พระไตรปิฎกเล่มที่ ๑๖ ภาษาบาลี อักษรไทย
พระสุตตันตปิฎกเล่มที่ ๘ สุตฺต. สํ. นิทานวคฺโค

                       ลกฺขณสํยุตฺตํ
                        ------
                      ปฐมวคฺโค ปฐโม
     [๖๓๖]   เอวมฺเม   สุตํ   เอกํ  สมยํ  ภควา  ราชคเห  วิหรติ
เวฬุวเน   กลนฺทกนิวาเป   ฯ   เตน  โข  ปน  สมเยน  อายสฺมา  จ
ลกฺขโณ    อายสฺมา    จ    มหาโมคฺคลฺลาโน    คิชฺฌกูเฏ    ปพฺพเต
วิหรนฺติ ฯ
     [๖๓๗]   อถ   โข   อายสฺมา   มหาโมคฺคลฺลาโน   ปุพฺพณฺหสมยํ
นิวาเสตฺวา    ปตฺตจีวรมาทาย    เยนายสฺมา    ลกฺขโณ   เตนุปสงฺกมิ
อุปสงฺกมิตฺวา  อายสฺมนฺตํ  ลกฺขณํ  เอตทโวจ  เอหิ  อาวุโส  ๑-  ลกฺขณ
ราชคหํ   ปิณฺฑาย   ปวิสิสฺสามาติ   ฯ   เอวมาวุโสติ   โข   อายสฺมา
ลกฺขโณ   อายสฺมโต   มหาโมคฺคลฺลานสฺส   ปจฺจสฺโสสิ   ฯ   อถ   โข
อายสฺมา     มหาโมคฺคลฺลาโน     คิชฺฌกูฏา    ปพฺพตา    โอโรหนฺโต
อญฺญตรสฺมึ   ปเทเส  สิตํ  ปาตฺวากาสิ  ฯ  อถ  โข  อายสฺมา  ลกฺขโณ
อายสฺมนฺตํ    มหาโมคฺคลฺลานํ    เอตทโวจ   โก   นุ   โข   อาวุโส
โมคฺคลฺลาน   เหตุ   โก   ปจฺจโย  สิตสฺส  ปาตุกมฺมายาติ  ฯ  อกาโล
โข    อาวุโส    ลกฺขณ   เอตสฺส   ปญฺหสฺส   ภควโต   มํ   สนฺติเก
เอตํ ปญฺหํ ปุจฺฉาติ ฯ
     [๖๓๘]   อถ  โข อายสฺมา จ ลกฺขโณ อายสฺมา จ มหาโมคฺคลฺลาโน
@เชิงอรรถ: ๑ ม. ยุ. อายามาวุโส ฯ
ราชคเห     ปิณฺฑาย     จริตฺวา     ปจฺฉาภตฺตํ    ปิณฺฑปาตปฏิกฺกนฺตา
เยน       ภควา      เตนุปสงฺกมึสุ      อุปสงฺกมิตฺวา      ภควนฺตํ
อภิวาเทตฺวา    เอกมนฺตํ    นิสีทึสุ    ฯ    เอกมนฺตํ   นิสินฺโน   โข
อายสฺมา     ลกฺขโณ     อายสฺมนฺตํ     มหาโมคฺคลฺลานํ    เอตทโวจ
อิธายสฺมา     มหาโมคฺคลฺลาโน    คิชฺฌกูฏา    ปพฺพตา    โอโรหนฺโต
อญฺญตรสฺมึ    ปเทเส    สิตํ   ปาตฺวากาสิ   โก   นุ   โข   อาวุโส
โมคฺคลฺลาน เหตุ โก ปจฺจโย สิตสฺส ปาตุกมฺมายาติ ฯ
     [๖๓๙]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
อฏฺฐิสงฺขลิกํ   เวหาสํ   คจฺฉนฺตึ  ๑-  ตเมนํ  คิชฺฌาปิ  กากาปิ  กุลลาปิ
อนุปติตฺวา   อนุปติตฺวา   [๒]-   วิตุเทนฺติ  วิตจฺเฉนฺติ  วิราเชนฺติ  ๓-
สา  ๔-  สุทํ  อฏฺฏสฺสรํ  กโรติ  ตสฺส  มยฺหํ  อาวุโส เอตทโหสิ อจฺฉริยํ
วต  โภ  อพฺภูตํ  วต  โภ  เอวรูโปปิ  นาม  สตฺโต  ภวิสฺสติ เอวรูโปปิ
นาม ยกฺโข ภวิสฺสติ เอวรูโปปิ นาม อตฺตภาวปฏิลาโภ ภวิสฺสตีติ ฯ
     [๖๔๐]   อถ   โข   ภควา   ภิกฺขู   อามนฺเตสิ  จกฺขุภูตา  วต
ภิกฺขเว   สาวกา   วิหรนฺติ   ญาณภูตา  วต  ภิกฺขเว  สาวกา  วิหรนฺติ
ยตฺร   หิ   นาม   สาวโก   เอวรูปํ   ญสฺสติ  วา  ทกฺขติ  วา  สกฺขึ
วา  กริสฺสติ  ฯ  ปุพฺเพว  ๕-  เม  โส  ภิกฺขเว  สตฺโต  ทิฏฺโฐ อโหสิ
อปิจาหํ   น   พฺยากาสึ   อหญฺเจตํ   พฺยากเรยฺยํ  ปเรปิ  ๖-  เม  น
สทฺทเหยฺยุํ    เย    เม   น   สทฺทเหยฺยุํ   เตสนฺตํ   อสฺส   ทีฆรตฺตํ
อหิตาย   ทุกฺขาย   ฯ   เอโส  ภิกฺขเว  สตฺโต  อิมสฺมิญฺเญว  ราชคเห
@เชิงอรรถ: ๑ ยุ. คจฺฉนฺตํ ฯ  ๒ ม. ยุ. ผาสุฬนฺตริกาหิ ฯ  ๓ ยุ. วิภเชนฺติ ฯ
@๔ ยุ. สาสฺสุทํ ฯ เอวมุปริปิ ฯ  ๕ ยุ. ปุพฺเพปิ ฯ  ๖ ม. ยุ. ปเร จ ฯ
โคฆาตโก   อโหสิ   โส   ตสฺส   กมฺมสฺส   วิปาเกน   พหูนิ  วสฺสานิ
พหูนิ    วสฺสสตานิ    พหูนิ    วสฺสสหสฺสานิ    พหูนิ   วสฺสสตสหสฺสานิ
นิรเย    ปจิตฺถ   ๑-   ตสฺเสว   กมฺมสฺส   วิปากาวเสเสน   เอวรูปํ
อตฺตภาวปฏิลาภํ ปฏิสํเวทยตีติ ฯ ปฐมํ ฯ
             [สพฺเพสํ สุตฺตนฺตานํ เอเสว เปยฺยาโล]
     [๖๔๑]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
มํสเปสึ   เวหาสํ   คจฺฉนฺตึ   ๒-   ตเมนํ   คิชฺฌาปิ  กากาปิ  กุลลาปิ
อนุปติตฺวา   อนุปติตฺวา  วิตจฺเฉนฺติ  วิราเชนฺติ  ๓-  สา  สุทํ  อฏฺฏสฺสรํ
กโรติ   ฯ   เอโส  ภิกฺขเว  สตฺโต  อิมสฺมิญฺเญว  ราชคเห  โคฆาตโก
อโหสิ ฯ ทุติยํ ฯ
     [๖๔๒]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
มํสปิณฺฑํ    เวหาสํ    คจฺฉนฺตํ    ตเมนํ   คิชฺฌาปิ   กากาปิ   กุลลาปิ
อนุปติตฺวา   อนุปติตฺวา   วิตจฺเฉนฺติ   วิราเชนฺติ   โส   สุทํ  อฏฺฏสฺสรํ
กโรติ   ฯ   เอโส   ภิกฺขเว  สตฺโต  อิมสฺมิญฺเญว  ราชคเห  สากุณิโก
อโหสิ ฯ ตติยํ ฯ
     [๖๔๓]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
นิจฺฉวึ   ปุริสํ   เวหาสํ   คจฺฉนฺตํ   ตเมนํ   คิชฺฌาปิ  กากาปิ  กุลลาปิ
อนุปติตฺวา   อนุปติตฺวา   วิตจฺเฉนฺติ   วิราเชนฺติ   โส   สุทํ  อฏฺฏสฺสรํ
กโรติ   ฯ   เอโส  ภิกฺขเว  สตฺโต  อิมสฺมิญฺเญว  ราชคเห  โอรพฺภิโก
อโหสิ ฯ จตุตฺถํ ฯ
@เชิงอรรถ: ๑ ม. ปจฺจิตฺวา ฯ ยุ. ปจิตฺวา ฯ  ๒ ยุ. คจฺฉนฺตํ ฯ
@๓ ยุ. วิภเชนฺติ ฯ เอวมุปริปิ ฯ
     [๖๔๔]   อิธาหํ    อาวุโส   คิชฺฌกูฏา   ปพฺพตา   โอโรหนฺโต
อทฺทสํ   อสิโลมํ   ปุริสํ   เวหาสํ  คจฺฉนฺตํ  ตสฺส  เต  อสี  อุปฺปติตฺวา
อุปฺปติตฺวา  ตสฺเสว  กาเย  นิปตนฺติ  โส  สุทํ  อฏฺฏสฺสรํ กโรติ ฯ เอโส
ภิกฺขเว สตฺโต อิมสฺมิญฺเญว ราชคเห สูกริโก อโหสิ ฯ ปญฺจมํ ฯ
     [๖๔๕]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
สตฺติโลมํ   ปุริสํ   เวหาสํ   คจฺฉนฺตํ   ตสฺส   ตา  สตฺติโย  อุปฺปติตฺวา
อุปฺปติตฺวา  ตสฺเสว  กาเย  นิปตนฺติ  โส  สุทํ  อฏฺฏสฺสรํ กโรติ ฯ เอโส
ภิกฺขเว สตฺโต อิมสฺมิญฺเญว ราชคเห มาควิโก อโหสิ ฯ ฉฏฺฐํ ฯ
     [๖๔๖]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
อุสุโลมํ  ปุริสํ  เวหาสํ  คจฺฉนฺตํ  ตสฺส  เต  อุสู  อุปฺปติตฺวา  อุปฺปติตฺวา
ตสฺเสว   กาเย   นิปตนฺติ   โส   สุทํ   อฏฺฏสฺสรํ   กโรติ  ฯ  เอโส
ภิกฺขเว สตฺโต อิมสฺมิญฺเญว ราชคเห การณิโก อโหสิ ฯ สตฺตมํ ฯ
     [๖๔๗]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
สูจิโลมํ   ปุริสํ   เวหาสํ   คจฺฉนฺตํ   ตสฺส   ตา   สูจิโย   อุปฺปติตฺวา
อุปฺปติตฺวา  ตสฺเสว  กาเย  นิปตนฺติ  โส  สุทํ  อฏฺฏสฺสรํ กโรติ ฯ เอโส
ภิกฺขเว สตฺโต อิมสฺมิญฺเญว ราชคเห สุโต ๑- อโหสิ ฯ อฏฺฐมํ ฯ
     [๖๔๘]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
สูจิโลมํ  ปุริสํ  เวหาสํ  คจฺฉนฺตํ  ตสฺส  ตา  สูจิโย  สีเส ปวิเสตฺวา ๒-
มุขโต   นิกฺขมนฺติ  มุเข  ปวิเสตฺวา  อุรโต  นิกฺขมนฺติ  อุเร  ปวิเสตฺวา
อุทรโต    นิกฺขมนฺติ    อุทเร    ปวิเสตฺวา   อุรูหิ   นิกฺขมนฺติ   อุรูสุ
@เชิงอรรถ: ๑ ม. สูโต ฯ ยุ. สูจโก ฯ  ๒ ม. ยุ. ปวิสิตฺวา ฯ เอวมุปริปิ ฯ
ปวิเสตฺวา    ชงฺฆาหิ    นิกฺขมนฺติ    ชงฺฆาสุ    ปวิเสตฺวา    ปาเทหิ
นิกฺขมนฺติ   โส   สุทํ   อฏฺฏสฺสรํ   กโรติ   ฯ  เอโส  ภิกฺขเว  สตฺโต
อิมสฺมิญฺเญว ราชคเห สูจิโก ๑- อโหสิ ฯ นวมํ ฯ
     [๖๔๙]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
กุมฺภณฺฑํ   ปุริสํ   เวหาสํ   คจฺฉนฺตํ   โส   คจฺฉนฺโตปิ  เต  จ  อณฺเฑ
ขนฺเธ   อาโรเปตฺวา   คจฺฉติ   นิสีทนฺโตปิ   เตเสฺวว  อณฺเฑสุ  นิสีทติ
ตเมนํ   คิชฺฌาปิ   กากาปิ   กุลลาปิ  อนุปติตฺวา  อนุปติตฺวา  วิตจฺเฉนฺติ
วิราเชนฺติ   โส   สุทํ   อฏฺฏสฺสรํ   กโรติ  ฯ  เอโส  ภิกฺขเว  สตฺโต
อิมสฺมิญฺเญว ราชคเห คามกูโฏ ๒- อโหสิ ฯ ทสมํ ฯ
                    ปฐมวคฺโค ปฐโม ฯ
                       ตสฺส อุทฺทานํ
               อฏฺฐิ เปสิ อุโภ คาวีฆาตกา ๓-
               ปิณฺโฑ สากุณิโย ๔- นิจฺฉโวรพฺภิ
               อสิ [๕]- สูกริโก สตฺติ
               อุสุ [๕]- การณิโก สูจิ สารถิ
               โย จ สิพฺพิสฺสติ ๖- สูจิโก ๑- หิ โส
               อณฺฑภารี อหุ คามกูฏโกติ ๗- ฯ
                        ------
@เชิงอรรถ: ๑ ม. ยุ. สูจโก ฯ  ๒ ม. คามกูฏโก ฯ  ๓ ม. ยุ. คาวฆาตกา ฯ  ๔ ยุ. ปิณฺฑสากุณิยํ ฯ
@๕ ยุ. จ ฯ  ๖ ม. ยุ. สพฺพิยติ ฯ  ๗ ยุ. ... จาติ ฯ
                     ทุติยวคฺโค ทุติโย
     [๖๕๐]   เอวมฺเม   สุตํ   เอกํ  สมยํ  ภควา  ราชคเห  วิหรติ
เวฬุวเน   กลนฺทกนิวาเป   ฯ   อิธาหํ   อาวุโส   คิชฺฌกูฏา   ปพฺพตา
โอโรหนฺโต  อทฺทสํ  ปุริสํ  คูถกูเป  สีสกา  ๑-  นิมุคฺคํ ฯ เอโส ภิกฺขเว
สตฺโต อิมสฺมิญฺเญว ราชคเห ปารทาริโก อโหสิ ฯ ปฐมํ ฯ
                 [เอวํ เปยฺยาโล กาตพฺโพ]
     [๖๕๑]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
ปุริสํ  คูถกูเป  นิมุคฺคํ  อุโภหิ  หตฺเถหิ  คูถํ  ขาทนฺตํ  ฯ  เอโส ภิกฺขเว
สตฺโต   อิมสฺมิญฺเญว   ราชคเห   พฺราหฺมโณ  อโหสิ  ฯ  โส  กสฺสปสฺส
สมฺมาสมฺพุทฺธสฺส  ปาวจเน  ภิกฺขุสงฺฆํ  ภตฺเตน  นิมนฺเตตฺวา  โทณิยา  ๒-
คูถสฺส   ปูราเปตฺวา   กาลํ  อาโรจาเปตฺวา  เอตทโวจ  อโห  โภนฺโต
ยาวทตฺถํ ภุญฺชนฺตุ เจว หรนฺตุ จาติ ฯ ทุติยํ ฯ
     [๖๕๒]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
นิจฺฉวึ   อิตฺถึ   เวหาสํ   คจฺฉนฺตึ   ตเมนํ   คิชฺฌาปิ  กากาปิ  กุลลาปิ
อนุปติตฺวา   อนุปติตฺวา   วิตจฺเฉนฺติ   วิราเชนฺติ   สา   สุทํ  อฏฺฏสฺสรํ
กโรติ   ฯ   เอสา   ภิกฺขเว   อิตฺถี  อิมสฺมิญฺเญว  ราชคเห  อติจารินี
อโหสิ ฯ ตติยํ ฯ
     [๖๕๓]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
อิตฺถึ   ทุคฺคนฺธํ   มงฺคุฬึ   เวหาสํ   คจฺฉนฺตึ   ตเมนํ  คิชฺฌาปิ  กากาปิ
@เชิงอรรถ: ๑ ม. ยุ. สสีสกนฺติ ทิสฺสติ ฯ  ๒ ม. โทณิโย ฯ
กุลลาปิ   อนุปติตฺวา   อนุปติตฺวา   วิตจฺเฉนฺติ   วิราเชนฺติ   สา   สุทํ
อฏฺฏสฺสรํ   กโรติ   ฯ   เอสา   ภิกฺขเว  อิตฺถี  อิมสฺมิญฺเญว  ราชคเห
อิกฺขณิกา อโหสิ ฯ จตุตฺถํ ฯ
     [๖๕๔]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
อิตฺถึ   อุปกฺกํ   โอกิลินึ  โอกิริณึ  เวหาสํ  คจฺฉนฺตึ  สา  สุทํ  อฏฺฏสฺสรํ
กโรติ   ฯ  เอสา  ภิกฺขเว  อิตฺถี  กลิงฺคสฺส  รญฺโญ  อคฺคมเหสี  อโหสิ
สา อิสฺสาปกตา สปตึ องฺคารกฏาเหน โอกิริ ฯ ปญฺจมํ ฯ
     [๖๕๕]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
อสีสกพนฺธํ   ๑-   เวหาสํ   คจฺฉนฺตํ  ตสฺส  อุเร  อกฺขีนิ  เจว  โหนฺติ
มุขญฺจ   ตเมนํ   คิชฺฌาปิ   กากาปิ   กุลลาปิ   อนุปติตฺวา   อนุปติตฺวา
วิตจฺเฉนฺติ    วิราเชนฺติ   โส   สุทํ   อฏฺฏสฺสรํ   กโรติ   ฯ   เอโส
ภิกฺขเว   สตฺโต   อิมสฺมิญฺเญว   ราชคเห   หาริโก  นาม  โจรฆาตโก
อโหสิ ฯ ฉฏฺฐํ ฯ
     [๖๕๖]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
ภิกฺขุํ    เวหาสํ   คจฺฉนฺตํ   ตสฺส   สงฺฆาฏิปิ   อาทิตฺตา   สมฺปชฺชลิตา
สญฺโชติภูตา   ๒-   ปตฺโตปิ   อาทิตฺโต   สมฺปชฺชลิโต  สญฺโชติภูโต  ๒-
กายพนฺธนมฺปิ    อาทิตฺตํ   สมฺปชฺชลิตํ   สญฺโชติภูตํ   กาโยปิ   อาทิตฺโต
สมฺปชฺชลิโต   สญฺโชติภูโต   โส   สุทํ   อฏฺฏสฺสรํ   กโรติ   ฯ  เอโส
ภิกฺขเว    ภิกฺขุ    กสฺสปสฺส    สมฺมาสมฺพุทฺธสฺส   ปาวจเน   ปาปภิกฺขุ
อโหสิ ฯ สตฺตมํ ฯ
@เชิงอรรถ: ๑ ยุ. อสีสกํ กวนฺธํ ฯ  ๒ ม. ยุ. สโชติภูตา สโชติภูโต ฯ เอวมุปริปิ ฯ
     [๖๕๗]   อทฺทสํ   ภิกฺขุนึ   เวหาสํ   คจฺฉนฺตึ   ตสฺสา  สงฺฆาฏิปิ
อาทิตฺตา ฯเปฯ ปาปภิกฺขุนี อโหสิ ฯ อฏฺฐมํ ฯ
     [๖๕๘]   อทฺทสํ   สิกฺขมานํ   เวหาสํ  คจฺฉนฺตึ  ตสฺสา  สงฺฆาฏิปิ
อาทิตฺตา ฯเปฯ ปาปสิกฺขมานา อโหสิ ฯ นวมํ ฯ
     [๖๕๙]   อทฺทสํ   สามเณรํ   เวหาสํ   คจฺฉนฺตํ  ตสฺส  สงฺฆาฏิปิ
อาทิตฺตา ฯเปฯ ปาปสามเณโร อโหสิ ฯ ทสมํ ฯ
     [๖๖๐]   อิธาหํ  อาวุโส  คิชฺฌกูฏา  ปพฺพตา  โอโรหนฺโต  อทฺทสํ
สามเณรึ   เวหาสํ   คจฺฉนฺตึ   ตสฺสา  สงฺฆาฏิปิ  อาทิตฺตา  สมฺปชฺชลิตา
สญฺโชติภูตา     ปตฺโตปิ     อาทิตฺโต     สมฺปชฺชลิโต     สญฺโชติภูโต
กายพนฺธนมฺปิ    อาทิตฺตํ   สมฺปชฺชลิตํ   สญฺโชติภูตํ   กาโยปิ   อาทิตฺโต
สมฺปชฺชลิโต   สญฺโชติภูโต   สา   สุทํ   อฏฺฏสฺสรํ   กโรติ   ฯ   ตสฺส
มยฺหํ   อาวุโส   เอตทโหสิ   อจฺฉริยํ   วต   โภ   อพฺภูตํ   วต  โภ
เอวรูโปปิ   นาม   สตฺโต   ภวิสฺสติ  เอวรูโปปิ  นาม  ยกฺโข  ภวิสฺสติ
เอวรูโปปิ นาม อตฺตภาวปฏิลาโภ ภวิสฺสตีติ ฯ
     [๖๖๑]   อถ   โข   ภควา   ภิกฺขู   อามนฺเตสิ  จกฺขุภูตา  วต
ภิกฺขเว   สาวกา   วิหรนฺติ   ญาณภูตา  วต  ภิกฺขเว  สาวกา  วิหรนฺติ
ยตฺร   หิ  นาม  สาวโก  เอวรูปํ  ญสฺสติ  วา  ทกฺขติ  วา  สกฺขึ  วา
กริสฺสติ  ฯ  ปุพฺเพว  ๑-  เม  สา  ภิกฺขเว  สามเณรี  ทิฏฺฐา อโหสิ ฯ
อปิจาหํ   น   พฺยากาสึ   อหญฺเจตํ   พฺยากเรยฺยํ  ปเรปิ  ๒-  เม  น
สทฺทเหยฺยุํ   เย   เม   น   สทฺทเหยฺยุํ   เตสํ   ตํ   อสฺส   ทีฆรตฺตํ
@เชิงอรรถ: ๑ ยุ. ปุพฺเพปิ ฯ  ๒ ม. ยุ. ปเร จ ฯ
อหิตาย    ทุกฺขาย    ฯ    เอสา    ภิกฺขเว    สามเณรี   กสฺสปสฺส
สมฺมาสมฺพุทฺธสฺส    ปาวจเน    ปาปสามเณรี    อโหสิ    สา    ตสฺส
กมฺมสฺส    วิปาเกน    พหูนิ    วสฺสานิ    พหูนิ    วสฺสสตานิ   พหูนิ
วสฺสสหสฺสานิ     พหูนิ     วสฺสสตสหสฺสานิ    นิรเย    ปจิตฺถ    ๑-
ตสฺเสว     กมฺมสฺส     วิปากาวเสเสน    เอวรูปํ    อตฺตภาวปฏิลาภํ
ปฏิสํเวทยตีติ ฯ เอกาทสมํ ฯ
                    ทุติยวคฺโค ทุติโย ฯ
                       ตสฺส อุทฺทานํ
               กูเป นิมุคฺโค หิ โส ปรทาริโก
               คูถขาทิ อหุ ทุฏฺฐพฺราหฺมโณ
               นิจฺฉวิตฺถี อติจารินี อหุ
               มงฺคุฬิตฺถี อหุ อิกฺขณิตฺถิกา ๒-
               โอกิลินี สปตึ กโรติ ๓-
               สีสจฺฉินฺโน อหุ โจรฆาตโก
               ภิกฺขุ ภิกฺขุนี สิกฺขมานา
               สามเณโร อถ สามเณริกา ๔-
               กสฺสปสฺส วินยสฺส ๕- ปพฺพชฺชํ ๖-
               ปาปกมฺมํ อกรึสุ ตาวเท ๗- ฯ
               ลกฺขณสํยุตฺตํ สตฺตมํ สมตฺตํ ฯ
                        -------
@เชิงอรรถ: ๑ ม. ปจิตฺวา ฯ  ๒ ยุ. อิกฺขณิตฺถิ ยา ฯ  ๓ ม. ยุ. สปตฺตงฺคาโรกิริ ฯ  ๔ ยุ.
@สามเณริโย ฯ ๕ ม. ยุ. วินยสฺมึ ฯ  ๖ ยุ. ปพฺพชฺชุํ ฯ  ๗ ม. ยุ. อิติสทฺโท อตฺถิ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๑๖ หน้าที่ ๒๙๘-๓๐๖.
http://84000.org/tipitaka/pitaka_item/pali_item_s.php?book=16&item=636&items=26&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=16&item=636&items=26&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=16&item=636&items=26&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=16&item=636&items=26&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=16&i=636
             The Pali Atthakatha in Thai :-
http://84000.org/tipitaka/atthapali/read_th.php?B=12&A=5291
             The Pali Atthakatha in Roman :-
http://84000.org/tipitaka/atthapali/read_rm.php?B=12&A=5291
             สารบัญพระไตรปิฎกเล่มที่ ๑๖
http://84000.org/tipitaka/read/?index_16