อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๑๔๕.

     กิฏฺฐาโทติ กิฏฺฐขาทโก. อนฺตรธาเปยฺยาติ นาเสยฺย. โคปสูติ คาโว จ
อชิกา จ. สิปฺปิสมฺพุกนฺติ สิปฺปิโย จ สมฺพุกา จ. สกฺขรกถลนฺติ สกฺขรา จ
กถลานิ จ. อภิโทสิกนฺติ อภิญฺญาตโทสํ กุทฺรูสกโภชนํ. นจฺฉาเทยฺยาติ น
รุจฺเจยฺย. ตตฺถ ยเทตํ ปุริสํ ภุตฺตาวินฺติ อุปโยควจนํ, ตํ สามิอตฺเถ ทฏฺฐพฺพํ.
อมุญฺหาวุโส ปุริสนฺติ อาวุโส อมุํ ปุริสํ.
     สพฺพนิมิตฺตานนฺติ สพฺเพสํ นิจฺจนิมิตฺตาทีนํ นิมิตฺตานํ. อนิมิตฺตํ
เจโตสมาธินฺติ พลววิปสฺสนาสมาธึ. จีริฬิกาสทฺโทติ ฌลฺลิกสทฺโท. ๑- สริสฺสติ
เนกฺขมฺมสฺสาติ ปพฺพชฺชาย คุณํ สริสฺสติ. อรหตํ อโหสีติ ภควโต สาวกานํ
อรหนฺตานํ อนฺตเร เอโก อรหา อโหสิ. อยญฺหิ เถโร สตฺต วาเร คิหี หุตฺวา
สตฺตวาเร ปพฺพชิ. กึการณา? กสฺสปสมฺมาสมฺพุทฺธกาเล กิเรส เอกสฺส ภิกฺขุโน
คิหิภาเว วณฺณํ กเถสิ. โส เตเนว กมฺเมน อรหตฺตสฺส อุปนิสฺสเย วิชฺชมาเนเยว
สตฺต วาเร คิหิภาเว จ ปพฺพชฺชาย จ สญฺจรนฺโต สตฺตเม วาเร ปพฺพชิตฺวา
อรหตฺตํ ปาปุณีติ.
                         ๗. มชฺเฌสุตฺตวณฺณนา
     [๖๑] สตฺตเม ปรายเน เมตฺเตยฺยปเญฺหติ ปรายนสมาคมมฺหิ เมตฺเตยฺยมาณวสฺส
ปเญฺห.  อุภนฺเต ๒- วิทิตฺวานาติ เทฺว อนฺเต เทฺว โกฏฺฐาเส ชานิตฺวา.
มชฺเฌ มนฺตา น ลิมฺปตีติ มนฺตา วุจฺจติ ปญฺญา, ตาย อุโภ อนฺเต วิทิตฺวา
มชฺเฌ น ลิมฺปติ, เวมชฺฌฏฺฐาเน น ลิมฺปติ. สิพฺพนิมจฺจคาติ สิพฺพนิสงฺขาตํ
ตณฺหํ อตีโต. ผสฺโสติ ผสฺสวเสน นิพฺพตฺตตฺตา อยํ อตฺตภาโว. เอโก อนฺโตติ
อยเมโก โกฏฺฐาโส. ผสฺสสมุทโยติ ผสฺโส สมุทโย อสฺสาติ ผสฺสสมุทโย, อิมสฺมึ
อตฺตภาเว กตกมฺมผสฺสปจฺจยา นิพฺพตฺโต อนาคตตฺตภาโว. ทุติโย อนฺโตติ ทุติโย
@เชิงอรรถ: ๑ สี. จิริฬิยสทฺโทติ จิริยสทฺโท  ๒ ฉ.ม. อุโภนฺเต


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๑๔๕.
http://84000.org/tipitaka/read/attha_page.php?book=16&page=145&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=3273&modeTY=2&pagebreak=1
http://84000.org/tipitaka/atthapali/th_line.php?B=16&A=3273&modeTY=2&pagebreak=1#p145