ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๕๓ ภาษาบาลี อักษรไทย สงฺคณี.อ. (อฏฺฐสาลินี)

หน้าที่ ๘๘.

เอวํ อตฺตโน อตฺถวิเสสาภาเวน ปณฺฑิเตหิ สมฺปฏิจฺฉิโต, น จ กุสลารูปํจกฺขุมาสทฺทา
วิย อญฺญมญฺญํ อโนโลกิตตฺถภาเวน. กุสลสทฺโท ปเนตฺถ อนวชฺชสุขวิปากสงฺขาตสฺส
อตฺถสฺส โชตกภาเวน ๑- สมฺปฏิจฺฉิโต, อกุสลสทฺโท สาวชฺชทุกฺขวิปากตฺถโชตกตฺเตน,
อพฺยากตสทฺโท อวิปากตฺถโชตกตฺเตน, ธมฺมสทฺโท สภาวธารณาทิอตฺถโชตกตฺเตน.
โส เอเตสํ อญฺญตรานนฺตเร วุจฺจมาโน อตฺตโน อตฺถสามญฺญํ ทีเปติ.
สพฺเพว หิ เอเต สภาวธารณาทินา ลกฺขเณน ธมฺมา. กุสลาทิสทฺทา จาปิ
ธมฺมสทฺทสฺส ปุรโต วุจฺจมานา อตฺตโน อตฺตโน อตฺถวิเสสํ ตสฺส ทีเปนฺติ. ธมฺโม หิ
กุสโล วา โหติ อกุสโล วา อพฺยากโต วา. เอวเมเต วิสุํ วิสุํ วุจฺจมานา อตฺตโน
อตฺตโน อตฺถมตฺตทีปกตฺเตน สมฺปฏิจฺฉิตา. ธมฺมสทฺเทน สห วุจฺจมานา อตฺตโน
อตฺตโน อตฺถสามญฺญอตฺถวิเสสทีปกตฺเตน โลเก ปณฺฑิเตหิ สมฺปฏิจฺฉิตา. ตสฺมา
ยเทตเมตฺถ เอกตฺถนานตฺถตํ วิกปฺเปตฺวา โทสาโรปนการณํ วุตฺตํ, สพฺพเมตํ อการณํ.
อยนฺตาว กุสลตฺติกสฺส อนุปุพฺพปทวณฺณนา. อิมินาว นเยน เสสติกทุกานมฺปิ
นโย เวทิตพฺโพ. อิโต ปรํ ปน วิเสสมตฺตเมว วกฺขามิ. ๒-
     [๒] สุขาย เวทนายาติอาทีสุ สุขสทฺโท ตาว สุขเวทนาสุขมูลสุขารมฺมณ-
สุขเหตุสุขปจฺจยฏฺฐานอพฺยาปชฺฌนิพฺพานาทีสุ ทิสฺสติ. อยญฺหิ "สุขสฺส จ ปหานา"ติ-
อาทีสุ ๓- สุขเวทนาย ทิสฺสติ. สุโข พุทฺธานํ อุปฺปาโท. ๔- สุขา วิราคตา โลเก"ติ-
อาทีสุ ๕- สุขมูเล. "ยสฺมา จ โข มหาลิ รูปํ สุขํ สุขานุปติตํ สุขาวกฺกนฺตนฺ"ติ-
อาทีสุ ๖- สุขารมฺมเณ. "สุขสฺเสตํ ภิกฺขเว อธิวจนํ ยทิทํ ปุญฺญานี"ติอาทีสุ ๗-
สุขเหตุมฺหิ. "ยาวญฺจิทํ ภิกฺขเว น สุกรํ อกฺขาเนน ปาปุณิตุํ, ยาว สุขา สคฺคา. ๘-
น เต สุขํ ปชานนฺติ, เย น ปสฺสนฺติ นนฺทนนฺ"ติอาทีสุ ๙- สุขปจฺจยฏฺฐาเน.
"ทิฏฺฐธมฺมสุขวิหารา เอเต ธมฺมา"ติอาทีสุ ๑๐- อพฺยาปชฺเฌ. "นิพฺพานํ ปรมํ
@เชิงอรรถ:  ก. โชตนภาเวน                        ฉ.ม. วกฺขาม
@ ม.มู. ๑๒/๑๗๓/๑๓๔, อภิ. ๓๔/๑๖๕/๕๒      ขุ.ธ. ๒๕/๑๙๔/๕๒
@ วินย. ๔/๕/๕, ขุ.อุ. ๒๕/๑๑/๑๐๕          สํ.ข. ๑๗/๖๐/๕๗
@ องฺ. สตฺตก. ๒๓/๖๒/๗๓                  ม.อุ. ๑๔/๒๕๕/๒๒๓
@ สํ.ส. ๑๕/๑๑/๖                      ๑๐ ม.มู. ๑๒/๘๒/๕๔



เนื้อความอรรถกถาฉบับภาษาบาลี อักษรไทย เล่มที่ ๕๓ หน้าที่ ๘๘. http://84000.org/tipitaka/read/attha_page.php?book=53&page=88&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=53&A=2144&modeTY=2&pagebreak=1 http://84000.org/tipitaka/atthapali/th_line.php?B=53&A=2144&modeTY=2&pagebreak=1#p88


จบการแสดงผล หน้าที่ ๘๘.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]