บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

ฉฏฺฐํ นนฺทกตฺเถราปทานํ (๔๐๖) [๔๐๘] |๔๐๘.๑๖๒| มิคลุทฺโธ ปุเร อาสึ อรญฺเญ กานเน อหํ ปสทํ มิคเมสนฺโต สยมฺภุํ อทฺทสํ อหํ ฯ |๔๐๘.๑๖๓| อนุรุทฺโธ นาม สมฺพุทฺโธ สยมฺภู อปราชิโต วิเวกกาโม โส ธีโร วนํ อชฺโฌคหิ ตทา ฯ |๔๐๘.๑๖๔| จตุทณฺเฑ คเหตฺวาน จตุฏฺฐาเน ฐเปสหํ มณฺฑปํ สุกตํ กตฺวา ปทุมปุปฺเผหิ ฉาทยิ ^๑- ฯ @เชิงอรรถ: ^๑ ม. ยุ. ฉาทยึ ฯ

--------------------------------------------------------------------------------------------- หน้าที่ ๕๕๑.

|๔๐๘.๑๖๕| มณฺฑปํ ฉาทยิตฺวาน สยมฺภุํ อภิวาทยึ ธนุํ ตตฺเถว นิกฺขิปฺป ปพฺพชึ อนคาริยํ ฯ |๔๐๘.๑๖๖| น จิรํ ปพฺพชิตสฺส พฺยาธิ เม อุปปชฺชถ ปุพฺพกมฺมํ สริตฺวาน ตตฺถ กาลํ กโต อหํ ฯ |๔๐๘.๑๖๗| ปุพฺพกมฺเมน สํยุตฺโต ตุสิตํ อคมาสหํ ตตฺถ โสณฺณมยํ พฺยมฺหํ นิพฺพตฺตติ ยถิจฺฉกํ ฯ |๔๐๘.๑๖๘| สหสฺสยุตฺตํ หยวาหึ ทิพฺพยานมธิฏฺฐิโต อาโรหิตฺวาน ตํ ยานํ คจฺฉามหํ ยถิจฺฉกํ ฯ |๔๐๘.๑๖๙| ตโต เม นียมานสฺส เทวภูตสฺส เม สโต สมนฺตา โยชนสตํ มณฺฑโป เม ธรียติ ฯ |๔๐๘.๑๗๐| สยเน โส ^๑- ตุวฏฺฏามิ อจฺฉนฺเน ปุปฺผสนฺถเต อนฺตลิกฺขา จ ปทุมา วสฺสนฺเต นิจฺจกาลิกํ ฯ |๔๐๘.๑๗๑| มรีจิเก ผนฺทมาเน ตปฺปมาเน จ อาตเป น มํ ตปติ ^๒- อาตปฺโป มณฺฑปสฺส อิทํ ผลํ ฯ |๔๐๘.๑๗๒| ทุคฺคตึ สมติกฺกนฺโต อปายา ปิหิตา มม มณฺฑเป รุกฺขมูเล วา สนฺตาโป เม น วิชฺชติ ฯ |๔๐๘.๑๗๓| มหิสญฺญํ อธิฏฺฐาย โลณโตยํ ตรามหํ ตสฺส เม สุกตํ กมฺมํ พุทฺธปูชายิทํ ผลํ ฯ |๔๐๘.๑๗๔| อพฺภมฺหิ ^๓- ปถํ กตฺวาน คจฺฉามิ อนิลญฺชเส อโห เม สุกตํ กมฺมํ พุทฺธปูชายิทํ ผลํ ฯ @เชิงอรรถ: ^๑ ม. หํ ฯ ^๒ ม. ตาเปติ ฯ ^๓ ม. ยุ. อปถมฺปิ ฯ

--------------------------------------------------------------------------------------------- หน้าที่ ๕๕๒.

|๔๐๘.๑๗๕| ปุพฺเพนิวาสํ ชานามิ ทิพฺพจกฺขุํ วิโสธิตํ อาสวา เม ปริกฺขีณา พุทฺธปูชายิทํ ผลํ ฯ |๔๐๘.๑๗๖| ชหิตา ปุริมา ชาติ พุทฺธสฺส โอรโส อหํ ทายาโทมฺหิ จ สทฺธมฺเม พุทฺธปูชายิทํ ผลํ ฯ |๔๐๘.๑๗๗| อาราธิโตมฺหิ สุคตํ โคตมํ สกฺยปุงฺควํ ธมฺมธโร ^๑- ธมฺมทายาโท พุทฺธปูชายิทํ ผลํ ฯ |๔๐๘.๑๗๘| อุปฏฺฐิตฺวาน สมฺพุทฺธํ โคตมํ สกฺยปุงฺควํ ปารํ คมนิยํ มคฺคํ อปุจฺฉึ โลกนายกํ ฯ |๔๐๘.๑๗๙| อชฺฌิฏฺโฐ กถยิ พุทฺโธ คมฺภีรํ นิปุณํ ปทํ ตสฺสาหํ ธมฺมํ สุตฺวาน ปตฺโตมฺหิ อาสวกฺขยํ ฯ |๔๐๘.๑๘๐| อโห เม สุกตํ กมฺมํ ปริมุตฺโตมฺหิ ชาติยา สพฺพาสวปริกฺขีโณ นตฺถิ ทานิ ปุนพฺภโว ฯ |๔๐๘.๑๘๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๐๘.๑๘๒| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๐๘.๑๘๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นนฺทโก เถโร อิมา คาถาโย อภาสิตฺถาติ ฯ นนฺทกตฺเถรสฺส อปทานํ สมตฺตํ ฯ @เชิงอรรถ: ^๑ ม. ยุ. ธมฺมทฺธโช ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๕๕๐-๕๕๒. http://84000.org/tipitaka/pali/pali_item_s.php?book=32&item=408&items=1&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=32&item=408&items=1&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=408&items=1&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=408&items=1&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=408 The Pali Atthakatha in Thai :- http://84000.org/tipitaka/atthapali/read_th.php?B=50&A=5435 The Pali Atthakatha in Roman :- http://84000.org/tipitaka/atthapali/read_rm.php?B=50&A=5435 สารบัญพระไตรปิฎกเล่มที่ ๓๒ http://84000.org/tipitaka/read/?index_32