ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ
                                          นิยามกถา
     [๑๐๗๗]   นิยาโม   อสงฺขโตติ  ฯ  อามนฺตา  ฯ  นิพฺพานํ  ตาณํ
เลณํ สรณํ ปรายนํ อจฺจุตํ อมตนฺติ ฯ น เหวํ วตฺตพฺเพ ฯเปฯ
     [๑๐๗๘]   นิยาโม  อสงฺขโต  นิพฺพานํ  อสงฺขตนฺติ  ฯ  อามนฺตา ฯ
เทฺว  อสงฺขตานีติ  ฯ  น  เหวํ  วตฺตพฺเพ  ฯเปฯ  เทฺว  อสงฺขตานีติ ฯ
อามนฺตา   ฯ   เทฺว   ตาณานิ   เทฺว   เลณานิ  เทฺว  สรณานิ  เทฺว
ปรายนานิ   เทฺว   อจฺจุตานิ   เทฺว   อมตานิ   เทฺว  นิพฺพานานีติ  ฯ
น   เหวํ  วตฺตพฺเพ  ฯเปฯ  เทฺว  นิพฺพานานีติ  ฯ  อามนฺตา  ฯ  อตฺถิ
ทฺวินฺนํ    นิพฺพานานํ    อุจฺจนีจตา   หีนปฺปณีตตา   อุกฺกํสาวกํโส   สีมา
วา เภโท วา ราชิ วา อนฺตริกา วาติ ฯ น เหวํ วตฺตพฺเพ ฯเปฯ
     [๑๐๗๙]   นิยาโม  อสงฺขโตติ  ฯ  อามนฺตา  ฯ  อตฺถิ เกจิ นิยามํ
โอกฺกมนฺติ     ปฏิลภนฺติ    อุปฺปาเทนฺติ    สมุปฺปาเทนฺติ    อุฏฺฐาเปนฺติ
สมุฏฺฐาเปนฺติ   นิพฺพตฺเตนฺติ   อภินิพฺพตฺเตนฺติ   ชเนนฺติ   สญฺชเนนฺตีติ  ฯ
อามนฺตา   ฯ   อตฺถิ  เกจิ  อสงฺขตํ  โอกฺกมนฺติ  ปฏิลภนฺติ  อุปฺปาเทนฺติ
สมุปฺปาเทนฺติ   อุฏฺฐาเปนฺติ   สมุฏฺฐาเปนฺติ   นิพฺพตฺเตนฺติ  อภินิพฺพตฺเตนฺติ
ชเนนฺติ สญฺชเนนฺตีติ ฯ น เหวํ วตฺตพฺเพ ฯเปฯ
     [๑๐๘๐]   นิยาโม  อสงฺขโตติ  ฯ  อามนฺตา ฯ มคฺโค อสงฺขโตติ ฯ
น  เหวํ  วตฺตพฺเพ  ฯเปฯ  มคฺโค  สงฺขโตติ  ฯ  อามนฺตา  ฯ  นิยาโม
สงฺขโตติ  ฯ  น  เหวํ  วตฺตพฺเพ  ฯเปฯ  โสตาปตฺตินิยาโม อสงฺขโตติ ฯ
อามนฺตา   ฯ   โสตาปตฺติมคฺโค   อสงฺขโตติ   ฯ   น  เหวํ  วตฺตพฺเพ
ฯเปฯ   โสตาปตฺติมคฺโค   สงฺขโตติ  ฯ  อามนฺตา  ฯ  โสตาปตฺตินิยาโม
สงฺขโตติ   ฯ   น   เหวํ   วตฺตพฺเพ  ฯเปฯ  สกทาคามินิยาโม  ฯเปฯ
อนาคามินิยาโม   ฯเปฯ   อรหตฺตนิยาโม   อสงฺขโตติ  ฯ  อามนฺตา  ฯ
อรหตฺตมคฺโค   อสงฺขโตติ  ฯ  น  เหวํ  วตฺตพฺเพ  ฯเปฯ  อรหตฺตมคฺโค
สงฺขโตติ   ฯ   อามนฺตา   ฯ   อรหตฺตนิยาโม  สงฺขโตติ  ฯ  น  เหวํ
วตฺตพฺเพ ฯเปฯ
     [๑๐๘๑]   โสตาปตฺตินิยาโม   อสงฺขโต   ฯเปฯ   อรหตฺตนิยาโม
อสงฺขโต   นิพฺพานํ  อสงฺขตนฺติ  ฯ  อามนฺตา  ฯ  ปญฺจ  อสงฺขตานีติ  ฯ
น   เหวํ  วตฺตพฺเพ  ฯเปฯ  ปญฺจ  อสงฺขตานีติ  ฯ  อามนฺตา  ฯ  ปญฺจ
ตาณานิ ฯเปฯ อนฺตริกา วาติ ฯ น เหวํ วตฺตพฺเพ ฯเปฯ
     [๑๐๘๒]   นิยาโม   อสงฺขโตติ  ฯ  อามนฺตา  ฯ  มิจฺฉตฺตนิยาโม
อสงฺขโตติ  ฯ  น  เหวํ  วตฺตพฺเพ  ฯเปฯ  มิจฺฉตฺตนิยาโม  สงฺขโตติ  ฯ
อามนฺตา ฯ สมฺมตฺตนิยาโม สงฺขโตติ ฯ น เหวํ วตฺตพฺเพ ฯเปฯ
     [๑๐๘๓]   น  วตฺตพฺพํ  นิยาโม  อสงฺขโตติ  ฯ อามนฺตา ฯ นิยาเม
อุปฺปชฺช   นิรุทฺเธ   อนิยโต   โหตีติ   ฯ   น  เหวํ  วตฺตพฺเพ  ฯเปฯ
เตน   หิ   นิยาโม   อสงฺขโตติ   ฯ  มิจฺฉตฺตนิยาเม  อุปฺปชฺช  นิรุทฺเธ
อนิยโต  โหตีติ  ฯ  น  เหวํ  วตฺตพฺเพ  ฯเปฯ  เตน  หิ มิจฺฉตฺตนิยาโม
อสงฺขโตติ ฯ
                                         นิยามกถา ฯ
                                           ---------



             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๓๔๕-๓๔๗. http://84000.org/tipitaka/pali/pali_item_s.php?book=37&item=1077&items=7&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=37&item=1077&items=7&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=37&item=1077&items=7&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=37&item=1077&items=7&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=37&i=1077              The Pali Atthakatha in Thai :- http://84000.org/tipitaka/atthapali/read_th.php?B=55&A=4866              The Pali Atthakatha in Roman :- http://84000.org/tipitaka/atthapali/read_rm.php?B=55&A=4866              สารบัญพระไตรปิฎกเล่มที่ ๓๗ http://84000.org/tipitaka/read/?index_37

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :