อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๑๕๙.

                          สตฺตกนิปาตวณฺณนา
                             ปณฺณาสก
                            ๑. ธนวคฺค
                      ๑-๕. ปฐมปิยสุตฺตาทิวณฺณนา
     [๑-๕] สตฺตกนิปาตสฺส ปฐเม อนวญฺญตฺติกาโมติ อภิญฺญาตภาวกาโม. ตติเย
โยนิโส วิจิเน ธมฺมนฺติ อุปาเยน จตุสจฺจธมฺมํ วิจินาติ. ปญฺญายตฺถํ วิปสฺสตีติ
สหวิปสฺสนาย มคฺคปญฺญาย สจฺจธมฺมํ วิปสฺสติ. ปชฺโชตสฺเสวาติ ทีปสฺเสว. วิโมกฺโข
โหติ เจตโสติ ตสฺส อิเมหิ พเลหิ สมนฺนาคตสฺส ขีณาสวสฺส ทีปนิพฺพานํ
วิย จริมกจิตฺตสฺส วตฺถารมฺมเณหิ วิโมกฺโข โหติ, คตฏฺฐานํ น ปญฺญายติ. จตุตฺเถ
สทฺโธ โหตีติอาทีนิ ปญฺจกนิปาเต วณฺณิตาเนว. ปญฺจเม ธนานีติ อทลิทฺทสฺส
กรณฏฺเฐน ๑- ธนานิ.
                         ๗. อุคฺคสุตฺตวณฺณนา
     [๗] สตฺตเม อุคฺโค ราชมหามตฺโตติ ปเสนทิโกสลสฺส มหาอมจฺโจ. อุปสงฺกมีติ
ภุตฺตปาตราโส อุปสงฺกมิ. อทฺโธติ นิธานคเตน ธเนน อทฺโธ. มิคาโร โรหเณยฺโยติ
โรหณเสฏฺฐิโน นตฺตารํ มิคารเสฏฺฐึ สนฺธาเยวมาห. มหทฺธโนติ วฬญฺชนธเนน
มหาธโน. มหาโภโคติ อุปโภคปริโภคภณฺฑสฺส มหนฺตตาย มหาโภโค. หิรญฺญสฺสาติ
สุวณฺณสฺเสว. สุวณฺณเมว หิสฺส โกฏิสงฺขํ อโหสิ. รูปิยสฺสาติ เสสสฺส ตฏฺฏกสรก-
อตฺถรณปาปุรณาทิโน ปริโภคปริกฺขารสฺส ปมาณสงฺขาเน วาโทเยว นตฺถิ.
@เชิงอรรถ: ๑ ฉ.ม. อทาลิทฺทิยกรณฏฺเฐน


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๑๕๙.
http://84000.org/tipitaka/read/attha_page.php?book=16&page=159&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=3547&modeTY=2&pagebreak=1
http://84000.org/tipitaka/atthapali/th_line.php?B=16&A=3547&modeTY=2&pagebreak=1#p159