paliTIPITAKA Volume 24 - Sutta Pitaka 16

Akkosavaggo pañcamo [41] Athakho āyasmā upāli yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho āyasmā upāli bhagavantaṃ etadavoca ko nu kho bhante hetu ko paccayo yena saṅghe bhaṇḍanakalahaviggahavivādā uppajjanti bhikkhū na phāsu viharantīti . idhupāli bhikkhū adhammaṃ dhammoti dīpenti dhammaṃ adhammoti dīpenti avinayaṃ vinayoti dīpenti vinayaṃ avinayoti dīpenti abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti anāciṇṇaṃ tathāgatena āciṇṇaṃ tathāgatenāti dīpenti āciṇṇaṃ tathāgatena anāciṇṇaṃ tathāgatenāti dīpenti appaññattaṃ tathāgatena paññattaṃ tathāgatenāti dīpenti paññattaṃ tathāgatena appaññattaṃ tathāgatenāti dīpenti ayaṃ kho upāli hetu ayaṃ paccayo yena saṅghe bhaṇḍanakalahaviggahavivādā uppajjanti bhikkhū na phāsu viharantīti. [42] Kati nu kho bhante vivādamūlānīti . dasa kho upāli vivādamūlāni katamāni dasa idhupāli bhikkhū adhammaṃ dhammoti dīpenti dhammaṃ adhammoti dīpenti avinayaṃ vinayoti dīpenti vinayaṃ avinayoti dīpenti abhāsitaṃ alapitaṃ tathāgatena bhāsitaṃ lapitaṃ tathāgatenāti Dīpenti bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti anāciṇṇaṃ tathāgatena āciṇṇaṃ tathāgatenāti dīpenti āciṇṇaṃ tathāgatena anāciṇṇaṃ tathāgatenāti dīpenti appaññattaṃ tathāgatena paññattaṃ tathāgatenāti dīpenti paññattaṃ tathāgatena appaññattaṃ tathāgatenāti dīpenti imāni kho upāli dasa vivādamūlānīti. [43] Kati nu kho bhante vivādamūlānīti. Dasa kho upāli vivādamūlāni katamāni dasa idhupāli bhikkhū anāpattiṃ āpattīti dīpenti āpattiṃ anāpattīti dīpenti lahukaṃ āpattiṃ garukāpattīti dīpenti garukaṃ āpattiṃ lahukāpattīti dīpenti duṭṭhullaṃ āpattiṃ aduṭṭhullāpattīti dīpenti aduṭṭhullaṃ āpattiṃ duṭṭhullāpattīti dīpenti sāvasesaṃ āpattiṃ avasesā āpattīti dīpenti anavasesaṃ āpattiṃ sāvasesāpattīti dīpenti sappaṭikammaṃ āpattiṃ appaṭikammāpattīti dīpenti appaṭikammaṃ āpattiṃ sappaṭikammāpattīti dīpenti imāni kho upāli dasa vivādamūlānīti.

The Pali Tipitaka in Roman Character Volume 24 page 81-82. http://84000.org/tipitaka/pali/roman_item_s.php?book=24&item=41&items=3 Classified by [Item Number] :- http://84000.org/tipitaka/pali/roman_item_s.php?book=24&item=41&items=3&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=24&item=41&items=3 Compare with The Royal Version of Thai Tipitaka :- http://84000.org/tipitaka/read/byitem_s.php?book=24&item=41&items=3 Study Atthakatha :- http://84000.org/tipitaka/attha/attha.php?b=24&i=41 Contents of The Tipitaka Volume 24 http://84000.org/tipitaka/read/?index_24