ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๑๒ ภาษาบาลี อักษรไทย สํ.อ. (สารตฺถ.๒)

หน้าที่ ๙๘.

ตํ โคจรคามํ กตฺวาติ อตฺโถ. อายสฺมาติ ปิยวจนเมตํ ครุวจนเมตํ. อานนฺโทติ ตสฺส
เถรสฺส นามํ. เอกมนฺตํ นิสีทีติ ฉ นิสชฺชโทเส วชฺเชนฺโต ๑- ทกฺขิณชาณุมณฺฑลสฺส
อภิมุขฏฺฐาเน ฉพฺพณฺณานํ พุทฺธรํสีนํ อนฺโต ปวิลิตฺวา ปสนฺนลาขารสํ
วิคาหนฺโต วิย สุวณฺณปฏํ ปารุปนฺโต วิย รตฺตกมฺพลวิตานมชฺฌํ ๒- ปวิสนฺโต
วิย ธมฺมกณฺฑาคาริโก อายสฺมา อานนฺโท นิสีทิ. เตน วุตฺตํ "เอกมนฺตํ
นิสีที"ติ.
    กาย ปน เวลาย เกน การเณน อยมายสฺมา ภควนฺตํ อุปสงฺกมนฺโตติ?
สายณฺหเวลาย ปจฺจยาการปญฺหปุจฺฉนการเณน. ตํทิวสํ กิร อยมายสฺมา
กุลสงฺคหตฺถาย ฆรทฺวาเร ฆรทฺวาเร สหสฺสภณฺฑิกํ นิกฺขิปนฺโต วิย กมฺมาสธมฺมํ
ปิณฺฑาย จริตฺวา ปิณฺฑปาตปฏิกฺกนฺโต สตฺถุ วตฺตํ ทสฺเสตฺวา สตฺถริ คนฺธกุฏึ
ปวิฏฺเฐ สตฺถารํ วนฺทิตฺวา อตฺตโน ทิวาฏฺฐานํ คนฺตฺวา อนฺเตวาสิเกสุ วตฺตํ
ทสฺเสตฺวา ปฏิกฺกนฺเตสุ ทิวาฏฺฐานํ ปฏิสมฺมชฺชิตฺวา จมฺมกฺขณฺฑํ ปญฺญเปตฺวา
อุทกตุมฺพโต อุทเกน หตฺถปาเท สีตลํ กตฺวา ปลฺลงฺกํ อาภุชิตฺวา นิสินฺโน
โสตาปตฺติผลสมาปตฺตึ สมาปชฺชิตฺวา. อถ ปริจฺฉินฺนกาลวเสน สมาปตฺติโต วุฏฺฐาย
ปจฺจยากาเร ญาณํ โอตาเรสิ. โส "อวิชฺชาปจฺจยา สงฺขารา"ติ อาทิโต ปฏฺฐาย
อนฺตํ, อนฺตโต ปฏฺฐาย อาทึ, อุภยนฺตโต ปฏฺฐาย มชฺฌํ, มชฺฌโต ปฏฺฐาย
อุโภ อนฺเต ปาเปนฺโต ติกฺขตฺตุํ ทฺวาทสปทปจฺจยาการํ สมฺมสิ. ตสฺเสวํ สมฺมสนฺตสฺส
ปจฺจยากาโร วิภูโต หุตฺวา อุตฺตานโก ๓- วิย อุปฏฺฐาสิ. ตโต จินฺเตสิ "อยํ
ปจฺจยากาโร สพฺพพุทฺเธหิ คมฺภีโร เจว คมฺภีราภาโส จาติ กถิโต, มยฺหํ โข
ปน ปเทสญาเณ ฐิตสฺส สาวกสฺส สโต อุตฺตาโน วิย วิภูโต ปากโฏ หุตฺวา
อุปฏฺฐาสิ, ๔- มยฺหํเยว นุ โข เอส อุตฺตานโก วิย อุปฏฺฐาติ, อุทาหุ อญฺเญสมฺปีติ
@เชิงอรรถ:  ฉ.ม.,อิ. วิวชฺเชนฺโต        สี. รตฺตุปฺปลวิตานมชฺฌํ, สุ.วิ. ๒/๙๕/๘๑
@ ฉ.ม.,อิ. อุตฺตานกุตฺตานโก     ฉ.ม. อุปฏฺฐาติ



เนื้อความอรรถกถาฉบับภาษาบาลี อักษรไทย เล่มที่ ๑๒ หน้าที่ ๙๘. http://84000.org/tipitaka/read/attha_page.php?book=12&page=98&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=12&A=2167&modeTY=2&pagebreak=1 http://84000.org/tipitaka/atthapali/th_line.php?B=12&A=2167&modeTY=2&pagebreak=1#p98


จบการแสดงผล หน้าที่ ๙๘.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]