Micchattavaggo tatiyo
[59] Sāvatthīnidānaṃ . micchattañca vo bhikkhave desessāmi
sammattañca taṃ suṇātha.
[60] Katamañca bhikkhave micchattaṃ . seyyathīdaṃ . micchādiṭṭhi
.pe. Micchāsamādhi. Idaṃ vuccati bhikkhave micchattaṃ.
[61] Katamañca bhikkhave sammattaṃ . seyyathīdaṃ . sammādiṭṭhi
.pe. Sammāsamādhi. Idaṃ vuccati bhikkhave sammattanti.
[62] Sāvatthīnidānaṃ . akusale ca vo bhikkhave dhamme desissāmi
kusale ca dhamme taṃ suṇātha.
[63] Katame ca bhikkhave akusalā dhammā . seyyathīdaṃ .
Micchādiṭṭhi .pe. micchāsamādhi . ime vuccanti bhikkhave akusalā
dhammā.
[64] Katame ca bhikkhave kusalā dhammā . seyyathīdaṃ .
Sammādiṭṭhi .pe. sammāsamādhi . ime vuccanti bhikkhave kusalā
dhammāti.
[65] Sāvatthīnidānaṃ . micchāpaṭipadañca vo bhikkhave desessāmi
sammāpaṭipadañca taṃ suṇātha.
[66] Katamā ca bhikkhave micchāpaṭipadā. Seyyathīdaṃ. Micchādiṭṭhi
.pe. Micchāsamādhi. Ayaṃ vuccati bhikkhave micchāpaṭipadā.
[67] Katamā ca bhikkhave sammāpaṭipadā. Seyyathīdaṃ. Sammādiṭṭhi
.pe. Sammāsamādhi. Ayaṃ vuccati bhikkhave sammāpaṭipadāti.
[68] Sāvatthīnidānaṃ . gihino vāhaṃ bhikkhave pabbajitassa vā
micchāpaṭipadaṃ na vaṇṇemi . gihī vā bhikkhave pabbajito vā
micchāpaṭipanno micchāpaṭipattādhikaraṇahetu nārādhako hoti ñāyaṃ
dhammaṃ kusalaṃ . katamā ca bhikkhave micchāpaṭipadā . seyyathīdaṃ .
Micchādiṭṭhi .pe. micchāsamādhi . ayaṃ vuccati bhikkhave micchāpaṭipadā.
Gihino vāhaṃ bhikkhave pabbajitassa vā micchāpaṭipadaṃ na vaṇṇemi . Gihī
vā bhikkhave pabbajito vā micchāpaṭipanno micchāpaṭipattādhikaraṇahetu
nārādhako hoti ñāyaṃ dhammaṃ kusalaṃ.
[69] Gihino vāhaṃ bhikkhave pabbajitassa vā sammāpaṭipadaṃ
vaṇṇemi . gihī vā bhikkhave pabbajito vā sammāpaṭipanno
sammāpaṭipattādhikaraṇahetu ārādhako hoti ñāyaṃ dhammaṃ kusalaṃ .
Katamā ca bhikkhave sammāpaṭipadā . seyyathīdaṃ . sammādiṭṭhi .pe.
Sammāsamādhi . ayaṃ vuccati bhikkhave sammāpaṭipadā . gihino
vāhaṃ bhikkhave pabbajitassa vā sammāpaṭipadaṃ vaṇṇemi . gihī vā
bhikkhave pabbajito vā sammāpaṭipanno sammāpaṭipattādhikaraṇahetu
ārādhako hoti ñāyaṃ dhammaṃ kusalanti.
[70] Sāvatthīnidānaṃ . asappurisañca vo bhikkhave desissāmi
Sappurisañca taṃ suṇātha.
[71] Katamo ca bhikkhave asappuriso . idha bhikkhave ekacco
micchādiṭṭhiko hoti micchāsaṅkappo micchāvāco micchākammanto
micchāājīvo micchāvāyāmo micchāsati micchāsamādhi . ayaṃ
vuccati bhikkhave asappuriso.
[72] Katamo ca bhikkhave sappuriso . idha bhikkhave ekacco
sammādiṭṭhiko hoti sammāsaṅkappo sammāvāco sammākammanto
sammāājīvo sammāvāyāmo sammāsati sammāsamādhi . ayaṃ
vuccati bhikkhave sappurisoti.
[73] Sāvatthīnidānaṃ . asappurisañca vo bhikkhave desessāmi
asappurisena asappurisatarañca . sappurisañca vo bhikkhave desissāmi
sappurisena sappurisatarañca taṃ suṇātha.
[74] Katamo ca bhikkhave asappuriso . idha bhikkhave ekacco
micchādiṭṭhiko hoti .pe. micchāsamādhi . ayaṃ vuccati bhikkhave
asappuriso.
[75] Katamo ca bhikkhave asappurisena asappusataro .
Idha bhikkhave ekacco micchādiṭṭhiko hoti .pe. micchāsamādhi
micchāñāṇī micchāvimutti . ayaṃ vuccati bhikkhave asappurisena
asappurisataro.
[76] Katamo ca bhikkhave sappuriso . idha bhikkhave ekacco
Sammādiṭṭhiko hoti .pe. sammāsamādhi . ayaṃ vuccati bhikkhave
sappuriso.
[77] Katamo ca bhikkhave sappurisena sappurisataro . idha
bhikkhave ekacco sammādiṭṭhiko hoti .pe. sammāsamādhi
sammāñāṇī sammāvimutti . ayaṃ vuccati bhikkhave sappurisena
sappurisataroti.
[78] Sāvatthīnidānaṃ . seyyathāpi bhikkhave kumbho anādhāro
suppavattiyo hoti sādhāro duppavattiyo hoti . evameva kho
bhikkhave cittaṃ anādhāraṃ suppavattiyaṃ hoti sādhāraṃ duppavattiyaṃ hoti.
[79] Ko ca bhikkhave cittassa ādhāro. Ayamevāriyo aṭṭhaṅgiko
maggo . seyyathīdaṃ . sammādiṭṭhi .pe. sammāsamādhi ayaṃ
cittassa ādhāro.
[80] Seyyathāpi bhikkhave kumbho anādhāro suppavattiyo hoti
sādhāro duppavattiyo hoti . evameva kho bhikkhave cittaṃ anādhāraṃ
suppavattiyaṃ hoti sādhāraṃ duppavattiyaṃ hotīti.
[81] Sāvatthīnidānaṃ . ariyaṃ vo bhikkhave sammāsamādhiṃ
desessāmi saupanisaṃ saparikkhāraṃ taṃ suṇātha.
[82] Katamo ca bhikkhave ariyo sammāsamādhi saupaniso
saparikkhāro. Seyyathīdaṃ. Sammādiṭṭhi 1- .pe. Sammāsamādhi.
@Footnote: 1 Ma. sammādiṭṭhi .pe. sammāsati.
[83] Yā kho bhikkhave imehi sattahaṅgehi cittassa ekaggatā
saparikkhatā 1- ayaṃ vuccati bhikkhave ariyo sammāsamādhi saupaniso
itipi saparikkhāro itipīti.
[84] Sāvatthīnidānaṃ . tisso imā bhikkhave vedanā. Katamā
tisso . sukhā vedanā dukkhā vedanā adukkhamasukhā vedanā .
Imā kho bhikkhave tisso vedanā.
[85] Imāsaṃ kho bhikkhave tissannaṃ vedanānaṃ pariññāya ariyo
aṭṭhaṅgiko maggo bhāvetabbo . katamo ariyo aṭṭhaṅgiko maggo.
Seyyathīdaṃ . sammādiṭṭhi .pe. sammāsamādhi . imāsaṃ kho bhikkhave
tissannaṃ 2- vedanānaṃ pariññāya ariyo aṭṭhaṅgiko maggo
bhāvetabboti.
[86] Sāvatthīnidānaṃ . atha kho āyasmā uttiyo yena bhagavā
tenupasaṅkami .pe. ekamantaṃ nisinno kho āyasmā uttiyo
bhagavantaṃ etadavoca idha mayhaṃ bhante rahogatassa paṭisallīnassa
evaṃ cetaso parivitakko udapādi pañca kāmaguṇā vuttā
bhagavatā. Katame nu kho pañca kāmaguṇā vuttā 3- bhagavatāti.
[87] Sādhu sādhu uttiya pañca khome uttiya kāmaguṇā
vuttā mayā . katame pañca . cakkhuviññeyyā rūpā iṭṭhā
kantā manāpā piyarūpā kāmūpasañhitā rajaniyā . sotaviññeyyā
saddā . ghānaviññeyyā gandhā . jivhāviññeyyā rasā .
@Footnote: 1 Po. parikkharatā. Ma. saparikkhāratā. Yu. saparikkhārā. 2-3 Yu. ayaṃ pāṭho natthi.
Kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā
rajaniyā. Ime kho uttiya pañca kāmaguṇā vuttā mayā.
[88] Imesaṃ kho uttiya pañcannaṃ kāmaguṇānaṃ pahānāya ariyo
aṭṭhaṅgiko maggo bhāvetabbo . katamo ariyo aṭṭhaṅgiko maggo.
Seyyathīdaṃ . sammādiṭṭhi .pe. sammāsamādhi . imesaṃ kho uttiya
pañcannaṃ kāmaguṇānaṃ pahānāya [1]- ariyo aṭṭhaṅgiko maggo
bhāvetabboti.
Micchattavaggo tatiyo.
Tassuddānaṃ
micchattaṃ akusalaṃ dhammaṃ 2- duve paṭipadāpi ca
asappurisena 3- dve vuttā kumbho samādhi vedanuttiyenāti.
---------
@Footnote: 1 Ma. Yu. ayaṃ. 2 Yu. ayaṃ pāṭho natthi. 3 Ma. asappurisena dve kumbho.
@Yu. dve sappurisena kumbho.
The Pali Tipitaka in Roman Character Volume 19 page 22-27.
http://84000.org/tipitaka/pali/roman_item_s.php?book=19&item=59&items=30
Classified by [Item Number] :-
http://84000.org/tipitaka/pali/roman_item_s.php?book=19&item=59&items=30&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=19&item=59&items=30
Compare with The Royal Version of Thai Tipitaka :-
http://84000.org/tipitaka/read/byitem_s.php?book=19&item=59&items=30
Study Atthakatha :-
http://84000.org/tipitaka/attha/attha.php?b=19&i=59
The Pali Atthakatha in Thai :-
http://84000.org/tipitaka/atthapali/read_th.php?B=13&A=4259
The Pali Atthakatha in Roman :-
http://84000.org/tipitaka/atthapali/read_rm.php?B=13&A=4259
Contents of The Tipitaka Volume 19
http://84000.org/tipitaka/read/?index_19
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
