Tecattāḷīso sakiṃsammajjakavaggo
paṭhamaṃ sakiṃsammajjakattherāpadānaṃ (421)
[11] |11.1| Vipassino bhagavato pāṭaliṃ bodhimuttamaṃ
disvāva taṃ pādapaggaṃ tattha cittaṃ pasādayiṃ.
|11.2| Sammajjaniṃ gahetvāna bodhiṃ sammajji tāvade
sammajjitvāna taṃ bodhiṃ avandiṃ pāṭaliṃ ahaṃ.
|11.3| Tattha cittaṃ pasādetvā sire katvāna añjaliṃ
namassamāno taṃ bodhiṃ gañchiṃ paṭikuṭiṃ ahaṃ.
|11.4| Cārimaggena 1- gacchāmi saranto bodhimuttamaṃ
ajagaro maṃ pīḷeti ghorarūpo mahabbalo.
|11.5| Āsanne me kataṃ kammaṃ phalena tosayī mamaṃ
kalevaraṃ me gilati devaloke ramāmahaṃ.
|11.6| Anāvilaṃ mama cittaṃ visuddhaṃ paṇḍaraṃ sadā
sokasallaṃ na jānāmi cittasantāpanaṃ mama.
|11.7| Kuṭṭhaṃ gaṇḍo kilāso ca apamāro vitacchikā
daddu kaṇḍu ca me natthi phalaṃ sammajjanāyidaṃ.
|11.8| Soko ca pariḷāho ca hadaye me na vijjati
abhantaṃ 2- ujukaṃ cittaṃ phalaṃ sammajjanāyidaṃ.
@Footnote: 1 Ma. tādimaggena. Yu. cārimamaggena. 2 Yu. asattaṃ.
|11.9| Samādhiṃ 1- puna pajjāmi visuddhaṃ 2- hoti mānasaṃ
yaṃ yaṃ samādhiṃ icchāmi so so sampajjate mama.
|11.10| Rajanīye na rajjāmi atho dosaniyesu ca
mohanīye na muyhāmi phalaṃ sammajjanāyidaṃ.
|11.11| Ekanavute ito kappe yaṃ kammamakariṃ tadā
duggatiṃ nābhijānāmi phalaṃ sammajjanāyidaṃ.
|11.12| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|11.13| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|11.14| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sakiṃsammajjako thero imā gāthāyo abhāsitthāti.
Sakiṃsammajjakattherassa apadānaṃ samattaṃ.
Dutiyaṃ ekadussadāyakattherāpadānaṃ (422)
[12] |12.15| Nagare haṃsavatiyā ahosiṃ tiṇahārako
tiṇahārena jīvāmi tena posemi dārake.
|12.16| Padumuttaro nāma jino sabbadhammāna pāragū
tamandhakāraṃ nāsetvā uppajji lokanāyako.
@Footnote: 1 Ma. samādhīsu na majjāmi. Yu. na sajjāmi. 2 Ma. visadaṃ.
|12.17| Sake ghare nisīditvā evaṃ cintesi tāvade
buddho loke samuppanno deyyadhammo na vijjati.
|12.18| Idaṃ me sāṭakaṃ ekaṃ natthi me koci dāyako
dukkho nirayasamphasso ropayissāmi dakkhiṇaṃ.
|12.19| Evāhaṃ cintayitvāna sakaṃ cittaṃ pasādayiṃ
ekaṃ dussaṃ gahetvāna buddhaseṭṭhassadāsahaṃ.
|12.20| Ekaṃ dussaṃ daditvāna ukkuṭṭhiṃ sampavattayiṃ
yadi buddho tuvaṃ vīra tārehi maṃ mahāmuni.
|12.21| Padumuttaro lokavidū āhutīnaṃ paṭiggaho
mamaṃ dānaṃ pakittento akā me anumodanaṃ.
|12.22| Iminā ekadussena cetanāpaṇidhīhi ca
kappasatasahassāni vinipātaṃ na gacchati.
|12.23| Chattiṃsakkhattuṃ devindo devarajjaṃ karissati
tettiṃsakkhattuṃ rājā ca cakkavatti bhavissati.
|12.24| Padesarajjaṃ vipulaṃ gaṇanāto asaṅkhayaṃ
devaloke manusase vā saṃsaranto tuvaṃ bhave.
|12.25| Rūpavā guṇasampanno anuvattantadehavā
akkhobhaṃ amitaṃ dussaṃ labhissati yathicchakaṃ.
|12.26| Idaṃ vatvāna sambuddho jalajuttamanāmako 1-
nabhaṃ abbhuggami dhīro haṃsarājāva ambare.
@Footnote: 1 Yu. jalajuttamanāyako.
|12.27| Yaṃ yaṃ yonūpapajjāmi devattaṃ atha mānusaṃ
bhoge me ūnatā natthi ekadussassidaṃ phalaṃ.
|12.28| Paduddhāre paduddhāre dussaṃ nibbattate mama
heṭṭhā dussamhi tiṭṭhāhi uparicchadanaṃ mama.
|12.29| Cakkavāḷaṃ upādāya sakānanaṃ sapabbataṃ
icchamāno ahaṃ ajja dussenacchādayeyya taṃ.
|12.30| Teneva ekadussena saṃsaranto bhavābhave
suvaṇṇavaṇṇo hutvāna saṃsarāmi bhavābhave.
|12.31| Vipākaṃ ekadussassa ajjhagaṃ 1- tattha bhikkhutaṃ
ayaṃpi 2- pacchimā jāti vipaccati idhāpi me.
|12.32| Satasahasse ito kappe yaṃ dussamadadiṃ tadā
duggatiṃ nābhijānāmi ekadussassidaṃ phalaṃ.
|12.33| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|12.34| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|12.35| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekadussadāyako thero imā gāthāyo abhāsitthāti.
Ekadussadāyakattherassa apadānaṃ samattaṃ.
@Footnote: 1 Ma. Yu. nājjhagaṃ kattha cikkhayaṃ. 2 Ma. ayaṃ me antimā jāti.
Tatiyaṃ ekāsanadāyakattherāpadānaṃ (423)
[13] |13.36| Himavantassa avidūre kasiko 1- nāma pabbato
assamo sukato mayhaṃ paṇṇasālā sumāpitā.
|13.37| Nārado nāma nāmena kassapo iti maṃ vidū
suddhimaggaṃ gavesanto vasāmi kasike tadā.
|13.38| Padumuttaro nāma jino sabbadhammāna pāragū
vivekakāmo sambuddho āgañchi anilañjasā.
|13.39| Vanagge gacchamānassa disvā raṃsiṃ mahesino
kaṭṭhamañcaṃ paññāpetvā ajinañca apatthariṃ.
|13.40| Āsanaṃ paññāpetvāna sīse katvāna añjaliṃ
somanassaṃ pavedetvā idaṃ vacanamabraviṃ.
|13.41| Sallakatto tuvaṃ dhīra āturānaṃ tikicchako
mama rāgaparetassa 2- tikicchaṃ dehi nāyaka.
|13.42| Puññatthikā 3- ye passanti buddhaseṭṭhaṃ tuvaṃ muni
dhuvatthasiddhiṃ papponti etesaṃ ajaro bhave.
|13.43| Na me deyyaṃ 4- tava atthi pavattaphalabhojahaṃ
idaṃ me āsanaṃ atthi nisīda kaṭṭhamañcake.
|13.44| Nisīdi tattha bhagavā achambhitova kesarī
muhuttaṃ vītināmetvā idaṃ vacanamabravi.
@Footnote: 1 Ma. gosito. Yu. kosiko. 2 Ma. Yu. rogaparetassa. 3 Ma. Yu.
@kallatthikā. 4 Ma. deyyadhammo atthi.
|13.45| Vissaṭṭho hohi mā bhāyi laddho jotiraso tayā
yaṃ tuyhaṃ patthitaṃ sabbaṃ paripūressatāsanaṃ 1-.
|13.46| Na 2- thokaṃ sukataṃ puññaṃ puññakkhette anuttare
sakkā uddharituṃ attā yassa cittaṃ sunīhitaṃ 3-.
|13.47| Iminā āsanadānena cetanāpaṇidhīhi ca
kappasatasahassāni vinipātaṃ na gacchati.
|13.48| Paññāsakkhattuṃ devindo devarajjaṃ karissati
asītikkhattuṃ rājā ca cakkavatti bhavissati.
|13.49| Padesarajjaṃ vipulaṃ gaṇanāto asaṅkhayaṃ
sabbattha sukhito hutvā saṃsāre saṃsarissati.
|13.50| Idaṃ vatvāna sambuddho jalajuttamanāmako
nabhaṃ abbhuggami dhīro haṃsarājāva ambare.
|13.51| Hatthiyānaṃ assayānaṃ sarathaṃ sandamānikaṃ
labhāmi sabbamevetaṃ ekāsanassidaṃ phalaṃ.
|13.52| Kānanaṃ pavisitvāna yadā icchāmi āsanaṃ
mama saṅkappamaññāya pallaṅko upatiṭṭhati.
|13.53| Vārimajjhagato santo yadā icchāmi āsanaṃ
mama saṅkappamaññāya pallaṅko upatiṭṭhati.
|13.54| Yaṃ yaṃ yonūpapajjāmi devattaṃ atha mānusaṃ
pallaṅkasatasahassāni parivārenti maṃ sadā.
@Footnote: 1 Ma. Yu. paripūrissatināgate. 2 Ma. na moghaṃ taṃ kataṃ tuyhaṃ. Yu. na thokaṃ taṃ
@kataṃ tuyhaṃ. 3 Ma. Yu. paṇīhitaṃ.
|13.55| Duve bhave saṃsarāmi devatte atha mānuse
duve kule ca jāyāmi khattiye cāpi brāhmaṇe.
|13.56| Ekāsanaṃ daditvāna puññakkhette anuttare
dhammapallaṅkamaññāya 1- viharāmi anāsavo.
|13.57| Satasahasse ito kappe yaṃ dānamadadiṃ tadā
duggatiṃ nābhijānāmi ekāsanassidaṃ phalaṃ.
|13.58| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|13.59| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|13.60| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekāsanadāyako thero imā gāthāyo abhāsitthāti.
Ekāsanadāyakattherassa apadānaṃ samattaṃ.
Catutthaṃ sattakadambapupphiyattherāpadānaṃ (424)
[14] |14.61| Himavantassa avidūre kadambo 2- nāma pabbato
tasmiṃ pabbatapassamhi 3- satta buddhā vasiṃsu te.
|14.62| Kadambapupphaṃ 4- disvāna paggahetvāna añjaliṃ
satta mālāni gahetvā puṇṇacittena 5- okiriṃ.
@Footnote: 1 Ma. Yu. ...mādāya. 2 Ma. kukkuṭo .... 3 Ma. ...pādamhi.
@4 Ma. Yu. kadambaṃ pupphitaṃ .... 5 Ma. Yu. puññacittena.
|14.63| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|14.64| Catunavute ito kappe yaṃ kammamakariṃ tadā
duggatiṃ nābhijānāmi buddhapūjāyidaṃ phalaṃ.
|14.65| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|14.66| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|14.67| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sattakadambapupphiyo thero imā gāthāyo abhāsitthāti.
Sattakadambapupphiyattherassa apadānaṃ samattaṃ.
Pañcamaṃ koraṇḍapupphiyattherāpadānaṃ (425)
[15] |15.68| Vanakammiko pure āsiṃ pitupetāmahenahaṃ 1-
pasumārena 2- jīvāmi kusalaṃ me na vijjati.
|15.69| Mama āsayasāmantā tisso lokagganāyako
padāni tīṇi dassesi anukampāya cakkhumā.
|15.70| Akkante ca pade disvā tissanāmassa satthuno
haṭṭho haṭṭhena cittena pade cittaṃ pasādayiṃ.
@Footnote: 1 pitumātumatenahaṃ. 2 Yu. pararuhirena.
|15.71| Koraṇḍaṃ pupphitaṃ disvā pādapaṃ dharaṇīruhaṃ
sakoṭikaṃ 1- gahetvāna padaseṭṭhaṃ apūjayiṃ.
|15.72| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|15.73| Yaṃ yaṃ yonūpapajjāmi devattaṃ atha mānusaṃ
koraṇḍavaṇṇakoyeva sappabhāso 2- bhavāmahaṃ.
|15.74| Dvenavute ito kappe yaṃ kammamakariṃ tadā
duggatiṃ nābhijānāmi padapūjāyidaṃ phalaṃ.
|15.75| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|15.76| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|15.77| Paṭisambhidā catasso vimokkhāpica aṭṭhime
chaḷabhiññā sacchakatā kataṃ buddhassa sāsananti.
Itthaṃ sudaṃ āyasmā koraṇḍapupphiyo thero imā gāthāyo abhāsitthāti.
Koraṇḍapupphiyattherassa apadānaṃ samattaṃ.
Chaṭṭhaṃ ghaṭamaṇḍadāyakattherāpadānaṃ (426)
[16] |16.78| Sucintitaṃ bhagavantaṃ lokajeṭṭhaṃ narāsabhaṃ
upaviṭṭhaṃ mahāraññaṃ vātābādhena pīḷitaṃ.
@Footnote: 1 Ma. sakosakaṃ. Yu. sakoṭakaṃ. 2 Ma. suppabhāso.
|16.79| Disvā cittaṃ pasādetvāna ghaṭamaṇḍaṃ upānayiṃ
katattā apacitattā 1- ca gaṅgā bhāgīrasī 2- ayaṃ.
|16.80| Mahāsamuddā cattāro ghaṭaṃ sampajjare mama
ayañca paṭhavī ghorā appamāṇā asaṅkhayā.
|16.81| Mama saṅkappamaññāya bhavate madhusakkharā
catuddisā 3- ime rukkhā pādapā dharaṇīruhā.
|16.82| Mama saṅkappamaññāya kapparukkhā bhavanti te
paññāsakkhattuṃ devindo devarajjamakārayiṃ.
|16.83| Ekapaññāsakkhattuñca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|16.84| Catunavute ito kappe yaṃ dānamadadiṃ tadā
duggatiṃ nābhijānāmi ghaṭamaṇḍassidaṃ phalaṃ.
|16.85| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|16.86| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|16.87| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ghaṭamaṇḍadāyako thero imā gāthāyo abhāsitthāti.
Ghaṭamaṇḍadāyakattherassa apadānaṃ samattaṃ.
@Footnote: 1 Ma. Yu. ācitattā ca. 2 Ma. bhāgīrathī. 3 Ma. Yu. cātuddīpā.
Sattamaṃ ekadhammasavaniyattherāpadānaṃ (427)
[17] |17.88| Padumuttaro nāma jino sabbadhammāna pāragū
catusaccaṃ pakāsento santāresi bahuṃ janaṃ.
|17.89| Ahaṃ tena samayena jaṭilo uggatāpano
dhunanto vākacīrāni gacchāmi ambare tadā.
|17.90| Buddhaseṭṭhassa upari gantuṃ na visahāmahaṃ
pakkhīva selamāsajja gamanaṃ na labhāmahaṃ.
|17.91| Udake dhopayitvāna 1- evaṃ gacchāmi ambare
na me idaṃ bhūtapubbaṃ iriyāpathavikopanaṃ.
|17.92| Handa me taṃ gavesissaṃ appevatthaṃ labheyyahaṃ
orohanto antalikkhā saddamassosi satthuno.
|17.93| Sarena rajanīyena savanīyena vattunā 2-
aniccataṃ kathentassa taññeva uggahiṃ tadā.
Aniccasaññamuggayha agamāsiṃ mamassamaṃ
|17.94| yāvatāyuṃ vasitvāna tattha kālaṃ kato ahaṃ.
Carime vattamānamhi saddhammassavanaṃ sariṃ
|17.95| tena kammena sukatena cetanāpaṇidhīhi ca.
Jahitvā mānusaṃ dehaṃ tāvatiṃsaṃ agañchahaṃ
|17.96| tiṃsakappasahassāni devaloke ramiṃ ahaṃ.
@Footnote: 1 Ma. vokkamitvāna. Yu. vomisitvāna. 2 Ma. Yu. vaggunā.
Ekapaññāsakkhattuñca devarajjamakārayiṃ
|17.97| ekatiṃsatikkhattuñca 1- cakkavatti ahosahaṃ.
Padesarajjaṃ vipulaṃ gaṇanāto asaṅkhayaṃ
|17.98| anubhomi sakaṃ puññaṃ sukhitohaṃ bhavābhave.
Anussarāmi taṃ saññaṃ saṃsaranto bhavābhave
na kenacihaṃ 2- vijjhāmi nibbānaṃ accutaṃ padaṃ.
|17.99| Pitu gehe nisīditvā samaṇo bhāvitindriyo
kathaṃ so paridīpento aniccaṃ 3- tatthudāhari.
|17.100| Aniccā vata saṅkhārā uppādavayadhammino
uppajjitvā nirujjhanti tesaṃ vūpasamo sukho.
|17.101| Saha gāthaṃ suṇitvāna sabbasaññaṃ 4- anussariṃ
ekāsane nisīditvā arahattamapāpuṇiṃ.
|17.102| Jātiyā sattavassena arahattaṃ apāpuṇiṃ
upasampādayi buddho dhammassavanassidaṃ phalaṃ.
|17.103| Satasahasse ito kappe yaṃ dhammaṃ asuṇiṃ tadā
duggatiṃ nābhijānāmi dhammassavanassidaṃ phalaṃ.
|17.104| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|17.105| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. Yu. ekavīsatikkhattuñca. 2 Ma. Yu. na koṭiṃ paṭivijjhāmi 3 Ma. anicacatamudāhari.
@Yu. aniccaṃ vatthudāhariṃ. 4 Po. Ma. Yu. pubbasaññamanussariṃ.
|17.106| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Atthaṃ sudaṃ āyasmā ekadhammasavaniyo thero imā gāthāyo abhāsitthāti.
Ekadhammasavaniyattherassa apadānaṃ samattaṃ.
Aṭṭhamaṃ sucintitattherāpadānaṃ (428)
[18] |18.107| Nagare haṃsavatiyā ahosiṃ kasako tadā
kasikammena jīvāmi tena posemi dārake.
|18.108| Susampannaṃ tadā khettaṃ dhaññaṃ me phalinaṃ ahu
pākakāleva sampatte evaṃ cintesahaṃ tadā.
|18.109| Na 1- mecchannaṃ na paṭirūpaṃ jānantassa guṇāguṇaṃ
yohaṃ saṅghe adatvāna aggaṃ bhuñjeyyamattanā 2-.
|18.110| Sambuddho asamo loke dvattiṃsavaralakkhaṇo
tato ca bhāvito saṅgho puññakkhettaṃ 3- anuttaraṃ.
|18.111| Tattha dassāmihaṃ dānaṃ navasassaṃ pure pure
evāhaṃ cintayitvāna haṭṭho pītikamānaso 4-.
|18.112| Khettato dhaññamāharitvā sambuddhaṃ upasaṅkamiṃ
upasaṅkamma sambuddhaṃ lokajeṭṭhaṃ narāsabhaṃ.
Vanditvā satthuno pāde idaṃ vacanamabraviṃ
|18.113| navasassañca sampannaṃ idha hosi ca tvaṃ 5- mune.
@Footnote: 1 Ma. Yu. nacchannaṃ . 2 Ma. bhuñjeyya ce tadā. Yu. bhuñjeyya maṃ tadā.
@3 Ma. Yu. puññakkhetato anuttaro. 4 Ma. Yu. piṇitamānaso. 5 Ma. āyāgosi
@gosi ca tuvaṃ mune. Yu. āyāyopi ....
Anukampaṃ upādāya adhivāsehi cakkhuma
|18.114| padumuttaro lokavidū āhutīnaṃ paṭiggaho.
Mama saṅkappamaññāya idaṃ vacanamabravi
|18.115| cattāro ca paṭipannā cattāro ca phale ṭhitā.
Esa saṅgho ujubhūto paññāsīlasamāhito
yajantānaṃ manussānaṃ puññapekkhāna pāṇinaṃ.
|18.116| Karotaṃ upacikaṃ 1- puññaṃ saṅghe dinnaṃ mahapphalaṃ
tasmiṃ saṅghe ca dātabbaṃ tava sassaṃ tathetaraṃ.
|18.117| Saṅghato uddisitvāna bhikkhū netvā sakaṃ gharaṃ
paṭiyattaṃ ghare santaṃ bhikkhusaṅghassa dehi tvaṃ.
|18.118| Saṅghato uddisitvāna bhikkhū netvānahaṃ gharaṃ
yaṃ ghare paṭiyattaṃ me bhikkhusaṅghassadāsahaṃ
|18.119| tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|18.120| Tattha me sukataṃ byamhaṃ sovaṇṇaṃ supabhassaraṃ
saṭṭhiyojanamubbedhaṃ tiṃsayojanavitthataṃ.
Ekūnavīsatimaṃ bhāṇavāraṃ.
|18.121| Ākiṇṇaṃ bhavanaṃ mayhaṃ nārīgaṇasamākulaṃ
tattha bhutvā pivitvā ca vasāmi tidase ahaṃ.
@Footnote: 1 Ma. karoto padhikaṃ. Yu. karontaṃ opadhikaṃ.
|18.122| Satānaṃ tiṃsakkhattuṃ 1- ca devarajjamakārayiṃ
satānaṃ pañcakkhattuñca devarajjamakārayiṃ.
|18.123| Satānaṃ pañcakkhattuñca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|18.124| Bhavābhave saṃsaranto labhāmi amitaṃ dhanaṃ
bhoge me ūnatā natthi navasassassidaṃ phalaṃ.
|18.125| Hatthiyānaṃ assayānaṃ sivikaṃ sandamānikaṃ
labhāmi sabbamevetaṃ navasassassidaṃ phalaṃ.
|18.126| Navavatthaṃ navaphalaṃ navaggarasabhojanaṃ
labhāmi sabbamevetaṃ navasassassidaṃ phalaṃ.
|18.127| Koseyyaṃ kambaliyāni khomakappāsikāni ca
labhāmi sabbamevetaṃ navasassassidaṃ phalaṃ.
|18.128| Dāsīgaṇaṃ dāsagaṇaṃ nāriyo samalaṅkatā
labhāmi sabbamevetaṃ navasassassidaṃ phalaṃ.
|18.129| Na maṃ sītaṃ va uṇhaṃ vā pariḷāho na vijjati
atho cetasikaṃ dukkhaṃ hadaye me na vijjati.
|18.130| Imaṃ khāda imaṃ bhuñja imamhi sayane saya
labhāmi sabbamevetaṃ navasassassidaṃ phalaṃ.
|18.131| Ayaṃ pacchimako dāni carimo vattate bhavo
ajjāpi deyyadhammo 2- me mamaṃ 3- toseti sabbadā.
@Footnote: 1 Ma. Yu. tīṇikkhattuñca. 2 Yu. deyyadhamme. 3 Ma. Yu. phalaṃ.
|18.132| Navasassaṃ daditvāna saṅghe gaṇavaruttame
aṭṭhānisaṃse anubhomi kammānucchavike mama.
|18.133| Vaṇṇavā yasavā homi mahābhogo anītiko
mahābhakkho 1- sadā homi abhejjapariso sadā.
|18.134| Sabbe maṃ apacāyanti yekeci paṭhavissitā
deyyadhammo ca yokoci pure pure labhāmihaṃ.
|18.135| Bhikkhusaṅghassa vā majjhe buddhaseṭṭhassa sammukhā
sabbepi samatikkamma denti mameva dāyakā.
|18.136| Paṭhamaṃ navasassañhi datvā saṅghe gaṇuttame
imānisaṃse anubhomi navasassassidaṃ phalaṃ.
|18.137| Satasahasse ito kappe yaṃ dānamadadiṃ tadā
duggatiṃ nābhijānāmi navasassassidaṃ phalaṃ.
|18.138| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|18.139| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|18.140| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sucintito thero imā gāthāyo abhāsitthāti.
Sucintitattherassa apadānaṃ samattaṃ.
@Footnote: 1 Ma. Yu. mahāpakkho.
Navamaṃ soṇṇakiṃkaṇiyattherāpadānaṃ 1- (429)
[19] |19.141| Saddhāya abhinikkhamma pabbajiṃ anagāriyaṃ
vākacīradharo āsiṃ tapokammamapassito.
|19.142| Atthadassī tu bhagavā lokajeṭṭho narāsabho
uppajji tamhi samaye tārayanto mahājanaṃ.
|19.143| Balañca vata me khīṇaṃ byādhinā paramenahaṃ 2-
buddhaseṭṭhaṃ saritvāna puḷine thūpamuttamaṃ.
|19.144| Karitvā haṭṭhacittohaṃ sahasena 3- samokiriṃ
soṇṇakiṃkaṇipupphāni udaggamanaso ahaṃ.
|19.145| Sammukhā viya sambuddhaṃ thūpaṃ paricariṃ ahaṃ
tena cetopasādena atthadassissa tādino.
|19.146| Devalokaṃ gato santo labhāmi vipulaṃ sukhaṃ
suvaṇṇavaṇṇo tatthāsi buddhapūjāyidaṃ phalaṃ.
|19.147| Asītikoṭiyo mayhaṃ nāriyo samalaṅkatā
sadā mayhaṃ upaṭṭhanti buddhapūjāyidaṃ phalaṃ.
|19.148| Saṭṭhī turiyasahassāni bheriyo paṇavāpica
saṅkhā ca deṇḍimā tattha vaggū vajjanti dundubhi.
|19.149| Cullāsītisahassāni hatthiyo samalaṅkatā
tidhappabhinnā mātaṅgā kuñjarā saṭṭhihāyanā.
@Footnote: 1 Ma. Yu. sovaṇṇa.... 2 Ma. paramena taṃ. 3 Ma. sahatthena.
|19.150| Hemajālābhisañchannā upaṭṭhānaṃ karonti me
balakāye bhave 1- ceva ūnatā me na vijjati.
|19.151| Soṇṇakiṃkaṇipupphānaṃ vipākaṃ anubhomihaṃ
aṭṭhapaññāsakkhattuṃ ca devarajjamakārayiṃ.
|19.152| Ekasattatikkhattuñca cakkavatti ahosahaṃ
paṭhabyā rajjaṃ ekasataṃ mahiyā kārayiṃ ahaṃ.
|19.153| So dāni patto amataṃ gambhīraṃ 2- duddasaṃ padaṃ
saṃyojanā parikkhīṇā natthi dāni punabbhavo.
|19.154| Aṭṭhārase kappasate yaṃ pupphamabhiropayiṃ
duggatiṃ nābhijānāmi buddhapūjāyidaṃ phalaṃ.
|19.155| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|19.156| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|19.157| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā soṇṇakiṃkaṇiyo thero imā gāthāyo abhāsitthāti.
Soṇṇakiṃkaṇiyattherassa apadānaṃ samattaṃ.
@Footnote: 1 Ma. Yu. gaje. 2 Ma. Yu. asaṅkhataṃ sududdasaṃ.
Dasamaṃ sovaṇṇakontarikattherāpadānaṃ 1- (430)
[20] |20.158| Manobhāvaniyaṃ buddhaṃ attadantaṃ samāhitaṃ
iriyamānaṃ brahmapathe cittavūpasame rataṃ.
|20.159| Nitiṇṇaogha sambuddhaṃ jhāyiṃ jhānarataṃ muniṃ
upaviṭṭhaṃ 2- samāpattiṃ indriyasaṃvarappahaṃ 3-.
|20.160| Alāvunodakaṃ gayha buddhaseṭṭhaṃ upāgamiṃ
buddhapāde dhovitvāna alāvukamadāsahaṃ.
|20.161| Āṇāpesi ca sambuddho padumuttaranāmako
imimodakamāhatvā pādamūle ṭhapehi me.
|20.162| Sādhūtihaṃ paṭissutvā satthu gāravatāyava 4-
udakaṃ lāvunāhatvā buddhaseṭṭhaṃ upānayiṃ 5-.
|20.163| Anumodi mahāvīro cittaṃ nibbāpayaṃ mama
iminā lāvudānena saṅkappo te samijjhatu.
|20.164| Paṇṇarase ito kappe devaloke ramiṃ ahaṃ
tettiṃsakkhattuṃ rājā ca cakkavatti ahosahaṃ.
|20.165| Divā vā yadivā rattiṃ caṅkamantassa tiṭṭhato
sovaṇṇaṃ kontaraṃ gayha tiṭṭhanti 6- purato mama.
|20.166| Buddhassa datvāna lāvuṃ labhāmi soṇṇakontaraṃ
appakaṃpi karaṃ kāraṃ vipulaṃ hoti tādisu 7-
@Footnote: 1 Ma. soṇṇakontarikat.... Yu. suvaṇṇakattarikat.... 2 Ma. upatitthaṃ
@samāpannaṃ. 3 Ma. Yu. indivaradalappabhaṃ. 4 Ma. Yu. ... ca. 5 Ma. upāgamiṃ.
@6 Ma. tiṭṭhate. Yu. tiṭṭhati. 7 Yu. tādisaṃ.
|20.167| Satasahasse ito kappe yaṃ lāvumadadiṃ tadā
duggatiṃ nābhijānāmi alāvussa idaṃ phalaṃ.
|20.168| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|20.169| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|20.170| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sovaṇṇakontariko thero imā gāthāyo abhāsitthāti.
Sovaṇṇakontarikattherassa apadānaṃ samattaṃ.
Uddānaṃ
sakiṃsammajjako thero ekadussāsanappadā
kadamba koraṇḍakadā ghaṭasavanikopica
sucintito kiṃkaṇiko soṇṇakontarikopica
ekagāthāsatañcettha ekasattatimeva ca.
Sakiṃsammajjakavaggo tecattāḷīso.
-----------------------
The Pali Tipitaka in Roman Character Volume 33 page 24-43.
http://84000.org/tipitaka/pali/roman_item_s.php?book=33&item=11&items=10
Classified by [Item Number] :-
http://84000.org/tipitaka/pali/roman_item_s.php?book=33&item=11&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=11&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=11&items=10
Study Atthakatha :-
http://84000.org/tipitaka/attha/attha.php?b=33&i=11
The Pali Atthakatha in Thai :-
http://84000.org/tipitaka/atthapali/read_th.php?B=50&A=5493
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5493
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
