Lakkhaṇakathā
[956] Lakkhaṇasamannāgato bodhisattoti. Āmantā. Padesalakkhaṇehi
samannāgato padesabodhisattoti. Na hevaṃ vattabbe .pe.
[957] Lakkhaṇasamannāgato bodhisattoti. Āmantā. Tibhāgalakkhaṇehi
samannāgato tibhāgabodhisattoti. Na hevaṃ vattabbe .pe.
[958] Lakkhaṇasamannāgato bodhisattoti. Āmantā. Upaḍḍhalakkhaṇehi
samannāgato upaḍḍhabodhisattoti. Na hevaṃ vattabbe .pe.
[959] Lakkhaṇasamannāgato bodhisattoti. Āmantā. Cakkavattisatto
lakkhaṇasamannāgato cakkavattisatto bodhisattoti . na
hevaṃ vattabbe .pe.
[960] Cakkavattisatto lakkhaṇasamannāgato cakkavattisatto
bodhisattoti . āmantā . yādiso bodhisattassa pubbayogo pubbacariyā
Dhammakkhānaṃ dhammadesanā tādiso cakkavattisattassa pubbayogo
pubbacariyā dhammakkhānaṃ dhammadesanāti. Na hevaṃ vattabbe .pe.
[961] Yathā bodhisattassa jāyamānassa devā paṭhamaṃ paṭiggaṇhanti
pacchā manussā evameva cakkavattisattassa jāyamānassa devā
paṭhamaṃ paṭiggaṇhanti pacchā manussāti. Na hevaṃ vattabbe .pe.
[962] Yathā bodhisattassa jāyamānassa cattāro [1]- devaputtā
paṭiggahetvā mātu purato ṭhapenti attamanā devi hohi mahesakkho
tava putto uppannoti evameva cakkavattisattassa jāyamānassa
cattāro [2]- devaputtā paṭiggahetvā mātu purato ṭhapenti attamanā
devi hohi mahesakkho tava putto uppannoti . na hevaṃ
vattabbe .pe.
[963] Yathā bodhisattassa jāyamānassa dve udakassa dhārā
antalikkhā pātubhavanti ekā sītassa ekā uṇhassa yena bodhisattassa
udakakiccaṃ karonti mātu ca evameva cakkavattisattassa
jāyamānassa dve udakassa dhārā antalikkhā pātubhavanti ekā
sītassa ekā uṇhassa yena cakkavattisattassa udakakiccaṃ karonti
mātu cāti. Na hevaṃ vattabbe .pe.
[964] Yathā sampatijāto bodhisatto samehi pādehi patiṭṭhahitvā
uttarena abhimukho satta padavītihāre gacchati setamhi chatte
anudhāriyamāne sabbā ca disā viloketi āsabhiñca vācaṃ bhāsati
@Footnote:[1]-[2] Ma. etathantare nantipāṭho atthi.
Aggohamasmi lokassa jeṭṭhohamasmi lokassa seṭṭhohamasmi
lokassa ayamantimā jāti natthidāni punabbhavoti evameva
sampatijāto cakkavattisatto samehi pādehi patiṭṭhahitvā uttarena
abhimukho satta padavītihāre gacchati setamhi chatte anudhāriyamāne
sabbā ca disā viloketi āsabhiñca vācaṃ bhāsati aggohamasmi
lokassa jeṭṭhohamasmi lokassa seṭṭhohamasmi lokassa ayamantimā
jāti natthidāni punabbhavoti. Na hevaṃ vattabbe .pe.
[965] Yathā bodhisattassa jāyamānassa mahato ālokassa mahato
obhāsassa mahato bhūmicālassa pātubhāvo hoti evameva cakkavattisattassa
jāyamānassa mahato ālokassa mahato obhāsassa mahato bhūmicālassa
pātubhāvo hotīti. Na hevaṃ vattabbe .pe.
[966] Yathā bodhisattassa pakatikāyo samantā byāmaṃ obhāsati
evameva cakkavattisattassa pakatikāyo samantā byāmaṃ obhāsatīti .
Na hevaṃ vattabbe .pe.
[967] Yathā bodhisatto mahāsupinaṃ passi 1- evameva cakkavattisatto
mahāsupinaṃ passatīti. Na hevaṃ vattabbe .pe.
[968] Na vattabbaṃ lakkhaṇasamannāgato bodhisattoti. Āmantā.
Nanu vuttaṃ bhagavatā dvattiṃsimāni bhikkhave mahāpurisassa mahāpurisalakkhaṇāni
yehi samannāgatassa mahāpurisassa dveva gatiyo bhavanti
anaññā sace agāraṃ ajjhāvasati rājā hoti cakkavatti dhammiko
@Footnote:1. Ma. passati.
Dhammarājā cāturanto vijitāvī janapadatthāvariyappatto sattaratanasamannāgato
tassimāni satta ratanāni bhavanti seyyathīdaṃ cakkaratanaṃ hatthiratanaṃ
assaratanaṃ maṇiratanaṃ itthīratanaṃ gahapatiratanaṃ pariṇāyakaratanameva
sattamaṃ parosahassaṃ kho panassa puttā bhavanti sūrā viraṅgarūpā
parasenappamaddanā so imaṃ paṭhaviṃ sāgarapariyantaṃ adaṇḍena asatthena
dhammena abhivijiya ajjhāvasati sace pana kho agārasmā anagāriyaṃ
pabbajjati arahaṃ hoti sammāsambuddho loke vivaṭacchadoti 1-
attheva suttantoti . āmantā . tena hi lakkhaṇasamannāgato
bodhisattoti.
Lakkhaṇakathā.
---------
The Pali Tipitaka in Roman Character Volume 37 page 309-312.
http://84000.org/tipitaka/pali/roman_item_s.php?book=37&item=956&items=13
Classified by [Item Number] :-
http://84000.org/tipitaka/pali/roman_item_s.php?book=37&item=956&items=13&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=37&item=956&items=13
Compare with The Royal Version of Thai Tipitaka :-
http://84000.org/tipitaka/read/byitem_s.php?book=37&item=956&items=13
Study Atthakatha :-
http://84000.org/tipitaka/attha/attha.php?b=37&i=956
The Pali Atthakatha in Thai :-
http://84000.org/tipitaka/atthapali/read_th.php?B=55&A=4622
The Pali Atthakatha in Roman :-
http://84000.org/tipitaka/atthapali/read_rm.php?B=55&A=4622
Contents of The Tipitaka Volume 37
http://84000.org/tipitaka/read/?index_37
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
