Aṭṭhattiṃso bodhivandanavaggo
paṭhamaṃ bodhivandakattherāpadānaṃ (371)
[373] |373.1| Pāṭaliṃ jalitaṃ 1- disvā pādapaṃ dharaṇīruhaṃ
ekaṃsaṃ añjaliṃ katvā avandiṃ pāṭaliṃ ahaṃ.
|373.2| Añjaliṃ paggahetvāna garuṃ katvāna mānasaṃ
antosuddhaṃ bahisuddhaṃ suvimuttaṃ anāsavaṃ.
|373.3| Vipassiṃ lokamahitaṃ karuṇāñāṇasāgaraṃ
sammukhā viya sambuddhaṃ avandiṃ pāṭaliṃ ahaṃ.
|373.4| Ekanavute ito kappe yaṃ bodhimabhivandihaṃ
duggatiṃ nābhijānāmi vandanāya idaṃ phalaṃ.
|373.5| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bodhivandako thero imā gāthāyo
abhāsitthāti.
Bodhivandakattherassa apadānaṃ samattaṃ.
@Footnote: 1 Ma. Yu. haritaṃ.
Dutiyaṃ pāṭalipupphiyattherāpadānaṃ (372)
[374] |374.6| Vipassī nāma bhagavā sayambhū aggapuggalo
purakkhato sasissehi bandhumaṃ pāvisī jino.
|374.7| Tīṇi pāṭalipupphāni ucchaṅge ṭhapitāni me
sīsaṃ nhāyitukāmohaṃ 1- nadītīraṃ 2- agacchahaṃ.
|374.8| Nikkhamma bandhumatiyā addasaṃ lokanāyakaṃ
indīvaraṃva jalitaṃ ādittaṃva hutāsanaṃ.
|374.9| Byagghūsabhaṃva pavaraṃ abhijātaṃva kesariṃ
gacchantaṃ samaṇānaggaṃ bhikkhusaṅghapurakkhataṃ.
|374.10| Tasmiṃ pasanno sugate kilesamaladhovane
gahetvā tīṇi pupphāni buddhaseṭṭhaṃ apūjayiṃ.
|374.11| Ekanavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|374.12| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā pāṭalipupphiyo thero imā gāthāyo
abhāsitthāti.
Pāṭalipupphiyattherassa apadānaṃ samattaṃ.
@Footnote: 1 Ma. ... nhāyitukāmo va. 2 Ma. Yu. nadītitthaṃ.
Tatiyaṃ tīṇuppalamāliyattherāpadānaṃ (373)
[375] |375.13| Candabhāgānadītīre ahosiṃ vānaro tadā
addasaṃ virajaṃ buddhaṃ nisinnaṃ pabbatantare.
|375.14| Obhāsentaṃ disā sabbā sālarājaṃva phullitaṃ
lakkhaṇabyañjanūpetaṃ disvā attamano ahaṃ.
|375.15| Udaggacitto sumano pītiyā haṭṭhamānaso
tīṇi uppalapupphāni matthake abhiropayiṃ.
|375.16| Pūjayitvāna pupphāni phussassāpi 1- mahesino
sagāravo bhavitvāna pakkāmiṃ uttarāmukho.
|375.17| Gacchanto paṭikuṭiko vippasannena cetasā
selantare patitvāna pāpuṇiṃ jīvitakkhayaṃ.
|375.18| Tena kammena sukatena cetanāpaṇidhīhi ca
jahitvā purimaṃ jātiṃ tāvatiṃsaṃ agacchahaṃ.
|375.19| Satānaṃ tīṇikkhattuñca devarajjamakārayiṃ
satānaṃ pañcakkhattuṃ ca cakkavatti ahosahaṃ.
|375.20| Dvenavute ito kappe yaṃ pupphamabhipūjayiṃ
duggatiṃ nābhijānāmi buddhapūjāyidaṃ phalaṃ.
|375.21| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. phussassāhaṃ. Yu. phussassātha.
Itthaṃ sudaṃ āyasmā tīṇuppalamāliyo thero imā gāthāyo
abhāsitthāti.
Tīṇuppalamāliyattherassa apadānaṃ samattaṃ.
Catutthaṃ pattipupphiyattherāpadānaṃ (374)
[376] |376.22| Yadā nibbāyi sambuddho mahesī padumuttaro
samāgamma janā sabbe sarīraṃ nīharanti te.
|376.23| Nīharante sarīramhi vijjamānāsu bherisu
pasannacitto sumano pattipupphamabhipūjayiṃ.
|376.24| Satasahasse ito kappe yaṃ pupphamabhipūjayiṃ
duggatiṃ nābhijānāmi sarīre pūjite phalaṃ.
|376.25| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|376.26| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|376.27| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā pattipupphiyo thero imā gāthāyo
abhāsitthāti.
Pattipupphiyattherassa apadānaṃ samattaṃ.
Pañcamaṃ sattapaṇṇiyattherāpadānaṃ (375)
[377] |377.28| Sumano nāma sambuddho uppajji lokanāyako
pasannacitto sumano sattapaṇṇimapūjayiṃ.
|377.29| Satasahasse ito kappe sattapaṇṇimapūjayiṃ
duggatiṃ nābhijānāmi sattapaṇṇipūjāyidaṃ phalaṃ.
|377.30| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|377.31| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|377.32| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sattapaṇṇiyo thero imā gāthāyo
abhāsitthāti.
Sattapaṇṇiyattherassa apadānaṃ samattaṃ.
Chaṭṭhaṃ gandhamuṭṭhiyattherāpadānaṃ (376)
[378] |378.33| Citake kayiramāne nānāgandhe samāgate 1-
pasannacitto sumano gandhamuṭṭhiṃ apūjayiṃ.
@Footnote: 1 Ma. samāhate.
|378.34| Satasahasse ito kappe citakaṃ yaṃ apūjayiṃ
duggatiṃ nābhijānāmi citapūjāyidaṃ phalaṃ.
|378.35| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|378.36| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|378.37| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā gandhamuṭṭhiyo thero imā gāthāyo
abhāsitthāti.
Gandhamuṭṭhiyattherassa apadānaṃ samattaṃ.
Sattamaṃ citakapūjakattherāpadānaṃ (377)
[379] |379.38| Parinibbute bhagavati jalajuttamanāmake
āropitamhi citake sālapupphaṃ apūjayiṃ.
|379.39| Satasahasse ito kappe yaṃ pupphaṃ apūjayiṃ 1-
duggatiṃ nābhijānāmi citapūjāyidaṃ phalaṃ.
|379.40| Svāgataṃ vata me āsi mama buddhassa 2- santike
tisso vijjā anuppattā kataṃ buddhassa sāsanaṃ.
@Footnote: 1 abhipūjayinti yuttataraṃ . 2 Yu. buddhaseṭṭhassa ....
|379.41| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|379.42| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā citakapūjako thero imā gāthāyo
abhāsitthāti.
Citakapūjakattherassa apadānaṃ samattaṃ.
Aṭṭhamaṃ sumanatālavaṇṭiyattherāpadānaṃ (378)
[380] |380.43| Siddhatthassa bhagavato tālavaṇṭaṃ adāsahaṃ
sumenahi paṭicchannaṃ dhārayāmi mahāyasaṃ 1-.
|380.44| Catunavute ito kappe tālavaṇṭaṃ adāsahaṃ
duggatiṃ nābhijānāmi tālavaṇṭassidaṃ phalaṃ.
|380.45| Svāgataṃ vata me āsi mama buddhassa santike
tisso vijjā anuppatā kataṃ buddhassa sāsanaṃ.
|380.46| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|380.47| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. mahārahaṃ.
Itthaṃ sudaṃ āyasmā sumanatālavaṇṭiyo thero imā gāthāyo
abhāsitthāti.
Sumanatālavaṇṭiyattherassa apadānaṃ samattaṃ.
Navamaṃ sumanadāmiyattherāpadānaṃ (379)
[381] |381.48| Siddhatthassa bhagavato nhātakassa tapassino
katvāna sumanadāmaṃ dhārayiṃ purato ṭhito.
|381.49| Catunavute ito kappe yaṃ dāmaṃ abhipūjayiṃ 1-
duggatiṃ nābhijānāmi sumanadāmassidaṃ 2- phalaṃ.
|381.50| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|381.51| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|381.52| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sumanadāmiyo thero imā gāthāyo
abhāsitthāti.
Sumanadāmiyattherassa apadānaṃ samattaṃ.
@Footnote: 1 Ma. .. dhārayiṃ tadā. 2 Ma. Yu. sumanadhāraṇe phalaṃ.
Dasamaṃ kāsumāriphaladāyakattherāpadānaṃ (380)
[382] |382.53| Kaṇikāraṃva jotantaṃ nisinnaṃ pabbatantare
addasaṃ virajaṃ buddhaṃ lokajeṭṭhaṃ narāsabhaṃ.
|382.54| Pasannacitto sumano sire katvāna añjaliṃ
kāsumāriphalaṃ gayha buddhaseṭṭhassadāsahaṃ.
|382.55| Ekattiṃse ito kappe yaṃ phalaṃ adadiṃ tadā 1-
duggatiṃ nābhijānāmi phaladānassidaṃ phalaṃ.
|382.56| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|382.57| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|382.58| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kāsumāriphaladāyako thero imā gāthāyo
abhāsitthāti.
Kāsumāriphaladāyakattherassa apadānaṃ samattaṃ.
Uddānaṃ
bodhipāṭaliuppali patti ca sattapaṇṇiyo
@Footnote: 1 Ma. Yu. ahaṃ.
Gandhamuṭṭhī ca citako tālaṃ sumanadāmako
kāsumāriphalīpica gāthā ekūnasaṭṭhiyo.
Bodhivandanavaggo aṭṭhattiṃso.
----------
The Pali Tipitaka in Roman Character Volume 32 page 453-462.
http://84000.org/tipitaka/pali/roman_item_s.php?book=32&item=373&items=10
Classified by [Item Number] :-
http://84000.org/tipitaka/pali/roman_item_s.php?book=32&item=373&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=373&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=373&items=10
Study Atthakatha :-
http://84000.org/tipitaka/attha/attha.php?b=32&i=373
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
