ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๑ ภาษาบาลี อักษรไทย พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค
                                            มหาวคฺเค ทิฏฺฐิกถา
                                                 --------
     [๒๙๔]   กติ    ทิฏฺฐิฏฺฐานานิ    กติ   ทิฏฺฐิปริยุฏฺฐานานิ   กติ
ทิฏฺฐิโย   กติ   ทิฏฺฐาภินิเวสา   กตโม   ทิฏฺฐิฏฺฐานสมุคฺฆาโต  ๓-  กติ
อภินิเวสปรามาโส ทิฏฺฐิ ฯ
     {๒๙๔.๑}   กติ   ทิฏฺฐิฏฺฐานานีติ   อฏฺฐ   ทิฏฺฐิฏฺฐานานิ  ฯ  กติ
ทิฏฺฐิปริยุฏฺฐานานีติ   อฏฺฐารส   ทิฏฺฐิปริยุฏฺฐานานิ   ฯ   กติ   ทิฏฺฐิโยติ
โสฬส   ทิฏฺฐิโย   ฯ   กติ  ทิฏฺฐาภินิเวสาติ  ตึสสตํ  ทิฏฺฐาภินิเวสา  ฯ
กตโม ทิฏฺฐิฏฺฐานสมุคฺฆาโตติ โสตาปตฺติมคฺโค ทิฏฺฐิฏฺฐานสมุคฺฆาโต ฯ
@เชิงอรรถ: ๑-๒ เหฏฺฐาวุตฺเตน เวทิตพฺพํ ฯ  ม. ยุ. ... สมุคฺฆาโตติ กา ทิฏฺฐีติ
@อภินิเวส ... ฯ
     [๒๙๕]   กติ  ๑-  อภินิเวสปรามาโส  ทิฏฺฐีติ  ๒-  รูปํ  เอตํ มม
เอโสหมสฺมิ   เอโส   เม   อตฺตาติ   อภินิเวสปรามาโส  ทิฏฺฐิ  เวทนํ
เอตํ  มม  ฯเปฯ  สญฺญํ  เอตํ  มม  สงฺขาเร  เอตํ  มม  วิญฺญาณํ เอตํ
มม  เอโสหมสฺมิ  เอโส  เม  อตฺตาติ  อภินิเวสปรามาโส  ทิฏฺฐิ ฯ จกฺขุํ
เอตํ  มม  โสตํ  เอตํ  มม  ฆานํ  เอตํ  มม  ชิวฺหํ เอตํ มม กายํ เอตํ
มม  มนํ  เอตํ  มม  เอโสหมสฺมิ  เอโส  เม อตฺตาติ อภินิเวสปรามาโส
ทิฏฺฐิ  ฯ  รูปํ  ๓-  เอตํ  มม  สทฺทํ  เอตํ  มม คนฺธํ เอตํ มม รสํ เอตํ
มม   โผฏฺฐพฺพํ   เอตํ  มม  ธมฺมํ  เอตํ  มม  เอโสหมสฺมิ  เอโส  เม
อตฺตาติ อภินิเวสปรามาโส ทิฏฺฐิ ฯ
     [๒๙๖]   จกฺขุวิญฺญาณํ   เอตํ   มม   โสตวิญฺญาณํ   เอตํ   มม
ฆานวิญฺญาณํ    เอตํ    มม   ชิวฺหาวิญฺญาณํ   เอตํ   มม   กายวิญฺญาณํ
เอตํ   มม   มโนวิญฺญาณํ  เอตํ  มม  เอโสหมสฺมิ  เอโส  เม  อตฺตาติ
อภินิเวสปรามาโส   ทิฏฺฐิ   ฯ   จกฺขุสมฺผสฺสํ   เอตํ   มม  โสตสมฺผสฺสํ
เอตํ    มม    ฆานสมฺผสฺสํ   เอตํ   มม   ชิวฺหาสมฺผสฺสํ   เอตํ   มม
กายสมฺผสฺสํ    เอตํ    มม    มโนสมฺผสฺสํ   เอตํ   มม   เอโสหมสฺมิ
เอโส   เม   อตฺตาติ   อภินิเวสปรามาโส   ทิฏฺฐิ   ฯ   จกฺขุสมฺผสฺสชํ
เวทนํ       โสตสมฺผสฺสชํ      เวทนํ      ฆานสมฺผสฺสชํ      เวทนํ
ชิวฺหาสมฺผสฺสชํ     เวทนํ     กายสมฺผสฺสชํ     เวทนํ    มโนสมฺผสฺสชํ
@เชิงอรรถ:  ม. ยุ. กถํ ฯ  ม. ยุ. อิติสทฺโท นตฺถิ ฯ  ม. รูเป ฯ
เวทนํ  เอตํ  มม  เอโสหมสฺมิ  เอโส  เม  อตฺตาติ  อภินิเวสปรามาโส
ทิฏฺฐิ ฯ
     [๒๙๗]   รูปสญฺญํ   เอตํ   มม   สทฺทสญฺญํ   คนฺธสญฺญํ   รสสญฺญํ
โผฏฺฐพฺพสญฺญํ    เอตํ    มม    เอโสหมสฺมิ    เอโส   เม   อตฺตาติ
อภินิเวสปรามาโส   ทิฏฺฐิ   ฯ   รูปสญฺเจตนํ   เอตํ  มม  สทฺทสญฺเจตนํ
คนฺธสญฺเจตนํ      รสสญฺเจตนํ      โผฏฺฐพฺพสญฺเจตนํ     ธมฺมสญฺเจตนํ
เอตํ   มม   เอโสหมสฺมิ   เอโส   เม   อตฺตาติ   อภินิเวสปรามาโส
ทิฏฺฐิ   ฯ   รูปตณฺหํ   เอตํ   มม   สทฺทตณฺหํ   เอตํ   มม   คนฺธตณฺหํ
รสตณฺหํ    โผฏฺฐพฺพตณฺหํ    เอตํ    มม    เอโสหมสฺมิ   เอโส   เม
อตฺตาติ    อภินิเวสปรามาโส    ทิฏฺฐิ    ฯ    รูปวิตกฺกํ   เอตํ   มม
สทฺทวิตกฺกํ     คนฺธวิตกฺกํ     รสวิตกฺกํ    โผฏฺฐพฺพวิตกฺกํ    ธมฺมวิตกฺกํ
เอตํ   มม   เอโสหมสฺมิ   เอโส   เม   อตฺตาติ   อภินิเวสปรามาโส
ทิฏฺฐิ   ฯ   รูปวิจารํ   เอตํ   มม   สทฺทวิจารํ  เอตํ  มม  คนฺธวิจารํ
เอตํ   มม  รสวิจารํ  เอตํ  มม  โผฏฺฐพฺพวิจารํ  เอตํ  มม  ธมฺมวิจารํ
เอตํ มม เอโสหมสฺมิ เอโส เม อตฺตาติ อภินิเวสปรามาโส ทิฏฺฐิ ฯ
     [๒๙๘]   ปฐวีธาตุํ  เอตํ  มม  อาโปธาตุํ  เอตํ  มม  เตโชธาตุํ
เอตํ    มม    วาโยธาตุํ    เอตํ    มม   อากาสธาตุํ   เอตํ   มม
วิญฺญาณธาตุํ     เอตํ    มม    เอโสหมสฺมิ    เอโส   เม   อตฺตาติ
อภินิเวสปรามาโส    ทิฏฺฐิ    ฯ    ปฐวีกสิณํ   อาโปกสิณํ   เตโชกสิณํ
วาโยกสิณํ      นีลกสิณํ      ปีตกสิณํ      โลหิตกสิณํ     โอทาตกสิณํ
อากาสกสิณํ     วิญฺญาณกสิณํ     เอตํ    มม    เอโสหมสฺมิ    เอโส
เม อตฺตาติ อภินิเวสปรามาโส ทิฏฺฐิ ฯ
     [๒๙๙]   เกสํ   เอตํ   มม   โลมํ  เอตํ  มม  นขํ  เอตํ  มม
ทนฺตํ   เอตํ   มม   ตจํ   เอตํ   มม   มํสํ  เอตํ  มม  นหารุํ  เอตํ
มม   อฏฺฐึ   เอตํ   มม   อฏฺฐิมิญฺชํ   เอตํ   มม   วกฺกํ   เอตํ  มม
หทยํ   เอตํ   มม   ยกนํ   เอตํ   มม   กิโลมกํ   เอตํ   มม  ปิหกํ
เอตํ    ฯเปฯ    เขฬํ    เอตํ   มม   สึฆาณิกํ   เอตํ   มม   ลสิกํ
เอตํ   มม   มุตฺตํ   เอตํ   มม   มตฺถลุงฺคํ   เอตํ   มม  เอโสหมสฺมิ
เอโส เม อตฺตาติ อภินิเวสปรามาโส ทิฏฺฐิ ฯ
     [๓๐๐]   จกฺขายตนํ  เอตํ  มม  รูปายตนํ  เอตํ  มม  โสตายตนํ
เอตํ    มม    สทฺทายตนํ    เอตํ    มม    ฆานายตนํ   เอตํ   มม
คนฺธายตนํ     เอตํ     มม     ชิวฺหายตนํ    รสายตนํ    กายายตนํ
โผฏฺฐพฺพายตนํ     มนายตนํ    ธมฺมายตนํ    เอตํ    มม    จกฺขุธาตุํ
เอตํ    มม    รูปธาตุํ    เอตํ   มม   จกฺขุวิญฺญาณธาตุํ   เอตํ   มม
โสตธาตุํ    เอตํ    มม    สทฺทธาตุํ    เอตํ   มม   โสตวิญฺญาณธาตุํ
เอตํ    มม    ฆานธาตุํ    คนฺธธาตุํ    ฆานวิญฺญาณธาตุํ    ชิวฺหาธาตุํ
รสธาตุํ        ชิวฺหาวิญฺญาณธาตุํ        กายธาตุํ       โผฏฺฐพฺพธาตุํ
กายวิญฺญาณธาตุํ    มโนธาตุํ    เอตํ    มม    ธมฺมธาตุํ   เอตํ   มม
มโนวิญฺญาณธาตุํ    เอตํ    มม   เอโสหมสฺมิ   เอโส   เม   อตฺตาติ
อภินิเวสปรามาโส ทิฏฺฐิ ฯ
     [๓๐๑]   จกฺขุนฺทฺริยํ  เอตํ  มม  โสตินฺทฺริยํ  เอตํ  มม  ฆานินฺทฺริยํ
เอตํ    มม    ชิวฺหินฺทฺริยํ   กายินฺทฺริยํ   ชีวิตินฺทฺริยํ   โสมนสฺสินฺทฺริยํ
โทมนสฺสินฺทฺริยํ   อุเปกฺขินฺทฺริยํ  สทฺธินฺทฺริยํ  วิริยินฺทฺริยํ  สตินฺทฺริยํ
สมาธินฺทฺริยํ    ปญฺญินฺทฺริยํ    เอตํ    มม   เอโสหมสฺมิ   เอโส   เม
อตฺตาติ อภินิเวสปรามาโส ทิฏฺฐิ ฯ
     [๓๐๒]   กามธาตุํ   เอตํ   มม   รูปธาตุํ  เอตํ  มม  อรูปธาตุํ
เอตํ    มม   กามภวํ   เอตํ   มม   รูปภวํ   เอตํ   มม   สญฺญาภวํ
เอตํ     มม     อสญฺญาภวํ     เอตํ    มม    เนวสญฺญานาสญฺญาภวํ
เอตํ   มม   เอกโวการภวํ   เอตํ   มม   จตุโวการภวํ   เอตํ   มม
ปญฺจโวการภวํ    เอตํ    มม    ปฐมชฺฌานํ   เอตํ   มม   ทุติยชฺฌานํ
เอตํ    มม    ตติยชฺฌานํ    เอตํ    มม   จตุตฺถชฺฌานํ   เอตํ   มม
เมตฺตาเจโตวิมุตฺตึ    เอตํ    มม    กรุณาเจโตวิมุตฺตึ    เอตํ    มม
มุทิตาเจโตวิมุตฺตึ    เอตํ    มม    อุเปกฺขาเจโตวิมุตฺตึ    เอตํ   มม
อากาสานญฺจายตนสมาปตฺตึ วิญฺญาณญฺจายตนสมาปตฺตึ
อากิญฺจญฺญายตนสมาปตฺตึ เนวสญฺญานาสญฺญายตนสมาปตฺตึ
เอตํ มม เอโสหมสฺมิ เอโส เม อตฺตาติ อภินิเวสปรามาโส ทิฏฺฐิ ฯ
     [๓๐๓]   อวิชฺชํ   เอตํ   มม   สงฺขาเร   เอตํ   มม  วิญฺญาณํ
เอตํ   มม  นามรูปํ  เอตํ  มม  สฬายตนํ  เอตํ  มม  ผสฺสํ  เอตํ  มม
เวทนํ   เอตํ   มม  ตณฺหํ  เอตํ  มม  อุปาทานํ  เอตํ  มม  ภวํ  เอตํ
มม   ชาตึ   เอตํ  มม  ชรามรณํ  เอตํ  มม  เอโสหมสฺมิ  เอโส  เม
อตฺตาติ อภินิเวสปรามาโส ทิฏฺฐิ เอวํ อภินิเวสปรามาโส ทิฏฺฐิ ฯ
     [๓๐๔]   กตมานิ   อฏฺฐ   ทิฏฺฐิฏฺฐานานิ  ฯ  ขนฺธาปิ  ทิฏฺฐิฏฺฐานํ
อวิชฺชาปิ    ทิฏฺฐิฏฺฐานํ    ผสฺโสปิ    ทิฏฺฐิฏฺฐานํ   สญฺญาปิ   ทิฏฺฐิฏฺฐานํ
วิตกฺกาปิ     ๑-     ทิฏฺฐิฏฺฐานํ     อโยนิโสมนสิกาโรปิ    ทิฏฺฐิฏฺฐานํ
ปาปมิตฺโตปิ ทิฏฺฐิฏฺฐานํ ปรโตโฆโสปิ ทิฏฺฐิฏฺฐานํ ฯ
     {๓๐๔.๑}   ขนฺธา   เหตุ  ขนฺธา  ปจฺจโย  ทิฏฺฐิฏฺฐานํ  อุปาทาย
สมุฏฺฐานฏฺเฐน   เอวํ   ขนฺธาปิ   ทิฏฺฐิฏฺฐานํ   อวิชฺชา   เหตุ  อวิชฺชา
ปจฺจโย    ทิฏฺฐิฏฺฐานํ    อุปาทาย    สมุฏฺฐานฏฺเฐน   เอวํ   อวิชฺชาปิ
ทิฏฺฐิฏฺฐานํ    ผสฺโส   เหตุ   ผสฺโส   ปจฺจโย   ทิฏฺฐิฏฺฐานํ   อุปาทาย
สมุฏฺฐานฏฺเฐน    เอวํ   ผสฺโสปิ   ทิฏฺฐิฏฺฐานํ   สญฺญา   เหตุ   สญฺญา
ปจฺจโย    ทิฏฺฐิฏฺฐานํ    อุปาทาย    สมุฏฺฐานฏฺเฐน    เอวํ   สญฺญาปิ
ทิฏฺฐิฏฺฐานํ   วิตกฺกา  ๒-  เหตุ  วิตกฺกา  ปจฺจโย  ทิฏฺฐิฏฺฐานํ  อุปาทาย
สมุฏฺฐานฏฺเฐน    เอวํ    วิตกฺกาปิ    ทิฏฺฐิฏฺฐานํ    อโยนิโสมนสิกาโร
เหตุ      อโยนิโสมนสิกาโร     ปจฺจโย     ทิฏฺฐิฏฺฐานํ     อุปาทาย
สมุฏฺฐานฏฺเฐน       เอวํ       อโยนิโสมนสิกาโรปิ       ทิฏฺฐิฏฺฐานํ
ปาปมิตฺโต    เหตุ    ปาปมิตฺโต    ปจฺจโย    ทิฏฺฐิฏฺฐานํ    อุปาทาย
สมุฏฺฐานฏฺเฐน    เอวํ   ปาปมิตฺโตปิ   ทิฏฺฐิฏฺฐานํ   ปรโตโฆโส   เหตุ
ปรโตโฆโส    ปจฺจโย   ทิฏฺฐิฏฺฐานํ   อุปาทาย   สมุฏฺฐานฏฺเฐน   เอวํ
@เชิงอรรถ:  ม. ยุ. วิตกฺโกปิ ฯ  ม. ยุ. วิตกฺโก ฯ เอวมุปริปิ ฯ
ปรโตโฆโสปิ ทิฏฺฐิฏฺฐานํ อิมานิ อฏฺฐ ทิฏฺฐิฏฺฐานานิ ฯ
     [๓๐๕]   กตมานิ   อฏฺฐารส   ทิฏฺฐิปริยุฏฺฐานานิ   ฯ  ยา  ทิฏฺฐิ
ทิฏฺฐิคตํ    ทิฏฺฐิคหนํ    ทิฏฺฐิกนฺตารํ    ทิฏฺฐิวิสูกํ    ทิฏฺฐิวิปนฺนตํ   ๑-
ทิฏฺฐิสญฺโญชนํ   ทิฏฺฐิสลฺลํ   ทิฏฺฐิสมฺภโว   ๒-   ทิฏฺฐิปลิโพโธ  ทิฏฺฐิพนฺธนํ
ทิฏฺฐิปปาโต    ทิฏฺฐานุสโย    ทิฏฺฐิสนฺตาโป   ทิฏฺฐิปริฬาโห   ทิฏฺฐิคณฺโฐ
ทิฏฺฐุปาทานํ     ทิฏฺฐาภินิเวโส    ทิฏฺฐิปรามาโส    อิมานิ    อฏฺฐารส
ทิฏฺฐิปริยุฏฺฐานานิ ฯ
     [๓๐๖]   กตมา   โสฬส   ทิฏฺฐิโย  ฯ  อสฺสาททิฏฺฐิ  อตฺตานุทิฏฺฐิ
มิจฺฉาทิฏฺฐิ        สกฺกายทิฏฺฐิ        สกฺกายวตฺถุกา       สสฺสตทิฏฺฐิ
สกฺกายวตฺถุกา    อุจฺเฉททิฏฺฐิ    อนฺตคฺคาหิกา    ทิฏฺฐิ   ปุพฺพนฺตานุทิฏฺฐิ
อปรนฺตานุทิฏฺฐิ    สญฺโญชนิกา    ทิฏฺฐิ    อหนฺติ   มานวินิพนฺธา   ทิฏฺฐิ
มมนฺติ    มานวินิพนฺธา   ทิฏฺฐิ   อตฺตวาทปฏิสํยุตฺตา   ทิฏฺฐิ   โลกวาท-
ปฏิสํยุตฺตา ทิฏฺฐิ ภวทิฏฺฐิ วิภวทิฏฺฐิ อิมา โสฬส ทิฏฺฐิโย ฯ [๓]-
     [๓๐๗]   อสฺสาททิฏฺฐิยา    กติหากาเรหิ    อภินิเวโส    โหติ
อตฺตานุทิฏฺฐิยา     กติหากาเรหิ    อภินิเวโส    โหติ    มิจฺฉาทิฏฺฐิยา
กติหากาเรหิ     อภินิเวโส    โหติ    สกฺกายทิฏฺฐิยา    กติหากาเรหิ
อภินิเวโส    โหติ    สกฺกายวตฺถุกาย    สสฺสตทิฏฺฐิยา    กติหากาเรหิ
อภินิเวโส    โหติ    สกฺกายวตฺถุกาย    อุจฺเฉททิฏฺฐิยา   กติหากาเรหิ
อภินิเวโส      โหติ     อนฺตคฺคาหิกาย     ทิฏฺฐิยา     กติหากาเรหิ
อภินิเวโส   โหติ   ปุพฺพนฺตานุทิฏฺฐิยา   กติหากาเรหิ   อภินิเวโส  โหติ
@เชิงอรรถ:  ม. ยุ. ทิฏฺฐิวิปฺผนฺทิตํ ฯ  ม. ยุ. ทิฏฺฐิสมฺพาโธ ฯ  ม. กตเม ตีณิ สตํ
@ทิฏฺฐาภินิเวสา ... ฯ
อปรนฺตานุทิฏฺฐิยา    กติหากาเรหิ    อภินิเวโส    โหติ   สญฺโญชนิกาย
ทิฏฺฐิยา    กติหากาเรหิ    อภินิเวโส   โหติ   อหนฺติ   มานวินิพนฺธาย
ทิฏฺฐิยา    กติหากาเรหิ    อภินิเวโส   โหติ   มมนฺติ   มานวินิพนฺธาย
ทิฏฺฐิยา     กติหากาเรหิ    อภินิเวโส    โหติ    อตฺตวาทปฏิสํยุตฺตาย
ทิฏฺฐิยา     กติหากาเรหิ    อภินิเวโส    โหติ    โลกวาทปฏิสํยุตฺตาย
ทิฏฺฐิยา   กติหากาเรหิ   อภินิเวโส   โหติ   ภวทิฏฺฐิยา   กติหากาเรหิ
อภินิเวโส โหติ วิภวทิฏฺฐิยา กติหากาเรหิ อภินิเวโส โหติ ฯ
     [๓๐๘]   อสฺสาททิฏฺฐิยา  ปญฺจตฺตึสาย  อากาเรหิ  อภินิเวโส  โหติ
อตฺตานุทิฏฺฐิยา   วีสติยา   อากาเรหิ   อภินิเวโส   โหติ  มิจฺฉาทิฏฺฐิยา
ทสหากาเรหิ      อภินิเวโส     โหติ     สกฺกายทิฏฺฐิยา     วีสติยา
อากาเรหิ     อภินิเวโส     โหติ    สกฺกายวตฺถุกาย    สสฺสตทิฏฺฐิยา
ปณฺณรสหิ      อากาเรหิ     อภินิเวโส     โหติ     สกฺกายวตฺถุกาย
อุจฺเฉททิฏฺฐิยา    ปญฺจหากาเรหิ    อภินิเวโส    โหติ   อนฺตคฺคาหิกาย
ทิฏฺฐิยา   ปญฺญาสาย   อากาเรหิ   อภินิเวโส   โหติ  ปุพฺพนฺตานุทิฏฺฐิยา
อฏฺฐารสหิ     อากาเรหิ     อภินิเวโส     โหติ    อปรนฺตานุทิฏฺฐิยา
จตุจตฺตาฬีสาย   อากาเรหิ   อภินิเวโส   โหติ   สญฺโญชนิกาย  ทิฏฺฐิยา
อฏฺฐารสหิ    อากาเรหิ    อภินิเวโส   โหติ   อหนฺติ   มานวินิพนฺธาย
ทิฏฺฐิยา     อฏฺฐารสหิ     อากาเรหิ    อภินิเวโส    โหติ    มมนฺติ
มานวินิพนฺธาย    ทิฏฺฐิยา   อฏฺฐารสหิ   อากาเรหิ   อภินิเวโส   โหติ
อตฺตวาทปฏิสํยุตฺตาย   ทิฏฺฐิยา   วีสติยา   อากาเรหิ   อภินิเวโส  โหติ
โลกวาทปฏิสํยุตฺตาย   ทิฏฺฐิยา   อฏฺฐหิ   อากาเรหิ   อภินิเวโส   โหติ
ภวทิฏฺฐิยา  เอกูนวีสติยา  อากาเรหิ  ๑-  อภินิเวโส  โหติ  วิภวทิฏฺฐิยา
เอกูนวีสติยา อากาเรหิ ๒- อภินิเวโส โหติ ฯ
     [๓๐๙]   อสฺสาททิฏฺฐิยา    กตเมหิ    ปญฺจตฺตึสาย   อากาเรหิ
อภินิเวโส   โหติ   ฯ   ยํ  รูปํ  ปฏิจฺจ  อุปฺปชฺชติ  สุขํ  โสมนสฺสํ  อยํ
รูปสฺส   อสฺสาโทติ   อภินิเวสปรามาโส   ทิฏฺฐิ   ทิฏฺฐิ   น   อสฺสาโท
อสฺสาโท    น   ทิฏฺฐิ   อญฺญา   ทิฏฺฐิ   อญฺโญ   อสฺสาโท   ยา   จ
ทิฏฺฐิ   โย   จ   อสฺสาโท   อยํ   วุจฺจติ   อสฺสาททิฏฺฐิ   อสฺสาททิฏฺฐิ
มิจฺฉาทิฏฺฐิ    ทิฏฺฐิวิปตฺติ   ตาย   ทิฏฺฐิวิปตฺติยา   สมนฺนาคโต   ปุคฺคโล
ทิฏฺฐิวิปนฺโน    ทิฏฺฐิวิปนฺโน   ปุคฺคโล   น   เสวิตพฺโพ   น   ภชิตพฺโพ
น    ปยิรุปาสิตพฺโพ    ตํ    กิสฺสเหตุ   ทิฏฺฐิ   หิสฺส   ปาปิกา   ยา
ทิฏฺฐิ   โย  ราโค  ๓-  โส  น  ทิฏฺฐิ  ทิฏฺฐิ  น  ราโค  อญฺญา  ทิฏฺฐิ
อญฺโญ   ราโค  ยา  จ  ทิฏฺฐิ  โย  จ  ราโค  อยํ  วุจฺจติ  ทิฏฺฐิราโค
ตาย    จ    ทิฏฺฐิยา    เตน   จ   ราเคน   สมนฺนาคโต   ปุคฺคโล
ทิฏฺฐิราครโต   ๔-   ทิฏฺฐิราครเต   ปุคฺคเล  ทินฺนทานํ  นมหปฺผลํ  โหติ
นมหานิสํสํ    ตํ    กิสฺสเหตุ    ทิฏฺฐิ    หิสฺส   ปาปิกา   อสฺสาททิฏฺฐิ
มิจฺฉาทิฏฺฐิ     มิจฺฉาทิฏฺฐิกสฺส    ปุริสปุคฺคลสฺส    เทฺว    จ    คติโย
นิรโย    วา    ติรจฺฉานโยนิ    วา    มิจฺฉาทิฏฺฐิกสฺส   ปุริสปุคฺคลสฺส
@เชิงอรรถ: ๑-๒ สี. ม. ยุ. เอเกน อากาเรน ฯ  ม. โย ทิฏฺฐิยา ราโค ฯ เอวมุปริปิ ฯ
@ ม. ยุ. ... ราครตฺโต ... ราครตฺเต ฯ
ยญฺเจว   กายกมฺมํ   ยถาทิฏฺฐิสมตฺตํ   ๑-   สมาทินฺนํ   ยญฺจ   วจีกมฺมํ
ยญฺจ   มโนกมฺมํ   ยถาทิฏฺฐิสมตฺตํ   สมาทินฺนํ   ยา   จ   เจตนา  ยา
จ   ปตฺถนา   โย   จ   ปณิธิ  เย  จ  สงฺขารา  สพฺเพ  เต  ธมฺมา
อนิฏฺฐาย    อกนฺตาย   อมนาปาย   อหิตาย   ทุกฺขาย   สํวตฺตนฺติ   ตํ
กิสฺสเหตุ    ทิฏฺฐิ    หิสฺส    ปาปิกา    เสยฺยถาปิ    นิมฺพพีชํ    วา
โกสาตกีพีชํ    วา   ติตฺตกลาพุพีชํ   วา   อลฺลาย   ปฐวิยา   นิกฺขิตฺตํ
ยญฺเจว    ปฐวีรสํ   อุปาทิยติ   ยญฺจ   อาโปรสํ   อุปาทิยติ   สพฺพนฺตํ
ติตฺตกตาย   กฏุกตาย   อสารตาย   ๒-   สํวตฺตติ   ตํ  กิสฺสเหตุ  พีชํ
หิสฺส    ปาปิกํ    เอวเมว    มิจฺฉาทิฏฺฐิกสฺส   ปุริสปุคฺคลสฺส   ยญฺเจว
กายกมฺมํ     ยถาทิฏฺฐิสมตฺตํ     สมาทินฺนํ    ยญฺจ    วจีกมฺมํ    ยญฺจ
มโนกมฺมํ    ยถาทิฏฺฐิสมตฺตํ   สมาทินฺนํ   ยา   จ   เจตนา   ยา   จ
ปตฺถนา   โย   จ   ปณิธิ   เย   จ   สงฺขารา   สพฺเพ  เต  ธมฺมา
อนิฏฺฐาย    อกนฺตาย   อมนาปาย   อหิตาย   ทุกฺขาย   สํวตฺตนฺติ   ตํ
กิสฺสเหตุ    ทิฏฺฐิ    หิสฺส    ปาปิกา   อสฺสาททิฏฺฐิ   มิจฺฉาทิฏฺฐิ   ยา
ทิฏฺฐิ ๓- ทิฏฺฐิคตํ ทิฏฺฐิคหนํ ฯเปฯ ทิฏฺฐาภินิเวสปรามาโส โหติ ฯ
     [๓๑๐]   ยํ   เวทนํ   ปฏิจฺจ   ยํ   สญฺญํ  ปฏิจฺจ  ยํ  สงฺขาเร
ปฏิจฺจ    ยํ    วิญฺญาณํ    ปฏิจฺจ    ยํ    จกฺขุํ   ปฏิจฺจ   ยํ   โสตํ
ปฏิจฺจ   ยํ   ฆานํ   ปฏิจฺจ   ยํ   ชิวฺหํ   ปฏิจฺจ   ยํ   กายํ   ปฏิจฺจ
ยํ   มนํ   ปฏิจฺจ   ยํ   รูเป   ปฏิจฺจ   ยํ  สทฺเท  ปฏิจฺจ  ยํ  คนฺเธ
@เชิงอรรถ:  สี. ยถาทิฏฺฐิสมฺปตฺตํ ฯ  ม. อสาตตฺตาย ฯ เอวมุปริปิ ฯ  ม. ยุ.
@มิจฺฉาทิฏฺฐิ ฯ   ม. อตฺถิ สญฺโญชนานิ เจว ทิฏฺฐิโย จ อตฺถิ สญฺโญชนานิ
@น จ ทิฏฺฐิโย กตมานิ ฯเปฯ อิมานิ สญฺโญชนานิ น จ ทิฏฺฐิโย ฯ
ปฏิจฺจ   ยํ   รเส   ปฏิจฺจ   ยํ  โผฏฺฐพฺเพ  ปฏิจฺจ  ยํ  ธมฺเม  ปฏิจฺจ
ยํ     จกฺขุวิญฺญาณํ     ปฏิจฺจ     ยํ     โสตวิญฺญาณํ    ปฏิจฺจ    ยํ
ฆานวิญฺญาณํ      ปฏิจฺจ      ยํ      ชิวฺหาวิญฺญาณํ     ปฏิจฺจ     ยํ
กายวิญฺญาณํ    ปฏิจฺจ    ยํ    มโนวิญฺญาณํ   ปฏิจฺจ   ยํ   จกฺขุสมฺผสฺสํ
ปฏิจฺจ    ยํ    โสตสมฺผสฺสํ    ปฏิจฺจ   ยํ   ฆานสมฺผสฺสํ   ปฏิจฺจ   ยํ
ชิวฺหาสมฺผสฺสํ    ปฏิจฺจ    ยํ   กายสมฺผสฺสํ   ปฏิจฺจ   ยํ   มโนสมฺผสฺสํ
ปฏิจฺจ   ยํ   จกฺขุสมฺผสฺสชํ   เวทนํ   ปฏิจฺจ   ยํ  โสตสมฺผสฺสชํ  เวทนํ
ปฏิจฺจ    ยํ    ฆานสมฺผสฺสชํ    เวทนํ    ปฏิจฺจ   ยํ   ชิวฺหาสมฺผสฺสชํ
เวทนํ ปฏิจฺจ ยํ กายสมฺผสฺสชํ เวทนํ ปฏิจฺจ
     {๓๑๐.๑}   ยํ   มโนสมฺผสฺสชํ   เวทนํ   ปฏิจฺจ   อุปฺปชฺชติ  สุขํ
โสมนสฺสํ   มโนสมฺผสฺสชาย   เวทนาย   อสฺสาโทติ   อภินิเวสปรามาโส
ทิฏฺฐิ   ทิฏฺฐิ   น   อสฺสาโท  อสฺสาโท  น  ทิฏฺฐิ  อญฺญา  ทิฏฺฐิ  อญฺโญ
อสฺสาโท   ยา   จ  ทิฏฺฐิ  โย  จ  อสฺสาโท  อยํ  วุจฺจติ  อสฺสาททิฏฺฐิ
อสฺสาททิฏฺฐิ      มิจฺฉาทิฏฺฐิ     ทิฏฺฐิวิปตฺติ     ตาย     ทิฏฺฐิวิปตฺติยา
สมนฺนาคโต      ปุคฺคโล     ทิฏฺฐิวิปนฺโน     ทิฏฺฐิวิปนฺโน     ปุคฺคโล
น    เสวิตพฺโพ   น   ภชิตพฺโพ   น   ปยิรุปาสิตพฺโพ   ตํ   กิสฺสเหตุ
ทิฏฺฐิ   หิสฺส   ปาปิกา   ยา   ทิฏฺฐิ   โย   ราโค   โส   น   ทิฏฺฐิ
ทิฏฺฐิ   น   ราโค   อญฺญา   ทิฏฺฐิ   อญฺโญ   ราโค   ยา   จ  ทิฏฺฐิ
โย   จ   ราโค   อยํ   วุจฺจติ   ทิฏฺฐิราโค  ตาย  จ  ทิฏฺฐิยา  เตน
จ    ราเคน    สมนฺนาคโต    ปุคฺคโล   ทิฏฺฐิราครโต   ทิฏฺฐิราครเต
ปุคฺคเล    ทินฺนทานํ    นมหปฺผลํ    โหติ   นมหานิสํสํ   ตํ   กิสฺสเหตุ
ทิฏฺฐิ    หิสฺส    ปาปิกา    อสฺสาททิฏฺฐิ    มิจฺฉาทิฏฺฐิ   มิจฺฉาทิฏฺฐิกสฺส
ปุริสปุคฺคลสฺส    เทฺว    จ    คติโย    นิรโย    วา   ติรจฺฉานโยนิ
วา      มิจฺฉาทิฏฺฐิกสฺส      ปุริสปุคฺคลสฺส      ยญฺเจว     กายกมฺมํ
ยถาทิฏฺฐิสมตฺตํ     สมาทินฺนํ     ยญฺจ    วจีกมฺมํ    ยญฺจ    มโนกมฺมํ
ยถาทิฏฺฐิสมตฺตํ   สมาทินฺนํ   ยา   จ   เจตนา   ยา  จ  ปตฺถนา  โย
จ   ปณิธิ   เย  จ  สงฺขารา  สพฺเพ  เต  ธมฺมา  อนิฏฺฐาย  อกนฺตาย
อมนาปาย    อหิตาย    ทุกฺขาย    สํวตฺตนฺติ    ตํ   กิสฺสเหตุ   ทิฏฺฐิ
หิสฺส ปาปิกา
     {๓๑๐.๒}   เสยฺยถาปิ    นิมฺพพีชํ    วา    โกสาตกีพีชํ   วา
ติตฺตกลาพุพีชํ    วา   อลฺลาย   ปฐวิยา   นิกฺขิตฺตํ   ยญฺเจว   ปฐวีรสํ
อุปาทิยติ     ยญฺจ     อาโปรสํ    อุปาทิยติ    สพฺพนฺตํ    ติตฺตกตาย
กฏุกตาย   อสารตาย   สํวตฺตติ   ตํ   กิสฺสเหตุ   พีชํ   หิสฺส   ปาปิกํ
เอวเมว     มิจฺฉาทิฏฺฐิกสฺส     ปุริสปุคฺคลสฺส     ยญฺเจว    กายกมฺมํ
ยถาทิฏฺฐิสมตฺตํ     สมาทินฺนํ     ยญฺจ    วจีกมฺมํ    ยญฺจ    มโนกมฺมํ
ยถาทิฏฺฐิสมตฺตํ   สมาทินฺนํ   ยา   จ   เจตนา   ยา  จ  ปตฺถนา  โย
จ   ปณิธิ   เย  จ  สงฺขารา  สพฺเพ  เต  ธมฺมา  อนิฏฺฐาย  อกนฺตาย
อมนาปาย    อหิตาย    ทุกฺขาย    สํวตฺตนฺติ    ตํ   กิสฺสเหตุ   ทิฏฺฐิ
หิสฺส   ปาปิกา   อสฺสาททิฏฺฐิ   มิจฺฉาทิฏฺฐิ   ยา   ทิฏฺฐิ   ๑-  ทิฏฺฐิคตํ
ทิฏฺฐิคหนํ   ฯเปฯ   ทิฏฺฐาภินิเวสปรามาโส   ๒-   โหติ   ๓-   อิเมหิ
อฏฺฐารสหิ   อากาเรหิ   ปริยุฏฺฐิตจิตฺตสฺส  สํโยโค  อสฺสาททิฏฺฐิภูตา  ๔-
@เชิงอรรถ:  ม. มิจฺฉาทิฏฺฐิ ฯ  ม. ทิฏฺฐาภินิเวโส ทิฏฺฐิปรามาโส ฯ  ม. ยุ. อยํ ปาโฐ
@นตฺถิ ฯ  ม. ยุ. อสฺสาททิฏฺฐิภูตา มิจฺฉาทิฏฺฐีติ อิเม เทฺว ปาฐา นตฺถิ ฯ
มิจฺฉาทิฏฺฐิ ฯ
     [๓๑๑]   อตฺถิ  สญฺโญชนานิ  เจว  ทิฏฺฐิโย  จ  อตฺถิ  สญฺโญชนานิ
น   จ   ทิฏฺฐิโย   ฯ   กตมานิ   สญฺโญชนานิ   เจว  ทิฏฺฐิโย  จ  ฯ
สกฺกายทิฏฺฐิปรามาโส    เจว    ๑-    สกฺกายทิฏฺฐิ   สีลพฺพตปรามาโส
จ   อิมานิ   สญฺโญชนานิ   เจว  ทิฏฺฐิโย  จ  ฯ  กตมานิ  สญฺโญชนานิ
น   จ   ทิฏฺฐิโย   ฯ   กามราคสญฺโญชนํ   ปฏิฆสญฺโญชนํ  มานสญฺโญชนํ
วิจิกิจฺฉาสญฺโญชนํ           ภวราคสญฺโญชนํ           อิสฺสาสญฺโญชนํ
มจฺฉริยสญฺโญชนํ            อนุสยสญฺโญชนํ           อวิชฺชาสญฺโญชนํ
อิมานิ    สญฺโญชนานิ    น   จ   ทิฏฺฐิโย   ฯ   อสฺสาททิฏฺฐิยา   ๒-
อิเมหิ ปญฺจตฺตึสาย อากาเรหิ อภินิเวโส โหติ ๒- ฯ
     [๓๑๒]   อตฺตานุทิฏฺฐิยา  กตเมหิ  วีสติยา  อากาเรหิ  อภินิเวโส
โหติ   ฯ   อิธ   อสฺสุตวา   ปุถุชฺชโน  อริยานํ  อทสฺสาวี  อริยธมฺมสฺส
อโกวิโท   อริยธมฺเม   อวินีโต   สปฺปุริสานํ   อทสฺสาวี  สปฺปุริสธมฺมสฺส
อโกวิโท   สปฺปุริสธมฺเม   อวินีโต   รูปํ   อตฺตโต  สมนุปสฺสติ  รูปวนฺตํ
วา   อตฺตานํ   อตฺตนิ   วา   รูปํ  รูปสฺมึ  วา  อตฺตานํ  เวทนํ  สญฺญํ
สงฺขาเร     วิญฺญาณํ     อตฺตโต    สมนุปสฺสติ    วิญฺญาณวนฺตํ    วา
อตฺตานํ อตฺตนิ วา วิญฺญาณํ วิญฺญาณสฺมึ วา อตฺตานํ ฯ
     [๓๑๓]   กถํ  รูปํ  อตฺตโต  สมนุปสฺสติ  ฯ  อิเธกจฺโจ  ปฐวีกสิณํ
อตฺตโต    สมนุปสฺสติ    ยํ    ปฐวีกสิณํ   โส   อหํ   โย   อหํ   ตํ
ปฐวีกสิณนฺติ      ปฐวีกสิณญฺจ      อตฺตญฺจ      อทฺวยํ     สมนุปสฺสติ
@เชิงอรรถ:  ม. ยุ. อิเม เทฺว ปาฐา นตฺถิ ฯ  ม. ยุ. อิเม ฉ ปาฐา นตฺถิ ฯ
เสยฺยถาปิ   เตลปฺปทีปสฺส   ฌายโต   ยา  อจฺฉิ  ๑-  โส  วณฺโณ  โย
วณฺโณ    สา    อจฺฉีติ    อจฺฉิญฺจ    วณฺณญฺจ    อทฺวยํ    สมนุปสฺสติ
เอวเมว     อิเธกจฺโจ     ปฐวีกสิณํ     อตฺตโต    สมนุปสฺสติ    ยํ
ปฐวีกสิณํ    โส    อหํ    โย   อหํ   ตํ   ปฐวีกสิณนฺติ   ปฐวีกสิณญฺจ
อตฺตญฺจ    อทฺวยํ   สมนุปสฺสติ   อภินิเวสปรามาโส   ทิฏฺฐิ   ทิฏฺฐิ   น
วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ  วตฺถุ  ยา  จ  ทิฏฺฐิ
ยญฺจ    วตฺถุ    อยํ   ปฐมา   รูปวตฺถุกา   อตฺตานุทิฏฺฐิ   อตฺตานุทิฏฺฐิ
มิจฺฉาทิฏฺฐิ     ทิฏฺฐิวิปตฺติ     อตฺตานุทิฏฺฐิกสฺส     ๒-    ปุริสปุคฺคลสฺส
เทฺว จ คติโย ฯเปฯ อิมานิ สญฺโญชนานิ น จ ทิฏฺฐิโย
     {๓๑๓.๑}   อิเธกจฺโจ  อาโปกสิณํ  เตโชกสิณํ  วาโยกสิณํ  นีลกสิณํ
ปีตกสิณํ     โลหิตกสิณํ     โอทาตกสิณํ    อตฺตโต    สมนุปสฺสติ    ยํ
โอทาตกสิณํ   โส   อหํ   โย   อหํ  ตํ  โอทาตกสิณนฺติ  โอทาตกสิณญฺจ
อตฺตญฺจ      อทฺวยํ      สมนุปสฺสติ      เสยฺยถาปิ     เตลปฺปทีปสฺส
ฌายโต   ยา   อจฺฉิ   โส   วณฺโณ  โย  วณฺโณ  สา  อจฺฉีติ  อจฺฉิญฺจ
วณฺณญฺจ  อทฺวยํ  สมนุปสฺสติ  เอวเมว  อิเธกจฺโจ  ฯเปฯ  โอทาตกสิณญฺจ
อตฺตญฺจ    อทฺวยํ    สมนุปสฺสติ    อภินิเวสปรามาโส    ทิฏฺฐิ    ทิฏฺฐิ
น   วตฺถุ   วตฺถุ   น  ทิฏฺฐิ  อญฺญา  ทิฏฺฐิ  อญฺญํ  วตฺถุ  ยา  จ  ทิฏฺฐิ
ยญฺจ    วตฺถุ    อยํ   ปฐมา   รูปวตฺถุกา   อตฺตานุทิฏฺฐิ   อตฺตานุทิฏฺฐิ
มิจฺฉาทิฏฺฐิ    ทิฏฺฐิวิปตฺติ    ฯเปฯ    อิมานิ    สญฺโญชนานิ    น   จ
ทิฏฺฐิโย เอวํ รูปํ อตฺตโต สมนุปสฺสติ ฯ
@เชิงอรรถ:  ม. ยุ. อจฺจิ ฯ เอวมุปริปิ ฯ  ม. ยุ. มิจฺฉาทิฏฺฐิกสฺส ฯ
     [๓๑๔]   กถํ   รูปวนฺตํ   อตฺตานํ   สมนุปสฺสติ   ฯ   อิเธกจฺโจ
เวทนํ   สญฺญํ   สงฺขาเร   วิญฺญาณํ   อตฺตโต   สมนุปสฺสติ  ตสฺส  เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมินา
รูเปน   รูปวาติ   รูปวนฺตํ   อตฺตานํ   สมนุปสฺสติ   เสยฺยถาปิ   รุกฺโข
ฉายาสมฺปนฺโน   อสฺส   ตเมนํ   ปุริโส   เอวํ   วเทยฺย   อยํ  รุกฺโข
อยํ   ฉายา   อญฺโญ   รุกฺโข  อญฺญา  ฉายา  โส  โข  ปนายํ  รุกฺโข
อิมาย   ฉายาย   ฉายาวาติ   ฉายาวนฺตํ   รุกฺขํ  สมนุปสฺสติ  เอวเมว
อิเธกจฺโจ   เวทนํ   สญฺญํ   สงฺขาเร   วิญฺญาณํ   อตฺตโต   สมนุปสฺสติ
ตสฺส  เอวํ  โหติ  อยํ  โข  เม  อตฺตา  โส  โข  ปน  เม อยํ อตฺตา
อิมินา     รูเปน     รูปวาติ     รูปวนฺตํ     อตฺตานํ     สมนุปสฺสติ
อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ  น  ทิฏฺฐิ  อญฺญา
ทิฏฺฐิ   อญฺญํ  วตฺถุ  ยา  จ  ทิฏฺฐิ  ยญฺจ  วตฺถุ  อยํ  ทุติยา  รูปวตฺถุกา
อตฺตานุทิฏฺฐิ    อตฺตานุทิฏฺฐิ   มิจฺฉาทิฏฺฐิ   ฯเปฯ   อิมานิ   สญฺโญชนานิ
น จ ทิฏฺฐิโย เอวํ รูปวนฺตํ อตฺตานํ สมนุปสฺสติ ฯ
     [๓๑๕]   กถํ   อตฺตนิ   รูปํ   สมนุปสฺสติ  ฯ  อิเธกจฺโจ  เวทนํ
สญฺญํ   สงฺขาเร   วิญฺญาณํ   อตฺตโต   สมนุปสฺสติ   ตสฺส   เอวํ  โหติ
อยํ   โข   เม   อตฺตา   อิมสฺมิญฺจ   ปน  อตฺตนิ  อิทํ  รูปนฺติ  อตฺตนิ
รูปํ    สมนุปสฺสติ    เสยฺยถาปิ    ปุปฺผํ   คนฺธสมฺปนฺนํ   อสฺส   ตเมนํ
ปุริโส   เอวํ   วเทยฺย   อิทํ   ปุปฺผํ  อยํ  คนฺโธ  อญฺญํ  ปุปฺผํ  อญฺโญ
คนฺโธ   โส   โข   ปนายํ   คนฺโธ   อิมสฺมึ   ปุปฺเผติ  ปุปฺผสฺมึ  คนฺธํ
สมนุปสฺสติ   เอวเมว   อิเธกจฺโจ   เวทนํ   สญฺญํ   สงฺขาเร  วิญฺญาณํ
อตฺตโต  สมนุปสฺสติ  ตสฺส  เอวํ  โหติ  อยํ  โข  เม  อตฺตา  อิมสฺมิญฺจ
ปน   อตฺตนิ   อิทํ   รูปนฺติ  อตฺตนิ  รูปํ  สมนุปสฺสติ  อภินิเวสปรามาโส
ทิฏฺฐิ   ทิฏฺฐิ  น  วตฺถุ  วตฺถุ  น  ทิฏฺฐิ  ฯเปฯ  อยํ  ตติยา  รูปวตฺถุกา
อตฺตานุทิฏฺฐิ    อตฺตานุทิฏฺฐิ    มิจฺฉาทิฏฺฐิ   ทิฏฺฐิวิปตฺติ   ฯเปฯ   อิมานิ
สญฺโญชนานิ น จ ทิฏฺฐิโย เอวํ อตฺตนิ รูปํ สมนุปสฺสติ ฯ
     [๓๑๖]   กถํ  รูปสฺมึ  อตฺตานํ  สมนุปสฺสติ  ฯ  อิเธกจฺโจ  เวทนํ
สญฺญํ   สงฺขาเร   วิญฺญาณํ   อตฺตโต   สมนุปสฺสติ   ตสฺส   เอวํ  โหติ
อยํ   โข  เม  อตฺตา  โส  โข  ปน  เม  อยํ  อตฺตา  อิมสฺมึ  รูเปติ
รูปสฺมึ   อตฺตานํ   สมนุปสฺสติ   เสยฺยถาปิ   มณิ   กรณฺฑเก   ปกฺขิตฺโต
อสฺส   ตเมนํ   ปุริโส   เอวํ   วเทยฺย   อยํ   มณิ   อยํ   กรณฺฑโก
อญฺโญ    มณิ   อญฺโญ   กรณฺฑโก   โส   โข   ปนายํ   มณิ   อิมสฺมึ
กรณฺฑเกติ    กรณฺฑกสฺมึ    มณึ    สมนุปสฺสติ    เอวเมว   อิเธกจฺโจ
เวทนํ   สญฺญํ   สงฺขาเร   วิญฺญาณํ   อตฺตโต   สมนุปสฺสติ  ตสฺส  เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมสฺมึ
รูเปติ    รูปสฺมึ    อตฺตานํ    สมนุปสฺสติ    อภินิเวสปรามาโส   ทิฏฺฐิ
ทิฏฺฐิ    น   วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ
ยา   จ   ทิฏฺฐิ   ยญฺจ   วตฺถุ   อยํ  จตุตฺถา  รูปวตฺถุกา  อตฺตานุทิฏฺฐิ
อตฺตานุทิฏฺฐิ    มิจฺฉาทิฏฺฐิ    ทิฏฺฐิวิปตฺติ   ฯเปฯ   อิมานิ   สญฺโญชนานิ
น จ ทิฏฺฐิโย เอวํ รูปสฺมึ อตฺตานํ สมนุปสฺสติ ฯ
     [๓๑๗]   กถํ   เวทนํ   อตฺตโต   สมนุปสฺสติ   ฯ   อิเธกจฺโจ
จกฺขุสมฺผสฺสชํ    เวทนํ   โสตสมฺผสฺสชํ   เวทนํ   ฆานสมฺผสฺสชํ   เวทนํ
ชิวฺหาสมฺผสฺสชํ   เวทนํ   กายสมฺผสฺสชํ   เวทนํ   มโนสมฺผสฺสชํ   เวทนํ
อตฺตโต   สมนุปสฺสติ   ยา   มโนสมฺผสฺสชา   เวทนา   โส   อหํ  โย
อหํ    สา    มโนสมฺผสฺสชา    เวทนาติ    มโนสมฺผสฺสชํ    เวทนญฺจ
อตฺตญฺจ    อทฺวยํ    สมนุปสฺสติ    เสยฺยถาปิ   เตลปฺปทีปสฺส   ฌายโต
ยา    อจฺฉิ    โส    วณฺโณ   โย   วณฺโณ   สา   อจฺฉีติ   อจฺฉิญฺจ
วณฺณญฺจ    อทฺวยํ    สมนุปสฺสติ   เอวเมว   อิเธกจฺโจ   มโนสมฺผสฺสชํ
เวทนํ   อตฺตโต   สมนุปสฺสติ   ยา   มโนสมฺผสฺสชา  เวทนา  โส  อหํ
โย   อหํ   สา   มโนสมฺผสฺสชา   เวทนาติ   มโนสมฺผสฺสชํ   เวทนญฺจ
อตฺตญฺจ    อทฺวยํ    สมนุปสฺสติ    อภินิเวสปรามาโส    ทิฏฺฐิ    ทิฏฺฐิ
น   วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ
ทิฏฺฐิ    ยญฺจ    วตฺถุ    อยํ    ปฐมา   เวทนาวตฺถุกา   อตฺตานุทิฏฺฐิ
อตฺตานุทิฏฺฐิ    มิจฺฉาทิฏฺฐิ    ทิฏฺฐิวิปตฺติ   ฯเปฯ   อิมานิ   สญฺโญชนานิ
น จ ทิฏฺฐิโย เอวํ เวทนํ อตฺตโต สมนุปสฺสติ ฯ
     [๓๑๘]   กถํ   เวทนาวนฺตํ   อตฺตานํ  สมนุปสฺสติ  ฯ  อิเธกจฺโจ
สญฺญํ   สงฺขาเร   วิญฺญาณํ   รูปํ   อตฺตโต   สมนุปสฺสติ   ตสฺส   เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมาย
เวทนาย   เวทนาวาติ   เวทนาวนฺตํ   อตฺตานํ   สมนุปสฺสติ  เสยฺยถาปิ
รุกฺโข   ฉายาสมฺปนฺโน   อสฺส   ตเมนํ   ปุริโส   เอวํ   วเทยฺย  อยํ
รุกฺโข   อยํ   ฉายา   อญฺโญ  รุกฺโข  อญฺญา  ฉายา  โส  โข  ปนายํ
รุกฺโข  อิมาย  ฉายาย  ฉายาวาติ  ฉายาวนฺตํ  รุกฺขํ สมนุปสฺสติ เอวเมว
อิเธกจฺโจ    สญฺญํ    สงฺขาเร   วิญฺญาณํ   รูปํ   อตฺตโต   สมนุปสฺสติ
ตสฺส  เอวํ  โหติ  อยํ  โข  เม  อตฺตา  โส  โข  ปน  เม อยํ อตฺตา
อิมาย    เวทนาย    เวทนาวาติ   เวทนาวนฺตํ   อตฺตานํ   สมนุปสฺสติ
อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ  น  ทิฏฺฐิ  อญฺญา
ทิฏฺฐิ  อญฺญํ  วตฺถุ  ยา  จ  ทิฏฺฐิ  ยญฺจ  วตฺถุ  อยํ ทุติยา เวทนาวตฺถุกา
อตฺตานุทิฏฺฐิ      อตฺตานุทิฏฺฐิ     มิจฺฉาทิฏฺฐิ     ทิฏฺฐิวิปตฺติ     ฯเปฯ
อิมานิ   สญฺโญชนานิ   น   จ   ทิฏฺฐิโย   เอวํ   เวทนาวนฺตํ  อตฺตานํ
สมนุปสฺสติ ฯ
     [๓๑๙]   กถํ   อตฺตนิ   เวทนํ  สมนุปสฺสติ  ฯ  อิเธกจฺโจ  สญฺญํ
สงฺขาเร   วิญฺญาณํ   รูปํ   อตฺตโต  สมนุปสฺสติ  ตสฺส  เอวํ  โหติ  อยํ
โข   เม   อตฺตา   อิมสฺมิญฺจ   ปน   อตฺตนิ   อยํ   เวทนาติ  อตฺตนิ
เวทนํ    สมนุปสฺสติ   เสยฺยถาปิ   ปุปฺผํ   คนฺธสมฺปนฺนํ   อสฺส   ตเมนํ
ปุริโส   เอวํ   วเทยฺย   อิทํ   ปุปฺผํ  อยํ  คนฺโธ  อญฺญํ  ปุปฺผํ  อญฺโญ
คนฺโธ   โส   โข   ปนายํ   คนฺโธ   อิมสฺมึ   ปุปฺเผติ  ปุปฺผสฺมึ  คนฺธํ
สมนุปสฺสติ    เอวเมว   อิเธกจฺโจ   สญฺญํ   สงฺขาเร   วิญฺญาณํ   รูปํ
อตฺตโต   สมนุปสฺสติ   ตสฺส   เอวํ   โหติ   อยํ   โข   เม   อตฺตา
อิมสฺมิญฺจ   ปน   อตฺตนิ   อยํ   เวทนาติ   อตฺตนิ   เวทนํ  สมนุปสฺสติ
อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ  น  ทิฏฺฐิ  ฯเปฯ
อยํ    ตติยา   เวทนาวตฺถุกา   อตฺตานุทิฏฺฐิ   อตฺตานุทิฏฺฐิ   มิจฺฉาทิฏฺฐิ
ทิฏฺฐิวิปตฺติ    ฯเปฯ   อิมานิ   สญฺโญชนานิ   น   จ   ทิฏฺฐิโย   เอวํ
อตฺตนิ เวทนํ สมนุปสฺสติ ฯ
     [๓๒๐]   กถํ   เวทนาย   อตฺตานํ   สมนุปสฺสติ   ฯ  อิเธกจฺโจ
สญฺญํ   สงฺขาเร   วิญฺญาณํ   รูปํ   อตฺตโต   สมนุปสฺสติ   ตสฺส   เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมาย
เวทนายาติ    เวทนาย    อตฺตานํ    สมนุปสฺสติ   เสยฺยถาปิ   ฯเปฯ
กรณฺฑกสฺมึ   มณึ   สมนุปสฺสติ   เอวเมว   อิเธกจฺโจ   สญฺญํ  สงฺขาเร
วิญฺญาณํ   รูปํ   อตฺตโต   สมนุปสฺสติ   ตสฺส   เอวํ   โหติ   อยํ  โข
เม   อตฺตา   โส   โข   ปน   เม  อยํ  อตฺตา  อิมาย  เวทนายาติ
เวทนาย    อตฺตานํ    สมนุปสฺสติ    อภินิเวสปรามาโส   ทิฏฺฐิ   ทิฏฺฐิ
น   วตฺถุ   วตฺถุ   น  ทิฏฺฐิ  อญฺญา  ทิฏฺฐิ  อญฺญํ  วตฺถุ  ยา  จ  ทิฏฺฐิ
ยญฺจ   วตฺถุ   อยํ   จตุตฺถา   เวทนาวตฺถุกา  อตฺตานุทิฏฺฐิ  อตฺตานุทิฏฺฐิ
มิจฺฉาทิฏฺฐิ       ทิฏฺฐิวิปตฺติ      ฯเปฯ      อิมานิ      สญฺโญชนานิ
น จ ทิฏฺฐิโย เอวํ เวทนาย อตฺตานํ สมนุปสฺสติ ฯ
     [๓๒๑]   กถํ    สญฺญํ   อตฺตโต   สมนุปสฺสติ   ฯ   อิเธกจฺโจ
จกฺขุสมฺผสฺสชํ    สญฺญํ    โสตสมฺผสฺสชํ    สญฺญํ    ฆานสมฺผสฺสชํ   สญฺญํ
ชิวฺหาสมฺผสฺสชํ    สญฺญํ    กายสมฺผสฺสชํ    สญฺญํ   มโนสมฺผสฺสชํ   สญฺญํ
อตฺตโต   สมนุปสฺสติ   ยา   มโนสมฺผสฺสชา   สญฺญา   โส   อหํ   โย
อหํ     สา     มโนสมฺผสฺสชา    สญฺญาติ    มโนสมฺผสฺสชํ    สญฺญญฺจ
อตฺตญฺจ   อทฺวยํ   สมนุปสฺสติ   เสยฺยถาปิ   เตลปฺปทีปสฺส  ฌายโต  ยา
อจฺฉิ   โส   วณฺโณ   โย   วณฺโณ   สา   อจฺฉีติ   อจฺฉิญฺจ   วณฺณญฺจ
อทฺวยํ    สมนุปสฺสติ    เอวเมว    อิเธกจฺโจ    มโนสมฺผสฺสชํ   สญฺญํ
อตฺตโต   สมนุปสฺสติ   ยา   มโนสมฺผสฺสชา   สญฺญา   โส   อหํ   โย
อหํ     สา     มโนสมฺผสฺสชา    สญฺญาติ    มโนสมฺผสฺสชํ    สญฺญญฺจ
อตฺตญฺจ    อทฺวยํ   สมนุปสฺสติ   อภินิเวสปรามาโส   ทิฏฺฐิ   ทิฏฺฐิ   น
วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ  วตฺถุ  ยา  จ  ทิฏฺฐิ
ยญฺจ   วตฺถุ   อยํ   ปฐมา   สญฺญาวตฺถุกา   อตฺตานุทิฏฺฐิ   อตฺตานุทิฏฺฐิ
มิจฺฉาทิฏฺฐิ     ฯเปฯ    อิมานิ    สญฺโญชนานิ    น    จ    ทิฏฺฐิโย
เอวํ สญฺญํ อตฺตโต สมนุปสฺสติ ฯ
     [๓๒๒]   กถํ   สญฺญาวนฺตํ   อตฺตานํ   สมนุปสฺสติ  ฯ  อิเธกจฺโจ
สงฺขาเร   วิญฺญาณํ   รูปํ   เวทนํ   อตฺตโต   สมนุปสฺสติ   ตสฺส  เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมาย
สญฺญาย    สญฺญาวาติ    สญฺญาวนฺตํ   อตฺตานํ   สมนุปสฺสติ   เสยฺยถาปิ
รุกฺโข    ฉายาสมฺปนฺโน    อสฺส    ตเมนํ    ปุริโส   เอวํ   วเทยฺย
อยํ   รุกฺโข   อยํ   ฉายา   อญฺโญ   รุกฺโข  อญฺญา  ฉายา  โส  โข
ปนายํ  รุกฺโข  อิมาย  ฉายาย  ฉายาวาติ  ฉายาวนฺตํ  รุกฺขํ  สมนุปสฺสติ
เอวเมว    อิเธกจฺโจ    สงฺขาเร   วิญฺญาณํ   รูปํ   เวทนํ   อตฺตโต
สมนุปสฺสติ   ตสฺส   เอวํ   โหติ  อยํ  โข  เม  อตฺตา  โส  โข  ปน
เม   อยํ   อตฺตา   อิมาย   สญฺญาย   สญฺญาวาติ  สญฺญาวนฺตํ  อตฺตานํ
สมนุปสฺสติ   อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ   น
ทิฏฺฐิ   อญฺญา   ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ
อยํ    ทุติยา    สญฺญาวตฺถุกา   อตฺตานุทิฏฺฐิ   อตฺตานุทิฏฺฐิ   มิจฺฉาทิฏฺฐิ
ฯเปฯ    อิมานิ   สญฺโญชนานิ   น   จ   ทิฏฺฐิโย   เอวํ   สญฺญาวนฺตํ
อตฺตานํ สมนุปสฺสติ ฯ
     [๓๒๓]   กถํ  อตฺตนิ  สญฺญํ  สมนุปสฺสติ  ฯ  อิเธกจฺโจ  สงฺขาเร
วิญฺญาณํ   รูปํ   เวทนํ   อตฺตโต   สมนุปสฺสติ   ตสฺส  เอวํ  โหติ  อยํ
โข   เม   อตฺตา   อิมสฺมิญฺจ   ปน   อตฺตนิ   อยํ   สญฺญาติ   อตฺตนิ
สญฺญํ    สมนุปสฺสติ    เสยฺยถาปิ   ปุปฺผํ   คนฺธสมฺปนฺนํ   อสฺส   ตเมนํ
ปุริโส   เอวํ   วเทยฺย   อิทํ   ปุปฺผํ  อยํ  คนฺโธ  อญฺญํ  ปุปฺผํ  อญฺโญ
คนฺโธ    โส    โข    ปนายํ    คนฺโธ   อิมสฺมึ   ปุปฺเผติ   ปุปฺผสฺมึ
คนฺธํ    สมนุปสฺสติ   เอวเมว   อิเธกจฺโจ   สงฺขาเร   วิญฺญาณํ   รูปํ
เวทนํ   อตฺตโต   สมนุปสฺสติ  ตสฺส  เอวํ  โหติ  อยํ  โข  เม  อตฺตา
อิมสฺมิญฺจ    ปน   อตฺตนิ   อยํ   สญฺญาติ   อตฺตนิ   สญฺญํ   สมนุปสฺสติ
อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ  น  ทิฏฺฐิ  อญฺญา
ทิฏฺฐิ    อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ   ตติยา
สญฺญาวตฺถุกา   อตฺตานุทิฏฺฐิ   อตฺตานุทิฏฺฐิ   มิจฺฉาทิฏฺฐิ   ฯเปฯ   อิมานิ
สญฺโญชนานิ น จ ทิฏฺฐิโย เอวํ อตฺตนิ สญฺญํ สมนุปสฺสติ ฯ
     [๓๒๔]   กถํ   สญฺญาย   อตฺตานํ   สมนุปสฺสติ   ฯ   อิเธกจฺโจ
สงฺขาเร   วิญฺญาณํ   รูปํ   เวทนํ   อตฺตโต   สมนุปสฺสติ   ตสฺส  เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิมาย
สญฺญายาติ     สญฺญาย     อตฺตานํ    สมนุปสฺสติ    เสยฺยถาปิ    มณิ
กรณฺฑเก    ปกฺขิตฺโต   อสฺส   ตเมนํ   ปุริโส   เอวํ   วเทยฺย   อยํ
มณิ    อยํ   กรณฺฑโก   อญฺโญ   มณิ   อญฺโญ   กรณฺฑโก   โส   โข
ปนายํ    มณิ    อิมสฺมึ    กรณฺฑเกติ    กรณฺฑกสฺมึ   มณึ   สมนุปสฺสติ
เอวเมว  อิเธกจฺโจ  สงฺขาเร  วิญฺญาณํ  รูปํ  เวทนํ  อตฺตโต สมนุปสฺสติ
ตสฺส  เอวํ  โหติ  อยํ  โข  เม อตฺตา โส โข ปน เม อยํ อตฺตา อิมาย
สญฺญายาติ     สญฺญาย     อตฺตานํ    สมนุปสฺสติ    อภินิเวสปรามาโส
ทิฏฺฐิ   ทิฏฺฐิ  น  วตฺถุ  วตฺถุ  น  ทิฏฺฐิ  อญฺญา  ทิฏฺฐิ  อญฺญํ  วตฺถุ  ยา
จ   ทิฏฺฐิ   ยญฺจ   วตฺถุ   อยํ   จตุตฺถา   สญฺญาวตฺถุกา   อตฺตานุทิฏฺฐิ
อตฺตานุทิฏฺฐิ   มิจฺฉาทิฏฺฐิ   ฯเปฯ   อิมานิ  สญฺโญชนานิ  น  จ  ทิฏฺฐิโย
เอวํ สญฺญาย อตฺตานํ สมนุปสฺสติ ฯ
     [๓๒๕]   กถํ   สงฺขาเร   อตฺตโต   สมนุปสฺสติ   ฯ  อิเธกจฺโจ
จกฺขุสมฺผสฺสชํ    เจตนํ   โสตสมฺผสฺสชํ   เจตนํ   ฆานสมฺผสฺสชํ   เจตนํ
ชิวฺหาสมฺผสฺสชํ   เจตนํ   กายสมฺผสฺสชํ   เจตนํ   มโนสมฺผสฺสชํ   เจตนํ
อตฺตโต   สมนุปสฺสติ   ยา  มโนสมฺผสฺสชา  เจตนา  โส  อหํ  โย  อหํ
สา    มโนสมฺผสฺสชา    เจตนาติ   มโนสมฺผสฺสชํ   เจตนญฺจ   อตฺตญฺจ
อทฺวยํ   สมนุปสฺสติ   เสยฺยถาปิ   เตลปฺปทีปสฺส   ฌายโต   ยา   อจฺฉิ
โส    วณฺโณ    โย    วณฺโณ    สา    อจฺฉีติ    อจฺฉิญฺจ   วณฺณญฺจ
อทฺวยํ    สมนุปสฺสติ    เอวเมว    อิเธกจฺโจ   มโนสมฺผสฺสชํ   เจตนํ
อตฺตโต   สมนุปสฺสติ   ยา  มโนสมฺผสฺสชา  เจตนา  โส  อหํ  โย  อหํ
สา    มโนสมฺผสฺสชา    เจตนาติ   มโนสมฺผสฺสชํ   เจตนญฺจ   อตฺตญฺจ
อทฺวยํ    สมนุปสฺสติ    อภินิเวสปรามาโส    ทิฏฺฐิ   ทิฏฺฐิ   น   วตฺถุ
วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ  ทิฏฺฐิ  ยญฺจ
วตฺถุ    อยํ    ปฐมา    สงฺขารวตฺถุกา    อตฺตานุทิฏฺฐิ    อตฺตานุทิฏฺฐิ
มิจฺฉาทิฏฺฐิ    ฯเปฯ   อิมานิ   สญฺโญชนานิ   น   จ   ทิฏฺฐิโย   เอวํ
สงฺขาเร อตฺตโต สมนุปสฺสติ ฯ
     [๓๒๖]   กถํ   สงฺขารวนฺตํ   อตฺตานํ  สมนุปสฺสติ  ฯ  อิเธกจฺโจ
วิญฺญาณํ    รูปํ    เวทนํ   สญฺญํ   อตฺตโต   สมนุปสฺสติ   ตสฺส   เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิเมหิ
สงฺขาเรหิ   สงฺขารวาติ   สงฺขารวนฺตํ   อตฺตานํ  สมนุปสฺสติ  เสยฺยถาปิ
รุกฺโข   ฉายาสมฺปนฺโน   อสฺส   ตเมนํ   ปุริโส   เอวํ   วเทยฺย  อยํ
รุกฺโข   อยํ   ฉายา   อญฺโญ  รุกฺโข  อญฺญา  ฉายา  โส  โข  ปนายํ
รุกฺโข   อิมาย   ฉายาย   ฉายาวาติ   ฉายาวนฺตํ   รุกฺขํ   สมนุปสฺสติ
เอวเมว   อิเธกจฺโจ   วิญฺญาณํ  รูปํ  เวทนํ  สญฺญํ  อตฺตโต  สมนุปสฺสติ
ตสฺส  เอวํ  โหติ  อยํ  โข  เม  อตฺตา  โส  โข  ปน  เม อยํ อตฺตา
อิเมหิ      สงฺขาเรหิ      สงฺขารวาติ      สงฺขารวนฺตํ     อตฺตานํ
สมนุปสฺสติ    อภินิเวสปรามาโส    ทิฏฺฐิ    ทิฏฺฐิ    น   วตฺถุ   วตฺถุ
น    ทิฏฺฐิ    อญฺญา   ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ
วตฺถุ    อยํ    ทุติยา    สงฺขารวตฺถุกา    อตฺตานุทิฏฺฐิ    อตฺตานุทิฏฺฐิ
มิจฺฉาทิฏฺฐิ    ฯเปฯ   อิมานิ   สญฺโญชนานิ   น   จ   ทิฏฺฐิโย   เอวํ
สงฺขารวนฺตํ อตฺตานํ สมนุปสฺสติ ฯ
     [๓๒๗]   กถํ   อตฺตนิ   สงฺขาเร   สมนุปสฺสติ   ฯ   อิเธกจฺโจ
วิญฺญาณํ    รูปํ    เวทนํ   สญฺญํ   อตฺตโต   สมนุปสฺสติ   ตสฺส   เอวํ
โหติ   อยํ   โข  เม  อตฺตา  อิมสฺมิญฺจ  ปน  อตฺตนิ  อิเม  สงฺขาราติ
อตฺตนิ   สงฺขาเร   สมนุปสฺสติ   เสยฺยถาปิ   ปุปฺผํ   คนฺธสมฺปนฺนํ  อสฺส
ตเมนํ   ปุริโส   เอวํ   วเทยฺย   อิทํ  ปุปฺผํ  อยํ  คนฺโธ  อญฺญํ  ปุปฺผํ
อญฺโญ    คนฺโธ    โส    โข    ปนายํ    คนฺโธ   อิมสฺมึ   ปุปฺเผติ
ปุปฺผสฺมึ    คนฺธํ    สมนุปสฺสติ   เอวเมว   อิเธกจฺโจ   วิญฺญาณํ   รูปํ
เวทนํ   สญฺญํ   อตฺตโต   สมนุปสฺสติ   ตสฺส   เอวํ   โหติ   อยํ  โข
เม   อตฺตา  อิมสฺมิญฺจ  ปน  อตฺตนิ  อิเม  สงฺขาราติ  อตฺตนิ  สงฺขาเร
สมนุปสฺสติ    อภินิเวสปรามาโส    ทิฏฺฐิ    ทิฏฺฐิ    น   วตฺถุ   วตฺถุ
น    ทิฏฺฐิ    อญฺญา   ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ
วตฺถุ    อยํ    ตติยา    สงฺขารวตฺถุกา    อตฺตานุทิฏฺฐิ    อตฺตานุทิฏฺฐิ
มิจฺฉาทิฏฺฐิ    ฯเปฯ   อิมานิ   สญฺโญชนานิ   น   จ   ทิฏฺฐิโย   เอวํ
อตฺตนิ สงฺขาเร สมนุปสฺสติ ฯ
     [๓๒๘]   กถํ   สงฺขาเรสุ   อตฺตานํ   สมนุปสฺสติ  ฯ  อิเธกจฺโจ
วิญฺญาณํ    รูปํ    เวทนํ   สญฺญํ   อตฺตโต   สมนุปสฺสติ   ตสฺส   เอวํ
โหติ   อยํ   โข  เม  อตฺตา  โส  โข  ปน  เม  อยํ  อตฺตา  อิเมสุ
สงฺขาเรสูติ    สงฺขาเรสุ    อตฺตานํ    สมนุปสฺสติ    เสยฺยถาปิ   มณิ
กรณฺฑเก  ปกฺขิตฺโต  อสฺส  ตเมนํ  ปุริโส  เอวํ  วเทยฺย  อยํ  มณิ  อยํ
กรณฺฑโก    อญฺโญ    มณิ    อญฺโญ    กรณฺฑโก   โส   โข   ปนายํ
มณิ    อิมสฺมึ    กรณฺฑเกติ   กรณฺฑกสฺมึ   มณึ   สมนุปสฺสติ   เอวเมว
อิเธกจฺโจ    วิญฺญาณํ    รูปํ    เวทนํ    สญฺญํ   อตฺตโต   สมนุปสฺสติ
ตสฺส  เอวํ  โหติ  อยํ  โข  เม อตฺตา โส โข ปน เม อยํ อตฺตา อิเมสุ
สงฺขาเรสูติ    สงฺขาเรสุ    อตฺตานํ    สมนุปสฺสติ   อภินิเวสปรามาโส
ทิฏฺฐิ   ทิฏฺฐิ   น   วตฺถุ   วตฺถุ   น  ทิฏฺฐิ  อญฺญา  ทิฏฺฐิ  อญฺญํ  วตฺถุ
ยา   จ   ทิฏฺฐิ  ยญฺจ  วตฺถุ  อยํ  จตุตฺถา  สงฺขารวตฺถุกา  อตฺตานุทิฏฺฐิ
อตฺตานุทิฏฺฐิ   มิจฺฉาทิฏฺฐิ   ฯเปฯ   อิมานิ  สญฺโญชนานิ  น  จ  ทิฏฺฐิโย
เอวํ สงฺขาเรสุ อตฺตานํ สมนุปสฺสติ ฯ
     [๓๒๙]   กถํ   วิญฺญาณํ   อตฺตโต   สมนุปสฺสติ   ฯ   อิเธกจฺโจ
จกฺขุวิญฺญาณํ        โสตวิญฺญาณํ       ฆานวิญฺญาณํ       ชิวฺหาวิญฺญาณํ
กายวิญฺญาณํ    มโนวิญฺญาณํ    อตฺตโต    สมนุปสฺสติ   ยํ   มโนวิญฺญาณํ
โส   อหํ   โย   อหํ   ตํ   มโนวิญฺญาณนฺติ   มโนวิญฺญาณญฺจ   อตฺตญฺจ
อทฺวยํ   สมนุปสฺสติ   เสยฺยถาปิ   เตลปฺปทีปสฺส   ฌายโต   ยา   อจฺฉิ
โส    วณฺโณ    โย    วณฺโณ    สา    อจฺฉีติ    อจฺฉิญฺจ   วณฺณญฺจ
อทฺวยํ    สมนุปสฺสติ    เอวเมว    อิเธกจฺโจ   มโนวิญฺญาณํ   อตฺตโต
สมนุปสฺสติ   ยํ   มโนวิญฺญาณํ   โส   อหํ  โย  อหํ  ตํ  มโนวิญฺญาณนฺติ
มโนวิญฺญาณญฺจ    อตฺตญฺจ    อทฺวยํ    สมนุปสฺสติ    อภินิเวสปรามาโส
ทิฏฺฐิ  ทิฏฺฐิ  น  วตฺถุ  วตฺถุ  น  ทิฏฺฐิ  อญฺญา  ทิฏฺฐิ  อญฺญํ  วตฺถุ ยา จ
ทิฏฺฐิ    ยญฺจ    วตฺถุ    อยํ    ปฐมา   วิญฺญาณวตฺถุกา   อตฺตานุทิฏฺฐิ
อตฺตานุทิฏฺฐิ   มิจฺฉาทิฏฺฐิ   ฯเปฯ   อิมานิ  สญฺโญชนานิ  น  จ  ทิฏฺฐิโย
เอวํ วิญฺญาณํ อตฺตโต สมนุปสฺสติ ฯ
     [๓๓๐]   กถํ   วิญฺญาณวนฺตํ   อตฺตานํ  สมนุปสฺสติ  ฯ  อิเธกจฺโจ
รูปํ   เวทนํ   สญฺญํ   สงฺขาเร  อตฺตโต  สมนุปสฺสติ  ตสฺส  เอวํ  โหติ
อยํ   โข   เม   อตฺตา   โส   โข   ปน   เม  อยํ  อตฺตา  อิมินา
วิญฺญาเณน     วิญฺญาณวาติ     วิญฺญาณวนฺตํ     อตฺตานํ     สมนุปสฺสติ
เสยฺยถาปิ   รุกฺโข  ฉายาสมฺปนฺโน  อสฺส  ตเมนํ  ปุริโส  เอวํ  วเทยฺย
อยํ   รุกฺโข   อยํ   ฉายา   อญฺโญ   รุกฺโข  อญฺญา  ฉายา  โส  โข
ปนายํ    รุกฺโข    อิมาย    ฉายาย   ฉายาวาติ   ฉายาวนฺตํ   รุกฺขํ
สมนุปสฺสติ    เอวเมว    อิเธกจฺโจ   รูปํ   เวทนํ   สญฺญํ   สงฺขาเร
อตฺตโต  สมนุปสฺสติ  ตสฺส  เอวํ  โหติ  อยํ  โข  เม  อตฺตา  โส  โข
ปน     เม     อยํ    อตฺตา    อิมินา    วิญฺญาเณน    วิญฺญาณวาติ
วิญฺญาณวนฺตํ     อตฺตานํ     สมนุปสฺสติ     อภินิเวสปรามาโส    ทิฏฺฐิ
ทิฏฺฐิ   น   วตฺถุ   วตฺถุ   น   ทิฏฺฐิ   อญฺญา  ทิฏฺฐิ  อญฺญํ  วตฺถุ  ยา
จ   ทิฏฺฐิ   ยญฺจ   วตฺถุ   อยํ   ทุติยา   วิญฺญาณวตฺถุกา   อตฺตานุทิฏฺฐิ
อตฺตานุทิฏฺฐิ    มิจฺฉาทิฏฺฐิ    ฯเปฯ    อิมานิ    สญฺโญชนานิ   น   จ
ทิฏฺฐิโย เอวํ วิญฺญาณวนฺตํ อตฺตานํ สมนุปสฺสติ ฯ
     [๓๓๑]   กถํ   อตฺตนิ   วิญฺญาณํ   สมนุปสฺสติ   ฯ   อิเธกจฺโจ
รูปํ   เวทนํ   สญฺญํ   สงฺขาเร  อตฺตโต  สมนุปสฺสติ  ตสฺส  เอวํ  โหติ
อยํ   โข   เม   อตฺตา   อิมสฺมิญฺจ   ปน   อตฺตนิ   อิทํ   วิญฺญาณนฺติ
อตฺตนิ     วิญฺญาณํ    สมนุปสฺสติ    เสยฺยถาปิ    ปุปฺผํ    คนฺธสมฺปนฺนํ
อสฺส   ตเมนํ   ปุริโส   เอวํ   วเทยฺย  อิทํ  ปุปฺผํ  อยํ  คนฺโธ  อญฺญํ
ปุปฺผํ   อญฺโญ   คนฺโธ   โส   โข   ปนายํ   คนฺโธ   อิมสฺมึ  ปุปฺเผติ
ปุปฺผสฺมึ   คนฺธํ   สมนุปสฺสติ   เอวเมว   อิเธกจฺโจ  รูปํ  เวทนํ  สญฺญํ
สงฺขาเร   อตฺตโต   สมนุปสฺสติ   ตสฺส   เอวํ   โหติ   อยํ  โข  เม
อตฺตา     อิมสฺมิญฺจ     ปน    อตฺตนิ    อิทํ    วิญฺญาณนฺติ    อตฺตนิ
วิญฺญาณํ     สมนุปสฺสติ     อภินิเวสปรามาโส     ทิฏฺฐิ    ทิฏฺฐิ    น
วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ  วตฺถุ  ยา  จ  ทิฏฺฐิ
ยญฺจ     วตฺถุ     อยํ     ตติยา     วิญฺญาณวตฺถุกา     อตฺตานุทิฏฺฐิ
อตฺตานุทิฏฺฐิ    มิจฺฉาทิฏฺฐิ    ฯเปฯ    อิมานิ    สญฺโญชนานิ   น   จ
ทิฏฺฐิโย เอวํ อตฺตนิ วิญฺญาณํ สมนุปสฺสติ ฯ
     [๓๓๒]   กถํ   วิญฺญาณสฺมึ   อตฺตานํ   สมนุปสฺสติ  ฯ  อิเธกจฺโจ
รูปํ   เวทนํ   สญฺญํ   สงฺขาเร  อตฺตโต  สมนุปสฺสติ  ตสฺส  เอวํ  โหติ
อยํ  โข  เม  อตฺตา  โส  โข  ปน  เม  อยํ  อตฺตา อิมสฺมึ วิญฺญาเณติ
วิญฺญาณสฺมึ       อตฺตานํ       สมนุปสฺสติ       เสยฺยถาปิ      มณิ
กรณฺฑเก    ปกฺขิตฺโต   อสฺส   ตเมนํ   ปุริโส   เอวํ   วเทยฺย   อยํ
มณิ    อยํ   กรณฺฑโก   อญฺโญ   มณิ   อญฺโญ   กรณฺฑโก   โส   โข
ปนายํ    มณิ    อิมสฺมึ    กรณฺฑเกติ    กรณฺฑกสฺมึ   มณึ   สมนุปสฺสติ
เอวเมว   อิเธกจฺโจ  รูปํ  เวทนํ  สญฺญํ  สงฺขาเร  อตฺตโต  สมนุปสฺสติ
ตสฺส  เอวํ  โหติ  อยํ  โข  เม  อตฺตา  โส  โข  ปน  เม อยํ อตฺตา
อิมสฺมึ       วิญฺญาเณติ      วิญฺญาณสฺมึ      อตฺตานํ      สมนุปสฺสติ
อภินิเวสปรามาโส   ทิฏฺฐิ   ทิฏฺฐิ   น   วตฺถุ   วตฺถุ  น  ทิฏฺฐิ  อญฺญา
ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ   จตุตฺถา
วิญฺญาณวตฺถุกา     อตฺตานุทิฏฺฐิ     อตฺตานุทิฏฺฐิ    มิจฺฉาทิฏฺฐิ    ฯเปฯ
อิมานิ   สญฺโญชนานิ   น   จ   ทิฏฺฐิโย   เอวํ   วิญฺญาณสฺมึ   อตฺตานํ
สมนุปสฺสติ   อตฺตานุทิฏฺฐิยา   อิเมหิ   วีสติยา   อากาเรหิ   อภินิเวโส
โหติ ฯ
     [๓๓๓]   มิจฺฉาทิฏฺฐิยา  กตเมหิ  ทสหากาเรหิ  อภินิเวโส  โหติ ฯ
นตฺถิ   ทินฺนนฺติ  วตฺถุํ  ๑-  เอวํวาโท  มิจฺฉาทิฏฺฐาภินิเวสปรามาโส  ๒-
ทิฏฺฐิ   ทิฏฺฐิ  น  วตฺถุ  ๓-  วตฺถุ  น  ทิฏฺฐิ  อญฺญา  ทิฏฺฐิ  อญฺญํ  วตฺถุ
ยา   จ   ทิฏฺฐิ   ยญฺจ   วตฺถุ   อยํ  ปฐมา  มิจฺฉาวตฺถุกา  มิจฺฉาทิฏฺฐิ
มิจฺฉาทิฏฺฐิ    ทิฏฺฐิวิปตฺติ    ฯเปฯ    อิมานิ    สญฺโญชนานิ    น   จ
ทิฏฺฐิโย   นตฺถิ   ยิฏฺฐนฺติ   วตฺถุํ   ฯเปฯ   นตฺถิ   หุตนฺติ  วตฺถุํ  นตฺถิ
สุกตทุกฺกตานํ   กมฺมานํ   ผลํ   วิปาโกติ   วตฺถุํ   นตฺถิ   อยํ  โลโกติ
วตฺถุํ    นตฺถิ    ปรโลโกติ    วตฺถุํ    นตฺถิ   มาตาติ   วตฺถุํ   นตฺถิ
@เชิงอรรถ:  ม. วตฺถุ ฯ  ม. มิจฺฉาภินิเวสปรามาโส ฯ เอวมุปริปิ ฯ
@ ยุ. วตฺถุํ ฯ เอวมุปริปิ ฯ
ปิตาติ    วตฺถุํ   นตฺถิ   สตฺตา   โอปปาติกาติ   วตฺถุํ   นตฺถิ   โลเก
สมณพฺราหฺมณา     สมฺมคฺคตา    สมฺมาปฏิปนฺนา    เย    อิมํปิ    ๑-
โลกํ   ปรํปิ   ๒-   โลกํ  สยํ  อภิญฺญา  สจฺฉิกตฺวา  ปเวเทนฺตีติ  วตฺถุํ
เอวํวาโท    มิจฺฉาทิฏฺฐาภินิเวสปรามาโส    ทิฏฺฐิ    ทิฏฺฐิ   น   วตฺถุ
วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ  ทิฏฺฐิ  ยญฺจ
วตฺถุ   อยํ   ทสวตฺถุกา   มิจฺฉาทิฏฺฐิ   มิจฺฉาทิฏฺฐิ   ทิฏฺฐิวิปตฺติ   ฯเปฯ
มิจฺฉาทิฏฺฐิกสฺส     ปุริสปุคฺคลสฺส    เทฺว    คติโย    ฯเปฯ    อิมานิ
สญฺโญชนานิ   น   จ   ทิฏฺฐิโย   มิจฺฉาทิฏฺฐิยา   อิเมหิ   ทสหากาเรหิ
อภินิเวโส โหติ ฯ
     [๓๓๔]   สกฺกายทิฏฺฐิยา  กตเมหิ  วีสติยา  อากาเรหิ  อภินิเวโส
โหติ   ฯ   อิธ   อสฺสุตวา   ปุถุชฺชโน  อริยานํ  อทสฺสาวี  อริยธมฺมสฺส
อโกวิโท   อริยธมฺเม   อวินีโต   สปฺปุริสานํ   อทสฺสาวี  สปฺปุริสธมฺมสฺส
อโกวิโท     สปฺปุริสธมฺเม    อวินีโต    รูปํ    อตฺตโต    สมนุปสฺสติ
รูปวนฺตํ   วา   อตฺตานํ  อตฺตนิ  วา  รูปํ  รูปสฺมึ  วา  อตฺตานํ  เวทนํ
สญฺญํ     สงฺขาเร    วิญฺญาณํ    อตฺตโต    สมนุปสฺสติ    วิญฺญาณวนฺตํ
วา อตฺตานํ อตฺตนิ วา วิญฺญาณํ วิญฺญาณสฺมึ วา อตฺตานํ ฯ
     {๓๓๔.๑}   กถํ  รูปํ  อตฺตโต  สมนุปสฺสติ  ฯ  อิเธกจฺโจ ปฐวีกสิณํ
ฯเปฯ   โอทาตกสิณํ   อตฺตโต   สมนุปสฺสติ   ยํ  โอทาตกสิณํ  โส  อหํ
โย    อหํ    ตํ    โอทาตกสิณนฺติ   โอทาตกสิณญฺจ   อตฺตญฺจ   อทฺวยํ
@เชิงอรรถ: ๑-๒ ม. ยุ. อิมญฺจ .. ปรญฺจ ฯ
สมนุปสฺสติ    เสยฺยถาปิ    เตลปฺปทีปสฺส   ฌายโต   ฯเปฯ   เอวเมว
อิเธกจฺโจ    โอทาตกสิณํ    อตฺตโต    สมนุปสฺสติ   อภินิเวสปรามาโส
ทิฏฺฐิ    ฯเปฯ   อยํ   ปฐมา   รูปวตฺถุกา   สกฺกายทิฏฺฐิ   สกฺกายทิฏฺฐิ
มิจฺฉาทิฏฺฐิ    ฯเปฯ   อิมานิ   สญฺโญชนานิ   น   จ   ทิฏฺฐิโย   เอวํ
รูปํ   อตฺตโต   สมนุปสฺสติ   ฯเปฯ   สกฺกายทิฏฺฐิยา   อิเมหิ   วีสติยา
อากาเรหิ อภินิเวโส โหติ ฯ
     [๓๓๕]   สกฺกายวตฺถุกาย    สสฺสตทิฏฺฐิยา   กตเมหิ   ปณฺณรสหิ
อากาเรหิ   อภินิเวโส   โหติ   ฯ   อิธ  อสฺสุตวา  ปุถุชฺชโน  อริยานํ
อทสฺสาวี    อริยธมฺมสฺส   อโกวิโท   อริยธมฺเม   อวินีโต   สปฺปุริสานํ
อทสฺสาวี     สปฺปุริสธมฺมสฺส     อโกวิโท     สปฺปุริสธมฺเม    อวินีโต
รูปวนฺตํ   วา   อตฺตานํ   อตฺตนิ   วา   รูปํ   รูปสฺมึ   วา   อตฺตานํ
เวทนาวนฺตํ   วา   อตฺตานํ   สญฺญาวนฺตํ   วา   อตฺตานํ   สงฺขารวนฺตํ
วา    อตฺตานํ   วิญฺญาณวนฺตํ   วา   อตฺตานํ   อตฺตนิ   วา   วิญฺญาณํ
วิญฺญาณสฺมึ วา อตฺตานํ ฯ
     {๓๓๕.๑}   กถํ   รูปวนฺตํ   อตฺตานํ  สมนุปสฺสติ  ฯ  อิเธกจฺโจ
เวทนํ   สญฺญํ   สงฺขาเร   วิญฺญาณํ   อตฺตโต   สมนุปสฺสติ  ตสฺส  เอวํ
โหติ  อยํ  โข  เม  อตฺตา  โส  โข  ปน  เม อยํ อตฺตา อิมินา รูเปน
รูปวาติ     รูปวนฺตํ     อตฺตานํ    สมนุปสฺสติ    เสยฺยถาปิ    รุกฺโข
ฉายาสมฺปนฺโน   อสฺส  ตเมนํ   ปุริโส  เอวํ  วเทยฺย  อยํ  รุกฺโข  อยํ
ฉายา   อญฺโญ   รุกฺโข   อญฺญา   ฉายา   โส   โข   ปนายํ  รุกฺโข
อิมาย   ฉายาย   ฉายาวาติ   ฉายาวนฺตํ   รุกฺขํ  สมนุปสฺสติ  เอวเมว
อิเธกจฺโจ   เวทนํ   ฯเปฯ   อยํ   ปฐมา   สกฺกายวตฺถุกา  สสฺสตทิฏฺฐิ
สสฺสตทิฏฺฐิ    มิจฺฉาทิฏฺฐิ    ฯเปฯ    อิมานิ    สญฺโญชนานิ    น   จ
ทิฏฺฐิโย   เอวํ   รูปวนฺตํ   อตฺตานํ  สมนุปสฺสติ  ฯเปฯ  สกฺกายวตฺถุกาย
สสฺสตทิฏฺฐิยา อิเมหิ ปณฺณรสหิ อากาเรหิ อภินิเวโส โหติ ฯ
     [๓๓๖]   สกฺกายวตฺถุกาย   อุจฺเฉททิฏฺฐิยา   กตเมหิ   ปณฺณรสหิ
อากาเรหิ   อภินิเวโส   โหติ   ฯ   อิธ  อสฺสุตวา  ปุถุชฺชโน  อริยานํ
อทสฺสาวี    อริยธมฺมสฺส   อโกวิโท   อริยธมฺเม   อวินีโต   สปฺปุริสานํ
อทสฺสาวี    สปฺปุริสธมฺมสฺส    อโกวิโท   สปฺปุริสธมฺเม   อวินีโต   รูปํ
อตฺตโต     สมนุปสฺสติ     เวทนํ     อตฺตโต     สมนุปสฺสติ    สญฺญํ
อตฺตโต    สมนุปสฺสติ    สงฺขาเร    อตฺตโต    สมนุปสฺสติ    วิญฺญาณํ
อตฺตโต สมนุปสฺสติ ฯ
     {๓๓๖.๑}   กถํ  รูปํ  อตฺตโต  สมนุปสฺสติ  ฯ  อิเธกจฺโจ ปฐวีกสิณํ
ฯเปฯ   โอทาตกสิณํ   อตฺตโต   สมนุปสฺสติ   ยํ  โอทาตกสิณํ  โส  อหํ
โย    อหํ    ตํ    โอทาตกสิณนฺติ   โอทาตกสิณญฺจ   อตฺตญฺจ   อทฺวยํ
สมนุปสฺสติ   เสยฺยถาปิ   เตลปฺปทีปสฺส   ฌายโต   ฯเปฯ   อยํ  ปฐมา
สกฺกายวตฺถุกา     อุจฺเฉททิฏฺฐิ     อุจฺเฉททิฏฺฐิ    มิจฺฉาทิฏฺฐิ    ฯเปฯ
อิมานิ   สญฺโญชนานิ   น   จ  ทิฏฺฐิโย  เอวํ  รูปํ  อตฺตโต  สมนุปสฺสติ
ฯเปฯ      สกฺกายวตฺถุกาย      อุจฺเฉททิฏฺฐิยา     อิเมหิ     ปญฺจหิ
อากาเรหิ อภินิเวโส โหติ ฯ
     [๓๓๗]   อนฺตคฺคาหิกาย     ทิฏฺฐิยา    กตเมหิ    ปญฺญาสาย
อากาเรหิ    อภินิเวโส    โหติ    สสฺสโต   โลโกติ   อนฺตคฺคาหิกาย
ทิฏฺฐิยา  กติหากาเรหิ  อภินิเวโส  โหติ  อสสฺสโต โลโกติ อนฺตคฺคาหิกาย
ทิฏฺฐิยา     กติหากาเรหิ    อภินิเวโส    โหติ    อนฺตวา    โลโกติ
อนฺตคฺคาหิกาย     ทิฏฺฐิยา     อนนฺตวา     โลโกติ    อนฺตคฺคาหิกาย
ทิฏฺฐิยา   ตํ   ชีวนฺตํ   สรีรนฺติ   อนฺตคฺคาหิกาย   ทิฏฺฐิยา   อญฺญํ  ชีวํ
อญฺญํ     สรีรนฺติ     อนฺตคฺคาหิกาย     ทิฏฺฐิยา    โหติ    ตถาคโต
ปรมฺมรณาติ   ฯเปฯ   น   โหติ   ตถาคโต   ปรมฺมรณาติ   โหติ   จ
น   จ   โหติ   ตถาคโต   ปรมฺมรณาติ   เนว   โหติ   น  น  โหติ
ตถาคโต     ปรมฺมรณาติ    อนฺตคฺคาหิกาย    ทิฏฺฐิยา    กติหากาเรหิ
อภินิเวโส    โหติ   ฯ   สสฺสโต   โลโกติ   อนฺตคฺคาหิกาย   ทิฏฺฐิยา
ปญฺจหากาเรหิ   อภินิเวโส   โหติ   ฯเปฯ   เนว  โหติ  น  น  โหติ
ตถาคโต    ปรมฺมรณาติ    อนฺตคฺคาหิกาย    ทิฏฺฐิยา    ปญฺจหากาเรหิ
อภินิเวโส โหติ ฯ
     [๓๓๘]   สสฺสโต   โลโกติ   อนฺตคฺคาหิกาย   ทิฏฺฐิยา   กตเมหิ
ปญฺจหากาเรหิ   อภินิเวโส   โหติ   ฯ  รูปํ  โลโก  เจว  สสฺสตญฺจาติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา    ทิฏฺฐิ   ทิฏฺฐิ   น   วตฺถุ   วตฺถุ   น   ทิฏฺฐิ   อญฺญา
ทิฏฺฐิ    อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ   ปฐมา
สสฺสโต     โลโกติ    อนฺตคฺคาหิกา    ทิฏฺฐิ    อนฺตคฺคาหิกา    ทิฏฺฐิ
มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย  เวทนา
โลโก   เจว   สสฺสตา   จาติ   ฯเปฯ  สญฺญา  โลโก  เจว  สสฺสตา
จาติ   ฯเปฯ   สงฺขารา  โลโก  เจว  สสฺสตา  จาติ  ฯเปฯ  วิญฺญาณํ
โลโก     เจว    สสฺสตญฺจาติ    อภินิเวสปรามาโส    ทิฏฺฐิ    ตาย
ทิฏฺฐิยา    โส    อนฺโต   คหิโตติ   อนฺตคฺคาหิกา   ทิฏฺฐิ   ทิฏฺฐิ   น
วตฺถุ    วตฺถุ    น   ทิฏฺฐิ   อญฺญา   ทิฏฺฐิ   อญฺญํ   วตฺถุ   ยา   จ
ทิฏฺฐิ   ยญฺจ   วตฺถุ   อยํ   ปญฺจมี   สสฺสโต   โลโกติ   อนฺตคฺคาหิกา
ทิฏฺฐิ     อนฺตคฺคาหิกา     ทิฏฺฐิ     มิจฺฉาทิฏฺฐิ     ฯเปฯ     อิมานิ
สญฺโญชนานิ    น    จ   ทิฏฺฐิโย   สสฺสโต   โลโกติ   อนฺตคฺคาหิกาย
ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๓๙]   อสสฺสโต   โลโกติ   อนฺตคฺคาหิกาย   ทิฏฺฐิยา  กตเมหิ
ปญฺจหากาเรหิ   อภินิเวโส   โหติ  ฯ  รูปํ  โลโก  เจว  อสสฺสตญฺจาติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา    ทิฏฺฐิ    ฯเปฯ    อยํ    ปฐมา   อสสฺสโต   โลโกติ
อนฺตคฺคาหิกา    ทิฏฺฐิ    อนฺตคฺคาหิกา   ทิฏฺฐิ   มิจฺฉาทิฏฺฐิ   ทิฏฺฐิวิปตฺติ
ฯเปฯ   อิมานิ   สญฺโญชนานิ   น  จ  ทิฏฺฐิโย  ฯเปฯ  เวทนา  โลโก
เจว   อสสฺสตา   จาติ   ฯเปฯ  สญฺญา  โลโก  เจว  อสสฺสตา  จาติ
ฯเปฯ   สงฺขารา   โลโก   เจว   อสสฺสตา   จาติ   ฯเปฯ  วิญฺญาณํ
โลโก    เจว    อสสฺสตญฺจาติ    อภินิเวสปรามาโส    ทิฏฺฐิ    ตาย
ทิฏฺฐิยา   โส   อนฺโต   คหิโตติ   อนฺตคฺคาหิกา   ทิฏฺฐิ   อนฺตคฺคาหิกา
ทิฏฺฐิ    มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย
อสสฺสโต   โลโกติ   อนฺตคฺคาหิกาย   ทิฏฺฐิยา   อิเมหิ   ปญฺจหากาเรหิ
อภินิเวโส โหติ ฯ
     [๓๔๐]   อนฺตวา   โลโกติ   อนฺตคฺคาหิกาย   ทิฏฺฐิยา   กตเมหิ
ปญฺจหากาเรหิ  อภินิเวโส  โหติ  ฯ  อิเธกจฺโจ  ปริตฺตํ  โอกาสํ นีลกโต
ผรติ    ตสฺส    เอวํ    โหติ   อนฺตวา   อยํ   โลโก   ปริวฏฺฏุโมติ
อนฺตสญฺญี   โหติ   ยํ   ผรติ   ตํ   วตฺถุญฺเจว  โลโก  จ  เยน  ผรติ
โส   อตฺตา   เจว   โลโก   จาติ   อภินิเวสปรามาโส   ทิฏฺฐิ  ตาย
ทิฏฺฐิยา   โส   อนฺโต   คหิโตติ   อนฺตคฺคาหิกา  ทิฏฺฐิ  ทิฏฺฐิ  น  วตฺถุ
วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ  ทิฏฺฐิ  ยญฺจ
วตฺถุ   อยํ  ปฐมา  อนฺตวา  โลโกติ  อนฺตคฺคาหิกา  ทิฏฺฐิ  อนฺตคฺคาหิกา
ทิฏฺฐิ     มิจฺฉาทิฏฺฐิ     ฯเปฯ     อิมานิ    สญฺโญชนานิ    น    จ
ทิฏฺฐิโย   อิเธกจฺโจ   ปริตฺตํ  โอกาสํ  ปีตกโต  ผรติ  โลหิตกโต  ผรติ
โอทาตกโต   ผรติ   โอภาสกโต   ผรติ   ตสฺส   เอวํ  โหติ  อนฺตวา
อยํ   โลโก   ปริวฏฺฏุโมติ   อนฺตสญฺญี   โหติ  ยํ  ผรติ  ตํ  วตฺถุญฺเจว
โลโก  จ  เยน  ผรติ  โส  อตฺตา  เจว โลโก จาติ อภินิเวสปรามาโส
ทิฏฺฐิ   ตาย  ทิฏฺฐิยา  โส  อนฺโต  คหิโตติ  อนฺตคฺคาหิกา  ทิฏฺฐิ  ฯเปฯ
อนฺตวา    โลโกติ   อนฺตคฺคาหิกาย   ทิฏฺฐิยา   อิเมหิ   ปญฺจหากาเรหิ
อภินิเวโส โหติ ฯ
     [๓๔๑]   อนนฺตวา   โลโกติ   อนฺตคฺคาหิกาย   ทิฏฺฐิยา  กตเมหิ
ปญฺจหากาเรหิ    อภินิเวโส   โหติ   ฯ   อิเธกจฺโจ   วิปุลํ   โอกาสํ
นีลกโต   ผรติ   ตสฺส  เอวํ  โหติ  อนนฺตวา  อยํ  โลโก  อปริยนฺโตติ
อนนฺตสญฺญี    โหติ   ยํ   ผรติ   ตํ   วตฺถุญฺเจว   โลโก   จ   เยน
ผรติ   โส  อตฺตา  เจว  โลโก  จาติ  อภินิเวสปรามาโส  ทิฏฺฐิ  ตาย
ทิฏฺฐิยา   โส   อนฺโต   คหิโตติ   อนฺตคฺคาหิกา  ทิฏฺฐิ  ทิฏฺฐิ  น  วตฺถุ
วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ  ทิฏฺฐิ  ยญฺจ
วตฺถุ    อยํ    ปฐมา    อนนฺตวา    โลโกติ    อนฺตคฺคาหิกา   ทิฏฺฐิ
อนฺตคฺคาหิกา    ทิฏฺฐิ   มิจฺฉาทิฏฺฐิ   ฯเปฯ   อิมานิ   สญฺโญชนานิ   น
จ   ทิฏฺฐิโย   อิเธกจฺโจ   วิปุลํ   โอกาสํ   ปีตกโต  ผรติ  โลหิตกโต
ผรติ   โอทาตกโต   ผรติ   โอภาสกโต   ผรติ   ตสฺส   เอวํ   โหติ
อนนฺตวา   อยํ   โลโก   อปริยนฺโตติ   อนนฺตสญฺญี   โหติ   ยํ   ผรติ
ตํ  วตฺถุญฺเจว  โลโก  จ  เยน  ผรติ  โส  อตฺตา  เจว  โลโก  จาติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา    ทิฏฺฐิ    ฯเปฯ    อนนฺตวา   โลโกติ   อนฺตคฺคาหิกาย
ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๒]   ตํ   ชีวํ  ตํ  สรีรนฺติ  อนฺตคฺคาหิกาย  ทิฏฺฐิยา  กตเมหิ
ปญฺจหากาเรหิ   อภินิเวโส   โหติ   ฯ   รูปํ   ชีวญฺเจว   สรีรญฺจ  ยํ
ชีวํ   ตํ  สรีรนฺติ  อภินิเวสปรามาโส  ทิฏฺฐิ  ตาย  ทิฏฺฐิยา  โส  อนฺโต
คหิโตติ   อนฺตคฺคาหิกา   ทิฏฺฐิ   ทิฏฺฐิ   น   วตฺถุ   วตฺถุ   น   ทิฏฺฐิ
อญฺญา    ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ
ปฐมา   ตํ   ชีวํ   ตํ   สรีรนฺติ   อนฺตคฺคาหิกา   ทิฏฺฐิ   อนฺตคฺคาหิกา
ทิฏฺฐิ    มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย
เวทนา   ชีวา   เจว  สรีรญฺจ  สญฺญา  ชีวา  เจว  สรีรญฺจ  สงฺขารา
ชีวา     เจว     สรีรญฺจ     วิญฺญาณํ    ชีวญฺเจว    สรีรญฺจ    ยํ
ชีวํ   ตํ   สรีรนฺติ   อภินิเวสปรามาโส   ทิฏฺฐิ   ตาย   ทิฏฺฐิยา   โส
อนฺโต   คหิโตติ   อนฺตคฺคาหิกา   ทิฏฺฐิ   ฯเปฯ   ตํ  ชีวํ  ตํ  สรีรนฺติ
อนฺตคฺคาหิกาย ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๓]   อญฺญํ   ชีวํ   อญฺญํ   สรีรนฺติ   อนฺตคฺคาหิกาย  ทิฏฺฐิยา
กตเมหิ   ปญฺจหากาเรหิ   อภินิเวโส  โหติ  ฯ  รูปํ  สรีรํ  น  ชีวํ  ตํ
สรีรํ   อญฺญํ   ชีวํ   อญฺญํ   สรีรนฺติ   อภินิเวสปรามาโส   ทิฏฺฐิ  ตาย
ทิฏฺฐิยา   โส   อนฺโต   คหิโตติ   อนฺตคฺคาหิกา  ทิฏฺฐิ  ทิฏฺฐิ  น  วตฺถุ
วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ  ยา  จ  ทิฏฺฐิ  ยญฺจ
วตฺถุ    อยํ    ปฐมา    อญฺญํ   ชีวํ   อญฺญํ   สรีรนฺติ   อนฺตคฺคาหิกา
ทิฏฺฐิ   อนฺตคฺคาหิกา   ทิฏฺฐิ   มิจฺฉาทิฏฺฐิ   ฯเปฯ   อิมานิ  สญฺโญชนานิ
น  จ  ทิฏฺฐิโย  เวทนา  สรีรํ  น  ชีวํ  สญฺญา  สรีรํ  น  ชีวํ สงฺขารา
สรีรํ  น  ชีวํ  วิญฺญาณํ  สรีรํ  น  ชีวํ  ตํ  สรีรํ  อญฺญํ ชีวํ อญฺญํ สรีรนฺติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา   ทิฏฺฐิ   ฯเปฯ  อญฺญํ  ชีวํ  อญฺญํ  สรีรนฺติ  อนฺตคฺคาหิกาย
ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๔]   โหติ   ตถาคโต   ปรมฺมรณาติ  อนฺตคฺคาหิกาย  ทิฏฺฐิยา
กตเมหิ   ปญฺจหากาเรหิ   อภินิเวโส   โหติ  ฯ  รูปํ  อิเธว  มรณธมฺมํ
ตถาคโต     กายสฺส     เภทา     โหติปิ     ติฏฺฐติปิ    อุปฺปชฺชติปิ
นิพฺพตฺตติปีติ   อภินิเวสปรามาโส   ทิฏฺฐิ   ตาย   ทิฏฺฐิยา   โส  อนฺโต
คหิโตติ   อนฺตคฺคาหิกา   ทิฏฺฐิ   ทิฏฺฐิ   น   วตฺถุ   วตฺถุ   น   ทิฏฺฐิ
อญฺญา   ทิฏฺฐิ   อญฺญํ   วตฺถุ   ยา  จ  ทิฏฺฐิ  ยญฺจ  วตฺถุ  อยํ  ปฐมา
โหติ    ตถาคโต    ปรมฺมรณาติ   อนฺตคฺคาหิกา   ทิฏฺฐิ   อนฺตคฺคาหิกา
ทิฏฺฐิ    มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย
เวทนา   อิเธว   มรณธมฺมา   สญฺญา   อิเธว   มรณธมฺมา   สงฺขารา
อิเธว     มรณธมฺมา     วิญฺญาณํ     อิเธว    มรณธมฺมํ    ตถาคโต
กายสฺส     เภทา     โหติปิ    ติฏฺฐติปิ    อุปฺปชฺชติปิ    นิพฺพตฺตติปีติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา  ทิฏฺฐิ  ฯเปฯ  โหติ  ตถาคโต  ปรมฺมรณาติ  อนฺตคฺคาหิกาย
ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๕]   น    โหติ   ตถาคโต   ปรมฺมรณาติ   อนฺตคฺคาหิกาย
ทิฏฺฐิยา   กตเมหิ   ปญฺจหากาเรหิ   อภินิเวโส   โหติ  ฯ  รูปํ  อิเธว
มรณธมฺมํ   ตถาคโต   กายสฺส   เภทา   อุจฺฉิชฺชติ   วินสฺสติ  น  โหติ
ตถาคโต    ปรมฺมรณาติ    อภินิเวสปรามาโส   ทิฏฺฐิ   ตาย   ทิฏฺฐิยา
โส   อนฺโต   คหิโตติ   อนฺตคฺคาหิกา   ทิฏฺฐิ   ทิฏฺฐิ   น  วตฺถุ  วตฺถุ
น   ทิฏฺฐิ   อญฺญา   ทิฏฺฐิ   อญฺญํ   วตฺถุ   ยา  จ  ทิฏฺฐิ  ยญฺจ  วตฺถุ
อยํ   ปฐมา   น   โหติ   ตถาคโต   ปรมฺมรณาติ  อนฺตคฺคาหิกา  ทิฏฺฐิ
อนฺตคฺคาหิกา    ทิฏฺฐิ   มิจฺฉาทิฏฺฐิ   ฯเปฯ   อิมานิ   สญฺโญชนานิ   น
จ   ทิฏฺฐิโย   เวทนา   อิเธว   มรณธมฺมา  สญฺญา  อิเธว  มรณธมฺมา
สงฺขารา     อิเธว     มรณธมฺมา     วิญฺญาณํ    อิเธว    มรณธมฺมํ
ตถาคโต   กายสฺส   เภทา   อุจฺฉิชฺชติ   วินสฺสติ   น  โหติ  ตถาคโต
ปรมฺมรณาติ   อภินิเวสปรามาโส   ทิฏฺฐิ   ตาย   ทิฏฺฐิยา   โส  อนฺโต
คหิโตติ   อนฺตคฺคาหิกา   ทิฏฺฐิ  ฯเปฯ  น  โหติ  ตถาคโต  ปรมฺมรณาติ
อนฺตคฺคาหิกาย ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๖]   โหติ  จ  น  จ โหติ ตถาคโต ปรมฺมรณาติ อนฺตคฺคาหิกาย
ทิฏฺฐิยา    กตเมหิ    ปญฺจหากาเรหิ    อภินิเวโส    โหติ   ฯ   รูปํ
อิเธว   มรณธมฺมํ   ตถาคโต  กายสฺส  เภทา  โหติ  จ  น  จ  โหตีติ
อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต   คหิโตติ
อนฺตคฺคาหิกา   ทิฏฺฐิ   ทิฏฺฐิ   น   วตฺถุ  วตฺถุ  น  ทิฏฺฐิ  อญฺญา  ทิฏฺฐิ
อญฺญํ   วตฺถุ   ยา   จ   ทิฏฺฐิ  ยญฺจ  วตฺถุ  อยํ  ปฐมา  โหติ  จ  น
จ   โหติ   ตถาคโต   ปรมฺมรณาติ   อนฺตคฺคาหิกา  ทิฏฺฐิ  อนฺตคฺคาหิกา
ทิฏฺฐิ     มิจฺฉาทิฏฺฐิ     ฯเปฯ     อิมานิ    สญฺโญชนานิ    น    จ
ทิฏฺฐิโย    เวทนา   อิเธว   มรณธมฺมา   สญฺญา   อิเธว   มรณธมฺมา
สงฺขารา   อิเธว   มรณธมฺมา   วิญฺญาณํ   อิเธว   มรณธมฺมํ  ตถาคโต
กายสฺส   เภทา   โหติ   จ   น  จ  โหตีติ  อภินิเวสปรามาโส  ทิฏฺฐิ
ตาย   ทิฏฺฐิยา   โส   อนฺโต   คหิโตติ   อนฺตคฺคาหิกา   ทิฏฺฐิ  ฯเปฯ
โหติ    จ   น   จ   โหติ   ตถาคโต   ปรมฺมรณาติ   อนฺตคฺคาหิกาย
ทิฏฺฐิยา อิเมหิ ปญฺจหากาเรหิ อภินิเวโส โหติ ฯ
     [๓๔๗]   เนว   โหติ   น   น   โหติ   ตถาคโต  ปรมฺมรณาติ
อนฺตคฺคาหิกาย   ทิฏฺฐิยา   กตเมหิ  ปญฺจหากาเรหิ  อภินิเวโส  โหติ  ฯ
รูปํ  อิเธว  มรณธมฺมํ  ตถาคโต  กายสฺส  เภทา  [๑]-  เนว  โหติ น
น   โหตีติ   อภินิเวสปรามาโส   ทิฏฺฐิ   ตาย   ทิฏฺฐิยา   โส  อนฺโต
คหิโตติ   อนฺตคฺคาหิกา   ทิฏฺฐิ   ทิฏฺฐิ   น   วตฺถุ   วตฺถุ   น   ทิฏฺฐิ
อญฺญา    ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ
ปฐมา   เนว  โหติ  น  น  โหติ  ตถาคโต  ปรมฺมรณาติ  อนฺตคฺคาหิกา
ทิฏฺฐิ     อนฺตคฺคาหิกา     ทิฏฺฐิ     มิจฺฉาทิฏฺฐิ     ฯเปฯ     อิมานิ
สญฺโญชนานิ   น   จ   ทิฏฺฐิโย   เวทนา   อิเธว   มรณธมฺมา  สญฺญา
อิเธว     มรณธมฺมา     สงฺขารา    อิเธว    มรณธมฺมา    วิญฺญาณํ
อิเธว  มรณธมฺมํ  ตถาคโต  กายสฺส  เภทา  [๒]-  เนว  โหติ  น  น
โหตีติ    อภินิเวสปรามาโส    ทิฏฺฐิ    ตาย   ทิฏฺฐิยา   โส   อนฺโต
คหิโตติ   อนฺตคฺคาหิกา   ทิฏฺฐิ   ทิฏฺฐิ   น   วตฺถุ   วตฺถุ   น   ทิฏฺฐิ
อญฺญา    ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ   วตฺถุ   อยํ
ปญฺจมี   เนว  โหติ  น  น  โหติ  ตถาคโต  ปรมฺมรณาติ  อนฺตคฺคาหิกา
ทิฏฺฐิ     อนฺตคฺคาหิกา     ทิฏฺฐิ     มิจฺฉาทิฏฺฐิ     ฯเปฯ     อิมานิ
สญฺโญชนานิ   น   จ   ทิฏฺฐิโย   เนว   โหติ  น  น  โหติ  ตถาคโต
@เชิงอรรถ: ๑-๒ ม. ปรํ มรณา ... ฯ
ปรมฺมรณาติ     อนฺตคฺคาหิกาย     ทิฏฺฐิยา    อิเมหิ    ปญฺจหากาเรหิ
อภินิเวโส    โหติ    อนฺตคฺคาหิกาย    ทิฏฺฐิยา    อิเมหิ   ปญฺญาสาย
อากาเรหิ อภินิเวโส โหติ ฯ
     [๓๔๘]   ปุพฺพนฺตานุทิฏฺฐิยา    กตเมหิ   อฏฺฐารสหิ   อากาเรหิ
อภินิเวโส   โหติ  ฯ  จตฺตาโร  สสฺสตวาทา  จตฺตาโร  เอกจฺจสสฺสติกา
จตฺตาโร     อนฺตานนฺติกา     จตฺตาโร     อมราวิกฺเขปิกา     เทฺว
อธิจฺจสมุปฺปนฺนิกา       ปุพฺพนฺตานุทิฏฺฐิยา       อิเมหิ      อฏฺฐารสหิ
อากาเรหิ อภินิเวโส โหติ ฯ
     [๓๔๙]   อปรนฺตานุทิฏฺฐิยา   กตเมหิ   จตุจตฺตาฬีสาย  อากาเรหิ
อภินิเวโส   โหติ   ฯ  โสฬส  สญฺญิวาทา  ๑-  อฏฺฐ  อสญฺญิวาทา  ๒-
อฏฺฐ      เนวสญฺญินาสญฺญิวาทา      สตฺต     อุจฺเฉทวาทา     ปญฺจ
ทิฏฺฐธมฺมนิพฺพานวาทา     อปรนฺตานุทิฏฺฐิยา     อิเมหิ    จตุจตฺตาฬีสาย
อากาเรหิ อภินิเวโส โหติ ฯ
     [๓๕๐]   สญฺโญชนิกาย     ทิฏฺฐิยา     กตเมหิ    อฏฺฐารสหิ
อากาเรหิ   อภินิเวโส  โหติ  ฯ  ยา  ทิฏฺฐิ  ทิฏฺฐิคตํ  ทิฏฺฐิคหณํ  ฯเปฯ
ทิฏฺฐาภินิเวโส     ทิฏฺฐิปรามาโส    สญฺโญชนิกาย    ทิฏฺฐิยา    อิเมหิ
อฏฺฐารสหิ อากาเรหิ อภินิเวโส โหติ ฯ
     [๓๕๑]   อหนฺติ   มานวินิพนฺธาย   ทิฏฺฐิยา   กตเมหิ  อฏฺฐารสหิ
อากาเรหิ   อภินิเวโส   โหติ   ฯ   จกฺขุํ  อหนฺติ  มานวินิพนฺธา  ทิฏฺฐิ
ทิฏฺฐิ    น   วตฺถุ   วตฺถุ   น   ทิฏฺฐิ   อญฺญา   ทิฏฺฐิ   อญฺญํ   วตฺถุ
@เชิงอรรถ: ๑-๒ ม. ยุ. สญฺญีวาทา อสญฺญีวาทา ฯ เอวมุปริปิ ฯ
ยา   จ   ทิฏฺฐิ   ยญฺจ   วตฺถุ   อยํ   ปฐมา   อหนฺติ   มานวินิพนฺธา
ทิฏฺฐิ     มานวินิพนฺธา     ทิฏฺฐิ     มิจฺฉาทิฏฺฐิ     ฯเปฯ     อิมานิ
สญฺโญชนานิ   น   จ   ทิฏฺฐิโย   โสตํ   อหนฺติ   ฯเปฯ  ฆานํ  อหนฺติ
ชิวฺหา   อหนฺติ   กาโย   อหนฺติ   มโน  อหนฺติ  ฯเปฯ  ธมฺมา  อหนฺติ
จกฺขุวิญฺญาณํ       อหนฺติ       ฯเปฯ       มโนวิญฺญาณํ      อหนฺติ
อภินิเวสปรามาโส     อหนฺติ     มานวินิพนฺธา    ทิฏฺฐิ    ทิฏฺฐิ    น
วตฺถุ   วตฺถุ  น  ทิฏฺฐิ  อญฺญา  ทิฏฺฐิ  อญฺญํ  วตฺถุ  ยา  จ  ทิฏฺฐิ  ยญฺจ
วตฺถุ    อยํ    อฏฺฐมี    อหนฺติ   มานวินิพนฺธา   ทิฏฺฐิ   มานวินิพนฺธา
ทิฏฺฐิ    มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย
อหนฺติ    มานวินิพนฺธาย    ทิฏฺฐิยา    อิเมหิ   อฏฺฐารสหิ   อากาเรหิ
อภินิเวโส โหติ ฯ
     [๓๕๒]   มมนฺติ   มานวินิพนฺธาย   ทิฏฺฐิยา   กตเมหิ  อฏฺฐารสหิ
อากาเรหิ   อภินิเวโส   โหติ   ฯ   จกฺขุํ  มมนฺติ  มานวินิพนฺธา  ทิฏฺฐิ
ทิฏฺฐิ   น   วตฺถุ   วตฺถุ  น  ทิฏฺฐิ  อญฺญา  ทิฏฺฐิ  อญฺญํ  วตฺถุ  ยา  จ
ทิฏฺฐิ    ยญฺจ    วตฺถุ    อยํ   ปฐมา   มมนฺติ   มานวินิพนฺธา   ทิฏฺฐิ
มานวินิพนฺธา   ทิฏฺฐิ   มิจฺฉาทิฏฺฐิ   ฯเปฯ   อิมานิ  สญฺโญชนานิ  น  จ
ทิฏฺฐิโย  โสตํ  มมนฺติ  ฯเปฯ  ฆานํ  มมนฺติ  ชิวฺหา  มมนฺติ  ฯเปฯ มโน
มมนฺติ   ฯเปฯ  ธมฺมา  มมนฺติ  จกฺขุวิญฺญาณํ  มมนฺติ  ฯเปฯ  มโนวิญฺญาณํ
มมนฺติ  อภินิเวสปรามาโส  มมนฺติ  มานวินิพนฺธา  ทิฏฺฐิ ทิฏฺฐิ น วตฺถุ วตฺถุ
น   ทิฏฺฐิ   อญฺญา  ทิฏฺฐิ  อญฺญํ  วตฺถุ  ยา  จ  ทิฏฺฐิ  ยญฺจ  วตฺถุ  อยํ
อฏฺฐมี   มมนฺติ   มานวินิพนฺธา   ทิฏฺฐิ   มานวินิพนฺธา  ทิฏฺฐิ  มิจฺฉาทิฏฺฐิ
ฯเปฯ   อิมานิ   สญฺโญชนานิ   น   จ  ทิฏฺฐิโย  มมนฺติ  มานวินิพนฺธาย
ทิฏฺฐิยา อิเมหิ อฏฺฐารสหิ อากาเรหิ อภินิเวโส โหติ ฯ
     [๓๕๓]   อตฺตวาทปฏิสํยุตฺตาย    ทิฏฺฐิยา    กตเมหิ    วีสติยา
อากาเรหิ   อภินิเวโส   โหติ   ฯ   อิธ  อสฺสุตวา  ปุถุชฺชโน  อริยานํ
อทสฺสาวี    อริยธมฺมสฺส   อโกวิโท   อริยธมฺเม   อวินีโต   สปฺปุริสานํ
อทสฺสาวี    สปฺปุริสธมฺมสฺส    อโกวิโท   สปฺปุริสธมฺเม   อวินีโต   รูปํ
อตฺตโต    สมนุปสฺสติ    รูปวนฺตํ   วา   อตฺตานํ   อตฺตนิ   วา   รูปํ
รูปสฺมึ    วา   อตฺตานํ   ฯเปฯ   เวทนํ   สญฺญํ   สงฺขาเร   วิญฺญาณํ
อตฺตโต    สมนุปสฺสติ    วิญฺญาณวนฺตํ    วา    อตฺตานํ   อตฺตนิ   วา
วิญฺญาณํ วิญฺญาณสฺมึ วา อตฺตานํ ฯเปฯ ฯ
     {๓๕๓.๑}   กถํ  รูปํ  อตฺตโต  สมนุปสฺสติ  ฯ อิเธกจฺโจ ปฐวีกสิณํ
ฯเปฯ   โอทาตกสิณํ   อตฺตโต   สมนุปสฺสติ  ยํ  โอทาตกสิณํ  โส  อหํ
โย    อหํ    ตํ    โอทาตกสิณนฺติ   โอทาตกสิณญฺจ   อตฺตญฺจ   อทฺวยํ
สมนุปสฺสติ    เสยฺยถาปิ    เตลปฺปทีปสฺส   ฌายโต   ยา   อจฺฉิ   โส
วณฺโณ    โย    วณฺโณ    สา    อจฺฉีติ   อจฺฉิญฺจ   วณฺณญฺจ   อทฺวยํ
สมนุปสฺสติ   เอวเมว   อิเธกจฺโจ   โอทาตกสิณํ   อตฺตโต   สมนุปสฺสติ
ฯเปฯ     อยํ     ปฐมา    รูปวตฺถุกา    อตฺตวาทปฏิสํยุตฺตา    ทิฏฺฐิ
อตฺตวาทปฏิสํยุตฺตา    ทิฏฺฐิ   มิจฺฉาทิฏฺฐิ   ฯเปฯ   อิมานิ   สญฺโญชนานิ
น    จ    ทิฏฺฐิโย   อตฺตวาทปฏิสํยุตฺตาย   ทิฏฺฐิยา   อิเมหิ   วีสติยา
อากาเรหิ อภินิเวโส โหติ ฯ
     [๓๕๔]   โลกวาทปฏิสํยุตฺตาย    ทิฏฺฐิยา    กตเมหิ    อฏฺฐหิ
อากาเรหิ   อภินิเวโส   โหติ   ฯ   สสฺสโต  อตฺตา  จ  โลโก  จาติ
อภินิเวสปรามาโส   โลกวาทปฏิสํยุตฺตา   ทิฏฺฐิ   ทิฏฺฐิ   น  วตฺถุ  วตฺถุ
น    ทิฏฺฐิ    อญฺญา   ทิฏฺฐิ   อญฺญํ   วตฺถุ   ยา   จ   ทิฏฺฐิ   ยญฺจ
วตฺถุ    อยํ    ปฐมา   โลกวาทปฏิสํยุตฺตา   ทิฏฺฐิ   โลกวาทปฏิสํยุตฺตา
ทิฏฺฐิ    มิจฺฉาทิฏฺฐิ   ฯเปฯ   อิมานิ   สญฺโญชนานิ   น   จ   ทิฏฺฐิโย
อสสฺสโต   อตฺตา   จ  โลโก  จาติ  สสฺสโต  จ  อสสฺสโต  จ  อตฺตา
จ   โลโก   จาติ   ฯเปฯ   เนวสสฺสโตนาสสฺสโต   อตฺตา  จ  โลโก
จาติ   อนฺตวา   อตฺตา  จ  โลโก  จาติ  อนนฺตวา  อตฺตา  จ  โลโก
จาติ    อนฺตวา    จ    อนนฺตวา   จ   อตฺตา   จ   โลโก   จาติ
เนวนฺตวานานนฺตวา    อตฺตา   จ   โลโก   จาติ   อภินิเวสปรามาโส
โลกวาทปฏิสํยุตฺตา    ทิฏฺฐิ    ทิฏฺฐิ    น    วตฺถุ   วตฺถุ   น   ทิฏฺฐิ
อญฺญา   ทิฏฺฐิ   อญฺญํ   วตฺถุ   ยา  จ  ทิฏฺฐิ  ยญฺจ  วตฺถุ  อยํ  อฏฺฐมี
โลกวาทปฏิสํยุตฺตา    ทิฏฺฐิ    โลกวาทปฏิสํยุตฺตา    ทิฏฺฐิ    มิจฺฉาทิฏฺฐิ
ฯเปฯ   อิมานิ   สญฺโญชนานิ   น   จ   ทิฏฺฐิโย   โลกวาทปฏิสํยุตฺตาย
ทิฏฺฐิยา อิเมหิ อฏฺฐหิ อากาเรหิ อภินิเวโส โหติ ฯ
     [๓๕๕]   โอลิยนาภินิเวโส   ภวทิฏฺฐิ   อติธาวนาภินิเวโส   ๑-
วิภวทิฏฺฐิ   อสฺสาททิฏฺฐิยา   ปญฺจตฺตึสาย   อากาเรหิ   อภินิเวโส   กติ
ภวทิฏฺฐิโย    กติ   วิภวทิฏฺฐิโย   อตฺตานุทิฏฺฐิยา   วีสติยา   อากาเรหิ
อภินิเวโส  กติ  ภวทิฏฺฐิโย  กติ  วิภวทิฏฺฐิโย  ฯเปฯ โลกวาทปฏิสํยุตฺตาย
ทิฏฺฐิยา     อฏฺฐหิ     อากาเรหิ     อภินิเวโส    กติ    ภวทิฏฺฐิโย
กติ วิภวทิฏฺฐิโย ฯ
     {๓๕๕.๑}   อสฺสาททิฏฺฐิยา   ปญฺจตฺตึสาย   อากาเรหิ  อภินิเวโส
สิยา    ภวทิฏฺฐิโย    สิยา    วิภวทิฏฺฐิโย    อตฺตานุทิฏฺฐิยา   วีสติยา
อากาเรหิ   อภินิเวโส   ปณฺณรส   ๒-   ภวทิฏฺฐิโย  ปญฺจ  วิภวทิฏฺฐิโย
มิจฺฉาทิฏฺฐิยา   ทสหิ   อากาเรหิ   อภินิเวโส   สพฺพาวตา  วิภวทิฏฺฐิโย
สกฺกายทิฏฺฐิยา   วีสติยา   อากาเรหิ   อภินิเวโส   ปณฺณรส  ภวทิฏฺฐิโย
ปญฺจ     วิภวทิฏฺฐิโย     สกฺกายวตฺถุกาย    สสฺสตทิฏฺฐิยา    ปณฺณรสหิ
อากาเรหิ    อภินิเวโส    สพฺพาวตา    ภวทิฏฺฐิโย    สกฺกายวตฺถุกาย
อุจฺเฉททิฏฺฐิยา ปญฺจหากาเรหิ อภินิเวโส สพฺพาวตา วิภวทิฏฺฐิโย
     {๓๕๕.๒}   สสฺสโต  โลโกติ  อนฺตคฺคาหิกาย ทิฏฺฐิยา ปญฺจหากาเรหิ
อภินิเวโส   สพฺพาวตา   ภวทิฏฺฐิโย   อสสฺสโต  โลโกติ  อนฺตคฺคาหิกาย
ทิฏฺฐิยา   ปญฺจหากาเรหิ   อภินิเวโส   สพฺพาวตา  วิภวทิฏฺฐิโย  อนฺตวา
โลโกติ   อนฺตคฺคาหิกาย   ทิฏฺฐิยา   ปญฺจหากาเรหิ   อภินิเวโส   สิยา
ภวทิฏฺฐิโย    สิยา   วิภวทิฏฺฐิโย   อนนฺตวา   โลโกติ   อนฺตคฺคาหิกาย
ทิฏฺฐิยา  ปญฺจหากาเรหิ  อภินิเวโส  สิยา  ภวทิฏฺฐิโย  สิยา  วิภวทิฏฺฐิโย
ตํ    ชีวํ    ตํ    สรีรนฺติ   อนฺตคฺคาหิกาย   ทิฏฺฐิยา   ปญฺจหากาเรหิ
@เชิงอรรถ:  สี. อภิภาวนาภินิเวโส ฯ  ปนฺนรสาติ วา ปาโฐ ฯ
อภินิเวโส    สพฺพาวตา    วิภวทิฏฺฐิโย   อญฺญํ   ชีวํ   อญฺญํ   สรีรนฺติ
อนฺตคฺคาหิกาย    ทิฏฺฐิยา    ปญฺจหากาเรหิ    อภินิเวโส    สพฺพาวตา
ภวทิฏฺฐิโย    โหติ   ตถาคโต   ปรมฺมรณาติ   อนฺตคฺคาหิกาย   ทิฏฺฐิยา
ปญฺจหากาเรหิ    อภินิเวโส    สพฺพาวตา    ภวทิฏฺฐิโย    น    โหติ
ตถาคโต    ปรมฺมรณาติ    อนฺตคฺคาหิกาย    ทิฏฺฐิยา    ปญฺจหากาเรหิ
อภินิเวโส   สพฺพาวตา   วิภวทิฏฺฐิโย  โหติ  จ  น  จ  โหติ  ตถาคโต
ปรมฺมรณาติ    อนฺตคฺคาหิกาย    ทิฏฺฐิยา    ปญฺจหากาเรหิ   อภินิเวโส
สิยา    ภวทิฏฺฐิโย    สิยา    วิภวทิฏฺฐิโย   [๑]-   อปรนฺตานุทิฏฺฐิยา
จตุจตฺตาฬีสาย  อากาเรหิ  อภินิเวโส  สิยา  ภวทิฏฺฐิโย สิยา วิภวทิฏฺฐิโย
สญฺโญชนิกาย ทิฏฺฐิยา
     {๓๕๕.๓}   อฏฺฐารสหิ  อากาเรหิ  อภินิเวโส สิยา ภวทิฏฺฐิโย สิยา
วิภวทิฏฺฐิโย   อหนฺติ   มานวินิพนฺธาย   ทิฏฺฐิยา   อฏฺฐารสหิ  อากาเรหิ
อภินิเวโส   สพฺพาวตา   วิภวทิฏฺฐิโย   มมนฺติ   มานวินิพนฺธาย  ทิฏฺฐิยา
อฏฺฐารสหิ   อากาเรหิ   อภินิเวโส   สพฺพาวตา  ภวทิฏฺฐิโย  อตฺตวาท-
ปฏิสํยุตฺตาย    ทิฏฺฐิยา    วีสติยา   อากาเรหิ   อภินิเวโส   ปณฺณรส
ภวทิฏฺฐิโย   ปญฺจ   วิภวทิฏฺฐิโย   โลกวาทปฏิสํยุตฺตาย   ทิฏฺฐิยา  อฏฺฐหิ
อากาเรหิ   อภินิเวโส  สิยา  ภวทิฏฺฐิโย  สิยา  วิภวทิฏฺฐิโย  สพฺพาวตา
ทิฏฺฐิโย   [๒]-   อตฺตานุทิฏฺฐิโย   สพฺพาวตา   ทิฏฺฐิโย   มิจฺฉาทิฏฺฐิโย
@เชิงอรรถ:  ม. เนว โหติ น น โหติ ตถาคโต ปรํ มรณาติ อนฺตคฺคาหิกาย ทิฏฺฐิยา
@ปญฺจหากาเรหิ อภินิเวโส สิยา ภวทิฏฺฐิโย สิยา วิภวทิฏฺฐิโย ฯ ปุพฺพนฺตานุทิฏฺฐิยา
@อฏฺฐารสหิ อากาเรหิ อภินิเวโส สิยา ภวทิฏฺฐิโย สิยา วิภวทิฏฺฐิโย ฯ
@ ม. ยุ. อสฺสาททิฏฺ ฐิโย สพฺพาวตา ทิฏฺฐิโย ฯ
สพฺพาวตา   ทิฏฺฐิโย   สกฺกายทิฏฺฐิโย  สพฺพาวตา  ทิฏฺฐิโย  อนฺตคฺคาหิกา
ทิฏฺฐิโย       สพฺพาวตา      ทิฏฺฐิโย      สญฺโญชนิกา      ทิฏฺฐิโย
อตฺตวาทปฏิสํยุตฺตา    ทิฏฺฐิโย    ภวทิฏฺฐิโย   ๑-   วิภวทิฏฺฐิโย   เอตํ
ทฺวยํ   ตกฺกิตา   นิสฺสิตา   เย   เตสํ  นิโรธมฺหิ  นตฺถิ  ญาณํ  ยตฺถายํ
โลโก วีปริตสญฺญีติ ฯ
     [๓๕๖]   ทฺวีหิ   ภิกฺขเว   ทิฏฺฐิคเตหิ   ปริยุฏฺฐิตา   เทวมนุสฺสา
โอลิยนฺติ ๒- เอเก อติธาวนฺติ เอเก จกฺขุมนฺโต จ ปสฺสนฺติ ฯ
     {๓๕๖.๑}   กถญฺจ  ภิกฺขเว  โอลิยนฺติ  เอเก  ภวารามา  ภิกฺขเว
เทวมนุสฺสา    ภวรตา    ภวสมฺมุทิตา    เตสํ    ภวนิโรธาย   ธมฺเม
เทสิยมาเน    จิตฺตํ    น   ปกฺขนฺทติ   น   สมฺปสีทติ   น   สนฺติฏฺฐติ
นาธิมุจฺจติ เอวํ โข ภิกฺขเว โอลิยนฺติ เอเก ฯ
     {๓๕๖.๒}   กถญฺจ  ภิกฺขเว  อติธาวนฺติ  เอเก  ภเวน โข ปเนเก
อฏฺฏิยมานา  ๓-  หรายมานา  ชิคุจฺฉมานา  วิภวํ  อภินนฺทนฺติ  ยโต  กิร
โภ   อตฺตา  กายสฺส  เภทา  อุจฺฉิชฺชติ  วินสฺสติ  น  โหติ  ปรมฺมรณาติ
เอตํ     สนฺตํ    เอตํ    ปณีตํ    ยถาภวนฺติ    ๔-    เอวํ    โข
ภิกฺขเว อติธาวนฺติ เอเก ฯ
     {๓๕๖.๓}   กถญฺจ  ภิกฺขเว  จกฺขุมนฺโต  จ  ปสฺสนฺติ  อิธ  ภิกฺขเว
ภิกฺขุ   ภูตํ   ภูตโต   ปสฺสติ   ภูตํ   ภูตโต   ทิสฺวา  ภูตสฺส  นิพฺพิทาย
วิราคาย   นิโรธาย   ปฏิปนฺโน   โหติ  เอวํ  โข  ภิกฺขเว  จกฺขุมนฺโต
@เชิงอรรถ:            ม. ภวญฺจ ทิฏฺฐึ วิภวญฺจ ทิฏฺฐึ,
@               เอตํ ทฺวยํ ตกฺกิกา นิสฺสิตา เส,
@               เตสํ น นิโรธมฺหิ น หตฺถิ ญาณํ,
@               ยตฺถายํ โลโก วีปรีตสญฺญีติ ฯ
@ ม. โอลียนฺติ ฯ เอวมุปริ ฯ  ม. อฏฺฏียมานา ฯ
จ ปสฺสนฺติ ฯ
           โย ภูตํ ภูตโต ทิสฺวา              ภูตสฺส จ อติกฺกมํ
           ยถาภูเตธิมุจฺจติ                   ภวตณฺหาปริกฺขยา
           สเจ ๑- ภูตสฺส ปริญฺญาโต     โส วีตตโณฺห ภวาภเว
           ภูตสฺส วิภวา ภิกฺขุ                 นาคจฺฉติ ปุนพฺภวนฺติ ฯ
     [๓๕๗]   ตโย ปุคฺคลา วิปนฺนทิฏฺฐี ตโย ปุคฺคลา สมฺปนฺนทิฏฺฐึ ฯ
     {๓๕๗.๑}   กตเม   ตโย   ปุคฺคลา   วิปนฺนทิฏฺฐี   ติตฺถิโย  จ
ติตฺถิยสาวโก จ โย จ มิจฺฉาทิฏฺฐิโก อิเม ตโย ปุคฺคลา วิปนฺนทิฏฺฐี ฯ
     {๓๕๗.๒}   กตเม   ตโย   ปุคฺคลา   สมฺปนฺนทิฏฺฐี  ตถาคโต  จ
ตถาคตสฺส   สาวโก   จ   โย  จ  สมฺมาทิฏฺฐิโก  อิเม  ตโย  ปุคฺคลา
สมฺปนฺนทิฏฺฐี ฯ
           โกธโน อุปนาหี จ              ปาปมกฺขี จ โย นโร
           วิปนฺนทิฏฺฐิ มายาวี            ตํ ชญฺญา วสโล อิติ ฯ
           อกฺโกธโน อนุปนาหี          อมกฺขี ๒- สุทฺธตํ คโต
           สมฺปนฺนทิฏฺฐิ เมธาวี          ตํ ชญฺญา อริโย อิตีติ ฯ
     [๓๕๘]   ติสฺโส วิปนฺนทิฏฺฐิโย ติสฺโส สมฺปนฺนทิฏฺฐิโย ฯ
     {๓๕๘.๑}   กตมา  ติสฺโส  วิปนฺนทิฏฺฐิโย  ฯ เอตํ มมนฺติ วิปนฺนทิฏฺฐิ
เอโสหมสฺมีติ   วิปนฺนทิฏฺฐิ   เอโส   เม   อตฺตาติ   วิปนฺนทิฏฺฐิ   อิมา
@เชิงอรรถ:  ม. สเว ภูตสฺส ปริญฺญาโต ฯ ยุ. สเว ภูตสฺส ปริญฺญา ฯ  ม. วิสุทฺโธ ฯ
ติสฺโส วิปนฺนทิฏฺฐิโย ฯ
     {๓๕๘.๒}   กตมา   ติสฺโส   สมฺปนฺนทิฏฺฐิโย   ฯ   เนตํ  มมนฺติ
สมฺปนฺนทิฏฺฐิ    เนโสหมสฺมีติ    สมฺปนฺนทิฏฺฐิ    น    เมโส    อตฺตาติ
สมฺปนฺนทิฏฺฐิ อิมา ติสฺโส สมฺปนฺนทิฏฺฐิโย ฯ
     [๓๕๙]   เอตํ  มมนฺติ  กา  ทิฏฺฐิ  กติ  ทิฏฺฐิโย  กตมนฺตานุคฺคหิตา
ตา   ทิฏฺฐิโย  เอโสหมสฺมีติ  กา  ทิฏฺฐิ  กติ  ทิฏฺฐิโย  กตมนฺตานุคฺคหิตา
ตา  ทิฏฺฐิโย  เอโส  เม  อตฺตาติ กา ทิฏฺฐิ กติ ทิฏฺฐิโย กตมนฺตานุคฺคหิตา
ตา   ทิฏฺฐิโย   ฯ   เอตํ   มมนฺติ   ปุพฺพนฺตานุทิฏฺฐิ  อฏฺฐารส  ทิฏฺฐิโย
ปุพฺพนฺตานุคฺคหิตา     ตา    ทิฏฺฐิโย    เอโสหมสฺมีติ    อปรนฺตานุทิฏฺฐิ
จตุจตฺตาฬสํ   ทิฏฺฐิโย   อปรนฺตานุคฺคหิตา   ตา   ทิฏฺฐิโย   เอโส  เม
อตฺตาติ     วีสติวตฺถุกา     อตฺตานุทิฏฺฐิ    วีสติวตฺถุกา    สกฺกายทิฏฺฐิ
สกฺกายทิฏฺฐิปฺปมุขานิ    ทฺวาสฏฺฐี    ทิฏฺฐิคตานิ   ปุพฺพนฺตาปรนฺตานุคฺคหิตา
ตา ทิฏฺฐิโย ฯ
     [๓๖๐]   เย   เกจิ   ภิกฺขเว   มยิ   นิฏฺฐงฺคตา   สพฺเพ  เต
ทิฏฺฐิสมฺปนฺนา   [๑]-   ปญฺจนฺนํ   อิธ   นิฏฺฐา   ปญฺจนฺนํ   อิธ  วิหาย
นิฏฺฐา ฯ
     {๓๖๐.๑}   กตเมสํ   ปญฺจนฺนํ  อิธ  นิฏฺฐา  ฯ  สตฺตกฺขตฺตุปรมสฺส
โกลงฺโกลสฺส  เอกพีชิสฺส  สกทาคามิสฺส  โย  จ  ทิฏฺเฐว  ธมฺเม  อรหา
อิเมสํ ปญฺจนฺนํ อิธ นิฏฺฐา ฯ
@เชิงอรรถ:  ม. ยุ. เตสํ ทิฏฺฐิสมฺปนฺนานํ ฯ
     {๓๖๐.๒}   กตเมสํ ปญฺจนฺนํ อิธ วิหาย นิฏฺฐา ฯ อนฺตราปรินิพฺพายิสฺส
อุปหจฺจปรินิพฺพายิสฺส      อสงฺขารปรินิพฺพายิสฺส     สสงฺขารปรินิพฺพายิสฺส
อุทฺธํโสตสฺส อกนิฏฺฐคามิโน อิเมสํ ปญฺจนฺนํ อิธ วิหาย นิฏฺฐา ฯ
     {๓๖๐.๓}   เย   เกจิ   ภิกฺขเว   มยิ  นิฏฺฐงฺคตา  สพฺเพ  เต
ทิฏฺฐิสมฺปนฺนา   ๑-   อิเมสํ   ปญฺจนฺนํ   อิธ   นิฏฺฐา   อิเมสํ  ปญฺจนฺนํ
อิธ วิหาย นิฏฺฐา ฯ
     [๓๖๑]   เย   เกจิ  ภิกฺขเว  มยิ  อเวจฺจปฺปสนฺนา  สพฺเพ  เต
โสตาปนฺนา    เตสํ    โสตาปนฺนานํ   อิเมสํ   ปญฺจนฺนํ   อิธ   นิฏฺฐา
ปญฺจนฺนํ อิธ วิหาย นิฏฺฐา ฯ
     {๓๖๑.๑}   กตเมสํ  ปญฺจนฺนํ  อิธ  นิฏฺฐา  ฯ  สตฺตกฺขตฺตุปรมสฺส
โกลงฺโกลสฺส  เอกพีชิสฺส  สกทาคามิสฺส  โย  จ  ทิฏฺเฐว  ธมฺเม  อรหา
อิเมสํ ปญฺจนฺนํ อิธ นิฏฺฐา ฯ
     {๓๖๑.๒}   กตเมสํ ปญฺจนฺนํ อิธ วิหาย นิฏฺฐา ฯ อนฺตราปรินิพฺพายิสฺส
อุปหจฺจปรินิพฺพายิสฺส      อสงฺขารปรินิพฺพายิสฺส     สสงฺขารปรินิพฺพายิสฺส
อุทฺธํโสตสฺส อกนิฏฺฐคามิโน อิเมสํ ปญฺจนฺนํ อิธ วิหาย นิฏฺฐา ฯ
     {๓๖๑.๓}   เย  เกจิ  ภิกฺขเว  มยิ  อเวจฺจปฺปสนฺนา  สพฺเพ  เต
โสตาปนฺนา   เตสํ   โสตาปนฺนานํ  อิเมสํ  ปญฺจนฺนํ  อิธ  นิฏฺฐา  อิเมสํ
ปญฺจนฺนํ อิธ วิหาย นิฏฺฐาติ ฯ
                                            ทิฏฺฐิกถา สมตฺตา ฯ
                                                  ------
@เชิงอรรถ:  ม. ยุ. เตสํ ทิฏฺฐิสมฺปนฺนานํ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๑๙๕-๒๔๓. http://84000.org/tipitaka/pali/pali_item_s.php?book=31&item=294&items=68&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=31&item=294&items=68&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=31&item=294&items=68&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=31&item=294&items=68&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=31&i=294              The Pali Atthakatha in Thai :- http://84000.org/tipitaka/atthapali/read_th.php?B=48&A=1047              The Pali Atthakatha in Roman :- http://84000.org/tipitaka/atthapali/read_rm.php?B=48&A=1047              สารบัญพระไตรปิฎกเล่มที่ ๓๑ http://84000.org/tipitaka/read/?index_31

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :