อรรถกถาเล่มที่ ๕๕ หน้าที่ ๒๗๘.

ตสฺมา ทิฏฺฐิคตํ อปริยาปนฺนนฺติ เยสํ ลทฺธิ เสยฺยถาปิ ปุพฺพเสลิยานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. เสสเมตฺถ ยถาปาลิเมว นิยฺยาตีติ. อปริยาปนฺนกถาวณฺณนา นิฏฺฐิตา. จุทฺทสโม วคฺโค สมตฺโต. ------------ ๑๕. ปณฺณรสมวคฺค ๑. ปจฺจยตากถาวณฺณนา [๗๑๑-๗๑๗] อิทานิ ปจฺจยตากถา นาม โหติ. ตตฺถ โย ธมฺโม เหตุปจฺจเยน ปจฺจโย, โส เยสํ เหตุปจฺจเยน ปจฺจโย, เตสญฺเญว ยสฺมา อารมฺมณานนฺตรสมนนฺตรปจฺจเยน ปจฺจโย น โหติ, โย วา อารมฺมณปจฺจเยน ปจฺจโย, โส ยสฺมา เตสญฺเญว อนนฺตรสมนนฺตรปจฺจเยน ปจฺจโย น โหติ, ตสฺมา ปจฺจยตา ววตฺถิตาติ เยสํ ลทฺธิ เสยฺยถาปิ มหาสํฆิกานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. เสสเมตฺถ ยถาปาลิเมว นิยฺยาตีติ. ปจฺจยตากถาวณฺณนา นิฏฺฐิตา. ------------- ๒. อญฺญมญฺญปจฺจยกถาวณฺณนา [๗๑๘-๗๑๙] อิทานิ อญฺญมญฺญปจฺจยกถา นาม โหติ. ตตฺถ เยสํ สมเย "อวิชฺชาปจฺจยา สงฺขารา"ติ อยเมว ตนฺติ, "สงฺขารปจฺจยาปิ อวิชฺชา"ติ อยํ นตฺถิ, ตสฺมา อวิชฺชาว สงฺขารานํ ปจฺจโย, น ปน สงฺขารา อวิชฺชายาติ ลทฺธิ เสยฺยถาปิ มหาสํฆิกานํ, เต สนฺธาย อวิชฺชาสงฺขาราทีนํ อญฺญมญฺญปจฺจยตาปิ อตฺถีติ ทสฺเสตุ ํ ปุจฺฉา สกวาทิสฺส, ปฏิญฺญา อิตรสฺส. อวิชฺชา สงฺขาเรนาติ

เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๒๗๘. http://84000.org/tipitaka/read/attha_page.php?book=55&page=278&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=55&A=6262&modeTY=2&pagebreak=1 http://84000.org/tipitaka/atthapali/th_line.php?B=55&A=6262&modeTY=2&pagebreak=1#p278