อรรถกถาเล่มที่ ๕๕ หน้าที่ ๒๑๓.

๗. จิตฺตารมฺมณกถาวณฺณนา [๔๓๖-๔๓๘] อิทานิ จิตฺตารมฺมณกถา นาม โหติ. ตตฺถ เจโตปริยาเย ญาณนฺติ วจนมตฺตเมว คเหตฺวา "ตํ ญาณํ จิตฺตารมฺมณเมวา"ติ เยสํ ลทฺธิ เสยฺยถาปิ เอตรหิ อนฺธกานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. อถสฺส "โย สราคาทิวเสน จิตฺตํ ชานาติ, ตสฺส ราคาทโยปิ อารมฺมณา โหนฺติ, ตสฺมา น วตฺตพฺพํ ตํ จิตฺตารมฺมณญฺเญวา"ติ โจทนตฺถํ นนุ อตฺถิ โกจีติอาทิ อารทฺธํ. ผสฺสารมฺมเณติ ผสฺสสงฺขาเต อารมฺมเณ. เวทนารมฺมเณติอาทีสุปิ เอเสว นโย. ปุน ผสฺสารมฺมเณ ญาณํ น วตฺตพฺพนฺติ ปุฏฺโฐ ผสฺสสฺส ผุสนลกฺขณํ มนสิกโรโต ผสฺสารมฺมณํ ^๑- โหตีติ ปฏิชานาติ. กิมฺปเนตํ ผสฺสปริยาเย ญาณนฺติ ปุฏฺโฐ ปน ตาทิสสฺส สุตฺตปทสฺส อภาวา ปฏิกฺขิปติ. เวทนาทีสุปิ เอเสว นโย. อิทานิ ยํ นิสฺสาย ลทฺธิ, ตเทว ทสฺเสตฺวา ลทฺธึ ปติฏฺฐาเปตุํ นนุ เจโตปริยาเย ญาณนฺติอาทิมาห. สา ปเนสา วจนมตฺตาภินิเวเสน ปติฏฺฐาปิตาปิ อปฺปติฏฺฐาปิตาว โหตีติ. จิตฺตารมฺมณกถาวณฺณนา นิฏฺฐิตา. -------------- ๘. อนาคตญาณกถาวณฺณนา [๔๓๙-๔๔๐] อิทานิ อนาคตญาณกถา นาม โหติ. ตตฺถ อนาคตํ นาม อนฺตรมฺปิ อตฺถิ อนนฺตรมฺปิ. เตสุ อนนฺตเร เอกนฺเตเนว ญาณํ นตฺถิ. ยถา จ อนนฺตเร, ตถา เอกวีถิเอกชวนปริยาปนฺเนปิ. ตตฺถ เย สพฺพสฺมิมฺปิ อนาคตญาณํ อิจฺฉนฺติ เสยฺยถาปิ อนฺธกานํ, ^๒- เต สนฺธาย ปุจฺฉา สกวาทิสฺส, ปฏิญฺญา อิตรสฺส. อถ นํ "ยนฺเต อนาคเต ญาณํ, กินฺเตน อนนฺตรานาคตํ มูลาทิวเสน ชานาตี"ติ โจเทตุํ อนาคตํ มูลโตติอาทิมาห. ตตฺถ มูลโตติอาทีนิ สพฺพานิ การณเววจนาเนว. @เชิงอรรถ: ^๑ ฉ.ม. ผสฺโสวารมฺมณํ ^๒ ฉ. อนฺธกา

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๒๑๓. http://84000.org/tipitaka/read/attha_page.php?book=55&page=213&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=4783&modeTY=2&pagebreak=1 http://84000.org/tipitaka/atthapali/th_line.php?B=55&A=4783&modeTY=2&pagebreak=1#p213