อรรถกถาเล่มที่ ๑๑ หน้าที่ ๒๘๔.

๑๐. ยกฺขสํยุตฺต ๑๐. ยกฺขสํยุตฺต ๑. อินฺทกสุตฺตวณฺณนา [๒๓๕] ยกฺขสํยุตฺตสฺส ปฐเม อินฺทกสฺสาติ อินฺทกูฏนิวาสิโน ยกฺขสฺส. ยกฺขโต หิ กูเฏน, กูฏโต จ ยกฺเขน นามํ ลทฺธํ. รูปํ น ชีวนฺติ วทนฺตีติ ยทิ พุทฺธา รูปํ ชีวนฺติ น วทนฺติ, ยทิ รูปํ สตฺโต ปุคฺคโลติ เอวํ น วทนฺตีติ อตฺโถ. กถํ นฺวยนฺติ กถํ นุ อยํ. กุตสฺส อฏฺฐียกปิณฺฑเมตีติ อสฺส สตฺตสฺส อฏฺฐี ยกปิณฺฑญฺจ ^๑- กุโต อาคจฺฉติ. เอตฺถ จ อฏฺฐิคฺคหเณน ตีณิ อฏฺฐิสตานิ, ยกปิณฺฑคฺคหเณน นว มํสเปสิสตานิ คหิตานิ. ยทิ รูปํ น ชีโว, อถสฺส อิมานิ จ อฏฺฐีนิ อิมา จ มํสเปสิโย กุโต อาคจฺฉนฺตีติ ปุจฺฉติ. กถํ นฺวยํ สชฺชติ คพฺภสฺมินฺติ ^๒- เกน นุ การเณน อยํ สตฺโต มาตุ กุจฺฉิสฺมึ สชฺชติ ลคฺคติ นิพฺพตฺตติ. ^๓- ปุคฺคลวาที กิเรส ยกฺโข, "เอกปฺปหาเรเนว สตฺโต มาตุ กุจฺฉิสฺมึ นิพฺพตฺตตี"ติ คเหตฺวา คพฺภเสยฺยกสตฺตสฺส มาตา มจฺฉมํสาทีนิ ขาทติ, สพฺพานิ เอกรตฺติวาเสน ปจิตฺวา เผณุํ ^๔- วิย วิลียนฺติ. ยทิ รูปํ สตฺโต น ภเวยฺย, เอวเมว วิลีเยยฺยาติ ลทฺธิยา เอวมาห. อถสฺส ภควา "น มาตุ กุจฺฉิสฺมึ เอกปฺปหาเรเนว นิพฺพตฺตติ, อนุปุพฺเพน ปน วฑฺฒตี"ติ ทสฺเสนฺโต ปฐมํ กลลํ โหตีติอาทิมาห. ตตฺถ ปฐมนฺติ ปฐเมน ปฏิสนฺธิวิญฺญาเณน สทฺธึ ติสฺโสติ วา ปุสฺโสติ วา นามํ นตฺถิ. อถโข ตีหิ ชาติอุณฺณํสูหิ กตสุตฺตคฺเค สณฺฐิตเตลพินฺทุปฺปมาณํ กลลํ โหตีติ, ^๕- ยํ สนฺธาย วุตฺตํ:- "ติลเตลสฺส ยถา พินฺทุ สปฺปิ มณฺโฑ อนาวิโล เอวํ วณฺณปฏิภาคํ กลลํ สมฺปวุจฺจตี"ติ. กลลา โหติ อพฺพุทนฺติ ตสฺมา กลลา สตฺตาหจฺจเยน มํสโธวนอุทกวณฺณํ อพฺพุทํ นาม โหติ, กลลนฺติ นามํ อนฺตรธายติ. วุตฺตมฺปิ เจตํ:- @เชิงอรรถ: ^๑ ฉ.ม. อฏฺฐิยกปิณฺฑญฺจ ^๒ ฉ.ม. คพฺภรสฺมินฺติ ^๓ ฉ.ม. ติฏฺฐตีติ @^๔ ฉ.ม. เผณํ ^๕ ฉ.ม. โหติ

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๒๘๔. http://84000.org/tipitaka/read/attha_page.php?book=11&page=284&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=7325&modeTY=2&pagebreak=1 http://84000.org/tipitaka/atthapali/th_line.php?B=11&A=7325&modeTY=2&pagebreak=1#p284