Sattamaṃ abhayattherāpadānaṃ (547)
[137] |137.195| Padumuttaro nāma jino sabbadhammesu pāragū 1-
ito satasahassamhi kappe uppajji nāyako.
|137.196| Saraṇāgamane keci 2- nivesesi tathāgato
keci 3- sīle nivesesi dasakammapathuttame.
|137.197| Deti kassaci so dhīro sāmaññaphalamuttamaṃ
samāpattī tathā aṭṭha tisso vijjā pavecchati.
|137.198| Chaḷabhiññāsu yojeti kañci sattaṃ naruttamo
deti kassaci so nātho catasso paṭisambhidā.
|137.199| Bodhaneyyaṃ pajaṃ disvā asaṅkheyyepi yojane
khaṇena upagantvāna vineti narasārathi.
|137.200| Tadāhaṃ haṃsavatiyaṃ ahosiṃ brāhmaṇatrajo
pāragū sabbavedānaṃ veyyākaraṇasammato.
|137.201| Niruttiyā ca kusalo nighaṇḍe 4- ca visārado
padako keṭubhavidū chandovicittakovido 5-.
|137.202| Jaṅghavihāraṃ vicaraṃ haṃsārāmaṃ upeccahaṃ
addasaṃ pavaraṃ 6- seṭṭhaṃ mahājanapurakkhataṃ.
|137.203| Desentaṃ virajaṃ dhammaṃ paccanikamatī ahaṃ
upetvā tassa vākyāni 7- sutvāna vimalānahaṃ.
@Footnote: 1 Ma. Yu. cakkhumā. 2-3 Ma. kiñci. Yu. kañci. 4 Ma. nighaṇṭumhi. Yu.
@nighaṇṭe. 5 Ma. Yu. ...vicitikovido. 6 Ma. varadaṃ. Yu. vadataṃ. 7 Ma. kalyāṇaṃ.
|137.204| Byāhataṃ punaruttaṃ vā apatthaṃ vā niratthakaṃ
nāddasaṃ tassa munino tato pabbajito ahaṃ.
|137.205| Na cireneva kālena sabbatthāpi visārado 1-
nipuṇe buddhavacane ahosiṃ gaṇisammato 2-.
|137.206| Tadā catasso gāthāyo ganthayitvā subyañjanā
santhavitvā tilokaggaṃ desayissaṃ dine dine.
|137.207| Virattosi mahāvīro saṃsāre sabhaye vasaṃ
karuṇāya na nibbāyi tato kāruṇiko muni.
|137.208| Puthujjanova yo satto 3- na kilesavaso ahu
sampajāno satiyutto tasmā eso acintiyo.
|137.209| Dubbalāni kilesāni yassāsayagatāni me
ñāṇaggiparidaḍḍhāni na khīyiṃsu tadabbhutaṃ.
|137.210| Yo sabbalokassa garu loke 4- yassa tathā garu
tathāpi lokācariyo loko tassānuvattako.
|137.211| Evamādīhi sambuddhaṃ kittayiṃ 5- dhammadesanaṃ
yāvajīvaṃ karitvāna gato saggaṃ tato cuto.
|137.212| Satasahasse ito kappe yaṃ buddhamabhikittayiṃ
duggatiṃ nābhijānāmi kittanāya idaṃ phalaṃ.
|137.213| Devaloke mahārajjaṃ dibbānubhosahantadā 6-
cakkavattimahārajjaṃ bahusonubhaviṃ ahaṃ.
@Footnote: 1 Ma. sabbasattavisārado. Yu. sabbasatthavisārado. 2 Ma. guṇisammato.
@3 Ma. santo. 4 Ma. Yu. loko. 5 Ma. Yu. kittayaṃ. 6 Ma. pādesiṃ
@kañcanaggiyaṃ. Yu. rajjapādesi kañcayaṃ.
|137.214| Duve bhave pajāyāmi devatte atha mānuse
aññaṃ gatiṃ na jānāmi kittanāya idaṃ phalaṃ.
|137.215| Duve kule pajāyāmi khattiye atha brāhmaṇe
nīce kule na jānāmi kittanāya idaṃ phalaṃ.
|137.216| Pacchime ca bhave dāni giribbajapuruttame
raññohaṃ bimbisārassa putto nāmena cābhayo.
|137.217| Pāpamittavasaṃ gantvā nigaṇṭhena samohito 1-
pesito nāṭaputtena buddhaseṭṭhaṃ upeccahaṃ.
|137.218| Pucchitvā nipuṇaṃ pañhaṃ sutvā byākaraṇuttamaṃ
pabbajitvāna na ciraṃ arahattaṃ apāpuṇiṃ.
|137.219| Kittayitvā jinavaraṃ kittito homi sabbadā
sugandhadehavadano āsiṃ sukhasamappito.
|137.220| Tikkhahāsalahuppañño mahāpañño tathevahaṃ
vicittapaṭibhāṇo ca tassa kammassa vāhasā.
|137.221| Abhitthavitvā padumuttarāhaṃ
pasannacitto asamaṃ sayambhuṃ
nāgacchi kappāni apāyabhūmiṃ
sataṃsahassāni phalena tassa.
|137.222| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
@Footnote: 1 Ma. Yu. vimohito.
|137.223| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|137.224| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā abhayo thero imā gāthāyo abhāsitthāti.
Abhayattherassa apadānaṃ samattaṃ.
The Pali Tipitaka in Roman Character Volume 33 page 240-243.
http://84000.org/tipitaka/pali/roman_item_s.php?book=33&item=137&items=1
Classified by [Item Number] :-
http://84000.org/tipitaka/pali/roman_item_s.php?book=33&item=137&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=137&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=137&items=1
Study Atthakatha :-
http://84000.org/tipitaka/attha/attha.php?b=33&i=137
The Pali Atthakatha in Thai :-
http://84000.org/tipitaka/atthapali/read_th.php?B=50&A=7056
The Pali Atthakatha in Roman :-
http://84000.org/tipitaka/atthapali/read_rm.php?B=50&A=7056
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
