บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

หน้าที่ ๓๙๗.

เตตฺตึโส อุมฺมาปุปฺผิยวคฺโค ปฐมํ อุมฺมาปุปฺผิยตฺเถราปทานํ (๓๒๑) [๓๒๓] |๓๒๓.๑| สมาหิตํ สมาปนฺนํ สิทฺธตฺถมปราชิตํ สมาธินา อุปวิฏฺฐํ อทฺทสาสึ ^๑- นรุตฺตมํ ฯ |๓๒๓.๒| อุมฺมาปุปฺผํ คเหตฺวาน พุทฺธสฺส อภิปูชยึ ^๒- สพฺเพ ปุปฺผา เอกสีสา อุทฺธํวณฺฏา อโธมุขา ฯ |๓๒๓.๓| สุจิตฺตา วิย ติฏฺฐนฺเต อากาเส ปุปฺผสนฺถรา เตน จิตฺตปฺปสาเทน ตุสิตํ อุปปชฺชหํ ฯ |๓๒๓.๔| จตุนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๓๒๓.๕| ปญฺจปญฺญาสิโต กปฺเป เอโก อาสิ มหีปติ สมนฺตฉทโน นาม จกฺกวตฺติ มหพฺพโล ฯ |๓๒๓.๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อุมฺมาปุปฺผิโย เถโร อิมา คาถาโย อภาสิตฺถาติ ฯ อุมฺมาปุปฺผิยตฺเถรสฺส อปทานํ สมตฺตํ ฯ @เชิงอรรถ: ^๑ ม. อทฺทสาหํ ฯ ^๒ ม. ยุ. อภิโรปยึ ฯ

--------------------------------------------------------------------------------------------- หน้าที่ ๓๙๘.

ทุติยํ ปุฬินปูชกตฺเถราปทานํ (๓๒๒) [๓๒๔] |๓๒๔.๗| กกุธํ วิลสนฺตํว นิสภาชานิยํ ยถา โอสธีว วิโรจนฺตํ โอภาสนฺตํ นราสภํ ฯ |๓๒๔.๘| อญฺชลึ ปคฺคเหตฺวาน อวนฺทึ สตฺถุโน อหํ สตฺถารํ ปริวณฺเณสึ สกกมฺเมน โตสยึ ^๑- ฯ |๓๒๔.๙| สุสุทฺธํ ปุฬินํ คยฺหํ ^๒- คตมคฺเค สโมกิรึ อุจฺฉงฺเคน คเหตฺวาน วิปสฺสิสฺส มเหสิโน ฯ |๓๒๔.๑๐| ตโต อุปฑฺฒปุฬินํ วิปฺปสนฺเนน เจตสา ทิวาวิหาเร โอสิญฺจึ ทิปทินฺทสฺส ตาทิโน ฯ |๓๒๔.๑๑| เอกนวุเต อิโต กปฺเป ปุฬินํ ยํ อสิญฺจิหํ ทุคฺคตึ นาภิชานามิ ปุฬินสฺส อิทํ ผลํ ฯ |๓๒๔.๑๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปุฬินปูชโก เถโร อิมา คาถาโย อภาสิตฺถาติ ฯ ปุฬินปูชกตฺเถรสฺส อปทานํ สมตฺตํ ฯ ตติยํ หาสชนกตฺเถราปทานํ (๓๒๓) [๓๒๕] |๓๒๕.๑๓| ทุมคฺเค ปํสุกูลิกํ ^๓- ลคฺคํ ทิสฺวาน สตฺถุโน อญฺชลึ ปคฺคเหตฺวาน ภิยฺโย อุจฺจาริตํ มยา ฯ @เชิงอรรถ: ^๑ ยุ. โตสิโต ฯ ^๒ ม. ยุ. คยฺห ฯ ^๓ ม. ปํสุกูลกํ ฯ

--------------------------------------------------------------------------------------------- หน้าที่ ๓๙๙.

|๓๒๕.๑๔| ทูรโต ปฏิทิสฺวาน ^๑- หาโส เม อุปปชฺชถ อญฺชลึ ปคฺคเหตฺวาน ภิยฺโย จิตฺตํ ปสาทยึ ฯ |๓๒๕.๑๕| เอกนวุเต อิโต กปฺเป ยํ สญฺญมลภึ ตทา ทุคฺคตึ นาภิชานามิ พุทฺธสญฺญายิทํ ผลํ ฯ |๓๒๕.๑๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา หาสชนโก เถโร อิมา คาถาโย อภาสิตฺถาติ ฯ หาสชนกตฺเถรสฺส อปทานํ สมตฺตํ ฯ จตุตฺถํ ยญฺญสามิกตฺเถราปทานํ (๓๒๔) [๓๒๖] |๓๒๖.๑๗| ชาติยา สตฺตวสฺโสหํ อโหสึ มนฺตปารคู กุลวํสํ ^๒- อธาเรสึ ยญฺโญ อุสฺสาปิโต ^๓- มยา ฯ |๓๒๖.๑๘| จุลฺลาสีติสหสฺสานิ ปสู หญฺญนฺติ เม ตทา สารสฺมึ ^๔- หิ อุปนีตานิ ยญฺญตฺถาย อุปฏฺฐิตา ฯ |๓๒๖.๑๙| อุกฺกามุโข ปหฏฺโฐว ^๕- ขทิรงฺคารสนฺนิโภ อุทยนฺโตว สุริโย ปุณฺณมาเยว จนฺทิมา ฯ |๓๒๖.๒๐| สิทฺธตฺโถ สพฺพสิทฺธตฺโถ ติโลกมหิโตหิโต อุปคนฺตฺวาน สมฺพุทฺโธ อิทํ วจนมพฺรวิ ฯ @เชิงอรรถ: ^๑ ม. ทูรโต ปน ทิสฺวาน ฯ ^๒ ม. กุลวตฺตํ ฯ ^๓ ม. ยุ. อุสฺสาหิโต ฯ @^๔ ม. ยุ. สารถมฺภุปนีตานิ ฯ ^๕ ยุ. ปหโต ว ฯ

--------------------------------------------------------------------------------------------- หน้าที่ ๔๐๐.

|๓๒๖.๒๑| อหึสา สพฺพปาณานํ ^๑- กุมาร มม รุจฺจติ เถยฺยา จ อติจารา จ มชฺชปานา จ อารติ ฯ |๓๒๖.๒๒| รติ จ สมจริยาย พาหุสจฺจํ กตญฺญุตา ทิฏฺเฐ ธมฺเม ปรตฺถ จ ธมฺมา เอเต ปสํสิยา ฯ |๓๒๖.๒๓| เอเต ธมฺเม ภาวยิตฺวา สพฺพสตฺตหิเต รโต พุทฺเธ จิตฺตํ ปสาเทตฺวา ภาเวหิ มคฺคมุตฺตมํ ฯ |๓๒๖.๒๔| อิทํ วตฺวาน สพฺพญฺญู โลกเชฏฺโฐ นราสโภ มเมวํ อนุสาสิตฺวา เวหาสํ อุคฺคโต คโต ฯ |๓๒๖.๒๕| ปุพฺเพ จิตฺตํ วิโสเธตฺวา ปจฺฉา จิตฺตํ ปสาทยึ เตน จิตฺตปฺปสาเทน ตุสิตํ อุปปชฺชหํ ฯ |๓๒๖.๒๖| จตุนวุเต อิโต กปฺเป ยทา จิตฺตํ ปสาทยึ ทุคฺคตึ นาภิชานามิ พุทฺธสญฺญายิทํ ผลํ ฯ |๓๒๖.๒๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ยญฺญสามิโก เถโร อิมา คาถาโย อภาสิตฺถาติ ฯ ยญฺญสามิกตฺเถรสฺส อปทานํ สมตฺตํ ฯ ปญฺจมํ นิมิตฺตสญฺญกตฺเถราปทานํ (๓๒๕) [๓๒๗] |๓๒๗.๒๘| จนฺทภาคานทีตีเร วสามิ อสฺสเม อหํ สุวณฺณมิคมทฺทกฺขึ จรนฺตํ วิวเน ^๒- อหํ ฯ @เชิงอรรถ: ^๑ ม. สพฺพปาณีนํ ฯ ^๒ ม. ยุ. วิปิเน ฯ

--------------------------------------------------------------------------------------------- หน้าที่ ๔๐๑.

|๓๒๗.๒๙| มิเค จิตฺตํ ปสาเทตฺวา โลกเชฏฺฐํ อนุสฺสรึ เตน จิตฺตปฺปสาเทน อญฺเญ พุทฺเธ อนุสฺสรึ ฯ |๓๒๗.๓๐| อพฺภตีตา จ เย พุทฺธา วตฺตมานา อนาคตา ^๑- เอวเมว วิโรจนฺติ มิคราชาว เต ^๒- ตโย ฯ |๓๒๗.๓๑| จตุนวุเต อิโต กปฺเป ยํ สญฺญมลภึ ตทา ทุคฺคตึ นาภิชานามิ พุทฺธสญฺญายิทํ ผลํ ฯ |๓๒๗.๓๒| สตฺตวีเส อิโต กปฺเป เอโก อาสิ มหีปติ อรญฺญสตฺโต นาเมน จกฺกวตฺติ มหพฺพโล ฯ |๓๒๗.๓๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นิมิตฺตสญฺญโก เถโร อิมา คาถาโย อภาสิตฺถาติ ฯ นิมิตฺตสญฺญกตฺเถรสฺส อปทานํ สมตฺตํ ฯ ฉฏฺฐํ อนฺนสํสาวกตฺเถราปทานํ (๓๒๖) [๓๒๘] |๓๒๘.๓๔| สุวณฺณวณฺณํ สมฺพุทฺธํ คจฺฉนฺตํ อนฺตราปเณ กญฺจนคฺฆิยสงฺกาสํ พตฺตึสวรลกฺขณํ ฯ |๓๒๘.๓๕| สิทฺธตฺถํ สพฺพสิทฺธตฺถํ อเนญฺชํ อปราชิตํ สมฺพุทฺธํ อตินาเมตฺวา โภชยึ ตํ มหามุนึ ฯ @เชิงอรรถ: ^๑ ยุ. ตถาคตา ฯ ^๒ ยุ. เจตโส ฯ

--------------------------------------------------------------------------------------------- หน้าที่ ๔๐๒.

|๓๒๘.๓๖| มุนิ การุณิโก โลเก โอภาสยิ มมํ ตทา พุทฺเธ จิตฺตํ ปสาเทตฺวา กปฺปํ สคฺคมฺหิ โมทหํ ฯ |๓๒๘.๓๗| จตุนวุเต อิโต กปฺเป ยํ ทานมททึ ตทา ทุคฺคตึ นาภิชานามิ ภิกฺขทานสฺสิทํ ผลํ ฯ |๓๒๘.๓๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อนฺนสํสาวโก เถโร อิมา คาถาโย อภาสิตฺถาติ ฯ อนฺนสํสาวกตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๓๙๗-๔๐๒. http://84000.org/tipitaka/pali/pali_item_s.php?book=32&item=323&items=6&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=32&item=323&items=6&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=323&items=6&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=323&items=6&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=323 The Pali Atthakatha in Thai :- http://84000.org/tipitaka/atthapali/read_th.php?B=50&A=5210 The Pali Atthakatha in Roman :- http://84000.org/tipitaka/atthapali/read_rm.php?B=50&A=5210 สารบัญพระไตรปิฎกเล่มที่ ๓๒ http://84000.org/tipitaka/read/?index_32