TIPITAKA Volume 32 : PALI ROMAN
Sutta Pitaka Vol 24 : Sutta. Khu. Apa(1)

                                Pañcattiṃso ekapadumavaggo
                            paṭhamaṃ ekapadumiyattherāpadānaṃ (341)
     [343] |343.1| Padumuttaro nāma jino   sabbadhammāna pāragū
                     bhavābhave vibhāvento            tāreti 1- janataṃ bahuṃ.
      |343.2| Haṃsarājā  tadā homi            dijānaṃ pavaro ahaṃ
                     jātassaraṃ samogayha             kīḷāmi haṃsakīḷitaṃ.
      |343.3| Padumuttaro lokavidū              āhutīnaṃ paṭiggaho
                     jātassarassa upari               āgacchi tāvade jino.
      |343.4| Disvānahaṃ devadevaṃ               sayambhuṃ lokanāyakaṃ
                     vaṇṭe chetvāna padumaṃ         sattapattaṃ manoramaṃ.
      |343.5| Mukhatuṇḍena paggayha           vippasannena 2- cetasā
                     ukkhipitvāna gagane             buddhaseṭṭhaṃ apūjayiṃ.
      |343.6| Padumuttaro lokavidū              āhutīnaṃ paṭiggaho
                     antalikkhe ṭhito satthā        akāsi 3- anumodanaṃ.
      |343.7| Iminā ekapadumena              cetanāpaṇidhīhi ca
                     kappānaṃ satasahassaṃ             vinipātaṃ na gacchasi.
      |343.8| Idaṃ vatvāna sambuddho          jalajuttamanāmako
                     mama kammaṃ pakittetvā         agamā yena patthitaṃ.
@Footnote: 1 Ma. tāresi. 2 Ma. Yu. pasanno lokanāyake. 3 Ma. Yu. akāme.
      |343.9| Satasahasse ito kappe         yaṃ kammamakariṃ tadā
                     duggatiṃ nābhijānāmi           buddhapūjāyidaṃ phalaṃ.
      |343.10| Paṭisambhidā catasso          vimokkhāpica aṭṭhime
                        chaḷabhiññā sacchikatā      kataṃ buddhassa sāsananti.
        Itthaṃ sudaṃ āyasmā ekapadumiyo thero imā gāthāyo
abhāsitthāti.
                            Ekapadumiyattherassa apadānaṃ samattaṃ.


             The Pali Tipitaka in Roman Character Volume 32 page 429-430.
http://84000.org/tipitaka/pali/roman_item_s.php?book=32&item=343&items=1
             Classified by [Item Number] :-
http://84000.org/tipitaka/pali/roman_item_s.php?book=32&item=343&items=1&mode=bracket
             Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=343&items=1
             Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=343&items=1
             Study Atthakatha :-
http://84000.org/tipitaka/attha/attha.php?b=32&i=343
             Contents of The Tipitaka Volume 32
http://84000.org/tipitaka/read/?index_32