อรรถกถาเล่มที่ ๕๕ ภาษาบาลี อักษรไทย
ปญฺจ.อ. (ปรมตฺถที.)
หน้าที่ ๓๒๒-๓๒๓.

หน้าที่ ๓๒๒.
                     ๙. อาเสวนปจฺจยตากถาวณฺณนา
     [๙๐๓-๙๐๕] อิทานิ อาเสวนปจฺจยตากถา นาม โหติ. ตตฺถ ยสฺมา
สพฺเพ ธมฺมา ขณิกา, น โกจิ มุหุตฺตมฺปิ ฐตฺวา อาเสวนปจฺจยํ อาเสวติ
นาม. ตสฺมา นตฺถิ กิญฺจิ อาเสวนปจฺจยตา, อาเสวนปจฺจยตาย อุปฺปนฺนํ
ปน น กิญฺจิ อตฺถีติ เยสํ ลทฺธิ เสยฺยถาปิ เตสญฺเญว, เต สนฺธาย ปุจฺฉา
สกวาทิสฺส, ปฏิญฺญา อิตรสฺส. อถ นํ สุตฺตวเสเนว ปญฺญาเปตุํ นนุ วุตฺตํ
ภควตา ปาณาติปาโตติอาทิ อาภตํ. ตํ สพฺพํ อุตฺตานตฺถเมวาติ.
                   อาเสวนปจฺจยตากถาวณฺณนา นิฏฺฐิตา.
                         ---------------
                         ๑๐. ขณิกกถาวณฺณนา
     [๙๐๖-๙๐๗] อิทานิ ขณิกกถา นาม โหติ. ตตฺถ ยสฺมา สพฺเพ
สงฺขตธมฺมา อนิจฺจา, ตสฺมา เอกจิตฺตกฺขณิกาเยว. สมานาย หิ อนิจฺจตาย
เอโก ลหุํ ภิชฺชติ, เอโก จิเรนาติ โก เอตฺถ วิเสโสติ ๑- เยสํ ลทฺธิ เสยฺยถาปิ
ปุพฺพเสลิยาปรเสลิยานํ, เต สนฺธาย เอกจิตฺตกฺขณิกาติ ปุจฺฉา สกวาทิสฺส, ปฏิญฺญา
อิตรสฺส. จิตฺเต มหาปฐวีติอาทีสุ เตสํ ตถา สณฺฐานํ อปสฺสนฺโต ปฏิกฺขิปติ.
จกฺขายตนนฺติอาทิ "ยทิ สพฺเพ เอกจิตฺตกฺขณิกา ภเวยฺยุํ, จกฺขายตนาทีนิ
จกฺขุวิญฺญาณาทีหิ สทฺธึเยว อุปฺปชฺชิตฺวา นิรุชฺเฌยฺยุนฺ"ติ โจทนตฺถํ วุตฺตํ.
อิตโร ปน อนฺโตมาตุกุจฺฉิคตสฺส วิญฺญาณุปฺปตฺตึ สนฺธาย ปฏิกฺขิปติ, ปวตฺตํ
สนฺธาย ลทฺธิวเสเนว ๒- ปฏิชานาติ. เสสเมตฺถ อุตฺตานตฺถเมวาติ. เตน หิ
@เชิงอรรถ: ๑ ฉ.ม. นิยาโมติ    ๒ ฉ.ม. ลทฺธิวเสน
---------------------------------------------------------------------------------------------
หน้าที่ ๓๒๓.
เอกจิตฺตกฺขณิกาติ ยสฺมา นิจฺจา น โหนฺติ, ตสฺมา เอกจิตฺตกฺขณิกาติ อตฺตโน
รุจิยา การณํ วทติ. ตํ อวุตฺตสทิสเมวาติ.
                       ขณิกกถาวณฺณนา นิฏฺฐิตา.
                       พาวีสติโม วคฺโค สมตฺโต.
                           ----------
                          ๒๓. เตวีสติมวคฺค
                      ๑. เอกาธิปฺปายกถาวณฺณนา
     [๙๐๘] อิทานิ เอกาธิปฺปายกถา นาม โหติ. ตตฺถ การุญฺเญน วา
เอเกน อธิปฺปาเยน เอกาธิปฺปาโย, สํสาเร วา เอกโต ภวิสฺสามาติ อิตฺถิยา
สทฺธึ พุทฺธปูชาทีนิ กตฺวา ปณิธิวเสน เอโก อธิปฺปาโย อสฺสาติ เอกาธิปฺปาโย,
เอวรูโป ทฺวินฺนมฺปิ ชนานํ เอกาธิปฺปาโย เมถุโน ธมฺโม ปฏิเสวิตพฺโพติ เยสํ
ลทฺธิ เสยฺยถาปิ อนฺธกานญฺเจว เวตุลฺลกานญฺจ, เต สนฺธาย ปุจฺฉา สกวาทิสฺส,
ปฏิญฺญา อิตรสฺส. เสสเมตฺถ ยถาปาลิเมว นิยฺยาตีติ.
                    เอกาธิปฺปายกถาวณฺณนา นิฏฺฐิตา.
                         --------------
                       ๒. อรหนฺตวณฺณกถาวณฺณนา
     [๙๐๙] อิทานิ อรหนฺตวณฺณกถา นาม โหติ. ตตฺถ อิริยาปถสมฺปนฺเน
อากปฺปสมฺปนฺเน ปาปภิกฺขู ทิสฺวา "อรหนฺตานํ วณฺเณน อมนุสฺสา เมถุนธมฺมํ
ปฏิเสวนฺตี"ติ เยสํ ลทฺธิ เสยฺยถาปิ เอกจฺจานํ อุตฺตราปถกานํ, เต สนฺธาย
ปุจฺฉา สกวาทิสฺส, ปฏิญฺญา อิตรสฺส. เสสเมตฺถ อุตฺตานตฺถเมวาติ.
                     อรหนฺตวณฺณกถาวณฺณนา นิฏฺฐิตา.
                          ------------


เนื้อความอรรถกถาฉบับภาษาบาลี อักษรไทย เล่มที่ ๕๕ หน้าที่ ๓๒๒-๓๒๓.
http://84000.org/tipitaka/read/attha_page.php?book=55&page=322&pages=2&modeTY=2&pagebreak=1&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=55&A=7248&modeTY=2&pagebreak=1
http://84000.org/tipitaka/atthapali/th_line.php?B=55&A=7248&modeTY=2&pagebreak=1#p322