พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

                              ตติยปาราชิกกณฺฑํ
     [๑๗๖]   เตน  สมเยน  พุทฺโธ  ภควา  เวสาลิยํ  วิหรติ มหาวเน
กูฏาคารสาลายํ  ฯ  เตน  โข  ปน สมเยน ภควา ภิกฺขูนํ อเนกปริยาเยน
อสุภกถํ   กเถติ   อสุภาย   วณฺณํ   ภาสติ  อสุภภาวนาย  วณฺณํ  ภาสติ
อาทิสฺส   อาทิสฺส   อสุภสมาปตฺติยา   วณฺณํ   ภาสติ  ฯ  อถโข  ภควา
ภิกฺขู   อามนฺเตสิ   อิจฺฉามหํ   ภิกฺขเว   อทฺธมาสํ   ปฏิสลฺลียิตุํ   นมฺหิ
เกนจิ   อุปสงฺกมิตพฺโพ   อญฺญตฺร   เอเกน   ปิณฺฑปาตนีหารเกนาติ   ฯ
เอวํ   ภนฺเตติ   โข   เต  ภิกฺขู  ภควโต  ปฏิสฺสุณิตฺวา  นาสฺสุธ  โกจิ
ภควนฺตํ อุปสงฺกมติ อญฺญตฺร เอเกน ปิณฺฑปาตนีหารเกน ฯ
     {๑๗๖.๑}   ภิกฺขู  ภควา โข อเนกปริยาเยน อสุภกถํ กเถติ อสุภาย
วณฺณํ  ภาสติ  อสุภภาวนาย  วณฺณํ  ภาสติ อาทิสฺส อาทิสฺส อสุภสมาปตฺติยา
วณฺณํ   ภาสตีติ   เต  ๑-  อเนกาการโวการํ  อสุภภาวนานุโยคมนุยุตฺตา
วิหรนฺติ  ฯ  เต  สเกน  กาเยน  อฏฺฏิยนฺติ หรายนฺติ ชิคุจฺฉนฺติ เสยฺยถาปิ
นาม   อิตฺถี   วา   ปุริโส   วา   ทหโร   ยุวา  มณฺฑนกชาติโก  สีสํ
นหาโต    อหิกุณเปน   วา   กุกฺกุรกุณเปน   วา   มนุสฺสกุณเปน   วา
กณฺเฐ  อาลคฺเคน  ๒-  อฏฺฏิเยยฺย  หราเยยฺย  ชิคุจฺเฉยฺย  เอวเมว เต
ภิกฺขู   สเกน   กาเยน   อฏฺฏิยนฺตา   หรายนฺตา  ชิคุจฺฉนฺตา  อตฺตนาปิ
อตฺตานํ    ชีวิตา    โวโรเปนฺติ    อญฺญมญฺญํปิ    ชีวิตา   โวโรเปนฺติ
@เชิงอรรถ: ๑ อติเรกปาเฐน ภวิตพฺพํ ๒ ยุ. ม. อาสตฺเตน ฯ รา. อาสฏฺเฐน ฯ
มิคลณฺฑิกํปิ   สมณกุตฺตกํ   อุปสงฺกมิตฺวา   เอวํ  วเทนฺติ  ๑-  สาธุ  โน
อาวุโส   ชีวิตา   โวโรเปหิ  อิทํ  เต  ปตฺตจีวรํ  ภวิสฺสตีติ  ฯ  อถโข
มิคลณฺฑิโก    สมณกุตฺตโก    ปตฺตจีวเรหิ    ภโฏ    สมฺพหุเล    ภิกฺขู
ชีวิตา   โวโรเปตฺวา  โลหิตกํ  ๒-  อสึ  อาทาย  เยน  วคฺคุมุทา  นที
เตนุปสงฺกมิ ฯ
     {๑๗๖.๒}   อถโข    มิคลณฺฑิกสฺส    สมณกุตฺตกสฺส    โลหีตกํ
ตํ   ๓-   อสึ  โธวนฺตสฺส  อหุเทว  กุกฺกุจฺจํ  อหุ  วิปฺปฏิสาโร  อลาภา
วต  เม  น  วต  เม  ลาภา  ทุลฺลทฺธํ  วต  เม  น  วต  เม  สุลทฺธํ
พหุํ   วต   มยา   อปุญฺญํ   ปสุตํ  โยหํ  ภิกฺขู  สีลวนฺเต  กลฺยาณธมฺเม
ชีวิตา   โวโรเปสินฺติ   ฯ   อถโข   อญฺญตรา   มารกายิกา   เทวตา
อภิชฺชมาเน    อุทเก   อาคนฺตฺวา   มิคลณฺฑิกํ   สมณกุตฺตกํ   เอตทโวจ
สาธุ   สาธุ   สปฺปุริส   ลาภา   เต   สปฺปุริส   สุลทฺธํ  เต  สปฺปุริส
พหุํ   ตยา   สปฺปุริส   ปุญฺญํ   ปสุตํ   ยํ   ตฺวํ  อติณฺเณ  ตาเรสีติ  ฯ
อถโข   มิคลณฺฑิโก   สมณกุตฺตโก   ลาภา   กิร  เม  สุลทฺธํ  กิร  เม
พหุํ   กิร   มยา   ปุญฺญํ   ปสุตํ  อติณฺเณ  กิราหํ  ตาเรมีติ  ติณฺหํ  ๔-
อสึ   อาทาย   วิหาเรน   วิหารํ   ปริเวเณน   ปริเวณํ  อุปสงฺกมิตฺวา
เอวํ   วเทติ   โก   อติณฺโณ  กํ  ตาเรมีติ  ฯ  ตตฺถ  เย  เต  ภิกฺขู
อวีตราคา   เตสํ   ตสฺมึ   สมเย   โหติเยว   ภยํ   โหติ   ฉมฺภิตตฺตํ
โหติ  โลมหํโส  ฯ  เย  ปน  เต  ภิกฺขู  วีตราคา  เตสํ ตสฺมึ สมเย น
@เชิงอรรถ: ๑ ยุ. ม. วทนฺติ ฯ ๒ ยุ. ม. โลหิตคตํ ฯ ๒ เตสุ โปตฺถเกสุ
@นตฺถิ อยํ ปาโฐ ฯ ๔ ยุ. ม. รา. ติกฺขํ ฯ
โหติ   ภยํ   น   โหติ   ฉมฺภิตตฺตํ   น   โหติ   โลมหํโส  ฯ  อถโข
มิคลณฺฑิโก   สมณกุตฺตโก  เอกํปิ  ภิกฺขุํ  เอกาเหเนว  ชีวิตา  โวโรเปสิ
เทฺวปิ   ภิกฺขู   เอกาเหน  ชีวิตา  โวโรเปสิ  ตโยปิ  ภิกฺขู  เอกาเหน
ชีวิตา   โวโรเปสิ   จตฺตาโรปิ   ภิกฺขู   เอกาเหน  ชีวิตา  โวโรเปสิ
ปญฺจปิ   ภิกฺขู   เอกาเหน   ชีวิตา   โวโรเปสิ   ฯเปฯ   ทสปิ  ภิกฺขู
เอกาเหน  ชีวิตา  โวโรเปสิ  วีสํปิ ๑- ภิกฺขู เอกาเหน ชีวิตา โวโรเปสิ
ตึสํปิ  ภิกฺขู  เอกาเหน  ชีวิตา  โวโรเปสิ จตฺตาฬีสํปิ ๒- ภิกฺขู เอกาเหน
ชีวิตา   โวโรเปสิ   ปญฺญาสํปิ   ภิกฺขู   เอกาเหน   ชีวิตา  โวโรเปสิ
สฏฺฐึปิ ภิกฺขู เอกาเหน ชีวิตา โวโรเปสิ ฯ
     [๑๗๗]   อถโข  ภควา  ตสฺส  อทฺธมาสสฺส  อจฺจเยน  ปฏิสลฺลานา
วุฏฺฐิโต   อายสฺมนฺตํ   อานนฺทํ  อามนฺเตสิ  กินฺนุ  โข  อานนฺท  ตนุภูโต
วิย  ภิกฺขุสงฺโฆติ  ฯ  ตถา  หิ  ปน  ภนฺเต ภควา ภิกฺขูนํ อเนกปริยาเยน
อสุภกถํ   กเถติ   อสุภาย   วณฺณํ   ภาสติ  อสุภภาวนาย  วณฺณํ  ภาสติ
อาทิสฺส   อาทิสฺส   อสุภสมาปตฺติยา   วณฺณํ   ภาสติ   เต   จ  ภนฺเต
ภิกฺขู   ภควา   โข   อเนกปริยาเยน   อสุภกถํ  กเถติ  อสุภาย  วณฺณํ
ภาสติ     อสุภภาวนาย     วณฺณํ     ภาสติ     อาทิสฺส     อาทิสฺส
อสุภสมาปตฺติยา      วณฺณํ     ภาสตีติ    อเนกาการโวการํ    อสุภ-
ภาวนานุโยคมนุยุตฺตา    วิหรนฺติ    เต   สเกน   กาเยน   อฏฺฏิยนฺติ
หรายนฺติ  ชิคุจฺฉนฺติ  เสยฺยถาปิ  นาม  อิตฺถี  วา  ปุริโส วา ทหโร ยุวา
@เชิงอรรถ: ๑ ยุ. วีสตึ ฯ ม. รา. วีสติปิ ฯ ๒ ยุ. จตฺตารีสํปิ ฯ
มณฺฑนกชาติโก   สีสํ   นหาโต   อหิกุณเปน   วา   กุกฺกุรกุณเปน   วา
มนุสฺสกุณเปน  วา  กณฺเฐ  อาลคฺเคน  อฏฺฏิเยยฺย  หราเยยฺย  ชิคุจฺเฉยฺย
เอวเมว  เต  ภิกฺขู  สเกน  กาเยน  อฏฺฏิยนฺตา  หรายนฺตา  ชิคุจฺฉนฺตา
อตฺตนาปิ   อตฺตานํ  ชีวิตา  โวโรเปนฺติ  อญฺญมญฺญํปิ  ชีวิตา  โวโรเปนฺติ
มิคลณฺฑิกํปิ    สมณกุตฺตกํ   อุปสงฺกมิตฺวา   เอวํ   วเทนฺติ   สาธุ   โน
อาวุโส  ชีวิตา  โวโรเปหิ  อิทํ  เต  ปตฺตจีวรํ  ภวิสฺสตีติ  อถโข ภนฺเต
มิคลณฺฑิโก   สมณกุตฺตโก   ปตฺตจีวเรหิ   ภโฏ  เอกํปิ  ภิกฺขุํ  เอกาเหน
ชีวิตา  โวโรเปสิ  ฯเปฯ  สฏฺฐึปิ  ภิกฺขู เอกาเหน ชีวิตา โวโรเปสิ สาธุ
ภนฺเต   ภควา   อญฺญํ   ปริยายํ  อาจิกฺขตุ  ยถายํ  ภิกฺขุสงฺโฆ  อญฺญาย
สณฺฐเหยฺยาติ   ฯ   เตนหานนฺท   ยาวติกา   ภิกฺขู  เวสาลึ  อุปนิสฺสาย
วิหรนฺติ   เต  สพฺเพ  อุปฏฺฐานสาลายํ  สนฺนิปาเตหีติ  ฯ  เอวํ  ภนฺเตติ
โข  อายสฺมา  อานนฺโท  ภควโต  ปฏิสฺสุณิตฺวา  ยาวติกา  ภิกฺขู  เวสาลึ
อุปนิสฺสาย    วิหรนฺติ   เต   สพฺเพ   อุปฏฺฐานสาลายํ   สนฺนิปาเตตฺวา
เยน  ภควา  เตนุปสงฺกมิ  อุปสงฺกมิตฺวา  ภควนฺตํ  เอตทโวจ  สนฺนิปติโต
ภนฺเต ภิกฺขุสงฺโฆ ยสฺสิทานิ ภนฺเต ภควา กาลํ มญฺญตีติ ฯ
     [๑๗๘]   อถโข   ภควา   เยน   อุปฏฺฐานสาลา   เตนุปสงฺกมิ
อุปสงฺกมิตฺวา   ปญฺญตฺเต   อาสเน   นิสีทิ   ฯ   นิสชฺช   โข   ภควา
ภิกฺขู   อามนฺเตสิ   อยํปิ   โข   ภิกฺขเว  อานาปานสฺสติสมาธิ  ภาวิโต
พหุลีกโต   สนฺโต   เจว  ปณีโต  จ  อเสจนโก  จ  สุโข  จ  วิหาโร
อุปฺปนฺนุปฺปนฺเน   จ   ปาปเก   อกุสเล   ธมฺเม  ฐานโส  อนฺตรธาเปติ
วูปสเมติ  เสยฺยถาปิ  ภิกฺขเว  คิมฺหานํ  ปจฺฉิเม  มาเส  อูหตํ  รโชชลฺลํ
ตเมนํ   มหาอกาลเมโฆ   ฐานโส   อนฺตรธาเปติ   วูปสเมติ  เอวเมว
โข   ภิกฺขเว   อานาปานสฺสติสมาธิ   ภาวิโต   พหุลีกโต  สนฺโต  เจว
ปณีโต   จ   อเสจนโก   จ   สุโข   จ   วิหาโร  อุปฺปนฺนุปฺปนฺเน  จ
ปาปเก    อกุสเล   ธมฺเม   ฐานโส   อนฺตรธาเปติ   วูปสเมติ   กถํ
ภาวิโต   จ   ภิกฺขเว   อานาปานสฺสติสมาธิ   กถํ   พหุลีกโต   สนฺโต
เจว   ปณีโต   จ   อเสจนโก   จ  สุโข  จ  วิหาโร  อุปฺปนฺนุปฺปนฺเน
จ ปาปเก อกุสเล ธมฺเม ฐานโส อนฺตรธาเปติ วูปสเมติ
     {๑๗๘.๑}   อิธ  ภิกฺขเว  ภิกฺขุ  อรญฺญคโต  วา  รุกฺขมูลคโต  วา
สุญฺญาคารคโต   วา   นิสีทติ   ปลฺลงฺกํ  อาภุชิตฺวา  อุชุํ  กายํ  ปณิธาย
ปริมุขํ สตึ อุปฏฺฐเปตฺวา โส สโต ว อสฺสสติ สโต ปสฺสสติ
     {๑๗๘.๒}   ทีฆํ  วา  อสฺสสนฺโต  ทีฆํ  อสฺสสามีติ ปชานาติ ทีฆํ วา
ปสฺสสนฺโต   ทีฆํ   ปสฺสสามีติ   ปชานาติ   รสฺสํ  วา  อสฺสสนฺโต  รสฺสํ
อสฺสสามีติ ปชานาติ รสฺสํ วา ปสฺสสนฺโต รสฺสํ ปสฺสสามีติ ปชานาติ
     {๑๗๘.๓}   สพฺพกายปฏิสํเวที   อสฺสสิสฺสามีติ   สิกฺขติ  สพฺพกาย-
ปฏิสํเวที   ปสฺสสิสฺสามีติ   สิกฺขติ  ปสฺสมฺภยํ  กายสงฺขารํ  อสฺสสิสฺสามีติ
สิกฺขติ    ปสฺสมฺภยํ   กายสงฺขารํ   ปสฺสสิสฺสามีติ   สิกฺขติ   ปีติปฏิสํเวที
อสฺสสิสฺสามีติ   สิกฺขติ   ปีติปฏิสํเวที  ปสฺสสิสฺสามีติ  สิกฺขติ  สุขปฏิสํเวที
อสฺสสิสฺสามีติ สิกฺขติ สุขปฏิสํเวที ปสฺสสิสฺสามีติ สิกฺขติ จิตฺตสงฺขารปฏิสํเวที
อสฺสสิสฺสามีติ    สิกฺขติ    จิตฺตสงฺขารปฏิสํเวที    ปสฺสสิสฺสามีติ   สิกฺขติ
ปสฺสมฺภยํ   จิตฺตสงฺขารํ   อสฺสสิสฺสามีติ   สิกฺขติ   ปสฺสมฺภยํ  จิตฺตสงฺขารํ
ปสฺสสิสฺสามีติ     สิกฺขติ     จิตฺตปฏิสํเวที     อสฺสสิสฺสามีติ     สิกฺขติ
จิตฺตปฏิสํเวที ปสฺสสิสฺสามีติ สิกฺขติ
     {๑๗๘.๔}   อภิปฺปโมทยํ  จิตฺตํ  อสฺสสิสฺสามีติ  สิกฺขติ  อภิปฺปโมทยํ
จิตฺตํ   ปสฺสสิสฺสามีติ   สิกฺขติ   สมาทหํ   จิตฺตํ   อสฺสสิสฺสามีติ   สิกฺขติ
สมาทหํ   จิตฺตํ   ปสฺสสิสฺสามีติ   สิกฺขติ   วิโมจยํ   จิตฺตํ  อสฺสสิสฺสามีติ
สิกฺขติ วิโมจยํ จิตฺตํ ปสฺสสิสฺสามีติ สิกฺขติ
     {๑๗๘.๕}   อนิจฺจานุปสฺสี   อสฺสสิสฺสามีติ   สิกฺขติ   อนิจฺจานุปสฺสี
ปสฺสสิสฺสามีติ   สิกฺขติ  วิราคานุปสฺสี  อสฺสสิสฺสามีติ  สิกฺขติ  วิราคานุปสฺสี
ปสฺสสิสฺสามีติ   สิกฺขติ  นิโรธานุปสฺสี  อสฺสสิสฺสามีติ  สิกฺขติ  นิโรธานุปสฺสี
ปสฺสสิสฺสามีติ     สิกฺขติ    ปฏินิสฺสคฺคานุปสฺสี    อสฺสสิสฺสามีติ    สิกฺขติ
ปฏินิสฺสคฺคานุปสฺสี ปสฺสสิสฺสามีติ สิกฺขติ
     {๑๗๘.๖}   เอวํ ภาวิโต โข ภิกฺขเว อานาปานสฺสติสมาธิ เอวํ พหุลีกโต
สนฺโต เจว ปณีโต จ อเสจนโก จ สุโข จ วิหาโร อุปฺปนฺนุปฺปนฺเน จ ปาปเก
อกุสเล ธมฺเม ฐานโส อนฺตรธาเปติ วูปสเมตีติ ฯ
     [๑๗๙]   อถโข  ภควา  เอตสฺมึ  นิทาเน เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา   ภิกฺขู   ปฏิปุจฺฉิ  สจฺจํ  กิร  ภิกฺขเว  ภิกฺขู  อตฺตนาปิ
อตฺตานํ    ชีวิตา    โวโรเปนฺติ    อญฺญมญฺญํปิ    ชีวิตา   โวโรเปนฺติ
มิคลณฺฑิกํปิ    สมณกุตฺตกํ   อุปสงฺกมิตฺวา   เอวํ   วเทนฺติ   สาธุ   โน
อาวุโส   ชีวิตา   โวโรเปหิ   อิทํ  เต  ปตฺตจีวรํ  ภวิสฺสตีติ  ฯ  สจฺจํ
ภควาติ   ฯ   วิครหิ  พุทฺโธ  ภควา  อนนุจฺฉวิกํ  ภิกฺขเว  เตสํ  ภิกฺขูนํ
อนนุโลมิกํ    อปฺปฏิรูปํ    อสฺสามณกํ    อกปฺปิยํ    อกรณียํ   กถํ   หิ
นาม   เต   ภิกฺขเว   ภิกฺขู  อตฺตนาปิ  อตฺตานํ  ชีวิตา  โวโรเปสฺสนฺติ
อญฺญมญฺญํปิ     ชีวิตา     โวโรเปสฺสนฺติ     มิคลณฺฑิกํปิ     สมณกุตฺตกํ
อุปสงฺกมิตฺวา   เอวํ   วกฺขนฺติ   สาธุ  โน  อาวุโส  ชีวิตา  โวโรเปหิ
อิทํ   เต   ปตฺตจีวรํ   ภวิสฺสตีติ   เนตํ   ภิกฺขเว   อปฺปสนฺนานํ   วา
ปสาทาย ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๑๗๙.๑}   โย  ปน  ภิกฺขุ  สญฺจิจฺจ มนุสฺสวิคฺคหํ ชีวิตา โวโรเปยฺย
สตฺถหารกํ วาสฺส ปริเยเสยฺย อยมฺปิ ปาราชิโก โหติ อสํวาโสติ ฯ
     {๑๗๙.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๑๘๐]   เตน   โข  ปน  สมเยน  อญฺญตโร  อุปาสโก  คิลาโน
โหติ   ฯ   ตสฺส   ปชาปตี   อภิรูปา   โหติ  ทสฺสนียา  ปาสาทิกา  ฯ
ฉพฺพคฺคิยา   ภิกฺขู   ตสฺสา   อิตฺถิยา   ปฏิพทฺธจิตฺตา  โหนฺติ  ฯ  อถโข
ฉพฺพคฺคิยานํ   ภิกฺขูนํ   เอตทโหสิ   สเจ   โข  โส  อาวุโส  อุปาสโก
ชีวิสฺสติ   น   มยํ   ตํ   อิตฺถึ   ลภิสฺสาม   หนฺท  มยํ  อาวุโส  ตสฺส
อุปาสกสฺส    มรณวณฺณํ   สํวณฺเณมาติ   ฯ   อถโข   ฉพฺพคฺคิยา   ภิกฺขู
เยน    โส    อุปาสโก   เตนุปสงฺกมึสุ   อุปสงฺกมิตฺวา   ตํ   อุปาสกํ
เอตทโวจุํ   ตฺวํ   โขสิ   อุปาสก  กตกลฺยาโณ  กตกุสโล  กตภีรุตฺตาโณ
อกตปาโป    อกตลุทฺโธ    อกตกิพฺพิโส   กตํ   ตยา   กลฺยาณํ   อกตํ
ตยา   ปาปํ   กึ   ตุยฺหิมินา   ปาปเกน   ทุชฺชีวิเตน   มตนฺเต  ชีวิตา
เสยฺโย  อิโต  ตฺวํ  กาลกโต  กายสฺส  เภทา  ปรํ  มรณา  สุคตึ  สคฺคํ
โลกํ    อุปปชฺชิสฺสสิ   ตตฺถ   ทิพฺเพหิ   ปญฺจหิ   กามคุเณหิ   สมปฺปิโต
สมงฺคิภูโต ปริจาเรสฺสสีติ ฯ
     {๑๘๐.๑}   อถโข  โส  อุปาสโก  สจฺจํ  โข  อยฺยา อาหํสุ อหญฺหิ
กตกลฺยาโณ     กตกุสโล     กตภีรุตฺตาโณ    อกตปาโป    อกตลุทฺโธ
อกตกิพฺพิโส   กตํ   มยา   กลฺยาณํ   อกตํ   มยา  ปาปํ  กึ  มยฺหิมินา
ปาปเกน   ทุชฺชีวิเตน   มตํ  เม  ชีวิตา  เสยฺโย  อิโต  อหํ  กาลกโต
กายสฺส   เภทา   ปรํ   มรณา  สุคตึ  สคฺคํ  โลกํ  อุปปชฺชิสฺสามิ  ตตฺถ
ทิพฺเพหิ   ปญฺจหิ   กามคุเณหิ  สมปฺปิโต  สมงฺคิภูโต  ปริจาเรสฺสามีติ  ฯ
โส   อสปฺปายานิ   เจว   โภชนานิ  ภุญฺชิ  อสปฺปายานิ  จ  ขาทนียานิ
ขาทิ  อสปฺปายานิ  จ  สายนียานิ  สายิ  อสปฺปายานิ  จ  ปานานิ ปิวิ ฯ
ตสฺส  อสปฺปายานิ  เจว  โภชนานิ  ภุญฺชโต  อสปฺปายานิ  จ  ขาทนียานิ
ขาทโต   อสปฺปายานิ  จ  สายนียานิ  สายโต  อสปฺปายานิ  จ  ปานานิ
ปิวโต  ขโร  อาพาโธ  อุปฺปชฺชิ  ฯ  โส เตเนว อาพาเธน กาลมกาสิ ฯ
ตสฺส   ปชาปตี   อุชฺฌายติ   ขียติ   วิปาเจติ   อลชฺชิโน  อิเม  สมณา
สกฺยปุตฺติยา    ทุสฺสีลา   มุสาวาทิโน   อิเม   หิ   นาม   ธมฺมจาริโน
สมจาริโน    พฺรหฺมจาริโน    สจฺจวาทิโน    สีลวนฺโต    กลฺยาณธมฺมา
ปฏิชานิสฺสนฺติ    นตฺถิ    อิเมสํ    สามญฺญํ   นตฺถิ   อิเมสํ   พฺรหฺมญฺญํ
นฏฺฐํ    อิเมสํ    สามญฺญํ   นฏฺฐํ   อิเมสํ   พฺรหฺมญฺญํ   กุโต   อิเมสํ
สามญฺญํ    กุโต    อิเมสํ    พฺรหฺมญฺญํ    อปคตา    อิเม   สามญฺญา
อปคตา    อิเม    พฺรหฺมญฺญา    อิเม    เม    สามิกสฺส   มรณวณฺณํ
สํวณฺเณสุํ   อิเมหิ   เม   สามิโก   มาริโตติ   ฯ   อญฺเญปิ   มนุสฺสา
อุชฺฌายนฺติ   ขียนฺติ   วิปาเจนฺติ   อลชฺชิโน   อิเม  สมณา  สกฺยปุตฺติยา
ทุสฺสีลา    มุสาวาทิโน    อิเม   หิ   นาม   ธมฺมจาริโน   สมจาริโน
พฺรหฺมจาริโน    สจฺจวาทิโน    สีลวนฺโต   กลฺยาณธมฺมา   ปฏิชานิสฺสนฺติ
นตฺถิ    อิเมสํ    สามญฺญํ   นตฺถิ   อิเมสํ   พฺรหฺมญฺญํ   นฏฺฐํ   อิเมสํ
สามญฺญํ    นฏฺฐํ   อิเมสํ   พฺรหฺมญฺญํ   กุโต   อิเมสํ   สามญฺญํ   กุโต
อิเมสํ    พฺรหฺมญฺญํ    อปคตา    อิเม    สามญฺญา    อปคตา   อิเม
พฺรหฺมญฺญา     อิเม     อุปาสกสฺส    มรณวณฺณํ    สํวณฺเณสุํ    อิเมหิ
อุปาสโก  มาริโตติ  ฯ  อสฺโสสุํ  โข  ภิกฺขู  เตสํ มนุสฺสานํ อุชฺฌายนฺตานํ
ขียนฺตานํ    วิปาเจนฺตานํ   ฯ   เย   เต   ภิกฺขู   อปฺปิจฺฉา   ฯเปฯ
เต    อุชฺฌายนฺติ   ขียนฺติ   วิปาเจนฺติ   กถํ   หิ   นาม   ฉพฺพคฺคิยา
ภิกฺขู อุปาสกสฺส มรณวณฺณํ สํวณฺเณสฺสนฺตีติ ฯ
     {๑๘๐.๒}   อถโข เต ภิกฺขู ภควโต เอตมตฺถํ อาโรเจสุํ ฯเปฯ สจฺจํ กิร
ตุเมฺห  ภิกฺขเว  อุปาสกสฺส  มรณวณฺณํ  สํวณฺเณถาติ  ฯ  สจฺจํ  ภควาติ ฯ
วิครหิ   พุทฺโธ   ภควา   อนนุจฺฉวิกํ   โมฆปุริสา  อนนุโลมิกํ  อปฺปฏิรูปํ
อสฺสามณกํ   อกปฺปิยํ   อกรณียํ   กถํ   หิ   นาม   ตุเมฺห   โมฆปุริสา
อุปาสกสฺส    มรณวณฺณํ   สํวณฺเณสฺสถ   เนตํ   โมฆปุริสา   อปฺปสนฺนานํ
วา    ปสาทาย    ฯเปฯ   เอวญฺจ   ปน   ภิกฺขเว   อิมํ   สิกฺขาปทํ
อุทฺทิเสยฺยาถ
     {๑๘๐.๓}   โย  ปน  ภิกฺขุ  สญฺจิจฺจ มนุสฺสวิคฺคหํ ชีวิตา โวโรเปยฺย
สตฺถหารกํ  วาสฺส  ปริเยเสยฺย  มรณวณฺณํ  วา  สํวณฺเณยฺย  มรณาย  วา
สมาทเปยฺย   อมฺโภ  ปุริส  กึ  ตุยฺหิมินา  ปาปเกน  ทุชฺชีวิเตน  มตนฺเต
ชีวิตา   เสยฺโยติ  อิติจิตฺตมโน  จิตฺตสงฺกปฺโป  อเนกปริยาเยน  มรณวณฺณํ
วา สํวณฺเณยฺย มรณาย วา สมาทเปยฺย อยมฺปิ ปาราชิโก โหติ อสํวาโสติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๑๒๘-๑๓๗.
http://84000.org/tipitaka/pitaka_item/pali_item_s.php?book=1&item=176&items=5&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=1&item=176&items=5&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=1&item=176&items=5&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=1&item=176&items=5&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=1&i=176
             The Pali Atthakatha in Thai :-
http://84000.org/tipitaka/atthapali/read_th.php?B=1&A=10112
             The Pali Atthakatha in Roman :-
http://84000.org/tipitaka/atthapali/read_rm.php?B=1&A=10112
             สารบัญพระไตรปิฎกเล่มที่ ๑
http://84000.org/tipitaka/read/?index_1