พระไตรปิฎกเล่มที่ ๓๔ ภาษาบาลี อักษรไทย
พระอภิธรรมปิฎกเล่มที่ ๑ อภิ. ธมฺมสงฺคณิ

     [๖๗๐]   กตเม   ธมฺมา   ทสฺสเนนปหาตพฺพา   ตีณิ  สญฺโญชนานิ
สกฺกายทิฏฺฐิ วิจิกิจฺฉา สีลพฺพตปรามาโส ฯ
     [๖๗๑]   ตตฺถ   กตมา   สกฺกายทิฏฺฐิ   อิธ  อสฺสุตวา  ปุถุชฺชโน
อริยานํ    อทสฺสาวี    อริยธมฺมสฺส    อโกวิโท   อริยธมฺเม   อวินีโต
สปฺปุริสานํ   อทสฺสาวี   สปฺปุริสธมฺมสฺส  อโกวิโท  สปฺปุริสธมฺเม  อวินีโต
รูปํ    อตฺตโต    สมนุปสฺสติ   รูปวนฺตํ   วา   อตฺตานํ   อตฺตนิ   วา
รูปํ   รูปสฺมึ   วา   อตฺตานํ   เวทนํ  อตฺตโต  สมนุปสฺสติ  เวทนาวนฺตํ
วา   อตฺตานํ   อตฺตนิ   วา   เวทนํ   เวทนาย   วา  อตฺตานํ  สญฺญํ
อตฺตโต   สมนุปสฺสติ   สญฺญาวนฺตํ   วา   อตฺตานํ   อตฺตนิ   วา  สญฺญํ
สญฺญาย   วา   อตฺตานํ   สงฺขาเร   อตฺตโต   สมนุปสฺสติ  สงฺขารวนฺตํ
วา   อตฺตานํ  อตฺตนิ  วา  สงฺขาเร  สงฺขาเรสุ  วา  อตฺตานํ  วิญฺญาณํ
อตฺตโต   สมนุปสฺสติ   วิญฺญาณวนฺตํ   วา  อตฺตานํ  อตฺตนิ  วา  วิญฺญาณํ
วิญฺญาณสฺมึ   วา   อตฺตานํ   ยา   เอวรูปา   ทิฏฺฐิ  ทิฏฺฐิคตํ  ทิฏฺฐิคหนํ
ทิฏฺฐิกนฺตาโร    ทิฏฺฐิวิสูกายิกํ    ทิฏฺฐิวิปฺผนฺทิตํ    ทิฏฺฐิสญฺโญชนํ   คาโห
ปฏิคฺคาโห    อภินิเวโส   ปรามาโส   กุมฺมคฺโค   มิจฺฉาปโถ   มิจฺฉตฺตํ
ติตฺถายตนํ วิปริเยสคฺคาโห อยํ วุจฺจติ สกฺกายทิฏฺฐิ ฯ
     [๖๗๒]   ตตฺถ  กตมา  วิจิกิจฺฉา  สตฺถริ  กงฺขติ  วิจิกิจฺฉติ  ธมฺเม
กงฺขติ   วิจิกิจฺฉติ   สงฺเฆ  กงฺขติ  วิจิกิจฺฉติ  สิกฺขาย  กงฺขติ  วิจิกิจฺฉติ
ปุพฺพนฺเต  กงฺขติ  วิจิกิจฺฉติ  อปรนฺเต  กงฺขติ  วิจิกิจฺฉติ  ปุพฺพนฺตาปรนฺเต
กงฺขติ       วิจิกิจฺฉติ      อิทปฺปจฺจยตาปฏิจฺจสมุปฺปนฺเนสุ      ธมฺเมสุ
กงฺขติ   วิจิกิจฺฉติ  ยา  เอวรูปา  กงฺขา  กงฺขายนา  กงฺขายิตตฺตํ  วิมติ
วิจิกิจฺฉา   เทฺวฬฺหกํ   เทฺวธาปโถ   สํสโย   อเนกํสคาโห   อาสปฺปนา
ปริสปฺปนา    อปริโยคาหนา    ถมฺภิตตฺตํ   จิตฺตสฺส   มโนวิเลโข   อยํ
วุจฺจติ วิจิกิจฺฉา ฯ
     [๖๗๓]   ตตฺถ    กตโม    สีลพฺพตปรามาโส   อิโต   พหิทฺธา
สมณพฺราหฺมณานํ   สีเลน   สุทฺธิ   วเตน  สุทฺธิ  สีลพฺพเตน  สุทฺธีติ  ยา
เอวรูปา    ทิฏฺฐิ    ทิฏฺฐิคตํ   ทิฏฺฐิคหนํ   ทิฏฺฐิกนฺตาโร   ทิฏฺฐิวิสูกายิกํ
ทิฏฺฐิวิปฺผนฺทิตํ   ทิฏฺฐิสญฺโญชนํ   คาโห  ปฏิคฺคาโห  อภินิเวโส  ปรามาโส
กุมฺมคฺโค     มิจฺฉาปโถ     มิจฺฉตฺตํ     ติตฺถายตนํ    วิปริเยสคฺคาโห
อยํ วุจฺจติ สีลพฺพตปรามาโส ฯ
     [๖๗๔]   อิมานิ  ตีณิ  สญฺโญชนานิ ตเทกฏฺฐา จ กิเลสา ตํสมฺปยุตฺโต
เวทนากฺขนฺโธ        ฯเปฯ        วิญฺญาณกฺขนฺโธ        ตํสมุฏฺฐานํ
กายกมฺมํ   วจีกมฺมํ   มโนกมฺมํ   อิเม   ธมฺมา   ทสฺสเนนปหาตพฺพา  ฯ
กตเม   ธมฺมา   ภาวนายปหาตพฺพา   อวเสโส   โลโภ  โทโส  โมโห
ตเทกฏฺฐา  จ  กิเลสา  ตํสมฺปยุตฺโต  เวทนากฺขนฺโธ ฯเปฯ วิญฺญาณกฺขนฺโธ
ตํสมุฏฺฐานํ     กายกมฺมํ     วจีกมฺมํ     มโนกมฺมํ     อิเม    ธมฺมา
ภาวนายปหาตพฺพา   ฯ   กตเม  ธมฺมา  เนวทสฺสเนนนภาวนายปหาตพฺพา
กุสลาพฺยากตา     ธมฺมา     กามาวจรา    รูปาวจรา    อรูปาวจรา
อปริยาปนฺนา     เวทนากฺขนฺโธ    ฯเปฯ    วิญฺญาณกฺขนฺโธ    สพฺพญฺจ
รูปํ อสงฺขตา จ ธาตุ อิเม ธมฺมา เนวทสฺสเนนนภาวนายปหาตพฺพา ฯ
     [๖๗๕]   กตเม  ธมฺมา  ทสฺสเนนปหาตพฺพเหตุกา  ตีณิ  สญฺโญชนานิ
สกฺกายทิฏฺฐิ     วิจิกิจฺฉา    สีลพฺพตปรามาโส    ฯ    ตตฺถ    กตมา
สกฺกายทิฏฺฐิ  ฯเปฯ  อยํ  วุจฺจติ  สกฺกายทิฏฺฐิ  ฯ  ตตฺถ  กตมา วิจิกิจฺฉา
ฯเปฯ อยํ วุจฺจติ วิจิกิจฺฉา ฯ
     {๖๗๕.๑}   ตตฺถ   กตโม  สีลพฺพตปรามาโส  ฯเปฯ  อยํ  วุจฺจติ
สีลพฺพตปรามาโส   ฯ  อิมานิ  ตีณิ  สญฺโญชนานิ  ตเทกฏฺฐา  จ  กิเลสา
ตํสมฺปยุตฺโต    เวทนากฺขนฺโธ    ฯเปฯ    วิญฺญาณกฺขนฺโธ    ตํสมุฏฺฐานํ
กายกมฺมํ วจีกมฺมํ มโนกมฺมํ อิเม ธมฺมา ทสฺสเนนปหาตพฺพเหตุกา ฯ
     {๖๗๕.๒}   ตีณิ     สญฺโญชนานิ     สกฺกายทิฏฺฐิ    วิจิกิจฺฉา
สีลพฺพตปรามาโส    อิเม    ธมฺมา    ทสฺสเนนปหาตพฺพา    ตเทกฏฺโฐ
โลโภ   โทโส   โมโห  อิเม  ธมฺมา  ทสฺสเนนปหาตพฺพเหตู  ตเทกฏฺฐา
จ    กิเลสา    ตํสมฺปยุตฺโต   เวทนากฺขนฺโธ   ฯเปฯ   วิญฺญาณกฺขนฺโธ
ตํสมุฏฺฐานํ     กายกมฺมํ     วจีกมฺมํ     มโนกมฺมํ     อิเม    ธมฺมา
ทสฺสเนนปหาตพฺพเหตุกา ฯ
     {๖๗๕.๓}   กตเม   ธมฺมา   ภาวนายปหาตพฺพเหตุกา   อวเสโส
โลโภ   โทโส   โมโห  อิเม  ธมฺมา  ภาวนายปหาตพฺพเหตู  ตเทกฏฺฐา
จ    กิเลสา    ตํสมฺปยุตฺโต   เวทนากฺขนฺโธ   ฯเปฯ   วิญฺญาณกฺขนฺโธ
ตํสมุฏฺฐานํ     กายกมฺมํ     วจีกมฺมํ     มโนกมฺมํ     อิเม    ธมฺมา
ภาวนายปหาตพฺพเหตุกา ฯ
     {๖๗๕.๔}   กตเม   ธมฺมา  เนวทสฺสเนนนภาวนายปหาตพฺพเหตุกา
เต  ธมฺเม  ฐเปตฺวา  อวเสสา  กุสลากุสลาพฺยากตา  ธมฺมา กามาวจรา
รูปาวจรา   อรูปาวจรา   อปริยาปนฺนา   เวทนากฺขนฺโธ   สญฺญากฺขนฺโธ
สงฺขารกฺขนฺโธ   วิญฺญาณกฺขนฺโธ  สพฺพญฺจ  รูปํ  อสงฺขตา  จ  ธาตุ  อิเม
ธมฺมา เนวทสฺสเนนนภาวนายปหาตพฺพเหตุกา ฯ
     [๖๗๖]   กตเม   ธมฺมา   อาจยคามิโน   สาสวา   กุสลากุสลา
ธมฺมา   กามาวจรา   รูปาวจรา   อรูปาวจรา   เวทนากฺขนฺโธ  ฯเปฯ
วิญฺญาณกฺขนฺโธ    อิเม    ธมฺมา   อาจยคามิโน   ฯ   กตเม   ธมฺมา
อปจยคามิโน    จตฺตาโร    มคฺคา    อปริยาปนฺนา    อิเม    ธมฺมา
อปจยคามิโน    ฯ    กตเม    ธมฺมา    เนวาจยคามิโนนาปจยคามิโน
กุสลากุสลานํ   ธมฺมานํ   วิปากา   กามาวจรา  รูปาวจรา  อรูปาวจรา
อปริยาปนฺนา    เวทนากฺขนฺโธ    ฯเปฯ    วิญฺญาณกฺขนฺโธ    เย   จ
ธมฺมา   กิริยา   เนว   กุสลา  นากุสลา  น  จ  กมฺมวิปากา  สพฺพญฺจ
รูปํ อสงฺขตา จ ธาตุ อิเม ธมฺมา เนวาจยคามิโนนาปจยคามิโน ฯ
     [๖๗๗]   กตเม  ธมฺมา  เสกฺขา  จตฺตาโร  มคฺคา  อปริยาปนฺนา
เหฏฺฐิมานิ    จ    ตีณิ   สามญฺญผลานิ   อิเม   ธมฺมา   เสกฺขา   ฯ
กตเม    ธมฺมา    อเสกฺขา    อุปริฏฺฐิมํ   อรหตฺตผลํ   อิเม   ธมฺมา
อเสกฺขา    ฯ   กตเม   ธมฺมา   เนวเสกฺขานาเสกฺขา   เต   ธมฺเม
ฐเปตฺวา  อวเสสา  กุสลากุสลาพฺยากตา  ธมฺมา  กามาวจรา  รูปาวจรา
อรูปาวจรา    เวทนากฺขนฺโธ   ฯเปฯ   วิญฺญาณกฺขนฺโธ   สพฺพญฺจ   รูปํ
อสงฺขตา จ ธาตุ อิเม ธมฺมา เนวเสกฺขานาเสกฺขา ฯ
     [๖๗๘]   กตเม   ธมฺมา  ปริตฺตา  สพฺเพว  กามาวจรา  กุสลา-
กุสลาพฺยากตา    ธมฺมา   รูปกฺขนฺโธ   ฯเปฯ   วิญฺญาณกฺขนฺโธ   อิเม
ธมฺมา   ปริตฺตา   ฯ  กตเม  ธมฺมา  มหคฺคตา  รูปาวจรา  อรูปาวจรา
กุสลาพฺยากตา     ธมฺมา    เวทนากฺขนฺโธ    ฯเปฯ    วิญฺญาณกฺขนฺโธ
อิเม   ธมฺมา   มหคฺคตา   ฯ  กตเม  ธมฺมา  อปฺปมาณา  อปริยาปนฺนา
มคฺคา    จ   มคฺคผลานิ   จ   อสงฺขตา   จ   ธาตุ   อิเม   ธมฺมา
อปฺปมาณา ฯ
     [๖๗๙]   กตเม  ธมฺมา  ปริตฺตารมฺมณา  ปริตฺเต  ธมฺเม  อารพฺภ
เย   อุปฺปชฺชนฺติ  จิตฺตเจตสิกา  ธมฺมา  อิเม  ธมฺมา  ปริตฺตารมฺมณา  ฯ
กตเม    ธมฺมา   มหคฺคตารมฺมณา   มหคฺคเต   ธมฺเม   อารพฺภ   เย
อุปฺปชฺชนฺติ   จิตฺตเจตสิกา   ธมฺมา   อิเม   ธมฺมา  มหคฺคตารมฺมณา  ฯ
กตเม   ธมฺมา   อปฺปมาณารมฺมณา   อปฺปมาเณ   ธมฺเม   อารพฺภ  เย
อุปฺปชฺชนฺติ จิตฺตเจตสิกา ธมฺมา อิเม ธมฺมา อปฺปมาณารมฺมณา ฯ
     [๖๘๐]   กตเม   ธมฺมา  หีนา  ตีณิ  อกุสลมูลานิ  โลโภ  โทโส
โมโห   ตเทกฏฺฐา   จ   กิเลสา   ตํสมฺปยุตฺโต  เวทนากฺขนฺโธ  ฯเปฯ
วิญฺญาณกฺขนฺโธ    ตํสมุฏฺฐานํ    กายกมฺมํ    วจีกมฺมํ   มโนกมฺมํ   อิเม
ธมฺมา   หีนา   ฯ   กตเม   ธมฺมา   มชฺฌิมา  สาสวา  กุสลาพฺยากตา
ธมฺมา    กามาวจรา    รูปาวจรา   อรูปาวจรา   รูปกฺขนฺโธ   ฯเปฯ
วิญฺญาณกฺขนฺโธ   อิเม   ธมฺมา   มชฺฌิมา   ฯ   กตเม   ธมฺมา  ปณีตา
อปริยาปนฺนา   มคฺคา   จ   มคฺคผลานิ   จ  อสงฺขตา  จ  ธาตุ  อิเม
ธมฺมา ปณีตา ฯ
     [๖๘๑]   กตเม  ธมฺมา  มิจฺฉตฺตนิยตา  ปญฺจ  กมฺมานิ อานนฺตริกานิ
ยา   จ   มิจฺฉาทิฏฺฐิ   นิยตา   อิเม  ธมฺมา  มิจฺฉตฺตนิยตา  ฯ  กตเม
ธมฺมา   สมฺมตฺตนิยตา   จตฺตาโร   มคฺคา   อปริยาปนฺนา  อิเม  ธมฺมา
สมฺมตฺตนิยตา  ฯ  กตเม  ธมฺมา  อนิยตา  เต  ธมฺเม ฐเปตฺวา อวเสสา
กุสลากุสลาพฺยากตา    ธมฺมา    กามาวจรา   รูปาวจรา   อรูปาวจรา
อปริยาปนฺนา     เวทนากฺขนฺโธ    ฯเปฯ    วิญฺญาณกฺขนฺโธ    สพฺพญฺจ
รูปํ อสงฺขตา จ ธาตุ อิเม ธมฺมา อนิยตา ฯ
     [๖๘๒]   กตเม   ธมฺมา   มคฺคารมฺมณา  อริยมคฺคํ  อารพฺภ  เย
อุปฺปชฺชนฺติ   จิตฺตเจตสิกา   ธมฺมา   อิเม   ธมฺมา   มคฺคารมฺมณา   ฯ
กตเม   ธมฺมา   มคฺคเหตุกา   อริยมคฺคสมงฺคิสฺส   มคฺคงฺคานิ  ฐเปตฺวา
ตํสมฺปยุตฺโต    เวทนากฺขนฺโธ   ฯเปฯ   วิญฺญาณกฺขนฺโธ   อิเม   ธมฺมา
มคฺคเหตุกา   ฯ   อริยมคฺคสมงฺคิสฺส   สมฺมาทิฏฺฐิ   มคฺโค   เจว  เหตุ
จ    สมฺมาทิฏฺฐึ    ฐเปตฺวา    ตํสมฺปยุตฺโต    เวทนากฺขนฺโธ   ฯเปฯ
วิญฺญาณกฺขนฺโธ    อิเม    ธมฺมา   มคฺคเหตุกา   ฯ   อริยมคฺคสมงฺคิสฺส
อโลโภ    อโทโส   อโมโห   อิเม   ธมฺมา   มคฺคเหตู   ตํสมฺปยุตฺโต
เวทนากฺขนฺโธ   ฯเปฯ   วิญฺญาณกฺขนฺโธ   อิเม  ธมฺมา  มคฺคเหตุกา  ฯ
กตเม    ธมฺมา    มคฺคาธิปติโน    อริยมคฺคํ   อธิปตึ   กริตฺวา   เย
อุปฺปชฺชนฺติ   จิตฺตเจตสิกา   ธมฺมา   อิเม   ธมฺมา   มคฺคาธิปติโน   ฯ
อริยมคฺคสมงฺคิสฺส   วีมํสาธิปเตยฺยํ   มคฺคํ   ภาวยนฺตสฺส  วีมํสํ  ฐเปตฺวา
ตํสมฺปยุตฺโต    เวทนากฺขนฺโธ   ฯเปฯ   วิญฺญาณกฺขนฺโธ   อิเม   ธมฺมา
มคฺคาธิปติโน ฯ
     [๖๘๓]   กตเม   ธมฺมา   อุปฺปนฺนา   เย  ธมฺมา  ชาตา  ภูตา
สญฺชาตา    นิพฺพตฺตา   อภินิพฺพตฺตา   ปาตุภูตา   อุปฺปนฺนา   สมุปฺปนฺนา
อุฏฺฐิตา     สมุฏฺฐิตา    อุปฺปนฺนา    อุปฺปนฺนํเสน    สงฺคหิตา    รูปา
เวทนา   สญฺญา   สงฺขารา   วิญฺญาณํ   อิเม   ธมฺมา   อุปฺปนฺนา   ฯ
กตเม   ธมฺมา   อนุปฺปนฺนา   เย   ธมฺมา  อชาตา  อภูตา  อสญฺชาตา
อนิพฺพตฺตา     อนภินิพฺพตฺตา    อปาตุภูตา    อนุปฺปนฺนา    อสมุปฺปนฺนา
อนุฏฺฐิตา    อสมุฏฺฐิตา    อนุปฺปนฺนา   อนุปฺปนฺนํเสน   สงฺคหิตา   รูปา
เวทนา   สญฺญา   สงฺขารา   วิญฺญาณํ   อิเม   ธมฺมา   อนุปฺปนฺนา  ฯ
กตเม   ธมฺมา  อุปฺปาทิโน  กุสลากุสลานํ  ธมฺมานํ  อวิปกฺกวิปากานํ  ๑-
วิปากา     กามาวจรา     รูปาวจรา    อรูปาวจรา    อปริยาปนฺนา
เวทนากฺขนฺโธ   ฯเปฯ   วิญฺญาณกฺขนฺโธ   ยญฺจ   รูปํ  กมฺมสฺส  กตตฺตา
อุปฺปชฺชิสฺสติ อิเม ธมฺมา อุปฺปาทิโน ฯ
     [๖๘๔]   กตเม   ธมฺมา   อตีตา   เย  ธมฺมา  อตีตา  นิรุทฺธา
วิคตา    วิปริณตา    อตฺถงฺคตา   อพฺภตฺถงฺคตา   อุปฺปชฺชิตฺวา   วิคตา
อตีตา    อตีตํเสน    สงฺคหิตา    รูปา   เวทนา   สญฺญา   สงฺขารา
วิญฺญาณํ   อิเม   ธมฺมา   อตีตา   ฯ   กตเม   ธมฺมา  อนาคตา  เย
ธมฺมา    อชาตา    อภูตา    อสญฺชาตา    อนิพฺพตฺตา   อนภินิพฺพตฺตา
อปาตุภูตา     อนุปฺปนฺนา     อสมุปฺปนฺนา     อนุฏฺฐิตา     อสมุฏฺฐิตา
อนาคตา   อนาคตํเสน   สงฺคหิตา   รูปา   เวทนา   สญฺญา  สงฺขารา
วิญฺญาณํ   อิเม   ธมฺมา   อนาคตา   ฯ   กตเม   ธมฺมา  ปจฺจุปฺปนฺนา
เย    ธมฺมา    ชาตา    ภูตา    สญฺชาตา   นิพฺพตฺตา   อภินิพฺพตฺตา
ปาตุภูตา    อุปฺปนฺนา    สมุปฺปนฺนา   อุฏฺฐิตา   สมุฏฺฐิตา   ปจฺจุปฺปนฺนา
ปจฺจุปฺปนฺนํเสน   สงฺคหิตา   รูปา   เวทนา   สญฺญา  สงฺขารา  วิญฺญาณํ
อิเม ธมฺมา ปจฺจุปฺปนฺนา ฯ
     [๖๘๕]   กตเม   ธมฺมา   อตีตารมฺมณา  อตีเต  ธมฺเม  อารพฺภ
เย   อุปฺปชฺชนฺติ   จิตฺตเจตสิกา  ธมฺมา  อิเม  ธมฺมา  อตีตารมฺมณา  ฯ
กตเม    ธมฺมา   อนาคตารมฺมณา   อนาคเต   ธมฺเม   อารพฺภ   เย
@เชิงอรรถ: ๑ ยุโรปิยมฺรมฺมโปตฺถเกสุ อยํ ปาโฐ น ทิสฺสติ ฯ
อุปฺปชฺชนฺติ   จิตฺตเจตสิกา   ธมฺมา   อิเม   ธมฺมา  อนาคตารมฺมณา  ฯ
กตเม   ธมฺมา   ปจฺจุปฺปนฺนารมฺมณา   ปจฺจุปฺปนฺเน  ธมฺเม  อารพฺภ  เย
อุปฺปชฺชนฺติ จิตฺตเจตสิกา ธมฺมา อิเม ธมฺมา ปจฺจุปฺปนฺนารมฺมณา ฯ
     [๖๘๖]   กตเม  ธมฺมา  อชฺฌตฺตา  เย  ธมฺมา  เตสํ เตสํ สตฺตานํ
อชฺฌตฺตํ   ปจฺจตฺตํ   นิยกา   ปาฏิปุคฺคลิกา   อุปาทินฺนา   รูปา  เวทนา
สญฺญา    สงฺขารา   วิญฺญาณํ   อิเม   ธมฺมา   อชฺฌตฺตา   ฯ   กตเม
ธมฺมา   พหิทฺธา   เย   ธมฺมา   เตสํ   เตสํ  ปรสตฺตานํ  ปรปุคฺคลานํ
อชฺฌตฺตํ   ปจฺจตฺตํ   นิยกา   ปาฏิปุคฺคลิกา   อุปาทินฺนา   รูปา  เวทนา
สญฺญา    สงฺขารา    วิญฺญาณํ   อิเม   ธมฺมา   พหิทฺธา   ฯ   กตเม
ธมฺมา อชฺฌตฺตพหิทฺธา ตทุภยํ อิเม ธมฺมา อชฺฌตฺตพหิทฺธา ฯ
     [๖๘๗]   กตเม   ธมฺมา   อชฺฌตฺตารมฺมณา   อชฺฌตฺเต   ธมฺเม
อารพฺภ    เย    อุปฺปชฺชนฺติ    จิตฺตเจตสิกา   ธมฺมา   อิเม   ธมฺมา
อชฺฌตฺตารมฺมณา    ฯ    กตเม    ธมฺมา    พหิทฺธารมฺมณา    พหิทฺธา
ธมฺเม    อารพฺภ    เย    อุปฺปชฺชนฺติ   จิตฺตเจตสิกา   ธมฺมา   อิเม
ธมฺมา    พหิทฺธารมฺมณา    ฯ   กตเม   ธมฺมา   อชฺฌตฺตพหิทฺธารมฺมณา
อชฺฌตฺตพหิทฺธา   ธมฺเม   อารพฺภ  เย  อุปฺปชฺชนฺติ  จิตฺตเจตสิกา  ธมฺมา
อิเม ธมฺมา อชฺฌตฺตพหิทฺธารมฺมณา ฯ
     [๖๘๘]   กตเม   ธมฺมา   สนิทสฺสนสปฺปฏิฆา   รูปายตนํ   อิเม
ธมฺมา    สนิทสฺสนสปฺปฏิฆา    ฯ    กตเม   ธมฺมา   อนิทสฺสนสปฺปฏิฆา
จกฺขายตนํ   โสตายตนํ   ฆานายตนํ   ชิวฺหายตนํ  กายายตนํ  สทฺทายตนํ
คนฺธายตนํ  รสายตนํ  โผฏฺฐพฺพายตนํ  อิเม  ธมฺมา  อนิทสฺสนสปฺปฏิฆา  ฯ
กตเม         ธมฺมา        อนิทสฺสนาปฺปฏิฆา        เวทนากฺขนฺโธ
สญฺญากฺขนฺโธ      สงฺขารกฺขนฺโธ     วิญฺญาณกฺขนฺโธ     ยญฺจ     รูปํ
อนิทสฺสนํ   อปฺปฏิฆํ   ธมฺมายตนปริยาปนฺนํ   อสงฺขตา   จ   ธาตุ  อิเม
ธมฺมา อนิทสฺสนาปฺปฏิฆา ฯ
                                              ติกํ ฯ
                                          -----------


             เนื้อความพระไตรปิฎกฉบับภาษาบาลีอักษรไทย เล่มที่ ๓๔ หน้าที่ ๒๖๒-๒๗๑.
http://84000.org/tipitaka/pali/pali_item_s.php?book=34&item=670&items=19&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=34&item=670&items=19&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=34&item=670&items=19&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=34&item=670&items=19&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=34&i=670
             The Pali Atthakatha in Thai :-
http://84000.org/tipitaka/atthapali/read_th.php?B=53&A=10016
             The Pali Atthakatha in Roman :-
http://84000.org/tipitaka/atthapali/read_rm.php?B=53&A=10016
             สารบัญพระไตรปิฎกเล่มที่ ๓๔
http://84000.org/tipitaka/read/?index_34