ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๒ ภาษาบาลี อักษรไทย วินย.อ. (สมนฺต.๒)

หน้าที่ ๕๑๒-๕๑๓.

หน้าที่ ๕๑๒.

{๖๖๔} ทุติเย ปาราชิเก ฯ กจฺจิโน สาติ กจฺจินุ สา ฯ อวณฺโณติ อคุโณ ฯ อกิตฺตีติ นินฺทา ฯ อยโสติ ปริวารวิปตฺติ ปรมฺมุขครหา วา ฯ {๖๖๖} สา วา อาโรเจตีติ ยา ปาราชิกํ อาปนฺนา สา สยํ วา อาโรเจติ ฯ อฏฺฐนฺนํ ปาราชิกานํ อญฺญตรนฺติ ภิกฺขูหิ สาธารณานํ จตุนฺนํ อสาธารณานํ จ จตุนฺนเมว อญฺญตรํ ฯ อิทญฺจ ปาราชิกํ ปจฺฉา ปญฺญตฺตํ ตสฺมา อฏฺฐนฺนนฺติ วิภงฺเค วุตฺตํ ฯ ปุริเมน ปน สทฺธึ ยุคลกตฺตา อิมสฺมึ โอกาเส ฐปิตนฺติ เวทิตพฺพํ ฯ ธุรํ นิกฺขิตฺตมตฺเตติ ธุเร นิกฺขิตฺตมตฺเต ฯ วิตฺถารกถา ปเนตฺถ สปฺปาณกวคฺคมฺหิ ทุฏฺฐุลฺลสิกฺขาปเท วุตฺตนเยเนว เวทิตพฺพา ฯ ตตฺร หิ ปาจิตฺติยํ อิธ ปาราชิกนฺติ อยเมว หิ วิเสโส ฯ เสสํ ตาทิสเมว ฯ {๖๖๕} วชฺชปฏิจฺฉาทิกาติ อิทํปิ อิมิสฺสา ปาราชิกาย นามมตฺตเมว ตสฺมา ปทภาชเน น วิจาริตํ ฯ เสสเมตฺถ อุตฺตานเมว ฯ ธุรนิกฺเขปสมุฏฺฐานํ กายวาจาจิตฺตโต สมุฏฺฐาติ อกิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ ทุติยปาราชิกํ ฯ {๖๖๙} ตติเย ฯ ธมฺเมนาติ ภูเตน วตฺถุนา ฯ วินเยนาติ โจเทตฺวา สาเรตฺวา ฯ ปทภาชนํ ปนสฺส เยน ธมฺเมน เยน วินเยน อุกฺขิตฺโต สุอุกฺขิตฺโต โหตีติ อิมํ อธิปฺปายมตฺตํ ทสฺเสตุํ วุตฺตํ ฯ สตฺถุ สาสเนนาติ ญตฺติสมฺปทาย เจว อนุสฺสาวนสมฺปทาย จ ฯ ปทภาชเน ปนสฺส ชินสาสเนน พุทฺธสาสเนนาติ เววจนมตฺตเมว วุตฺตํ ฯ สงฺฆํ วา คณํ วาติอาทีสุ เยน สงฺเฆน กมฺมํ กตํ ตํ สงฺฆํ วา

--------------------------------------------------------------------------------------------- หน้าที่ ๕๑๓.

ตตฺถ สมฺพหุลปุคฺคลสงฺขาตํ คณํ วา เอกปุคฺคลํ วา ตํ วา กมฺมํ น อาทิยติ น อนุวตฺตติ น ตตฺถ อาทรํ ชเนตีติ อตฺโถ ฯ สมานสํวาสกา ภิกฺขู วุจฺจนฺติ สหายา โส เตหิ สทฺธึ นตฺถีติ เอตฺถ เอกกมฺมํ เอกุทฺเทโส สมสิกฺขาตาติ อยํ ตาว สํวาโส ฯ สมาโน สํวาโส เอเตสนฺติ สมานสํวาสกา ฯ เอวรูปา ภิกฺขู ภิกฺขุสฺส ตสฺมึ สํวาเส สห อยนภาเวน สหายาติ วุจฺจนฺติ ฯ อิทานิ เยน สํวาเสน เต สมานสํวาสกาติ วุตฺตา โส สํวาโส ตสฺส อุกฺขิตฺตกสฺส เตหิ สทฺธึ นตฺถิ เยหิ จ สทฺธึ ตสฺส โส สํวาโส นตฺถิ น เตน เต ภิกฺขู อตฺตโน สหายา กตา โหนฺติ ฯ ตสฺมา วุตฺตํ สมานสํวาสกา ภิกฺขู วุจฺจนฺติ สหายา โส เตหิ สทฺธึ นตฺถิ เตน วุจฺจติ อกตสหาโยติ ฯ เสสํ สงฺฆเภทสิกฺขาปทาทีสุ วุตฺตนยตฺตา อุตฺตานเมว ฯ สมนุภาสนสมุฏฺฐานํ กายวาจาจิตฺตโต สมุฏฺฐาติ อกิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ ตติยปาราชิกํ ฯ {๖๗๕} จตุตฺเถ ฯ อวสฺสุตาติ โลกสฺสาทมิตฺตสนฺถววเสน กายสํสคฺคราเคน อวสฺสุตา ฯ ทุติยปเทปิ เอเสว นโย ฯ ปุริสปุคฺคลสฺส หตฺถคฺคหณํ วาติอาทีสุ ปน ยํ ปุริสปุคฺคเลน หตฺเถ คหณํ กตํ ตํ ปุริสปุคฺคลสฺส หตฺถคฺคหณนฺติ วุตฺตํ ฯ เอเสว นโย สงฺฆาฏิกณฺณคฺคหเณปิ ฯ หตฺถคฺคหณนฺติ เอตฺถ จ หตฺถคฺคหณญฺจ อญฺญํปิ อปาราชิกกฺเขตฺเต คหณญฺจ เอกชฺฌํ กตฺวา หตฺถคฺคหณํ วุตฺตนฺติ


เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๑๒-๕๑๓. http://84000.org/tipitaka/read/attha_page.php?book=2&page=512&pages=2&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=10773&modeTY=2&pagebreak=1 http://84000.org/tipitaka/atthapali/th_line.php?B=2&A=10773&modeTY=2&pagebreak=1#p512


จบการแสดงผล หน้าที่ ๕๑๒-๕๑๓.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]