บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

หน้าที่ ๕๘๕.

ฉฏฺฐํ มูคผกฺขจริยํ [๒๖] |๒๖.๔๘| ปุนาปรํ ยทา โหมิ กาสิราชสฺส อตฺรโช มูคผกฺโขติ ^๑- นาเมน เตมิโยติ วทนฺติ มํ ฯ |๒๖.๔๙| โสฬสิตฺถีสหสฺสานํ น วิชฺชติ ปุโม ตทา อโหรตฺตานมจฺจเยน นิพฺพตฺโต อหเมกโก ฯ |๒๖.๕๐| กิจฺฉา ลทฺธํ ปิยํ ปุตฺตํ อภิชาตํ ชุตินฺธรํ เสตจฺฉตฺตํ ธารยิตฺวาน สยเน โปเสสิ มํ ปิตา ฯ |๒๖.๕๑| นิทฺทายมาโน สยนวเร ปพุชฺฌิตฺวานหํ ตทา อทฺทสํ ปณฺฑรํ ฉตฺตํ เยนาหํ นิรยํ คโต ฯ |๒๖.๕๒| สห ทิฏฺฐิสฺส ^๒- เม ฉตฺตํ ตาโส อุปฺปชฺชิ เภรโว วินิจฺฉยํ สมาปนฺโน กทาหํ อิมํ มุญฺจิสฺสํ ฯ |๒๖.๕๓| ปุพฺพสาโลหิตา มยฺหํ เทวตา อตฺถกามินี สา มํ ทิสฺวาน ทุกฺขิตํ ตึสุ ฐาเนสุ โยชยิ ฯ |๒๖.๕๔| มา ปณฺฑิจฺจยํ วิภาวย พาลมโต ภว สพฺพปาณินํ สพฺโพ ตญฺชโน โอจินายตุ เอวํ ตว อตฺโถ ภวิสฺสติ ฯ |๒๖.๕๕| เอวํ วุตฺตายหํ ตสฺสา อิทํ วจนมพฺรวึ กโรมิ เต ตํ วจนํ ยํ มํ ภณสิ เทวเต ฯ |๒๖.๕๖| อตฺถกามาสิ เม อมฺม หิตกามาสิ เทวเต ตสฺสาหํ วจนํ สุตฺวา สาคเรว ถลํ ลภึ ฯ @เชิงอรรถ: ^๑ ม. ยุ. มูคปกฺโขติ ฯ ^๒ ม. ทิฏฺฐสฺส ฯ

--------------------------------------------------------------------------------------------- หน้าที่ ๕๘๖.

|๒๖.๕๗| หฏฺโฐ สํวิคฺคมานโส ตโย องฺเค อธิฏฺฐหึ มูโค อโหสึ พธิโร ผกฺโข ^๑- คติวิวชฺชิโต ฯ |๒๖.๕๘| เอเต องฺเค อธิฏฺฐาย วสฺสานิ โสฬสํ วสึ ตโต เม หตฺเถ ปาเท จ ชิวฺหํ โสตญฺจ มทฺทิย |๒๖.๕๙| อนูนตํ เม ปสฺสิตฺวา กาฬกณฺณีติ นินฺทิสุํ ฯ ตโต ชานปทา สพฺเพ เสนาปติปุโรหิตา |๒๖.๖๐| สพฺเพ เอกมนา หุตฺวา ฉฑฺฑนํ อนุโมทิสุํ ฯ โสหํ เตสํ มตึ สุตฺวา หฏฺโฐ สํวิคฺคมานโส |๒๖.๖๑| ยสฺสตฺถาย ตโป จิณฺโณ โส เม อตฺโถ สมิชฺฌถ ฯ นฺหาเปตฺวา อนุลิมฺเปตฺวา เวเฐตฺวา ราชเวฐนํ |๒๖.๖๒| อภิสิญฺจิตฺวา ฉตฺเตน กาเรสุํ ปุรํ ปทกฺขิณํ ฯ สตฺตาหํ ธารยิตฺวาน อุคฺคเต รวิมณฺฑเล |๒๖.๖๓| รเถน มํ นีหริตฺวา สารถิ วนมุปาคมิ ฯ เอโกกาเส รถํ กตฺวา สชฺชสฺสํ หตฺถมุญฺจิโต ^๒- |๒๖.๖๔| สารถิ ขณตี กาสุํ นิกฺขาตุํ ปฐวิยา มมํ ฯ อธิฏฺฐิตมธิฏฺฐานํ ตชฺเชนฺโต วิวิธการณา |๒๖.๖๕| น ภินฺทึว ตมธิฏฺฐานํ โพธิยาเยว การณา ฯ มาตา ปิตา น เม เทสฺสา อตฺตา เม น จ เทสฺสิโย |๒๖.๖๖| สพฺพญฺญุตํ ปิยํ มยฺหํ ตสฺมา ว ตมธิฏฺฐหึ ฯ @เชิงอรรถ: ^๑ ม. ยุ. ปกฺโข ฯ ^๒ ยุ. หตฺถมุญฺจิตํ ฯ

--------------------------------------------------------------------------------------------- หน้าที่ ๕๘๗.

เอเต องฺเค อธิฏฺฐาย วสฺสานิ โสฬสํ วสึ อธิฏฺฐาเนน ^[๑]- สโม นตฺถิ เอสา เม อธิฏฺฐานปารมีติ มูคผกฺขจริยํ ฉฏฺฐํ ฯ สตฺตมํ กปิลราชจริยํ [๒๗] |๒๗.๖๗| ยทา อหํ กปิ อาสึ นทีกูเล ทรีสเย ปีฬิโต สุํสุมาเรน ^๒- คมนํ น ลภามหํ ฯ |๒๗.๖๘| ยโมฺหกาเส อหํ ฐตฺวา โอรา ปรํ ปตามหํ ตตฺถจฺฉิ สตฺตุวธโก กุมฺภิโล ลุทฺธทสฺสโน ฯ |๒๗.๖๙| โส มํ อสํสิ เอหีติ อหมฺเปมีติ ตํ วทึ ^๓- ตสฺส มตฺถกมกฺกมฺม ปรกูเล ปติฏฺฐหึ ฯ |๒๗.๗๐| น ตสฺสาลิกํ ภณิตํ ยถา วาจํ อกาสหํ สจฺเจน เม สโม นตฺถิ เอสา เม สจฺจปารมีติ ฯ กปิลราชจริยํ สตฺตมํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๘๕-๕๘๗. http://84000.org/tipitaka/pali/pali_item_s.php?book=33&item=234&items=2&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=33&item=234&items=2&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=234&items=2&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=234&items=2&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=234 The Pali Atthakatha in Thai :- http://84000.org/tipitaka/atthapali/read_th.php?B=52&A=5541 The Pali Atthakatha in Roman :- http://84000.org/tipitaka/atthapali/read_rm.php?B=52&A=5541 สารบัญพระไตรปิฎกเล่มที่ ๓๓ http://84000.org/tipitaka/read/?index_33