรหฺมจริยวาโส   น   โหติ   อญฺญํ  ชีวํ  อญฺญํ
สรีรนฺติ   วา   ภิกฺขุ   ทิฏฺฐิยา   สติ   พฺรหฺมจริยวาโส   น  โหติ  ฯ
เอเต   เต   ภิกฺขุ   อุโภ  อนฺเต  อนุปคมฺม  มชฺเฌน  ตถาคโต  ธมฺมํ
เทเสติ ชาติปจฺจยา ชรามรณนฺติ ฯ
     [๑๓๐]   กตมา  นุ  โข  ภนฺเต  ชาติ  กสฺส  จ  ปนายํ ชาตีติ ฯ
โน    กลฺโล   ปโญฺหติ   ภควา   อโวจ   กตมา   ชาติ   กสฺส   จ
ปนายํ   ชาตีติ   อิติ   วา  ภิกฺขุ  โย  วเทยฺย  อญฺญา  ชาติ  อญฺญสฺส
จ   ปนายํ   ชาตีติ  อิติ  วา  ภิกฺขุ  โย   วเทยฺย  อุภยเมตํ  เอกตฺถํ
พฺยญฺชนเมว   นานํ   ฯ  ตํ  ชีวํ  ตํ  สรีรนฺติ  วา  ภิกฺขุ  ทิฏฺฐิยา  สติ
พฺรหฺมจริยวาโส   น   โหติ   อญฺญํ   ชีวํ   อญฺญํ   สรีรนฺติ  วา  ภิกฺขุ
ทิฏฺฐิยา   สติ   พฺรหฺมจริยวาโส  น  โหติ  ฯ  เอเต  เต  ภิกฺขุ  อุโภ
อนฺเต    อนุปคมฺม   มชฺเฌน   ตถาคโต   ธมฺมํ   เทเสติ   ภวปจฺจยา
ชาตีติ ฯ
     [๑๓๑]   กตโม  นุ  โข  ภนฺเต  ภโว  กสฺส  จ  ปนายํ ภโวติ ฯ
โน    กลฺโล   ปโญฺหติ   ภควา   อโวจ   กตโม   ภโว   กสฺส   จ
ปนายํ   ภโวติ   อิติ   วา  ภิกฺขุ  โย  วเทยฺย  อญฺโญ  ภโว  อญฺญสฺส
จ   ปนายํ   ภโวติ   อิติ  วา  ภิกฺขุ  โย  วเทยฺย  อุภยเมตํ  เอกตฺถํ
พฺยญฺชนเมว   นานํ   ฯ  ตํ  ชีวํ  ตํ  สรีรนฺติ  วา  ภิกฺขุ  ทิฏฺฐิยา  สติ
พฺรหฺมจริยวาโส   น   โหติ   อญฺญํ   ชีวํ   อญฺญํ   สรีรนฺติ  วา  ภิกฺขุ
ทิฏฺฐิยา   สติ   พฺรหฺมจริยวาโส  น  โหติ  ฯ  เอเต  เต  ภิกฺขุ  อุโภ
อนฺเต   อนุปคมฺม   มชฺเฌน   ตถาคโต  ธมฺมํ  เทเสติ  อุปาทานปจฺจยา
ภโวติ    ฯเปฯ    ตณฺหาปจฺจยา   อุปาทานนฺติ   ...   เวทนาปจฺจยา
ตณฺหาติ    ...    ผสฺสปจฺจยา    เวทนาติ    ...   สฬายตนปจฺจยา
ผสฺโสติ   ...   นามรูปปจฺจยา   สฬายตนนฺติ    ...   วิญฺญาณปจฺจยา
นามรูปนฺติ ... สงฺขารปจฺจยา วิญฺญาณนฺติ ฯ
     [๑๓๒]   กตเม   นุ   โข   ภนฺเต  สงฺขารา  กสฺส  จ  ปนิเม
สงฺขาราติ   ฯ   โน  กลฺโล  ปโญฺหติ  ภควา  อโวจ  กตเม  สงฺขารา
กสฺส   จ   ปนิเม   สงฺขาราติ   อิติ  วา  ภิกฺขุ  โย  วเทยฺย  อญฺเญ
สงฺขารา   อญฺญสฺส   จ   ปนิเม   สงฺขาราติ   อิติ   วา   ภิกฺขุ  โย
วเทยฺย   อุภยเมตํ   เอกตฺถํ   พฺยญฺชนเมว   นานํ   ฯ   ตํ   ชีวํ  ตํ
สรีรนฺติ    วา    ภิกฺขุ   ทิฏฺฐิยา   สติ   พฺรหฺมจริยวาโส   น   โหติ
อญฺญํ   ชีวํ   อญฺญํ   สรีรนฺติ  วา  ภิกฺขุ  ทิฏฺฐิยา  สติ  พฺรหฺมจริยวาโส
น   โหติ   ฯ   เอเต   เต   ภิกฺขุ  อุโภ  อนฺเต  อนุปคมฺม  มชฺเฌน
ตถาคโต ธมฺมํ เทเสติ อวิชฺชาปจฺจยา สงฺขาราติ ฯ
     [๑๓๓]   อวิชฺชาย  เตฺวว ภิกฺขุ อเสสวิราคนิโรธา ยานิสฺส ตานิ ๑-
วิสูกายิตานิ   วิเสวิตานิ   วิปฺผนฺทิตานิ   กานิจิ  กานิจิ  กตมํ  ชรามรณํ
กสฺส   จ   ปนิทํ   ชรามรณํ   อิติ   วา  อญฺญํ  ชรามรณํ  อญฺญสฺส  จ
ปนิทํ  ชรามรณํ  อิติ  วา  ตํ  ชีวํ  ตํ  สรีรํ  อิติ  วา  อญฺญํ  ชีวํ อญฺญํ
สรีรํ   อิติ   วา  สพฺพานิสฺส  ตานิ  ๒-  ปหีนานิ  ภวนฺติ  อุจฺฉินฺนมูลานิ
ตาลาวตฺถุกตานิ อนภาวงฺคตานิ อายตึ อนุปฺปาทธมฺมานิ ฯ
     [๑๓๔]   อวิชฺชาย  เตฺวว  ภิกฺขุ  อเสสวิราคนิโรธา  ยานิสฺส ตานิ
วิสูกายิตานิ   วิเสวิตานิ   วิปฺผนฺทิตานิ   กานิจิ   กานิจิ   กตมา  ชาติ
@เชิงอรรถ:  ยุ. ยานิสฺสิตานิ ฯ เอวมุปริปิ  ฯ   ยุ.  สพฺพานิสฺสิตานิ ฯ เอวมุปริปิ ฯ
กสฺส   จ   ปนายํ   ชาติ  อิติ  วา  อญฺญา  ชาติ  อญฺญสฺส  จ  ปนายํ
ชาติ  อิติ  วา  ตํ  ชีวํ  ตํ  สรีรํ  อิติ  วา  อญฺญํ  ชีวํ  อญฺญํ สรีรํ อิติ
วา     สพฺพานิสฺส     ตานิ     ปหีนานิ     ภวนฺติ     อุจฺฉินฺนมูลานิ
ตาลาวตฺถุกตานิ อนภาวงฺคตานิ อายตึ อนุปฺปาทธมฺมานิ ฯ
     [๑๓๕]   อวิชฺชาย  เตฺวว  ภิกฺขุ  อเสสวิราคนิโรธา  ยานิสฺส ตานิ
วิสูกายิตานิ   วิเสวิตานิ   วิปฺผนฺทิตานิ   กานิจิ   กานิจิ   กตโม  ภโว
ฯเปฯ  กตมํ  อุปาทานํ  ...  กตมา  ตณฺหา  ...  กตมา เวทนา ...
กตโม  ผสฺโส  ...  กตมํ  สฬายตนํ  ...  กตมํ  นามรูปํ  ...  กตมํ
วิญฺญาณํ ... ฯ
     [๑๓๖]   อวิชฺชาย   เตฺวว   ภิกฺขุ   อเสสวิราคนิโรธา  ยานิสฺส
ตานิ   วิสูกายิตานิ   วิเสวิตานิ   วิปฺผนฺทิตานิ   กานิจิ   กานิจิ  กตเม
สงฺขารา   กสฺส   จ   ปนิเม   สงฺขารา   อิติ  วา  อญฺเญ  สงฺขารา
อญฺญสฺส   จ   ปนิเม  สงฺขารา  อิติ  วา  ตํ  ชีวํ  ตํ  สรีรํ  อิติ  วา
อญฺญํ    ชีวํ   อญฺญํ   สรีรํ   อิติ   วา   สพฺพานิสฺส   ตานิ   ปหีนานิ
ภวนฺติ     อุจฺฉินฺนมูลานิ    ตาลาวตฺถุกตานิ    อนภาวงฺคตานิ    อายตึ
อนุปฺปาทธมฺมานีติ ฯ ปญฺจมํ ฯ
     [๑๓๗]   สาวตฺถิยํ  วิหรติ  ...  ตตฺร  โข  ฯเปฯ อวิชฺชาปจฺจยา
ภิกฺขเว    สงฺขารา    สงฺขารปจฺจยา   วิญฺญาณํ   ฯเปฯ   เอวเมตสฺส
เกวลสฺส ทุกฺขกฺขนฺธสฺส สมุทโย โหติ ฯ
     [๑๓๘]   กตมํ  ชรามรณํ  กสฺส  จ  ปนิทํ  ชรามรณนฺติ  อิติ  วา
ภิกฺขเว   โย  วเทยฺย  อญฺญํ  ชรามรณํ  อญฺญสฺส  จ  ปนิทํ  ชรามรณนฺติ
อิติ  วา  ภิกฺขเว  โย  วเทยฺย  อุภยเมตํ  เอกตฺถํ  พฺยญฺชนเมว นานํ ฯ
ตํ  ชีวํ  ตํ  สรีรนฺติ  วา  ภิกฺขเว  ทิฏฺฐิยา  สติ พฺรหฺมจริยวาโส น โหติ
อญฺญํ   ชีวํ  อญฺญํ  สรีรนฺติ  วา  ภิกฺขเว  ทิฏฺฐิยา  สติ  พฺรหฺมจริยวาโส
น  โหติ  ฯ  เอเต  เต  ภิกฺขเว อุโภ อนฺเต อนุปคมฺม มชฺเฌน ตถาคโต
ธมฺมํ  เทเสติ  ชาติปจฺจยา  ชรามรณนฺติ  ฯเปฯ กตมา ชาติ  ... กตโม
ภโว  ... กตมํ อุปาทานํ ... กตมา ตณฺหา ... กตมา เวทนา ... กตโม
ผสฺโส ... กตมํ สฬายตนํ ... กตมํ นามรูปํ ... กตมํ วิญฺญาณํ ... ฯ
     [๑๓๙]   กตเม  สงฺขารา  กสฺส  จ  ปนิเม  สงฺขาราติ  อิติ  วา
ภิกฺขเว  โย  วเทยฺย  อญฺเญ  สงฺขารา  อญฺญสฺส  จ  ปนิเม  สงฺขาราติ
อิติ  วา  ภิกฺขเว  โย  วเทยฺย  อุภยเมตํ  เอกตฺถํ  พฺยญฺชนเมว นานํ ฯ
ตํ  ชีวํ  ตํ  สรีรํ  อิติ  วา  ภิกฺขเว ทิฏฺฐิยา สติ พฺรหฺมจริยวาโส น โหติ
อญฺญํ  ชีวํ  อญฺญํ  สรีรํ  อิติ  วา  ภิกฺขเว  ทิฏฺฐิยา  สติ พฺรหฺมจริยวาโส
น  โหติ  ฯ  เอเต  เต  ภิกฺขเว อุโภ อนฺเต อนุปคมฺม มชฺเฌน ตถาคโต
ธมฺมํ เทเสติ อวิชฺชาปจฺจยา สงฺขารา ฯเปฯ
     [๑๔๐]   อวิชฺชาย  เตฺวว  ภิกฺขเว อเสสวิราคนิโรธา ยานิสฺส ตานิ
วิสูกายิตานิ   วิเสวิตานิ   วิปฺผนฺทิตานิ   กานิจิ  กานิจิ  กตมํ  ชรามรณํ
กสฺส   จ   ปนิทํ   ชรามรณํ   อิติ   วา  อญฺญํ  ชรามรณํ  อญฺญสฺส  จ
ปนิทํ  ชรามรณํ  อิติ  วา  ตํ  ชีวํ  ตํ  สรีรํ  อิติ  วา  อญฺญํ  ชีวํ อญฺญํ
สรีรํ   อิติ   วา   สพฺพานิสฺส   ตานิ   ปหีนานิ   ภวนฺติ  อุจฺฉินฺนมูลานิ
ตาลาวตฺถุกตานิ อนภาวงฺคตานิ อายตึ อนุปฺปาทธมฺมานิ ฯ
     [๑๔๑]   อวิชฺชาย  เตฺวว  ภิกฺขเว อเสสวิราคนิโรธา ยานิสฺส ตานิ
วิสูกายิตานิ   วิเสวิตานิ   วิปฺผนฺทิตานิ   กานิจิ   กานิจิ   กตมา  ชาติ
ฯเปฯ  กตโม  ภโว  ...  กตมํ อุปาทานํ ... กตมา ตณฺหา ... กตมา
เวทนา  ...  กตโม  ผสฺโส ... กตมํ สฬายตนํ ... กตมํ นามรูปํ ...
กตมํ วิญฺญาณํ ... ฯ
     [๑๔๒]   อวิชฺชาย  เตฺวว  ภิกฺขเว อเสสวิราคนิโรธา ยานิสฺส ตานิ
วิสูกายิตานิ   วิเสวิตานิ   วิปฺผนฺทิตานิ  กานิจิ  กานิจิ  กตเม  สงฺขารา
กสฺส   จ   ปนิเม   สงฺขารา   อิติ   วา   อญฺเญ  สงฺขารา  อญฺญสฺส
จ  ปนิเม  สงฺขารา  อิติ  วา  ตํ  ชีวํ  ตํ  สรีรํ อิติ วา อญฺญํ ชีวํ อญฺญํ
สรีรํ   อิติ   วา   สพฺพานิสฺส   ตานิ   ปหีนานิ   ภวนฺติ  อุจฺฉินฺนมูลานิ
ตาลาวตฺถุกตานิ     อนภาวงฺคตานิ    อายตึ    อนุปฺปาทธมฺมานีติ    ฯ
ฉฏฺฐํ ฯ
     [๑๔๓]   สาวตฺถิยํ  วิหรติ  ...  นายํ ภิกฺขเว กาโย ตุมฺหากํ นาปิ
อญฺเญสํ    ฯ    ปุราณมิทํ   ภิกฺขเว   กมฺมํ   อภิสงฺขตํ   อภิสญฺเจตยิตํ
เวทนียํ ทฏฺฐพฺพํ ฯ
     [๑๔๔]   ตตฺร [๑]- ภิกฺขเว สุตวา อริยสาวโก ปฏิจฺจสมุปฺปาทญฺเญว
สาธุกํ   โยนิโส  มนสิกโรติ  อิติ  อิมสฺมึ  สติ  อิทํ  โหติ  อิมสฺสุปฺปาทา
@เชิงอรรถ:  ม. ยุ. โข ฯ
อิทํ  อุปฺปชฺชติ  อิมสฺมึ  อสติ  อิทํ  น  โหติ  อิมสฺส  นิโรธา อิทํ นิรุชฺฌติ
ยทิทํ    อวิชฺชาปจฺจยา    สงฺขารา   สงฺขารปจฺจยา   วิญฺญาณํ   ฯเปฯ
เอวเมตสฺส  เกวลสฺส  ทุกฺขกฺขนฺธสฺส  สมุทโย  โหติ  ฯ  อวิชฺชาย เตฺวว
อเสสวิราคนิโรธา    สงฺขารนิโรโธ    สงฺขารนิโรธา    วิญฺญาณนิโรโธ
ฯเปฯ เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ  สตฺตมํ ฯ
     [๑๔๕]   สาวตฺถิยํ  วิหรติ  ...  ยญฺจ [๑]- ภิกฺขเว เจเตติ ยญฺจ
ปกปฺเปติ   ยญฺจ   อนุเสติ   อารมฺมณเมตํ   โหติ   วิญฺญาณสฺส   ฐิติยา
อารมฺมเณ    สติ    ปติฏฺฐา    วิญฺญาณสฺส    โหติ   ตสฺมึ   ปติฏฺฐิเต
วิญฺญาเณ     วิรูเฬฺห    อายตึ    ปุนพฺภวาภินิพฺพตฺติ    โหติ    อายตึ
ปุนพฺภวาภินิพฺพตฺติยา     สติ    อายตึ    ชาติชรามรณํ    โสกปริเทว-
ทุกฺขโทมนสฺสุปายาสา   สมฺภวนฺติ   เอวเมตสฺส  เกวลสฺส  ทุกฺขกฺขนฺธสฺส
สมุทโย  โหติ ฯ โน จ ๒- ภิกฺขเว เจเตติ โน จ ๒- ปกปฺเปติ อถ จ ๒-
อนุเสติ   อารมฺมณเมตํ   โหติ   วิญฺญาณสฺส   ฐิติยา   อารมฺมเณ   สติ
ปติฏฺฐา    วิญฺญาณสฺส    โหติ   ตสฺมึ   ปติฏฺฐิเต   วิญฺญาเณ   วิรูเฬฺห
อายตึ    ปุนพฺภวาภินิพฺพตฺติ   โหติ   อายตึ   ปุนพฺภวาภินิพฺพตฺติยา   สติ
อายตึ     ชาติชรามรณํ    โสกปริเทวทุกฺขโทมนสฺสุปายาสา    สมฺภวนฺติ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๔๖]   ยโต จ โข ภิกฺขเว โน จ ๓- เจเตติ โน จ ปกปฺเปติ โน
จ   อนุเสติ   อารมฺมณเมตํ   น   โหติ  วิญฺญาณสฺส  ฐิติยา  อารมฺมเณ
@เชิงอรรถ:  ยุ. โข ฯ    ม. ยุ. เจ ฯ เอวมุปริปิ ฯ     ม. ยุ. เจว ฯ
อสติ   ปติฏฺฐา  วิญฺญาณสฺส  น  โหติ  ตทปฺปติฏฺฐิเต  วิญฺญาเณ  อวิรูเฬฺห
อายตึ    ปุนพฺภวาภินิพฺพตฺติ    น   โหติ   อายตึ   ปุนพฺภวาภินิพฺพตฺติยา
อสติ      อายตึ     ชาติชรามรณํ     โสกปริเทวทุกฺขโทมนสฺสุปายาสา
นิรุชฺฌนฺติ      เอวเมตสฺส     เกวลสฺส     ทุกฺขกฺขนฺธสฺส     นิโรโธ
โหตีติ ฯ อฏฺฐมํ ฯ
     [๑๔๗]   สาวตฺถิยํ   วิหรติ  ...  ยญฺจ  ภิกฺขเว  เจเตติ  ยญฺจ
ปกปฺเปติ   ยญฺจ   อนุเสติ   อารมฺมณเมตํ   โหติ   วิญฺญาณสฺส   ฐิติยา
อารมฺมเณ    สติ    ปติฏฺฐา    วิญฺญาณสฺส    โหติ   ตสฺมึ   ปติฏฺฐิเต
วิญฺญาเณ    วิรูเฬฺห    นามรูปสฺส    อวกฺกนฺติ   โหติ   นามรูปปจฺจยา
สฬายตนํ   สฬายตนปจฺจยา   ผสฺโส  ผสฺสปจฺจยา  เวทนา  ...  ตณฺหา
...  อุปาทานํ  ...  ภโว  ...  ชาติ ... ชรามรณํ โสกปริเทวทุกฺข-
โทมนสฺสุปายาสา    สมฺภวนฺติ   เอวเมตสฺส   เกวลสฺส   ทุกฺขกฺขนฺธสฺส
สมุทโย  โหติ  ฯ  โน  จ  ภิกฺขเว  เจเตติ  โน  จ  ปกปฺเปติ  อถ จ
อนุเสติ   อารมฺมณเมตํ   โหติ   วิญฺญาณสฺส   ฐิติยา   อารมฺมเณ   สติ
ปติฏฺฐา    วิญฺญาณสฺส    โหติ   ตสฺมึ   ปติฏฺฐิเต   วิญฺญาเณ   วิรูเฬฺห
นามรูปสฺส    อวกฺกนฺติ    โหติ    นามรูปปจฺจยา    สฬายตนํ   ฯเปฯ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๔๘]   ยโต  จ  โข  ภิกฺขเว  โน  จ  เจเตติ โน จ ปกปฺเปติ
โน    จ    อนุเสติ   อารมฺมณเมตํ   น   โหติ   วิญฺญาณสฺส   ฐิติยา
อารมฺมเณ    อสติ    ปติฏฺฐา   วิญฺญาณสฺส   น   โหติ   ตทปฺปติฏฺฐิเต
วิญฺญาเณ   อวิรูเฬฺห   นามรูปสฺส   อวกฺกนฺติ   น  โหติ  นามรูปนิโรธา
สฬายตนนิโรโธ   ฯเปฯ   เอวเมตสฺส  เกวลสฺส  ทุกฺขกฺขนฺธสฺส  นิโรโธ
โหตีติ ฯ นวมํ ฯ
     [๑๔๙]   สาวตฺถิยํ   วิหรติ  ...  ยญฺจ  ภิกฺขเว  เจเตติ  ยญฺจ
ปกปฺเปติ   ยญฺจ   อนุเสติ   อารมฺมณเมตํ   โหติ   วิญฺญาณสฺส   ฐิติยา
อารมฺมเณ    สติ    ปติฏฺฐา    วิญฺญาณสฺส    โหติ   ตสฺมึ   ปติฏฺฐิเต
วิญฺญาเณ   วิรูเฬฺห   นติ   โหติ   นติยา   สติ   อาคติคติ  ๑-  โหติ
อาคติคติยา  สติ  จุตูปปาโต  โหติ  จุตูปปาเต  สติ  อายตึ ชาติชรามรณํ
โสกปริเทวทุกฺขโทมนสฺสุปายาสา         สมฺภวนฺติ         เอวเมตสฺส
เกวลสฺส ทุกฺขกฺขนฺธสฺส สมุทโย โหติ ฯ
     {๑๔๙.๑}   โน  จ  ภิกฺขเว เจเตติ โน จ ปกปฺเปติ อถ จ อนุเสติ
อารมฺมณเมตํ   โหติ   วิญฺญาณสฺส   ฐิติยา   อารมฺมเณ   สติ   ปติฏฺฐา
วิญฺญาณสฺส  โหติ  ตสฺมึ  ปติฏฺฐิเต  วิญฺญาเณ  วิรูเฬฺห  นติ  โหติ  นติยา
สติ  อาคติคติ  โหติ  อาคติคติยา  สติ  จุตูปปาโต  โหติ  จุตูปปาเต สติ
อายตึ     ชาติชรามรณํ    โสกปริเทวทุกฺขโทมนสฺสุปายาสา    สมฺภวนฺติ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๕๐]   ยโต  จ  โข  ภิกฺขเว  โน  จ  เจเตติ โน จ ปกปฺเปติ
โน    จ    อนุเสติ   อารมฺมณเมตํ   น   โหติ   วิญฺญาณสฺส   ฐิติยา
@เชิงอรรถ:  สี. อคติคติ ฯ
อารมฺมเณ    อสติ    ปติฏฺฐา   วิญฺญาณสฺส   น   โหติ   ตทปฺปติฏฺฐิเต
วิญฺญาเณ   อวิรูเฬฺห   นติ  น  โหติ  นติยา  อสติ  อาคติคติ  น  โหติ
อาคติคติยา   อสติ   จุตูปปาโต   น   โหติ   จุตูปปาเต  อสติ  อายตึ
ชาติชรามรณํ         โสกปริเทวทุกฺขโทมนสฺสุปายาสา        นิรุชฺฌนฺติ
เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ ทสมํ ฯ
                  กฬารขตฺติยวคฺโค จตุตฺโถ ฯ
                       ตสฺส อุทฺทานํ
         ภูตมิทํ กฬารญฺจ             เทฺว จ ญาณวตฺถุนิ ๑-
         อวิชฺชาปจฺจยา จ เทฺว      นตุมฺหา เจตนา ตโยติ ฯ
                   ----------------
@เชิงอรรถ:  ม. ญาณวตฺถูนิ ฯ ยุ. ญาณสฺส วตฺถูนิ ฯ
                    คหปติวคฺโค ปญฺจโม
     [๑๕๑]   สาวตฺถิยํ  วิหรติ  ...  อถ  โข  อนาถปิณฺฑิโก  คหปติ
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทิ   ฯ   เอกมนฺตํ   นิสินฺนํ   โข   อนาถปิณฺฑิกํ   คหปตึ
ภควา   เอตทโวจ   ยโต   โข   คหปติ   อริยสาวกสฺส  ปญฺจ  ภยานิ
เวรานิ   วูปสนฺตานิ   โหนฺติ   จตูหิ  จ  โสตาปตฺติยงฺเคหิ  สมนฺนาคโต
โหติ   อริโย   จสฺส   ญาโย  ปญฺญาย  สุทิฏฺโฐ  โหติ  สุปฏิวิทฺโธ  โส
อากงฺขมาโน     อตฺตนาว     อตฺตานํ     พฺยากเรยฺย    ขีณนิรโยมฺหิ
ขีณติรจฺฉานโยนิโย     ๑-     ขีณปิตฺติวิสโย     ขีณาปายทุคฺคติวินิปาโต
โสตาปนฺโนหมสฺมิ อวินิปาตธมฺโม นิยโต สมฺโพธิปรายโนติ ฯ
     [๑๕๒]   กตมานิ  ปญฺจ  ภยานิ  เวรานิ  วูปสนฺตานิ  โหนฺติ  ฯ ยํ
คหปติ   ปาณาติปาตี   ปาณาติปาตปฺปจฺจยา   ทิฏฺฐธมฺมิกมฺปิ   ภยํ   เวรํ
ปสวติ   สมฺปรายิกมฺปิ   ภยํ   เวรํ  ปสวติ  เจตสิกมฺปิ  ทุกฺขํ  โทมนสฺสํ
ปฏิสํเวทยติ   ปาณาติปาตา   ปฏิวิรตสฺส   เอวํ  ตํ  ภยํ  เวรํ  วูปสนฺตํ
โหติ   ฯ   ยํ   คหปติ  อทินฺนาทายี  อทินฺนาทานปฺปจฺจยา  ทิฏฺฐธมฺมิกมฺปิ
ภยํ   เวรํ   ปสวติ  สมฺปรายิกมฺปิ  ภยํ  เวรํ  ปสวติ  เจตสิกมฺปิ  ทุกฺขํ
โทมนสฺสํ   ปฏิสํเวทยติ   อทินฺนาทานา  ปฏิวิรตสฺส  เอวํ  ตํ  ภยํ  เวรํ
วูปสนฺตํ  โหติ  ฯ  ยํ  คหปติ  กาเมสุมิจฺฉาจารี กาเมสุมิจฺฉาจารปฺปจฺจยา
@เชิงอรรถ:  ม. ขีณติรจฺฉานโยนิ ฯ เอวมุปริปิ ฯ
ทิฏฺฐธมฺมิกมฺปิ   ภยํ   เวรํ   ปสวติ   สมฺปรายิกมฺปิ   ภยํ  เวรํ  ปสวติ
เจตสิกมฺปิ     ทุกฺขํ     โทมนสฺสํ    ปฏิสํเวทยติ    กาเมสุมิจฺฉาจารา
ปฏิวิรตสฺส  เอวํ  ตํ  ภยํ  เวรํ  วูปสนฺตํ  โหติ  ฯ  ยํ  คหปติ มุสาวาที
มุสาวาทปฺปจฺจยา       ทิฏฺฐธมฺมิกมฺปิ      ภยํ      เวรํ      ปสวติ
สมฺปรายิกมฺปิ    ภยํ    เวรํ    ปสวติ   เจตสิกมฺปิ   ทุกฺขํ   โทมนสฺสํ
ปฏิสํเวทยติ   มุสาวาทา   ปฏิวิรตสฺส   เอวํ   ตํ   ภยํ  เวรํ  วูปสนฺตํ
โหติ    ฯ    ยํ   คหปติ   สุราเมรยมชฺชปมาทฏฺฐายี   สุราเมรยมชฺช-
ปมาทฏฺฐานปฺปจฺจยา      ทิฏฺฐธมฺมิกมฺปิ      ภยํ     เวรํ     ปสวติ
สมฺปรายิกมฺปิ    ภยํ    เวรํ    ปสวติ   เจตสิกมฺปิ   ทุกฺขํ   โทมนสฺสํ
ปฏิสํเวทยติ      สุราเมรยมชฺชปมาทฏฺฐานา      ปฏิวิรตสฺส      เอวํ
ตํ   ภยํ   เวรํ   วูปสนฺตํ   โหติ   ฯ   อิมานิ  ปญฺจ  ภยานิ  เวรานิ
วูปสนฺตานิ โหนฺติ ฯ
     [๑๕๓]   กตเมหิ  จตูหิ  โสตาปตฺติยงฺเคหิ  สมนฺนาคโต  โหติ  ฯ
อิธ   คหปติ   อริยสาวโก  พุทฺเธ  อเวจฺจปฺปสาเทน  สมนฺนาคโต  โหติ
อิติปิ   โส   ภควา   อรหํ   สมฺมาสมฺพุทฺโธ  วิชฺชาจรณสมฺปนฺโน  สุคโต
โลกวิทู    อนุตฺตโร    ปุริสทมฺมสารถิ   สตฺถา   เทวมนุสฺสานํ   พุทฺโธ
ภควาติ   ธมฺเม   อเวจฺจปฺปสาเทน   สมนฺนาคโต   โหติ   สฺวากฺขาโต
ภควตา   ธมฺโม  สนฺทิฏฺฐิโก  อกาลิโก  เอหิปสฺสิโก  โอปนยิโก  ปจฺจตฺตํ
เวทิตพฺโพ    วิญฺญูหีติ   สงฺเฆ   อเวจฺจปฺปสาเทน   สมนฺนาคโต   โหติ
สุปฏิปนฺโน   ภควโต   สาวกสงฺโฆ   อุชุปฏิปนฺโน   ภควโต  สาวกสงฺโฆ
ญายปฏิปนฺโน     ภควโต     สาวกสงฺโฆ    สามีจิปฏิปนฺโน    ภควโต
สาวกสงฺโฆ   ยทิทํ   จตฺตาริ   ปุริสยุคานิ   อฏฺฐ   ปุริสปุคฺคลา   เอส
ภควโต     สาวกสงฺโฆ     อาหุเนยฺโย    ปาหุเนยฺโย    ทกฺขิเณยฺโย
อญฺชลิกรณีโย     อนุตฺตรํ     ปุญฺญกฺเขตฺตํ    โลกสฺสาติ    อริยกนฺเตหิ
สีเลหิ     สมนฺนาคโต    โหติ    อขณฺเฑหิ    อจฺฉิทฺเทหิ    อสพเลหิ
อกมฺมาเสหิ        ภุชิสฺเสหิ        วิญฺญูปสตฺเถหิ       อปรามฏฺเฐหิ
สมาธิสํวตฺตนิเกหิ      ฯ       อิเมหิ     จตูหิ     โสตาปตฺติยงฺเคหิ
สมนฺนาคโต โหติ ฯ
     [๑๕๔]   กตโม   จสฺส   อริโย  ญาโย  ปญฺญาย  สุทิฏฺโฐ  โหติ
สุปฏิวิทฺโธ    ฯ    อิธ    คหปติ    อริยสาวโก   ปฏิจฺจสมุปฺปาทญฺเญว
สาธุกํ   โยนิโส  มนสิกโรติ  อิติ  อิมสฺมึ  สติ  อิทํ  โหติ  อิมสฺสุปฺปาทา
อิทํ   อุปฺปชฺชติ   อิมสฺมึ   อสติ   อิทํ   น  โหติ  อิมสฺส  นิโรธา  อิทํ
นิรุชฺฌติ      ยทิทํ     อวิชฺชาปจฺจยา     สงฺขารา     สงฺขารปจฺจยา
วิญฺญาณํ    ฯเปฯ    เอวเมตสฺส    เกวลสฺส   ทุกฺขกฺขนฺธสฺส   สมุทโย
โหติ  อวิชฺชาย  เตฺวว  อเสสวิราคนิโรธา  สงฺขารนิโรโธ สงฺขารนิโรธา
วิญฺญาณนิโรโธ     ฯเปฯ     เอวเมตสฺส    เกวลสฺส    ทุกฺขกฺขนฺธสฺส
นิโรโธ   โหติ   ฯ   อยมสฺส   อริโย  ญาโย  ปญฺญาย  สุทิฏฺโฐ  โหติ
สุปฏิวิทฺโธ ฯ
     [๑๕๕]   ยโต   โข  คหปติ  อริยสาวกสฺส  อิมานิ  ปญฺจ  ภยานิ
เวรานิ   วูปสนฺตานิ   โหนฺติ   อิเมหิ  จ  ๑-  จตูหิ  โสตาปตฺติยงฺเคหิ
สมนฺนาคโต    โหติ    อยญฺจสฺส   อริโย   ญาโย   ปญฺญาย   สุทิฏฺโฐ
โหติ   สุปฏิวิทฺโธ   โส   อากงฺขมาโน  อตฺตนาว  อตฺตานํ  พฺยากเรยฺย
@เชิงอรรถ:  ม. ยุ. จสทฺโท นตฺถิ ฯ
ขีณนิรโยมฺหิ   ขีณติรจฺฉานโยนิโย   ขีณปิตฺติวิสโย   ขีณาปายทุคฺคติวินิปาโต
โสตาปนฺโนหมสฺมิ    อวินิปาตธมฺโม    นิยโต    สมฺโพธิปรายโนติ    ฯ
ปฐมํ ฯ
     [๑๕๖]   สาวตฺถิยํ  วิหรติ  ...  ยโต  โข  ภิกฺขเว อริยสาวกสฺส
ปญฺจ   ภยานิ   เวรานิ  วูปสนฺตานิ  โหนฺติ  จตูหิ  จ  โสตาปตฺติยงฺเคหิ
สมนฺนาคโต    โหติ    อริโย    จสฺส    ญาโย    ปญฺญาย   สุทิฏฺโฐ
โหติ   สุปฏิวิทฺโธ   โส   อากงฺขมาโน  อตฺตนาว  อตฺตานํ  พฺยากเรยฺย
ขีณนิรโยมฺหิ ฯเปฯ อวินิปาตธมฺโม นิยโต สมฺโพธิปรายโนติ ฯ
               [ภิกฺขเวติ สพฺพํ วิตฺถาเรตพฺพํ] ๑-
     [๑๕๗]   กตมานิ   ปญฺจ  ภยานิ  เวรานิ  วูปสนฺตานิ  โหนฺติ  ฯ
ยํ   ภิกฺขเว   ปาณาติปาตี   ฯเปฯ   ยํ   ภิกฺขเว  อทินฺนาทายี  ฯเปฯ
ยํ   ภิกฺขเว   กาเมสุมิจฺฉาจารี   ฯเปฯ  ยํ  ภิกฺขเว  มุสาวาที  ฯเปฯ
ยํ   ภิกฺขเว   สุราเมรยมชฺชปมาทฏฺฐายี   ฯเปฯ   อิมานิ  ปญฺจ  ภยานิ
เวรานิ วูปสนฺตานิ โหนฺติ ฯ
     [๑๕๘]   กตเมหิ  จตูหิ  โสตาปตฺติยงฺเคหิ  สมนฺนาคโต  โหติ  ฯ
อิธ   ภิกฺขเว   อริยสาวโก   พุทฺเธ   ฯเปฯ   ธมฺเม   ฯเปฯ  สงฺเฆ
ฯเปฯ    อริยกนฺเตหิ    สีเลหิ   สมนฺนาคโต   โหติ   ฯเปฯ   อิเมหิ
จตูหิ โสตาปตฺติยงฺเคหิ สมนฺนาคโต โหติ ฯ
     [๑๕๙]   กตโม   จสฺส   อริโย  ญาโย  ปญฺญาย  สุทิฏฺโฐ  โหติ
@เชิงอรรถ:  สีหลโปฏฺฐเก ภิกฺขเวติ สพฺพํ วิตฺถาเรตพฺพนฺติ เอวํ ทิสฺสติ ฯ
สุปฏิวิทฺโธ    ฯ    อิธ    ภิกฺขเว   อริยสาวโก   ปฏิจฺจสมุปฺปาทญฺเญว
สาธุกํ   โยนิโส   มนสิกโรติ   ฯเปฯ  อยมสฺส  อริโย  ญาโย  ปญฺญาย
สุทิฏฺโฐ โหติ สุปฏิวิทฺโธ ฯ
     [๑๖๐]   ยโต  โข  ภิกฺขเว  อริยสาวกสฺส  อิมานิ  ปญฺจ  ภยานิ
เวรานิ    วูปสนฺตานิ   โหนฺติ   อิเมหิ   จ   จตูหิ   โสตาปตฺติยงฺเคหิ
สมนฺนาคโต    โหติ    อยญฺจสฺส   อริโย   ญาโย   ปญฺญาย   สุทิฏฺโฐ
โหติ  สุปฏิวิทฺโธ  ฯ  โส  อากงฺขมาโน  อตฺตนาว  อตฺตานํ  พฺยากเรยฺย
ขีณนิรโยมฺหิ   ขีณติรจฺฉานโยนิโย   ขีณปิตฺติวิสโย   ขีณาปายทุคฺคติวินิปาโต
โสตาปนฺโนหมสฺมิ    อวินิปาตธมฺโม    นิยโต    สมฺโพธิปรายโนติ    ฯ
ทุติยํ ฯ
     [๑๖๑]   สาวตฺถิยํ   วิหรติ   ...   ทุกฺขสฺส  ภิกฺขเว  สมุทยญฺจ
อตฺถงฺคมญฺจ  เทเสสฺสามิ  ตํ  สุณาถ  สาธุกํ  มนสิกโรถ  ภาสิสฺสามีติ  ฯ
เอวํ ภนฺเตติ โข เต ภิกฺขู ภควโต ปจฺจสฺโสสุํ ฯ
     [๑๖๒]   ภควา  เอตทโวจ  กตโม  จ  ภิกฺขเว  ทุกฺขสฺส  สมุทโย
จกฺขุญฺจ   ปฏิจฺจ   รูเป   จ   อุปฺปชฺชติ   จกฺขุวิญฺญาณํ   ติณฺณํ   สงฺคติ
ผสฺโส    ผสฺสปจฺจยา    เวทนา   เวทนาปจฺจยา   ตณฺหา   อยํ   โข
ภิกฺขเว  ทุกฺขสฺส  สมุทโย  ฯ  โสตญฺจ  ปฏิจฺจ  สทฺเท  จ  ... ฆานญฺจ
ปฏิจฺจ  คนฺเธ  จ  ...  ชิวฺหญฺจ  ปฏิจฺจ  รเส  จ  ... กายญฺจ ปฏิจฺจ
โผฏฺฐพฺเพ   จ  ...  มนญฺจ  ปฏิจฺจ  ธมฺเม  จ  อุปฺปชฺชติ  มโนวิญฺญาณํ
ติณฺณํ   สงฺคติ   ผสฺโส   ผสฺสปจฺจยา   เวทนา   เวทนาปจฺจยา  ตณฺหา
อยํ โข ภิกฺขเว ทุกฺขสฺส สมุทโย ฯ
     [๑๖๓]   กตโม   จ   ภิกฺขเว  ทุกฺขสฺส  อตฺถงฺคโม  ฯ  จกฺขุญฺจ
ปฏิจฺจ    รูเป   จ   อุปฺปชฺชติ   จกฺขุวิญฺญาณํ   ติณฺณํ   สงฺคติ   ผสฺโส
ผสฺสปจฺจยา    เวทนา   เวทนาปจฺจยา   ตณฺหา   ตสฺสาเยว   ตณฺหาย
อเสสวิราคนิโรธา     อุปาทานนิโรโธ    อุปาทานนิโรธา    ภวนิโรโธ
ภวนิโรธา    ชาตินิโรโธ    ชาตินิโรธา   ชรามรณํ   โสกปริเทวทุกฺข-
โทมนสฺสุปายาสา    นิรุชฺฌนฺติ   เอวเมตสฺส   เกวลสฺส   ทุกฺขกฺขนฺธสฺส
นิโรโธ โหติ อยํ โข ภิกฺขเว ทุกฺขสฺส อตฺถงฺคโม ฯ
     {๑๖๓.๑}   โสตญฺจ  ปฏิจฺจ  สทฺเท จ ... ฆานญฺจ ปฏิจฺจ คนฺเธ จ
...  ชิวฺหญฺจ ปฏิจฺจ รเส จ ... กายญฺจ ปฏิจฺจ โผฏฺฐพฺเพ จ ... มนญฺจ
ปฏิจฺจ   ธมฺเม   จ   อุปฺปชฺชติ   มโนวิญฺญาณํ   ติณฺณํ   สงฺคติ   ผสฺโส
ผสฺสปจฺจยา    เวทนา   เวทนาปจฺจยา   ตณฺหา   ตสฺสาเยว   ตณฺหาย
อเสสวิราคนิโรธา  อุปาทานนิโรโธ  อุปาทานนิโรธา ภวนิโรโธ ภวนิโรธา
ชาตินิโรโธ    ชาตินิโรธา   ชรามรณํ   โสกปริเทวทุกฺขโทมนสฺสุปายาสา
นิรุชฺฌนฺติ  เอวเมตสฺส  เกวลสฺส  ทุกฺขกฺขนฺธสฺส  นิโรโธ  โหติ  อยํ  โข
ภิกฺขเว ทุกฺขสฺส อตฺถงฺคโมติ ฯ ตติยํ ฯ
     [๑๖๔]   สาวตฺถิยํ   วิหรติ   ...   โลกสฺส  ภิกฺขเว  สมุทยญฺจ
อตฺถงฺคมญฺจ  เทเสสฺสามิ  ตํ  สุณาถ  ...  กตโม  จ  ภิกฺขเว  โลกสฺส
สมุทโย    ฯ   จกฺขุญฺจ   ปฏิจฺจ   รูเป   จ   อุปฺปชฺชติ   จกฺขุวิญฺญาณํ
ติณฺณํ   สงฺคติ   ผสฺโส   ผสฺสปจฺจยา   เวทนา   เวทนาปจฺจยา  ตณฺหา
ตณฺหาปจฺจยา    อุปาทานํ   อุปาทานปจฺจยา   ภโว   ภวปจฺจยา   ชาติ
ชาติปจฺจยา    ชรามรณํ    โสกปริเทวทุกฺขโทมนสฺสุปายาสา    สมฺภวนฺติ
อยํ โข ภิกฺขเว โลกสฺส สมุทโย ฯ
     {๑๖๔.๑}   โสตญฺจ  ปฏิจฺจ  สทฺเท  จ  ... ฆานญฺจ ปฏิจฺจ คนฺเธ
จ ... ชิวฺหญฺจ ปฏิจฺจ รเส จ ... กายญฺจ ปฏิจฺจ โผฏฺฐพฺเพ จ ... มนญฺจ
ปฏิจฺจ   ธมฺเม   จ   อุปฺปชฺชติ   มโนวิญฺญาณํ   ติณฺณํ   สงฺคติ   ผสฺโส
ผสฺสปจฺจยา   เวทนา   ฯเปฯ  ชาติปจฺจยา  ชรามรณํ  โสกปริเทวทุกฺข-
โทมนสฺสุปายาสา สมฺภวนฺติ อยํ โข ภิกฺขเว โลกสฺส สมุทโย ฯ
     [๑๖๕]   กตโม   จ   ภิกฺขเว  โลกสฺส  อตฺถงฺคโม  ฯ  จกฺขุญฺจ
ปฏิจฺจ    รูเป   จ   อุปฺปชฺชติ   จกฺขุวิญฺญาณํ   ติณฺณํ   สงฺคติ   ผสฺโส
ผสฺสปจฺจยา    เวทนา   เวทนาปจฺจยา   ตณฺหา   ตสฺสาเยว   ตณฺหาย
อเสสวิราคนิโรธา   อุปาทานนิโรโธ  อุปาทานนิโรธา  ภวนิโรโธ  ฯเปฯ
เอวเมตสฺส    เกวลสฺส    ทุกฺขกฺขนฺธสฺส   นิโรโธ   โหติ   อยํ   โข
ภิกฺขเว โลกสฺส อตฺถงฺคโม ฯ
     {๑๖๕.๑}   โสตญฺจ  ปฏิจฺจ  สทฺเท จ ... ฆานญฺจ ปฏิจฺจ คนฺเธ จ
...  ชิวฺหญฺจ ปฏิจฺจ รเส จ ... กายญฺจ ปฏิจฺจ โผฏฺฐพฺเพ จ ... มนญฺจ
ปฏิจฺจ  ธมฺเม  จ  อุปฺปชฺชติ  มโนวิญฺญาณํ  ติณฺณํ สงฺคติ ผสฺโส ผสฺสปจฺจยา
เวทนา  เวทนาปจฺจยา  ตณฺหา  ตสฺสาเยว  ตณฺหาย   อเสสวิราคนิโรธา
อุปาทานนิโรโธ    อุปาทานนิโรธา    ภวนิโรโธ   ฯเปฯ   เอวเมตสฺส
เกวลสฺส   ทุกฺขกฺขนฺธสฺส   นิโรโธ   โหติ   อยํ  โข  ภิกฺขเว  โลกสฺส
อตฺถงฺคโมติ ฯ จตุตฺถํ ฯ
     [๑๖๖]   เอวมฺเม สุตํ เอกํ สมยํ ภควา ญาติเก วิหรติ คิญฺชกาวสเถ ฯ
อถ  โข  ภควา  รโหคโต  ปฏิสลฺลีโน ๑- อิมํ ธมฺมปริยายํ อภาสิ จกฺขุญฺจ
ปฏิจฺจ  รูเป  จ  อุปฺปชฺชติ  จกฺขุวิญฺญาณํ  ติณฺณํ  สงฺคติ ผสฺโส ผสฺสปจฺจยา
เวทนา  เวทนาปจฺจยา  ตณฺหา  ตณฺหาปจฺจยา อุปาทานํ ฯเปฯ เอวเมตสฺส
เกวลสฺส  ทุกฺขกฺขนฺธสฺส  สมุทโย  โหติ  ฯ  โสตญฺจ ปฏิจฺจ สทฺเท จ ...
ฆานญฺจ  ปฏิจฺจ  คนฺเธ จ ... ชิวฺหญฺจ ปฏิจฺจ รเส จ ... กายญฺจ ปฏิจฺจ
โผฏฺฐพฺเพ  จ  ...  มนญฺจ  ปฏิจฺจ  ธมฺเม จ อุปฺปชฺชติ มโนวิญฺญาณํ ติณฺณํ
สงฺคติ  ผสฺโส  ผสฺสปจฺจยา  เวทนา  เวทนาปจฺจยา  ตณฺหา ตณฺหาปจฺจยา
อุปาทานํ ฯเปฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๖๗]   จกฺขุญฺจ  ปฏิจฺจ  รูเป  จ  อุปฺปชฺชติ  จกฺขุวิญฺญาณํ  ติณฺณํ
สงฺคติ   ผสฺโส  ผสฺสปจฺจยา  เวทนา  เวทนาปจฺจยา  ตณฺหา  ตสฺสาเยว
ตณฺหาย     อเสสวิราคนิโรธา     อุปาทานนิโรโธ     อุปาทานนิโรธา
ภวนิโรโธ  ฯเปฯ  เอวเมตสฺส  เกวลสฺส  ทุกฺขกฺขนฺธสฺส  นิโรโธ โหติ ฯ
โสตญฺจ  ปฏิจฺจ  สทฺเท  จ  ฯเปฯ  มนญฺจ  ปฏิจฺจ  ธมฺเม  จ  อุปฺปชฺชติ
มโนวิญฺญาณํ   ติณฺณํ  สงฺคติ  ผสฺโส  ผสฺสปจฺจยา  เวทนา  เวทนาปจฺจยา
ตณฺหา ตสฺสาเยว ตณฺหาย
@เชิงอรรถ:  ม. ปฏิสลฺลาโน ฯ
อเสสวิราคนิโรธา   อุปาทานนิโรโธ  อุปาทานนิโรธา  ภวนิโรโธ  ฯเปฯ
เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ
     [๑๖๘]   เตน  โข  ปน สมเยน อญฺญตโร ภิกฺขุ ภควโต อุปสฺสุติ ๑-
ฐิโต  โหติ  ฯ  อทฺทสา  โข  ภควา  ตํ  ภิกฺขุํ  อุปสฺสุติ ๑- ฐิตํ ทิสฺวาน
ตํ   ภิกฺขุํ  เอตทโวจ  อสฺโสสิ  โน  ตฺวํ  ภิกฺขุ  อิมํ  ธมฺมปริยายนฺติ  ฯ
เอวํ  ภนฺเตติ  ฯ  อุคฺคณฺหาหิ  ตฺวํ  ภิกฺขุ  อิมํ  ธมฺมปริยายํ  ปริยาปุณาหิ
ตฺวํ   ภิกฺขุ   อิมํ   ธมฺมปริยายํ   ธาเรหิ  ตฺวํ  ภิกฺขุ  อิมํ  ธมฺมปริยายํ
อตฺถสญฺหิโตยํ ภิกฺขุ ธมฺมปริยาโย อาทิพฺรหฺมจริยโกติ ฯ ปญฺจมํ ฯ
     [๑๖๙]   สาวตฺถิยํ  วิหรติ  ...  อถ  โข  อญฺญตโร  พฺราหฺมโณ
เยน   ภควา   เตนุปสงฺกมิ   อุปสงฺกมิตฺวา   ภควตา   สทฺธึ   สมฺโมทิ
สมฺโมทนียํ กถํ สาราณียํ วีติสาเรตฺวา เอกมนฺตํ นิสีทิ ฯ
     [๑๗๐]   เอกมนฺตํ   นิสินฺโน   โข   โส   พฺราหฺมโณ   ภควนฺตํ
เอตทโวจ  กึ  นุ  โข  โภ  โคตม  โส  กโรติ  โส  ปฏิสํเวทยตีติ  ฯ
โส   กโรติ   โส   ปฏิสํเวทยตีติ  โข  พฺราหฺมณ  อยเมโก  อนฺโต  ฯ
กึ   ปน   โภ   โคตม   อญฺโญ   กโรติ   อญฺโญ   ปฏิสํเวทยตีติ   ฯ
อญฺโญ   กโรติ   อญฺโญ   ปฏิสํเวทยตีติ   โข   พฺราหฺมณ   อยํ  ทุติโย
อนฺโต   เอเต   เต   พฺราหฺมณ   อุโภ   อนฺเต   อนุปคมฺม   มชฺเฌน
ตถาคโต   ธมฺมํ   เทเสติ   อวิชฺชาปจฺจยา   สงฺขารา   สงฺขารปจฺจยา
วิญฺญาณํ    ฯเปฯ    เอวเมตสฺส    เกวลสฺส   ทุกฺขกฺขนฺธสฺส   สมุทโย
โหติ  ฯ  อวิชฺชายเตฺวว  อเสสวิราคนิโรธา สงฺขารนิโรโธ สงฺขารนิโรธา
@เชิงอรรถ:  ยุ. อุปสฺสุตึ ฯ
วิญฺญาณนิโรโธ     ฯเปฯ     เอวเมตสฺส    เกวลสฺส    ทุกฺขกฺขนฺธสฺส
นิโรโธ โหตีติ ฯ
     [๑๗๑]   เอวํ   วุตฺเต   โส   พฺราหฺมโณ   ภควนฺตํ  เอตทโวจ
อภิกฺกนฺตํ   โภ   โคตม   อภิกฺกนฺตํ   โภ   โคตม  ฯเปฯ  อุปาสกํ  มํ
ภวํ โคตโม ธาเรตุ อชฺชตคฺเค ปาณุเปตํ สรณงฺคตนฺติ ฯ ฉฏฺฐํ ฯ
     [๑๗๒]   สาวตฺถิยํ  วิหรติ  ...  อถ  โข  ชาณุสฺโสณิ  พฺราหฺมโณ
เยน ภควา เตนุปสงฺกมิ อุปสงฺกมิตฺวา ภควตา สทฺธึ ฯเปฯ
     [๑๗๓]   เอกมนฺตํ  นิสินฺโน  โข  ชาณุสฺโสณิ  พฺราหฺมโณ  ภควนฺตํ
เอตทโวจ   กึ   นุ   โข  โภ  โคตม  สพฺพมตฺถีติ  ฯ  สพฺพมตฺถีติ  โข
พฺราหฺมณ   อยเมโก  อนฺโต  ฯ  กึ  ปน  โภ  โคตม  สพฺพํ  นตฺถีติ  ฯ
สพฺพํ   นตฺถีติ   โข   พฺราหฺมณ   อยํ   ทุติโย   อนฺโต   เอเต   เต
พฺราหฺมณ   อุโภ   อนฺเต   อนุปคมฺม  มชฺเฌน  ตถาคโต  ธมฺมํ  เทเสติ
อวิชฺชาปจฺจยา     สงฺขารา     สงฺขารปจฺจยา     วิญฺญาณํ     ฯเปฯ
เอวเมตสฺส   เกวลสฺส  ทุกฺขกฺขนฺธสฺส  สมุทโย  โหติ  ฯ  อวิชฺชายเตฺวว
อเสสวิราคนิโรธา    สงฺขารนิโรโธ    สงฺขารนิโรธา    วิญฺญาณนิโรโธ
ฯเปฯ เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ
     [๑๗๔]   เอวํ  วุตฺเต  ชาณุสฺโสณิ  พฺราหฺมโณ  ภควนฺตํ  เอตทโวจ
อภิกฺกนฺตํ   โภ   โคตม   อภิกฺกนฺตํ   โภ   โคตม   ฯเปฯ   ปาณุเปตํ
สรณงฺคตนฺติ ฯ สตฺตมํ ฯ
     [๑๗๕]   สาวตฺถิยํ  วิหรติ  ...  อถ  โข  โลกายติโก พฺราหฺมโณ
เยน ภควา เตนุปสงฺกมิ ฯเปฯ
     [๑๗๖]   เอกมนฺตํ  นิสินฺโน  โข  โลกายติโก  พฺราหฺมโณ  ภควนฺตํ
เอตทโวจ   กึ   นุ   โข  โภ  โคตม  สพฺพมตฺถีติ  ฯ  สพฺพมตฺถีติ  โข
พฺราหฺมณ  เชฏฺฐเมตํ  โลกายตํ  ฯ  กึ  ปน  โภ  โคตม  สพฺพํ นตฺถีติ ฯ
สพฺพํ   นตฺถีติ  โข  พฺราหฺมณ  ทุติยเมตํ  โลกายตํ  ฯ  กึ  นุ  โข  โภ
โคตม   สพฺพเมกตฺตนฺติ   ฯ   สพฺพเมกตฺตนฺติ   โข  พฺราหฺมณ  ตติยเมตํ
โลกายตํ  ฯ  กึ  ปน  โภ  โคตม  สพฺพํ  ปุถุตฺตนฺติ  ฯ  สพฺพํ  ปุถุตฺตนฺติ
โข   พฺราหฺมณ   จตุตฺถเมตํ   โลกายตํ   เอเต   เต  พฺราหฺมณ  อุโภ
อนฺเต   อนุปคมฺม   มชฺเฌน   ตถาคโต   ธมฺมํ  เทเสติ  อวิชฺชาปจฺจยา
สงฺขารา    สงฺขารปจฺจยา   วิญฺญาณํ   ฯเปฯ   เอวเมตสฺส   เกวลสฺส
ทุกฺขกฺขนฺธสฺส   สมุทโย   โหติ  ฯ  อวิชฺชาย  เตฺวว  อเสสวิราคนิโรธา
สงฺขารนิโรโธ    สงฺขารนิโรธา   วิญฺญาณนิโรโธ   ฯเปฯ   เอวเมตสฺส
เกวลสฺส ทุกฺขกฺขนฺธสฺส นิโรโธ โหตีติ ฯ
     [๑๗๗]   เอวํ  วุตฺเต  โลกายติโก  พฺราหฺมโณ  ภควนฺตํ เอตทโวจ
อภิกฺกนฺตํ   โภ   โคตม   อภิกฺกนฺตํ   โภ   โคตม   ฯเปฯ  อชฺชตคฺเค
ปาณุเปตํ สรณงฺคตนฺติ ฯ อฏฺฐมํ ฯ
     [๑๗๘]   สาวตฺถิยํ  วิหรติ  ...  ตตฺร โข ... น ภิกฺขเว สุตวโต
อริยสาวกสฺส   เอวํ   โหติ   กึ   นุ   โข   กิสฺมึ   สติ   กึ   โหติ
กิสฺสุปฺปาทา   กึ   อุปฺปชฺชติ   [๑]-   กิสฺมึ  สติ  นามรูปํ  โหติ  กิสฺมึ
สติ    สฬายตนํ    โหติ    กิสฺมึ   สติ   ผสฺโส   โหติ   กิสฺมึ   สติ
@เชิงอรรถ:  ม. ยุ. กิสฺมึ สติ สงฺขารา โหนฺติ กิสฺมึ สติ วิญฺญาณํ โหติ ฯ
เวทนา   โหติ   กิสฺมึ   สติ   ตณฺหา   โหติ   กิสฺมึ   สติ   อุปาทานํ
โหติ   กิสฺมึ   สติ   ภโว   โหติ   กิสฺมึ   สติ   ชาติ   โหติ   กิสฺมึ
สติ ชรามรณํ โหตีติ ฯ
     [๑๗๙]   อถ  โข  ภิกฺขเว  สุตวโต  อริยสาวกสฺส  อปรปฺปจฺจยา
ญาณเมเวตฺถ   โหติ   อิมสฺมึ   สติ   อิทํ   โหติ   อิมสฺสุปฺปาทา   อิทํ
อุปฺปชฺชติ  [๑]-  วิญฺญาเณ  สติ  นามรูปํ  โหติ  นามรูเป  สติ สฬายตนํ
โหติ   สฬายตเน   สติ   ผสฺโส   โหติ   ผสฺเส   สติ  เวทนา  โหติ
เวทนาย    สติ    ตณฺหา    โหติ   ตณฺหาย   สติ   อุปาทานํ   โหติ
อุปาทาเน  สติ  ภโว  โหติ  ฯเปฯ  ชาติยา  สติ  ชรามรณํ  โหตีติ  ฯ
โส เอวํ ปชานาติ เอวมยํ โลโก สมุทยตีติ ฯ
     [๑๘๐]   น   ภิกฺขเว   สุตวโต   อริยสาวกสฺส  เอวํ  โหติ  กึ
นุ   โข   กิสฺมึ   อสติ   กึ   น   โหติ   กิสฺส  นิโรธา  กึ  นิรุชฺฌติ
กิสฺมึ   อสติ   นามรูปํ   น   โหติ   กิสฺมึ   อสติ  สฬายตนํ  น  โหติ
กิสฺมึ   อสติ   ผสฺโส   น   โหติ   กิสฺมึ   อสติ   เวทนา   น  โหติ
กิสฺมึ   อสติ   ตณฺหา   น   โหติ   กิสฺมึ   อสติ   อุปาทานํ  น  โหติ
กิสฺมึ   อสติ   ภโว   น   โหติ   กิสฺมึ   อสติ  ชาติ  น  โหติ  กิสฺมึ
อสติ ชรามรณํ น โหตีติ ฯ
     [๑๘๑]   อถ  โข  ภิกฺขเว  สุตวโต  อริยสาวกสฺส  อปรปฺปจฺจยา
ญาณเมเวตฺถ   โหติ   อิมสฺมึ   อสติ   อิทํ   น  โหติ  อิมสฺส  นิโรธา
อิทํ   นิรุชฺฌติ   วิญฺญาเณ   อสติ   นามรูปํ   น  โหติ  นามรูเป  อสติ
@เชิงอรรถ:  ม. ยุ. อวิชฺชาย สติ ฯเปฯ วิณฺญาณํ โหติ ฯ เอวมีทิเสสุ ฐาเนสุ ฯ
สฬายตนํ  น  โหติ  ฯเปฯ  อุปาทานํ  น  โหติ  ... ภโว น โหติ ...
ชาติ   น   โหติ   ชาติยา  อสติ  ชรามรณํ  น  โหตีติ  ฯ  โส  เอวํ
ปชานาติ เอวมยํ โลโก นิรุชฺฌตีติ ฯ
     [๑๘๒]   ยโต  โข  ภิกฺขเว  อริยสาวโก  เอวํ  โลกสฺส สมุทยญฺจ
อตฺถงฺคมญฺจ   ยถาภูตํ   ปชานาติ  ฯ  อยํ  วุจฺจติ  ภิกฺขเว  อริยสาวโก
ทิฏฺฐิสมฺปนฺโน     อิติปิ     ฯเปฯ     อมตทฺวารํ    อาหจฺจ    ติฏฺฐติ
อิติปีติ ฯ นวมํ ฯ
     [๑๘๓]   สาวตฺถิยํ  วิหรติ  ...  ตตฺร โข ... น ภิกฺขเว สุตวโต
อริยสาวกสฺส   เอวํ   โหติ   กึ   นุ   โข   กิสฺมึ   สติ   กึ   โหติ
กิสฺสุปฺปาทา    กึ   อุปฺปชฺชติ   กิสฺมึ   สติ   สงฺขารา   โหนฺติ   กิสฺมึ
สติ    วิญฺญาณํ    โหติ    กิสฺมึ   สติ   นามรูปํ   โหติ   กิสฺมึ   สติ
สฬายตนํ   โหติ   กิสฺมึ   สติ   ผสฺโส   โหติ   กิสฺมึ   สติ   เวทนา
โหติ    กิสฺมึ    สติ   ตณฺหา   โหติ   กิสฺมึ   สติ   อุปาทานํ   โหติ
กิสฺมึ    สติ   ภโว   โหติ   กิสฺมึ   สติ   ชาติ   โหติ   กิสฺมึ   สติ
ชรามรณํ โหตีติ ฯ
     [๑๘๔]   อถ  โข  ภิกฺขเว  สุตวโต  อริยสาวกสฺส  อปรปฺปจฺจยา
ญาณเมเวตฺถ    โหติ    อิมสฺมึ    สติ    อิทํ    โหติ   อิมสฺสุปฺปาทา
อิทํ   อุปฺปชฺชติ   อวิชฺชาย   สติ   สงฺขารา   โหนฺติ   สงฺขาเรสุ  สติ
วิญฺญาณํ    โหติ    วิญฺญาเณ   สติ   นามรูปํ   โหติ   นามรูเป   สติ
สฬายตนํ   โหติ   สฬายตเน   สติ  ผสฺโส  โหติ  ผสฺเส  สติ  เวทนา
โหติ   เวทนาย   สติ   ตณฺหา   โหติ   ตณฺหาย  สติ  อุปาทานํ  โหติ
อุปาทาเน   สติ   ภโว   โหติ   ภเว  สติ  ชาติ  โหติ  ชาติยา  สติ
ชรามรณํ โหตีติ ฯ โส เอวํ ปชานาติ เอวมยํ โลโก สมุทยตีติ ฯ
     [๑๘๕]   น   ภิกฺขเว   สุตวโต   อริยสาวกสฺส  เอวํ  โหติ  กึ
นุ   โข   กิสฺมึ   อสติ   กึ   น   โหติ   กิสฺส  นิโรธา  กึ  นิรุชฺฌติ
กิสฺมึ   อสติ   สงฺขารา   น   โหนฺติ   กิสฺมึ  อสติ  วิญฺญาณํ  น  โหติ
กิสฺมึ   อสติ   นามรูปํ   น   โหติ   กิสฺมึ   อสติ  สฬายตนํ  น  โหติ
กิสฺมึ   อสติ   ผสฺโส   น   โหติ   กิสฺมึ   อสติ   เวทนา   น  โหติ
กิสฺมึ   อสติ   ตณฺหา   น   โหติ  ฯเปฯ  อุปาทานํ  ...  ภโว  ...
ชาติ ... กิสฺมึ อสติ ชรามรณํ น โหตีติ ฯ
     [๑๘๖]   อถ  โข  ภิกฺขเว  สุตวโต  อริยสาวกสฺส  อปรปฺปจฺจยา
ญาณเมเวตฺถ   โหติ   อิมสฺมึ   อสติ   อิทํ   น  โหติ  อิมสฺส  นิโรธา
อิทํ   นิรุชฺฌติ   อวิชฺชาย   อสติ   สงฺขารา   น   โหนฺติ   สงฺขาเรสุ
อสติ    วิญฺญาณํ   น   โหติ   วิญฺญาเณ   อสติ   นามรูปํ   น   โหติ
นามรูเป   อสติ   สฬายตนํ  น  โหติ  ฯเปฯ  ชาติยา  อสติ  ชรามรณํ
น โหตีติ ฯ โส เอวํ ปชานาติ เอวมยํ โลโก นิรุชฺฌตีติ ฯ
     [๑๘๗]   ยโต  โข  ภิกฺขเว  อริยสาวโก  เอวํ  โลกสฺส สมุทยญฺจ
อตฺถงฺคมญฺจ   ยถาภูตํ   ปชานาติ  ฯ  อยํ  วุจฺจติ  ภิกฺขเว  อริยสาวโก
ทิฏฺฐิสมฺปนฺโน   อิติปิ   ทสฺสนสมฺปนฺโน   อิติปิ   อาคโต   อิมํ   สทฺธมฺมํ
อิติปิ   ปสฺสติ   อิมํ   สทฺธมฺมํ   อิติปิ   เสกฺเขน  ญาเณน  สมนฺนาคโต
อิติปิ   เสกฺขาย   วิชฺชาย   สมนฺนาคโต   อิติปิ   ธมฺมโสตํ  สมาปนฺโน
อิติปิ    อริโย   นิพฺเพธิกปญฺโญ   อิติปิ   อมตทฺวารํ   อาหจฺจ   ติฏฺฐติ
อิติปีติ ฯ ทสมํ ฯ
                     คหปติวคฺโค ปญฺจโม ฯ
                        ตสฺส อุทฺทานํ
         เทฺว ปญฺจเวรภยา วุตฺตา     ทุกฺขํ โลโก จ ญาติกํ
         อญฺญตรํ ชาณุสฺโสณิ จ      โลกายติเกน อฏฺฐมํ
         เทฺว อริยสาวกา วุตฺตา        วคฺโค เตน ปวุจฺจตีติ ฯ
                       ----------
                     ทุกฺขวคฺโค ฉฏฺโฐ
     [๑๘๘]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา   เอตทโวจ   กิตฺตาวตา   นุ  โข  ภิกฺขเว  ภิกฺขุ  ปริวีมํสมาโน
ปริวีมํเสยฺย   สพฺพโส   สมฺมา   ทุกฺขกฺขยายาติ   ฯ   ภควํมูลกา   โน
ภนฺเต    ธมฺมา    ภควํเนตฺติกา   ภควํปฏิสรณา   สาธุ   วต   ภนฺเต
ภควนฺตํเยว   ปฏิภาตุ   เอตสฺส   ภาสิตสฺส   อตฺโถ   ภควโต   สุตฺวา
ภิกฺขู  ธาเรสฺสนฺตีติ  ฯ  เตนหิ  ภิกฺขเว  [๑]-  สุณาถ สาธุกํ มนสิกโรถ
ภาสิสฺสามีติ ฯ เอวํ ภนฺเตติ โข เต ภิกฺขู ภควโต ปจฺจสฺโสสุํ ฯ
     [๑๘๙]   ภควา   เอตทโวจ   อิธ  ภิกฺขเว  ภิกฺขุ  ปริวีมํสมาโน
ปริวีมํสติ  ยํ  โข  อิทํ  อเนกวิธํ  นานปฺปการกํ  ทุกฺขํ  โลเก  อุปฺปชฺชติ
ชรามรณํ   อิทํ   นุ   โข   ทุกฺขํ   กึนิทานํ   กึสมุทยํ  กึชาติกํ  กึปภวํ
กิสฺมึ   สติ   ชรามรณํ   โหติ   กิสฺมึ   อสติ  ชรามรณํ  น  โหตีติ  ฯ
โส  ปริวีมํสมาโน  เอวํ  ปชานาติ  ยํ  โข  อิทํ  อเนกวิธํ นานปฺปการกํ
ทุกฺขํ    โลเก   อุปฺปชฺชติ   ชรามรณํ   อิทํ   โข   ทุกฺขํ   ชาตินิทานํ
ชาติสมุทยํ     ชาติชาติกํ    ชาติปฺปภวํ    ชาติยา    สติ    ชรามรณํ
โหติ   ชาติยา   อสติ   ชรามรณํ   น   โหตีติ   ฯ  โส  ชรามรณญฺจ
ปชานาติ       ชรามรณสมุทยญฺจ      ปชานาติ      ชรามรณนิโรธญฺจ
@เชิงอรรถ:  ยุ. ตํ ฯ
ปชานาติ    ยา    จ    ชรามรณนิโรธสารุปฺปคามินี    ปฏิปทา   ตญฺจ
ปชานาติ   ตถา   ปฏิปนฺโน   จ   โหติ   อนุธมฺมจารี  ฯ  อยํ  วุจฺจติ
ภิกฺขเว     ภิกฺขุ     สพฺพโส     สมฺมา     ทุกฺขกฺขยาย    ปฏิปนฺโน
ชรามรณนิโรธาย ฯ
     [๑๙๐]   อถาปรํ  ปริวีมํสมาโน  ปริวีมํสติ  ชาติ  ปนายํ  กึนิทานา
กึสมุทยา   กึชาติกา   กึปภวา   กิสฺมึ   สติ   ชาติ  โหติ  กิสฺมึ  อสติ
ชาติ   น   โหตีติ   ฯ   โส   ปริวีมํสมาโน   เอวํ   ปชานาติ  ชาติ
ภวนิทานา   ภวสมุทยา   ภวชาติกา  ภวปฺปภวา  ภเว  สติ  ชาติ  โหติ
ภเว  อสติ  ชาติ  น  โหตีติ  ฯ  โส  ชาติญฺจ  ปชานาติ  ชาติสมุทยญฺจ
ปชานาติ   ชาตินิโรธญฺจ   ปชานาติ   ยา   จ   ชาตินิโรธสารุปฺปคามินี
ปฏิปทา   ตญฺจ   ปชานาติ   ตถา  ปฏิปนฺโน  จ  โหติ  อนุธมฺมจารี  ฯ
อยํ   วุจฺจติ   ภิกฺขเว   ภิกฺขุ   สพฺพโส  สมฺมา  ทุกฺขกฺขยาย  ปฏิปนฺโน
ชาตินิโรธาย ฯ
     [๑๙๑]   อถาปรํ    ปริวีมํสมาโน    ปริวีมํสติ   ภโว   ปนายํ
กึนิทาโน   ฯเปฯ   อุปาทานํ   ปนิทํ   กึนิทานํ   ...   ตณฺหา  ปนายํ
กึนิทานา  ...  เวทนา ปนายํ กึนิทานา ... ผสฺโส ปนายํ กึนิทาโน ...
สฬายตนํ   ปนิทํ  กึนิทานํ  ...  นามรูปํ  ปนิทํ  กึนิทานํ  ...  วิญฺญาณํ
ปนิทํ   กึนิทานํ   ...  สงฺขารา  ปนิเม  กึนิทานา  กึสมุทยา  กึชาติกา
กึปภวา  กิสฺมึ  สติ  สงฺขารา  โหนฺติ  กิสฺมึ  อสติ สงฺขารา น โหนฺตีติ ฯ
โส    ปริวีมํสมาโน    เอวํ    ปชานาติ    สงฺขารา   อวิชฺชานิทานา
อวิชฺชาสมุทยา     อวิชฺชาชาติกา     อวิชฺชาปภวา    อวิชฺชาย    สติ
สงฺขารา โหนฺติ อวิชฺชาย อสติ สงฺขารา น โหนฺตีติ ฯ
     {๑๙๑.๑}   โส  สงฺขาเร  จ  ปชานาติ  สงฺขารสมุทยญฺจ ปชานาติ
สงฺขารนิโรธญฺจ   ปชานาติ   ยา  จ  สงฺขารนิโรธสารุปฺปคามินี  ปฏิปทา
ตญฺจ  ปชานาติ  ตถา  ปฏิปนฺโน  จ  โหติ  อนุธมฺมจารี  ฯ  อยํ  วุจฺจติ
ภิกฺขเว  ภิกฺขุ  สพฺพโส  สมฺมา  ทุกฺขกฺขยาย  ปฏิปนฺโน สงฺขารนิโรธาย ฯ
อวิชฺชาคโต    [๑]-    ภิกฺขเว    ปุริสปุคฺคโล    ปุญฺญญฺเจ   สงฺขารํ
อภิสงฺขโรติ     ปุญฺญูปคํ     โหติ    วิญฺญาณํ    อปุญฺญญฺเจ    สงฺขารํ
อภิสงฺขโรติ    อปุญฺญูปคํ    โหติ   วิญฺญาณํ   ฯ   อเนชญฺเจ   สงฺขารํ
อภิสงฺขโรติ อเนชูปคํ โหติ วิญฺญาณํ ฯ
     [๑๙๒]   ยโต  โข  ภิกฺขเว  ภิกฺขุโน  อวิชฺชา  ปหีนา โหติ วิชฺชา
อุปฺปนฺนา   ฯ   โส   อวิชฺชาวิราคา  วิชฺชุปฺปาทา  เนว  ปุญฺญาภิสงฺขารํ
อภิสงฺขโรติ   น   อปุญฺญาภิสงฺขารํ   อภิสงฺขโรติ   น   อเนชาภิสงฺขารํ
อภิสงฺขโรติ    อนภิสงฺขโรนฺโต   อนภิสญฺเจตยนฺโต   น   กิญฺจิ   โลเก
อุปาทิยติ   อนุปาทิยํ   น  ปริตสฺสติ  อปริตสฺสํ  ปจฺจตฺตํเยว  ปรินิพฺพายติ
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานาติ ฯ
     {๑๙๒.๑}   โส  สุขญฺเจ  เวทนํ  เวทยติ  สา  อนิจฺจาติ ปชานาติ
อนชฺโฌสิตาติ    ปชานาติ    อนภินนฺทิตาติ    ปชานาติ   ฯ   ทุกฺขญฺเจ
เวทนํ   เวทยติ   สา   อนิจฺจาติ   ปชานาติ   อนชฺโฌสิตาติ  ปชานาติ
อนภินนฺทิตาติ   ปชานาติ   ฯ   อทุกฺขมสุขญฺเจ   เวทนํ   เวทยติ   สา
@เชิงอรรถ:  ม. ยุ. ยํ ฯ
อนิจฺจาติ     ปชานาติ     อนชฺโฌสิตาติ     ปชานาติ    อนภินนฺทิตาติ
ปชานาติ   ฯ   โส   สุขญฺเจ  เวทนํ  เวทยติ  วิสญฺญุตฺโต  นํ  เวทยติ
ทุกฺขญฺเจ   เวทนํ   เวทยติ   วิสญฺญุตฺโต   นํ   เวทยติ  อทุกฺขมสุขญฺเจ
เวทนํ เวทยติ วิสญฺญุตฺโต นํ เวทยติ ฯ
     {๑๙๒.๒}   โส  กายปริยนฺติกํ  เวทนํ  เวทยมาโน  กายปริยนฺติกํ
เวทนํ   เวทยามีติ   ปชานาติ   ฯ   ชีวิตปริยนฺติกํ  เวทนํ  เวทยมาโน
ชีวิตปริยนฺติกํ   เวทนํ   เวทยามีติ  ปชานาติ  ฯ  กายสฺส  เภทา  อุทฺธํ
ชีวิตปริยาทานา    อิเธว   สพฺพเวทยิตานิ   อนภินนฺทิตานิ   สีตีภวิสฺสนฺติ
สรีรานิ อวสิสิสฺสนฺตีติ ปชานาติ ฯ
     [๑๙๓]   เสยฺยถาปิ  ภิกฺขเว  ปุริโส  กุมฺภการปากา  อุณฺหํ  กุมฺภํ
อุทฺธริตฺวา   สเม   ภูมิภาเค   ปติฏฺฐเปยฺย   ตตฺร   ยายํ  อุสฺมา  สา
ตตฺเถว   วูปสเมยฺย   กปลฺลานิ   อวสิเสยฺยุํ   เอวเมว   โข  ภิกฺขเว
ภิกฺขุ    กายปริยนฺติกํ    เวทนํ    เวทยมาโน   กายปริยนฺติกํ   เวทนํ
เวทยามีติ    ปชานาติ    ฯ    ชีวิตปริยนฺติกํ    เวทนํ    เวทยมาโน
ชีวิตปริยนฺติกํ    เวทนํ   เวทยามีติ   ปชานาติ   ฯ   กายสฺส   เภทา
อุทฺธํ     ชีวิตปริยาทานา     อิเธว    สพฺพเวทยิตานิ    อนภินนฺทิตานิ
สีตีภวิสฺสนฺติ สรีรานิ อวสิสิสฺสนฺตีติ ปชานาติ ฯ
     [๑๙๔]   ตํ   กึ  มญฺญถ  ภิกฺขเว  อปิ  นุ  โข  ขีณาสโว  ภิกฺขุ
ปุญฺญาภิสงฺขารํ   วา   อภิสงฺขเรยฺย  อปุญฺญาภิสงฺขารํ  วา  อภิสงฺขเรยฺย
อเนญฺชาภิสงฺขารํ  วา  อภิสงฺขเรยฺยาติ  ฯ  โน  เหตํ  ภนฺเต ฯ สพฺพโส
วา   ปน   สงฺขาเรสุ   อสติ   สงฺขารนิโรธา   อปิ  นุ  โข  วิญฺญาณํ
ปญฺญาเยถาติ   ฯ   โน  เหตํ  ภนฺเต  ฯ  สพฺพโส  วา  ปน  วิญฺญาเณ
อสติ   วิญฺญาณนิโรธา   อปิ   นุ   โข  นามรูปํ  ปญฺญาเยถาติ  ฯ  โน
เหตํ   ภนฺเต   ฯ   สพฺพโส  วา  ปน  นามรูเป  อสติ  นามรูปนิโรธา
อปิ  นุ  โข  สฬายตนํ  ปญฺญาเยถาติ  ฯ  โน  เหตํ  ภนฺเต  ฯ สพฺพโส
วา   ปน   สฬายตเน   อสติ   สฬายตนนิโรธา   อปิ  นุ  โข  ผสฺโส
ปญฺญาเยถาติ   ฯ   โน   เหตํ   ภนฺเต  ฯ  สพฺพโส  วา  ปน  ผสฺเส
อสติ   ผสฺสนิโรธา  อปิ  นุ  โข  เวทนา  ปญฺญาเยถาติ  ฯ  โน  เหตํ
ภนฺเต   ฯ   สพฺพโส   วา   ปน  เวทนาย  อสติ  เวทนานิโรธา  อปิ
นุ   โข   ตณฺหา   ปญฺญาเยถาติ   ฯ   โน  เหตํ  ภนฺเต  ฯ  สพฺพโส
วา   ปน   ตณฺหาย   อสติ   ตณฺหานิโรธา   อปิ   นุ   โข  อุปาทานํ
ปญฺญาเยถาติ   ฯ  โน  เหตํ  ภนฺเต  ฯ  สพฺพโส  วา  ปน  อุปาทาเน
อสติ   อุปาทานนิโรธา   อปิ   นุ   โข   ภโว  ปญฺญาเยถาติ  ฯ  โน
เหตํ   ภนฺเต   ฯ  สพฺพโส  วา  ปน  ภเว  อสติ  ภวนิโรธา  อปิ  นุ
โข   ชาติ  ปญฺญาเยถาติ  ฯ  โน  เหตํ  ภนฺเต  ฯ  สพฺพโส  วา  ปน
ชาติยา   อสติ   ชาตินิโรธา  อปิ  นุ  โข  ชรามรณํ  ปญฺญาเยถาติ  ฯ
โน เหตํ ภนฺเต ฯ
     [๑๙๕]   สาธุ  สาธุ  ภิกฺขเว  เอวเมตํ  ภิกฺขเว  มญฺญถ  สทฺทหถ
เอวเมตํ   ภิกฺขเว   อธิมุจฺจถ   นิกฺกงฺขา   เอตฺถ   โหถ  นิพฺพิจิกิจฺฉา
เอเสวนฺโต ทุกฺขสฺสาติ ฯ ปฐมํ ฯ
     [๑๙๖]   สาวตฺถิยํ  วิหรติ  ... ตตฺร โข ภควา ... อุปาทานิเยสุ
ภิกฺขเว    ธมฺเมสุ    อสฺสาทานุปสฺสิโน    วิหรโต    ตณฺหา   ปวฑฺฒติ
ตณฺหาปจฺจยา     อุปาทานํ     อุปาทานปจฺจยา     ภโว    ภวปจฺจยา
ชาติ     ชาติปจฺจยา     ชรามรณํ     โสกปริเทวทุกฺขโทมนสฺสุปายาสา
สมฺภวนฺติ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๑๙๗]   เสยฺยถาปิ  ภิกฺขเว  ทสนฺนํ  วา  กฏฺฐวาหานํ  วีสาย วา
กฏฺฐวาหานํ   ตึสาย   วา   กฏฺฐวาหานํ  จตฺตารีสาย  วา  กฏฺฐวาหานํ
มหา   อคฺคิกฺขนฺโธ   ชเลยฺย   ตตฺร   ปุริโส   กาเลน  กาลํ  สุกฺขานิ
เจว   ติณานิ   ปกฺขิเปยฺย   สุกฺขานิ  จ  โคมยานิ  ปกฺขิเปยฺย  สุกฺขานิ
จ   กฏฺฐานิ   ปกฺขิเปยฺย   เอวญฺหิ   โส   ภิกฺขเว  มหา  อคฺคิกฺขนฺโธ
ตทาหาโร   ตทุปาทาโน   จิรํ   ทีฆมทฺธานํ   ชเลยฺย   เอวเมว   โข
ภิกฺขเว   อุปาทานิเยสุ   ธมฺเมสุ   อสฺสาทานุปสฺสิโน   วิหรโต   ตณฺหา
ปวฑฺฒติ    ตณฺหาปจฺจยา    อุปาทานํ   ฯเปฯ   เอวเมตสฺส   เกวลสฺส
ทุกฺขกฺขนฺธสฺส สมุทโย โหติ ฯ
     [๑๙๘]   อุปาทานิเยสุ  ภิกฺขเว  ธมฺเมสุ  อาทีนวานุปสฺสิโน วิหรโต
ตณฺหา    นิรุชฺฌติ    ตณฺหานิโรธา    อุปาทานนิโรโธ   อุปาทานนิโรธา
ภวนิโรโธ     ภวนิโรธา     ชาตินิโรโธ     ชาตินิโรธา    ชรามรณํ
โสกปริเทวทุกฺขโทมนสฺสุปายาสา         นิรุชฺฌนฺติ         เอวเมตสฺส
เกวลสฺส ทุกฺขกฺขนฺธสฺส นิโรโธ โหติ ฯ
     [๑๙๙]   เสยฺยถาปิ  ภิกฺขเว  ทสนฺนํ  วา  กฏฺฐวาหานํ  วีสาย วา
กฏฺฐวาหานํ   ตึสาย   วา   กฏฺฐวาหานํ  จตฺตารีสาย  วา  กฏฺฐวาหานํ
มหา   อคฺคิกฺขนฺโธ   ชเลยฺย  ตตฺร  ปุริโส  น  กาเลน  กาลํ  สุกฺขานิ
เจว   ติณานิ   ปกฺขิเปยฺย   น   สุกฺขานิ  จ  โคมยานิ  ปกฺขิเปยฺย  น
สุกฺขานิ    จ   กฏฺฐานิ   ปกฺขิเปยฺย   เอวญฺหิ   โส   ภิกฺขเว   มหา
อคฺคิกฺขนฺโธ    ปุริมสฺส   จ   อุปาทานสฺส   ปริยาทานา   อญฺญสฺส   จ
อนุปหารา  ๑-  อนาหาโร นิพฺพาเยยฺย เอวเมว โข ภิกฺขเว อุปาทานิเยสุ
ธมฺเมสุ   อาทีนวานุปสฺสิโน   วิหรโต   ตณฺหา   นิรุชฺฌติ   ตณฺหานิโรธา
อุปาทานนิโรโธ   ฯเปฯ   เอวเมตสฺส  เกวลสฺส  ทุกฺขกฺขนฺธสฺส  นิโรโธ
โหตีติ ฯ ทุติยํ ฯ
     [๒๐๐]   สาวตฺถิยํ  วิหรติ  ... ตตฺร โข ภควา ... สญฺโญชนิเยสุ
ภิกฺขเว    ธมฺเมสุ    อสฺสาทานุปสฺสิโน    วิหรโต    ตณฺหา   ปวฑฺฒติ
ตณฺหาปจฺจยา     อุปาทานํ     อุปาทานปจฺจยา     ภโว    ภวปจฺจยา
ชาติ     ชาติปจฺจยา     ชรามรณํ     โสกปริเทวทุกฺขโทมนสฺสุปายาสา
สมฺภวนฺติ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๐๑]   เสยฺยถาปิ   ภิกฺขเว   เตลญฺจ  ปฏิจฺจ  วฏฺฏิญฺจ  ปฏิจฺจ
เตลปฺปทีโป   ฌาเยยฺย  ตตฺร  ปุริโส  กาเลน  กาลํ  เตลํ  อาสิญฺเจยฺย
วฏฺฏึ   อุปสํหเรยฺย   เอวญฺหิ   โส   ภิกฺขเว   เตลปฺปทีโป  ตทาหาโร
ตทุปาทาโน    จิรํ    ทีฆมทฺธานํ   ชเลยฺย   เอวเมว   โข   ภิกฺขเว
สญฺโญชนิเยสุ   ธมฺเมสุ   อสฺสาทานุปสฺสิโน   วิหรโต   ตณฺหา   ปวฑฺฒติ
ตณฺหาปจฺจยา     อุปาทานํ     อุปาทานปจฺจยา     ภโว    ภวปจฺจยา
@เชิงอรรถ:  ยุ. อนุปาหารา ฯ เอวมุปริปิ ฯ
ชาติ     ชาติปจฺจยา     ชรามรณํ     โสกปริเทวทุกฺขโทมนสฺสุปายาสา
สมฺภวนฺติ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๐๒]   สญฺโญชนิเยสุ  ภิกฺขเว  ธมฺเมสุ  อาทีนวานุปสฺสิโน วิหรโต
ตณฺหา    นิรุชฺฌติ    ตณฺหานิโรธา    อุปาทานนิโรโธ   อุปาทานนิโรธา
ภวนิโรโธ     ภวนิโรธา     ชาตินิโรโธ     ชาตินิโรธา    ชรามรณํ
โสกปริเทวทุกฺขโทมนสฺสุปายาสา    นิรุชฺฌนฺติ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหติ ฯ
     [๒๐๓]   เสยฺยถาปิ   ภิกฺขเว   เตลญฺจ  ปฏิจฺจ  วฏฺฏิญฺจ  ปฏิจฺจ
เตลปฺปทีโป    ฌาเยยฺย   ตตฺร   ปุริโส   น   กาเลน   กาลํ   เตลํ
อาสิญฺเจยฺย   น  วฏฺฏึ  อุปสํหเรยฺย  เอวญฺหิ  โส  ภิกฺขเว  เตลปฺปทีโป
ปุริมสฺส    จ    อุปาทานสฺส   ปริยาทานา   อญฺญสฺส   จ   อนุปหารา
อนาหาโร    นิพฺพาเยยฺย    เอวเมว    โข   ภิกฺขเว   สญฺโญชนิเยสุ
ธมฺเมสุ   อาทีนวานุปสฺสิโน   วิหรโต   ตณฺหา   นิรุชฺฌติ   ตณฺหานิโรธา
อุปาทานนิโรโธ     ฯเปฯ    เอวเมตสฺส    เกวลสฺส    ทุกฺขกฺขนฺธสฺส
นิโรโธ โหตีติ ฯ ตติยํ ฯ
     [๒๐๔]   สาวตฺถิยํ  วิหรติ  ...  ตตฺร  โข ภควา ... เสยฺยถาปิ
ภิกฺขเว   เตลญฺจ   ปฏิจฺจ   วฏฺฏิญฺจ   ปฏิจฺจ   เตลปฺปทีโป   ฌาเยยฺย
ตตฺร   ปุริโส   กาเลน   กาลํ   เตลํ  อาสิญฺเจยฺย  วฏฺฏึ  อุปสํหเรยฺย
เอวญฺหิ   โส   ภิกฺขเว   เตลปฺปทีโป   ตทาหาโร   ตทุปาทาโน   จิรํ
ทีฆมทฺธานํ   ชเลยฺย   เอวเมว   โข   ภิกฺขเว  สญฺโญชนิเยสุ  ธมฺเมสุ
อสฺสาทานุปสฺสิโน     วิหรโต     ตณฺหา     ปวฑฺฒติ     ตณฺหาปจฺจยา
อุปาทานํ ฯเปฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๐๕]   เสยฺยถาปิ   ภิกฺขเว   เตลญฺจ  ปฏิจฺจ  วฏฺฏิญฺจ  ปฏิจฺจ
เตลปฺปทีโป    ฌาเยยฺย   ตตฺร   ปุริโส   น   กาเลน   กาลํ   เตลํ
อาสิญฺเจยฺย   น  วฏฺฏึ  อุปสํหเรยฺย  เอวญฺหิ  โส  ภิกฺขเว  เตลปฺปทีโป
ปุริมสฺส    จ    อุปาทานสฺส   ปริยาทานา   อญฺญสฺส   จ   อนุปหารา
อนาหาโร   นิพฺพาเยยฺย  เอวเมว  โข  ภิกฺขเว  สญฺโญชนิเยสุ  ธมฺเมสุ
อาทีนวานุปสฺสิโน     วิหรโต     ตณฺหา     นิรุชฺฌติ     ตณฺหานิโรธา
อุปาทานนิโรโธ     ฯเปฯ    เอวเมตสฺส    เกวลสฺส    ทุกฺขกฺขนฺธสฺส
นิโรโธ โหตีติ ฯ จตุตฺถํ ฯ
     [๒๐๖]   สาวตฺถิยํ  วิหรติ  ... ตตฺร โข ภควา ... อุปาทานิเยสุ
ภิกฺขเว    ธมฺเมสุ    อสฺสาทานุปสฺสิโน    วิหรโต    ตณฺหา   ปวฑฺฒติ
ตณฺหาปจฺจยา      อุปาทานํ      อุปาทานปจฺจยา     ภโว     ฯเปฯ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๐๗]   เสยฺยถาปิ   ภิกฺขเว   มหา  รุกฺโข  ตสฺส  ยานิ  เจว
มูลานิ   อโธคมานิ   ยานิ   จ   ติริยงฺคมานิ   สพฺพานิ   ตานิ   อุทฺธํ
โอชํ   อภิหรนฺติ   เอวญฺหิ   โส   ภิกฺขเว   มหา   รุกฺโข  ตทาหาโร
ตทุปาทาโน    จิรํ   ทีฆมทฺธานํ   ติฏฺเฐยฺย   เอวเมว   โข   ภิกฺขเว
อุปาทานิเยสุ     ธมฺเมสุ     อสฺสาทานุปสฺสิโน     วิหรโต     ตณฺหา
ปวฑฺฒติ    ตณฺหาปจฺจยา    อุปาทานํ   อุปาทานปจฺจยา   ภโว   ฯเปฯ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๐๘]   อุปาทานิเยสุ  ภิกฺขเว  ธมฺเมสุ  อาทีนวานุปสฺสิโน วิหรโต
ตณฺหา    นิรุชฺฌติ    ตณฺหานิโรธา    อุปาทานนิโรโธ   อุปาทานนิโรธา
ภวนิโรโธ    ฯเปฯ   เอวเมตสฺส   เกวลสฺส   ทุกฺขกฺขนฺธสฺส   นิโรโธ
โหติ ฯ
     [๒๐๙]   เสยฺยถาปิ    ภิกฺขเว   มหา   รุกฺโข   อถ   ปุริโส
อาคจฺเฉยฺย   กุทฺทาลปิฏกํ   อาทาย   โส   ตํ   รุกฺขํ  มูเล  ฉินฺเทยฺย
มูเล   เฉตฺวา   ปลิขเนยฺย   ปลิขนิตฺวา   มูลานิ  อุทฺธเรยฺย  อนฺตมโส
อุสีรนาฬิมตฺตานิปิ    ฯ    โส    ตํ    รุกฺขํ   ขณฺฑาขณฺฑิกํ   ฉินฺเทยฺย
ขณฺฑาขณฺฑิกํ    ฉินฺทิตฺวา    ผาเลยฺย    ผาเลตฺวา    สกลิกํ    สกลิกํ
กเรยฺย   สกลิกํ   สกลิกํ   กริตฺวา   วาตาตเป  วิโสเสยฺย  วาตาตเป
วิโสเสตฺวา   อคฺคินา   ฑเหยฺย   อคฺคินา  ฑเหตฺวา  มสึ  กเรยฺย  มสึ
กริตฺวา   มหาวาเต   วา   โอผุเนยฺย   ๑-   นทิยา  วา  สีฆโสตาย
ปวาเหยฺย   เอวญฺหิ   โส   ภิกฺขเว   มหา  รุกฺโข  อุจฺฉินฺนมูโล  อสฺส
ตาลาวตฺถุกโต   อนภาวงฺคโต   ๒-   อายตึ   อนุปฺปาทธมฺโม  เอวเมว
โข    ภิกฺขเว    อุปาทานิเยสุ   ธมฺเมสุ   อาทีนวานุปสฺสิโน   วิหรโต
ตณฺหา    นิรุชฺฌติ    ตณฺหานิโรธา    อุปาทานนิโรโธ   อุปาทานนิโรธา
ภวนิโรโธ    ฯเปฯ   เอวเมตสฺส   เกวลสฺส   ทุกฺขกฺขนฺธสฺส   นิโรโธ
โหตีติ ฯ ปญฺจมํ ฯ
     [๒๑๐]   สาวตฺถิยํ  วิหรติ  ...  ตตฺร  โข ภควา ... เสยฺยถาปิ
ภิกฺขเว   มหา  รุกฺโข  ตสฺส  ยานิ  เจว  มูลานิ  อโธคมานิ  ยานิ  จ
@เชิงอรรถ:  ม. โอผุเณยฺย ฯ ยุ. โอปุเนยฺย ฯ  ม. ยุ. อนภาวงฺกโต ฯ เอวมุปริปิ ฯ
ติริยงฺคมานิ   สพฺพานิ   ตานิ   อุทฺธํ   โอชํ   อภิหรนฺติ   เอวญฺหิ  โส
ภิกฺขเว    มหา   รุกฺโข   ตทาหาโร   ตทุปาทาโน   จิรํ   ทีฆมทฺธานํ
ติฏฺเฐยฺย  เอวเมว  โข  ภิกฺขเว  อุปาทานิเยสุ ธมฺเมสุ อสฺสาทานุปสฺสิโน
วิหรโต     ตณฺหา     ปวฑฺฒติ    ตณฺหาปจฺจยา    อุปาทานํ    ฯเปฯ
เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๑๑]   เสยฺยถาปิ    ภิกฺขเว   มหา   รุกฺโข   อถ   ปุริโส
อาคจฺเฉยฺย   กุทฺทาลปิฏกํ   อาทาย   โส   ตํ   รุกฺขํ  มูเล  ฉินฺเทยฺย
มูเล   เฉตฺวา   ปลิขเนยฺย   ปลิขนิตฺวา   มูลานิ   อุทฺธเรยฺย   ฯเปฯ
นทิยา   วา   สีฆโสตาย   ปวาเหยฺย   เอวญฺหิ   โส   ภิกฺขเว  มหา
รุกฺโข      อุจฺฉินฺนมูโล     อสฺส     ตาลาวตฺถุกโต     อนภาวงฺคโต
อายตึ    อนุปฺปาทธมฺโม    เอวเมว    โข    ภิกฺขเว   อุปาทานิเยสุ
ธมฺเมสุ      อาทีนวานุปสฺสิโน      วิหรโต      ตณฺหา      นิรุชฺฌติ
ตณฺหานิโรธา     อุปาทานนิโรโธ    ฯเปฯ    เอวเมตสฺส    เกวลสฺส
ทุกฺขกฺขนฺธสฺส นิโรโธ โหตีติ ฯ ฉฏฺฐํ ฯ
     [๒๑๒]   สาวตฺถิยํ  วิหรติ  ... ตตฺร โข ภควา ... สญฺโญชนิเยสุ
ภิกฺขเว    ธมฺเมสุ    อสฺสาทานุปสฺสิโน    วิหรโต    ตณฺหา   ปวฑฺฒติ
ตณฺหาปจฺจยา      อุปาทานํ      ฯเปฯ     เอวเมตสฺส     เกวลสฺส
ทุกฺขกฺขนฺธสฺส สมุทโย โหติ ฯ
     [๒๑๓]   เสยฺยถาปิ   ภิกฺขเว   ตรุโณ   รุกฺโข   ตสฺส   ปุริโส
กาเลน   กาลํ   มูลานิ  ปลิสชฺเชยฺย  ๑-  กาเลน  กาลํ  ปํสุํ  ทเทยฺย
@เชิงอรรถ:  ม. ปลิมชฺเชยฺย ฯ
กาเลน   กาลํ   อุทกํ   ทเทยฺย  เอวญฺหิ  โส  ภิกฺขเว  ตรุโณ  รุกฺโข
ตทาหาโร   ตทุปาทาโน   วุฑฺฒึ  วิรูฬฺหึ  เวปุลฺลํ  อาปชฺเชยฺย  เอวเมว
โข    ภิกฺขเว    สญฺโญชนิเยสุ   ธมฺเมสุ   อสฺสาทานุปสฺสิโน   วิหรโต
ตณฺหา    ปวฑฺฒติ    ตณฺหาปจฺจยา    อุปาทานํ    ฯเปฯ   เอวเมตสฺส
เกวลสฺส ทุกฺขกฺขนฺธสฺส สมุทโย โหติ ฯ
     [๒๑๔]   สญฺโญชนิเยสุ    ภิกฺขเว   ธมฺเมสุ   อาทีนวานุปสฺสิโน
วิหรโต    ตณฺหา    นิรุชฺฌติ   ตณฺหานิโรธา   อุปาทานนิโรโธ   ฯเปฯ
เอวเมตสฺส เกวลสฺส ทุกฺขกฺขนฺธสฺส นิโรโธ โหติ ฯ
     [๒๑๕]   เสยฺยถาปิ   ภิกฺขเว   ตรุโณ   รุกฺโข   อถ   ปุริโส
อาคจฺเฉยฺย   กุทฺทาลปิฏกํ   อาทาย   ฯเปฯ   นทิยา   วา  สีฆโสตาย
ปวาเหยฺย   เอวญฺหิ   โส   ภิกฺขเว  ตรุโณ  รุกฺโข  อุจฺฉินฺนมูโล  อสฺส
ตาลาวตฺถุกโต    อนภาวงฺคโต    อายตึ    อนุปฺปาทธมฺโม    เอวเมว
โข    ภิกฺขเว    สญฺโญชนิเยสุ   ธมฺเมสุ   อาทีนวานุปสฺสิโน   วิหรโต
ตณฺหา      นิรุชฺฌติ      ตณฺหานิโรธา     อุปาทานนิโรโธ     ฯเปฯ
เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ สตฺตมํ ฯ
     [๒๑๖]   สาวตฺถิยํ  วิหรติ  ... ตตฺร โข ภควา ... สญฺโญชนิเยสุ
ภิกฺขเว   ธมฺเมสุ   อสฺสาทานุปสฺสิโน   วิหรโต   นามรูปสฺส   อวกฺกนฺติ
โหติ    นามรูปปจฺจยา    สฬายตนํ    ฯเปฯ   เอวเมตสฺส   เกวลสฺส
ทุกฺขกฺขนฺธสฺส สมุทโย โหติ ฯ
     [๒๑๗]   เสยฺยถาปิ   ภิกฺขเว   มหา  รุกฺโข  ตสฺส  ยานิ  เจว
มูลานิ   อโธคมานิ   ยานิ   จ   ติริยงฺคมานิ   สพฺพานิ   ตานิ   อุทฺธํ
โอชํ   อภิหรนฺติ   เอวญฺหิ   โส   ภิกฺขเว   มหา   รุกฺโข  ตทาหาโร
ตทุปาทาโน    จิรํ   ทีฆมทฺธานํ   ติฏฺเฐยฺย   เอวเมว   โข   ภิกฺขเว
สญฺโญชนิเยสุ     ธมฺเมสุ    อสฺสาทานุปสฺสิโน    วิหรโต    นามรูปสฺส
อวกฺกนฺติ    โหติ    นามรูปปจฺจยา    สฬายตนํ   ฯเปฯ   เอวเมตสฺส
เกวลสฺส ทุกฺขกฺขนฺธสฺส สมุทโย โหติ ฯ
     [๒๑๘]   สญฺโญชนิเยสุ    ภิกฺขเว   ธมฺเมสุ   อาทีนวานุปสฺสิโน
วิหรโต     นามรูปสฺส     อวกฺกนฺติ     น    โหติ    นามรูปนิโรธา
สฬายตนนิโรโธ     ฯเปฯ    เอวเมตสฺส    เกวลสฺส    ทุกฺขกฺขนฺธสฺส
นิโรโธ โหติ ฯ
     [๒๑๙]   เสยฺยถาปิ  ภิกฺขเว  มหา  รุกฺโข  อถ ปุริโส อาคจฺเฉยฺย
กุทฺทาลปิฏกํ    อาทาย    ฯเปฯ    อายตึ   อนุปฺปาทธมฺโม   เอวเมว
โข    ภิกฺขเว    สญฺโญชนิเยสุ   ธมฺเมสุ   อาทีนวานุปสฺสิโน   วิหรโต
นามรูปสฺส    อวกฺกนฺติ    น   โหติ   นามรูปนิโรธา   สฬายตนนิโรโธ
ฯเปฯ   เอวเมตสฺส   เกวลสฺส   ทุกฺขกฺขนฺธสฺส   นิโรโธ   โหตีติ   ฯ
อฏฺฐมํ ฯ
     [๒๒๐]   สาวตฺถิยํ  วิหรติ  ... ตตฺร โข ภควา ... สญฺโญชนิเยสุ
ภิกฺขเว   ธมฺเมสุ   อสฺสาทานุปสฺสิโน   วิหรโต   วิญฺญาณสฺส   อวกฺกนฺติ
โหติ    วิญฺญาณปจฺจยา    นามรูปํ    ฯเปฯ    เอวเมตสฺส   เกวลสฺส
ทุกฺขกฺขนฺธสฺส สมุทโย โหติ ฯ
     [๒๒๑]   เสยฺยถาปิ   ภิกฺขเว   มหา  รุกฺโข  ตสฺส  ยานิ  เจว
มูลานิ    ฯเปฯ    เอวเมว   โข   ภิกฺขเว   สญฺโญชนิเยสุ   ธมฺเมสุ
อสฺสาทานุปสฺสิโน      วิหรโต      วิญฺญาณสฺส     อวกฺกนฺติ     โหติ
วิญฺญาณปจฺจยา      นามรูปํ      ฯเปฯ     เอวเมตสฺส     เกวลสฺส
ทุกฺขกฺขนฺธสฺส สมุทโย โหติ ฯ
     [๒๒๒]   สญฺโญชนิเยสุ    ภิกฺขเว   ธมฺเมสุ   อาทีนวานุปสฺสิโน
วิหรโต     วิญฺญาณสฺส     อวกฺกนฺติ     น    โหติ    วิญฺญาณนิโรธา
นามรูปนิโรโธ     ฯเปฯ     เอวเมตสฺส    เกวลสฺส    ทุกฺขกฺขนฺธสฺส
นิโรโธ โหติ ฯ
     [๒๒๓]   เสยฺยถาปิ    ภิกฺขเว   มหา   รุกฺโข   อถ   ปุริโส
อาคจฺเฉยฺย    กุทฺทาลปิฏกํ   อาทาย   ฯเปฯ   อายตึ   อนุปฺปาทธมฺโม
เอวเมว    โข   ภิกฺขเว   สญฺโญชนิเยสุ   ธมฺเมสุ   อาทีนวานุปสฺสิโน
วิหรโต     วิญฺญาณสฺส     อวกฺกนฺติ     น    โหติ    วิญฺญาณนิโรธา
นามรูปนิโรโธ     ฯเปฯ     เอวเมตสฺส    เกวลสฺส    ทุกฺขกฺขนฺธสฺส
นิโรโธ โหตีติ ฯ นวมํ ฯ
     [๒๒๔]   เอกํ  สมยํ  ภควา  กุรูสุ  วิหรติ  กมฺมาสทมฺมํ  ๑- นาม
กุรูนํ  นิคโม  ฯ  อถ  โข  อายสฺมา  อานนฺโท  เยน ภควา เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ  ฯ  เอกมนฺตํ
นิสินฺโน    โข   อายสฺมา   อานนฺโท   ภควนฺตํ   เอตทโวจ   อจฺฉริยํ
ภนฺเต   อพฺภูตํ   ภนฺเต   ยาวคมฺภีโร   จายํ   ภนฺเต  ปฏิจฺจสมุปฺปาโท
@เชิงอรรถ:  กมฺมาสธมฺมนฺติปิ ปาโฐ ฯ
คมฺภีราวภาโส    จ    อถ   จ   ปน   เม   อุตฺตานกุตฺตานโก   วิย
ขายตีติ ฯ
     [๒๒๕]   มา  เหวํ  อานนฺท  มา  เหวํ  อานนฺท  คมฺภีโร  จายํ
อานนฺท    ปฏิจฺจสมุปฺปาโท    คมฺภีราวภาโส    จ   เอตสฺส   อานนฺท
ธมฺมสฺส     อญฺญาณา    อนนุโพธา    อปฺปฏิเวธา    เอวมยํ    ปชา
ตนฺตากุลชาตา     คุฬีคุณฺฐิกชาตา     ๑-     มุญฺชปพฺพชภูตา    อปายํ
ทุคฺคตึ วินิปาตํ สํสารํ นาติวตฺตติ ฯ
     [๒๒๖]   อุปาทานิเยสุ    อานนฺท   ธมฺเมสุ   อสฺสาทานุปสฺสิโน
วิหรโต   ตณฺหา   ปวฑฺฒติ   ตณฺหาปจฺจยา   อุปาทานํ   อุปาทานปจฺจยา
ภโว    ภวปจฺจยา   ชาติ   ชาติปจฺจยา   ชรามรณํ   โสกปริเทวทุกฺข-
โทมนสฺสุปายาสา        สมฺภวนฺติ       เอวเมตสฺส       เกวลสฺส
ทุกฺขกฺขนฺธสฺส สมุทโย โหติ ฯ
     [๒๒๗]   เสยฺยถาปิ   อานนฺท   มหา  รุกฺโข  ตสฺส  ยานิ  เจว
มูลานิ   อโธคมานิ   ยานิ   จ   ติริยงฺคมานิ   สพฺพานิ   ตานิ   อุทฺธํ
โอชํ   อภิหรนฺติ   เอวญฺหิ   โส   อานนฺท   มหา   รุกฺโข  ตทาหาโร
ตทุปาทาโน    จิรํ   ทีฆมทฺธานํ   ติฏฺเฐยฺย   เอวเมว   โข   อานนฺท
อุปาทานิเยสุ     ธมฺเมสุ     อสฺสาทานุปสฺสิโน     วิหรโต     ตณฺหา
ปวฑฺฒติ      ตณฺหาปจฺจยา     อุปาทานํ     อุปาทานปจฺจยา     ภโว
ฯเปฯ เอวเมตสฺส เกวลสฺส ทุกฺขกฺขนฺธสฺส สมุทโย โหติ ฯ
     [๒๒๘]   อุปาทานิเยสุ  อานนฺท  ธมฺเมสุ  อาทีนวานุปสฺสิโน วิหรโต
@เชิงอรรถ:  ม. กุลคณฺฐิกชาตา ฯ ยุ. คุฬิคนุธิกชาตา ฯ
ตณฺหา    นิรุชฺฌติ    ตณฺหานิโรธา    อุปาทานนิโรโธ   อุปาทานนิโรธา
ภวนิโรโธ    ฯเปฯ   เอวเมตสฺส   เกวลสฺส   ทุกฺขกฺขนฺธสฺส   นิโรโธ
โหติ ฯ
     [๒๒๙]   เสยฺยถาปิ    อานนฺท   มหา   รุกฺโข   อถ   ปุริโส
อาคจฺเฉยฺย   กุทฺทาลปิฏกํ   อาทาย   โส   ตํ   รุกฺขํ  มูเล  ฉินฺเทยฺย
มูเล   เฉตฺวา   ปลิขเนยฺย   ปลิขนิตฺวา   มูลานิ  อุทฺธเรยฺย  อนฺตมโส
อุสีรนาฬิมตฺตานิปิ    ฯ    โส    ตํ    รุกฺขํ   ขณฺฑาขณฺฑิกํ   ฉินฺเทยฺย
ขณฺฑาขณฺฑิกํ    เฉตฺวา   ๑-   ผาเลยฺย   ผาเลตฺวา   สกลิกํ   สกลิกํ
กเรยฺย   สกลิกํ   สกลิกํ   กริตฺวา   วาตาตเป  วิโสเสยฺย  วาตาตเป
วิโสเสตฺวา    อคฺคินา   ฑเหยฺย   อคฺคินา   ฑเหตฺวา   มสึ   กเรยฺย
มสึ   กริตฺวา   มหาวาเต   วา   โอผุเนยฺย   นทิยา  วา  สีฆโสตาย
ปวาเหยฺย    เอวญฺหิ    โส    อานนฺท   มหา   รุกฺโข   อุจฺฉินฺนมูโล
อสฺส     ตาลาวตฺถุกโต     อนภาวงฺคโต     อายตึ    อนุปฺปาทธมฺโม
เอวเมว    โข   อานนฺท   อุปาทานิเยสุ   ธมฺเมสุ   อาทีนวานุปสฺสิโน
วิหรโต      ตณฺหา     นิรุชฺฌติ     ตณฺหานิโรธา     อุปาทานนิโรโธ
อุปาทานนิโรธา    ภวนิโรโธ    ภวนิโรธา   ชาตินิโรโธ   ชาตินิโรธา
ชรามรณํ          โสกปริเทวทุกฺขโทมนสฺสุปายาสา          นิรุชฺฌนฺติ
เอวเมตสฺส     เกวลสฺส     ทุกฺขกฺขนฺธสฺส    นิโรโธ    โหตีติ    ฯ
ทสมํ ฯ
                    ทุกฺขวคฺโค ฉฏฺโฐ ฯ
@เชิงอรรถ:  ม. ยุ. ฉินฺทิตฺวา ฯ
                       ตสฺส อุทฺทานํ
         ปริวีมํสนุปาทานํ               เทฺว จ สญฺโญชนานิ จ
         มหารุกฺเขน เทฺว วุตฺตา       ตรุเณน จ สตฺตมํ
         นามรูปญฺจ วิญฺญาณํ         นิทาเนน จ เต ทสาติ ฯ
                      -----------
                     มหาวคฺโค สตฺตโม
     [๒๓๐]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน  อนาถปิณฺฑิกสฺส  อาราเม  ฯ  ตตฺร  โข  ภควา ... อสฺสุตวา
ภิกฺขเว   ปุถุชฺชโน   อิมสฺมึ   จาตุมฺมหาภูติกสฺมึ   กายสฺมึ  นิพฺพินฺเทยฺยปิ
วิรชฺเชยฺยปิ   วิมุจฺเจยฺยปิ   ตํ   กิสฺส   เหตุ  ทิสฺสติ  หิ  ๑-  ภิกฺขเว
อิมสฺส   จาตุมฺมหาภูติกสฺส   กายสฺส   อาจโยปิ   อปจโยปิ   อาทานมฺปิ
นิกฺเขปนมฺปิ     ตสฺมา     ตตฺราสฺสุตวา     ปุถุชฺชโน    นิพฺพินฺเทยฺยปิ
วิรชฺเชยฺยปิ วิมุจฺเจยฺยปิ ฯ
     {๒๓๐.๑}   ยญฺจ  โข  เอตํ  ภิกฺขเว  วุจฺจติ จิตฺตํ อิติปิ มโน อิติปิ
วิญฺญาณํ    อิติปิ    ตตฺราสฺสุตวา   ปุถุชฺชโน   นาลํ   นิพฺพินฺทิตุํ   นาลํ
วิรชฺชิตุํ  นาลํ  วิมุจฺจิตุํ  ตํ  กิสฺส  เหตุ  ทีฆรตฺตํ เหตํ ภิกฺขเว อสฺสุตวโต
ปุถุชฺชนสฺส  อชฺโฌสิตํ  มมายิตํ  ปรามฏฺฐํ  เอตํ  มม  เอโสหมสฺมิ  เอโส
เม   อตฺตาติ   ตสฺมา   ตตฺราสฺสุตวา  ปุถุชฺชโน  นาลํ  นิพฺพินฺทิตุํ  นาลํ
วิรชฺชิตุํ นาลํ วิมุจฺจิตุํ ฯ
     [๒๓๑]   วรํ   ภิกฺขเว  อสฺสุตวา  ปุถุชฺชโน  อิมํ  จาตุมฺมหาภูติกํ
กายํ  อตฺตโต  อุปคจฺเฉยฺย  น  เตฺวว  จิตฺตํ  ตํ  กิสฺส  เหตุ  ทิสฺสตายํ
ภิกฺขเว    จาตุมฺมหาภูติโก    กาโย    เอกมฺปิ    วสฺสํ    ติฏฺฐมาโน
เทฺวปิ   วสฺสานิ   ติฏฺฐมาโน   ตีณิปิ   วสฺสานิ   ติฏฺฐมาโน   จตฺตาริปิ
วสฺสานิ    ติฏฺฐมาโน   ปญฺจปิ   วสฺสานิ   ติฏฺฐมาโน   ทสปิ   วสฺสานิ
ติฏฺฐมาโน   วีสติปิ   วสฺสานิ   ติฏฺฐมาโน   ตึสมฺปิ  วสฺสานิ  ติฏฺฐมาโน
@เชิงอรรถ:  ม. ยุ. หิสทฺโท นตฺถิ ฯ
จตฺตาฬีสมฺปิ    วสฺสานิ   ติฏฺฐมาโน   ปญฺญาสมฺปิ   วสฺสานิ   ติฏฺฐมาโน
วสฺสสตมฺปิ   ติฏฺฐมาโน   ภิยฺโยปิ   ติฏฺฐมาโน   ฯ   ยญฺจ   โข  เอตํ
ภิกฺขเว    วุจฺจติ   จิตฺตํ   อิติปิ   มโน   อิติปิ   วิญฺญาณํ   อิติปิ   ตํ
รตฺติยา จ ทิวสสฺส จ อญฺญเทว อุปฺปชฺชติ อญฺญํ นิรุชฺฌติ ฯ
     [๒๓๒]   เสยฺยถาปิ  ภิกฺขเว  มกฺกโฏ  อรญฺเญ  จ  พฺรหาวเน ๑-
จรมาโน    สาขํ    คณฺหาติ    ตํ    มุญฺจิตฺวา   อญฺญํ   คณฺหาติ   ตํ
มุญฺจิตฺวา     อญฺญํ     คณฺหาติ    ตํ    มุญฺจิตฺวา    อญฺญํ    คณฺหาติ
เอวเมว   โข   ภิกฺขเว   ยมิทํ   วุจฺจติ   จิตฺตํ   อิติปิ   มโน  อิติปิ
วิญฺญาณํ   อิติปิ   ตํ   รตฺติยา   จ   ทิวสสฺส   จ  อญฺญเทว  อุปฺปชฺชติ
อญฺญํ นิรุชฺฌติ ฯ
     [๒๓๓]   ตตฺร  ภิกฺขเว  สุตวา  อริยสาวโก  ปฏิจฺจสมุปฺปาทญฺเญว
สาธุกํ   โยนิโส  มนสิกโรติ  อิติ  อิมสฺมึ  สติ  อิทํ  โหติ  อิมสฺสุปฺปาทา
อิทํ   อุปฺปชฺชติ   อิมสฺมึ   อสติ   อิทํ   น  โหติ  อิมสฺส  นิโรธา  อิทํ
นิรุชฺฌติ    ยทิทํ   อวิชฺชาปจฺจยา   สงฺขารา   สงฺขารปจฺจยา   วิญฺญาณํ
ฯเปฯ    เอวเมตสฺส   เกวลสฺส   ทุกฺขกฺขนฺธสฺส   สมุทโย   โหติ   ฯ
อวิชฺชาย        เตฺวว       อเสสวิราคนิโรธา       สงฺขารนิโรโธ
สงฺขารนิโรธา        วิญฺญาณนิโรโธ        ฯเปฯ       เอวเมตสฺส
เกวลสฺส ทุกฺขกฺขนฺธสฺส นิโรโธ โหตีติ ฯ
     [๒๓๔]   เอวํ   ปสฺสํ   ภิกฺขเว   สุตวา   อริยสาวโก  รูปสฺมึปิ
นิพฺพินฺทติ      เวทนายปิ      นิพฺพินฺทติ      สญฺญายปิ      นิพฺพินฺทติ
@เชิงอรรถ:  ม. ยุ. ปวเน ฯ
สงฺขาเรสุปิ      นิพฺพินฺทติ      วิญฺญาณสฺมึปิ     นิพฺพินฺทติ     นิพฺพินฺทํ
วิรชฺชติ   วิราคา   วิมุจฺจติ   ฯ   วิมุตฺตสฺมึ  วิมุตฺตมิติ  ญาณํ  โหติ  ฯ
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานาตีติ ฯ ปฐมํ ฯ
     [๒๓๕]   สาวตฺถิยํ  วิหรติ  ...  ตตฺร  โข  ภควา ... อสฺสุตวา
ภิกฺขเว   ปุถุชฺชโน   อิมสฺมึ   จาตุมฺมหาภูติกสฺมึ   กายสฺมึ  นิพฺพินฺเทยฺยปิ
วิรชฺเชยฺยปิ   วิมุจฺเจยฺยปิ   ตํ  กิสฺส  เหตุ  ทิสฺสติ  หิ  ภิกฺขเว  อิมสฺส
จาตุมฺมหาภูติกสฺส     กายสฺส     อาจโยปิ     อปจโยปิ    อาทานมฺปิ
นิกฺเขปนมฺปิ     ตสฺมา     ตตฺราสฺสุตวา     ปุถุชฺชโน    นิพฺพินฺเทยฺยปิ
วิรชฺเชยฺยปิ   วิมุจฺเจยฺยปิ   ฯ  ยญฺจ  โข  เอตํ  ภิกฺขเว  วุจฺจติ  จิตฺตํ
อิติปิ   มโน   อิติปิ   วิญฺญาณํ   อิติปิ   ตตฺราสฺสุตวา   ปุถุชฺชโน  นาลํ
นิพฺพินฺทิตุํ   นาลํ   วิรชฺชิตุํ   นาลํ   วิมุจฺจิตุํ   ตํ  กิสฺส  เหตุ  ทีฆรตฺตํ
เหตํ   ภิกฺขเว   อสฺสุตวโต   ปุถุชฺชนสฺส   อชฺโฌสิตํ  มมายิตํ  ปรามฏฺฐํ
เอตํ   มม   เอโสหมสฺมิ   เอโส   เม  อตฺตาติ  ตสฺมา  ตตฺราสฺสุตวา
ปุถุชฺชโน นาลํ นิพฺพินฺทิตุํ นาลํ วิรชฺชิตุํ นาลํ วิมุจฺจิตุํ ฯ
     [๒๓๖]   วรํปิ  ภิกฺขเว  อสฺสุตวา  ปุถุชฺชโน  อิมํ  จาตุมฺมหาภูติกํ
กายํ  อตฺตโต  อุปคจฺเฉยฺย  น  เตฺวว  จิตฺตํ  ตํ  กิสฺส  เหตุ  ทิสฺสตายํ
ภิกฺขเว    จาตุมฺมหาภูติโก    กาโย    เอกมฺปิ    วสฺสํ    ติฏฺฐมาโน
เทฺวปิ   วสฺสานิ   ติฏฺฐมาโน   ตีณิปิ   วสฺสานิ   ติฏฺฐมาโน   จตฺตาริปิ
วสฺสานิ    ติฏฺฐมาโน   ปญฺจปิ   วสฺสานิ   ติฏฺฐมาโน   ทสปิ   วสฺสานิ
ติฏฺฐมาโน   วีสํปิ   วสฺสานิ   ติฏฺฐมาโน   ตึสํปิ   วสฺสานิ   ติฏฺฐมาโน
จตฺตาฬีสมฺปิ    วสฺสานิ    ติฏฺฐมาโน   ปญฺญาสํปิ   วสฺสานิ   ติฏฺฐมาโน
วสฺสสตํปิ   ติฏฺฐมาโน   ภิยฺโยปิ   ติฏฺฐมาโน   ฯ   ยญฺจ   โข   เอตํ
ภิกฺขเว    วุจฺจติ   จิตฺตํ   อิติปิ   มโน   อิติปิ   วิญฺญาณํ   อิติปิ   ตํ
รตฺติยา จ ทิวสสฺส จ อญฺญเทว อุปฺปชฺชติ อญฺญํ นิรุชฺฌติ ฯ
     [๒๓๗]   ตตฺร   ภิกฺขเว  สุตวา  อริยสาวโก  ปฏิจฺจสมุปฺปาทํเยว
สาธุกํ   โยนิโส  มนสิกโรติ  อิติ  อิมสฺมึ  สติ  อิทํ  โหติ  อิมสฺสุปฺปาทา
อิทํ   อุปฺปชฺชติ   อิมสฺมึ   อสติ   อิทํ   น  โหติ  อิมสฺส  นิโรธา  อิทํ
นิรุชฺฌติ   ฯ   สุขเวทนิยํ   ภิกฺขเว   ผสฺสํ   ปฏิจฺจ   อุปฺปชฺชติ   สุขา
เวทนา   ตสฺเสว   สุขเวทนิยสฺส   ผสฺสสฺส  นิโรธา  ยํ  ตชฺชํ  เวทยิตํ
สุขเวทนิยํ   ผสฺสํ   ปฏิจฺจ   อุปฺปนฺนา   สุขา   เวทนา   สา  นิรุชฺฌติ
สา   วูปสมติ   ฯ   ทุกฺขเวทนิยํ   ภิกฺขเว   ผสฺสํ   ปฏิจฺจ   อุปฺปชฺชติ
ทุกฺขา   เวทนา   ตสฺเสว   ทุกฺขเวทนิยสฺส  ผสฺสสฺส  นิโรธา  ยํ  ตชฺชํ
เวทยิตํ   ทุกฺขเวทนิยํ   ผสฺสํ   ปฏิจฺจ   อุปฺปนฺนา  ทุกฺขา  เวทนา  สา
นิรุชฺฌติ   สา   วูปสมติ   ฯ   อทุกฺขมสุขเวทนิยํ  ภิกฺขเว  ผสฺสํ  ปฏิจฺจ
อุปฺปชฺชติ     อทุกฺขมสุขา    เวทนา    ตสฺเสว    อทุกฺขมสุขเวทนิยสฺส
ผสฺสสฺส   นิโรธา   ยํ   ตชฺชํ  เวทยิตํ  อทุกฺขมสุขเวทนิยํ  ผสฺสํ  ปฏิจฺจ
อุปฺปนฺนา อทุกฺขมสุขา เวทนา สา นิรุชฺฌติ สา วูปสมติ ฯ
     [๒๓๘]   เสยฺยถาปิ   ภิกฺขเว   ทฺวินฺนํ  กฏฺฐานํ  สงฺฆฏสโมธานา
อุสฺมา    ชายติ    เตโช   อภินิพฺพตฺตติ   เตสํเยว   ทฺวินฺนํ   กฏฺฐานํ
นานากตวินิพฺโภคา  ๑-  ยา  ตชฺชา  อุสฺมา  สา  นิรุชฺฌติ  สา  วูปสมติ
เอวเมว   โข   ภิกฺขเว   สุขเวทนิยํ   ผสฺสํ   ปฏิจฺจ  อุปฺปชฺชติ  สุขา
เวทนา   ตสฺเสว   สุขเวทนิยสฺส   ผสฺสสฺส  นิโรธา  ยํ  ตชฺชํ  เวทยิตํ
สุขเวทนิยํ   ผสฺสํ   ปฏิจฺจ   อุปฺปนฺนา   สุขา   เวทนา   สา  นิรุชฺฌติ
สา   วูปสมติ   ทุกฺขเวทนิยํ   ผสฺสํ   ปฏิจฺจ  อุปฺปชฺชติ  ทุกฺขา  เวทนา
ตสฺเสว    ทุกฺขเวทนิยสฺส    ผสฺสสฺส    นิโรธา   ยํ   ตชฺชํ   เวทยิตํ
ทุกฺขเวทนิยํ   ผสฺสํ   ปฏิจฺจ   อุปฺปนฺนา   ทุกฺขา  เวทนา  สา  นิรุชฺฌติ
สา     วูปสมติ     อทุกฺขมสุขเวทนิยํ     ผสฺสํ    ปฏิจฺจ    อุปฺปชฺชติ
อทุกฺขมสุขา     เวทนา     ตสฺเสว    อทุกฺขมสุขเวทนิยสฺส    ผสฺสสฺส
นิโรธา    ยํ    ตชฺชํ    เวทยิตํ    อทุกฺขมสุขเวทนิยํ   ผสฺสํ   ปฏิจฺจ
อุปฺปนฺนา อทุกฺขมสุขา เวทนา สา นิรุชฺฌติ สา วูปสมติ ฯ
     [๒๓๙]   เอวํ   ปสฺสํ   ภิกฺขเว   สุตวา   อริยสาวโก  ผสฺเสปิ
นิพฺพินฺทติ      เวทนายปิ      นิพฺพินฺทติ      สญฺญายปิ      นิพฺพินฺทติ
สงฺขาเรสุปิ      นิพฺพินฺทติ      วิญฺญาณสฺมึปิ     นิพฺพินฺทติ     นิพฺพินฺทํ
วิรชฺชติ   วิราคา   วิมุจฺจติ   ฯ   วิมุตฺตสฺมึ  วิมุตฺตมิติ  ญาณํ  โหติ  ฯ
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานาตีติ ฯ ทุติยํ ฯ
     [๒๔๐]   สาวตฺถิยํ  วิหรติ  ...  ตตฺร โข ภควา ... จตฺตาโรเม
ภิกฺขเว   อาหารา   ภูตานํ   วา   สตฺตานํ   ฐิติยา   สมฺภเวสีนํ  วา
@เชิงอรรถ:  สี. นานาภวาวินิกฺเขปา ฯ ยุ. นานาภาวา วินิกฺเขปา ฯ
อนุคฺคหาย   ฯ   กตเม  จตฺตาโร  ฯ  กวฬีกาโร  อาหาโร  โอฬาริโก
วา   สุขุโม   วา   ผสฺโส   ทุติโย   มโนสญฺเจตนา   ตติยา  วิญฺญาณํ
จตุตฺถํ  ฯ  อิเม  โข  ภิกฺขเว  จตฺตาโร  อาหารา  ภูตานํ  วา สตฺตานํ
ฐิติยา สมฺภเวสีนํ วา อนุคฺคหาย ฯ
     [๒๔๑]   กถญฺจ   ภิกฺขเว   กวฬีกาโร   อาหาโร  ทฏฺฐพฺโพ  ฯ
เสยฺยถาปิ   ภิกฺขเว   เทฺว   ชายปติกา   ๑-  ปริตฺตํ  สมฺพลํ  อาทาย
กนฺตารมคฺคํ   ปฏิปชฺเชยฺยุํ   เตสมสฺส   เอกปุตฺตโก   ปิโย  มนาโป  ฯ
อถ  โข  เตสํ  ภิกฺขเว  ทฺวินฺนํ  ชายปติกานํ  กนฺตารคตานํ  ยา ปริตฺตา
สมฺพลมตฺตา   สา   ปริกฺขยํ   ปริยาทานํ   คจฺเฉยฺย  สิยา  ปเนส  ๒-
กนฺตาราวเสโส   อนิตฺถิณฺโณ   ๓-  ฯ  อถ  โข  เตสํ  ภิกฺขเว  ทฺวินฺนํ
ชายปติกานํ    เอวมสฺส   อมฺหากํ   โข   ยา   ปริตฺตา   สมฺพลมตฺตา
สา   ปริกฺขีณา   ปริยาทินฺนา   อตฺถิ  จายํ  กนฺตาราวเสโส  อนิตฺถิณฺโณ
ยนฺนูน  มยํ  อิมํ  เอกปุตฺตกํ  ปิยํ  มนาปํ  วธิตฺวา  วลฺลูรญฺจ  โสณฺฑิกญฺจ
กริตฺวา   ปุตฺตมํสานิ   ขาทนฺตา   เอว  เทฺวปิ  ๔-  ตํ  กนฺตาราวเสสํ
นิตฺถเรยฺยาม  โน  เจ  สพฺเพว  ๕-  ตโย  วินสฺสมฺหาติ  ฯ อถ โข เต
ภิกฺขเว   เทฺว   ชายปติกา   เอตํ   เอกปุตฺตกํ   ปิยํ  มนาปํ  วธิตฺวา
วลฺลูรญฺจ    โสณฺฑิกญฺจ    กริตฺวา   ปุตฺตมํสานิ   ขาทนฺตา   เอว   ตํ
กนฺตาราวเสสํ   นิตฺถเรยฺยุํ   เต  ปุตฺตมํสานิ  เจว  ขาเทยฺยุํ  อุเร  จ
ปติปึเสยฺยุํ ๖- กหํ เอกปุตฺตก กหํ เอกปุตฺตกาติ ฯ
     {๒๔๑.๑}   ตํ     กึ     มญฺญถ     ภิกฺขเว     อปิ    นุ
เต     ทวาย     วา     อาหารํ     อาหเรยฺยุํ     มทาย    วา
@เชิงอรรถ:  ม. ยุ. ชายมฺปติกา ฯ เอวมุปริปิ ฯ   ม. ยุ.  จ เนสํ ฯ  ม. อนติณฺโณ ฯ
@เอวมุปริปิ ฯ   ม. ยุ.  เอวํ ตํ ฯ เอวมุปริปิ ฯ    ม. ยุ.  มา สพฺเพว ฯ
@ ม. ปฏิปิเสยฺยุํ ฯ
อาหารํ   อาหเรยฺยุํ  มณฺฑนาย  วา  อาหารํ  อาหเรยฺยุํ  วิภูสนาย  วา
อาหารํ   อาหเรยฺยุนฺติ   ฯ   โน  เหตํ  ภนฺเต  ฯ  นนุ  เต  ภิกฺขเว
ยาวเทว   กนฺตารสฺส   นิตฺถรณตฺถาย   อาหารํ  อาหเรยฺยุนฺติ  ฯ  เอวํ
ภนฺเต   ฯ  เอวเมว  ขฺวาหํ  ภิกฺขเว  กวฬีกาโร  อาหาโร  ทฏฺฐพฺโพติ
วทามิ   ฯ   กวฬีกาเร   ภิกฺขเว  อาหาเร  ปริญฺญาเต  ปญฺจกามคุณิโก
ราโค    ปริญฺญาโต    โหติ    ปญฺจกามคุณิเก    ราเค    ปริญฺญาเต
นตฺถิ    ตํ    สญฺโญชนํ   เยน   สญฺโญชเนน   สญฺญุตฺโต   อริยสาวโก
ปุน อิมํ โลกํ อาคจฺเฉยฺย ฯ
     [๒๔๒]   กถญฺจ   ภิกฺขเว  ผสฺสาหาโร  ทฏฺฐพฺโพ  ฯ  เสยฺยถาปิ
ภิกฺขเว   คาวี   นิจฺจมฺมา   กุฑฺฑญฺเจ   ๑-   นิสฺสาย   ติฏฺเฐยฺย  เย
กุฑฺฑนิสฺสิตา   ปาณา   เต   นํ  ขาเทยฺยุํ  รุกฺขญฺเจ  นิสฺสาย  ติฏฺเฐยฺย
เย   รุกฺขนิสฺสิตา   ปาณา   เต   นํ   ขาเทยฺยุํ   อุทกญฺเจ   นิสฺสาย
ติฏฺเฐยฺย   เย   อุทกนิสฺสิตา   ปาณา   เต  นํ  ขาเทยฺยุํ  อากาสญฺเจ
นิสฺสาย   ติฏฺเฐยฺย   เย   อากาสนิสฺสิตา   ปาณา   เต  นํ  ขาเทยฺยุํ
ยญฺญเทว   หิ   สา   ภิกฺขเว  คาวี  นิจฺจมฺมา  นิสฺสาย  ติฏฺเฐยฺย  เย
ตํ   นิสฺสิตา   ตํ  นิสฺสิตา  ปาณา  เต  นํ  ขาเทยฺยุํ  เอวเมว  ขฺวาหํ
ภิกฺขเว   ผสฺสาหาโร  ทฏฺฐพฺโพติ  วทามิ  ฯ  ผสฺเส  ภิกฺขเว  อาหาเร
ปริญฺญาเต    ติสฺโส    เวทนา   ปริญฺญาตา   โหนฺติ   ตีสุ   เวทนาสุ
ปริญฺญาตาสุ อริยสาวกสฺส นตฺถิ กิญฺจิ อุตฺตริกรณียนฺติ วทามิ ฯ
     [๒๔๓]   กถญฺจ   ภิกฺขเว   มโนสญฺเจตนาหาโร   ทฏฺฐพฺโพ   ฯ
@เชิงอรรถ:  ม. กุฏฺฏํ เจ ฯ
เสยฺยถาปิ      ภิกฺขเว      องฺคารกาสุ     สาธิกโปริสา     ปุณฺณา
องฺคารานํ     วีตจฺจิกานํ    วีตธูมานํ    อถ    ปุริโส    อาคจฺเฉยฺย
ชีวิตุกาโม      อมริตุกาโม     สุขกาโม     ทุกฺขปฏิกฺกูโล     ตเมนํ
เทฺว   พลวนฺโต   ปุริสา   นานาพาหาสุ   คเหตฺวา   ตํ   องฺคารกาสุํ
อุปกฑฺเฒยฺยุํ   ฯ   อถ   โข   ภิกฺขเว   ตสฺส   ปุริสสฺส   อารกาวสฺส
เจตนา  อารกาว  ปตฺถนา  อารกา  ปณิธิ  ตํ  กิสฺส  เหตุ  วิทิตญฺหิ ๑-
ภิกฺขเว   ตสฺส   ปุริสสฺส   โหติ   อิมญฺจาหํ   องฺคารกาสุํ   ปปติสฺสามิ
ตโตนิทานํ   มรณํ   วา   นิคจฺฉามิ   มรณมตฺตํ  วา  ทุกฺขนฺติ  เอวเมว
ขฺวาหํ    ภิกฺขเว    มโนสญฺเจตนาหาโร    ทฏฺฐพฺโพติ    วทามิ    ฯ
มโนสญฺเจตนาย    ภิกฺขเว    อาหาเร    ปริญฺญาเต   ติสฺโส   ตณฺหา
ปริญฺญาตา    โหนฺติ    ตีสุ    ตณฺหาสุ    ปริญฺญาตาสุ    อริยสาวกสฺส
นตฺถิ กิญฺจิ อุตฺตริกรณียนฺติ วทามิ ฯ
     [๒๔๔]   กถญฺจ  ภิกฺขเว  วิญฺญาณาหาโร  ทฏฺฐพฺโพ  ฯ  เสยฺยถาปิ
ภิกฺขเว  โจรํ  อาคุจารึ  คเหตฺวา  รญฺโญ  ทสฺเสสุํ  ๒-  อยนฺเต  เทว
โจโร   อาคุจารี   อิมสฺส   ยํ   อิจฺฉสิ   ตํ   ทณฺฑํ   ปเณหีติ  ตเมนํ
ราชา    เอวํ    วเทยฺย    คจฺฉถ   โภ   อิมํ   ปุริสํ   ปุพฺพณฺหสมยํ
สตฺติสเตน    หนถาติ    ตเมนํ    ปุพฺพณฺหสมยํ    สตฺติสเตน   หเนยฺยุํ
อถ   ราชา   มชฺฌนฺติกสมยํ   เอวํ  วเทยฺย  อมฺโภ  กถํ  โส  ปุริโสติ
ตเถว  เทว  ชีวตีติ  ตเมนํ  ราชา  เอวํ  วเทยฺย  คจฺฉถ  โภ ตํ ปุริสํ
มชฺฌนฺติกสมยํ      สตฺติสเตน     หนถาติ     ตเมนํ     มชฺฌนฺติกสมยํ
สตฺติสเตน   หเนยฺยุํ   อถ   ราชา  สายณฺหสมยํ  เอวํ  วเทยฺย  อมฺโภ
@เชิงอรรถ:  ม. ยุ. เอวํ หิ ฯ   ม. ยุ. ทสฺเสยฺยุํ ฯ
กถํ   โส  ปุริโสติ  ตเถว  เทว  ชีวตีติ  ตเมนํ  ราชา  เอวํ  วเทยฺย
คจฺฉถ   โภ   ตํ   ปุริสํ   สายณฺหสมยํ   สตฺติสเตน   หนถาติ   ตเมนํ
สายณฺหสมยํ   สตฺติสเตน   หเนยฺยุํ   ฯ   ตํ   กึ  มญฺญถ  ภิกฺขเว  อปิ
นุ   โข   โส   ปุริโส   ทิวสํ  ตีหิ  สตฺติสเตหิ  หญฺญมาโน  ตโตนิทานํ
ทุกฺขํ    โทมนสฺสํ    ปฏิสํเวทเยถาติ    เอกิสฺสาปิ   ภิกฺขเว   สตฺติยา
หญฺญมาโน    ตโตนิทานํ   ทุกฺขํ   โทมนสฺสํ   ปฏิสํเวทเยถ   โก   ปน
วาโท    ตีหิ   สตฺติสเตหิ   หญฺญมาโนติ   เอวเมว   ขฺวาหํ   ภิกฺขเว
วิญฺญาณาหาโร   ทฏฺฐพฺโพติ   วทามิ   ฯ   วิญฺญาเณ  ภิกฺขเว  อาหาเร
ปริญฺญาเต     นามรูปํ    ปริญฺญาตํ    โหติ    นามรูเป    ปริญฺญาเต
อริยสาวกสฺส นตฺถิ กิญฺจิ อุตฺตริกรณียนฺติ วทามีติ ฯ ตติยํ ฯ
     [๒๔๕]   สาวตฺถิยํ  วิหรติ  ...  ตตฺร โข ภควา ... จตฺตาโรเม
ภิกฺขเว   อาหารา   ภูตานํ   วา   สตฺตานํ   ฐิติยา   สมฺภเวสีนํ  วา
อนุคฺคหาย   ฯ   กตเม  จตฺตาโร  ฯ  กวฬีกาโร  อาหาโร  โอฬาริโก
วา   สุขุโม   วา   ผสฺโส   ทุติโย   มโนสญฺเจตนา   ตติยา  วิญฺญาณํ
จตุตฺถํ  ฯ  อิเม  โข  ภิกฺขเว  จตฺตาโร  อาหารา  ภูตานํ  วา สตฺตานํ
ฐิติยา สมฺภเวสีนํ วา อนุคฺคหาย ฯ
     [๒๔๖]   กวฬีกาเร  เจ  ภิกฺขเว  อาหาเร  อตฺถิ  ราโค  อตฺถิ
นนฺทิ    อตฺถิ    ตณฺหา    ปติฏฺฐิตํ    ตตฺถ   วิญฺญาณํ   วิรูฬฺหํ   ยตฺถ
ปติฏฺฐิตํ    วิญฺญาณํ    วิรูฬฺหํ    อตฺถิ    ตตฺถ   นามรูปสฺส   อวกฺกนฺติ
ยตฺถ   อตฺถิ   นามรูปสฺส   อวกฺกนฺติ   อตฺถิ   ตตฺถ   สงฺขารานํ  วุฑฺฒิ
ยตฺถ   อตฺถิ   สงฺขารานํ   วุฑฺฒิ  อตฺถิ  ตตฺถ  อายตึ  ปุนพฺภวาภินิพฺพตฺติ
ยตฺถ    อตฺถิ    อายตึ    ปุนพฺภวาภินิพฺพตฺติ    อตฺถิ    ตตฺถ   อายตึ
ชาติชรามรณํ   ยตฺถ   อตฺถิ   อายตึ   ชาติชรามรณํ   ฯ   สโสกํ   ตํ
ภิกฺขเว สรชํ สอุปายาสนฺติ วทามิ ฯ
     {๒๔๖.๑}   ผสฺเส  เจ  ภิกฺขเว อาหาเร ... มโนสญฺเจตนาย เจ
ภิกฺขเว  อาหาเร  ...  วิญฺญาเณ  เจ  ภิกฺขเว  อาหาเร  อตฺถิ ราโค
อตฺถิ   นนฺทิ   อตฺถิ   ตณฺหา   ปติฏฺฐิตํ   ตตฺถ   วิญฺญาณํ  วิรูฬฺหํ  ยตฺถ
ปติฏฺฐิตํ    วิญฺญาณํ    วิรูฬฺหํ    อตฺถิ    ตตฺถ   นามรูปสฺส   อวกฺกนฺติ
ยตฺถ   อตฺถิ   นามรูปสฺส   อวกฺกนฺติ   อตฺถิ   ตตฺถ   สงฺขารานํ  วุฑฺฒิ
ยตฺถ   อตฺถิ   สงฺขารานํ   วุฑฺฒิ  อตฺถิ  ตตฺถ  อายตึ  ปุนพฺภวาภินิพฺพตฺติ
ยตฺถ    อตฺถิ    อายตึ    ปุนพฺภวาภินิพฺพตฺติ    อตฺถิ    ตตฺถ   อายตึ
ชาติชรามรณํ   ยตฺถ   อตฺถิ   อายตึ   ชาติชรามรณํ   ฯ   สโสกํ   ตํ
ภิกฺขเว สรชํ สอุปายาสนฺติ วทามิ ฯ
     [๒๔๗]   เสยฺยถาปิ  ภิกฺขเว  รชโก  วา  จิตฺตการโก  วา  สติ
รชนาย  วา  ลาขาย  วา  หลิทฺทิยา  วา  นีลิยา  วา  มญฺชิฏฺฐาย  วา
สุมฏฺเฏ  ๑-  วา  ผลเก  วา  ภิตฺติยา  วา  ทุสฺสปเฏ  วา อิตฺถีรูปํ วา
ปุริสรูปํ   วา   อภินิมฺมิเนยฺย   สพฺพงฺคปจฺจงฺคํ   เอวเมว  โข  ภิกฺขเว
กวฬีกาเร   เจ   อาหาเร   อตฺถิ   ราโค  อตฺถิ  นนฺทิ  อตฺถิ  ตณฺหา
ปติฏฺฐิตํ   ตตฺถ   วิญฺญาณํ   วิรูฬฺหํ   ยตฺถ   ปติฏฺฐิตํ   วิญฺญาณํ   วิรูฬฺหํ
อตฺถิ   ตตฺถ   นามรูปสฺส   อวกฺกนฺติ  ยตฺถ  อตฺถิ  นามรูปสฺส  อวกฺกนฺติ
อตฺถิ   ตตฺถ   สงฺขารานํ   วุฑฺฒิ   ยตฺถ  อตฺถิ  สงฺขารานํ  วุฑฺฒิ  อตฺถิ
@เชิงอรรถ:  ม. ยุ. สุปริมฏฺเฐ วา ฯ
ตตฺถ      อายตึ     ปุนพฺภวาภินิพฺพตฺติ     ยตฺถ     อตฺถิ     อายตึ
ปุนพฺภวาภินิพฺพตฺติ     อตฺถิ    ตตฺถ    อายตึ    ชาติชรามรณํ    ยตฺถ
อตฺถิ    อายตึ    ชาติชรามรณํ    ฯ    สโสกํ   ตํ   ภิกฺขเว   สรชํ
สอุปายาสนฺติ วทามิ ฯ
     {๒๔๗.๑}   ผสฺเส เจ ภิกฺขเว อาหาเร ... มโนสญฺเจตนาย เจ ภิกฺขเว
อาหาเร  ...  วิญฺญาเณ  เจ  ภิกฺขเว  อาหาเร อตฺถิ ราโค อตฺถิ นนฺทิ
อตฺถิ   ตณฺหา   ปติฏฺฐิตํ  ตตฺถ  วิญฺญาณํ  วิรูฬฺหํ  ยตฺถ  ปติฏฺฐิตํ  วิญฺญาณํ
วิรูฬฺหํ   อตฺถิ   ตตฺถ   นามรูปสฺส   อวกฺกนฺติ   ยตฺถ  อตฺถิ  นามรูปสฺส
อวกฺกนฺติ   อตฺถิ   ตตฺถ   สงฺขารานํ   วุฑฺฒิ   ยตฺถ   อตฺถิ  สงฺขารานํ
วุฑฺฒิ   อตฺถิ   ตตฺถ   อายตึ   ปุนพฺภวาภินิพฺพตฺติ   ยตฺถ   อตฺถิ  อายตึ
ปุนพฺภวาภินิพฺพตฺติ   อตฺถิ   ตตฺถ   อายตึ   ชาติชรามรณํ   ยตฺถ   อตฺถิ
อายตึ ชาติชรามรณํ ฯ สโสกํ ตํ ภิกฺขเว สรชํ สอุปายาสนฺติ วทามิ ฯ
     [๒๔๘]   กวฬีกาเร  เจ  ภิกฺขเว  อาหาเร  นตฺถิ  ราโค  นตฺถิ
นนฺทิ    นตฺถิ   ตณฺหา   อปฺปติฏฺฐิตํ   ตตฺถ   วิญฺญาณํ   อวิรูฬฺหํ   ยตฺถ
อปฺปติฏฺฐิตํ    วิญฺญาณํ   อวิรูฬฺหํ   นตฺถิ   ตตฺถ   นามรูปสฺส   อวกฺกนฺติ
ยตฺถ   นตฺถิ   นามรูปสฺส   อวกฺกนฺติ   นตฺถิ   ตตฺถ   สงฺขารานํ  วุฑฺฒิ
ยตฺถ   นตฺถิ   สงฺขารานํ   วุฑฺฒิ  นตฺถิ  ตตฺถ  อายตึ  ปุนพฺภวาภินิพฺพตฺติ
ยตฺถ    นตฺถิ    อายตึ    ปุนพฺภวาภินิพฺพตฺติ    นตฺถิ    ตตฺถ   อายตึ
ชาติชรามรณํ  ยตฺถ  นตฺถิ  อายตึ  ชาติชรามรณํ  ฯ  อโสกํ  ตํ  ภิกฺขเว
อรชํ อนุปายาสนฺติ วทามิ ฯ
     {๒๔๘.๑}   ผสฺเส  เจ  ภิกฺขเว  อาหาเร  ...  มโนสญฺเจตนาย
เจ     ภิกฺขเว     อาหาเร    ...    วิญฺญาเณ    เจ    ภิกฺขเว
อาหาเร    นตฺถิ   ราโค   นตฺถิ   นนฺทิ   นตฺถิ   ตณฺหา   อปฺปติฏฺฐิตํ
ตตฺถ    วิญฺญาณํ    อวิรูฬฺหํ    ยตฺถ    อปฺปติฏฺฐิตํ   วิญฺญาณํ   อวิรูฬฺหํ
นตฺถิ    ตตฺถ    นามรูปสฺส    อวกฺกนฺติ    ยตฺถ    นตฺถิ   นามรูปสฺส
อวกฺกนฺติ   นตฺถิ   ตตฺถ   สงฺขารานํ   วุฑฺฒิ   ยตฺถ   นตฺถิ  สงฺขารานํ
วุฑฺฒิ    นตฺถิ    ตตฺถ    อายตึ    ปุนพฺภวาภินิพฺพตฺติ    ยตฺถ    นตฺถิ
อายตึ    ปุนพฺภวาภินิพฺพตฺติ    นตฺถิ    ตตฺถ    อายตึ    ชาติชรามรณํ
ยตฺถ   นตฺถิ   อายตึ   ชาติชรามรณํ   ฯ   อโสกํ   ตํ  ภิกฺขเว  อรชํ
อนุปายาสนฺติ วทามิ ฯ
     [๒๔๙]   เสยฺยถาปิ  ภิกฺขเว  กูฏาคารํ  วา  กูฏาคารสาลา  วา
อุตฺตราย  วา  ทกฺขิณาย  วา  ปาจินวาตปานา  ๑-  สุริเย  อุคฺคจฺฉนฺเต
วาตปาเนน    รสฺมิ   ปวิสิตฺวา   กฺวาสฺส   ปติฏฺฐิตาติ   ฯ   ปจฺฉิมายํ
ภนฺเต   ภิตฺติยนฺติ   ฯ   ปจฺฉิมาย  เจ  ภิกฺขเว  ภิตฺติ  นาสฺส  กฺวาสฺส
ปติฏฺฐิตาติ  ฯ  ปฐวิยํ  ภนฺเตติ  ฯ  ปฐวี  เจ  ภิกฺขเว  นาสฺส  กฺวาสฺส
ปติฏฺฐิตาติ   ฯ   อาปสฺมึ   ภนฺเตติ   ฯ   อาโป  เจ  ภิกฺขเว  นาสฺส
กฺวาสฺส   ปติฏฺฐิตาติ   ฯ   อปฺปติฏฺฐิตา   ภนฺเตติ   ฯ   เอวเมว  โข
ภิกฺขเว   กวฬีกาเร   เจ   อาหาเร  นตฺถิ  ราโค  นตฺถิ  นนฺทิ  นตฺถิ
ตณฺหา  ... ผสฺเส เจ ภิกฺขเว อาหาเร ... มโนสญฺเจตนาย เจ ภิกฺขเว
อาหาเร  ...  วิญฺญาเณ  เจ  ภิกฺขเว  อาหาเร นตฺถิ ราโค นตฺถิ นนฺทิ
นตฺถิ   ตณฺหา   อปฺปติฏฺฐิตํ   ตตฺถ   วิญฺญาณํ  อวิรูฬฺหํ  ยตฺถ  อปฺปติฏฺฐิตํ
วิญฺญาณํ   อวิรูฬฺหํ   นตฺถิ   ตตฺถ   นามรูปสฺส   อวกฺกนฺติ   ยตฺถ  นตฺถิ
นามรูปสฺส   อวกฺกนฺติ   นตฺถิ   ตตฺถ   สงฺขารานํ   วุฑฺฒิ   ยตฺถ  นตฺถิ
@เชิงอรรถ:  ม. ยุ. ปาจีนาย วา วาตปานา ฯ
สงฺขารานํ    วุฑฺฒิ    นตฺถิ   ตตฺถ   อายตึ   ปุนพฺภวาภินิพฺพตฺติ   ยตฺถ
นตฺถิ   อายตึ   ปุนพฺภวาภินิพฺพตฺติ   นตฺถิ   ตตฺถ   อายตึ  ชาติชรามรณํ
ยตฺถ   นตฺถิ   อายตึ   ชาติชรามรณํ   ฯ   อโสกํ   ตํ  ภิกฺขเว  อรชํ
อนุปายาสนฺติ วทามีติ ฯ จตุตฺถํ ฯ
     [๒๕๐]   สาวตฺถิยํ วิหรติ ... ตตฺร โข ภควา ... ปุพฺเพว ๑- เม
ภิกฺขเว   สมฺโพธา   อนภิสมฺพุทฺธสฺส   โพธิสตฺตสฺเสว   สโต  เอตทโหสิ
กิจฺฉํ  วตายํ  โลโก  อาปนฺโน  ชายติ  จ  ชิยฺยติ  จ  มิยฺยติ จ จวติ จ
อุปปชฺชติ   จ   อถ   จ   ปนิมสฺส   ทุกฺขสฺส    นิสฺสรณํ   นปฺปชานาติ
ชรามรณสฺส     กุทาสฺสุ     นาม     อิมสฺส     ทุกฺขสฺส     นิสฺสรณํ
ปญฺญายิสฺสติ ชรามรณสฺสาติ ฯ
     [๒๕๑]   ตสฺส   มยฺหํ   ภิกฺขเว  เอตทโหสิ  กิมฺหิ  นุ  โข  สติ
ชรามรณํ   โหติ   กึปจฺจยา   ชรามรณนฺติ   ฯ   ตสฺส   มยฺหํ  ภิกฺขเว
โยนิโสมนสิการา    อหุ    ปญฺญาย    อภิสมโย   ชาติยา   โข   สติ
ชรามรณํ   โหติ   ชาติปจฺจยา   ชรามรณนฺติ   ฯ  ตสฺส  มยฺหํ  ภิกฺขเว
เอตทโหสิ   กิมฺหิ  นุ  โข  สติ  ชาติ  โหติ  ฯเปฯ  ภโว  โหติ  ...
อุปาทานํ  โหติ ... ตณฺหา โหติ ... เวทนา โหติ ... ผสฺโส โหติ ...
สฬายตนํ   โหติ   ...  นามรูปํ  โหติ  กึปจฺจยา  นามรูปนฺติ  ฯ  ตสฺส
มยฺหํ   ภิกฺขเว   โยนิโสมนสิการา   อหุ   ปญฺญาย  อภิสมโย  วิญฺญาเณ
โข   สติ   นามรูปํ   โหติ  วิญฺญาณปจฺจยา  นามรูปนฺติ  ฯ  ตสฺส  มยฺหํ
ภิกฺขเว   เอตทโหสิ   กิมฺหิ   นุ   โข   สติ  วิญฺญาณํ  โหติ  กึปจฺจยา
@เชิงอรรถ:  ม. ยุ. ปุพฺเพ ฯ
วิญฺญาณนฺติ    ฯ    ตสฺส    มยฺหํ    ภิกฺขเว   โยนิโสมนสิการา   อหุ
ปญฺญาย     อภิสมโย     นามรูเป    โข    สติ    วิญฺญาณํ    โหติ
นามรูปปจฺจยา วิญฺญาณนฺติ ฯ
     {๒๕๑.๑}   ตสฺส   มยฺหํ   ภิกฺขเว   เอตทโหสิ   ปจฺจุทาวตฺตติ
โข    อิทํ    วิญฺญาณํ   นามรูปมฺหา   น   ปรํ   คจฺฉติ   เอตฺตาวตา
ชาเยถ  วา  ชิยฺเยถ  วา  มิยฺเยถ  ๑-  วา  จเวถ วา อุปปชฺเชถ วา
ยทิทํ      นามรูปปจฺจยา      วิญฺญาณํ     วิญฺญาณปจฺจยา     นามรูปํ
นามรูปปจฺจยา   สฬายตนํ   สฬายตนปจฺจยา  ผสฺโส  ฯเปฯ  เอวเมตสฺส
เกวลสฺส   ทุกฺขกฺขนฺธสฺส   สมุทโย   โหติ   ฯ  สมุทโย  สมุทโยติ  โข
เม   ภิกฺขเว   ปุพฺเพ   อนนุสฺสุเตสุ   ธมฺเมสุ   จกฺขุํ   อุทปาทิ  ญาณํ
อุทปาทิ ปญฺญา อุทปาทิ วิชฺชา อุทปาทิ อาโลโก อุทปาทิ ฯ
     [๒๕๒]   ตสฺส   มยฺหํ  ภิกฺขเว  เอตทโหสิ  กิมฺหิ  นุ  โข  อสติ
ชรามรณํ   น   โหติ   กิสฺส   นิโรธา   ชรามรณนิโรโธติ   ฯ   ตสฺส
มยฺหํ   ภิกฺขเว   โยนิโสมนสิการา   อหุ   ปญฺญาย   อภิสมโย  ชาติยา
โข   อสติ   ชรามรณํ   น   โหติ   ชาตินิโรธา  ชรามรณนิโรโธติ  ฯ
ตสฺส   มยฺหํ   ภิกฺขเว   เอตทโหสิ   กิมฺหิ   นุ   โข  อสติ  ชาติ  น
โหติ  ฯเปฯ  ภโว  น  โหติ  ...  อุปาทานํ  น  โหติ  ... ตณฺหา น
โหติ  ...  เวทนา  น  โหติ  ...  ผสฺโส  น  โหติ ... สฬายตนํ น
โหติ   ...   นามรูปํ   น   โหติ  กิสฺส  นิโรธา  นามรูปนิโรโธติ  ฯ
ตสฺส    มยฺหํ   ภิกฺขเว   โยนิโสมนสิการา   อหุ   ปญฺญาย   อภิสมโย
วิญฺญาเณ     โข    อสติ    นามรูปํ    น    โหติ    วิญฺญาณนิโรธา
@เชิงอรรถ:  ยุ. มาเยถ ฯ
นามรูปนิโรโธติ   ฯ   ตสฺส   มยฺหํ   ภิกฺขเว   เอตทโหสิ   กิมฺหิ   นุ
โข    อสติ   วิญฺญาณํ   น   โหติ   กิสฺส   นิโรธา   วิญฺญาณนิโรโธติ
ตสฺส    มยฺหํ   ภิกฺขเว   โยนิโสมนสิการา   อหุ   ปญฺญาย   อภิสมโย
นามรูเป     โข    อสติ    วิญฺญาณํ    น    โหติ    นามรูปนิโรธา
วิญฺญาณนิโรโธติ ฯ
     {๒๕๒.๑}   ตสฺส  มยฺหํ  ภิกฺขเว  เอตทโหสิ  อธิคโต  โข  มฺยายํ
มคฺโค   โพธาย   ยทิทํ   นามรูปนิโรธา  วิญฺญาณนิโรโธ  วิญฺญาณนิโรธา
นามรูปนิโรโธ     นามรูปนิโรธา    สฬายตนนิโรโธ    สฬายตนนิโรธา
ผสฺสนิโรโธ    ฯเปฯ   อวเมตสฺส   เกวลสฺส   ทุกฺขกฺขนฺธสฺส   นิโรโธ
โหติ   ฯ   นิโรโธ   นิโรโธติ  โข  เม  ภิกฺขเว  ปุพฺเพ  อนนุสฺสุเตสุ
ธมฺเมสุ   จกฺขุํ   อุทปาทิ   ญาณํ   อุทปาทิ   ปญฺญา   อุทปาทิ   วิชฺชา
อุทปาทิ อาโลโก อุทปาทิ ฯ
     [๒๕๓]   เสยฺยถาปิ   ภิกฺขเว  ปุริโส  อรญฺเญ  ปวเน  จรมาโน
ปสฺเสยฺย   ปุราณมคฺคํ   ปุราณญฺชสํ   ปุพฺพเกหิ   มนุสฺเสหิ   อนุยาตํ  ฯ
โส   ตมนุคจฺเฉยฺย   ตมนุคจฺฉนฺโต   ปสฺเสยฺย   ปุราณํ   นครํ   ปุราณํ
ราชธานึ    ปุพฺพเกหิ    มนุสฺเสหิ    อชฺฌาวุตฺถํ   ๑-   อารามสมฺปนฺนํ
วนสมฺปนฺนํ     โปกฺขรณีสมฺปนฺนํ     อุทฺทาปวนฺตํ    ๒-    รมณียํ    ฯ
อถ    โข   โส   ภิกฺขเว   ปุริโส  รญฺโญ  วา  ราชมหามตฺตสฺส  วา
อาโรเจยฺย     ยคฺเฆ   ภนฺเต   ชาเนยฺยาสิ   อหํ   อทฺทสํ   อรญฺเญ
ปวเน       จรมาโน      ปุราณมคฺคํ      ปุราณญฺชสํ      ปุพฺพเกหิ
มนุสฺเสหิ     อนุยาตํ     โส     ๓-     ตมนุคจฺฉึ     ตมนุคจฺฉนฺโต
อทฺทสํ    ปุราณํ    นครํ    ปุราณํ    ราชธานึ   ปุพฺพเกหิ   มนุสฺเสหิ
@เชิงอรรถ:  ม. อชฺฌาวุฏฺฐํ ฯ เอวมุปริปิ ฯ   ม. อุทฺธาปวนฺตํ ฯ
@ ม. ยุ. อยํ สทฺโท นตฺถิ ฯ
อชฺฌาวุตฺถํ       อารามสมฺปนฺนํ       วนสมฺปนฺนํ      โปกฺขรณีสมฺปนฺนํ
อุทฺทาปวนฺตํ   รมณียํ   ตํ   ภนฺเต   นครํ   มาเปหีติ   ฯ  อถโข  โส
ภิกฺขเว   ราชา   วา  ราชมหามตฺโต  วา  ตํ  นครํ  มาเปยฺย  ตทสฺส
นครํ  อปเรน  สมเยน  อิทฺธํ  เจว  ผีตํ  จ  พหุชญฺญํ  ๑- อากิณฺณมนุสฺสํ
วุฑฺฒิเวปุลฺลปฺปตฺตํ   ฯ   เอวเมว   ขฺวาหํ   ภิกฺขเว  อทฺทสํ  ปุราณมคฺคํ
ปุราณญฺชสํ ปุพฺพเกหิ สมฺมาสมฺพุทฺเธหิ อนุยาตํ ฯ
     {๒๕๓.๑}   กตโม   จ   โส  ภิกฺขเว  ปุราณมคฺโค  ปุราณญฺชโส
ปุพฺพเกหิ   สมฺมาสมฺพุทฺเธหิ   อนุยาโต   ฯ  อยเมว  อริโย  อฏฺฐงฺคิโก
มคฺโค  เสยฺยถีทํ  สมฺมาทิฏฺฐิ  ฯเปฯ  สมฺมาสมาธิ  ฯ อยํ โข โส ภิกฺขเว
ปุราณมคฺโค   ปุราณญฺชโส   ปุพฺพเกหิ   สมฺมาสมฺพุทฺเธหิ   อนุยาโต  โส
ตมนุคจฺฉึ     ตมนุคจฺฉนฺโต    ชรามรณํ    อพฺภญฺญาสึ    ชรามรณสมุทยํ
อพฺภญฺญาสึ      ชรามรณนิโรธํ      อพฺภญฺญาสึ     ชรามรณนิโรธคามินึ
ปฏิปทํ   อพฺภญฺญาสึ   ตมนุคจฺฉึ   ตมนุคจฺฉนฺโต  ชาตึ  อพฺภญฺญาสึ  ฯเปฯ
ภวํ  อพฺภญฺญาสึ  ...  อุปาทานํ  อพฺภญฺญาสึ  ...  ตณฺหํ อพฺภญฺญาสึ ...
เวทนํ  อพฺภญฺญาสึ  ...  ผสฺสํ  อพฺภญฺญาสึ ... สฬายตนํ อพฺภญฺญาสึ ...
นามรูปํ     อพฺภญฺญาสึ     ...    วิญฺญาณํ    อพฺภญฺญาสึ    ตมนุคจฺฉึ
ตมนุคจฺฉนฺโต     สงฺขาเร    อพฺภญฺญาสึ    สงฺขารสมุทยํ    อพฺภญฺญาสึ
สงฺขารนิโรธํ    อพฺภญฺญาสึ    สงฺขารนิโรธคามินึ    ปฏิปทํ   อพฺภญฺญาสึ
ตทภิญฺญาย   อาจิกฺขึ   ภิกฺขูนํ  ภิกฺขุนีนํ  อุปาสกานํ  อุปาสิกานํ  ฯ  ตยิทํ
@เชิงอรรถ:  ม. พาหุชญฺญํ ฯ ยุ. พหุชนํ ฯ เอวมุปริปิ ฯ
ภิกฺขเว    พฺรหฺมจริยํ    อิทฺธํ   เจว   ผีตํ   จ   วิตฺถาริกํ   พหุชญฺญํ
ปุถุภูตํ ยาว เทวมนุสฺเสหิ สุปกาสิตนฺติ ฯ ปญฺจมํ ฯ
     [๒๕๔]   เอวมฺเม   สุตํ   เอกํ   สมยํ   ภควา   กุรูสุ  วิหรติ
กมฺมาสทมฺมํ  นาม  กุรูนํ  นิคโม  ฯ  ตตฺร  โข  ภควา  ภิกฺขู อามนฺเตสิ
ภิกฺขโวติ   ฯ   ภทนฺเตติ   เต   ภิกฺขู  ภควโต  ปจฺจสฺโสสุํ  ฯ  ภควา
เอตทโวจ   สมฺมสถ   โน   ตุเมฺห   ภิกฺขเว   อนฺตรํ   สมฺมสนฺติ   ฯ
เอวํ   วุตฺเต   อญฺญตโร   ภิกฺขุ  ภควนฺตํ  เอตทโวจ  อหํ  โข  ภนฺเต
สมฺมสามิ   อนฺตรํ   สมฺมสนฺติ   ฯ   ยถากถํ   ปน  ตฺวํ  ภิกฺขุ  สมฺมสสิ
อนฺตรํ   สมฺมสนฺติ   ฯ   อถ   โข   โส   ภิกฺขุ  พฺยากาสิ  ยถา  โส
ภิกฺขุ พฺยากาสิ น โส ภิกฺขุ ภควโต จิตฺตํ อาราเธสิ ฯ
     [๒๕๕]   เอวํ   วุตฺเต  อายสฺมา  อานนฺโท  ภควนฺตํ  เอตทโวจ
เอตสฺส   ภควา   กาโล   เอตสฺส   สุคต   กาโล  ยํ  ภควา  อนฺตรํ
สมฺมสํ   ภาเสยฺย  ภควโต  สุตฺวา  ภิกฺขู  ธาเรสฺสนฺตีติ  ฯ  เตนหานนฺท
สุณาถ   สาธุกํ   มนสิกโรถ   ภาสิสฺสามีติ  ฯ  เอวํ  ภนฺเตติ  โข  เต
ภิกฺขู ภควโต ปจฺจสฺโสสุํ ฯ
     [๒๕๖]   ภควา   เอตทโวจ   อิธ   ภิกฺขเว  ภิกฺขุ  สมฺมสมาโน
สมฺมสติ    อนฺตรํ   สมฺมสํ   ยํ   โข   อิทํ   อเนกวิธํ   นานปฺปการกํ
ทุกฺขํ   โลเก   อุปฺปชฺชติ   ชรามรณํ  อิทํ  นุ  ๑-  โข  ทุกฺขํ  กึนิทานํ
กึสมุทยํ   กึชาติกํ   กึปภวํ   กิสฺมึ   สติ   ชรามรณํ   โหตีติ   ฯ  โส
สมฺมสมาโน   เอวํ   ชานาติ   ยํ   โข   อิทํ  อเนกวิธํ  นานปฺปการกํ
@เชิงอรรถ:  ม. ยุ. นุสทฺโท นตฺถิ ฯ
ทุกฺขํ    โลเก   อุปฺปชฺชติ   ชรามรณํ   อิทํ   โข   ทุกฺขํ   อุปธินิทานํ
อุปธิสมุทยํ   อุปธิชาติกํ   อุปธิปฺปภวํ   อุปธิสฺมึ   สติ   ชรามรณํ   โหติ
อุปธิสฺมึ   อสติ   ชรามรณํ   น  โหตีติ  ฯ  โส  ชรามรณญฺจ  ปชานาติ
ชรามรณสมุทยญฺจ     ปชานาติ    ชรามรณนิโรธญฺจ    ปชานาติ    ยา
จ    ชรามรณนิโรธสารุปฺปคามินี    ปฏิปทา    ตญฺจ   ปชานาติ   ตถา
ปฏิปนฺโน   จ   โหติ   อนุธมฺมจารี   ฯ   อยํ   วุจฺจติ  ภิกฺขเว  ภิกฺขุ
สพฺพโส สมฺมา ทุกฺขกฺขยาย ปฏิปนฺโน ชรามรณนิโรธาย ฯ
     [๒๕๗]   อถาปรํ   สมฺมสมาโน   สมฺมสติ   อนฺตรํ  สมฺมสํ  อุปธิ
ปนายํ   กึนิทาโน   กึสมุทโย   กึชาติโก   กึปภโว   กึสฺมึ   สติ  อุปธิ
โหติ   กิสฺมึ   อสติ   อุปธิ   น   โหตีติ   ฯ  โส  สมฺมสมาโน  เอวํ
ชานาติ     อุปธิ     ตณฺหานิทาโน     ตณฺหาสมุทโย     ตณฺหาชาติโก
ตณฺหาปภโว   ตณฺหาย   สติ   อุปธิ   โหติ   ตณฺหาย   อสติ  อุปธิ  น
โหตีติ    ฯ    โส    อุปธิญฺจ    ปชานาติ   อุปธิสมุทยญฺจ   ปชานาติ
อุปธินิโรธญฺจ    ปชานาติ   ยา   จ   อุปธินิโรธสารุปฺปคามินี   ปฏิปทา
ตญฺจ  ปชานาติ  ตถา  ปฏิปนฺโน  จ  โหติ  อนุธมฺมจารี  ฯ  อยํ  วุจฺจติ
ภิกฺขเว ภิกฺขุ สพฺพโส สมฺมา ทุกฺขกฺขยาย ปฏิปนฺโน อุปธินิโรธาย ฯ
     [๒๕๘]   อถาปรํ   สมฺมสมาโน   สมฺมสติ  อนฺตรํ  สมฺมสํ  ตณฺหา
ปนายํ  กตฺถ  อุปฺปชฺชมานา  อุปฺปชฺชติ  กตฺถ  นิวีสมานา  นิวีสตีติ  ๑- ฯ
โส   สมฺมสมาโน   เอวํ   ชานาติ   ยํ   โข  โลเก  ปิยรูปํ  สาตรูปํ
เอตฺเถสา    ตณฺหา    อุปฺปชฺชมานา    อุปฺปชฺชติ   เอตฺถ   นิวีสมานา
@เชิงอรรถ:  ม. ยุ. นิวิสมานา นิวิสตีติ ฯ เอวมุปริปิ ฯ
นิวีสติ   ฯ   กิญฺจิ   โลเก   ปิยรูปํ  สาตรูปํ  ฯ  จกฺขุํ  โลเก  ปิยรูปํ
สาตรูปํ   ฯเปฯ   โสตํ   โลเก   ปิยรูปํ  สาตรูปํ  ...  ฆานํ  โลเก
ปิยรูปํ  สาตรูปํ  ...  ชิวฺหา  โลเก  ปิยรูปํ  สาตรูปํ ... กาโย โลเก
ปิยรูปํ  สาตรูปํ  ...  มโน  โลเก  ปิยรูปํ  สาตรูปํ  เอตฺเถสา  ตณฺหา
อุปฺปชฺชมานา อุปฺปชฺชติ เอตฺถ นิวีสมานา นิวีสติ ฯ
     [๒๕๙]   เย  หิ  เกจิ  ภิกฺขเว  อตีตมทฺธานํ สมณา วา พฺราหฺมณา
วา   ยํ  โลเก  ปิยรูปํ  สาตรูปํ  ตํ  นิจฺจโต  อทฺทกฺขุํ  สุขโต  อทฺทกฺขุํ
อตฺตโต    อทฺทกฺขุํ    อาโรคฺยโต   อทฺทกฺขุํ   เขมโต   อทฺทกฺขุํ   เต
ตณฺหํ   วฑฺเฒสุํ  ฯ  เย  ตณฺหํ  วฑฺเฒสุํ  เต  อุปธึ  วฑฺเฒสุํ  เย  อุปธึ
วฑฺเฒสุํ   เต   ทุกฺขํ   วฑฺเฒสุํ  เย  ทุกฺขํ  วฑฺเฒสุํ  เต  น  ปริมุจฺจึสุ
ชาติยา   ชราย   มรเณน   โสเกหิ   ปริเทเวหิ  ทุกฺเขหิ  โทมนสฺเสหิ
อุปายาเสหิ น ปริมุจฺจึสุ ทุกฺขสฺมาติ วทามิ ฯ
     {๒๕๙.๑}   เย   หิ  เกจิ  ภิกฺขเว  อนาคตมทฺธานํ  สมณา  วา
พฺราหฺมณา   วา   ยํ   โลเก  ปิยรูปํ  สาตรูปํ  ตํ  นิจฺจโต  ทกฺขิสฺสนฺติ
สุขโต    ทกฺขิสฺสนฺติ    อตฺตโต   ทกฺขิสฺสนฺติ   อาโรคฺยโต   ทกฺขิสฺสนฺติ
เขมโต  ทกฺขิสฺสนฺติ  เต  ตณฺหํ  วฑฺเฒสฺสนฺติ  ฯ  เย  ตณฺหํ  วฑฺเฒสฺสนฺติ
เต  อุปธึ  วฑฺเฒสฺสนฺติ  เย  อุปธึ  วฑฺเฒสฺสนฺติ  เต  ทุกฺขํ  วฑฺเฒสฺสนฺติ
เย  ทุกฺขํ  วฑฺเฒสฺสนฺติ  เต  น  ปริมุจฺจิสฺสนฺติ  ชาติยา  ชราย  มรเณน
โสเกหิ     ปริเทเวหิ    ทุกฺเขหิ    โทมนสฺเสหิ    อุปายาเสหิ    น
ปริมุจฺจิสฺสนฺติ ทุกฺขสฺมาติ วทามิ ฯ
     {๒๕๙.๒}   เย      หิ     เกจิ     ภิกฺขเว     เอตรหิ
สมณา   วา   พฺราหฺมณา  วา  ยํ  โลเก  ปิยรูปํ  สาตรูปํ  ตํ  นิจฺจโต
ปสฺสนฺติ     สุขโต     ปสฺสนฺติ     อตฺตโต    ปสฺสนฺติ    อาโรคฺยโต
ปสฺสนฺติ   เขมโต   ปสฺสนฺติ   เต   ตณฺหํ   วฑฺเฒนฺติ   ฯ   เย  ตณฺหํ
วฑฺเฒนฺติ   เต   อุปธึ   วฑฺเฒนฺติ   เย   อุปธึ   วฑฺเฒนฺติ  เต  ทุกฺขํ
วฑฺเฒนฺติ   เย   ทุกฺขํ   วฑฺเฒนฺติ  เต  น  ปริมุจฺจนฺติ  ชาติยา  ชราย
มรเณน    โสเกหิ    ปริเทเวหิ   ทุกฺเขหิ   โทมนสฺเสหิ   อุปายาเสหิ
น ปริมุจฺจนฺติ ทุกฺขสฺมาติ วทามิ ฯ
     [๒๖๐]   เสยฺยถาปิ    ภิกฺขเว    อาปานียกํโส   วณฺณสมฺปนฺโน
คนฺธสมฺปนฺโน   รสสมฺปนฺโน   ฯ  โส  จ  โข  วิเสน  สํสฏฺโฐ  ฯ  อถ
ปุริโส    อาคจฺเฉยฺย    ฆมฺมาภิตตฺโต   ฆมฺมปเรโต   กิลนฺโต   ตสิโต
ปิปาสิโต  ฯ  ตเมนํ  เอวํ  วเทยฺยุํ  อยํ  เต  อมฺโภ ปุริส อาปานียกํโส
วณฺณสมฺปนฺโน    คนฺธสมฺปนฺโน    รสสมฺปนฺโน   โส   จ   โข   วิเสน
สํสฏฺโฐ   ๑-   สเจ   อากงฺขสิ   ปิว  ปิวโต  หิ  โข  ตํ  ฉาเทสฺสติ
วณฺเณนปิ   คนฺเธนปิ   รเสนปิ   ปิวิตฺวา   จ   ปน   ตโตนิทานํ  มรณํ
วา   นิคจฺฉสิ   มรณมตฺตํ   วา   ทุกฺขนฺติ   ฯ   โส   ตํ  อาปานียกํสํ
สหสา   อปฺปฏิสงฺขา   ปิเวยฺย   น  ปฏินิสฺสชฺเชยฺย  ฯ  โส  ตโตนิทานํ
มรณํ  วา  นิคจฺเฉยฺย  มรณมตฺตํ  วา  ทุกฺขํ  ฯ  เอวเมว  โข  ภิกฺขเว
เย   หิ   เกจิ   อตีตมทฺธานํ  สมณา  วา  พฺราหฺมณา  วา  ยํ  โลเก
ปิยรูปํ    สาตรูปํ   ฯเปฯ   อนาคตมทฺธานํ   ฯเปฯ   เอตรหิ   สมณา
วา   พฺราหฺมณา  วา  ยํ  โลเก  ปิยรูปํ  สาตรูปํ  ตํ  นิจฺจโต  ปสฺสนฺติ
@เชิงอรรถ:  ยุ. สมฺปนฺโน ฯ
สุขโต   ปสฺสนฺติ   อตฺตโต   ปสฺสนฺติ   อาโรคฺยโต   ปสฺสนฺติ   เขมโต
ปสฺสนฺติ   เต   ตณฺหํ   วฑฺเฒนฺติ   ฯ  เย  ตณฺหํ  วฑฺเฒนฺติ  เต  อุปธึ
วฑฺเฒนฺติ   เย   อุปธึ   วฑฺเฒนฺติ   เต   ทุกฺขํ   วฑฺเฒนฺติ  เย  ทุกฺขํ
วฑฺเฒนฺติ   เต   น   ปริมุจฺจนฺติ   ชาติยา   ชราย   มรเณน  โสเกหิ
ปริเทเวหิ    ทุกฺเขหิ    โทมนสฺเสหิ    อุปายาเสหิ    น   ปริมุจฺจนฺติ
ทุกฺขสฺมาติ วทามิ ฯ
     [๒๖๑]   เย   จ  โข  เกจิ  ภิกฺขเว  อตีตมทฺธานํ  สมณา  วา
พฺราหฺมณา   วา   ยํ   โลเก   ปิยรูปํ  สาตรูปํ  ตํ  อนิจฺจโต  อทฺทกฺขุํ
ทุกฺขโต    อทฺทกฺขุํ    อนตฺตโต   อทฺทกฺขุํ   โรคโต   อทฺทกฺขุํ   ภยโต
อทฺทกฺขุํ   เต   ตณฺหํ  ปชหึสุ  ฯ  เย  ตณฺหํ  ปชหึสุ  เต  อุปธึ  ปชหึสุ
เย  อุปธึ  ปชหึสุ  เต  ทุกฺขํ  ปชหึสุ  เย  ทุกฺขํ  ปชหึสุ  เต  ปริมุจฺจึสุ
ชาติยา   ชราย   มรเณน   โสเกหิ   ปริเทเวหิ  ทุกฺเขหิ  โทมนสฺเสหิ
อุปายาเสหิ ปริมุจฺจึสุ ทุกฺขสฺมาติ วทามิ ฯ
     {๒๖๑.๑}   เยปิ  หิ  เกจิ  ภิกฺขเว  อนาคตมทฺธานํ  สมณา  วา
พฺราหฺมณา   วา   ยํ  โลเก  ปิยรูปํ  สาตรูปํ  ตํ  อนิจฺจโต  ทกฺขิสฺสนฺติ
ทุกฺขโต    ทกฺขิสฺสนฺติ    อนตฺตโต    ทกฺขิสฺสนฺติ   โรคโต   ทกฺขิสฺสนฺติ
ภยโต   ทกฺขิสฺสนฺติ   เต   ตณฺหํ  ปชหิสฺสนฺติ  ฯ  เย  ตณฺหํ  ปชหิสฺสนฺติ
ฯเปฯ เต ปริมุจฺจนฺติ ทุกฺขสฺมาติ วทามิ ฯ
     {๒๖๑.๒}   เยปิ   หิ   เกจิ   ภิกฺขเว   เอตรหิ   สมณา  วา
พฺราหฺมณา   วา   ยํ   โลเก   ปิยรูปํ  สาตรูปํ  ตํ  อนิจฺจโต  ปสฺสนฺติ
ทุกฺขโต     ปสฺสนฺติ     อนตฺตโต     ปสฺสนฺติ     โรคโต    ปสฺสนฺติ
ภยโต   ปสฺสนฺติ   เต   ตณฺหํ   ปชหนฺติ   ฯ  เย  ตณฺหํ  ปชหนฺติ  เต
อุปธึ   ปชหนฺติ   เย   อุปธึ   ปชหนฺติ  เต  ทุกฺขํ  ปชหนฺติ  เย  ทุกฺขํ
ปชหนฺติ   เต  ปริมุจฺจนฺติ  ชาติยา  ชราย  มรเณน  โสเกหิ  ปริเทเวหิ
ทุกฺเขหิ โทมนสฺเสหิ อุปายาเสหิ ปริมุจฺจนฺติ ทุกฺขสฺมาติ วทามิ ฯ
     [๒๖๒]   เสยฺยถาปิ    ภิกฺขเว    อาปานียกํโส   วณฺณสมฺปนฺโน
คนฺธสมฺปนฺโน   รสสมฺปนฺโน   ฯ  โส  จ  โข  วิเสน  สํสฏฺโฐ  ฯ  อถ
ปุริโส    อาคจฺเฉยฺย    ฆมฺมาภิตตฺโต   ฆมฺมปเรโต   กิลนฺโต   ตสิโต
ปิปาสิโต  ฯ  ตเมนํ  เอวํ  วเทยฺยุํ  อยํ  เต  อมฺโภ ปุริส อาปานียกํโส
วณฺณสมฺปนฺโน    คนฺธสมฺปนฺโน    รสสมฺปนฺโน   โส   จ   โข   วิเสน
สํสฏฺโฐ   สเจ   อากงฺขสิ   ปิว   ปิวโต   หิ   โข   ตํ   ฉาเทสฺสติ
วณฺเณนปิ   คนฺเธนปิ   รเสนปิ   ปิวิตฺวา   จ   ปน   ตโตนิทานํ  มรณํ
วา นิคจฺฉสิ มรณมตฺตํ วา ทุกฺขนฺติ ฯ
     {๒๖๒.๑}   อถ  โข  ภิกฺขเว ตสฺส ปุริสสฺส เอวมสฺส สกฺกา โข เม
อยํ   สุรา   ปิปาสิตา  ปานีเยน  วา  วิเนตุํ  ทธิมณฺฑเกน  วา  วิเนตุํ
มฏฺฐโลณิกาย  ๑-  วา  วิเนตุํ  โลณโสจิรเกน  วา วิเนตุํ น เตฺววาหนฺตํ
ปิเวยฺยํ  ยํ  มม  อสฺส  ทีฆรตฺตํ  อหิตาย ทุกฺขายาติ ฯ โส ตํ อาปานียกํสํ
ปฏิสงฺขา  น  ปิเวยฺย  ปฏินิสฺสชฺเชยฺย  ฯ  โส  ตโตนิทานํ  มรณํ  วา น
นิคจฺเฉยฺย  มรณมตฺตํ  วา  ทุกฺขํ  ฯ  เอวเมว  โข  ภิกฺขเว เย หิ เกจิ
อตีตมทฺธานํ   สมณา   วา  พฺราหฺมณา  วา  ยํ  โลเก  ปิยรูปํ  สาตรูปํ
@เชิงอรรถ:  ม. ภฏฺฐโลณิกาย ฯ
ตํ   อนิจฺจโต   อทฺทกฺขุํ   ทุกฺขโต  อทฺทกฺขุํ  อนตฺตโต  อทฺทกฺขุํ  โรคโต
อทฺทกฺขุํ  ภยโต  อทฺทกฺขุํ  เต  ตณฺหํ  ปชหึสุ  ฯ  เย  ตณฺหํ  ปชหึสุ  เต
อุปธึ  ปชหึสุ  เย  อุปธึ  ปชหึสุ  เต  ทุกฺขํ  ปชหึสุ  เย ทุกฺขํ ปชหึสุ เต
ปริมุจฺจึสุ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ อุปายาเสหิ ปริมุจฺจึสุ ทุกฺขสฺมาติ วทามิ ฯ
     {๒๖๒.๒}   เย  หิ  เกจิ  ภิกฺขเว  อนาคตมทฺธานํ  ฯเปฯ เอตรหิ
สมณา   วา  พฺราหฺมณา  วา  ยํ  โลเก  ปิยรูปํ  สาตรูปํ  ตํ  อนิจฺจโต
ปสฺสนฺติ     ทุกฺขโต     ปสฺสนฺติ     อนตฺตโต     ปสฺสนฺติ    โรคโต
ปสฺสนฺติ    ภยโต   ปสฺสนฺติ   เต   ตณฺหํ   ปชหนฺติ   ฯ   เย   ตณฺหํ
ปชหนฺติ    เต   อุปธึ   ปชหนฺติ   เย   อุปธึ   ปชหนฺติ   เต   ทุกฺขํ
ปชหนฺติ    เย   ทุกฺขํ   ปชหนฺติ   เต   ปริมุจฺจนฺติ   ชาติยา   ชราย
มรเณน    โสเกหิ    ปริเทเวหิ   ทุกฺเขหิ   โทมนสฺเสหิ   อุปายาเสหิ
ปริมุจฺจนฺติ ทุกฺขสฺมาติ วทามีติ ฯ ฉฏฺฐํ ฯ
     [๒๖๓]   เอกํ   สมยํ   อายสฺมา   จ  สารีปุตฺโต  อายสฺมา  จ
มหาโกฏฺฐิโต   ๑-   พาราณสิยํ   วิหรนฺติ  อิสิปตเน  มิคทาเย  ฯ  อถ
โข    อายสฺมา    มหาโกฏฺฐิโต   สายณฺหสมยํ   ปฏิสลฺลานา   วุฏฺฐิโต
เยนายสฺมา    สารีปุตฺโต    เตนุปสงฺกมิ    อุปสงฺกมิตฺวา    อายสฺมตา
สารีปุตฺเตน   สทฺธึ   สมฺโมทิ   สมฺโมทนียํ  กถํ  สาราณียํ  วีติสาเรตฺวา
เอกมนฺตํ นิสีทิ ฯ
     [๒๖๔]   เอกมนฺตํ    นิสินฺโน   โข   อายสฺมา   มหาโกฏฺฐิโต
@เชิงอรรถ:  ม. มหาโกฏฺฐิโก ฯ
อายสฺมนฺตํ  สารีปุตฺตํ  เอตทโวจ  กึ  นุ  โข  อาวุโส  สารีปุตฺตํ  สยํกตํ
ชรามรณํ     ปรกตํ    ชรามรณํ    สยํกตญฺจ    ปรกตญฺจ    ชรามรณํ
อุทาหุ   อสยํการํ   อปรการํ   อธิจฺจ   สมุปฺปนฺนํ   ชรามรณนฺติ  ฯ  น
โข    อาวุโส   โกฏฺฐิต   สยํกตํ   ชรามรณํ   น   ปรกตํ   ชรามรณํ
น    สยํกตญฺจ    ปรกตญฺจ    ชรามรณํ   นาปิ   อสยํการํ   อปรการํ
อธิจฺจ สมุปฺปนฺนํ ชรามรณํ อปิจ ชาติปจฺจยา ชรามรณนฺติ ฯ
     {๒๖๔.๑}   กึ  นุ  โข  อาวุโส  สารีปุตฺต  สยํกตา  ชาติ ปรกตา
ชาติ   สยํกตา  จ  ปรกตา  จ  ชาติ  อุทาหุ  อสยํการํ  อปรการํ  ๑-
อธิจฺจ   สมุปฺปนฺนา   ชาตีติ   ฯ   น   โข  อาวุโส  โกฏฺฐิต  สยํกตา
ชาติ   น   ปรกตา   ชาติ   น  สยํกตา  จ  ปรกตา  จ  ชาติ  นาปิ
อสยํการํ    อปรการํ   อธิจฺจ   สมุปฺปนฺนา   ชาติ   อปิจ   ภวปจฺจยา
ชาตีติ ฯ
     {๒๖๔.๒}   กึ  นุ  โข  อาวุโส  สารีปุตฺต  สยํกโต  ภโว  ฯเปฯ
สยํกตํ  อุปาทานํ  ...  สยํกตา ตณฺหา ... สยํกตา เวทนา ... สยํกโต
ผสฺโส   ...  สยํกตํ  สฬายตนํ  ...  สยํกตํ  นามรูปํ  ปรกตํ  นามรูปํ
สยํกตญฺจ   ปรกตญฺจ   นามรูปํ   อุทาหุ   อสยํการํ   อปรการํ   อธิจฺจ
สมุปฺปนฺนํ   นามรูปนฺติ   ฯ   น  โข  อาวุโส  โกฏฺฐิต  สยํกตํ  นามรูปํ
น   ปรกตํ   นามรูปํ  น  สยํกตญฺจ  ปรกตญฺจ  นามรูปํ  นาปิ  อสยํการํ
อปรการํ     อธิจฺจ    สมุปฺปนฺนํ    นามรูปํ    อปิจ    วิญฺญาณปจฺจยา
นามรูปนฺติ ฯ
     {๒๖๔.๓}   กึ   นุ   โข   อาวุโส   สารีปุตฺต  สยํกตํ  วิญฺญาณํ
ปรกตํ        วิญฺญาณํ       สยํกตญฺจ       ปรกตญฺจ       วิญฺญาณํ
@เชิงอรรถ:  ม. อสยํการา อปรํการา ฯ
อุทาหุ   อสยํการํ   อปรการํ   อธิจฺจ   สมุปฺปนฺนํ   วิญฺญาณนฺติ   ฯ  น
โข   อาวุโส   โกฏฺฐิต   สยํกตํ   วิญฺญาณํ   น   ปรกตํ   วิญฺญาณํ  น
สยํกตญฺจ    ปรกตญฺจ   วิญฺญาณํ   นาปิ   อสยํการํ   อปรการํ   อธิจฺจ
สมุปฺปนฺนํ วิญฺญาณํ อปิจ นามรูปปจฺจยา วิญฺญาณนฺติ ฯ
     [๒๖๕]   อิทาเนว   โข   มยํ   อายสฺมโต  สารีปุตฺตสฺส  ภาสิตํ
เอวํ   อาชานาม   น   โข   อาวุโส   โกฏฺฐิต   สยํกตํ  นามรูปํ  น
ปรกตํ   นามรูปํ   น   สยํกตญฺจ   ปรกตญฺจ   นามรูปํ  นาปิ  อสยํการํ
อปรการํ     อธิจฺจ    สมุปฺปนฺนํ    นามรูปํ    อปิจ    วิญฺญาณปจฺจยา
นามรูปนฺติ ฯ
     {๒๖๕.๑}   อิทาเนว   ปน  มยํ  อายสฺมโต  สารีปุตฺตสฺส  ภาสิตํ
เอวํ    อาชานาม    น   โข   อาวุโส   โกฏฺฐิต   สยํกตํ   วิญฺญาณํ
น    ๑-    ปรกตํ    วิญฺญาณํ    น   สยํกตญฺจ   ปรกตญฺจ   วิญฺญาณํ
นาปิ    อสยํการํ    อปรการํ    อธิจฺจ    สมุปฺปนฺนํ   วิญฺญาณํ   อปิจ
นามรูปปจฺจยา    วิญฺญาณนฺติ    ฯ    ยถากถํ    ปนาวุโส    สารีปุตฺต
อิมสฺส ภาสิตสฺส อตฺโถ ทฏฺฐพฺโพติ ฯ
     [๒๖๖]   เตนหาวุโส   อุปมนฺเต   กริสฺสามิ   อุปมายปิเธกจฺเจ
วิญฺญู   ปุริสา   ภาสิตสฺส   อตฺถํ   อาชานนฺติ   ฯ  เสยฺยถาปิ  อาวุโส
เทฺว    นฬกลาปิโย   อญฺญมญฺญํ   นิสฺสาย   ติฏฺเฐยฺยุํ   เอวเมว   โข
อาวุโส     นามรูปปจฺจยา     วิญฺญาณํ     วิญฺญาณปจฺจยา     นามรูปํ
นามรูปปจฺจยา     สฬายตนํ     สฬายตนปจฺจยา     ผสฺโส     ฯเปฯ
เอวเมตสฺส   เกวลสฺส   ทุกฺขกฺขนฺธสฺส   สมุทโย   โหติ   ฯ  ตาสญฺเจ
@เชิงอรรถ:  ยุ. นสทฺโท นตฺถิ ฯ
อาวุโส     นฬกลาปีนํ     เอกํ    อปกฑฺเฒยฺย    เอกา    ปปเตยฺย
อปรญฺเจ   อปกฑฺเฒยฺย   อปรา   ปปเตยฺย  ฯ  เอวเมว  โข  อาวุโส
นามรูปนิโรธา     วิญฺญาณนิโรโธ     วิญฺญาณนิโรธา     นามรูปนิโรโธ
นามรูปนิโรธา     สฬายตนนิโรโธ     สฬายตนนิโรธา     ผสฺสนิโรโธ
ฯเปฯ เอวเมตสฺส เกวลสฺส ทุกฺขกฺขนฺธสฺส นิโรโธ โหตีติ ฯ
     [๒๖๗]   อจฺฉริยํ   อาวุโส  สารีปุตฺต  อพฺภูตํ  อาวุโส  สารีปุตฺต
ยาว    สุภาสิตญฺจิทํ    อายสฺมตา    สารีปุตฺเตน   อิทญฺจ   ปน   มยํ
อายสฺมโต   สารีปุตฺตสฺส   สุภาสิตํ  อิเมหิ  ฉตฺตึสาย  วตฺถูหิ  อนุโมทาม
ชรามรณสฺส    เจ   อาวุโส   ภิกฺขุ   นิพฺพิทาย   วิราคาย   นิโรธาย
ธมฺมํ   เทเสติ   ธมฺมกถิโก   ภิกฺขูติ   อลํ   วจนาย   ฯ  ชรามรณสฺส
เจ   อาวุโส   ภิกฺขุ   นิพฺพิทาย   วิราคาย  นิโรธาย  ปฏิปนฺโน  โหติ
ธมฺมานุธมฺมปฏิปนฺโน    ภิกฺขูติ   อลํ   วจนาย   ฯ   ชรามรณสฺส   เจ
อาวุโส   ภิกฺขุ   นิพฺพิทา   วิราคา   นิโรธา  อนุปาทา  วิมุตฺโต  โหติ
ทิฏฺฐธมฺมนิพฺพานปฺปตฺโต   ภิกฺขูติ   อลํ  วจนาย  ฯ  ชาติยา  เจ  ฯเปฯ
ภวสฺส  เจ  ...  อุปาทานสฺส  เจ  ...  ตณฺหาย  เจ  ... เวทนาย
เจ  ...  ผสฺสสฺส  เจ  ...  สฬายตนสฺส เจ ... นามรูปสฺส เจ ...
วิญฺญาณสฺส  เจ  ...  สงฺขารานญฺเจ  ...  อวิชฺชาย  เจ อาวุโส ภิกฺขุ
นิพฺพิทาย   วิราคาย   นิโรธาย   ธมฺมํ   เทเสติ   ธมฺมกถิโก   ภิกฺขูติ
อลํ   วจนาย   ฯ   อวิชฺชาย  เจ  อาวุโส  ภิกฺขุ  นิพฺพิทาย  วิราคาย
นิโรธาย    ปฏิปนฺโน    โหติ    ธมฺมานุธมฺมปฏิปนฺโน    ภิกฺขูติ    อลํ
วจนาย   ฯ   อวิชฺชาย  เจ  อาวุโส  ภิกฺขุ  นิพฺพิทา  วิราคา  นิโรธา
อนุปาทา    วิมุตฺโต    โหติ    ทิฏฺฐธมฺมนิพฺพานปฺปตฺโต    ภิกฺขูติ   อลํ
วจนายาติ ฯ สตฺตมํ ฯ
     [๒๖๘]   เอกํ  สมยํ อายสฺมา จ มุสิโล ๑- อายสฺมา จ ปวิฏฺโฐ ๒-
อายสฺมา   จ   นารโท   อายสฺมา   จ   อานนฺโท  โกสมฺพิยํ  วิหรนฺติ
โฆสิตาราเม ฯ
     [๒๖๙]   อถ  โข  อายสฺมา  ปวิฏฺโฐ  อายสฺมนฺตํ  มุสิลํ เอตทโวจ
อญฺญเตฺรว   อาวุโส  มุสิล  สทฺธาย  อญฺญตฺร  รุจิยา  อญฺญตฺร  อนุสฺสวา
อญฺญตฺร       อาการปริวิตกฺกา      อญฺญตฺร      ทิฏฺฐินิชฺฌานกฺขนฺติยา
อตฺถายสฺมโต      มุสิลสฺส      ปจฺจตฺตเมว     ญาณํ     ชาติปจฺจยา
ชรามรณนฺติ    ฯ    อญฺญเตฺรว   อาวุโส   ปวิฏฺฐ   สทฺธาย   อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา      อหเมตํ     ชานามิ     อหเมตํ     ปสฺสามิ
ชาติปจฺจยา ชรามรณนฺติ ฯ
     {๒๖๙.๑}   อญฺญเตฺรว   อาวุโส  มุสิล  สทฺธาย  อญฺญตฺร  รุจิยา
อญฺญตฺร      อนุสฺสวา      อญฺญตฺร     อาการปริวิตกฺกา     อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    มุสิลสฺส    ปจฺจตฺตเมว    ญาณํ
ภวปจฺจยา   ชาตีติ  ฯเปฯ  อุปาทานปจฺจยา  ภโวติ  ...  ตณฺหาปจฺจยา
อุปาทานนฺติ  ...  เวทนาปจฺจยา  ตณฺหาติ  ...  ผสฺสปจฺจยา  เวทนาติ
...   สฬายตนปจฺจยา   ผสฺโสติ   ...   นามรูปปจฺจยา   สฬายตนนฺติ
...  วิญฺญาณปจฺจยา  นามรูปนฺติ  ...  สงฺขารปจฺจยา  วิญฺญาณนฺติ  ...
@เชิงอรรถ:  ยุ. มุสีโล ฯ  ยุ. สวิฏฺโฐ ฯ
อวิชฺชาปจฺจยา   สงฺขาราติ   ฯ   อญฺญเตฺรว   อาวุโส  ปวิฏฺฐ  สทฺธาย
อญฺญตฺร    รุจิยา    อญฺญตฺร    อนุสฺสวา   อญฺญตฺร   อาการปริวิตกฺกา
อญฺญตฺร    ทิฏฺฐินิชฺฌานกฺขนฺติยา   อหเมตํ   ชานามิ   อหเมตํ   ปสฺสามิ
อวิชฺชาปจฺจยา สงฺขาราติ ฯ
     [๒๗๐]   อญฺญตฺร    จ    อาวุโส   มุสิล   สทฺธาย   อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    มุสิลสฺส    ปจฺจตฺตเมว    ญาณํ
ชาตินิโรธา   ชรามรณนิโรโธติ  ฯ  อญฺญเตฺรว  อาวุโส  ปวิฏฺฐ  สทฺธาย
อญฺญตฺร    รุจิยา    อญฺญตฺร    อนุสฺสวา   อญฺญตฺร   อาการปริวิตกฺกา
อญฺญตฺร    ทิฏฺฐินิชฺฌานกฺขนฺติยา   อหเมตํ   ชานามิ   อหเมตํ   ปสฺสามิ
ชาตินิโรธา ชรามรณนิโรโธติ ฯ
     {๒๗๐.๑}   อญฺญเตฺรว   อาวุโส  มุสิล  สทฺธาย  อญฺญตฺร  รุจิยา
อญฺญตฺร      อนุสฺสวา      อญฺญตฺร     อาการปริวิตกฺกา     อญฺญตฺร
ทิฏฺฐินิชฺฌานกฺขนฺติยา       อตฺถายสฺมโต      มุสิลสฺส      ปจฺจตฺตเมว
ญาณํ      ภวนิโรธา     ชาตินิโรโธติ     ฯเปฯ     อุปาทานนิโรธา
ภวนิโรโธติ  ...  ตณฺหานิโรธา  อุปาทานนิโรโธติ  ...  เวทนานิโรธา
ตณฺหานิโรโธติ  ...  ผสฺสนิโรธา  เวทนานิโรโธติ  ... สฬายตนนิโรธา
ผสฺสนิโรโธติ  ...  นามรูปนิโรธา  สฬายตนนิโรโธติ ... วิญฺญาณนิโรธา
นามรูปนิโรโธติ  ...  สงฺขารนิโรธา วิญฺญาณนิโรโธติ ... อวิชฺชานิโรธา
สงฺขารนิโรโธติ   ฯ   อญฺญเตฺรว   อาวุโส   ปวิฏฺฐ   สทฺธาย  อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา      อหเมตํ     ชานามิ     อหเมตํ     ปสฺสามิ
อวิชฺชานิโรธา สงฺขารนิโรโธติ ฯ
     [๒๗๑]   อญฺญเตฺรว   อาวุโส   มุสิล   สทฺธาย  อญฺญตฺร  รุจิยา
อญฺญตฺร      อนุสฺสวา      อญฺญตฺร     อาการปริวิตกฺกา     อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    มุสิลสฺส    ปจฺจตฺตเมว    ญาณํ
ภวนิโรโธ    นิพฺพานนฺติ   ฯ   อญฺญเตฺรว   อาวุโส   ปวิฏฺฐ   สทฺธาย
อญฺญตฺร    รุจิยา    อญฺญตฺร    อนุสฺสวา   อญฺญตฺร   อาการปริวิตกฺกา
อญฺญตฺร    ทิฏฺฐินิชฺฌานกฺขนฺติยา   อหเมตํ   ชานามิ   อหเมตํ   ปสฺสามิ
ภวนิโรโธ   นิพฺพานนฺติ   ฯ  เตนหายสฺมา  มุสิโล  อรหํ  ขีณาสโวติ  ฯ
เอวํ วุตฺเต อายสฺมา มุสิโล ตุณฺหี อโหสิ ฯ
     [๒๗๒]   อถ  โข  อายสฺมา  นารโท  อายสฺมนฺตํ ปวิฏฺฐํ เอตทโวจ
สาธาวุโส   ปวิฏฺฐ   อหํ   เอตํ   ปญฺหํ   ลเภยฺยํ   เอวํ  ปญฺหํ  ปุจฺฉ
อหํ   เต   เอตํ   ปญฺหํ   พฺยากริสฺสามีติ  ฯ  ลภติ  อายสฺมา  นารโท
เอตํ   ปญฺหํ   ปุจฺฉามหํ   อายสฺมนฺตํ   นารทํ   เอตํ  ปญฺหํ  พฺยากโรตุ
จ    เม    อายสฺมา   นารโท   เอตํ   ปญฺหํ   อญฺญเตฺรว   อาวุโส
นารท    สทฺธาย    อญฺญตฺร    รุจิยา   อญฺญตฺร   อนุสฺสวา   อญฺญตฺร
อาการปริวิตกฺกา     อญฺญตฺร     ทิฏฺฐินิชฺฌานกฺขนฺติยา     อตฺถายสฺมโต
นารทสฺส   ปจฺจตฺตเมว   ญาณํ  ชาติปจฺจยา  ชรามรณนฺติ  ฯ  อญฺญเตฺรว
อาวุโส    ปวิฏฺฐ    สทฺธาย    อญฺญตฺร   รุจิยา   อญฺญตฺร   อนุสฺสวา
อญฺญตฺร       อาการปริวิตกฺกา      อญฺญตฺร      ทิฏฺฐินิชฺฌานกฺขนฺติยา
อหเมตํ ชานามิ อหเมตํ ปสฺสามิ ชาติปจฺจยา ชรามรณนฺติ ฯ
     {๒๗๒.๑}   อญฺญเตฺรว  อาวุโส  นารท  สทฺธาย  อญฺญตฺร  รุจิยา
อญฺญตฺร      อนุสฺสวา      อญฺญตฺร     อาการปริวิตกฺกา     อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    นารทสฺส    ปจฺจตฺตเมว   ญาณํ
ภวปจฺจยา   ชาตีติ   ฯเปฯ   อวิชฺชาปจฺจยา  สงฺขาราติ  ฯ  อญฺญเตฺรว
อาวุโส   ปวิฏฺฐ   สทฺธาย  อญฺญตฺร  รุจิยา  อญฺญตฺร  อนุสฺสวา  อญฺญตฺร
อาการปริวิตกฺกา    อญฺญตฺร    ทิฏฺฐินิชฺฌานกฺขนฺติยา   อหเมตํ   ชานามิ
อหเมตํ ปสฺสามิ อวิชฺชาปจฺจยา สงฺขาราติ ฯ
     [๒๗๓]   อญฺญตฺร    จ   อาวุโส   นารท   สทฺธาย   อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    นารทสฺส    ปจฺจตฺตเมว   ญาณํ
ชาตินิโรธา  ชรามรณนิโรโธติ  ฯเปฯ  อวิชฺชานิโรธา  สงฺขารนิโรโธติ ฯ
อญฺญเตฺรว        อาวุโส       ปวิฏฺฐ       สทฺธาย       อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา      อหเมตํ     ชานามิ     อหเมตํ     ปสฺสามิ
อวิชฺชานิโรธา สงฺขารนิโรโธติ ฯ
     [๒๗๔]   อญฺญเตฺรว    อาวุโส    นารท    สทฺธาย   อญฺญตฺร
รุจิยา    อญฺญตฺร    อนุสฺสวา    อญฺญตฺร   อาการปริวิตกฺกา   อญฺญตฺร
ทิฏฺฐินิชฺฌานกฺขนฺติยา    อตฺถายสฺมโต    นารทสฺส    ปจฺจตฺตเมว   ญาณํ
ภวนิโรโธ    นิพฺพานนฺติ   ฯ   อญฺญเตฺรว   อาวุโส   ปวิฏฺฐ   สทฺธาย
อญฺญตฺร    รุจิยา    อญฺญตฺร    อนุสฺสวา   อญฺญตฺร   อาการปริวิตกฺกา
อญฺญตฺร    ทิฏฺฐินิชฺฌานกฺขนฺติยา   อหเมตํ   ชานามิ   อหเมตํ   ปสฺสามิ
ภวนิโรโธ นิพฺพานนฺติ ฯ
     {๒๗๔.๑}   เตนหายสฺมา    นารโท    อรหํ   ขีณาสโวติ   ฯ
ภวนิโรโธ   นิพฺพานนฺติ   โข   เม   อาวุโส   ยถาภูตํ   สมฺมปฺปญฺญาย
สุทิฏฺฐํ   น   จมฺหิ   อรหํ  ขีณาสโว  เสยฺยถาปิ  อาวุโส  กนฺตารมคฺเค
อุทปาโน    ตตฺร    เนวสฺส   รชฺชุ   น   อุทกวารโก   อถ   ปุริโส
อาคจฺเฉยฺย   ฆมฺมาภิตตฺโต   ฆมฺมปเรโต   กิลนฺโต   ตสิโต   ปิปาสิโต
โส    ตํ   อุทปานํ   โอโลเกยฺย   ตสฺส   อุทกนฺติ   หิ   โข   ญาณํ
อสฺส   น   จ   กาเยน   ผุสิตฺวา   วิหเรยฺย  เอวเมว  โข  อาวุโส
ภวนิโรโธ    นิพฺพานนฺติ   ยถาภูตํ   สมฺมปฺปญฺญาย   สุทิฏฺฐํ   น   จมฺหิ
อรหํ ขีณาสโวติ ฯ
     [๒๗๕]   เอวํ   วุตฺเต   อายสฺมา  อานนฺโท  อายสฺมนฺตํ  ปวิฏฺฐํ
เอตทโวจ   เอวํวาที   ตฺวํ   อาวุโส   ปวิฏฺฐ   อายสฺมนฺตํ  นารทํ  กึ
วเทสีติ   ฯ   เอวํวาทาหํ   อาวุโส   อานนฺท   อายสฺมนฺตํ  นารทํ  น
กิญฺจิ วทามิ อญฺญตฺร กลฺยาณา อญฺญตฺร กุสลาติ ฯ อฏฺฐมํ ฯ
     [๒๗๖]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน อนาถปิณฺฑิกสฺส อาราเม ฯ
     [๒๗๗]   ตตฺร  โข  ภควา  ...  มหาสมุทฺโท  ภิกฺขเว  อุปยนฺโต
มหานทิโย      อุปยาเปติ     มหานทิโย     อุปยนฺติโย     กุนฺนทิโย
อุปยาเปนฺติ     กุนฺนทิโย     อุปยนฺติโย    มหาโสพฺเภ    อุปยาเปนฺติ
มหาโสพฺภา   อุปยนฺตา  กุสฺโสพฺเภ  อุปยาเปนฺติ  เอวเมว  โข  ภิกฺขเว
อวิชฺชา   อุปยนฺตี   สงฺขาเร   อุปยาเปติ  สงฺขารา  อุปยนฺตา  วิญฺญาณํ
อุปยาเปนฺติ    วิญฺญาณํ    อุปยนฺตํ    นามรูปํ    อุปยาเปติ    นามรูปํ
อุปยนฺตํ   สฬายตนํ   อุปยาเปติ   สฬายตนํ   อุปยนฺตํ  ผสฺสํ  อุปยาเปติ
ผสฺโส  อุปยนฺโต  เวทนํ  อุปยาเปติ  เวทนา  อุปยนฺตี  ตณฺหํ  อุปยาเปติ
ตณฺหา     อุปยนฺตี     อุปาทานํ    อุปยาเปติ    อุปาทานํ    อุปยนฺตํ
ภวํ   อุปยาเปติ   ภโว   อุปยนฺโต   ชาตึ   อุปยาเปติ  ชาติ  อุปยนฺตี
ชรามรณํ อุปยาเปติ ฯ
     [๒๗๘]   มหาสมุทฺโท   ภิกฺขเว  อปยนฺโต  มหานทิโย  อปยาเปติ
มหานทิโย   อปยนฺติโย   กุนฺนทิโย   อปยาเปนฺติ   กุนฺนทิโย  อปยนฺติโย
มหาโสพฺเภ     อปยาเปนฺติ     มหาโสพฺภา    อปยนฺตา    กุสฺโสพฺเภ
อปยาเปนฺติ  เอวเมว  โข  ภิกฺขเว  อวิชฺชา อปยนฺตี สงฺขาเร อปยาเปติ
สงฺขารา    อปยนฺตา    วิญฺญาณํ    อปยาเปนฺติ    วิญฺญาณํ    อปยนฺตํ
นามรูปํ    อปยาเปติ    นามรูปํ    อปยนฺตํ    สฬายตนํ    อปยาเปติ
สฬายตนํ    อปยนฺตํ    ผสฺสํ   อปยาเปติ   ผสฺโส   อปยนฺโต   เวทนํ
อปยาเปติ    เวทนา   อปยนฺตี   ตณฺหํ   อปยาเปติ   ตณฺหา   อปยนฺตี
อุปาทานํ    อปยาเปติ   อุปาทานํ   อปยนฺตํ   ภวํ   อปยาเปติ   ภโว
อปยนฺโต     ชาตึ     อปยาเปติ     ชาติ     อปยนฺตี     ชรามรณํ
อปยาเปตีติ ฯ นวมํ ฯ
     [๒๗๙]   เอวมฺเม   สุตํ   เอกํ  สมยํ  ภควา  ราชคเห  วิหรติ
เวฬุวเน   กลนฺทกนิวาเป  ฯ  เตน  โข  ปน  สมเยน  ภควา  สกฺกโต
โหติ    ครุกโต    มานิโต   ปูชิโต   อปจิโต   ลาภี   จีวรปิณฺฑปาต-
เสนาสนคิลานปจฺจยเภสชฺชปริกฺขารานํ    ภิกฺขุสงฺโฆปิ    สกฺกโต   โหติ
ครุกโต    มานิโต    ปูชิโต   อปจิโต   ลาภี   จีวรปิณฺฑปาตเสนาสน-
คิลานปจฺจยเภสชฺชปริกฺขารานํ    ฯ    อญฺญติตฺถิยา   ปน   ปริพฺพาชกา
อสกฺกตา   โหนฺติ   อครุกตา   อมานิตา   อปูชิตา  อนปจิตา  อลาภิโน
จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ
     [๒๘๐]   เตน  โข  ปน  สมเยน  สุสิโม  ปริพฺพาชโก  ราชคเห
ปฏิวสติ   มหติยา   ปริพฺพาชกปริสาย   สทฺธึ   ฯ   อถ   โข  สุสิมสฺส
ปริพฺพาชกสฺส    ปริสา    สุสิมํ   ปริพฺพาชกํ   เอตทโวจุํ   เอหิ   ตฺวํ
อาวุโส  สุสิม  สมเณ  โคตเม  พฺรหฺมจริยํ  จร  ตฺวํ  ธมฺมํ ปริยาปุณิตฺวา
อเมฺห  วาเจยฺยาสิ  ๑-  ตํ  มยํ  ธมฺมํ  ปริยาปุณิตฺวา  คิหีนํ  ภาสิสฺสาม
เอวํ   มยมฺปิ   สกฺกตา   ภวิสฺสาม   ครุกตา  มานิตา  ปูชิตา  อปจิตา
ลาภิโน      จีวรปิณฺฑปาตเสนาสนคิลานปจฺจยเภสชฺชปริกฺขารานนฺติ     ฯ
เอวมาวุโสติ   โข   สุสิโม   ปริพฺพาชโก   สกาย  ปริสาย  ปฏิสฺสุตฺวา
เยนายสฺมา     อานนฺโท    เตนุปสงฺกมิ    อุปสงฺกมิตฺวา    อายสฺมตา
อานนฺเทน   สทฺธึ   สมฺโมทิ   สมฺโมทนียํ   กถํ  สาราณียํ  วีติสาเรตฺวา
เอกมนฺตํ   นิสีทิ   ฯ   เอกมนฺตํ   นิสินฺโน   โข   สุสิโม  ปริพฺพาชโก
อายสฺมนฺตํ   อานนฺทํ   เอตทโวจ   อิจฺฉามหํ   อาวุโส  อานนฺท  อิมสฺมึ
ธมฺมวินเย พฺรหฺมจริยํ จริตุนฺติ ฯ
@เชิงอรรถ:  ยุ. วาเจสฺสสิ ฯ
     [๒๘๑]   อถ  โข  อายสฺมา  อานนฺโท  สุสิมํ  ปริพฺพาชกํ  อาทาย
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทิ   ฯ   เอกมนฺตํ   นิสินฺโน   โข   อายสฺมา  อานนฺโท
ภควนฺตํ    เอตทโวจ   อยํ   ภนฺเต   สุสิโม   ปริพฺพาชโก   เอวมาห
อิจฺฉามหํ     อาวุโส    อานนฺท    อิมสฺมึ    ธมฺมวินเย    พฺรหฺมจริยํ
จริตุนฺติ   ฯ   เตนหานนฺท  สุสิมํ  ปพฺพาเชถาติ  ฯ  อลตฺถ  โข  สุสิโม
ปริพฺพาชโก ภควโต สนฺติเก ปพฺพชฺชํ อลตฺถูปสมฺปทํ ฯ
     [๒๘๒]   เตน  โข  ปน  สมเยน สมฺพหุเลหิ กิร ๑- ภิกฺขูหิ ภควโต
สนฺติเก   อญฺญา   พฺยากตา   โหติ   ขีณา   ชาติ   วุสิตํ   พฺรหฺมจริยํ
กตํ   กรณียํ   นาปรํ   อิตฺถตฺตายาติ   ปชานามาติ   ฯ   อสฺโสสิ  โข
อายสฺมา   สุสิโม   สมฺพหุเลหิ   กิร   ภิกฺขูหิ  ภควโต  สนฺติเก  อญฺญา
พฺยากตา    ขีณา    ชาติ   วุสิตํ   พฺรหฺมจริยํ   กตํ   กรณียํ   นาปรํ
อิตฺถตฺตายาติ   ปชานามาติ   ฯ  อถ  โข  อายสฺมา  สุสิโม  เยน  เต
ภิกฺขู    เตนุปสงฺกมิ    อุปสงฺกมิตฺวา   เตหิ   ภิกฺขูหิ   สทฺธึ   สมฺโมทิ
สมฺโมทนียํ   กถํ  สาราณียํ  วีติสาเรตฺวา  เอกมนฺตํ  นิสีทิ  ฯ  เอกมนฺตํ
นิสินฺโน   โข   อายสฺมา   สุสิโม   เต   ภิกฺขู  เอตทโวจ  สจฺจํ  กิร
อายสฺมนฺเตหิ    ภควโต    สนฺติเก   อญฺญา   พฺยากตา   ขีณา   ชาติ
วุสิตํ   พฺรหฺมจริยํ   กตํ   กรณียํ  นาปรํ  อิตฺถตฺตายาติ  ปชานามาติ  ฯ
เอวมาวุโสติ ฯ
     [๒๘๓]   อปิ  นุ  ๒-  ตุเมฺห  อายสฺมนฺโต  เอวํ  ชานนฺตา  เอวํ
@เชิงอรรถ:  ม. ยุ. กิรสทฺโท นตฺถิ ฯ   ม. ยุ. ปน ฯ เอวมุปริปิ ฯ
ปสฺสนฺตา   อเนกวิหิตํ   อิทฺธิวิธํ   ปจฺจนุโภถ   เอโกปิ   หุตฺวา  พหุธา
โหถ   พหุธาปิ   หุตฺวา   เอโก   โหถ  อาวิภาวํ  ติโรภาวํ  ติโรกุฑฺฑํ
ติโรปาการํ   ติโรปพฺพตํ   อสชฺชมานา   คจฺฉถ   เสยฺยถาปิ   อากาเส
ปฐวิยาปิ    อุมฺมุชฺชนิมฺมุชฺชํ    กโรถ    เสยฺยถาปิ    อุทเก   อุทเกปิ
อภิชฺชมาเน   คจฺฉถ   เสยฺยถาปิ   ปฐวิยํ  อากาเสปิ  ปลฺลงฺเกน  กมถ
เสยฺยถาปิ    ปกฺขี    สกุโณ    อิเมปิ    จนฺทิมสุริเย    เอวํมหิทฺธิเก
เอวํมหานุภาเว    ปาณินา   ปริมสถ   ปริมชฺชถ   ยาว   พฺรหฺมโลกาปิ
กาเยน วสํ วตฺเตถาติ ฯ โน เหตํ อาวุโส ฯ
     [๒๘๔]   อปิ  นุ  ตุเมฺห  อายสฺมนฺโต เอวํ ชานนฺตา เอวํ ปสฺสนฺตา
ทิพฺพาย    โสตธาตุยา   วิสุทฺธาย   อติกฺกนฺตมานุสิกาย   อุโภ   สทฺเท
สุณาถ ทิพฺเพ จ มานุเส จ เย ทูเร สนฺติเก จาติ ฯ โน เหตํ อาวุโส ฯ
     [๒๘๕]   อปิ  นุ  ตุเมฺห  อายสฺมนฺโต เอวํ ชานนฺตา เอวํ ปสฺสนฺตา
ปรสตฺตานํ   ปรปุคฺคลานํ   เจตสา  เจโต  ปริจฺจ  ชานาถ  สราคํ  วา
จิตฺตํ    สราคํ   จิตฺตนฺติ   ปชานาถ   วีตราคํ   วา   จิตฺตํ   วีตราคํ
จิตฺตนฺติ   ปชานาถ   สโทสํ   วา   จิตฺตํ   สโทสํ   จิตฺตนฺติ  ปชานาถ
วีตโทสํ   วา   จิตฺตํ   วีตโทสํ   จิตฺตนฺติ  ปชานาถ  สโมหํ  วา  จิตฺตํ
สโมหํ   จิตฺตนฺติ   ปชานาถ   วีตโมหํ   วา   จิตฺตํ   วีตโมหํ  จิตฺตนฺติ
ปชานาถ   สงฺขิตฺตํ   วา   จิตฺตํ   สงฺขิตฺตํ  จิตฺตนฺติ  ปชานาถ  วิกฺขิตฺตํ
วา   จิตฺตํ   วิกฺขิตฺตํ   จิตฺตนฺติ  ปชานาถ  มหคฺคตํ  วา  จิตฺตํ  มหคฺคตํ
จิตฺตนฺติ    ปชานาถ    อมหคฺคตํ    วา    จิตฺตํ   อมหคฺคตํ   จิตฺตนฺติ
ปชานาถ   สอุตฺตรํ   วา   จิตฺตํ   สอุตฺตรํ  จิตฺตนฺติ  ปชานาถ  อนุตฺตรํ
วา    จิตฺตํ    อนุตฺตรํ    จิตฺตนฺติ   ปชานาถ   สมาหิตํ   วา   จิตฺตํ
สมาหิตํ    จิตฺตนฺติ    ปชานาถ    อสมาหิตํ    วา   จิตฺตํ   อสมาหิตํ
จิตฺตนฺติ   ปชานาถ   วิมุตฺตํ   วา   จิตฺตํ   วิมุตฺตํ   จิตฺตนฺติ  ปชานาถ
อวิมุตฺตํ   วา   จิตฺตํ   อวิมุตฺตํ   จิตฺตนฺติ   ปชานาถาติ  ฯ  โน  เหตํ
อาวุโส ฯ
     [๒๘๖]   อปิ  นุ  ตุเมฺห  อายสฺมนฺโต เอวํ ชานนฺตา เอวํ ปสฺสนฺตา
อเนกวิหิตํ   ปุพฺเพนิวาสํ   อนุสฺสรถ   เสยฺยถีทํ   เอกมฺปิ  ชาตึ  เทฺวปิ
ชาติโย   ติสฺโสปิ   ชาติโย   จตสฺโสปิ  ชาติโย  ปญฺจปิ  ชาติโย  ทสปิ
ชาติโย    วีสมฺปิ   ชาติโย   ตึสมฺปิ   ชาติโย   จตฺตาฬีสมฺปิ   ชาติโย
ปญฺญาสมฺปิ    ชาติโย    ชาติสตมฺปิ    ชาติสหสฺสมฺปิ    ชาติสตสหสฺสมฺปิ
อเนเกปิ  สํวฏฺฏกปฺเป  อเนเกปิ  วิวฏฺฏกปฺเป  อเนเกปิ สํวฏฺฏวิวฏฺฏกปฺเป
อมุตฺราสึ     เอวํนาโม     เอวํโคตฺโต    เอวํวณฺโณ    เอวมาหาโร
เอวํสุขทุกฺขปฏิสํเวที    เอวมายุปริยนฺโต    โส   ตโต   จุโต   อมุตฺร
อุทปาทึ   ตตฺราปาสึ   เอวํนาโม  เอวํโคตฺโต  เอวํวณฺโณ  เอวมาหาโร
เอวํสุขทุกฺขปฏิสํเวที   เอวมายุปริยนฺโต   โส   ตโต  จุโต  อิธูปปนฺโนติ
อิติ   สาการํ   สอุทฺเทสํ  อเนกวิหิตํ  ปุพฺเพนิวาสํ  อนุสฺสรถาติ  ฯ  โน
เหตํ อาวุโส ฯ
     [๒๘๗]   อปิ  นุ  ตุเมฺห  อายสฺมนฺโต เอวํ ชานนฺตา เอวํ ปสฺสนฺตา
ทิพฺเพน  จกฺขุนา  วิสุทฺเธน  อติกฺกนฺตมานุสเกน  สตฺเต  ปสฺสถ  จวมาเน
อุปปชฺชมาเน    หีเน   ปณีเต   สุวณฺเณ   ทุพฺพณฺเณ   สุคเต   ทุคฺคเต
ยถากมฺมูปเค  สตฺเต  ปชานาถ  อิเม  วต  โภนฺโต สตฺตา กายทุจฺจริเตน
สมนฺนาคตา   วจีทุจฺจริเตน   สมนฺนาคตา   มโนทุจฺจริเตน   สมนฺนาคตา
อริยานํ    อุปวาทกา    มิจฺฉาทิฏฺฐิกา    มิจฺฉาทิฏฺฐิกมฺมสมาทานา   เต
กายสฺส   เภทา   ปรํ  มรณา  อปายํ  ทุคฺคตึ  วินิปาตํ  นิรยํ  อุปปนฺนา
อิเม  วา  ปน  โภนฺโต  สตฺตา  กายสุจริเตน  สมนฺนาคตา  วจีสุจริเตน
สมนฺนาคตา     มโนสุจริเตน    สมนฺนาคตา    อริยานํ    อนุปวาทกา
สมฺมาทิฏฺฐิกา    สมฺมาทิฏฺฐิกมฺมสมาทานา   เต   กายสฺส   เภทา   ปรํ
มรณา   สุคตึ  สคฺคํ  โลกํ  อุปปนฺนาติ  อิติ  ทิพฺเพน  จกฺขุนา  วิสุทฺเธน
อติกฺกนฺตมานุสเกน    สตฺเต   ปสฺสถ   จวมาเน   อุปปชฺชมาเน   หีเน
ปณีเต   สุวณฺเณ   ทุพฺพณฺเณ   สุคเต   ทุคฺคเต   ยถากมฺมูปเค   สตฺเต
ปชานาถาติ ฯ โน เหตํ อาวุโส ฯ
     [๒๘๘]   อปิ  นุ  ตุเมฺห  อายสฺมนฺโต เอวํ ชานนฺตา เอวํ ปสฺสนฺตา
เย   เต   สนฺตา   วิโมกฺขา  อติกฺกมฺม  รูเป  อารุปฺปา  เต  กาเยน
ผุสิตฺวา วิหรถาติ ฯ โน เหตํ อาวุโส ฯ
     [๒๘๙]   เอตฺถทานิ   อายสฺมนฺโต  อิทญฺจ  เวยฺยากรณํ  อิเมสญฺจ
ธมฺมานํ  อสมาปตฺติ  [๑]-  อิทํ  โน  อาวุโส  กถนฺติ  ฯ  ปญฺญาวิมุตฺตา
โข   มยํ   อาวุโส   สุสิมาติ   ฯ   น   ขฺวาหํ  อิมสฺส  อายสฺมนฺตานํ
สงฺขิตฺเตน    ภาสิตสฺส    วิตฺถาเรน   อตฺถํ   อาชานามิ   สาธุ   เม
อายสฺมนฺโต  ตถา  ภาสนฺตุ  ยถา  ๒-  อิมสฺส  อายสฺมนฺตานํ  สงฺขิตฺเตน
@เชิงอรรถ:  ยุ. อิทนฺเต อาวุโส อปิ ปน ตุเมฺห อายสฺมนฺโต เอวํ ชานนฺตา เอวํ ปสฺสนฺตา เย
@เต สนฺตา วิโมกฺขา อติกฺกมฺม รูเป อารุปฺปา เต กาเยน ปสฺสิตฺวา วิหรถาติ ฯ
@โน เหตํ อาวุโส ฯ เอตฺถทานิ อายสฺมนฺโต อิทญฺจ เวยฺยากรณํ อิเมสญฺจ ธมฺมานํ
@อสมาปตฺติ ฯ   ม. ยุ. ยถาหํ ฯ
ภาสิตสฺส   วิตฺถาเรน   อตฺถํ   อาชาเนยฺยนฺติ   ฯ  อาชาเนยฺยาสิ  วา
ตฺวํ  อาวุโส  สุสิม  น  วา  ตฺวํ  อาชาเนยฺยาสิ  อถ  โข ปญฺญาวิมุตฺตา
มยนฺติ ฯ
     [๒๙๐]   อถ  โข  อายสฺมา  สุสิโม  อุฏฺฐายาสนา  เยน  ภควา
เตนุปสงฺกมิ   อุปสงฺกมิตฺวา   ภควนฺตํ  อภิวาเทตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข   อายสฺมา   สุสิโม   ยาวตโก  เตหิ  ภิกฺขูหิ
สทฺธึ   อโหสิ   กถาสลฺลาโป  ตํ  สพฺพํ  ภควโต  อาโรเจสิ  ฯ  ปุพฺเพ
โข    สุสิม    ธมฺมฏฺฐิติญาณํ    ปจฺฉา   นิพฺพาเน   ญาณนฺติ   ฯ   น
ขฺวาหํ  ภนฺเต  อิมสฺส  ภควตา  ๑-  สงฺขิตฺเตน ภาสิตสฺส วิตฺถาเรน อตฺถํ
อาชานามิ   สาธุ   เม   ภนฺเต   ภควา  ตถา  ภาสตุ  ยถาหํ  อิมสฺส
ภควตา ๑- สงฺขิตฺเตน ภาสิตสฺส วิตฺถาเรน อตฺถํ อาชาเนยฺยนฺติ ฯ
     [๒๙๑]   อาชาเนยฺยาสิ  วา  สุสิม  น  วา  ตฺวํ  อาชาเนยฺยาสิ
อถ   โข   ธมฺมฏฺฐิติญาณํ   ปุพฺเพ   ปจฺฉา   นิพฺพาเน   ญาณํ   ฯ  ตํ
กึ   มญฺญสิ  สุสิม  รูปํ  นิจฺจํ  วา  อนิจฺจํ  วาติ  ฯ  อนิจฺจํ  ภนฺเต  ฯ
ยํ   ปนานิจฺจํ   ทุกฺขํ   วา   ตํ   สุขํ  วาติ  ฯ  ทุกฺขํ  ภนฺเต  ฯ  ยํ
ปนานิจฺจํ    ทุกฺขํ   วิปริณามธมฺมํ   กลฺลํ   นุ   ตํ   สมนุปสฺสิตุํ   เอตํ
มม  เอโสหมสฺมิ  เอโส  เม  อตฺตาติ  ฯ  โน  เหตํ  ภนฺเต ฯ เวทนา
นิจฺจา   วา   อนิจฺจา   วาติ   ฯ   อนิจฺจา  ภนฺเต  ฯ  ยํ  ปนานิจฺจํ
ทุกฺขํ   วา   ตํ   สุขํ  วาติ  ฯ  ทุกฺขํ  ภนฺเต  ฯ  ยํ  ปนานิจฺจํ  ทุกฺขํ
วิปริณามธมฺมํ   กลฺลํ   นุ   ตํ   สมนุปสฺสิตุํ   เอตํ   มม   เอโสหมสฺมิ
@เชิงอรรถ:  ยุ. ภควโต ฯ
เอโส   เม   อตฺตาติ   ฯ  โน  เหตํ  ภนฺเต  ฯ  สญฺญา  นิจฺจา  วา
อนิจฺจา   วาติ   ฯ   อนิจฺจา   ภนฺเต   ฯเปฯ  สงฺขารา  นิจฺจา  วา
อนิจฺจา   วาติ   ฯ   อนิจฺจา  ภนฺเต  ฯ  ยํ  ปนานิจฺจํ  ทุกฺขํ  วา  ตํ
สุขํ   วาติ   ฯ   ทุกฺขํ   ภนฺเต  ฯ  ยํ  ปนานิจฺจํ  ทุกฺขํ  วิปริณามธมฺมํ
กลฺลํ  นุ  ตํ  สมนุปสฺสิตุํ  เอตํ  มม  เอโสหมสฺมิ  เอโส  เม อตฺตาติ ฯ
โน   เหตํ   ภนฺเต   ฯ  วิญฺญาณํ  นิจฺจํ  วา  อนิจฺจํ  วาติ  ฯ  อนิจฺจํ
ภนฺเต  ฯ  ยํ  ปนานิจฺจํ  ทุกฺขํ  วา  ตํ  สุขํ  วาติ  ฯ  ทุกฺขํ  ภนฺเต ฯ
ยํ    ปนานิจฺจํ    ทุกฺขํ    วิปริณามธมฺมํ   กลฺลํ   นุ   ตํ   สมนุปสฺสิตุํ
เอตํ มม เอโสหมสฺมิ เอโส เม อตฺตาติ ฯ โน เหตํ ภนฺเต ฯ
     [๒๙๒]   ตสฺมาติห   สุสิม   ยงฺกิญฺจิ   รูปํ  อตีตานาคตปจฺจุปฺปนฺนํ
อชฺฌตฺตํ   วา  พหิทฺธา  วา  โอฬาริกํ  วา  สุขุมํ  วา  หีนํ  วา  ปณีตํ
วา   ยํ   ทูเร   สนฺติเก  วา  สพฺพํ  รูปํ  เนตํ  มม  เนโสหมสฺมิ  น
เมโส    อตฺตาติ    เอวเมตํ   ยถาภูตํ   สมฺมปฺปญฺญาย   ทฏฺฐพฺพํ   ฯ
ยากาจิ    เวทนา   อตีตานาคตปจฺจุปฺปนฺนา   อชฺฌตฺตา   วา   พหิทฺธา
วา   โอฬาริกา   วา  สุขุมา  วา  หีนา  วา  ปณีตา  วา  ยา  ทูเร
สนฺติเก   วา   สพฺพา   เวทนา   เนตํ   มม  เนโสหมสฺมิ  น  เมโส
อตฺตาติ    เอวเมตํ   ยถาภูตํ   สมฺมปฺปญฺญาย   ทฏฺฐพฺพํ   ฯ   ยากาจิ
สญฺญา   ฯเปฯ   เยเกจิ   สงฺขารา   อตีตานาคตปจฺจุปฺปนฺนา  อชฺฌตฺตา
วา  พหิทฺธา  วา  โอฬาริกา  วา  สุขุมา  วา  หีนา  วา  ปณีตา  วา
เย   ทูเร   สนฺติเก   วา   สพฺเพ  สงฺขารา  เนตํ  มม  เนโสหมสฺมิ
น   เมโส   อตฺตาติ   เอวเมตํ   ยถาภูตํ   สมฺมปฺปญฺญาย  ทฏฺฐพฺพํ  ฯ
ยงฺกิญฺจิ    วิญฺญาณํ    อตีตานาคตปจฺจุปฺปนฺนํ    อชฺฌตฺตํ   วา   พหิทฺธา
วา  โอฬาริกํ  วา  สุขุมํ  วา  หีนํ  วา  ปณีตํ  วา  ยํ  ทูเร  สนฺติเก
วา   สพฺพํ   วิญฺญาณํ   เนตํ   มม   เนโสหมสฺมิ   น  เมโส  อตฺตาติ
เอวเมตํ ยถาภูตํ สมฺมปฺปญฺญาย ทฏฺฐพฺพํ ฯ
     [๒๙๓]   เอวํ  ปสฺสํ  สุสิม  สุตวา  อริยสาวโก  รูปสฺมึปิ นิพฺพินฺทติ
เวทนายปิ    นิพฺพินฺทติ   สญฺญายปิ   นิพฺพินฺทติ   สงฺขาเรสุปิ   นิพฺพินฺทติ
วิญฺญาณสฺมึปิ    นิพฺพินฺทติ    นิพฺพินฺทํ   วิรชฺชติ   วิราคา   วิมุจฺจติ   ฯ
วิมุตฺตสฺมึ    วิมุตฺตมิติ   ๑-   ญาณํ   โหติ   ฯ   ขีณา   ชาติ   วุสิตํ
พฺรหฺมจริยํ กตํ กรณียํ นาปรํ อิตฺถตฺตายาติ ปชานาติ ฯ
     [๒๙๔]   ชาติปจฺจยา  ชรามรณนฺติ  สุสิม  ปสฺสสีติ ฯ เอวํ ภนฺเต ฯ
ภวปจฺจยา  ชาตีติ  สุสิม  ปสฺสสีติ  ฯ  เอวํ  ภนฺเต  ฯ  อุปาทานปจฺจยา
ภโวติ    สุสิม    ปสฺสสีติ    ฯ    เอวํ   ภนฺเต   ฯ   ตณฺหาปจฺจยา
อุปาทานนฺติ   สุสิม   ปสฺสสีติ   ฯ   เอวํ   ภนฺเต   ฯ  เวทนาปจฺจยา
ตณฺหาติ    ...    ผสฺสปจฺจยา    เวทนาติ    ...   สฬายตนปจฺจยา
ผสฺโสติ    ...   นามรูปปจฺจยา   สฬายตนนฺติ   ...   วิญฺญาณปจฺจยา
นามรูปนฺติ   ...   สงฺขารปจฺจยา   วิญฺญาณนฺติ   ...   อวิชฺชาปจฺจยา
สงฺขาราติ สุสิม ปสฺสสีติ ฯ เอวํ ภนฺเต ฯ
     [๒๙๕]   ชาตินิโรธา  ชรามรณนิโรโธติ  สุสิม  ปสฺสสีติ  ฯ  เอวํ
@เชิงอรรถ:  วิมุตฺตมฺหีติ วา ปาโฐ ฯ
ภนฺเต  ฯ  ภวนิโรธา  ชาตินิโรโธติ  สุสิม  ปสฺสสีติ  ฯ  เอวํ  ภนฺเต ฯ
อุปาทานนิโรธา  ภวนิโรโธติ  ...  ตณฺหานิโรธา  อุปาทานนิโรโธติ ...
เวทนานิโรธา  ตณฺหานิโรโธติ  ...  ผสฺสนิโรธา  เวทนานิโรโธติ  ...
สฬายตนนิโรธา  ผสฺสนิโรโธติ  ... นามรูปนิโรธา สฬายตนนิโรโธติ ...
วิญฺญาณนิโรธา  นามรูปนิโรโธติ  ... สงฺขารนิโรธา วิญฺญาณนิโรโธติ ...
อวิชฺชานิโรธา สงฺขารนิโรโธติ สุสิม ปสฺสสีติ ฯ เอวํ ภนฺเต ฯ
     [๒๙๖]   อปิ  นุ  โข  ตฺวํ  สุสิม  เอวํ  ชานนฺโต  เอวํ ปสฺสนฺโต
อเนกวิหิตํ   อิทฺธิวิธํ  ปจฺจนุโภสิ  เอโกปิ  หุตฺวา  พหุธา  โหสิ  พหุธาปิ
หุตฺวา   เอโก   โหสิ   อาวิภาวํ   ติโรภาวํ   ติโรกุฑฺฑํ   ติโรปาการํ
ติโรปพฺพตํ    อสชฺชมาโน    คจฺฉสิ   เสยฺยถาปิ   อากาเส   ปฐวิยาปิ
อุมฺมุชฺชนิมฺมุชฺชํ    กโรสิ    เสยฺยถาปิ   อุทเก   อุทเกปิ   อภิชฺชมาเน
คจฺฉสิ   เสยฺยถาปิ   ปฐวิยํ   อากาเสปิ   ปลฺลงฺเกน  กมสิ  เสยฺยถาปิ
ปกฺขี    สกุโณ   อิเมปิ   จนฺทิมสุริเย   เอวํมหิทฺธิเก   เอวํมหานุภาเว
ปาณินา    ปริมสสิ    ปริมชฺชสิ   ยาว   พฺรหฺมโลกาปิ   กาเยน   วสํ
วตฺเตสีติ ฯ โน เหตํ ภนฺเต ฯ
     [๒๙๗]   อปิ   นุ   ตฺวํ  สุสิม  เอวํ  ชานนฺโต  เอวํ  ปสฺสนฺโต
ทิพฺพาย     โสตธาตุยา     วิสุทฺธาย     อติกฺกนฺตมานุสิกาย     อุโภ
สทฺเท   สุณาสิ   ทิพฺเพ  จ  มานุเส  จ  เย  ทูเร  สนฺติเก  จาติ  ฯ
โน เหตํ ภนฺเต ฯ
     [๒๙๘]   อปิ   นุ   ตฺวํ  สุสิม  เอวํ  ชานนฺโต  เอวํ  ปสฺสนฺโต
ปรสตฺตานํ   ปรปุคฺคลานํ   เจตสา   เจโต   ปริจฺจ   ชานาสิ   สราคํ
วา   จิตฺตํ   สราคํ   จิตฺตนฺติ   ปชานาสิ   ฯเปฯ  อวิมุตฺตํ  วา  จิตฺตํ
อวิมุตฺตํ จิตฺตนฺติ ปชานาสีติ ฯ โน เหตํ ภนฺเต ฯ
     [๒๙๙]   อปิ   นุ   ตฺวํ  สุสิม  เอวํ  ชานนฺโต  เอวํ  ปสฺสนฺโต
อเนกวิหิตํ   ปุพฺเพนิวาสํ   อนุสฺสรสิ   เสยฺยถีทํ   เอกมฺปิ  ชาตึ  ฯเปฯ
อิติ    สาการํ   สอุทฺเทสํ   อเนกวิหิตํ   ปุพฺเพนิวาสํ   อนุสฺสรสีติ   ฯ
โน เหตํ ภนฺเต ฯ
     [๓๐๐]   อปิ  นุ  ตฺวํ  สุสิม  เอวํ ชานนฺโต เอวํ ปสฺสนฺโต ทิพฺเพน
จกฺขุนา   วิสุทฺเธน  อติกฺกนฺตมานุสเกน  สตฺเต  ปสฺสสิ  จวมาเน  ฯเปฯ
ยถากมฺมูปเค สตฺเต ปชานาสีติ ฯ โน เหตํ ภนฺเต ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๖ หน้าที่ ๑-๑๕๕. http://84000.org/tipitaka/pali/pali_item_s.php?book=16&item=1&items=727&modeTY=2&mode=bracket              อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/pali/pali_item_s.php?book=16&item=1&items=727&modeTY=2              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=16&item=1&items=727&modeTY=2&mode=bracket              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=16&item=1&items=727&modeTY=2&mode=bracket              ศึกษาอรรถกถานี้ได้ที่ :- http://84000.org/tipitaka/attha/attha.php?b=16&i=1              The Pali Atthakatha in Thai :- http://84000.org/tipitaka/atthapali/read_th.php?B=12&A=1              The Pali Atthakatha in Roman :- http://84000.org/tipitaka/atthapali/read_rm.php?B=12&A=1              สารบัญพระไตรปิฎกเล่มที่ ๑๖ http://84000.org/tipitaka/read/?index_16

แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :