ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๙ ภาษาบาลี อักษรไทย พระสุตตันตปิฎกเล่มที่ ๑๑ สุตฺต. สํ. มหาวารวคฺโค
     [๘๐๓]   สาวตฺถีนิทานํ  ฯ  สโต  ภิกฺขเว ภิกฺขุ วิหเรยฺย สมฺปชาโน
อยํ  โว  อมฺหากํ  อนุสาสนี  ฯ  กถญฺจ  ภิกฺขเว  ภิกฺขุ  สโต  โหติ  ฯ
อิธ   ภิกฺขเว   ภิกฺขุ   กาเย  กายานุปสฺสี  วิหรติ  อาตาปี  สมฺปชาโน
สติมา   วิเนยฺย  โลเก  อภิชฺฌาโทมนสฺสํ  ฯ  เวทนาสุ  จิตฺเต  ธมฺเมสุ
ธมฺมานุปสฺสี   วิหรติ   อาตาปี   สมฺปชาโน   สติมา   วิเนยฺย   โลเก
อภิชฺฌาโทมนสฺสํ ฯ เอวํ โข ภิกฺขเว ภิกฺขุ สโต โหติ ฯ
     [๘๐๔]   กถญฺจ  ภิกฺขเว  ภิกฺขุ  สมฺปชาโน  โหติ  ฯ  อิธ ภิกฺขเว
ภิกฺขุโน    วิทิตา   เวทนา   อุปฺปชฺชนฺติ   วิทิตา   อุปฏฺฐหนฺติ   วิทิตา
อพฺภตฺถํ   คจฺฉนฺติ   ฯ   วิทิตา  วิตกฺกา  อุปฺปชฺชนฺติ  วิทิตา  อุปฏฺฐหนฺติ
วิทิตา   อพฺภตฺถํ   คจฺฉนฺติ   ฯ  วิทิตา  ปญฺญา  ๑-  อุปฺปชฺชนฺติ  วิทิตา
อุปฏฺฐหนฺติ   วิทิตา   อพฺภตฺถํ   คจฺฉนฺติ   ฯ  เอวํ  โข  ภิกฺขเว  ภิกฺขุ
สมฺปชาโน   โหติ  ฯ  สโต  ภิกฺขเว  ภิกฺขุ  วิหเรยฺย   สมฺปชาโน  อยํ
โว อมฺหากํ อนุสาสนีติ ฯ
     [๘๐๕]   สาวตฺถีนิทานํ  ฯ  จตฺตาโรเม  ภิกฺขเว  สติปฏฺฐานา  ฯ
กตเม   จตฺตาโร   ฯ   อิธ  ภิกฺขเว  ภิกฺขุ  กาเย  กายานุสฺสี  วิหรติ
อาตาปี  สมฺปชาโน  สติมา  วิเนยฺย  โลเก  อภิชฺฌาโทมนสฺสํ ฯ เวทนาสุ
จิตฺเต   ธมฺเมสุ   ธมฺมานุปสฺสี   วิหรติ   อาตาปี   สมฺปชาโน   สติมา
วิเนยฺย   โลเก   อภิชฺฌาโทมนสฺสํ   ฯ   อิเม  โข  ภิกฺขเว  จตฺตาโร
สติปฏฺฐานา   ฯ  อิเมสํ  โข  ภิกฺขเว  จตุนฺนํ  สติปฏฺฐานานํ  ภาวิตตฺตา
พหุลีกตตฺตา    ทฺวินฺนํ    ผลานํ    อญฺญตรํ   ผลํ   ปาฏิกงฺขํ   ทิฏฺเฐว
ธมฺเม อญฺญา สติ วา อุปาทิเสเส อนาคามิตาติ ฯ
     [๘๐๖]   จตฺตาโรเม  ภิกฺขเว  สติปฏฺฐานา  ฯ  กตเม จตฺตาโร ฯ
อิธ   ภิกฺขเว   ภิกฺขุ   กาเย  กายานุปสฺสี  วิหรติ  อาตาปี  สมฺปชาโน
สติมา  วิเนยฺย  โลเก  อภิชฺฌาโทมนสฺสํ  ฯ  ตสฺส  กาเย กายานุปสฺสิโน
วิหรโต   โย   กายสฺมึ   ฉนฺโท  โส  ปหิยฺยติ  ฉนฺทสฺส  ปหานาย  ๒-
อมตํ สจฺฉิกตํ โหติ ฯ
@เชิงอรรถ:  ม. ยุ. สญฺญา ฯ  ม. ปหานา ฯ เอวมุปริ ฯ
     [๘๐๗]   เวทนาสุ   เวทนานุปสฺสี   วิหรติ   อาตาปี  สมฺปชาโน
สติมา    วิเนยฺย    โลเก    อภิชฺฌาโทมนสฺสํ   ฯ   ตสฺส   เวทนาสุ
เวทนานุปสฺสิโน    วิหรโต    โย   เวทนาสุ   ฉนฺโท   โส   ปหิยฺยติ
ฉนฺทสฺส ปหานาย อมตํ สจฺฉิกตํ โหติ ฯ
     [๘๐๘]   จิตฺเต  จิตฺตานุปสฺสี  วิหรติ  อาตาปี  สมฺปชาโน  สติมา
วิเนยฺย   โลเก   อภิชฺฌาโทมนสฺสํ   ฯ   ตสฺส   จิตฺเต  จิตฺตานุปสฺสิโน
วิหรโต   โย   จิตฺตสฺมึ   ฉนฺโท   โส   ปหิยฺยติ   ฉนฺทสฺส   ปหานาย
อมตํ สจฺฉิกตํ โหติ ฯ
     [๘๐๙]   ธมฺเมสุ  ธมฺมานุปสฺสี  วิหรติ  อาตาปี  สมฺปชาโน  สติมา
วิเนยฺย   โลเก   อภิชฺฌาโทมนสฺสํ   ฯ   ตสฺส  ธมฺเมสุ  ธมฺมานุปสฺสิโน
วิหรโต   โย   ธมฺเมสุ   ฉนฺโท   โส   ปหิยฺยติ   ฉนฺทสฺส   ปหานาย
อมตํ สจฺฉิกตํ โหตีติ ฯ
     [๘๑๐]   จตฺตาโรเม  ภิกฺขเว  สติปฏฺฐานา  ฯ  กตเม จตฺตาโร ฯ
อิธ   ภิกฺขเว   ภิกฺขุ   กาเย  กายานุปสฺสี  วิหรติ  อาตาปี  สมฺปชาโน
สติมา    วิเนยฺย    โลเก    อภิชฺฌาโทมนสฺสํ    ฯ    ตสฺส   กาเย
กายานุปสฺสิโน     วิหรโต    กาโย    ปริญฺญาโต    โหติ    กายสฺส
ปริญฺญาตตฺตา อมตํ สจฺฉิกตํ โหติ ฯ
     [๘๑๑]   เวทนาสุ   เวทนานุปสฺสี   วิหรติ   อาตาปี  สมฺปชาโน
สติมา    วิเนยฺย    โลเก    อภิชฺฌาโทมนสฺสํ   ฯ   ตสฺส   เวทนาสุ
เวทนานุปสฺสิโน    วิหรโต    เวทนา    ปริญฺญาตา   โหติ   เวทนานํ
ปริญฺญาตตฺตา อมตํ สจฺฉิกตํ โหติ ฯ
     [๘๑๒]   จิตฺเต  จิตฺตานุปสฺสี  วิหรติ  อาตาปี  สมฺปชาโน  สติมา
วิเนยฺย   โลเก   อภิชฺฌาโทมนสฺสํ   ฯ   ตสฺส   จิตฺเต  จิตฺตานุปสฺสิโน
วิหรโต    จิตฺตํ    ปริญฺญาตํ    โหติ   จิตฺตสฺส   ปริญฺญาตตฺตา   อมตํ
สจฺฉิกตํ โหติ ฯ
     [๘๑๓]   ธมฺเมสุ  ธมฺมานุปสฺสี  วิหรติ  อาตาปี  สมฺปชาโน  สติมา
วิเนยฺย   โลเก   อภิชฺฌาโทมนสฺสํ   ฯ   ตสฺส  ธมฺเมสุ  ธมฺมานุปสฺสิโน
วิหรโต   ธมฺมา   ปริญฺญาตา   โหนฺติ   ธมฺมานํ   ปริญฺญาตตฺตา   อมตํ
สจฺฉิกตํ โหตีติ ฯ
     [๘๑๔]   จตุนฺนํ   ภิกฺขเว   สติปฏฺฐานานํ  ภาวนํ  เทสิสฺสามิ  ตํ
สุณาถ   ฯ   กตมา   ภิกฺขเว   จตุนฺนํ  สติปฏฺฐานานํ  ภาวนา  ฯ  อิธ
ภิกฺขเว   ภิกฺขุ  กาเย  กายานุปสฺสี  วิหรติ  อาตาปี  สมฺปชาโน  สติมา
วิเนยฺย  โลเก  อภิชฺฌาโทมนสฺสํ  ฯ  เวทนาสุ จิตฺเต ธมฺเมสุ ธมฺมานุปสฺสี
วิหรติ  อาตาปี  สมฺปชาโน  สติมา  วิเนยฺย  โลเก  อภิชฺฌาโทมนสฺสํ  ฯ
อยํ โข ภิกฺขเว จตุนฺนํ สติปฏฺฐานานํ ภาวนาติ ฯ
     [๘๑๕]   สติปฏฺฐานญฺจ  โว  ภิกฺขเว  เทสิสฺสามิ สติปฏฺฐานภาวนญฺจ
สติปฏฺฐานภาวนาคามินิญฺจ     ปฏิปทํ     ตํ    สุณาถ    ฯ    กตมญฺจ
ภิกฺขเว   สติปฏฺฐานํ   ฯ   อิธ   ภิกฺขเว   ภิกฺขุ   กาเย  กายานุปสฺสี
วิหรติ      อาตาปี     สมฺปชาโน     สติมา     วิเนยฺย     โลเก
อภิชฺฌาโทมนสฺสํ   ฯ   เวทนาสุ   จิตฺเต   ธมฺเมสุ  ธมฺมานุปสฺสี  วิหรติ
อาตาปี   สมฺปชาโน   สติมา   วิเนยฺย   โลเก   อภิชฺฌาโทมนสฺสํ   ฯ
อิทํ วุจฺจติ ภิกฺขเว สติปฏฺฐานํ ฯ
     [๘๑๖]   กตมา  จ  ภิกฺขเว  สติปฏฺฐานภาวนา  ฯ  อิธ  ภิกฺขเว
ภิกฺขุ    สมุทยธมฺมานุปสฺสี   กายสฺมึ   วิหรติ   วยธมฺมานุปสฺสี   กายสฺมึ
วิหรติ    สมุทยวยธมฺมานุปสฺสี   กายสฺมึ   วิหรติ   อาตาปี   สมฺปชาโน
สติมา  วิเนยฺย  โลเก  อภิชฺฌาโทมนสฺสํ  ฯ  สมุทยธมฺมานุปสฺสี  เวทนาสุ
วิหรติ     วยธมฺมานุปสฺสี    เวทนาสุ    วิหรติ    สมุทยวยธมฺมานุปสฺสี
เวทนาสุ   วิหรติ   ฯ   ตถา   จิตฺเต   ฯ   ธมฺเมสุ  วิหรติ  อาตาปี
สมฺปชาโน   สติมา   วิเนยฺย   โลเก  อภิชฺฌาโทมนสฺสํ  ฯ  อยํ  วุจฺจติ
ภิกฺขเว สติปฏฺฐานภาวนา ฯ
     [๘๑๗]   กตมา  จ  ภิกฺขเว  สติปฏฺฐานภาวนาคามินี  ปฏิปทา  ฯ
อยเมว   อริโย   อฏฺฐงฺคิโก   มคฺโค   ฯ   เสยฺยถีทํ   ฯ  สมฺมาทิฏฺฐิ
สมฺมาสงฺกปฺโป      สมฺมาวาจา      สมฺมากมฺมนฺโต      สมฺมาอาชีโว
สมฺมาวายาโม    สมฺมาสติ   สมฺมาสมาธิ   ฯ   อยํ   วุจฺจติ   ภิกฺขเว
สติปฏฺฐานภาวนาคามินี ปฏิปทาติ ฯ
                   อนนุสฺสุตวคฺโค จตุตฺโถ ฯ
                        ตสฺสุทฺทานํ
         อนนุสฺสุตํ วิราโค จ            วิรทฺโธ ภาวนา สโต
         อญฺญํ ฉนฺทํ ปริญฺญาย         ภาวนา วิภงฺเคน เต ทสาติ ๑- ฯ
                      -----------
@เชิงอรรถ:  ม.    อนนุสฺสุตํ วิราโค             วิรทฺโธ ภาวนาสติ
@           อญฺญา ฉนฺทํ ปริญฺญาย    ภาวนา วิภงฺเคน จาติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๒๔๑-๒๔๕. http://84000.org/tipitaka/pitaka_item/pali_item_s.php?book=19&item=803&items=15&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=19&item=803&items=15&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=19&item=803&items=15&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=19&item=803&items=15&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=19&i=803              สารบัญพระไตรปิฎกเล่มที่ ๑๙ http://84000.org/tipitaka/read/?index_19

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :