Aṭṭhamaṃ puṇṇikātheriyāpadānaṃ (38)
[178] |178.185| Vipassino bhagavato sikhino vessabhussa ca
kakusandhassa munino konāgamanatādino.
|178.186| Kassapassa ca buddhassa pabbajitvāna sāsane
bhikkhunī sīlasampannā nipakā saṃvutindriyā.
|178.187| Bahussutā dhammadharā dhammatthaparipucchitā 1-
uggahetvā 2- ca dhammānaṃ sotā payirupāsikā 3-.
|178.188| Desentī janamajjhehaṃ ahosiṃ jinasāsanaṃ 4-
bāhusaccena tenāhaṃ pesalā atimaññisaṃ.
|178.189| Pacchime ca bhave dāni sāvatthiyaṃ puruttame
anāthapiṇḍino gehe jātāhaṃ kumbhadāsiyā.
|178.190| Gatā udakahāriyaṃ sotthiyaṃ dijamaddasaṃ
sītaṭṭaṃ toyamajjhamhi taṃ disvā idamabraviṃ.
@Footnote: 1 Ma. ...paṭipucchikā. Yu. atthatthaparipucchikā. 2 Ma. Yu. uggahetā.
@3 Po. ...sitā. 4 Ma. jinasāsane.
|178.191| Udakahārī 1- ahaṃ sīte sadā udakamotariṃ
ayyānaṃ daṇḍabhayabhītā vācārosabhayaṭṭitā 2-.
|178.192| Kassa brāhmaṇa tvaṃ bhīto sadā udakamotari
vedhamānehi gattehi sītaṃ vedayase bhusaṃ.
|178.193| Jānantī vata maṃ bhoti 3- puṇṇike paripucchasi 4-
karontaṃ 5- kusalaṃ kammaṃ nudantaṃ kammapāpakaṃ.
|178.194| Yo vuḍḍho 6- daharo cāpi pāpakammaṃ pakubbati
udakābhisecanā sopi pāpakammā pamuccati.
|178.195| Uttarantassa akkhāsiṃ dhammatthasahitaṃ padaṃ
tañca sutvā susaṃviggo 7- pabbajitvārahā ahu.
|178.196| Pūrentī ūnakasataṃ jātā dāsikule yato
tato puṇṇāti nāmaṃ me bhujissaṃ 8- maṃ akaṃsu te.
|178.197| Seṭṭhiṃ tatonumodetvā 9- pabbajiṃ anagāriyaṃ
na cireneva kālena arahattaṃ apāpuṇiṃ.
|178.198| Iddhīsu ca vasī homi dibbāya sotadhātuyā
cetopariyañāṇassa vasī homi mahāmune.
|178.199| Pubbenivāsaṃ jānāmi dibbacakkhuṃ visodhitaṃ
sabbāsavaparikkhīṇā natthi dāni punabbhavo.
Atthadhammaniruttīsu paṭibhāṇe tatheva ca
@Footnote: 1 Ma. udahārī. Yu. udabhārī. 2 Ma. Yu. vācādosabhayaṭṭitā. 3 Yu. hoti.
@4 Yu. paripucchiyaṃ. 5 Ma. rundantaṃ. Yu. niddhantaṃ. 6 Ma. yo ce vuḍḍho daharo
@vā. Yu. yo ca vuddho daharo vā. 7 Ma. Yu. sasaṃviggo. 8 Yu. bhujissañca ....
@Po. bhujissañca akāsi maṃ. 9 Ma. ... tatonujānetvā.
Ñāṇaṃ me vimalaṃ suddhaṃ buddhaseṭṭhassa vāhasā.
|178.200| Bhāvanāya mahāpaññā suteneva sutāvinī
mānena nīcakulajā na hi kammaṃ panassati 1-.
|178.201| Kilesā jhāpitā mayhaṃ viharāmi anāsavā.
Nāgīva bandhanaṃ chetvā viharāmi anāsavā.
|178.202| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|178.203| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ puṇṇikā bhikkhunī imā gāthāyo abhāsitthāti.
Puṇṇikātheriyā apadānaṃ samattaṃ
The Pali Tipitaka in Roman Character Volume 33 page 396-398.
http://84000.org/tipitaka/pali/roman_item_s.php?book=33&item=178&items=1
Classified by [Item Number] :-
http://84000.org/tipitaka/pali/roman_item_s.php?book=33&item=178&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=178&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=178&items=1
Study Atthakatha :-
http://84000.org/tipitaka/attha/attha.php?b=33&i=178
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
