Dutiyo ekuposathavaggo
paṭhamaṃ ekuposathikātheriyāpadānaṃ (11)
[151] |151.1| Nagare bandhumatiyā bandhumā nāma khattiyo
divase puṇṇamāya so upavasi 1- uposathaṃ.
|151.2| Ahaṃ tena samayena kumbhadāsī ahu 2- tahiṃ
disvā sarājikaṃ senaṃ evāhaṃ cintayiṃ tadā.
|151.3| Rājāpi rajjaṃ chaḍḍetvā upavasi 1- uposathaṃ
saphalaṃ nūna taṃ kammaṃ janakāyo pamodito.
|151.4| Yoniso paccavekkhitvā duggatiñca 3- daliddataṃ
mānasaṃ sampahaṃsitvā upavasiṃ 4- uposathaṃ.
|151.5| Ahaṃ uposathaṃ katvā sammāsambuddhasāsane
tena kammena sukatena tāvatiṃsaṃ agañchahaṃ.
|151.6| Tattha me sukataṃ byamhaṃ uddhaṃ 5- yojanamuggataṃ
kūṭāgāravarūpetaṃ mahāsanaṃ subhūsitaṃ.
|151.7| Accharā satasahassā upatiṭṭhanti maṃ sadā
aññādeva 6- atikkamma atirocāmi sabbadā.
|151.8| Catusaṭṭhidevarājūnaṃ mahesittamakārayiṃ
tesaṭṭhicakkavattīnaṃ mahesittamakārayiṃ.
@Footnote: 1 Yu. upapajji. 2 Ma. Yu. ahaṃ. 3 Ma. Yu. daggaccañca. 4 Yu. upapajjiṃ.
@5 Ma. ubbha.... Yu. ubbhaṃ.... 6 Ma. Yu. aññedeva.
|151.9| Suvaṇṇavaṇṇā hutvāna bhavesu saṃsarāmahaṃ
sabbattha pavarā homi uposathassidaṃ phalaṃ.
|151.10| Hatthiyānaṃ assayānaṃ rathayānañca kevalaṃ 1-
labhāmi sabbametampi 2- uposathassidaṃ phalaṃ.
|151.11| Sovaṇṇamayaṃ rūpimayaṃ athopi phalikāmayaṃ
lohitaṅkamayañceva sabbaṃ paṭilabhāmahaṃ.
|151.12| Koseyyakambalakāni 3- khomakappāsikāni ca
mahagghāni ca vatthāni sabbaṃ paṭilabhāmahaṃ.
|151.13| Annapānaṃ khādanīyaṃ vatthasenāsanāni ca
sabbametaṃ paṭilabhe uposathassidaṃ phalaṃ.
|151.14| Varagandhañca mālañca cuṇṇakañca vilepanaṃ
sabbametaṃ paṭilabhe uposathassidaṃ phalaṃ.
|151.15| Kūṭāgārañca pāsādaṃ maṇḍapaṃ hammiyaṃ guhaṃ
sabbametaṃ paṭilabhe uposathassidaṃ phalaṃ.
|151.16| Jātiyā sattavassāhaṃ pabbajiṃ anagāriyaṃ
aḍḍhamāse asampatte arahattaṃ apāpuṇiṃ
[4]-
Sabbāsavaparikkhīṇā natthi dāni punabbhavo.
|151.17| Ekanavute ito kappe yaṃ kammamakariṃ tadā
duggatiṃ nābhijānāmi uposathassidaṃ phalaṃ.
@Footnote: 1 Ma. sīvikaṃ. 2 Ma. sabbamevetaṃ. 3 Ma. Yu. ...kambaliyāni. 4 Ma. Yu. kilesā
@jhāpitā mayhaṃ bhavā sabbe samūhatā.
|151.18| Kilesā jhāpitā mayhaṃ bhavā sabbe samūhatā
nāgīva bandhanaṃ chetvā viharāmi anāsavā.
|151.19| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|151.20| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ ekuposathikā bhikkhunī imā gāthāyo abhāsitthāti.
Ekuposathikātheriyā apadānaṃ samattaṃ.
The Pali Tipitaka in Roman Character Volume 33 page 270-272.
http://84000.org/tipitaka/pali/roman_item_s.php?book=33&item=151&items=1
Classified by [Item Number] :-
http://84000.org/tipitaka/pali/roman_item_s.php?book=33&item=151&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=151&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=151&items=1
Study Atthakatha :-
http://84000.org/tipitaka/attha/attha.php?b=33&i=151
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
