พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                      สตฺตจตฺตาฬีโส สาลปุปฺผิวคฺโค
                                   ปฐมํ สาลกุสุมิยตฺเถราปทานํ (๔๖๑)
     [๕๑]   |๕๑.๑| ปรินิพฺพุเต ภควติ           ชลชุตฺตมนามเก
                    อาโรปิตมฺหิ จิตเก              สาลปุปฺผํ อปูชยึ ฯ
         |๕๑.๒| สตสหสฺเส อิโต กปฺเป         ยํ ปุปฺผมภิปูชยึ
                    ทุคฺคตึ นาภิชานามิ            จิตปูชายิทํ ผลํ ฯ
         |๕๑.๓| กิเลสา ฌาปิตา มยฺหํ         ภวา สพฺเพ สมูหตา
                    นาโคว พนฺธนํ เฉตฺวา          วิหรามิ อนาสโว ฯ
         |๕๑.๔| สฺวาคตํ วต เม อาสิ            มม พุทฺธสฺส สนฺติเก
                    ติสฺโส วิชฺชา อนุปฺปตฺตา      กตํ พุทฺธสฺส สาสนํ ฯ
         |๕๑.๕| ปฏิสมฺภิทา จตสฺโส            วิโมกฺขาปิจ อฏฺฐิเม
                    ฉฬภิญฺญา สจฺฉิกตา          กตํ พุทฺธสฺส สาสนนฺติ ฯ
            อิตฺถํ สุทํ อายสฺมา สาลกุสุมิโย เถโร อิมา คาถาโย อภาสิตฺถาติ ฯ
                                 สาลกุสุมิยตฺเถรสฺส อปทานํ สมตฺตํ ฯ
                                    ทุติยํ จิตกปูชกตฺเถราปทานํ (๔๖๒)
     [๕๒]   |๕๒.๖| ฌายมานสฺส ภควโต      สิขิโน โลกพนฺธุโน
                     อฏฺฐ จมฺปกปุปฺผานิ          จิตกํ อภิโรปยึ ฯ
         |๕๒.๗| เอกตึเส อิโต กปฺเป            ยํ ปุปฺผํ อภิโรปยึ
                    ทุคฺคตึ นาภิชานามิ            พุทฺธปูชายิทํ ๑- ผลํ ฯ
         |๕๒.๘| กิเลสา ฌาปิตา มยฺหํ         ภวา สพฺเพ สมูหตา
                    นาโคว พนฺธนํ เฉตฺวา          วิหรามิ อนาสโว ฯ
         |๕๒.๙| สฺวาคตํ วต เม อาสิ            มม พุทฺธสฺส สนฺติเก
                     ติสฺโส วิชฺชา อนุปฺปตฺตา     กตํ พุทฺธสฺส สาสนํ ฯ
         |๕๒.๑๐| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
           อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติ ฯ
                                  จิตกปูชกตฺเถรสฺส อปทานํ สมตฺตํ ฯ
                               ตติยํ จิตกนิพฺพาปกตฺเถราปทานํ (๔๖๓)
     [๕๓]   |๕๓.๑๑| ฑยฺหมาเน สรีรมฺหิ      เวสฺสภุสฺส มเหสิโน
                       คนฺโธทกํ คเหตฺวาน         จิตํ นิพฺพาปยึ อหํ ฯ
         |๕๓.๑๒| เอกตฺตึเส อิโต กปฺเป       จิตํ นิพฺพาปยึ อหํ
                       ทุคฺคตึ นาภิชานามิ         คนฺโธทกสฺสิทํ ผลํ ฯ
         |๕๓.๑๓| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๓.๑๔| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา    กตํ พุทฺธสฺส สาสนํ ฯ
@เชิงอรรถ: ๑ ม. ยุ. จิตปูชายิทํ ผลํ ฯ
         |๕๓.๑๕| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา จิตกนิพฺพาปโก เถโร อิมา คาถาโย อภาสิตฺถาติ ฯ
                            จิตกนิพฺพาปกตฺเถรสฺส อปทานํ สมตฺตํ ฯ
                               จตุตฺถํ เสตุทายกตฺเถราปทานํ (๔๖๔)
     [๕๔]   |๕๔.๑๖| วิปสฺสิโน ภควโต         จงฺกมนฺตสฺส สมฺมุขา
                       ปสนฺนจิตฺโต สุมโน          เสตุํ การาปยึ อหํ ฯ
         |๕๔.๑๗| เอกนวุเต อิโต กปฺเป        ยํ เสตุํ การยึ อหํ
                       ทุคฺคตึ นาภิชานามิ         เสตุทานสฺสิทํ ผลํ ฯ
         |๕๔.๑๘| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๔.๑๙| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๕๔.๒๐| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา เสตุทายโก เถโร อิมา คาถาโย อภาสิตฺถาติ ฯ
                                เสตุทายกตฺเถรสฺส อปทานํ สมตฺตํ ฯ
                           ปญฺจมํ สุมนตาลวณฺฏิยตฺเถราปทานํ (๔๖๕)
     [๕๕]   |๕๕.๒๑| สิทฺธตฺถสฺส ภควโต      ตาลวณฺฏํ อทาสหํ
                        สุมเนหิ ปฏิจฺฉนฺนํ          ธารยามิ มหายสํ ฯ
         |๕๕.๒๒| จตุนวุเต อิโต กปฺเป         ตาลวณฺฏํ อทาสหํ
                       ทุคฺคตึ นาภิชานามิ         ตาลวณฺฏสฺสิทํ ผลํ ฯ
         |๕๕.๒๓| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๕.๒๔| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๕๕.๒๕| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา สุมนตาลวณฺฏิโย เถโร อิมา คาถาโย อภาสิตฺถาติ ฯ
                              สุมนตาลวณฺฏิยตฺเถรสฺส อปทานํ สมตฺตํ ฯ
                                  ฉฏฺฐํ อวฏผลิยตฺเถราปทานํ (๔๖๖)
     [๕๖]   |๕๖.๒๖| สตรํสี นาม ภควา        สยมฺภู อปราชิโต
                        วิเวกกาโม สมฺพุทฺโธ       โคจรายาภินิกฺขมิ ฯ
          |๕๖.๒๗| ผลหตฺโถ อหํ ทิสฺวา        อุปคญฺฉึ นราสภํ
                        ปสนฺนจิตฺโต สุมโน         อทาสึ อวฏํ ผลํ ฯ
         |๕๖.๒๘| จตุนวุเต อิโต กปฺเป        ยํ ผลํ อททึ ตทา
                        ทุคฺคตึ นาภิชานามิ        ผลทานสฺสิทํ ผลํ ฯ
         |๕๖.๒๙| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๖.๓๐| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
         |๕๖.๓๑| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา อวฏผลิโย เถโร อิมา คาถาโย อภาสิตฺถาติ ฯ
                                  อวฏผลิยตฺเถรสฺส อปทานํ สมตฺตํ ฯ
                               สตฺตมํ ลพุชผลทายกตฺเถราปทานํ (๔๖๗)
     [๕๗]   |๕๗.๓๒| นคเร พนฺธุมติยา        อารามิโก อหํ ตทา
                        อทฺทสํ วิรชํ พุทฺธํ           คจฺฉนฺตํ อนิลญฺชเส ฯ
         |๕๗.๓๓| ลพุชผลมาทาย              พุทฺธเสฏฺฐสฺสทาสหํ
                        อากาเสว ฐิโต สนฺโต      ปฏิคฺคณฺหิ มหายโส ฯ
         |๕๗.๓๔| วิตฺติสญฺชนโน ๑- มยฺหํ   ทิฏฺฐธมฺเม สุขาวโห
                        ผลํ พุทฺธสฺส ทตฺวาน      วิปฺปสนฺเนน เจตสา ฯ
         |๕๗.๓๕| อธิคฺคญฺฉึ ตทา ปีตึ         วิปุลํ สุขมุตฺตมํ
                        อุปฺปชฺชเต เม รตนํ         นิพฺพตฺตสฺส ตหึ ตหึ ฯ
@เชิงอรรถ: ๑ ยุ. วิตฺตํ สญฺชนโน ฯ
         |๕๗.๓๖| เอกนวุเต อิโต กปฺเป       ยํ ผลํ อททึ ตทา
                       ทุคฺคตึ นาภิชานามิ         ผลทานสฺสิทํ ผลํ ฯ
         |๕๗.๓๗| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๗.๓๘| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๕๗.๓๙| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา ลพุชผลทายโก เถโร อิมา คาถาโย อภาสิตฺถาติ ฯ
                           ลพุชผลทายกตฺเถรสฺส อปทานํ สมตฺตํ ฯ
                        อฏฺฐมํ มิลกฺขุผลทายกตฺเถราปทาน ๑- (๔๖๘)
     [๕๘]   |๕๘.๔๐| วนนฺตเร ๒- พุทฺธํ ทิสฺวา   อตฺถทสฺสึ มหายสํ
                       ปสนฺนจิตฺโต สุมโน         มิลกฺขุสฺส ผลํ อทํ ฯ
         |๕๘.๔๑| อฏฺฐารเส กปฺปสเต         ยํ ผลํ อททึ ตทา
                       ทุคฺคตึ นาภิชานามิ         ผลทานสฺสิทํ ผลํ ฯ
         |๕๘.๔๒| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๘.๔๓| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
@เชิงอรรถ: ๑ ม. ปิลกฺขผล... ฯ ยุ. ปิลกฺขุผล... ฯ ๒ ยุ. วนนฺเต ฯ
         |๕๘.๔๔| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา มิลกฺขุผลทายโก เถโร อิมา คาถาโย อภาสิตฺถาติ ฯ
                              มิลกฺขุผลทายกตฺเถรสฺส อปทานํ สมตฺตํ ฯ
                               นวมํ สยมฺปฏิภาณิยตฺเถราปทานํ (๔๖๙)
     [๕๙]   |๕๙.๔๕| กกุธํ วิลสนฺตํว            เทวเทวํ นราสภํ
                       รถิยํ ปฏิปชฺชนฺตํ             โก ทิสฺวา นปฺปสีทติ ฯ
         |๕๙.๔๖| ตมนฺธการํ นาเสตฺวา       สนฺตาเรตฺวา พหุํ ชนํ
                       ญาณาโลเกน โชตนฺตํ      โก ทิสฺวา นปฺปสีทติ ฯ
         |๕๙.๔๗| วสีสตสหสฺเสหิ                นิยฺยนฺตํ โลกนายกํ
                       อุทฺธรนฺตํ ฬหู สตฺเต         โก ทิสฺวา นปฺปสีทติ ฯ
         |๕๙.๔๘| อาหนิตฺวา ธมฺมเภรึ         มทฺทนฺตํ ติตฺถิเย คเณ
                        สีหนาทํ ว นทนฺตํ           โก ทิสฺวา นปฺปสีทติ ฯ
         |๕๙.๔๙| ยาวตา พฺรหฺมโลกมฺหา    อาคนฺตฺวาน สพฺรหฺมกา
                       ปุจฺฉนฺติ นิปุเณ ปเญฺห     โก ทิสฺวา นปฺปสีทติ ฯ
         |๕๙.๕๐| ยสฺสญฺชลึ กริตฺวาน         อาธาวนฺติ ๑- สเทวกา
                       เตน ปุญฺญํ อนุโภนฺติ       โก ทิสฺวา นปฺปสีทติ ฯ
         |๕๙.๕๑| สพฺเพ ชนา สมาคนฺตฺวา   สมฺปวาเรนฺติ จกฺขุมํ
                       น วิกมฺปติ อชฺฌิฏฺโฐ        โก ทิสฺวา นปฺปสีทติ ฯ
@เชิงอรรถ: ๑ ม. ยุ. อายาจนฺติ ฯ
         |๕๙.๕๒| นครํ ปวีสโต ยสฺส           นทนฺติ ๑- เภริโย พหู
                       วินทนฺติ คชา ๒- มตฺตา   โก ทิสฺวา นปฺปสีทติ ฯ
         |๕๙.๕๓| วีถิยา คจฺฉโต ยสฺส         ปภา ๓- วา โชตเต สทา
                       อพฺภุนฺนตา สมา โหนฺติ   โก ทิสฺวา นปฺปสีทติ ฯ
         |๕๙.๕๔| พฺยาหรนฺตสฺส พุทฺธสฺส    จกฺกวาฬมฺหิ *- สุยฺยติ
                       สพฺเพ สตฺเต วิญฺญาเปติ   โก ทิสฺวา นปฺปสีทติ ฯ
         |๕๙.๕๕| สตสหสฺเส อิโต กปฺเป      ยํ พุทฺธมภิกิตฺตยึ
                       ทุคฺคตึ นาภิชานามิ         กิตฺตนาย อิทํ ผลํ ฯ
         |๕๙.๕๖| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๕๙.๕๗| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๕๙.๕๘| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
             อิตฺถํ สุทํ อายสฺมา สยมฺปฏิภาณิโย เถโร อิมา คาถาโย อภาสิตฺถาติ ฯ
                              สยมฺปฏิภาณิยตฺเถรสฺส อปทานํ สมตฺตํ ฯ
                             ทสมํ นิมิตฺตพฺยากรณิยตฺเถราปทานํ (๔๗๐)
     [๖๐]   |๖๐.๕๙| อชฺโฌคเหตฺวา หิมวนฺตํ   มนฺเต วาเจมหนฺตทา
                          จตุปญฺญาสสหสฺสานิ      สิสฺสา มยฺหํ อุปฏฺฐหุํ ฯ
@เชิงอรรถ: ๑ ม. รวนฺติ ฯ ยุ. รวนฺเต ฯ ๒ ยุ. อนุคชฺชา ฯ ๓ ม. ยุ. สพฺพาภา ฯ
@* มีการแก้ไขคำ จกฺวาฬมฺหิ เป็น จกฺกวาฬมฺหิ
         |๖๐.๖๐| อธิตา เวทคู สพฺเพ          ฉฬงฺเค ปารมึ คตา
                       สกวิชฺชาหุปตฺถทฺธา        หิมวนฺเต วสนฺติ เต ฯ
         |๖๐.๖๑| จวิตฺวา ตุสิตา กายา        เทวปุตฺโต มหายโส
                       อุปฺปชฺชิ มาตุกุจฺฉิสฺมึ       สมฺปชาโน ปฏิสฺสโต ฯ
         |๖๐.๖๒| สมฺพุทฺเธ อุปปชฺชนฺเต      ทสสหสฺสิ กมฺปถ
                       อนฺธา จกฺขุํ อลภึสุ          อุปฺปชฺชนฺตมฺหิ นายเก ฯ
         |๖๐.๖๓| ฉปฺปการมกมฺปิตฺถ ๑-     เกวลา วสุธา อยํ
                       นิคฺโฆสสทฺทํ สุตฺวาน       วิมฺหยึสุ ๒- มหาชนา ฯ
         |๖๐.๖๔| สพฺเพ ชนา สมาคมฺม      อคญฺฉุํ มม สนฺติเก
                       วสุธายํ ปกมฺปิตฺถ           กึวิปาโก ภวิสฺสติ ฯ
         |๖๐.๖๕| วิทสฺสามิ ๓- ตทา เตสํ    มา ภายิตฺถ นตฺถิ โว ภยํ
                       วิสฺสฏฺฐา โหถ สพฺเพปิ      อุปฺปาโทยํ สุขตฺถิโก ๔- ฯ
         |๖๐.๖๖| อฏฺฐเหตูหิ สมฺผสฺสา         วสุธายํ ปกมฺปติ
                       ตถา นิมิตฺตา ทิสฺสนฺติ      โอภาโส วิปุโล มหา ฯ
         |๖๐.๖๗| อสํสยํ พุทฺธเสฏฺโฐ           อุปฺปชฺชิสฺสติ จกฺขุมา
                       สญฺญาเปตฺวาน ชนตํ       ปญฺจ สีเล กเถสหํ ฯ
         |๖๐.๖๘| สุตฺวาน ปญฺจ สีลานิ        พุทฺธุปฺปาทญฺจ ทุลฺลภํ
                       อุพฺเพงฺคชาตา สุมนา      ตุฏฺฐหฏฺฐา อเหสุ เต ฯ
         |๖๐.๖๙| เทฺวนวุเต อิโต กปฺเป       ยํ นิมิตฺตํ วิยากรึ
                       ทุคฺคตึ นาภิชานามิ        พฺยากรณสฺสิทํ ผลํ ฯ
@เชิงอรรถ: ๑ ม. สพฺพาการํ ปกมฺปิตฺถ ฯ ยุ. ฉพฺพิการํ ... ฯ ๒ ม. ยุ. อุพฺพิชฺชึสุ ฯ
@๓ ม. อวจาสึ ตทา เตสํ ฯ ยุ. อวจาสิ ... ฯ ๔ ม. สุวตฺถิโก ฯ
         |๖๐.๗๐| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๖๐.๗๑| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๖๐.๗๒| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
            อิตฺถํ สุทํ อายสฺมา นิมิตฺตพฺยากรณิโย เถโร อิมา คาถาโย อภาสิตฺถาติ ฯ
                              นิมิตฺตพฺยากรณิยตฺเถรสฺส อปทานํ สมตฺตํ ฯ
                                                   อุทฺทานํ
                             สาลกุสุมิโย เถโร             ปูชา นิพฺพาปโกปิจ
                             เสตุโท ตาลวณฺฏิ จ          อวฏํ ลพุชมฺปโท
                             มิลกฺขุ ปฏิภาณี จ            เวยฺยากรณิโย ทิชา
                             เทฺวสตฺตติ จ คาถาโย       คณิตาโย วิภาวิภิ ฯ
                                      สาลปุปฺผิวคฺโค สตฺตจตฺตาฬีโส ฯ
                                         -----------------------
                                     อฏฺฐจตฺตาฬีโส นฬมาลิวคฺโค


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๗๗-๘๗.
http://84000.org/tipitaka/pali/pali_item_s.php?book=33&item=51&items=10&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=51&items=10&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=51&items=10&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=51&items=10&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=51
             The Pali Atthakatha in Thai :-
http://84000.org/tipitaka/atthapali/read_th.php?B=50&A=5513
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=5513
             สารบัญพระไตรปิฎกเล่มที่ ๓๓
http://84000.org/tipitaka/read/?index_33