อรรถกถาเล่มที่ ๓๖ ภาษาบาลี อักษรไทย
ชา.อ.๒ เอกนิปาต(๒)
หน้าที่ ๖๗.

นิมฺมิลนฺติ ฯ โส ตํ การณํ อสลฺลกฺเขตฺวา มุขํ วิวริ ฯ อถสฺส
อกฺขีนิ ปิถียึสุ ฯ โส มุขํ วิวริตฺวา อกฺขีนิ นิมฺมิเลตฺวา นิปชฺชิ ฯ
โพธิสตฺโต ตถาภาวํ ญตฺวา ทีปกา อุปฺปติโต คนฺตฺวา กุมฺภีลสฺส
มตฺถกํ อกฺกมิตฺวา ตโต  อุปฺปติโต วิชฺชุลตา วิย วิชฺโชตมาโน
ปรตีเร อฏฺฐาสิ ฯ กุมฺภีโล ตํ อจฺฉริยํ ทิสฺวา อิมินา วานรินฺเทน
อติอจฺเฉรกํ กตนฺติ จินฺเตตฺวา โภ วานรินฺท อิมสฺมึ โลเก จตูหิ
ธมฺเมหิ สมนฺนาคโต ปุคฺคโล ปจฺจามิตฺเต อภิภวติ เต สพฺเพปิ
ตุยฺหํ อพฺภนฺตเร  อตฺถิ มญฺเญติ วตฺวา อิมํ คาถมาห
         ยสฺเสเต จตุโร ธมฺมา     วานรินฺท ยถา ตว
         สจฺจํ ธมฺโม ธิติ จาโค     ทิฏฺฐํ โส อติวตฺตตีติ ฯ
     ตตฺถ ยสฺสาติ ยสฺส กสฺสจิ ปุคฺคลสฺส ฯ เอเตติ อิทานิ
วตฺตพฺเพ ปจฺจกฺขโต นิทฺทิสติ ฯ จตุโร ธมฺมาติ จตฺตาโร
คุณา ฯ สจฺจนฺติ วจีสจฺจํ มม สนฺติกํ อาคมิสฺสามีติ วตฺวา
มุสาวาทํ อกตฺวา อาคโตเยวาติ เอตนฺเต วจีสจฺจํ ฯ ธมฺโมติ
วิจารณปญฺญา เอวํ กเต อิทํ นาม ภวิสฺสติ เอสา เต
วิจารณปญฺญา ฯ ธิตีติ อพฺโพจฺฉินฺนวิริยํ วุจฺจติ เอตมฺปิ เต
อตฺถิ ฯ จาโคติ อตฺตปริจฺจาโค ตฺวํ อตฺตานํ ปริจฺจชิตฺวา มม สนฺติกํ
อาคโต ยํ ปนาหํ คณฺหิตุํ นาสกฺขึ มยฺหเมเวโส โทโส ฯ
ทิฏฺฐนฺติ ปจฺจามิตฺตํ ฯ โส อติวตฺตตีติ ยสฺส ปุคฺคลสฺส ยถา ตว
เอวํ เอเต จตฺตาโร ธมฺมา อตฺถิ โส ยถา มํ อชฺช ตฺวํ
อติกฺกนฺโต ตเถว อตฺตโน ปจฺจามิตฺตํ อติกฺกมติ อภิภวตีติ ฯ


เนื้อความอรรถกถาฉบับภาษาบาลี อักษรไทย เล่มที่ ๓๖ หน้าที่ ๖๗.
http://84000.org/tipitaka/read/attha_page.php?book=36&page=67&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=36&A=1326&modeTY=2&pagebreak=1
http://84000.org/tipitaka/atthapali/th_line.php?B=36&A=1326&modeTY=2&pagebreak=1#p67