บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

หน้าที่ ๕๘๘.

นวมํ วฏฺฏกโปตกจริยํ [๒๙] |๒๙.๗๒| ปุนาปรํ ยทา โหมิ มคเธ วฏฺฏโปตโก อชาตปกฺโข ตรุโณ มํสเปสิ กุลาวเก ฯ |๒๙.๗๓| มุขตุณฺฑเกน อาหริตฺวา มาตา โปสยตี มมํ ตสฺสา ผสฺเสน ชีวามิ นตฺถิ เม กายิกํ พลํ ฯ |๒๙.๗๔| สํวจฺฉเร คิมฺหสมเย ทวทาโห ปทิปฺปติ อุปคจฺฉติ อมฺหากํ ปาวโก กณฺหวตฺตนิ ฯ |๒๙.๗๕| ธมธมํ ^๑- อิติ เอวํ สทฺทายนฺโต มหา สิขี อนุปุพฺเพน ฌาเปนฺโต อคฺคิ มมมุปาคมิ ฯ |๒๙.๗๖| อคฺคิเวคภยา ภีตา ตสิตา มาตา ปิตา มม กุลาวเก มํ ฉฑฺเฑตฺวา อตฺตานํ ปริโมจยุํ ฯ |๒๙.๗๗| ปาเท ปกฺเข ปชหามิ นตฺถิ เม กายิกํ พลํ โสหํ อคติโก ตตฺถ เอวํ จินฺเตสหํ ตทา ฯ |๒๙.๗๘| เยสาหํ อุปธาเวยฺยํ ภีโต ตสิตเวธิโต เต มํ โอหาย ปกฺกนฺตา กถํ เม อชฺช กาตเว ฯ |๒๙.๗๙| อตฺถิ โลเก สีลคุโณ สจฺจํ โสเจยฺยนุทฺทยา เตน สจฺเจน กาหามิ สจฺจกิริยมุตฺตมํ ^๒- ฯ |๒๙.๘๐| อาวชฺชิตฺวา ธมฺมพลํ สริตฺวา ปุพฺพเก ชิเน สจฺจพลมวสฺสาย สจฺจกิริยมกาสหํ ฯ @เชิงอรรถ: ^๑ ม. ธมธมา ฯ ยุ. ธูมธูมญฺชนีเตฺววํ ฯ ^๒ สจฺจกิริยมนุตฺตรํ อิติปิ ปาโฐ ฯ

--------------------------------------------------------------------------------------------- หน้าที่ ๕๘๙.

|๒๙.๘๑| สนฺติ ปกฺขา อปตนา สนฺติ ปาทา อวญฺจนา มาตา ปิตา จ นิกฺขนฺตา ชาตเวท ปฏิกฺกม ฯ |๒๙.๘๒| สห สจฺเจ กเต มยฺหํ มหาปชฺชลิโต สิขี วชฺเชสิ โสฬส กรีสานิ อุทกํ ปตฺวา ยถา สิขี สจฺเจน เม สโม นตฺถิ เอสา เม สจฺจปารมีติ ฯ วฏฺฏกโปตกจริยํ นวมํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๘๘-๕๘๙. http://84000.org/tipitaka/pali/pali_item_s.php?book=33&item=237&items=1&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=33&item=237&items=1&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=237&items=1&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=237&items=1&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=237 The Pali Atthakatha in Thai :- http://84000.org/tipitaka/atthapali/read_th.php?B=52&A=5991 The Pali Atthakatha in Roman :- http://84000.org/tipitaka/atthapali/read_rm.php?B=52&A=5991 สารบัญพระไตรปิฎกเล่มที่ ๓๓ http://84000.org/tipitaka/read/?index_33