พระไตรปิฎกเล่มที่ ๑๘ ภาษาบาลี อักษรไทย
พระสุตตันตปิฎกเล่มที่ ๑๐ สังยุตตนิกาย สฬายตนวรรค

     [๒๑๙]   ยํ   ภิกฺขเว   น   ตุมฺหากํ  ตํ  ปชหถ  ตํ  โว  ปหีนํ
หิตาย   สุขาย   ภวิสฺสติ   ฯ   กิญฺจ   ภิกฺขเว  น  ตุมฺหากํ  ฯ  จกฺขุํ
ภิกฺขเว   น   ตุมฺหากํ   ตํ   ปชหถ   ตํ   โว   ปหีนํ  หิตาย  สุขาย
@เชิงอรรถ: ๑ ม. ภวราคานุสารีภิ ฯ   ๒ ม. สุสมฺพุโธ ฯ   ๓ ม. สมฺพุทฺธุมรหติ ฯ
ภวิสฺสติ   ฯเปฯ   ชิวฺหา   น   ตุมฺหากํ   ตํ   ปชหถ   ฯ   สา  โว
ปหีนา   หิตาย   สุขาย   ภวิสฺสติ   ฯเปฯ   มโน   น   ตุมฺหากํ   ตํ
ปชหถ   โส   โว   ปหีโน   หิตาย   สุขาย   ภวิสฺสติ  ฯ  เสยฺยถาปิ
ภิกฺขเว   ยํ   อิมสฺมึ   เชตวเน  ติณกฏฺฐสาขาปลาสํ  ตํ  ชโน  หเรยฺย
วา   ฑเหยฺย   วา   ยถาปจฺจยํ   วา   กเรยฺย   อปิ   นุ   ตุมฺหากํ
เอวมสฺส   อเมฺห   ชโน   หรติ   วา   ฑหติ   วา   ยถาปจฺจยํ  วา
กโรตีติ  ฯ  โน  เหตํ  ภนฺเต  ฯ  ตํ  กิสฺส  เหตุ  ฯ  น  หิ โน เอตํ
ภนฺเต   อตฺตา   วา  อตฺตนิยํ  วาติ  ฯ  เอวเมว  โข  ภิกฺขเว  จกฺขุํ
น   ตุมฺหากํ   ตํ   ปชหถ   ตํ   โว   ปหีนํ   หิตาย  สุขาย  ภวิสฺสติ
ฯเปฯ    ชิวฺหา    น    ตุมฺหากํ    ตํ   ปชหถ   สา   โว   ปหีนา
หิตาย   สุขาย   ภวิสฺสติ   ฯเปฯ   มโน   น   ตุมฺหากํ   ตํ   ปชหถ
โส โว ปหีโน หิตาย สุขาย ภวิสฺสตีติ ฯ ปญฺจมํ ฯ
     [๒๒๐]   ยํ   ภิกฺขเว   น   ตุมฺหากํ  ตํ  ปชหถ  ตํ  โว  ปหีนํ
หิตาย   สุขาย   ภวิสฺสติ   ฯ   กิญฺจ   ภิกฺขเว  น  ตุมฺหากํ  ฯ  รูปา
ภิกฺขเว   น   ตุมฺหากํ   เต   ปชหถ  เต  โว  ปหีนา  หิตาย  สุขาย
ภวิสฺสนฺติ    ฯ    สทฺทา    คนฺธา    รสา   โผฏฺฐพฺพา   ธมฺมา   น
ตุมฺหากํ   เต   ปหชถ   เต  โว  ปหีนา  หิตาย  สุขาย  ภวิสฺสนฺติ  ฯ
เสยฺยถาปิ   ภิกฺขเว   ยํ   อิมสฺมึ  เชตวเน  ติณกฏฺฐสาขาปลาสํ  ฯเปฯ
เอวเมว  โข  ภิกฺขเว  รูปา  น  ตุมฺหากํ  เต  ปชหถ  เต  โว ปหีนา
หิตาย    สุขาย   ภวิสฺสนฺติ   ฯ   สทฺทา   คนฺธา   รสา   โผฏฺฐพฺพา
ธมฺมา   น   ตุมฺหากํ   เต   ปชหถ   เต  โว  ปหีนา  หิตาย  สุขาย
ภวิสฺสนฺตีติ ฯ ฉฏฺฐํ ฯ
     [๒๒๑]   จกฺขุํ   ภิกฺขเว   อนิจฺจํ   โยปิ   เหตุ  โยปิ  ปจฺจโย
จกฺขุสฺส    อุปฺปาทาย   โสปิ   อนิจฺโจ   อนิจฺจสมฺภูตํ   ภิกฺขเว   จกฺขุ
กุโต   นิจฺจํ   ภวิสฺสติ   ฯเปฯ   ชิวฺหา   อนิจฺจา   โยปิ  เหตุ  โยปิ
ปจฺจโย   ชิวฺหาย   อุปฺปาทาย   โสปิ   อนิจฺโจ  อนิจฺจสมฺภูตา  ภิกฺขเว
ชิวฺหา   กุโต   นิจฺจา   ภวิสฺสติ  ฯเปฯ  มโน  อนิจฺโจ  โยปิ  ภิกฺขเว
เหตุ   โยปิ   ปจฺจโย  มนสฺส  อุปฺปาทาย  โสปิ  อนิจฺโจ  อนิจฺจสมฺภูโต
ภิกฺขเว   มโน   กุโต   นิจฺโจ   ภวิสฺสตีติ   ฯ   เอวํ  ปสฺสํ  ภิกฺขเว
สุตวา   อริยสาวโก   จกฺขุสฺมึปิ   นิพฺพินฺทติ  ฯเปฯ  ชิวฺหายปิ  นิพฺพินฺทติ
ฯเปฯ   มนสฺมึปิ   นิพฺพินฺทติ   นิพฺพินฺทํ   วิรชฺชติ   วิราคา  วิมุจฺจติ  ฯ
วิมุตฺตสฺมึ   วิมุตฺตมิติ   ญาณํ   โหติ   ฯ  ขีณา  ชาติ  วุสิตํ  พฺรหฺมจริยํ
กตํ กรณียํ นาปรํ อิตฺถตฺตายาติ ปชานาตีติ ฯ สตฺตมํ ฯ
     [๒๒๒]   จกฺขุํ  ภิกฺขเว  ทุกฺขํ  โยปิ  เหตุ  โยปิ  ปจฺจโย จกฺขุสฺส
อุปฺปาทาย   โสปิ   ทุกฺโข   ทุกฺขสมฺภูตํ   ภิกฺขเว   จกฺขุํ   กุโต   สุขํ
ภวิสฺสติ   ฯเปฯ   ชิวฺหา   ทุกฺขา  โยปิ  เหตุ  โยปิ  ปจฺจโย  ชิวฺหาย
อุปฺปาทาย   โสปิ   ทุกฺโข   ทุกฺขสมฺภูตา   ภิกฺขเว  ชิวฺหา  กุโต  สุขา
ภวิสฺสติ   ฯเปฯ   มโน   ทุกฺโข   โยปิ   เหตุ  โยปิ  ปจฺจโย  มนสฺส
อุปฺปาทาย   โสปิ   ทุกฺโข   ทุกฺขสมฺภูโต   ภิกฺขเว   มโน  กุโต  สุโข
ภวิสฺสติ ฯ เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ
     [๒๒๓]   จกฺขุํ   ภิกฺขเว   อนตฺตา   โยปิ  เหตุ  โยปิ  ปจฺจโย
จกฺขุสฺส   อุปฺปาทาย   โสปิ   อนตฺตา  อนตฺตสมฺภูตํ  ภิกฺขเว  จกฺขุ  ๑-
กุโต   อตฺตา   ภวิสฺสติ   ฯเปฯ   ชิวฺหา   อนตฺตา  โยปิ  เหตุ  โยปิ
ปจฺจโย     ชิวฺหาย    อุปฺปาทาย    โสปิ    อนตฺตา    อนตฺตสมฺภูตา
ภิกฺขเว    ชิวฺหา   กุโต   อตฺตา   ภวิสฺสติ   ฯเปฯ   มโน   อนตฺตา
โยปิ    เหตุ   โยปิ   ปจฺจโย   มนสฺส   อุปฺปาทาย   โสปิ   อนตฺตา
อนตฺตสมฺภูโต   ภิกฺขเว   มโน   กุโต  อตฺตา  ภวิสฺสติ  ฯ  เอวํ  ปสฺสํ
ฯเปฯ นาปรํ อิตฺถตฺตายาติ ปชานาตีติ ฯ อฏฺฐมํ ฯ
     [๒๒๔]   รูปา   ภิกฺขเว   อนิจฺจา   โยปิ  เหตุ  โยปิ  ปจฺจโย
รูปานํ   อุปฺปาทาย   ฯเปฯ   โสปิ   อนิจฺโจ   อนิจฺจสมฺภูตา   ภิกฺขเว
รูปา   กุโต   นิจฺจา   ภวิสฺสนฺติ   ฯ  สทฺทา  คนฺธา  รสา  โผฏฺฐพฺพา
ธมฺมา   อนิจฺจา  โยปิ  เหตุ  โยปิ  ปจฺจโย  ธมฺมานํ  อุปฺปาทาย  โสปิ
อนิจฺโจ   อนิจฺจสมฺภูตา   ภิกฺขเว   ธมฺมา   กุโต  นิจฺจา  ภวิสฺสนฺติ  ฯ
เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ
     [๒๒๕]   รูปา  ภิกฺขเว  ทุกฺขา  โยปิ  เหตุ  โยปิ  ปจฺจโย รูปานํ
อุปฺปาทาย    โสปิ    ทุกฺโข    ทุกฺขสมฺภูตา    ภิกฺขเว   รูปา   กุโต
สุขา    ภวิสฺสนฺติ    ฯ   สทฺทา   คนฺธา   รสา   โผฏฺฐพฺพา   ธมฺมา
ทุกฺขา    โยปิ   เหตุ   โยปิ   ปจฺจโย   ธมฺมานํ   อุปฺปาทาย   โสปิ
ทุกฺโข   ทุกฺขสมฺภูตา   ภิกฺขเว   ธมฺมา   กุโต   สุขา   ภวิสฺสนฺติ   ฯ
เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ นวมํ ฯ
@เชิงอรรถ: ๑ ยุ. สพฺพตฺถ จกฺขุํ ฯ
     [๒๒๖]   รูปา  ภิกฺขเว  อนตฺตา  โยปิ  เหตุ  โยปิ ปจฺจโย รูปานํ
อุปฺปาทาย    โส    อนตฺตา    อนตฺตสมฺภูตา   ภิกฺขเว   รูปา   กุโต
อตฺตา    ภวิสฺสนฺติ   ฯ   สทฺทา   คนฺธา   รสา   โผฏฺฐพฺพา   ธมฺมา
อนตฺตา   โยปิ   เหตุ   โยปิ   ปจฺจโย   ธมฺมานํ   อุปฺปาทาย   โสปิ
อนตฺตา   อนตฺตสมฺภูตา   ภิกฺขเว   ธมฺมา   กุโต  อตฺตา  ภวิสฺสนฺติ  ฯ
เอวํ   ปสฺสํ   ภิกฺขเว   สุตวา  อริยสาวโก  รูเปสุ  นิพฺพินฺทติ  สทฺเทสุ
คนฺเธสุ     รเสสุ     โผฏฺฐพฺเพสุ    ธมฺเมสุ    นิพฺพินฺทติ    นิพฺพินฺทํ
วิรชฺชติ   วิราคา   วิมุจฺจติ   ฯ   วิมุตฺตสฺมึ  วิมุตฺตมิติ  ญาณํ  โหติ  ฯ
ขีณา   ชาติ   วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ
ปชานาตีติ ฯ ทสมํ ฯ
                   เทวทหวคฺโค จตุตฺโถ ฯ
                        ตสฺสุทฺทานํ
         เทวทหขโณปคฺคยฺห ๑-     อคฺคยฺห เทฺว โหนฺติ มนสินา ๒-
         เหตุนาปิ ตโย วุตฺตา          ทุเว อชฺฌตฺตพาหิราติ ฯ
                       --------
@เชิงอรรถ: ๑ ม. เทวทโห ขโณ รูปา เทฺว น ตุมฺหากเมว จ ฯ ยุ. เทวทหขโณ สงฺคยฺห ฯ
@๒ ยุ. ปลาสินา ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๑๘ หน้าที่ ๑๖๑-๑๖๕.
http://84000.org/tipitaka/pitaka_item/pali_item_s.php?book=18&item=219&items=8&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=18&item=219&items=8&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=18&item=219&items=8&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=18&item=219&items=8&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=18&i=219
             สารบัญพระไตรปิฎกเล่มที่ ๑๘
http://84000.org/tipitaka/read/?index_18