paliTIPITAKA Volume 23 - Sutta Pitaka 15

[174] 84 Tatra kho āyasmā sārīputto bhikkhū āmantesi āvuso bhikkhaveti . āvusoti kho te bhikkhū āyasmato sārīputtassa paccassosuṃ . āyasmā sārīputto etadavoca aṭṭhime āvuso puggalā santo saṃvijjamānā lokasmiṃ. Katame aṭṭha. {174.1} Idhāvuso bhikkhuno pavivittassa viharato nirāyattavuttino icchā uppajjati lābhāya so uṭṭhahati ghaṭati vāyamati lābhāya tassa uṭṭhahato ghaṭato vāyamato lābhāya lābho nuppajjati so tena alābhena socati kilamati paridevati urattāḷī kandati sammohaṃ āpajjati ayaṃ vuccatāvuso bhikkhu iccho viharati lābhāya uṭṭhahati ghaṭati vāyamati lābhāya na ca lābhī soci ca paridevi ca cuto ca saddhammā. {174.2} Idha panāvuso bhikkhuno pavivittassa viharato nirāyattavuttino icchā uppajjati lābhāya so uṭṭhahati ghaṭati vāyamati lābhāya tassa uṭṭhahato ghaṭato vāyamato lābhāya lābho uppajjati so Tena lābhena majjati pamajjati pamādamāpajjati ayaṃ vuccatāvuso bhikkhu iccho viharati lābhāya uṭṭhahati ghaṭati vāyamati lābhāya lābhī ca madī ca pamādī ca cuto ca saddhammā. {174.3} Idha panāvuso bhikkhuno pavivittassa viharato nirāyattavuttino icchā uppajjati lābhāya so na uṭṭhahati na ghaṭati na vāyamati lābhāya tassa anuṭṭhahato aghaṭato avāyamato lābhāya lābho nuppajjati so tena alābhena socati kilamati paridevati urattāḷī kandati sammohaṃ āpajjati ayaṃ vuccatāvuso bhikkhu iccho viharati lābhāya na uṭṭhahati na ghaṭati na vāyamati lābhāya na ca lābhī soci ca paridevi ca cuto ca saddhammā. {174.4} Idha panāvuso bhikkhuno pavivittassa viharato nirāyattavuttino icchā uppajjati lābhāya so na uṭṭhahati na ghaṭati na vāyamati lābhāya tassa anuṭṭhahato aghaṭato avāyamato lābhāya lābho uppajjati so tena lābhena majjati pamajjati pamādamāpajjati ayaṃ vuccatāvuso bhikkhu iccho viharati lābhāya na uṭṭhahati na ghaṭati na vāyamati lābhāya lābhī ca madī ca pamādī ca cuto ca saddhammā. {174.5} Idha panāvuso bhikkhuno pavivittassa viharato nirāyattavuttino icchā uppajjati lābhāya so uṭṭhahati ghaṭati vāyamati lābhāya tassa uṭṭhahato ghaṭato vāyamato lābhāya lābho nuppajjati so tena alābhena na socati na kilamati na paridevati na urattāḷī kandati na Sammohaṃ āpajjati ayaṃ vuccatāvuso bhikkhu iccho viharati lābhāya uṭṭhahati ghaṭati vāyamati lābhāya na ca lābhī na ca soci na ca paridevi accuto ca saddhammā. {174.6} Idha panāvuso bhikkhuno pavivittassa viharato nirāyattavuttino icchā uppajjati lābhāya so uṭṭhahati ghaṭati vāyamati lābhāya tassa uṭṭhahato ghaṭato vāyamato lābhāya lābho uppajjati so tena lābhena na majjati na pamajjati na pamādamāpajjati ayaṃ vuccatāvuso bhikkhu iccho viharati lābhāya uṭṭhahati ghaṭati vāyamati lābhāya lābhī ca na ca madī na ca pamādī accuto ca saddhammā. {174.7} Idha panāvuso bhikkhuno pavivittassa viharato nirāyattavuttino icchā uppajjati lābhāya so na uṭṭhahati na ghaṭati na vāyamati lābhāya tassa anuṭṭhahato aghaṭato avāyamato lābhāya lābho nuppajjati so tena alābhena na socati na kilamati na paridevati na urattāḷī kandati na sammohaṃ āpajjati ayaṃ vuccatāvuso bhikkhu iccho viharati lābhāya na uṭṭhahati na ghaṭati na vāyamati lābhāya na ca lābhī na ca soci na ca paridevi accuto ca saddhammā. {174.8} Idha panāvuso bhikkhuno pavivittassa viharato nirāyattavuttino icchā uppajjati lābhāya so na uṭṭhahati na ghaṭati na vāyamati lābhāya tassa anuṭṭhahato aghaṭato avāyamato lābhāya lābho uppajjati so tena lābhena na majjati na pamajjati na pamādamāpajjati ayaṃ Vuccatāvuso bhikkhu iccho viharati lābhāya na uṭṭhahati na ghaṭati na vāyamati lābhāya lābhī ca na ca madī na ca pamādī accuto ca saddhammā. Ime kho āvuso aṭṭha puggalā santo saṃvijjamānā lokasminti. [175] 85 Tatra kho āyasmā sārīputto bhikkhū āmantesi .pe. Chahāvuso dhammehi samannāgato bhikkhu alaṃ attano alaṃ paresaṃ . Katamehi chahi . idhāvuso bhikkhu khippanisanti ca hoti kusalesu dhammesu sutānañca dhammānaṃ dhārakajātiko hoti dhatānañca dhammānaṃ atthūpaparikkhī ^1- hoti atthamaññāya dhammamaññāya dhammānudhammapaṭipanno ca hoti kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā sandassako ca hoti samādapako samuttejako sampahaṃsako sabrahmacārīnaṃ. Imehi kho āvuso chahi dhammehi samannāgato bhikkhu alaṃ attano alaṃ paresaṃ. [176] 86 Pañcahāvuso dhammehi samannāgato bhikkhu alaṃ attano alaṃ paresaṃ . katamehi pañcahi . idhāvuso bhikkhu na heva kho khippanisanti ca hoti kusalesu dhammesu sutānañca dhammānaṃ dhārakajātiko hoti dhatānañca dhammānaṃ atthūpaparikkhī hoti atthamaññāya dhammamaññāya dhammānudhammapaṭipanno ca hoti kalyāṇavāco ca hoti .pe. Sandassako ca hoti .pe. sabrahmacārīnaṃ . imehi kho āvuso pañcahi dhammehi samannāgato bhikkhu alaṃ attano alaṃ paresaṃ. [177] 87 Catūhāvuso dhammehi samannāgato bhikkhu alaṃ attano no @Footnote: ¹ Ma. atthūpaparikkhitā. evamuparipi. Paresaṃ . katamehi catūhi . idhāvuso bhikkhu khippanisanti ca hoti kusalesu dhammesu sutānañca dhammānaṃ dhārakajātiko hoti dhatānañca dhammānaṃ atthūpaparikkhī hoti atthamaññāya dhammamaññāya dhammānudhammapaṭipanno ca hoti no ca kalyāṇavāco hoti .pe. No ca sandassako hoti .pe. Sabrahmacārīnaṃ . imehi kho āvuso catūhi dhammehi samannāgato bhikkhu alaṃ attano no paresaṃ. [178] 88 Catūhāvuso dhammehi samannāgato bhikkhu alaṃ paresaṃ no attano . katamehi catūhi . idhāvuso bhikkhu khippanisanti ca hoti kusalesu dhammesu sutānañca dhammānaṃ dhārakajātiko hoti no ca dhatānaṃ dhammānaṃ atthūpaparikkhī hoti no ca atthamaññāya dhammamaññāya dhammānudhammapaṭipanno hoti kalyāṇavāco ca hoti .pe. sandassako ca hoti .pe. sabrahmacārīnaṃ . imehi kho āvuso catūhi dhammehi samannāgato bhikkhu alaṃ paresaṃ no attano. [179] 89 Tīhāvuso dhammehi samannāgato bhikkhu alaṃ attano no paresaṃ . katamehi tīhi . idhāvuso bhikkhu na heva kho khippanisanti ca hoti kusalesu dhammesu sutānañca dhammānaṃ dhārakajātiko hoti dhatānañca dhammānaṃ atthūpaparikkhī hoti atthamaññāya dhammamaññāya dhammānudhammapaṭipanno ca hoti no ca kalyāṇavāco hoti .pe. no ca sandassako hoti .pe. sabrahmacārīnaṃ . imehi kho āvuso tīhi dhammehi samannāgato bhikkhu alaṃ attano no paresaṃ. [180] 90 Tīhāvuso dhammehi samannāgato bhikkhu alaṃ paresaṃ no attano . katamehi tīhi. Idhāvuso bhikkhu na heva kho khippanisanti ca hoti kusalesu dhammesu sutānañca dhammānaṃ dhārakajātiko hoti no ca dhatānaṃ dhammānaṃ atthūpaparikkhī hoti no ca atthamaññāya dhammamaññāya dhammānudhammapaṭipanno hoti kalyāṇavāco ca hoti .pe. atthassa viññāpaniyā sandassako ca hoti .pe. sabrahmacārīnaṃ . imehi kho āvuso tīhi dhammehi samannāgato bhikkhu alaṃ paresaṃ no attano. [181] 91 Dvīhāvuso dhammehi samannāgato bhikkhu alaṃ attano no paresaṃ . katamehi dvīhi. Idhāvuso bhikkhu na heva kho khippanisanti ca hoti kusalesu dhammesu sutānañca dhammānaṃ dhārakajātiko hoti dhatānañca dhammānaṃ atthūpaparikkhī hoti atthamaññāya dhammamaññāya dhammānudhammapaṭipanno ca hoti no ca kalyāṇavāco hoti .pe. no ca sandassako hoti .pe. sabrahmacārīnaṃ . imehi kho āvuso dvīhi dhammehi samannāgato bhikkhu alaṃ attano no paresaṃ. [182] 92 Dvīhāvuso dhammehi samannāgato bhikkhu alaṃ paresaṃ no attano . katamehi dvīhi . idhāvuso bhikkhu na heva kho khippanisanti ca hoti kusalesu dhammesu no ca sutānaṃ dhammānaṃ dhārakajātiko hoti no ca dhatānaṃ dhammānaṃ atthūpaparikkhī hoti no ca atthamaññāya dhammamaññāya dhammānudhammapaṭipanno hoti kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya Atthassa viññāpaniyā sandassako ca hoti samādapako samuttejako sampahaṃsako sabrahmacārīnaṃ . imehi kho āvuso dvīhi dhammehi samannāgato bhikkhu alaṃ paresaṃ no attanoti.

The Pali Tipitaka in Roman Character Volume 23 page 337-343. http://84000.org/tipitaka/pali/roman_item_s.php?book=23&item=174&items=9 Classified by [Item Number] :- http://84000.org/tipitaka/pali/roman_item_s.php?book=23&item=174&items=9&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=23&item=174&items=9 Compare with The Royal Version of Thai Tipitaka :- http://84000.org/tipitaka/read/byitem_s.php?book=23&item=174&items=9 Study Atthakatha :- http://84000.org/tipitaka/attha/attha.php?b=23&i=174 Contents of The Tipitaka Volume 23 http://84000.org/tipitaka/read/?index_23