ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๔ ภาษาบาลี อักษรไทย พระสุตตันตปิฎกเล่มที่ ๖ สุตฺต. ม. อุปริปณฺณาสกํ
     [๘๑๐]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา    เอตทโวจ   ธมฺมํ   โว   ภิกฺขเว   เทสิสฺสามิ   อาทิกลฺยาณํ
มชฺเฌกลฺยาณํ    ปริโยสานกลฺยาณํ    สาตฺถํ    สพฺยญฺชนํ   เกวลปริปุณฺณํ
ปริสุทฺธํ   พฺรหฺมจริยํ   ปกาสิสฺสามิ   ยทิทํ   ฉ   ฉกฺกานิ   ตํ   สุณาถ
สาธุกํ   มนสิกโรถ   ภาสิสฺสามีติ   ฯ   เอวมฺภนฺเตติ   โข  เต  ภิกฺขู
ภควโต ปจฺจสฺโสสุํ ฯ
     [๘๑๑]   ภควา    เอตทโวจ    ฉ   อชฺฌตฺติกานิ   อายตนานิ
เวทิตพฺพานิ   ฉ   พาหิรานิ   อายตนานิ  เวทิตพฺพานิ  ฉ  วิญฺญาณกายา
เวทิตพฺพา   ฉ   ผสฺสกายา   เวทิตพฺพา   ฉ  เวทนากายา  เวทิตพฺพา
ฉ ตณฺหากายา เวทิตพฺพา ฯ
     [๘๑๒]   ฉ   อชฺฌตฺติกานิ   อายตนานิ   เวทิตพฺพานีติ  อิติ  โข
ปเนตํ   วุตฺตํ   ฯ   กิญฺเจตํ  ปฏิจฺจ  วุตฺตํ  ฯ  จกฺขฺวายตนํ  โสตายตนํ
ฆานายตนํ   ชิวฺหายตนํ   กายายตนํ   มนายตนํ   ฯ   ฉ   อชฺฌตฺติกานิ
อายตนานิ   เวทิตพฺพานีติ   อิติ  ยนฺตํ  วุตฺตํ  อิทเมตํ  ปฏิจฺจ  วุตฺตํ  ฯ
อิทํ ปฐมํ ฉกฺกํ ฯ
     [๘๑๓]   ฉ  พาหิรานิ  อายตนานิ  เวทิตพฺพานีติ  อิติ  โข  ปเนตํ
วุตฺตํ   ฯ   กิญฺเจตํ  ปฏิจฺจํ  วุตฺตํ  ฯ  รูปายตนํ  สทฺทายตนํ  คนฺธายตนํ
รสายตนํ   โผฏฺฐพฺพายตนํ   ธมฺมายตนํ   ฯ   ฉ   พาหิรานิ  อายตนานิ
เวทิตพฺพานีติ   อิติ   ยนฺตํ   วุตฺตํ   อิทเมตํ   ปฏิจฺจ   วุตฺตํ   ฯ  อิทํ
ทุติยํ ฉกฺกํ ฯ
     [๘๑๔]   ฉ  วิญฺญาณกายา  เวทิตพฺพาติ  อิติ  โข  ปเนตํ  วุตฺตํ ฯ
กิญฺเจตํ   ปฏิจฺจ   วุตฺตํ   ฯ   จกฺขุญฺจ   ปฏิจฺจ   รูเป   จ  อุปฺปชฺชติ
จกฺขุวิญฺญาณํ      โสตญฺจ      ปฏิจฺจ     สทฺเท     จ     อุปฺปชฺชติ
โสตวิญฺญาณํ    ฆานญฺจ   ปฏิจฺจ   คนฺเธ   จ   อุปฺปชฺชติ   ฆานวิญฺญาณํ
ชิวฺหญฺจ    ปฏิจฺจ    รเส    จ    อุปฺปชฺชติ   ชิวฺหาวิญฺญาณํ   กายญฺจ
ปฏิจฺจ    โผฏฺฐพฺเพ    จ    อุปฺปชฺชติ   กายวิญฺญาณํ   มนญฺจ   ปฏิจฺจ
ธมฺเม   จ   อุปฺปชฺชติ   มโนวิญฺญาณํ  ฯ  ฉ  วิญฺญาณกายา  เวทิตพฺพาติ
อิติ ยนฺตํ วุตฺตํ อิทเมตํ ปฏิจฺจ วุตฺตํ ฯ อิทํ ตติยํ ฉกฺกํ ฯ
     [๘๑๕]   ฉ  ผสฺสกายา  เวทิตพฺพาติ  อิติ  โข  ปเนตํ  วุตฺตํ  ฯ
กิญฺเจตํ   ปฏิจฺจ   สุตฺตํ   ฯ   จกฺขุญฺจ   ปฏิจฺจ   รูเป   จ  อุปฺปชฺชติ
จกฺขุวิญฺญาณํ    ติณฺณํ   สงฺคติ   ผสฺโส   ฯ   โสตญฺจ   ปฏิจฺจ   สทฺเท
จ    อุปฺปชฺชติ    โสตวิญฺญาณํ   ติณฺณํ   สงฺคติ   ผสฺโส   ฯ   ฆานญฺจ
ปฏิจฺจ     คนฺเธ    จ    อุปฺปชฺชติ    ฆานวิญฺญาณํ    ติณฺณํ    สงฺคติ
ผสฺโส    ฯ   ชิวฺหญฺจ   ปฏิจฺจ   รเส   จ   อุปฺปชฺชติ   ชิวฺหาวิญฺญาณํ
ติณฺณํ   สงฺคติ   ผสฺโส   ฯ   กายญฺจ  ปฏิจฺจ  โผฏฺฐพฺเพ  จ  อุปฺปชฺชติ
กายวิญฺญาณํ    ติณฺณํ    สงฺคติ   ผสฺโส   ฯ   มนญฺจ   ปฏิจฺจ   ธมฺเม
จ    อุปฺปชฺชติ    มโนวิญฺญาณํ    ติณฺณํ    สงฺคติ    ผสฺโส    ฯ   ฉ
ผสฺสกายา   เวทิตพฺพาติ   อิติ   ยนฺตํ  วุตฺตํ  อิทเมตํ  ปฏิจฺจ  วุตฺตํ  ฯ
อิทํ จตุตฺถํ ฉกฺกํ ฯ
     [๘๑๖]   ฉ  เวทนากายา  เวทิตพฺพาติ  อิติ  โข  ปเนตํ  วุตฺตํ ฯ
กิญฺเจตํ   ปฏิจฺจ   วุตฺตํ   ฯ   จกฺขุญฺจ   ปฏิจฺจ   รูเป   จ  อุปฺปชฺชติ
จกฺขุวิญฺญาณํ    ติณฺณํ    สงฺคติ    ผสฺโส    ผสฺสปจฺจยา   เวทนา   ฯ
โสตญฺจ   ปฏิจฺจ   สทฺเท   จ   อุปฺปชฺชติ   โสตวิญฺญาณํ  ...  ฆานญฺจ
ปฏิจฺจ   คนฺเธ   จ   อุปฺปชฺชติ   ฆานวิญฺญาณํ   ...   ชิวฺหญฺจ  ปฏิจฺจ
รเส   จ   อุปฺปชฺชติ   ชิวฺหาวิญฺญาณํ  ...  กายญฺจ  ปฏิจฺจ  โผฏฺฐพฺเพ
จ   อุปฺปชฺชติ   กายวิญฺญาณํ  ...  มนญฺจ  ปฏิจฺจ  ธมฺเม  จ  อุปฺปชฺชติ
มโนวิญฺญาณํ    ติณฺณํ    สงฺคติ    ผสฺโส    ผสฺสปจฺจยา   เวทนา   ฯ
ฉ   เวทนากายา   เวทิตพฺพาติ   อิติ   ยนฺตํ   วุตฺตํ   อิทเมตํ  ปฏิจฺจ
วุตฺตํ ฯ อิทํ ปญฺจมํ ฉกฺกํ ฯ
     [๘๑๗]   ฉ  ตณฺหากายา  เวทิตพฺพาติ  อิติ  โข  ปเนตํ  วุตฺตํ  ฯ
กิญฺเจตํ   ปฏิจฺจ   วุตฺตํ   ฯ   จกฺขุญฺจ   ปฏิจฺจ   รูเป   จ  อุปฺปชฺชติ
จกฺขุวิญฺญาณํ   ติณฺณํ  สงฺคติ  ผสฺโส  ผสฺสปจฺจยา  เวทนา  เวทนาปจฺจยา
ตณฺหา   ฯ   โสตญฺจ   ปฏิจฺจ  สทฺเท  จ  อุปฺปชฺชติ  โสตวิญฺญาณํ  ...
ฆานญฺจ    ปฏิจฺจ    คนฺเธ    จ    อุปฺปชฺชติ    ฆานวิญฺญาณํ    ...
ชิวฺหญฺจ   ปฏิจฺจ   รเส   จ   อุปฺปชฺชติ   ชิวฺหาวิญฺญาณํ  ...  กายญฺจ
ปฏิจฺจ   โผฏฺฐพฺเพ   จ   อุปฺปชฺชติ   กายวิญฺญาณํ  ...  มนญฺจ  ปฏิจฺจ
ธมฺเม     จ    อุปฺปชฺชติ    มโนวิญฺญาณํ    ติณฺณํ    สงฺคติ    ผสฺโส
ผสฺสปจฺจยา   เวทนา   เวทนาปจฺจยา   ตณฺหา   ฯ   ฉ   ตณฺหากายา
เวทิตพฺพาติ   อิติ   ยนฺตํ   วุตฺตํ   อิทเมตํ   ปฏิจฺจ   วุตฺตํ   ฯ   อิทํ
ฉฏฺฐํ ฉกฺกํ ฯ
     [๘๑๘]   จกฺขุ  อตฺตาติ  โย  เอวํ  ๑-  วเทยฺย ตํ น อุปปชฺชติ ฯ
จกฺขุสฺส   อุปฺปาโทปิ   วโยปิ  ปญฺญายติ  ฯ  ยสฺส  โข  ปน  อุปฺปาโทปิ
วโยปิ   ปญฺญายติ   อตฺตา   เม   อุปฺปชฺชติ   จ  เวติ  จาติ  อิจฺจสฺส
เอวมาคตํ   โหติ   ตสฺมา   ตํ   น   อุปปชฺชติ   จกฺขุ   อตฺตาติ  โย
วเทยฺย ฯ อิติ จกฺขุ อนตฺตา ฯ
     {๘๑๘.๑}   รูปา  อตฺตาติ  โย  วเทยฺย  ตํ  น อุปปชฺชติ ฯ รูปานํ
อุปฺปาโทปิ   วโยปิ   ปญฺญายติ   ฯ  ยสฺส  โข  ปน  อุปฺปาโทปิ  วโยปิ
ปญฺญายติ   อตฺตา   เม  อุปฺปชฺชติ  จ  เวติ  จาติ  อิจฺจสฺส  เอวมาคตํ
โหติ  ตสฺมา  ตํ  น  อุปปชฺชติ  รูปา  อตฺตาติ  โย  วเทยฺย ฯ อิติ จกฺขุ
อนตฺตา รูปา อนตฺตา ฯ
     {๘๑๘.๒}   จกฺขุวิญฺญาณํ  อตฺตาติ  โย  วเทยฺย  ตํ  น อุปปชฺชติ ฯ
จกฺขุวิญฺญาณสฺส   อุปฺปาโทปิ   วโยปิ   ปญฺญายติ   ฯ   ยสฺส   โข  ปน
อุปฺปาโทปิ   วโยปิ   ปญฺญายติ   อตฺตา  เม  อุปฺปชฺชติ  จ  เวติ  จาติ
อิจฺจสฺส   เอวมาคตํ   โหติ   ตสฺมา   ตํ   น   อุปปชฺชติ  จกฺขุวิญฺญาณํ
อตฺตาติ  โย  วเทยฺย  ฯ  อิติ  จกฺขุ  อนตฺตา  รูปา อนตฺตา จกฺขุวิญฺญาณํ
อนตฺตา ฯ
     {๘๑๘.๓}   จกฺขุสมฺผสฺโส    อตฺตาติ   โย   วเทยฺย   ตํ   น
อุปปชฺชติ       ฯ       จกฺขุสมฺผสฺสสฺส       อุปฺปาโทปิ      วโยปิ
@เชิงอรรถ:  ม. ยุ. เอวํสทฺโท นตฺถิ ฯ
ปญฺญายติ   ฯ   ยสฺส   โข   ปน  อุปฺปาโทปิ  วโยปิ  ปญฺญายติ  อตฺตา
เม   อุปฺปชฺชติ   จ   เวติ   จาติ   อิจฺจสฺส  เอวมาคตํ  โหติ  ตสฺมา
ตํ   น   อุปปชฺชติ   จกฺขุสมฺผสฺโส   อตฺตาติ   โย   วเทยฺย   ฯ  อิติ
จกฺขุ   อนตฺตา   รูปา   อนตฺตา   จกฺขุวิญฺญาณํ   อนตฺตา  จกฺขุสมฺผสฺโส
อนตฺตา ฯ
     {๘๑๘.๔}   เวทนา  อตฺตาติ  โย  วเทยฺย  ตํ  น  อุปปชฺชติ  ฯ
เวทนาย    อุปฺปาโทปิ    วโยปิ    ปญฺญายติ   ฯ   ยสฺส   โข   ปน
อุปฺปาโทปิ    วโยปิ   ปญฺญายติ   อตฺตา   เม   อุปฺปชฺชติ   จ   เวติ
จาติ   อิจฺจสฺส   เอวมาคตํ   โหติ   ตสฺมา  ตํ  น  อุปปชฺชติ  เวทนา
อตฺตาติ   โย   วเทยฺย   ฯ   อิติ   จกฺขุ   อนตฺตา   รูปา   อนตฺตา
จกฺขุวิญฺญาณํ อนตฺตา จกฺขุสมฺผสฺโส อนตฺตา เวทนา อนตฺตา ฯ
     {๘๑๘.๕}   ตณฺหา  อตฺตาติ  โย  วเทยฺย ตํ น อุปฺปชฺชติ ฯ ตณฺหาย
อุปฺปาโทปิ    วโยปิ    ปญฺญายติ   ฯ   ยสฺส   โข   ปน   อุปฺปาโทปิ
วโยปิ   ปญฺญายติ   อตฺตา   เม   อุปปชฺชติ   จ  เวติ  จาติ  อิจฺจสฺส
เอวมาคตํ    โหติ    ตสฺมา    ตํ   น   อุปปชฺชติ   ตณฺหา   อตฺตาติ
โย   วเทยฺย   ฯ   อิติ   จกฺขุ   อนตฺตา  รูปา  อนตฺตา  จกฺขุวิญฺญาณํ
อนตฺตา จกฺขุสมฺผสฺโส อนตฺตา เวทนา อนตฺตา ตณฺหา อนตฺตา ฯ
     [๘๑๙]   โสตํ  อตฺตาติ  โย  วเทยฺย  ...  ฆานํ  อตฺตาติ  โย
วเทยฺย  ...  ชิวฺหา  อตฺตาติ  โย  วเทยฺย  ...  กาโย  อตฺตาติ โย
วเทยฺย  ...  มโน  อตฺตาติ  โย  วเทยฺย  ตํ  น  อุปปชฺชติ  ฯ มนสฺส
อุปฺปาโทปิ    วโยปิ    ปญฺญายติ   ฯ   ยสฺส   โข   ปน   อุปฺปาโทปิ
วโยปิ   ปญฺญายติ   อตฺตา   เม   อุปฺปชฺชติ   จ  เวติ  จาติ  อิจฺจสฺส
เอวมาคตํ   โหติ   ตสฺมา   ตํ   น   อุปปชฺชติ   มโน   อตฺตาติ  โย
วเทยฺย ฯ อิติ มโน อนตฺตา ฯ
     {๘๑๙.๑}   ธมฺมา  อตฺตาติ  โย  วเทยฺย ตํ น อุปปชฺชติ ฯ ธมฺมานํ
อุปฺปาโทปิ   วโยปิ   ปญฺญายติ   ฯ  ยสฺส  โข  ปน  อุปฺปาโทปิ  วโยปิ
ปญฺญายติ   อตฺตา   เม  อุปฺปชฺชติ  จ  เวติ  จาติ  อิจฺจสฺส  เอวมาคตํ
โหติ  ตสฺมา  ตํ  น  อุปปชฺชติ  ธมฺมา  อตฺตาติ  โย วเทยฺย ฯ อิติ มโน
อนตฺตา ธมฺมา อนตฺตา ฯ
     {๘๑๙.๒}   มโนวิญฺญาณํ  อตฺตาติ  โย  วเทยฺย  ตํ  น อุปปชฺชติ ฯ
มโนวิญฺญาณสฺส   อุปฺปาโทปิ   วโยปิ   ปญฺญายติ   ฯ   ยสฺส   โข  ปน
อุปฺปาโทปิ    วโยปิ   ปญฺญายติ   อตฺตา   เม   อุปฺปชฺชติ   จ   เวติ
จาติ    อิจฺจสฺส    เอวมาคตํ    โหติ    ตสฺมา   ตํ   น   อุปปชฺชติ
มโนวิญฺญาณํ   อตฺตาติ   โย   วเทยฺย   ฯ  อิติ  มโน  อนตฺตา  ธมฺมา
อนตฺตา มโนวิญฺญาณํ อนตฺตา ฯ
     {๘๑๙.๓}   มโนสมฺผสฺโส  อตฺตาติ  โย  วเทยฺย  ตํ น อุปปชฺชติ ฯ
มโนสมฺผสฺสสฺส   อุปฺปาโทปิ   วโยปิ   ปญฺญายติ   ฯ   ยสฺส   โข  ปน
อุปฺปาโทปิ   วโยปิ   ปญฺญายติ   อตฺตา  เม  อุปฺปชฺชติ  จ  เวติ  จาติ
อิจฺจสฺส   เอวมาคตํ   โหติ   ตสฺมา   ตํ   น  อุปปชฺชติ  มโนสมฺผสฺโส
อตฺตาติ   โย   วเทยฺย   ฯ   อิติ   มโน   อนตฺตา   ธมฺมา  อนตฺตา
มโนวิญฺญาณํ อนตฺตา มโนสมฺผสฺโส อนตฺตา ฯ
     {๘๑๙.๔}   เวทนา  อตฺตาติ  โย  วเทยฺย  ตํ  น  อุปปชฺชติ  ฯ
เวทนาย      อุปฺปาโทปิ      วโยปิ      ปญฺญายติ     ฯ     ยสฺส
โข    ปน   อุปฺปาโทปิ   วโยปิ   ปญฺญายติ   อตฺตา   เม   อุปฺปชฺชติ
จ   เวติ   จาติ   อิจฺจสฺส  เอวมาคตํ  โหติ  ตสฺมา  ตํ  น  อุปปชฺชติ
เวทนา  อตฺตาติ  โย  วเทยฺย  ฯ  อิติ  มโน  อนตฺตา  ธมฺมา  อนตฺตา
มโนวิญฺญาณํ อนตฺตา มโนสมฺผสฺโส อนตฺตา เวทนา อนตฺตา ฯ
     {๘๑๙.๕}   ตณฺหา   อตฺตาติ  โย  วเทยฺย  ตํ  น  อุปปชฺชติ  ฯ
ตณฺหาย   อุปฺปาโทปิ   วโยปิ  ปญฺญายติ  ฯ  ยสฺส  โข  ปน  อุปฺปาโทปิ
วโยปิ   ปญฺญายติ   อตฺตา   เม   อุปฺปชฺชติ   จ  เวติ  จาติ  อิจฺจสฺส
เอวมาคตํ    โหติ    ตสฺมา    ตํ   น   อุปปชฺชติ   ตณฺหา   อตฺตาติ
โย   วเทยฺย   ฯ   อิติ   มโน  อนตฺตา  ธมฺมา  อนตฺตา  มโนวิญฺญาณํ
อนตฺตา มโนสมฺผสฺโส อนตฺตา เวทนา อนตฺตา ตณฺหา อนตฺตา ฯ
     [๘๒๐]   อยํ  โข  ปน  ภิกฺขเว  สกฺกายสมุทยคามินี  ปฏิปทา  ฯ
จกฺขุํ   เอตํ   มม   เอโสหมสฺมิ   เอโส  เม  อตฺตาติ  สมนุปสฺสติ  ฯ
รูเป   เอตํ   มม   เอโสหมสฺมิ   เอโส  เม  อตฺตาติ  สมนุปสฺสติ  ฯ
จกฺขุวิญฺญาณํ    เอตํ    มม    เอโสหมสฺมิ    เอโส    เม   อตฺตาติ
สมนุปสฺสติ   ฯ   จกฺขุสมฺผสฺสํ   เอตํ   มม   เอโสหมสฺมิ   เอโส  เม
อตฺตาติ   สมนุปสฺสติ   ฯ   เวทนํ   เอตํ   มม   เอโสหมสฺมิ   เอโส
เม   อตฺตาติ   สมนุปสฺสติ   ฯ   ตณฺหํ  เอตํ  มม  เอโสหมสฺมิ  เอโส
เม   อตฺตาติ   สมนุปสฺสติ   ฯ   โสตํ   เอตํ  มม  ...  ฆานํ  เอตํ
มม  ...  ชิวฺหํ  เอตํ  มม  ...  กายํ  เอตํ  มม  ... มนํ เอตํ มม
เอโสหมสฺมิ   เอโส   เม   อตฺตาติ   สมนุปสฺสติ   ฯ   ธมฺเม   เอตํ
มม   เอโสหมสฺมิ   เอโส   เม   อตฺตาติ  สมนุปสฺสติ  ฯ  มโนวิญฺญาณํ
เอตํ   มม   เอโสหมสฺมิ   เอโส   เม  อตฺตาติ  สมนุปสฺสติ  ฯ  ตณฺหํ
เอตํ มม เอโสหมสฺมิ เอโส เม อตฺตาติ สมนุปสฺสติ ฯ
     [๘๒๑]   อยํ  โข  ปน  ภิกฺขเว  สกฺกายนิโรธคามินี  ปฏิปทา  ฯ
จกฺขุํ   เนตํ   มม   เนโสหมสฺมิ   น   เมโส  อตฺตาติ  สมนุปสฺสติ  ฯ
รูเป   เนตํ   มม   เนโสหมสฺมิ   น   เมโส  อตฺตาติ  สมนุปสฺสติ  ฯ
จกฺขุวิญฺญาณํ    เนตํ    มม    เนโสหมสฺมิ    น    เมโส    อตฺตาติ
สมนุปสฺสติ   ฯ   จกฺขุสมฺผสฺสํ   เนตํ   มม   เนโสหมสฺมิ   น   เมโส
อตฺตาติ   สมนุปสฺสติ   ฯ   เวทนํ   เนตํ  มม  เนโสหมสฺมิ  น  เมโส
อตฺตาติ   สมนุปสฺสติ   ฯ   ตณฺหํ   เนตํ   มม  เนโสหมสฺมิ  น  เมโส
อตฺตาติ  สมนุปสฺสติ  ฯ  โสตํ  เนตํ  มม  ...  ฆานํ  เนตํ  มม  ...
ชิวฺหํ  เนตํ  มม  ...  กายํ  เนตํ  มม  ... มนํ เนตํ มม เนโสหมสฺมิ
น   เมโส   อตฺตาติ   สมนุปสฺสติ   ฯ  ธมฺเม  เนตํ  มม  เนโสหมสฺมิ
น    เมโส    อตฺตาติ    สมนุปสฺสติ   ฯ   มโนวิญฺญาณํ   เนตํ   มม
เนโสหมสฺมิ   น   เมโส   อตฺตาติ   สมนุปสฺสติ  ฯ  มโนสมฺผสฺสํ  เนตํ
มม   เนโสหมสฺมิ   น   เมโส   อตฺตาติ  สมนุปสฺสติ  ฯ  เวทนํ  เนตํ
มม   เนโสหมสฺมิ   น   เมโส   อตฺตาติ   สมนุปสฺสติ  ฯ  ตณฺหํ  เนตํ
มม เนโสหมสฺมิ น เมโส อตฺตาติ สมนุปสฺสติ ฯ
     [๘๒๒]   จกฺขุญฺจ    ภิกฺขเว    ปฏิจฺจ   รูเป   จ   อุปฺปชฺชติ
จกฺขุวิญฺญาณํ   ติณฺณํ   สงฺคติ   ผสฺโส   ผสฺสปจฺจยา   อุปฺปชฺชติ  เวทยิตํ
สุขํ  วา  ทุกฺขํ  วา  อทุกฺขมสุขํ  วา  ฯ  โส  สุขาย  เวทนาย  ผุฏฺโฐ
สมาโน     อภินนฺทติ     อภิวทติ     อชฺโฌสาย     ติฏฺฐติ     ตสฺส
ราคานุสโย   อนุเสติ   ฯ   ทุกฺขาย  เวทนาย  ผุฏฺโฐ  สมาโน  โสจติ
กิลมติ    ปริเทวติ    อุรตฺตาฬึ    กนฺทติ   สมฺโมหํ   อาปชฺชติ   ตสฺส
ปฏิฆานุสโย   อนุเสติ   ฯ   อทุกฺขมสุขาย   เวทนาย   ผุฏฺโฐ  สมาโน
ตสฺสา    เวทนาย    สมุทยญฺจ   อตฺถงฺคมญฺจ   อสฺสาทญฺจ   อาทีนวญฺจ
นิสฺสรณญฺจ ยถาภูตํ นปฺปชานาติ ตสฺส อวิชฺชานุสโย อนุเสติ ฯ
     {๘๒๒.๑}   โส  วต  ภิกฺขเว  สุขาย เวทนาย ราคานุสยํ อปฺปหาย
ทุกฺขาย  เวทนาย  ปฏิฆานุสยํ  อปฺปฏิวิโนเทตฺวา  อทุกฺขมสุขาย  เวทนาย
อวิชฺชานุสยํ    อสมูหนิตฺวา   อวิชฺชํ   อปฺปหาย   วิชฺชํ   อนุปฺปาเทตฺวา
ทิฏฺเฐว   ธมฺเม   ทุกฺขสฺสนฺตกโร   ภวิสฺสตีติ   เนตํ   ฐานํ  วิชฺชติ  ฯ
โสตญฺจ   ภิกฺขเว   ปฏิจฺจ   สทฺเท   จ   อุปฺปชฺชติ  โสตวิญฺญาณํ  ...
ฆานญฺจ   ภิกฺขเว   ปฏิจฺจ   คนฺเธ   จ   อุปฺปชฺชติ  ฆานวิญฺญาณํ  ...
ชิวฺหญฺจ   ภิกฺขเว   ปฏิจฺจ   รเส   จ   อุปฺปชฺชติ  ชิวฺหาวิญฺญาณํ  ...
กายญฺจ   ภิกฺขเว   ปฏิจฺจ  โผฏฺฐพฺเพ  จ  อุปฺปชฺชติ  กายวิญฺญาณํ  ...
มนญฺจ   ภิกฺขเว   ปฏิจฺจ   ธมฺเม   จ   อุปฺปชฺชติ   มโนวิญฺญาณํ  ติณฺณํ
สงฺคติ   ผสฺโส   ผสฺสปจฺจยา   อุปฺปชฺชติ   เวทยิตํ   สุขํ   วา   ทุกฺขํ
วา   อทุกฺขมสุขํ   วา   ฯ   โส   สุขาย   เวทนาย  ผุฏฺโฐ  สมาโน
อภินนฺทติ     อภิวทติ     อชฺโฌสาย    ติฏฺฐติ    ตสฺส    ราคานุสโย
อนุเสติ  ฯ  ทุกฺขาย  เวทนาย  ผุฏฺโฐ  สมาโน  โสจติ  กิลมติ ปริเทวติ
อุรตฺตาฬึ   กนฺทติ   สมฺโมหํ   อาปชฺชติ  ตสฺส  ปฏิฆานุสโย  อนุเสติ  ฯ
อทุกฺขมสุขาย     เวทนาย    ผุฏฺโฐ    สมาโน    ตสฺสา    เวทนาย
สมุทยญฺจ     อตฺถงฺคมญฺจ     อสฺสาทญฺจ     อาทีนวญฺจ     นิสฺสรณญฺจ
ยถาภูตํ   นปฺปชานาติ   ตสฺส   อวิชฺชานุสโย   อนุเสติ   ฯ   โส  วต
ภิกฺขเว   สุขาย   เวทนาย   ราคานุสยํ   อปฺปหาย  ทุกฺขาย  เวทนาย
ปฏิฆานุสยํ    อปฺปฏิวิโนเทตฺวา   อทุกฺขมสุขาย   เวทนาย   อวิชฺชานุสยํ
อสมูหนิตฺวา   อวิชฺชํ   อปฺปหาย   วิชฺชํ  อนุปฺปาเทตฺวา  ทิฏฺเฐว  ธมฺเม
ทุกฺขสฺสนฺตกโร ภวิสฺสตีติ เนตํ ฐานํ วิชฺชติ ฯ
     [๘๒๓]   จกฺขุญฺจ   โข   ภิกฺขเว   ปฏิจฺจ   รูเป  จ  อุปฺปชฺชติ
จกฺขุวิญฺญาณํ   ติณฺณํ   สงฺคติ   ผสฺโส   ผสฺสปจฺจยา   อุปฺปชฺชติ  เวทยิตํ
สุขํ  วา  ทุกฺขํ  วา  อทุกฺขมสุขํ  วา  ฯ  โส  สุขาย  เวทนาย  ผุฏฺโฐ
สมาโน     นาภินนฺทติ     นาภิวทติ    นาชฺโฌสาย    ติฏฺฐติ    ตสฺส
ราคานุสโย  นานุเสติ  ฯ  ทุกฺขาย  เวทนาย  ผุฏฺโฐ สมาโน น โสจติ น
กิลมติ   น   ปริเทวติ   น   อุรตฺตาฬึ   กนฺทติ  น  สมฺโมหํ  อาปชฺชติ
ตสฺส   ปฏิฆานุสโย   นานุเสติ   ฯ   อทุกฺขมสุขาย   เวทนาย   ผุฏฺโฐ
สมาโน    ตสฺสา    เวทนาย    สมุทยญฺจ    อตฺถงฺคมญฺจ   อสฺสาทญฺจ
อาทีนวญฺจ    นิสฺสรณญฺจ    ยถาภูตํ    ปชานาติ   ตสฺส   อวิชฺชานุสโย
นานุเสติ ฯ
     {๘๒๓.๑}   โส  วต  ภิกฺขเว  สุขาย  เวทนาย  ราคานุสยํ ปหาย
ทุกฺขาย   เวทนาย   ปฏิฆานุสยํ  ปฏิวิโนเทตฺวา  อทุกฺขมสุขาย  เวทนาย
อวิชฺชานุสยํ   สมูหนิตฺวา   อวิชฺชํ   ปหาย  วิชฺชํ  อุปฺปาเทตฺวา  ทิฏฺเฐว
ธมฺเม    ทุกฺขสฺสนฺตกโร   ภวิสฺสตีติ   ฐานเมตํ   วิชฺชติ   ฯ   โสตญฺจ
ภิกฺขเว   ปฏิจฺจ   สทฺเท   จ   อุปฺปชฺชติ   โสตวิญฺญาณํ  ...  ฆานญฺจ
ภิกฺขเว   ปฏิจฺจ   คนฺเธ   จ   อุปฺปชฺชติ   ฆานวิญฺญาณํ  ...  ชิวฺหญฺจ
ภิกฺขเว   ปฏิจฺจ   รเส   จ   อุปฺปชฺชติ   ชิวฺหาวิญฺญาณํ  ...  กายญฺจ
ภิกฺขเว   ปฏิจฺจ   โผฏฺฐพฺเพ   จ  อุปฺปชฺชติ  กายวิญฺญาณํ  ...  มนญฺจ
ภิกฺขเว    ปฏิจฺจ    ธมฺเม    จ    อุปฺปชฺชติ    มโนวิญฺญาณํ    ติณฺณํ
สงฺคติ   ผสฺโส   ผสฺสปจฺจยา   อุปฺปชฺชติ   เวทยิตํ   สุขํ   วา   ทุกฺขํ
วา   อทุกฺขมสุขํ   วา   ฯ   โส   สุขาย   เวทนาย  ผุฏฺโฐ  สมาโน
นาภินนฺทติ    นาภิวทติ    นาชฺโฌสาย    ติฏฺฐติ    ตสฺส   ราคานุสโย
นานุเสติ  ฯ  ทุกฺขาย  เวทนาย  ผุฏฺโฐ  สมาโน  น  โสจติ  น  กิลมติ
น   ปริเทวติ   น   อุรตฺตาฬึ   กนฺทติ   น   สมฺโมหํ  อาปชฺชติ  ตสฺส
ปฏิฆานุสโย   นานุเสติ   ฯ   อทุกฺขมสุขาย   เวทนาย  ผุฏฺโฐ  สมาโน
ตสฺสา    เวทนาย    สมุทยญฺจ   อตฺถงฺคมญฺจ   อสฺสาทญฺจ   อาทีนวญฺจ
นิสฺสรณญฺจ ยถาภูตํ ปชานาติ ตสฺส อวิชฺชานุสโย นานุเสติ ฯ
     {๘๒๓.๒}   โส  วต  ภิกฺขเว  สุขาย  เวทนาย  ราคานุสยํ ปหาย
ทุกฺขาย   เวทนาย   ปฏิฆานุสยํ  ปฏิวิโนเทตฺวา  อทุกฺขมสุขาย  เวทนาย
อวิชฺชานุสยํ   สมูหนิตฺวา   อวิชฺชํ   ปหาย  วิชฺชํ  อุปฺปาเทตฺวา  ทิฏฺเฐว
ธมฺเม ทุกฺขสฺสนฺตกโร ภวิสฺสตีติ ฐานเมตํ วิชฺชตีติ ฯ
     [๘๒๔]   เอวํ   ปสฺสํ   ภิกฺขเว   สุตวา  อริยสาวโก  จกฺขุสฺมึปิ
นิพฺพินฺทติ      รูเปสุปิ      นิพฺพินฺทติ     จกฺขุวิญฺญาเณปิ     นิพฺพินฺทติ
จกฺขุสมฺผสฺเสปิ   นิพฺพินฺทติ   เวทนายปิ   นิพฺพินฺทติ   ตณฺหายปิ  นิพฺพินฺทติ
โสตสฺมึปิ   นิพฺพินฺทติ   สทฺเทสุปิ   นิพฺพินฺทติ   ...  ฆานสฺมึปิ  นิพฺพินฺทติ
คนฺเธสุปิ  นิพฺพินฺทติ  ...  ชิวฺหายปิ  นิพฺพินฺทติ  รเสสุปิ  นิพฺพินฺทติ  ...
กายสฺมึปิ   นิพฺพินฺทติ  โผฏฺฐพฺเพสุปิ  นิพฺพินฺทติ  ...  มนสฺมึปิ  นิพฺพินฺทติ
ธมฺเมสุปิ     นิพฺพินฺทติ    มโนวิญฺญาเณปิ    นิพฺพินฺทติ    มโนสมฺผสฺเสปิ
นิพฺพินฺทติ   เวทนายปิ   นิพฺพินฺทติ   ตณฺหายปิ   นิพฺพินฺทติ   ฯ   นิพฺพินฺทํ
วิรชฺชติ    วิราคา    วิมุจฺจติ    วิมุตฺตสฺมึ    วิมุตฺตมิติ   ญาณํ   โหติ
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานาตีติ ฯ
     อิทมโวจ    ภควา    อตฺตมนา   เต   ภิกฺขู   ภควโต   ภาสิตํ
อภินนฺทุนฺติ    ฯ    อิมสฺมิญฺจ   ๑-   ปน   เวยฺยากรณสฺมึ   ภญฺญมาเน
สฏฺฐิมตฺตานํ ภิกฺขูนํ อนุปาทาย อาสเวหิ จิตฺตานิ วิมุจฺจึสูติ ฯ
                  ฉฉกฺกสุตฺตํ นิฏฺฐิตํ ฉฏฺฐํ ฯ
                        -------
@เชิงอรรถ:  ม. ยุ. อิมสฺมึ โข ปน ฯ
                   สฬายตนวิภงฺคสุตฺตํ ๑-



             เนื้อความพระไตรปิฎกฉบับภาษาบาลีอักษรไทย เล่มที่ ๑๔ หน้าที่ ๕๐๙-๕๒๑. http://84000.org/tipitaka/pitaka_item/pali_item_s.php?book=14&item=810&items=15&modeTY=2&mode=bracket              อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=14&item=810&items=15&modeTY=2              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=14&item=810&items=15&modeTY=2&mode=bracket              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=14&item=810&items=15&modeTY=2&mode=bracket              ศึกษาอรรถกถานี้ได้ที่ :- http://84000.org/tipitaka/attha/attha.php?b=14&i=810              The Pali Atthakatha in Thai :- http://84000.org/tipitaka/atthapali/read_th.php?B=10&A=6371              The Pali Atthakatha in Roman :- http://84000.org/tipitaka/atthapali/read_rm.php?B=10&A=6371              สารบัญพระไตรปิฎกเล่มที่ ๑๔ http://84000.org/tipitaka/read/?index_14

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :