Catuttiṃso gandhodakavaggo
paṭhamaṃ gandhadhūpiyattherāpadānaṃ (331)
[333] |333.1| Siddhatthassa bhagavato gandhadhūpaṃ adāsahaṃ
sumanehi paṭicchannaṃ buddhānucchavikañca taṃ.
|333.2| Kañcanagghiyasaṅkāsaṃ buddhaṃ lokagganāyakaṃ
indīvaraṃva jalitaṃ ādittaṃva hutāsanaṃ.
|333.3| Byagghusabhaṃva paramaṃ abhijātaṃva kesariṃ
nisinnaṃ samaṇānaggaṃ bhikkhusaṅghapurakkhataṃ.
|333.4| Disvā cittaṃ pasādetvā paggahetvāna añjaliṃ
vanditvā satthuno pāde pakkāmiṃ uttarāmukho.
|333.5| Catunavute ito kappe yaṃ gandhamadadiṃ tadā
duggatiṃ nābhijānāmi gandhapūjāyidaṃ phalaṃ.
|333.6| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā gandhadhūpiyo thero imā gāthāyo
abhāsitthāti.
Gandhadhūpiyattherassa apadānaṃ samattaṃ.
Dutiyaṃ udakapūjakattherāpadānaṃ (332)
[334] |334.7| Suvaṇṇavaṇṇaṃ sambuddhaṃ gacchantaṃ anilañjase
ghatāsanaṃva jalitaṃ ādittaṃva hutāsanaṃ.
|334.8| Pāṇinā udakaṃ gayha ākāse ukkhipiṃ ahaṃ
sampaṭicchi mahāvīro buddho kāruṇiko isi.
|334.9| Antalikkhe ṭhito satthā padumuttaranāmako
mama saṅkappamaññāya imaṃ gāthaṃ abhāsatha.
|334.10| Iminā dakadānena pītiuppādanena ca
kappasatasahassaṃpi duggatiṃ nūpapajjasi.
|334.11| Tena kammena dipadinda lokajeṭṭha narāsabha
pattomhi acalaṃ ṭhānaṃ hitvā jayaparājayaṃ.
|334.12| Sahassarājanāmena tayo ca cakkavattino
pañcasaṭṭhikappasate cāturanto janādhipā.
|334.13| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā udakapūjako thero imā gāthāyo
abhāsitthāti.
Udakapūjakattherassa apadānaṃ samattaṃ.
Tatiyaṃ punnāgapupphiyattherāpadānaṃ (333)
[335] |335.14| Kānanaṃ vanamoggayha vasāmi luddako ahaṃ
punnāgaṃ pupphitaṃ disvā buddhaseṭṭhaṃ anussariṃ.
|335.15| Taṃ pupphaṃ ocinitvāna sugandhaṃ gandhitaṃ subhaṃ
thūpaṃ katvāna puḷine buddhassa abhiropayiṃ.
|335.16| Dvenavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|335.17| Ekamhi navute kappe eko āsi tamonudo
sattaratanasampanno cakkavatti mahabbalo.
|335.18| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā punnāgapupphiyo thero imā gāthāyo
abhāsitthāti.
Punnāgapupphittherassa apadānaṃ samattaṃ.
Catutthaṃ ekadussadāyakattherāpadānaṃ (334)
[336] |336.19| Nagare haṃsavatiyā ahosiṃ tiṇahārako
tiṇahārena jīvāmi tena posemi dārake.
|336.20| Padumuttaro nāma jino sabbadhammāna pāragū
tamandhakāraṃ nāsetvā uppajji lokanāyako.
|336.21| Sake ghare nisīditvā evaṃ cintesahaṃ tadā
buddho loke samuppanno deyyadhammo ca natthi me.
|336.22| Idaṃ me sāṭakaṃ ekaṃ natthi me koci dāyako
dukkho nirayasamphasso ropayissāmi dakkhiṇaṃ.
|336.23| Evāhaṃ cintayitvāna sakaṃ cittaṃ pasādayiṃ
ekaṃ dussaṃ gahetvāna buddhaseṭṭhassadāsahaṃ.
|336.24| Ekaṃ dussaṃ daditvāna ukkuṭṭhiṃ sampavattayiṃ
yadi buddho tuvaṃ vīra tārehi maṃ mahāmuni.
|336.25| Padumuttaro lokavidū āhutīnaṃ paṭiggaho
mama dānaṃ pakittento akā me anumodanaṃ.
|336.26| Iminā ekadussena cetanāpaṇidhīhi ca
kappasatasahassāni vinipātaṃ na gacchati.
|336.27| Chattiṃsakkhattu devindo devarajjaṃ karissati
tettiṃsakkhattu rājā ca cakkavatti bhavissati.
|336.28| Padesarajjaṃ vipulaṃ gaṇanāto asaṅkhayaṃ
devaloke manusse vā saṃsaranto tuvaṃ bhave.
|336.29| Rūpavā guṇasampanno anavakkantadehavā
akkhobhaṃ amitaṃ dussaṃ bhavissati 1- yathicchakaṃ.
@Footnote: 1 Ma. labhissasi.
|336.30| Idaṃ vatvāna sambuddho jalajuttamanāmako
nabhaṃ abbhuggami dhīro haṃsarājāva ambare.
|336.31| Yaṃ yaṃ yonūpapajjāmi devattaṃ atha mānusaṃ
bhoge me ūnatā natthi ekadussassidaṃ phalaṃ.
|336.32| Paduddhāre paduddhāre dussaṃ nibbattate mamaṃ
heṭṭhā dussamhi tiṭṭhāmi upari chadanaṃ mama.
|336.33| Cakkavāḷamupādāya sakānanaṃ sapabbataṃ
icchamāno cahaṃ ajja dussehacchādayeyyahaṃ.
|336.34| Teneva ekadussena saṃsaranto bhavābhave
suvaṇṇavaṇṇo hutvāna saṃsarāmi bhavābhave.
|336.35| Vipākaṃ ekadussassa najjhagaṃ katthacikkhayaṃ
ayaṃ me antimā jāti vipaccati idhāpi me.
|336.36| Satasahassito kappe yaṃ dussamadadiṃ tadā
duggatiṃ nābhijānāmi ekadussassidaṃ phalaṃ.
|336.37| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|336.38| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekadussadāyako thero imā gāthāyo
abhāsitthāti.
Ekadussadāyakattherassa apadānaṃ samattaṃ.
Pañcamaṃ phussitakammiyattherāpadānaṃ (335)
[337] |337.39| Vipassī nāma sambuddho lokajeṭṭho narāsabho
khīṇāsavehi sahito saṅghārāme vasī tadā.
|337.40| Ārāmadvārā nikkhamma vipassī lokanāyako
saha satasahassehi aṭṭhakhīṇāsavehi so.
|337.41| Ajinena nivatthohaṃ vākacīradharopi ca
kusumbhodakamādāya 1- sambuddhaṃ upasaṅkamiṃ.
|337.42| Sakaṃ cittaṃ pasādetvā vedajāto katañjalī
kusumbhodakamādāya 2- buddhamabbhukiriṃ 3- ahaṃ.
|337.43| Tena kammena sambuddho jalajuttamanāmako
mama kammaṃ pakittetvā agamā yena patthitaṃ.
|337.44| Phussitā pañcasahassā yehi pūjesahaṃ jinaṃ
aḍḍhateyyasahassehi devarajjamakārayiṃ.
|337.45| Aḍḍhateyyasahassehi cakkavatti ahosahaṃ
avasesena kammena arahattaṃ apāpuṇiṃ.
|337.46| Devarājā yadāhosiṃ 4- manujādhipati tadā 5-
taṃyeva nāmadheyyaṃ me phussito nāmahosahaṃ 6-.
|337.47| Devabhūtassa santassa athāpi mānusassa vā
samantā byāmato mayhaṃ phussitaṃpi 7- pavassati.
@Footnote: 1-2 Ma. kusumodakamādāya. 3 Ma. Yu. buddhamabbhukkiriṃ. 4 Ma. Yu. yathā homi.
@5 Ma. yadā. Yu. yathā. 6 Ma. Yu. nāmahomahaṃ. 7 Ma. Yu. phussitaṃva.
|337.48| Bhavā ugghāṭitā mayhaṃ kilesā jhāpitā mama
sabbāsavaparikkhīṇo phussitassa idaṃ phalaṃ.
|337.49| Candanasseva me vasso 1- tathā gandho pavāyati
sārīrako 2- mama gandho aḍḍhakose pavāyati.
|337.50| Dibbagandhaṃ sampavantaṃ puññakammasamaṅginaṃ
gandhaṃ ghatvāna jānanti phussito āgato idha.
|337.51| Sākhā palāsakaṭṭhāni tiṇānipica sabbaso
mama saṅkappamaññāya gandho sampajjate khaṇe.
|337.52| Satasahasse ito kappe candanaṃ abhipūjayiṃ
duggatiṃ nābhijānāmi phussitadassidaṃ phalaṃ.
|337.53| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā phussitakammiyo thero imā gāthāyo
abhāsitthāti.
Phussitakammiyattherassa apadānaṃ samattaṃ.
Chaṭṭhaṃ pabhaṅkarattherāpadānaṃ (336)
[338] |338.54| Padumuttarabhagavato lokajeṭṭhassa tādino
pavane 3- cetiyaṃ āsi vāḷamigasamākule.
@Footnote: 1 Ma. kāyā. 2 Ma. sarīrato. Yu. sārīriko. 3 Ma. sabbattha vipine.
|338.55| Na koci visahi gantuṃ cetiyaṃ abhivandituṃ
tiṇakaṭṭhalatonaddhaṃ paluggaṃ āsi cetiyaṃ.
|338.56| Vanakammiko tadā āsiṃ pitāpetāmahenahaṃ 1-
addasaṃ pavane thūpaṃ luggaṃ tiṇalatākulaṃ.
|338.57| Disvānāhaṃ buddhathūpaṃ garucittaṃ upaṭṭhahiṃ
buddhaseṭṭhassa thūpoyaṃ paluggo acchati vane.
|338.58| Nacchannaṃ nappaṭirūpaṃ jānantassa guṇāguṇaṃ
buddhathūpaṃ asodhetvā aññaṃ kammaṃ payojaye.
|338.59| Tiṇakaṭṭhañca valliñca sodhayitvāna cetiye
vanditvā aṭṭha vārāni paṭikuṭiko agacchahaṃ.
|338.60| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|338.61| Tattha me sukataṃ byamhaṃ sovaṇṇaṃ sappabhassaraṃ
saṭṭhiyojanamubbiddhaṃ tiṃsayojanavitthataṃ.
|338.62| Tisatāni ca vārāni devarajjamakārayiṃ
pañcavīsatikkhattuñca cakkavatti ahosahaṃ.
|338.63| Bhavābhave saṃsaranto mahābhogaṃ labhāmahaṃ
bhoge me ūnatā natthi sodhanāya idaṃ phalaṃ.
|338.64| Siviyā 2- hatthikhandhena pavane gacchato mama 3-
yaṃ yaṃ disāhaṃ gacchāmi saraṇaṃ sampajjate 4- vanaṃ.
@Footnote: 1 Ma. pitumātumatenahaṃ. Yu. pitupetāmahenahaṃ. 2 Ma. sivikā. 3 Yu. mamaṃ.
@4 Ma. sampate.
|338.65| Khāṇuṃ vā kaṇṭakaṃ vāpi nāhaṃ passāmi cakkhunā
puññakammena saṃyutto sayamevāpanīyare.
|338.66| Kuṭṭhaṃ gaṇḍo kilāso ca apamāro vitacchikā
daddu kaṇḍu ca me natthi sodhanāya idaṃ phalaṃ.
|338.67| Aññaṃpi me acchariyaṃ buddhathūpamhi 1- sodhite
nābhijānāmi me kāye jātaṃ piḷakabindukaṃ.
|338.68| Aññaṃpi me acchariyaṃ buddhathūpamhi sodhite
duve bhave saṃsarāmi devatte atha mānuse.
|338.69| Aññaṃpi me acchariyaṃ buddhathūpamhi sodhite
suvaṇṇavaṇṇo sabbattha sappabhāso bhavāmahaṃ.
|338.70| Aññaṃpi me acchariyaṃ buddhathūpamhi sodhite
amanāpaṃ vivajjeti manāpaṃ upatiṭṭhati.
|338.71| Aññaṃpi me acchariyaṃ buddhathūpamhi sodhite
visuddhaṃ hoti me cittaṃ ekaggaṃ susamāhitaṃ.
|338.72| Aññaṃpi me acchariyaṃ buddhathūpamhi sodhite
ekāsane nisīditvā arahattaṃ apāpuṇiṃ.
|338.73| Satasahasse ito kappe yaṃ kammamakariṃ tadā
duggatiṃ nābhijānāmi sodhanāya idaṃ phalaṃ.
|338.74| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. Yu. buddhathūpassa sodhane.
Itthaṃ sudaṃ āyasmā pabhaṅkaro thero imā gāthāyo
abhāsitthāti.
Pabhaṅkarattherassa apadānaṃ samattaṃ.
Sattamaṃ tiṇakuṭidāyakattherāpadānaṃ (337)
[339] |339.75| Nagare bandhumatiyā ahosiṃ parakammiko
parakammāyane yutto parabhattaṃ apassito.
|339.76| Rahogato nisīditvā evaṃ cintesahaṃ 1- tadā
buddho loke samuppanno adhikāro ca natthi me.
|339.77| Kālo gatiṃ me sodhetuṃ khaṇo me paṭipādito
dukkho nirayasamphasso apuññānaṃ hi pāṇinaṃ.
|339.78| Evāhaṃ cintayitvāna kammasāmiṃ upāgamiṃ
ekāhaṃ kammaṃ yācitvā pavanaṃ pāvisiṃ ahaṃ.
|339.79| Tiṇakaṭṭhañca valliñca āharitvānahantadā
tidaṇḍake ṭhapetvāna akaṃ tiṇakuṭiṃ ahaṃ.
|339.80| Saṅghassatthāya kuṭikaṃ niyyādetvāna taṃ ahaṃ
tadaheyeva āgantvā kammāsāmiṃ upāgamiṃ.
|339.81| Tena kammena sukatena tāvatiṃsaṃ agañchahaṃ
tattha me sukataṃ byamhaṃ tiṇakuṭikāya 2- nimmitaṃ.
@Footnote: 1 Yu. --- cintesi tāvade. 2 Ma. kuṭikāya sunimmitaṃ.
|339.82| Sahassakaṇḍo satageṇḍu dhajālu haritāmayo
satasahassaniyyūhā byamhe pātubhaviṃsu me.
|339.83| Yaṃ yaṃ yonūpapajjāmi devattaṃ atha mānusaṃ
mama saṅkappamaññāya pāsādo upatiṭṭhati.
|339.84| Bhayaṃ vā chambhitattaṃ vā lomahaṃso na vijjati
tāsaṃ mama na jānāmi tiṇakuṭikāyidaṃ phalaṃ
|339.85| sīhā byagghā ca dīpi ca acchakokataracchayo 1-
sabbe maṃ parivajjanti tiṇakuṭikāyidaṃ phalaṃ.
|339.86| Siriṃsapā ca bhūtā ca ahikumbhaṇḍarakkhasā
tepi maṃ parivajjanti tiṇakuṭikāyidaṃ phalaṃ.
|339.87| Na pāpasupinassāhaṃ sarāmi dassanaṃ mama
upaṭṭhitā sati mayhaṃ tiṇakuṭikāyidaṃ phalaṃ.
|339.88| Tāyeva tiṇakuṭikāya anubhotvāna sampadā
gotamassa bhagavato dhammaṃ sacchikariṃ ahaṃ.
|339.89| Ekanavute ito kappe yaṃ kammamakariṃ tadā
duggatiṃ nābhijānāmi tiṇakuṭikāyidaṃ phalaṃ.
|339.90| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. acchakokataracchakā.
Itthaṃ sudaṃ āyasmā tiṇakuṭidāyako thero imā gāthāyo
abhāsitthāti.
Tiṇakuṭidāyakattherassa apadānaṃ samattaṃ.
Aṭṭhamaṃ uttareyyadāyakattherāpadānaṃ (338)
[340] |340.91| Nagare haṃsavatiyā ahosiṃ brāhmaṇo tadā
ajjhāyiko mantadharo tiṇṇaṃ vedāna pāragū.
|340.92| Purakkhato sasissehi jātimo 1- ca susikkhito
toyābhisecanatthāya nagarā nikkhamiṃ tadā.
|340.93| Padumuttaro 2- lokavidū sabbadhammāna pāragū
khīṇāsavasahassehi nagaraṃ pāvisī jino.
|340.94| Sucārurūpaṃ disvāna aneñjaṃ kāritaṃ viya
parivutaṃ arahantehi disvā cittaṃ pasādayiṃ.
|340.95| Sirasi añjaliṃ katvā namassitvāna subbataṃ
pasannacitto sumano uttariyamadāsahaṃ.
|340.96| Ubhohatthehi paggayha sāṭakaṃ ukkhipiṃ ahaṃ
yāvatā buddhaparisā tāva chādesi sāṭakaṃ.
|340.97| Piṇḍacāraṃ carantassa mahābhikkhugaṇādino 3-
chādaṃ karonto aṭṭhāsi hāsayanto mamaṃ tadā.
@Footnote: 1 Ma. jātimā. 2 Ma. Yu. padumuttaro nāma jino. 3 Yu. mahābhikkhugaṇādinaṃ.
|340.98| Gharato nikkhamantassa sayambhū aggapuggalo
vīthiyaṃ 1- ṭhitako satthā akāsi anumodanaṃ.
|340.99| Pasannacitto sumano yo me pādāsi 2- sāṭakaṃ
tamahaṃ kittayissāmi suṇātha mama bhāsato.
|340.100| Tiṃsakappasahassāni devaloke ramissati
paññāsakkhattuṃ devindo devarajjaṃ karissati.
|340.101| Devaloke vasantassa puññakammasamaṅgino
samantā yojanasataṃ dussacchannaṃ bhavissati.
|340.102| Chattiṃsakkhattuṃ rājā ca cakkavatti bhavissati
padesarajjaṃ vipulaṃ gaṇanāto asaṅkhayaṃ.
|340.103| Bhave saṃsaramānassa puññakammasamaṅgino
manasā patthitaṃ sabbaṃ nibbattissati tāvade.
|340.104| Koseyyakambalāni 3- ca khomakappāsikāni ca
mahagghāni ca dussāni paṭilacchatiyaṃ naro.
|340.105| Manasā patthitaṃ sabbaṃ paṭilacchatiyaṃ naro
ekadussassa vipākaṃ anubhossati sabbadā.
|340.106| So pacchā pabbajitvāna sukkamūlena codito
gotamassa bhagavato dhammaṃ sacchikarissati.
|340.107| Aho me sukataṃ kammaṃ sambuddhassa 4- mahesino
ekāhaṃ sāṭakaṃ datvā pattomhi amataṃ padaṃ.
@Footnote: 1 Ma. Yu. vithiyaṃva ṭhito satthā akāme anumodanaṃ. 2 Ma. adāsi.
@3 Ma. koseyyakambaliyāni. 4 Ma. Yu. sabbaññussa.
|340.108| Maṇḍape rukkhamūle vā vasato suññake ghare
dhāreti dussachadanaṃ samantā byāmato mama.
|340.109| Aviññattaṃ 1- nivāsemi cīvaraṃ paccayañcahaṃ
lābhimhi 2- annapānassa uttareyyassidaṃ phalaṃ.
|340.110| Satasahasse ito kappe yaṃ kammamakariṃ tadā
duggatiṃ nābhijānāmi vatthadānassidaṃ phalaṃ.
|340.111| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā uttareyyadāyako thero imā gāthāyo
abhāsitthāti.
Uttareyyadāyakattherassa apadānaṃ samattaṃ.
Navamaṃ dhammassavaniyattherāpadānaṃ (339)
[341] |341.112| Padumuttaro nāma jino sabbadhammāna pāragū
catusaccaṃ pakāsento santāreti 3- bahujjanaṃ.
|341.113| Ahaṃ tena samayena jaṭilo uggatāpano
dhunanto vākacīrāni gacchāmi ambare tadā.
|341.114| Buddhaseṭṭhassa upari gantuṃ na visahāmahaṃ
pakkhīva selamāpajja 4- gamanaṃ na labhintadā 5-.
@Footnote: 1 Yu. aviññatti nisevāmi. 2 Ma. lābhī. Yu. lābhīhi. 3 Ma. santāresi bahuṃ janaṃ.
@4 Ma. Yu. selamāsajja. 5 Ma. na labhāmahaṃ. Yu. na labhe tadā.
|341.115| Na me idaṃ bhūtapubbaṃ iriyassa vikopanaṃ
dake yathā ummilitvā evaṃ gacchāmi ambare.
|341.116| Uḷārabhūto manujo ca heṭṭhāsīno bhavissati
handa metaṃ gavesissaṃ api atthaṃ labheyyahaṃ.
|341.117| Orohanto antalikkhā saddamassosi satthuno
aniccataṃ kathentassa tamahaṃ uggahiṃ tadā.
|341.118| Aniccasaññamuggayha agamāsiṃ mamassamaṃ
yāvatāyuṃ vasitvāna tattha kālaṃ kato ahaṃ.
|341.119| Carime vattamānamhi taṃ dhammassavanaṃ sariṃ
tena kammena sukatena tāvatiṃsaṃ agacchahaṃ.
|341.120| Tiṃsakappasahassāni devaloke ramiṃ ahaṃ
ekapaññāsakkhattuñca devarajjamakārayiṃ.
|341.121| Ekasattatikkhattuñca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|341.122| Pitughare nisīditvā samaṇo bhāvitindriyo
gāthāya paridīpento aniccavatthudāhari 1-.
|341.123| Anussarāmi taṃ saññaṃ saṃsaranto bhavābhave
na koṭiṃ paṭivijjhāmi nibbānaṃ accutaṃ padaṃ.
|341.124| Aniccā vata saṅkhārā uppādavayadhammino
uppajjitvā nirujjhanti tesaṃ vūpasamo sukho.
@Footnote: 1 Ma. aniccatamudāhari.
|341.125| Saha gāthaṃ suṇitvāna pubbakammaṃ anussariṃ
ekāsane nisīditvā arahattaṃ apāpuṇiṃ.
|341.126| Jātiyā sattavassohaṃ arahattaṃ apāpuṇiṃ
upasampādayi buddho guṇamaññāya cakkhumā.
|341.127| Dārakova ahaṃ santo karaṇīyaṃ samāpayiṃ
kiṃ me karaṇīyaṃ ajja sakyaputtassa sāsane.
|341.128| Satasahasse ito kappe yaṃ kammamakariṃ tadā
duggatiṃ nābhijānāmi saddhammassavane phalaṃ.
|341.129| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā dhammassavaniyo thero imā gāthāyo
abhāsitthāti.
Dhammassavaniyattherassa apadānaṃ samattaṃ.
Dasamaṃ ukkhittapadumiyattherāpadānaṃ (340)
[342] |342.130| Nagare haṃsavatiyā ahosiṃ māliko tadā
ogāhetvā padumasaraṃ sattapatte 1- ocināmahaṃ.
|342.131| Padumuttaro nāma jino sabbadhammāna pāragū
saha satasahassehi santacittehi tādibhi.
@Footnote: 1 Ma. sabbattha satapattanti dissati.
|342.132| Khīṇāsavehi suddhehi chaḷabhiññehi jhāyibhi
mama vuḍḍhiṃ samanvesaṃ āgañchi purisuttamo 1-.
|342.133| Disvānahaṃ devadevaṃ sayambhuṃ lokanāyakaṃ
vaṇṭe chetvā sattapattaṃ ukkhipiṃ ambare tadā.
|342.134| Yadi buddho tuvaṃ dhīra lokajeṭṭho narāsabho
sayaṃ gantvā sattapatto matthake dhārayantu te.
|342.135| Adhiṭṭhahi mahāvīro lokajeṭṭho narāsabho
buddhassa ānubhāvena matthake dhārayiṃsu te.
|342.136| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agacchahaṃ.
|342.137| Tattha me sukataṃ byamhaṃ sattapattanti vuccati
saṭṭhiyojanamubbiddhaṃ tiṃsayojanavitthataṃ.
|342.138| Sahassakkhattuṃ devindo devarajjamakārayiṃ
pañcasattatikkhattuñca cakkavatti ahosahaṃ.
|342.139| Padesarajjaṃ vipulaṃ gaṇanāto asaṅkhayaṃ
anubhomi sakaṃ kammaṃ pubbe sukatamattano.
|342.140| Tenevekapadumena anubhotvāna sampadā
gotamassa bhagavato dhammaṃ sacchikariṃ ahaṃ.
|342.141| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
@Footnote: 1 Ma. -- mama santikaṃ.
|342.142| Satasahasse ito kappe yaṃ pupphamabhipūjayiṃ
duggatiṃ nābhijānāmi ekapadumassidaṃ phalaṃ.
|342.143| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ukkhittapadumiyo thero imā gāthāyo
abhāsitthāti.
Ukkhittapadumiyattherassa apadānaṃ samattaṃ.
Uddānaṃ
gandhodakaṃ pūjanī ca punnāgaṃ ekadussikā
phussito ca pabhaṅkaro kuṭido uttarīyako.
Savanaṃ ekapadumi gāthāyo sabbapiṇḍitā
ekagāthāsatañceva catutāḷīsameva ca.
Gandhodakavaggo catuttiṃso.
---------
The Pali Tipitaka in Roman Character Volume 32 page 411-428.
http://84000.org/tipitaka/pali/roman_item_s.php?book=32&item=333&items=10
Classified by [Item Number] :-
http://84000.org/tipitaka/pali/roman_item_s.php?book=32&item=333&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=333&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=333&items=10
Study Atthakatha :-
http://84000.org/tipitaka/attha/attha.php?b=32&i=333
The Pali Atthakatha in Thai :-
http://84000.org/tipitaka/atthapali/read_th.php?B=50&A=5221
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5221
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
