อรรถกถาเล่มที่ ๑๓ หน้าที่ ๒๐๖.

ปฏิฆนิมิตฺตนฺติอาทีสุ ปน ปฏิโฆปิ ปฏิฆนิมิตฺตํ ปฏิฆารมฺมณมฺปิ. อรตีติ อุกฺกณฺฐิตา, ^๑- ยํ สนฺธาย วุตฺตํ "ตตฺถ กตมา อรติ, ปนฺเตสุ วา เสนาสเนสุ อญฺญตรญฺญตเรสุ วา อธิกุสเลสุ ธมฺเมสุ อรติ อรติตา อนภิรติ อนภิรมณา อุกฺกณฺฐิตา ปริตสฺสิตา ^๒- อยํ วุจฺจติ อรตี"ติ. ^๓- ตนฺทีติ อติสีตาทิปจฺจยา อุปฺปนฺนํ อาคนฺตุกกายาลสิยํ. ยสฺมึ อุปฺปนฺเน "อติสีตํ อติอุณฺหํ อติจฺฉาโตสฺมิ อติธาโตสฺมิ อติทูรมคฺคํ คโตสฺมี"ติ วทติ, ยํ สนฺธาย วุตฺตํ "ตตฺถ กตมา ตนฺที? ยา ตนฺที ตนฺทิยนา ตนฺทิมนกตา, อาลสฺยํ อาลสฺยายนา อาลสฺยายิตตฺตํ, อยํ วุจฺจติ ตนฺที"ติ. ^๔- วิชมฺภิตาติ กิเลสวเสน กายวินมนา, ยํ สนฺธาย วุตฺตํ "ตตฺถ กตมา วิชมฺภิตา, ยา กายสฺส ชมฺภนา วิชมฺภนา อานมนา วินมนา สนฺนมนา ปณมนา พฺยาธิยกํ ^๕- อยํ วุจฺจติ วิชมฺภิตา"ติ. ^๔- ภตฺตสมฺมโทติ ภตฺตปริฬาโห, ยํ สนฺธาย วุตฺตํ "ตตฺถ กตโม ภตฺตสมฺมโท, ยา ภุตฺตาวิสฺส ภตฺตมุจฺฉา ภตฺตกิลมโถ ภตฺตปริฬาโห กายทุฏฺฐุลฺลํ, อยํ วุจฺจติ ภตฺตสมฺมโท"ติ. ^๖- เจตโส จ ลีนตฺตนฺติ จิตฺตสฺส ลียนากาโร, ยํ สนฺธาย วุตฺตํ "ตตฺถ กตมํ เจตโส ลีนตฺตํ, ยา จิตฺตสฺส อกลฺยตา อกมฺมญฺญตา โอลียนา สลฺลียนา ลีนํ ลียนา ลียิตตฺตํ ถินํ ถิยนา ถิยิตตฺตํ จิตฺตสฺส, อิทํ วุจฺจติ เจตโส ลีนตฺตนฺ"ติ. ^๖- เจตโส อวูปสโมติ ยถา นาม วีตจฺจิโกปิ องฺคาโร เนว ตาว สนฺนิสีทติ ปตาปํ กโรติเยว, ยถา จ ปตฺตปจนฏฺฐาเน เนว ตาว สนฺนิสีทติ ปตาปํ กโรติเยว, เอวํ จิตฺตสฺส อวูปสนฺตากาโร, อตฺถโต ปเนตํ อุทฺธจฺจกุกฺกุจฺจเมว โหติ. @เชิงอรรถ: ^๑ ก. อุกฺกณฺฐิกา ^๒ ก. ปริตสฺสิกา ^๓ อภิ.วิ. ๓๕/๘๕๖/๔๒๙ @^๔ อภิ.วิ. ๓๕/๘๕๗-๘/๔๒๙ ^๕ ก. ปณามนา พฺยาธิยตํ ^๖ อภิ.วิ. ๓๕/๘๕๙-๖๐/๔๒๙

เนื้อความอรรถกถาฉบับภาษาบาลี อักษรไทย เล่มที่ ๑๓ หน้าที่ ๒๐๖. http://84000.org/tipitaka/read/attha_page.php?book=13&page=206&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=13&A=4469&modeTY=2&pagebreak=1 http://84000.org/tipitaka/atthapali/th_line.php?B=13&A=4469&modeTY=2&pagebreak=1#p206