พระไตรปิฎกเล่มที่ ๑๓ ภาษาบาลี อักษรไทย
พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ

     [๕๑๔]   อถ  ขฺวาหํ  อนุปุพฺเพน  จาริกํ  จรมาโน  เยน พาราณสี
อิสิปตนํ    มิคทาโย    เยน    ปญฺจวคฺคิยา   ภิกฺขู   เตนุปสงฺกมึ   ฯ
อทฺทสํสุ   โข   มํ   ราชกุมาร  ปญฺจวคฺคิยา  ภิกฺขู  ทูรโตว  อาคจฺฉนฺตํ
ทิสฺวาน    อญฺญมญฺญํ    กติกํ    สณฺฐเปสุํ    อยํ    อาวุโส    สมโณ
โคตโม   อาคจฺฉติ   พาหุลฺลิโก   ปธานวิพฺภนฺโต   อาวตฺโต  พาหุลฺลาย
โส    เนว   อภิวาเทตพฺโพ   น   ปจฺจุฏฺฐาตพฺโพ   นาสฺส   ปตฺตจีวรํ
ปฏิคฺคเหตพฺพํ   อปิจ   โข   อาสนํ   ฐเปตพฺพํ   สเจ   อากงฺขติ  ๕-
นิสีทิสฺสตีติ    ฯ   ยถา   ยถา   โข   อหํ   ราชกุมาร   ปญฺจวคฺคิเย
@เชิงอรรถ: ๑ ยุ. สีติภูโตสฺมิ ฯ  ๒ ยุ. อาหญฺฉํ ฯ    ๓ สี. โอกปฺเปตฺวา ฯ ยุ. โอกมฺเปตฺวา ฯ
@๔ ปททฺวยํ สีหฬโปตฺถเก นตฺถิ ฯ    ๕ ยุ. อากงฺขิสฺสติ ฯ
ภิกฺขู   อุปสงฺกมึ   ตถา   ตถา   ปญฺจวคฺคิยา   ภิกฺขู  นาสกฺขึสุ  สกาย
กติกาย   สณฺฐาตุํ   อปฺเปกจฺเจ  มํ  ปจฺจุคฺคนฺตฺวา  ปตฺตจีวรํ  ปฏิคฺคเหสุํ
อปฺเปกจฺเจ   อาสนํ   ปญฺญาเปสุํ   อปฺเปกจฺเจ   ปาโททกํ   อุปฏฺฐเปสุํ
อปิจ โข มํ นาเมน จ อาวุโสวาเทน จ สมุทาจรนฺติ ฯ
     {๕๑๔.๑}   เอวํ  วุตฺเต อหํ ราชกุมาร ปญฺจวคฺคิเย ภิกฺขู เอตทโวจํ
มา   ภิกฺขเว   ตถาคตํ   นาเมน   จ  อาวุโสวาเทน  จ  สมุทาจริตฺถ
อรหํ   ภิกฺขเว   ตถาคโต   สมฺมาสมฺพุทฺโธ   โอทหถ   ภิกฺขเว   โสตํ
อมตมธิคตํ    อหมนุสาสามิ   อหํ   ธมฺมํ   เทเสมิ   ยถานุสิฏฺฐํ   ตถา
ปฏิปชฺชมานา   นจิรสฺเสว   ยสฺสตฺถาย   กุลปุตฺตา  สมฺมเทว  อคารสฺมา
อนคาริยํ   ปพฺพชนฺติ   ตทนุตฺตรํ   พฺรหฺมจริยปริโยสานํ   ทิฏฺเฐว  ธมฺเม
สยํ   อภิญฺญา   สจฺฉิกตฺวา   อุปสมฺปชฺช   วิหริสฺสถาติ  ฯ  เอวํ  วุตฺเต
ราชกุมาร   ปญฺจวคฺคิยา   ภิกฺขู   มํ   เอตทโวจุํ   ตายปิ   โข   ตฺวํ
อาวุโส   โคตม   อิริยาย   ตาย   ปฏิปทาย  ตาย  ทุกฺกรการิกาย  น
อชฺฌคมา    อุตฺตรึ    มนุสฺสธมฺมา    อลมริยญาณทสฺสนวิเสสํ   กึ   ปน
ตฺวํ    เอตรหิ    พาหุลฺลิโก    ปธานวิพฺภนฺโต   อาวตฺโต   พาหุลฺลาย
อธิคมิสฺสสิ     อุตฺตรึ    มนุสฺสธมฺมา    อลมริยญาณทสฺสนวิเสสนฺติ    ฯ
เอวํ  วุตฺเต  อหํ  ราชกุมาร  ปญฺจวคฺคิเย  ภิกฺขู  เอตทโวจํ  น ภิกฺขเว
ตถาคโต    พาหุลฺลิโก    ปธานวิพฺภนฺโต   ๑-   อาวตฺโต   พาหุลฺลาย
อรหํ   ภิกฺขเว   ตถาคโต   สมฺมาสมฺพุทฺโธ   โอทหถ   ภิกฺขเว   โสตํ
อมตมธิคตํ    อหมนุสาสามิ   อหํ   ธมฺมํ   เทเสมิ   ยถานุสิฏฺฐํ   ตถา
@เชิงอรรถ: ๑ ยุ. น ปธานวิพฺภนฺโต น อาวตฺโต พาหุลฺลาย ฯ
ปฏิปชฺชมานา   นจิรสฺเสว   ยสฺสตฺถาย   กุลปุตฺตา  สมฺมเทว  อคารสฺมา
อนคาริยํ   ปพฺพชนฺติ   ตทนุตฺตรํ   พฺรหฺมจริยปริโยสานํ   ทิฏฺเฐว  ธมฺเม
สยํ อภิญฺญา สจฺฉิกตฺวา อุปสมฺปชฺช วิหริสฺสถาติ ฯ
     {๕๑๔.๒}   ทุติยมฺปิ  โข  ราชกุมาร ปญฺจวคฺคิยา ภิกฺขู มํ เอตทโวจุํ
ตายปิ  โข  ตฺวํ อาวุโส โคตม อิริยาย ตาย ปฏิปทาย ตาย ทุกฺกรการิกาย
น    อชฺฌคมา    อุตฺตรึ    มนุสฺสธมฺมา    อลมริยญาณทสฺสนวิเสสํ   กึ
ปน   ตฺวํ   เอตรหิ   พาหุลฺลิโก   ปธานวิพฺภนฺโต  อาวตฺโต  พาหุลฺลาย
อธิคมิสฺสสิ อุตฺตรึ มนุสฺสธมฺมา อลมริยญาณทสฺสนวิเสสนฺติ ฯ
     {๕๑๔.๓}   ทุติยมฺปิ   โข   อหํ   ราชกุมาร  ปญฺจวคฺคิเย  ภิกฺขู
เอตทโวจํ   น  ภิกฺขเว  ตถาคโต  พาหุลฺลิโก  ปธานวิพฺภนฺโต  อาวตฺโต
พาหุลฺลาย   อรหํ   ภิกฺขเว  ตถาคโต  สมฺมาสมฺพุทฺโธ  โอทหถ  ภิกฺขเว
โสตํ   อมตมธิคตํ   อหมนุสาสามิ  อหํ  ธมฺมํ  เทเสมิ  ยถานุสิฏฺฐํ  ตถา
ปฏิปชฺชมานา   นจิรสฺเสว   ยสฺสตฺถาย   กุลปุตฺตา  สมฺมเทว  อคารสฺมา
อนคาริยํ   ปพฺพชนฺติ   ตทนุตฺตรํ    พฺรหฺมจริยปริโยสานํ  ทิฏฺเฐว  ธมฺเม
สยํ อภิญฺญา สจฺฉิกตฺวา อุปสมฺปชฺช วิหริสฺสถาติ ฯ
     {๕๑๔.๔}   ตติยมฺปิ   โข   ราชกุมาร   ปญฺจวคฺคิยา   ภิกฺขู  มํ
เอตทโวจุํ   ตายปิ   โข   ตฺวํ  อาวุโส  ๑-  อิริยาย  ตาย  ปฏิปทาย
ตาย     ทุกฺกรการิกาย     น     อชฺฌคมา    อุตฺตรึ    มนุสฺสธมฺมา
อลมริยญาณทสฺสนวิเสสํ     กึ     ปน    ตฺวํ    เอตรหิ    พาหุลฺลิโก
ปธานวิพฺภนฺโต      อาวตฺโต     พาหุลฺลาย     อธิคมิสฺสสิ     อุตฺตรึ
มนุสฺสธมฺมา         อลมริยญาณทสฺสนวิเสสนฺติ        ฯ        เอวํ
@เชิงอรรถ: ๑ ยุ. อาวุโส โคตม ฯ
วุตฺเต   อหํ   ราชกุมาร   ปญฺจวคฺคิเย   ภิกฺขู   เอตทโวจํ  อภิชานาถ
เม   โน   ตุเมฺห   ภิกฺขเว   อิโต  ปุพฺเพ  เอวรูปํ  ภาสิตเมตนฺติ  ฯ
โน   เหตํ   ภนฺเต   ฯ   อรหํ   ภิกฺขเว   ตถาคโต   สมฺมาสมฺพุทฺโธ
โอทหถ    ภิกฺขเว    โสตํ    อมตมธิคตํ   อหมนุสาสามิ   อหํ   ธมฺมํ
เทเสมิ    ยถานุสิฏฺฐํ    ตถา   ปฏิปชฺชมานา   นจิรสฺเสว   ยสฺสตฺถาย
กุลปุตฺตา    สมฺมเทว    อคารสฺมา    อนคาริยํ   ปพฺพชนฺติ   ตทนุตฺตรํ
พฺรหฺมจริยปริโยสานํ    ทิฏฺเฐว    ธมฺเม    สยํ   อภิญฺญา   สจฺฉิกตฺวา
อุปสมฺปชฺช วิหริสฺสถาติ ฯ
     {๕๑๔.๕}   อสกฺขึ   โข   อหํ   ราชกุมาร   ปญฺจวคฺคิเย  ภิกฺขู
สญฺญาเปตุํ  ฯ  เทฺวปิ  สุทํ  ราชกุมาร  ภิกฺขู  โอวทามิ  ฯ  ตโย  ภิกฺขู
ปิณฺฑาย   จรนฺติ  ฯ  ยํ  ตโย  ภิกฺขู  ปิณฺฑาย  จริตฺวา  อาหรนฺติ  เตน
ฉพฺพคฺคา  ยาเปม  ฯ  ตโยปิ  สุทํ  ราชกุมาร  ภิกฺขู  โอวทามิ ฯ [๑]-
เทฺว  ภิกฺขู  ปิณฺฑาย  จริตฺวา  อาหรนฺติ  เตน  ฉพฺพคฺคา  ๒- ยาเปม ฯ
อถ  โข   ราชกุมาร  ปญฺจวคฺคิยา  ภิกฺขู  มยา  เอวํ โอวทิยมานา เอวํ
อนุสาสิยมานา   นจิรสฺเสว   ยสฺสตฺถาย  กุลปุตฺตา  สมฺมเทว  อคารสฺมา
อนคาริยํ   ปพฺพชนฺติ   ตทนุตฺตรํ   พฺรหฺมจริยปริโยสานํ   ทิฏฺเฐว  ธมฺเม
สยํ อภิญฺญา สจฺฉิกตฺวา อุปสมฺปชฺช วิหรึสูติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๓ หน้าที่ ๔๖๗-๔๗๐.
https://84000.org/tipitaka/read/pali_item.php?book=13&item=514&items=1
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=13&item=514&items=1&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=13&item=514&items=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=13&item=514&items=1
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=13&i=514
             สารบัญพระไตรปิฎกเล่มที่ ๑๓
https://84000.org/tipitaka/read/?index_13
https://84000.org/tipitaka/english/?index_13