อรรถกถาเล่มที่ ๓๔ ภาษาบาลี อักษรไทย
เถรี.อ. (ปรมตฺถที.)
หน้าที่ ๔๓.

       [๒๘]   สงฺฆาฏึ นิกฺขิปิตฺวาน           ปตฺตกญฺจ นิกุชฺชิย
              เสเล ขมฺเภสึ อตฺตานํ         ตโมกฺขนฺธํ  ปทาลิยา"ติ
อิมา เทฺว คาถา อภาสิ.
      ตตฺถ กิญฺจาปิ โขมฺหิ กิสิกาติ ยทิปิ อหํ ชรา ชิณฺณา อปฺปมํสโลหิตภาเวน
กิสสรีรา อมฺหิ. คิลานา พาฬฺหทุพฺพลาติ ธาตฺวาทิวิกาเรน ๑- คิลานา, เตเนว
เคลญฺเญน อติวิย ทุพฺพลา. ทณฺฑโมลุพฺภ คจฺฉามีติ ยตฺถ กตฺถจิ คจฺฉนฺตี กตฺตรยฏฺฐึ
อาลมฺพิตฺวาว ๒- คจฺฉามิ. ปพฺพตํ อภิรูหิยาติ เอวํ ภูตาปิ วิเวกกามตาย คิชฺฌกูฏํ
ปพฺพตํ อภิรุหิตฺวา. สงฺฆาฏึ นิกฺขิปิตฺวานาติ สนฺตรุตฺตรา เอว หุตฺวา ยถา
สํหตํ อํเส ฐปิตํ สงฺฆาฏึ หตฺถปาเส ฐเปตฺวา. ปตฺตกญฺจ นิกุชฺชิยาติ มยฺหํ
วลญฺชนมตฺติกาปตฺตํ อโธมุขํ กตฺวา เอกมนฺเต ฐเปตฺวา. เสเล ขมฺเภสึ อตฺตานํ,
ตโมกฺขนฺธํ ปทาลิยาติ ปพฺพเต นิสินฺนา อิมินา ทีเฆน อทฺธุนา อปทาลิตปุพฺพํ
โมหกฺขนฺธํ ปทาเลตฺวา, เตเนว จ โมหกฺขนฺธปทาลเนน อตฺตานํ อตฺตภาวํ ขมฺเภสึ,
มม สนฺตานํ อายตึ อนุปตฺติธมฺมตาปาทเนน วิขมฺเภสินฺติ อตฺโถ.
                     จิตฺตาเถรีคาถาวณฺณนา นิฏฺฐิตา.
                       ------------------
                   ๔๒๕. ๖. เมตฺติกาเถรีคาถาวณฺณนา
      กิญฺจาปิ โขมฺหิ ทุกฺขิตาติอาทิกา เมตฺติกาย เถริยา คาถา.
      อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ ปุญฺญํ
อุปจินนฺตี สิทฺธตฺถสฺส ภควโต กาเล คหปติกุเล นิพฺพตฺติตฺวา วิญฺญุตํ ปตฺวา
สตฺถุ เจติเย รตนปฏิมณฺฑิตาย เมขลาย ปูชํ อกาสิ. สา เตน ปุญฺญกมฺเมน
@เชิงอรรถ: ๑ ม.ชรตาทิวิกาเรน  ๒ ม. ยฏฺฐึ อวลุพฺภิตฺวาว


เนื้อความอรรถกถาฉบับภาษาบาลี อักษรไทย เล่มที่ ๓๔ หน้าที่ ๔๓.
http://84000.org/tipitaka/read/attha_page.php?book=34&page=43&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=34&A=916&modeTY=2&pagebreak=1
http://84000.org/tipitaka/atthapali/th_line.php?B=34&A=916&modeTY=2&pagebreak=1#p43