อรรถกถาเล่มที่ ๒๗ หน้าที่ ๓๑๙.

"จตุกฺกณฺโณ จตุทฺวาโร วิภตฺโต ภาคโส มิโต อโยปาการปริยนฺโต อยสา ปฏิกุชฺชิโต. ตสฺส อโยมยา ภูมิ ชลิตา เตชสา ยุตา สมนฺตา โยชนสตํ ผริตฺวา ติฏฺฐติ สพฺพทา"ติ. ^๑- อทุฏฺฐสฺสาติ อทุฏฺฐจิตฺตสฺส. ทุพฺเภติ ทุสฺเสยฺย. ตเมว ปาปํ ผุสตีติ ตเมว อทุฏฺฐทุพฺภึ ปาปปุคฺคลํ ปาปํ นิหีนํ ปาปผลํ ผุสติ ปาปุณาติ อภิภวติ. เภสฺมาติ วิปุลภาเวน คมฺภีรภาเวน จ ภึสาเปนฺโต วิย, วิปุลคมฺภีโรติ อตฺโถ. วาเทนาติ โทเสน. วิหึสตีติ พาธติ อาสาเทติ. วาโท ตมฺหิ น รูหตีติ ตสฺมึ ตถาคเต ปเรน อาโรปิยมาโน โทโส น รูหติ น ติฏฺฐติ วิสกุมฺโภ วิย สมุทฺทสฺส, น ตสฺส วิการํ ชเนตีติ อตฺโถ. เอวํ ฉหิ คาถาหิ ปาปิจฺฉตาทิสมนฺนาคตสฺส นิรยูปคภาวทสฺสเนน ทุกฺขโต อปริมุตฺตตํ ทสฺเสตฺวา อิทานิ ตปฺปฏิปกฺขธมฺมสมนฺนาคตสฺส ทุกฺขกฺขยํ ทสฺเสนฺโต "ตาทิสํ มิตฺตนฺ"ติ โอสานคาถมาห. ตสฺสตฺโถ:- ยสฺส สมฺมา ปฏิปนฺนสฺส มคฺคานุโค ปฏิปตฺติมคฺคํ อนุคโต สมฺมา ปฏิปนฺโน อปฺปิจฺฉตาทิคุณสมนฺนาคเมน สกลสฺส วฏฺฏทุกฺขสฺส ^๒- ขยํ ปริโยสานํ ปาปุเณยฺย, ตาทิสํ พุทฺธํ วา พุทฺธสาวกํ วา ปณฺฑิโต สปฺปญฺโญ อตฺตโน มิตฺตํ กุพฺเพถ เตน เมตฺติกํ กเรยฺย, ตญฺจ เสเวยฺย ตเมว ปยิรุปาเสยฺยาติ. อิติ อิมสฺมึ วคฺเค ฉฏฺฐสตฺตมสุตฺเตสุ วิวฏฺฏํ กถิตํ, อิตเรสุ วฏฺฏวิวฏฺฏํ กถิตํ. ทสมสุตฺตวณฺณนา นิฏฺฐิตา. จตุตฺถวคฺควณฺณนา นิฏฺฐิตา. -------------- @เชิงอรรถ: ^๑ ม.อุ. ๑๔/๒๕๐/๒๑๘, องฺ.ติก. ๒๐/๓๖/๑๓๖, ขุ.เปต. ๒๖/๖๙๔-๕/๒๔๑, @ขุ.ชา. ๒๘/๙๒/๔๐ (สฺยา) ^๒ ฉ.ม. สกลวฏฏทุกฺขสุส

เนื้อความอรรถกถาฉบับภาษาบาลี อักษรไทย เล่มที่ ๒๗ หน้าที่ ๓๑๙. http://84000.org/tipitaka/read/attha_page.php?book=27&page=319&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=27&A=7045&modeTY=2&pagebreak=1 http://84000.org/tipitaka/atthapali/th_line.php?B=27&A=7045&modeTY=2&pagebreak=1#p319