เตจตฺตาฬีโส สกึสมฺมชฺชกวคฺโค
ปฐมํ สกึสมฺมชฺชกตฺเถราปทานํ (๔๒๑)
[๑๑] |๑๑.๑| วิปสฺสิโน ภควโต ปาฏลึ โพธิมุตฺตมํ
ทิสฺวาว ตํ ปาทปคฺคํ ตตฺถ จิตฺตํ ปสาทยึ ฯ
|๑๑.๒| สมฺมชฺชนึ คเหตฺวาน โพธึ สมฺมชฺชิ ตาวเท
สมฺมชฺชิตฺวาน ตํ โพธึ อวนฺทึ ปาฏลึ อหํ ฯ
|๑๑.๓| ตตฺถ จิตฺตํ ปสาเทตฺวา สิเร กตฺวาน อญฺชลึ
นมสฺสมาโน ตํ โพธึ คญฺฉึ ปฏิกุฏึ อหํ ฯ
|๑๑.๔| จาริมคฺเคน ๑- คจฺฉามิ สรนฺโต โพธิมุตฺตมํ
อชคโร มํ ปีเฬติ โฆรรูโป มหพฺพโล ฯ
|๑๑.๕| อาสนฺเน เม กตํ กมฺมํ ผเลน โตสยี มมํ
กเลวรํ เม คิลติ เทวโลเก รมามหํ ฯ
|๑๑.๖| อนาวิลํ มม จิตฺตํ วิสุทฺธํ ปณฺฑรํ สทา
โสกสลฺลํ น ชานามิ จิตฺตสนฺตาปนํ มม ฯ
|๑๑.๗| กุฏฺฐํ คณฺโฑ กิลาโส จ อปมาโร วิตจฺฉิกา
ททฺทุ กณฺฑุ จ เม นตฺถิ ผลํ สมฺมชฺชนายิทํ ฯ
|๑๑.๘| โสโก จ ปริฬาโห จ หทเย เม น วิชฺชติ
อภนฺตํ ๒- อุชุกํ จิตฺตํ ผลํ สมฺมชฺชนายิทํ ฯ
@เชิงอรรถ: ๑ ม. ตาทิมคฺเคน ฯ ยุ. จาริมมคฺเคน ฯ ๒ ยุ. อสตฺตํ ฯ
|๑๑.๙| สมาธึ ๑- ปุน ปชฺชามิ วิสุทฺธํ ๒- โหติ มานสํ
ยํ ยํ สมาธึ อิจฺฉามิ โส โส สมฺปชฺชเต มม ฯ
|๑๑.๑๐| รชนีเย น รชฺชามิ อโถ โทสนิเยสุ จ
โมหนีเย น มุยฺหามิ ผลํ สมฺมชฺชนายิทํ ฯ
|๑๑.๑๑| เอกนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ ผลํ สมฺมชฺชนายิทํ ฯ
|๑๑.๑๒| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๑.๑๓| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๑.๑๔| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สกึสมฺมชฺชโก เถโร อิมา คาถาโย อภาสิตฺถาติ ฯ
สกึสมฺมชฺชกตฺเถรสฺส อปทานํ สมตฺตํ ฯ
ทุติยํ เอกทุสฺสทายกตฺเถราปทานํ (๔๒๒)
[๑๒] |๑๒.๑๕| นคเร หํสวติยา อโหสึ ติณหารโก
ติณหาเรน ชีวามิ เตน โปเสมิ ทารเก ฯ
|๑๒.๑๖| ปทุมุตฺตโร นาม ชิโน สพฺพธมฺมาน ปารคู
ตมนฺธการํ นาเสตฺวา อุปฺปชฺชิ โลกนายโก ฯ
@เชิงอรรถ: ๑ ม. สมาธีสุ น มชฺชามิ ฯ ยุ. น สชฺชามิ ฯ ๒ ม. วิสทํ ฯ
|๑๒.๑๗| สเก ฆเร นิสีทิตฺวา เอวํ จินฺเตสิ ตาวเท
พุทฺโธ โลเก สมุปฺปนฺโน เทยฺยธมฺโม น วิชฺชติ ฯ
|๑๒.๑๘| อิทํ เม สาฏกํ เอกํ นตฺถิ เม โกจิ ทายโก
ทุกฺโข นิรยสมฺผสฺโส โรปยิสฺสามิ ทกฺขิณํ ฯ
|๑๒.๑๙| เอวาหํ จินฺตยิตฺวาน สกํ จิตฺตํ ปสาทยึ
เอกํ ทุสฺสํ คเหตฺวาน พุทฺธเสฏฺฐสฺสทาสหํ ฯ
|๑๒.๒๐| เอกํ ทุสฺสํ ททิตฺวาน อุกฺกุฏฺฐึ สมฺปวตฺตยึ
ยทิ พุทฺโธ ตุวํ วีร ตาเรหิ มํ มหามุนิ ฯ
|๑๒.๒๑| ปทุมุตฺตโร โลกวิทู อาหุตีนํ ปฏิคฺคโห
มมํ ทานํ ปกิตฺเตนฺโต อกา เม อนุโมทนํ ฯ
|๑๒.๒๒| อิมินา เอกทุสฺเสน เจตนาปณิธีหิ จ
กปฺปสตสหสฺสานิ วินิปาตํ น คจฺฉติ ฯ
|๑๒.๒๓| ฉตฺตึสกฺขตฺตุํ เทวินฺโท เทวรชฺชํ กริสฺสติ
เตตฺตึสกฺขตฺตุํ ราชา จ จกฺกวตฺติ ภวิสฺสติ ฯ
|๑๒.๒๔| ปเทสรชฺชํ วิปุลํ คณนาโต อสงฺขยํ
เทวโลเก มนุสเส วา สํสรนฺโต ตุวํ ภเว ฯ
|๑๒.๒๕| รูปวา คุณสมฺปนฺโน อนุวตฺตนฺตเทหวา
อกฺโขภํ อมิตํ ทุสฺสํ ลภิสฺสติ ยถิจฺฉกํ ฯ
|๑๒.๒๖| อิทํ วตฺวาน สมฺพุทฺโธ ชลชุตฺตมนามโก ๑-
นภํ อพฺภุคฺคมิ ธีโร หํสราชาว อมฺพเร ฯ
@เชิงอรรถ: ๑ ยุ. ชลชุตฺตมนายโก ฯ
|๑๒.๒๗| ยํ ยํ โยนูปปชฺชามิ เทวตฺตํ อถ มานุสํ
โภเค เม อูนตา นตฺถิ เอกทุสฺสสฺสิทํ ผลํ ฯ
|๑๒.๒๘| ปทุทฺธาเร ปทุทฺธาเร ทุสฺสํ นิพฺพตฺตเต มม
เหฏฺฐา ทุสฺสมฺหิ ติฏฺฐาหิ อุปริจฺฉทนํ มม ฯ
|๑๒.๒๙| จกฺกวาฬํ อุปาทาย สกานนํ สปพฺพตํ
อิจฺฉมาโน อหํ อชฺช ทุสฺเสนจฺฉาทเยยฺย ตํ ฯ
|๑๒.๓๐| เตเนว เอกทุสฺเสน สํสรนฺโต ภวาภเว
สุวณฺณวณฺโณ หุตฺวาน สํสรามิ ภวาภเว ฯ
|๑๒.๓๑| วิปากํ เอกทุสฺสสฺส อชฺฌคํ ๑- ตตฺถ ภิกฺขุตํ
อยํปิ ๒- ปจฺฉิมา ชาติ วิปจฺจติ อิธาปิ เม ฯ
|๑๒.๓๒| สตสหสฺเส อิโต กปฺเป ยํ ทุสฺสมททึ ตทา
ทุคฺคตึ นาภิชานามิ เอกทุสฺสสฺสิทํ ผลํ ฯ
|๑๒.๓๓| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๒.๓๔| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๒.๓๕| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา เอกทุสฺสทายโก เถโร อิมา คาถาโย อภาสิตฺถาติ ฯ
เอกทุสฺสทายกตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. นาชฺฌคํ กตฺถ จิกฺขยํ ฯ ๒ ม. อยํ เม อนฺติมา ชาติ ฯ
ตติยํ เอกาสนทายกตฺเถราปทานํ (๔๒๓)
[๑๓] |๑๓.๓๖| หิมวนฺตสฺส อวิทูเร กสิโก ๑- นาม ปพฺพโต
อสฺสโม สุกโต มยฺหํ ปณฺณสาลา สุมาปิตา ฯ
|๑๓.๓๗| นารโท นาม นาเมน กสฺสโป อิติ มํ วิทู
สุทฺธิมคฺคํ คเวสนฺโต วสามิ กสิเก ตทา ฯ
|๑๓.๓๘| ปทุมุตฺตโร นาม ชิโน สพฺพธมฺมาน ปารคู
วิเวกกาโม สมฺพุทฺโธ อาคญฺฉิ อนิลญฺชสา ฯ
|๑๓.๓๙| วนคฺเค คจฺฉมานสฺส ทิสฺวา รํสึ มเหสิโน
กฏฺฐมญฺจํ ปญฺญาเปตฺวา อชินญฺจ อปตฺถรึ ฯ
|๑๓.๔๐| อาสนํ ปญฺญาเปตฺวาน สีเส กตฺวาน อญฺชลึ
โสมนสฺสํ ปเวเทตฺวา อิทํ วจนมพฺรวึ ฯ
|๑๓.๔๑| สลฺลกตฺโต ตุวํ ธีร อาตุรานํ ติกิจฺฉโก
มม ราคปเรตสฺส ๒- ติกิจฺฉํ เทหิ นายก ฯ
|๑๓.๔๒| ปุญฺญตฺถิกา ๓- เย ปสฺสนฺติ พุทฺธเสฏฺฐํ ตุวํ มุนิ
ธุวตฺถสิทฺธึ ปปฺโปนฺติ เอเตสํ อชโร ภเว ฯ
|๑๓.๔๓| น เม เทยฺยํ ๔- ตว อตฺถิ ปวตฺตผลโภชหํ
อิทํ เม อาสนํ อตฺถิ นิสีท กฏฺฐมญฺจเก ฯ
|๑๓.๔๔| นิสีทิ ตตฺถ ภควา อฉมฺภิโตว เกสรี
มุหุตฺตํ วีตินาเมตฺวา อิทํ วจนมพฺรวิ ฯ
@เชิงอรรถ: ๑ ม. โคสิโต ฯ ยุ. โกสิโก ฯ ๒ ม. ยุ. โรคปเรตสฺส ฯ ๓ ม. ยุ.
@กลฺลตฺถิกา ฯ ๔ ม. เทยฺยธมฺโม อตฺถิ ฯ
|๑๓.๔๕| วิสฺสฏฺโฐ โหหิ มา ภายิ ลทฺโธ โชติรโส ตยา
ยํ ตุยฺหํ ปตฺถิตํ สพฺพํ ปริปูเรสฺสตาสนํ ๑- ฯ
|๑๓.๔๖| น ๒- โถกํ สุกตํ ปุญฺญํ ปุญฺญกฺเขตฺเต อนุตฺตเร
สกฺกา อุทฺธริตุํ อตฺตา ยสฺส จิตฺตํ สุนีหิตํ ๓- ฯ
|๑๓.๔๗| อิมินา อาสนทาเนน เจตนาปณิธีหิ จ
กปฺปสตสหสฺสานิ วินิปาตํ น คจฺฉติ ฯ
|๑๓.๔๘| ปญฺญาสกฺขตฺตุํ เทวินฺโท เทวรชฺชํ กริสฺสติ
อสีติกฺขตฺตุํ ราชา จ จกฺกวตฺติ ภวิสฺสติ ฯ
|๑๓.๔๙| ปเทสรชฺชํ วิปุลํ คณนาโต อสงฺขยํ
สพฺพตฺถ สุขิโต หุตฺวา สํสาเร สํสริสฺสติ ฯ
|๑๓.๕๐| อิทํ วตฺวาน สมฺพุทฺโธ ชลชุตฺตมนามโก
นภํ อพฺภุคฺคมิ ธีโร หํสราชาว อมฺพเร ฯ
|๑๓.๕๑| หตฺถิยานํ อสฺสยานํ สรถํ สนฺทมานิกํ
ลภามิ สพฺพเมเวตํ เอกาสนสฺสิทํ ผลํ ฯ
|๑๓.๕๒| กานนํ ปวิสิตฺวาน ยทา อิจฺฉามิ อาสนํ
มม สงฺกปฺปมญฺญาย ปลฺลงฺโก อุปติฏฺฐติ ฯ
|๑๓.๕๓| วาริมชฺฌคโต สนฺโต ยทา อิจฺฉามิ อาสนํ
มม สงฺกปฺปมญฺญาย ปลฺลงฺโก อุปติฏฺฐติ ฯ
|๑๓.๕๔| ยํ ยํ โยนูปปชฺชามิ เทวตฺตํ อถ มานุสํ
ปลฺลงฺกสตสหสฺสานิ ปริวาเรนฺติ มํ สทา ฯ
@เชิงอรรถ: ๑ ม. ยุ. ปริปูริสฺสตินาคเต ฯ ๒ ม. น โมฆํ ตํ กตํ ตุยฺหํ ฯ ยุ. น โถกํ ตํ
@กตํ ตุยฺหํ ฯ ๓ ม. ยุ. ปณีหิตํ ฯ
|๑๓.๕๕| ทุเว ภเว สํสรามิ เทวตฺเต อถ มานุเส
ทุเว กุเล จ ชายามิ ขตฺติเย จาปิ พฺราหฺมเณ ฯ
|๑๓.๕๖| เอกาสนํ ททิตฺวาน ปุญฺญกฺเขตฺเต อนุตฺตเร
ธมฺมปลฺลงฺกมญฺญาย ๑- วิหรามิ อนาสโว ฯ
|๑๓.๕๗| สตสหสฺเส อิโต กปฺเป ยํ ทานมททึ ตทา
ทุคฺคตึ นาภิชานามิ เอกาสนสฺสิทํ ผลํ ฯ
|๑๓.๕๘| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๓.๕๙| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๓.๖๐| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา เอกาสนทายโก เถโร อิมา คาถาโย อภาสิตฺถาติ ฯ
เอกาสนทายกตฺเถรสฺส อปทานํ สมตฺตํ ฯ
จตุตฺถํ สตฺตกทมฺพปุปฺผิยตฺเถราปทานํ (๔๒๔)
[๑๔] |๑๔.๖๑| หิมวนฺตสฺส อวิทูเร กทมฺโพ ๒- นาม ปพฺพโต
ตสฺมึ ปพฺพตปสฺสมฺหิ ๓- สตฺต พุทฺธา วสึสุ เต ฯ
|๑๔.๖๒| กทมฺพปุปฺผํ ๔- ทิสฺวาน ปคฺคเหตฺวาน อญฺชลึ
สตฺต มาลานิ คเหตฺวา ปุณฺณจิตฺเตน ๕- โอกิรึ ฯ
@เชิงอรรถ: ๑ ม. ยุ. ...มาทาย ฯ ๒ ม. กุกฺกุโฏ ... ฯ ๓ ม. ...ปาทมฺหิ ฯ
@๔ ม. ยุ. กทมฺพํ ปุปฺผิตํ ... ฯ ๕ ม. ยุ. ปุญฺญจิตฺเตน ฯ
|๑๔.๖๓| เตน กมฺเมน สุกเตน เจตนาปณิธีหิ จ
ชหิตฺวา มานุสํ เทหํ ตาวตึสํ อคญฺฉหํ ฯ
|๑๔.๖๔| จตุนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ พุทฺธปูชายิทํ ผลํ ฯ
|๑๔.๖๕| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๔.๖๖| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๔.๖๗| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สตฺตกทมฺพปุปฺผิโย เถโร อิมา คาถาโย อภาสิตฺถาติ ฯ
สตฺตกทมฺพปุปฺผิยตฺเถรสฺส อปทานํ สมตฺตํ ฯ
ปญฺจมํ โกรณฺฑปุปฺผิยตฺเถราปทานํ (๔๒๕)
[๑๕] |๑๕.๖๘| วนกมฺมิโก ปุเร อาสึ ปิตุเปตามเหนหํ ๑-
ปสุมาเรน ๒- ชีวามิ กุสลํ เม น วิชฺชติ ฯ
|๑๕.๖๙| มม อาสยสามนฺตา ติสฺโส โลกคฺคนายโก
ปทานิ ตีณิ ทสฺเสสิ อนุกมฺปาย จกฺขุมา ฯ
|๑๕.๗๐| อกฺกนฺเต จ ปเท ทิสฺวา ติสฺสนามสฺส สตฺถุโน
หฏฺโฐ หฏฺเฐน จิตฺเตน ปเท จิตฺตํ ปสาทยึ ฯ
@เชิงอรรถ: ๑ ปิตุมาตุมเตนหํ ฯ ๒ ยุ. ปรรุหิเรน ฯ
|๑๕.๗๑| โกรณฺฑํ ปุปฺผิตํ ทิสฺวา ปาทปํ ธรณีรุหํ
สโกฏิกํ ๑- คเหตฺวาน ปทเสฏฺฐํ อปูชยึ ฯ
|๑๕.๗๒| เตน กมฺเมน สุกเตน เจตนาปณิธีหิ จ
ชหิตฺวา มานุสํ เทหํ ตาวตึสํ อคญฺฉหํ ฯ
|๑๕.๗๓| ยํ ยํ โยนูปปชฺชามิ เทวตฺตํ อถ มานุสํ
โกรณฺฑวณฺณโกเยว สปฺปภาโส ๒- ภวามหํ ฯ
|๑๕.๗๔| เทฺวนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ ปทปูชายิทํ ผลํ ฯ
|๑๕.๗๕| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๕.๗๖| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๕.๗๗| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติ ฯ
โกรณฺฑปุปฺผิยตฺเถรสฺส อปทานํ สมตฺตํ ฯ
ฉฏฺฐํ ฆฏมณฺฑทายกตฺเถราปทานํ (๔๒๖)
[๑๖] |๑๖.๗๘| สุจินฺติตํ ภควนฺตํ โลกเชฏฺฐํ นราสภํ
อุปวิฏฺฐํ มหารญฺญํ วาตาพาเธน ปีฬิตํ ฯ
@เชิงอรรถ: ๑ ม. สโกสกํ ฯ ยุ. สโกฏกํ ฯ ๒ ม. สุปฺปภาโส ฯ
|๑๖.๗๙| ทิสฺวา จิตฺตํ ปสาเทตฺวาน ฆฏมณฺฑํ อุปานยึ
กตตฺตา อปจิตตฺตา ๑- จ คงฺคา ภาคีรสี ๒- อยํ ฯ
|๑๖.๘๐| มหาสมุทฺทา จตฺตาโร ฆฏํ สมฺปชฺชเร มม
อยญฺจ ปฐวี โฆรา อปฺปมาณา อสงฺขยา ฯ
|๑๖.๘๑| มม สงฺกปฺปมญฺญาย ภวเต มธุสกฺขรา
จตุทฺทิสา ๓- อิเม รุกฺขา ปาทปา ธรณีรุหา ฯ
|๑๖.๘๒| มม สงฺกปฺปมญฺญาย กปฺปรุกฺขา ภวนฺติ เต
ปญฺญาสกฺขตฺตุํ เทวินฺโท เทวรชฺชมการยึ ฯ
|๑๖.๘๓| เอกปญฺญาสกฺขตฺตุญฺจ จกฺกวตฺติ อโหสหํ
ปเทสรชฺชํ วิปุลํ คณนาโต อสงฺขยํ ฯ
|๑๖.๘๔| จตุนวุเต อิโต กปฺเป ยํ ทานมททึ ตทา
ทุคฺคตึ นาภิชานามิ ฆฏมณฺฑสฺสิทํ ผลํ ฯ
|๑๖.๘๕| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๖.๘๖| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๖.๘๗| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ฆฏมณฺฑทายโก เถโร อิมา คาถาโย อภาสิตฺถาติ ฯ
ฆฏมณฺฑทายกตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. อาจิตตฺตา จ ฯ ๒ ม. ภาคีรถี ฯ ๓ ม. ยุ. จาตุทฺทีปา ฯ
สตฺตมํ เอกธมฺมสวนิยตฺเถราปทานํ (๔๒๗)
[๑๗] |๑๗.๘๘| ปทุมุตฺตโร นาม ชิโน สพฺพธมฺมาน ปารคู
จตุสจฺจํ ปกาเสนฺโต สนฺตาเรสิ พหุํ ชนํ ฯ
|๑๗.๘๙| อหํ เตน สมเยน ชฏิโล อุคฺคตาปโน
ธุนนฺโต วากจีรานิ คจฺฉามิ อมฺพเร ตทา ฯ
|๑๗.๙๐| พุทฺธเสฏฺฐสฺส อุปริ คนฺตุํ น วิสหามหํ
ปกฺขีว เสลมาสชฺช คมนํ น ลภามหํ ฯ
|๑๗.๙๑| อุทเก โธปยิตฺวาน ๑- เอวํ คจฺฉามิ อมฺพเร
น เม อิทํ ภูตปุพฺพํ อิริยาปถวิโกปนํ ฯ
|๑๗.๙๒| หนฺท เม ตํ คเวสิสฺสํ อปฺเปวตฺถํ ลเภยฺยหํ
โอโรหนฺโต อนฺตลิกฺขา สทฺทมสฺโสสิ สตฺถุโน ฯ
|๑๗.๙๓| สเรน รชนีเยน สวนีเยน วตฺตุนา ๒-
อนิจฺจตํ กเถนฺตสฺส ตญฺเญว อุคฺคหึ ตทา ฯ
อนิจฺจสญฺญมุคฺคยฺห อคมาสึ มมสฺสมํ
|๑๗.๙๔| ยาวตายุํ วสิตฺวาน ตตฺถ กาลํ กโต อหํ ฯ
จริเม วตฺตมานมฺหิ สทฺธมฺมสฺสวนํ สรึ
|๑๗.๙๕| เตน กมฺเมน สุกเตน เจตนาปณิธีหิ จ ฯ
ชหิตฺวา มานุสํ เทหํ ตาวตึสํ อคญฺฉหํ
|๑๗.๙๖| ตึสกปฺปสหสฺสานิ เทวโลเก รมึ อหํ ฯ
@เชิงอรรถ: ๑ ม. โวกฺกมิตฺวาน ฯ ยุ. โวมิสิตฺวาน ฯ ๒ ม. ยุ. วคฺคุนา ฯ
เอกปญฺญาสกฺขตฺตุญฺจ เทวรชฺชมการยึ
|๑๗.๙๗| เอกตึสติกฺขตฺตุญฺจ ๑- จกฺกวตฺติ อโหสหํ ฯ
ปเทสรชฺชํ วิปุลํ คณนาโต อสงฺขยํ
|๑๗.๙๘| อนุโภมิ สกํ ปุญฺญํ สุขิโตหํ ภวาภเว ฯ
อนุสฺสรามิ ตํ สญฺญํ สํสรนฺโต ภวาภเว
น เกนจิหํ ๒- วิชฺฌามิ นิพฺพานํ อจฺจุตํ ปทํ ฯ
|๑๗.๙๙| ปิตุ เคเห นิสีทิตฺวา สมโณ ภาวิตินฺทฺริโย
กถํ โส ปริทีเปนฺโต อนิจฺจํ ๓- ตตฺถุทาหริ ฯ
|๑๗.๑๐๐| อนิจฺจา วต สงฺขารา อุปฺปาทวยธมฺมิโน
อุปฺปชฺชิตฺวา นิรุชฺฌนฺติ เตสํ วูปสโม สุโข ฯ
|๑๗.๑๐๑| สห คาถํ สุณิตฺวาน สพฺพสญฺญํ ๔- อนุสฺสรึ
เอกาสเน นิสีทิตฺวา อรหตฺตมปาปุณึ ฯ
|๑๗.๑๐๒| ชาติยา สตฺตวสฺเสน อรหตฺตํ อปาปุณึ
อุปสมฺปาทยิ พุทฺโธ ธมฺมสฺสวนสฺสิทํ ผลํ ฯ
|๑๗.๑๐๓| สตสหสฺเส อิโต กปฺเป ยํ ธมฺมํ อสุณึ ตทา
ทุคฺคตึ นาภิชานามิ ธมฺมสฺสวนสฺสิทํ ผลํ ฯ
|๑๗.๑๐๔| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๗.๑๐๕| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
@เชิงอรรถ: ๑ ม. ยุ. เอกวีสติกฺขตฺตุญฺจ ฯ ๒ ม. ยุ. น โกฏึ ปฏิวิชฺฌามิ ๓ ม. อนิจจตมุทาหริ ฯ
@ยุ. อนิจฺจํ วตฺถุทาหรึ ฯ ๔ โป. ม. ยุ. ปุพฺพสญฺญมนุสฺสรึ ฯ
|๑๗.๑๐๖| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อตฺถํ สุทํ อายสฺมา เอกธมฺมสวนิโย เถโร อิมา คาถาโย อภาสิตฺถาติ ฯ
เอกธมฺมสวนิยตฺเถรสฺส อปทานํ สมตฺตํ ฯ
อฏฺฐมํ สุจินฺติตตฺเถราปทานํ (๔๒๘)
[๑๘] |๑๘.๑๐๗| นคเร หํสวติยา อโหสึ กสโก ตทา
กสิกมฺเมน ชีวามิ เตน โปเสมิ ทารเก ฯ
|๑๘.๑๐๘| สุสมฺปนฺนํ ตทา เขตฺตํ ธญฺญํ เม ผลินํ อหุ
ปากกาเลว สมฺปตฺเต เอวํ จินฺเตสหํ ตทา ฯ
|๑๘.๑๐๙| น ๑- เมจฺฉนฺนํ น ปฏิรูปํ ชานนฺตสฺส คุณาคุณํ
โยหํ สงฺเฆ อทตฺวาน อคฺคํ ภุญฺเชยฺยมตฺตนา ๒- ฯ
|๑๘.๑๑๐| สมฺพุทฺโธ อสโม โลเก ทฺวตฺตึสวรลกฺขโณ
ตโต จ ภาวิโต สงฺโฆ ปุญฺญกฺเขตฺตํ ๓- อนุตฺตรํ ฯ
|๑๘.๑๑๑| ตตฺถ ทสฺสามิหํ ทานํ นวสสฺสํ ปุเร ปุเร
เอวาหํ จินฺตยิตฺวาน หฏฺโฐ ปีติกมานโส ๔- ฯ
|๑๘.๑๑๒| เขตฺตโต ธญฺญมาหริตฺวา สมฺพุทฺธํ อุปสงฺกมึ
อุปสงฺกมฺม สมฺพุทฺธํ โลกเชฏฺฐํ นราสภํ ฯ
วนฺทิตฺวา สตฺถุโน ปาเท อิทํ วจนมพฺรวึ
|๑๘.๑๑๓| นวสสฺสญฺจ สมฺปนฺนํ อิธ โหสิ จ ตฺวํ ๕- มุเน ฯ
@เชิงอรรถ: ๑ ม. ยุ. นจฺฉนฺนํ ฯ ๒ ม. ภุญฺเชยฺย เจ ตทา ฯ ยุ. ภุญฺเชยฺย มํ ตทา ฯ
@๓ ม. ยุ. ปุญฺญกฺเขตโต อนุตฺตโร ฯ ๔ ม. ยุ. ปิณิตมานโส ฯ ๕ ม. อายาโคสิ
@โคสิ จ ตุวํ มุเน ฯ ยุ. อายาโยปิ ... ฯ
อนุกมฺปํ อุปาทาย อธิวาเสหิ จกฺขุม
|๑๘.๑๑๔| ปทุมุตฺตโร โลกวิทู อาหุตีนํ ปฏิคฺคโห ฯ
มม สงฺกปฺปมญฺญาย อิทํ วจนมพฺรวิ
|๑๘.๑๑๕| จตฺตาโร จ ปฏิปนฺนา จตฺตาโร จ ผเล ฐิตา ฯ
เอส สงฺโฆ อุชุภูโต ปญฺญาสีลสมาหิโต
ยชนฺตานํ มนุสฺสานํ ปุญฺญเปกฺขาน ปาณินํ ฯ
|๑๘.๑๑๖| กโรตํ อุปจิกํ ๑- ปุญฺญํ สงฺเฆ ทินฺนํ มหปฺผลํ
ตสฺมึ สงฺเฆ จ ทาตพฺพํ ตว สสฺสํ ตเถตรํ ฯ
|๑๘.๑๑๗| สงฺฆโต อุทฺทิสิตฺวาน ภิกฺขู เนตฺวา สกํ ฆรํ
ปฏิยตฺตํ ฆเร สนฺตํ ภิกฺขุสงฺฆสฺส เทหิ ตฺวํ ฯ
|๑๘.๑๑๘| สงฺฆโต อุทฺทิสิตฺวาน ภิกฺขู เนตฺวานหํ ฆรํ
ยํ ฆเร ปฏิยตฺตํ เม ภิกฺขุสงฺฆสฺสทาสหํ
|๑๘.๑๑๙| เตน กมฺเมน สุกเตน เจตนาปณิธีหิ จ
ชหิตฺวา มานุสํ เทหํ ตาวตึสํ อคญฺฉหํ ฯ
|๑๘.๑๒๐| ตตฺถ เม สุกตํ พฺยมฺหํ โสวณฺณํ สุปภสฺสรํ
สฏฺฐิโยชนมุพฺเพธํ ตึสโยชนวิตฺถตํ ฯ
เอกูนวีสติมํ ภาณวารํ ฯ
|๑๘.๑๒๑| อากิณฺณํ ภวนํ มยฺหํ นารีคณสมากุลํ
ตตฺถ ภุตฺวา ปิวิตฺวา จ วสามิ ติทเส อหํ ฯ
@เชิงอรรถ: ๑ ม. กโรโต ปธิกํ ฯ ยุ. กโรนฺตํ โอปธิกํ ฯ
|๑๘.๑๒๒| สตานํ ตึสกฺขตฺตุํ ๑- จ เทวรชฺชมการยึ
สตานํ ปญฺจกฺขตฺตุญฺจ เทวรชฺชมการยึ ฯ
|๑๘.๑๒๓| สตานํ ปญฺจกฺขตฺตุญฺจ จกฺกวตฺติ อโหสหํ
ปเทสรชฺชํ วิปุลํ คณนาโต อสงฺขยํ ฯ
|๑๘.๑๒๔| ภวาภเว สํสรนฺโต ลภามิ อมิตํ ธนํ
โภเค เม อูนตา นตฺถิ นวสสฺสสฺสิทํ ผลํ ฯ
|๑๘.๑๒๕| หตฺถิยานํ อสฺสยานํ สิวิกํ สนฺทมานิกํ
ลภามิ สพฺพเมเวตํ นวสสฺสสฺสิทํ ผลํ ฯ
|๑๘.๑๒๖| นววตฺถํ นวผลํ นวคฺครสโภชนํ
ลภามิ สพฺพเมเวตํ นวสสฺสสฺสิทํ ผลํ ฯ
|๑๘.๑๒๗| โกเสยฺยํ กมฺพลิยานิ โขมกปฺปาสิกานิ จ
ลภามิ สพฺพเมเวตํ นวสสฺสสฺสิทํ ผลํ ฯ
|๑๘.๑๒๘| ทาสีคณํ ทาสคณํ นาริโย สมลงฺกตา
ลภามิ สพฺพเมเวตํ นวสสฺสสฺสิทํ ผลํ ฯ
|๑๘.๑๒๙| น มํ สีตํ ว อุณฺหํ วา ปริฬาโห น วิชฺชติ
อโถ เจตสิกํ ทุกฺขํ หทเย เม น วิชฺชติ ฯ
|๑๘.๑๓๐| อิมํ ขาท อิมํ ภุญฺช อิมมฺหิ สยเน สย
ลภามิ สพฺพเมเวตํ นวสสฺสสฺสิทํ ผลํ ฯ
|๑๘.๑๓๑| อยํ ปจฺฉิมโก ทานิ จริโม วตฺตเต ภโว
อชฺชาปิ เทยฺยธมฺโม ๒- เม มมํ ๓- โตเสติ สพฺพทา ฯ
@เชิงอรรถ: ๑ ม. ยุ. ตีณิกฺขตฺตุญฺจ ฯ ๒ ยุ. เทยฺยธมฺเม ฯ ๓ ม. ยุ. ผลํ ฯ
|๑๘.๑๓๒| นวสสฺสํ ททิตฺวาน สงฺเฆ คณวรุตฺตเม
อฏฺฐานิสํเส อนุโภมิ กมฺมานุจฺฉวิเก มม ฯ
|๑๘.๑๓๓| วณฺณวา ยสวา โหมิ มหาโภโค อนีติโก
มหาภกฺโข ๑- สทา โหมิ อเภชฺชปริโส สทา ฯ
|๑๘.๑๓๔| สพฺเพ มํ อปจายนฺติ เยเกจิ ปฐวิสฺสิตา
เทยฺยธมฺโม จ โยโกจิ ปุเร ปุเร ลภามิหํ ฯ
|๑๘.๑๓๕| ภิกฺขุสงฺฆสฺส วา มชฺเฌ พุทฺธเสฏฺฐสฺส สมฺมุขา
สพฺเพปิ สมติกฺกมฺม เทนฺติ มเมว ทายกา ฯ
|๑๘.๑๓๖| ปฐมํ นวสสฺสญฺหิ ทตฺวา สงฺเฆ คณุตฺตเม
อิมานิสํเส อนุโภมิ นวสสฺสสฺสิทํ ผลํ ฯ
|๑๘.๑๓๗| สตสหสฺเส อิโต กปฺเป ยํ ทานมททึ ตทา
ทุคฺคตึ นาภิชานามิ นวสสฺสสฺสิทํ ผลํ ฯ
|๑๘.๑๓๘| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๘.๑๓๙| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๘.๑๔๐| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สุจินฺติโต เถโร อิมา คาถาโย อภาสิตฺถาติ ฯ
สุจินฺติตตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. มหาปกฺโข ฯ
นวมํ โสณฺณกึกณิยตฺเถราปทานํ ๑- (๔๒๙)
[๑๙] |๑๙.๑๔๑| สทฺธาย อภินิกฺขมฺม ปพฺพชึ อนคาริยํ
วากจีรธโร อาสึ ตโปกมฺมมปสฺสิโต ฯ
|๑๙.๑๔๒| อตฺถทสฺสี ตุ ภควา โลกเชฏฺโฐ นราสโภ
อุปฺปชฺชิ ตมฺหิ สมเย ตารยนฺโต มหาชนํ ฯ
|๑๙.๑๔๓| พลญฺจ วต เม ขีณํ พฺยาธินา ปรเมนหํ ๒-
พุทฺธเสฏฺฐํ สริตฺวาน ปุฬิเน ถูปมุตฺตมํ ฯ
|๑๙.๑๔๔| กริตฺวา หฏฺฐจิตฺโตหํ สหเสน ๓- สโมกิรึ
โสณฺณกึกณิปุปฺผานิ อุทคฺคมนโส อหํ ฯ
|๑๙.๑๔๕| สมฺมุขา วิย สมฺพุทฺธํ ถูปํ ปริจรึ อหํ
เตน เจโตปสาเทน อตฺถทสฺสิสฺส ตาทิโน ฯ
|๑๙.๑๔๖| เทวโลกํ คโต สนฺโต ลภามิ วิปุลํ สุขํ
สุวณฺณวณฺโณ ตตฺถาสิ พุทฺธปูชายิทํ ผลํ ฯ
|๑๙.๑๔๗| อสีติโกฏิโย มยฺหํ นาริโย สมลงฺกตา
สทา มยฺหํ อุปฏฺฐนฺติ พุทฺธปูชายิทํ ผลํ ฯ
|๑๙.๑๔๘| สฏฺฐี ตุริยสหสฺสานิ เภริโย ปณวาปิจ
สงฺขา จ เทณฺฑิมา ตตฺถ วคฺคู วชฺชนฺติ ทุนฺทุภิ ฯ
|๑๙.๑๔๙| จุลฺลาสีติสหสฺสานิ หตฺถิโย สมลงฺกตา
ติธปฺปภินฺนา มาตงฺคา กุญฺชรา สฏฺฐิหายนา ฯ
@เชิงอรรถ: ๑ ม. ยุ. โสวณฺณ... ฯ ๒ ม. ปรเมน ตํ ฯ ๓ ม. สหตฺเถน ฯ
|๑๙.๑๕๐| เหมชาลาภิสญฺฉนฺนา อุปฏฺฐานํ กโรนฺติ เม
พลกาเย ภเว ๑- เจว อูนตา เม น วิชฺชติ ฯ
|๑๙.๑๕๑| โสณฺณกึกณิปุปฺผานํ วิปากํ อนุโภมิหํ
อฏฺฐปญฺญาสกฺขตฺตุํ จ เทวรชฺชมการยึ ฯ
|๑๙.๑๕๒| เอกสตฺตติกฺขตฺตุญฺจ จกฺกวตฺติ อโหสหํ
ปฐพฺยา รชฺชํ เอกสตํ มหิยา การยึ อหํ ฯ
|๑๙.๑๕๓| โส ทานิ ปตฺโต อมตํ คมฺภีรํ ๒- ทุทฺทสํ ปทํ
สํโยชนา ปริกฺขีณา นตฺถิ ทานิ ปุนพฺภโว ฯ
|๑๙.๑๕๔| อฏฺฐารเส กปฺปสเต ยํ ปุปฺผมภิโรปยึ
ทุคฺคตึ นาภิชานามิ พุทฺธปูชายิทํ ผลํ ฯ
|๑๙.๑๕๕| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๑๙.๑๕๖| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๑๙.๑๕๗| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา โสณฺณกึกณิโย เถโร อิมา คาถาโย อภาสิตฺถาติ ฯ
โสณฺณกึกณิยตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. คเช ฯ ๒ ม. ยุ. อสงฺขตํ สุทุทฺทสํ ฯ
ทสมํ โสวณฺณโกนฺตริกตฺเถราปทานํ ๑- (๔๓๐)
[๒๐] |๒๐.๑๕๘| มโนภาวนิยํ พุทฺธํ อตฺตทนฺตํ สมาหิตํ
อิริยมานํ พฺรหฺมปเถ จิตฺตวูปสเม รตํ ฯ
|๒๐.๑๕๙| นิติณฺณโอฆ สมฺพุทฺธํ ฌายึ ฌานรตํ มุนึ
อุปวิฏฺฐํ ๒- สมาปตฺตึ อินฺทฺริยสํวรปฺปหํ ๓- ฯ
|๒๐.๑๖๐| อลาวุโนทกํ คยฺห พุทฺธเสฏฺฐํ อุปาคมึ
พุทฺธปาเท โธวิตฺวาน อลาวุกมทาสหํ ฯ
|๒๐.๑๖๑| อาณาเปสิ จ สมฺพุทฺโธ ปทุมุตฺตรนามโก
อิมิโมทกมาหตฺวา ปาทมูเล ฐเปหิ เม ฯ
|๒๐.๑๖๒| สาธูติหํ ปฏิสฺสุตฺวา สตฺถุ คารวตายว ๔-
อุทกํ ลาวุนาหตฺวา พุทฺธเสฏฺฐํ อุปานยึ ๕- ฯ
|๒๐.๑๖๓| อนุโมทิ มหาวีโร จิตฺตํ นิพฺพาปยํ มม
อิมินา ลาวุทาเนน สงฺกปฺโป เต สมิชฺฌตุ ฯ
|๒๐.๑๖๔| ปณฺณรเส อิโต กปฺเป เทวโลเก รมึ อหํ
เตตฺตึสกฺขตฺตุํ ราชา จ จกฺกวตฺติ อโหสหํ ฯ
|๒๐.๑๖๕| ทิวา วา ยทิวา รตฺตึ จงฺกมนฺตสฺส ติฏฺฐโต
โสวณฺณํ โกนฺตรํ คยฺห ติฏฺฐนฺติ ๖- ปุรโต มม ฯ
|๒๐.๑๖๖| พุทฺธสฺส ทตฺวาน ลาวุํ ลภามิ โสณฺณโกนฺตรํ
อปฺปกํปิ กรํ การํ วิปุลํ โหติ ตาทิสุ ๗-
@เชิงอรรถ: ๑ ม. โสณฺณโกนฺตริกตฺ... ฯ ยุ. สุวณฺณกตฺตริกตฺ... ฯ ๒ ม. อุปติตฺถํ
@สมาปนฺนํ ฯ ๓ ม. ยุ. อินฺทิวรทลปฺปภํ ฯ ๔ ม. ยุ. ... จ ฯ ๕ ม. อุปาคมึ ฯ
@๖ ม. ติฏฺฐเต ฯ ยุ. ติฏฺฐติ ฯ ๗ ยุ. ตาทิสํ ฯ
|๒๐.๑๖๗| สตสหสฺเส อิโต กปฺเป ยํ ลาวุมททึ ตทา
ทุคฺคตึ นาภิชานามิ อลาวุสฺส อิทํ ผลํ ฯ
|๒๐.๑๖๘| กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
|๒๐.๑๖๙| สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
|๒๐.๑๗๐| ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา โสวณฺณโกนฺตริโก เถโร อิมา คาถาโย อภาสิตฺถาติ ฯ
โสวณฺณโกนฺตริกตฺเถรสฺส อปทานํ สมตฺตํ ฯ
อุทฺทานํ
สกึสมฺมชฺชโก เถโร เอกทุสฺสาสนปฺปทา
กทมฺพ โกรณฺฑกทา ฆฏสวนิโกปิจ
สุจินฺติโต กึกณิโก โสณฺณโกนฺตริโกปิจ
เอกคาถาสตญฺเจตฺถ เอกสตฺตติเมว จ ฯ
สกึสมฺมชฺชกวคฺโค เตจตฺตาฬีโส ฯ
-----------------------
เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๒๔-๔๓.
http://84000.org/tipitaka/pali/pali_item_s.php?book=33&item=11&items=10&modeTY=2
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=11&items=10&modeTY=2&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=11&items=10&modeTY=2
อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=11&items=10&modeTY=2
ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=11
The Pali Atthakatha in Thai :-
http://84000.org/tipitaka/atthapali/read_th.php?B=50&A=5493
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5493
สารบัญพระไตรปิฎกเล่มที่ ๓๓
http://84000.org/tipitaka/read/?index_33
บันทึก ๑๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
