ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)
     [๗๓๑]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม  ฯ  เตน  โข  ปน  สมเยน  ราชา  ปเสนทิ
โกสโล    อุยฺยานปาลํ   อาณาเปสิ   คจฺฉ   ภเณ   อุยฺยานํ   โสเธหิ
อุยฺยานํ  คมิสฺสามาติ  ฯ  เอวํ  เทวาติ  โข  โส  อุยฺยานปาโล  รญฺโญ
ปเสนทิสฺส    โกสลสฺส    ปฏิสฺสุณิตฺวา    อุยฺยานํ   โสเธนฺโต   อทฺทส
ภควนฺตํ    อญฺญตรสฺมึ    รุกฺขมูเล    นิสินฺนํ   ทิสฺวาน   เยน   ราชา
ปเสนทิ    โกสโล    เตนุปสงฺกมิ    อุปสงฺกมิตฺวา   ราชานํ   ปเสนทึ
โกสลํ    เอตทโวจ    สุทฺธํ   เทว   อุยฺยานํ   อปิจ   ภควา   ตตฺถ
นิสินฺโนติ ฯ โหตุ ภเณ มยํ ภควนฺตํ ปยิรุปาสิสฺสามาติ ฯ
     {๗๓๑.๑}   อถโข   ราชา   ปเสนทิ  โกสโล  อุยฺยานํ  คนฺตฺวา
เยน   ภควา   เตนุปสงฺกมิ   ฯ   เตน   โข  ปน  สมเยน  อญฺญตโร
อุปาสโก   ภควนฺตํ   ปยิรุปาสนฺโต   นิสินฺโน   โหติ   ฯ  อทฺทสา  โข
ราชา   ปเสนทิ   โกสโล   ตํ   อุปาสกํ  ภควนฺตํ  ปยิรุปาสนฺตํ  นิสินฺนํ
ทิสฺวาน   ภีโต   อฏฺฐาสิ   ฯ   อถโข   รญฺโญ   ปเสนทิสฺส  โกสลสฺส
เอตทโหสิ  นารหตายํ  ปุริโส  ปาโป  โหตุํ  ยถา ภควนฺตํ ปยิรุปาสตีติ ฯ
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทิ  ฯ  อถโข  โส  อุปาสโก  ภควโต  คารเวน  ราชานํ
ปเสนทึ   โกสลํ   เนว   อภิวาเทสิ  น  ปจฺจุฏฺฐาสิ  ฯ  อถโข  ราชา
ปเสนทิ   โกสโล   อนตฺตมโน  อโหสิ  กถํ  หิ  นาม  อยํ  ปุริโส  มยิ
อาคเต   เนว   อภิวาเทสฺสติ   น   ปจฺจุฏฺเฐสฺสตีติ  ฯ  อถโข  ภควา
ราชานํ    ปเสนทึ    โกสลํ   อนตฺตมนํ   วิทิตฺวา   ราชานํ   ปเสนทึ
โกสลํ    เอตทโวจ    เอโส   โข   มหาราช   อุปาสโก   พหุสฺสุโต
อาคตาคโม    กาเมสุ   วีตราโคติ   ฯ   อถโข   รญฺโญ   ปเสนทิสฺส
โกสลสฺส   เอตทโหสิ   นารหตายํ   อุปาสโก   โอรโก  โหตุํ  ภควาปิ
อิมสฺส    วณฺณํ    ภณตีติ   ฯ   ตํ   อุปาสกํ   เอตทโวจ   วเทยฺยาสิ
อุปาสก   เยน  อตฺโถติ  ฯ  สุฏฺฐุ  เทวาติ  ฯ  อถโข  ภควา  ราชานํ
ปเสนทึ   โกสลํ   ธมฺมิยา   กถาย  สนฺทสฺเสสิ  สมาทเปสิ  สมุตฺเตเชสิ
สมฺปหํเสสิ   ฯ   อถโข   ราชา   ปเสนทิ   โกสโล  ภควตา  ธมฺมิยา
กถาย      สนฺทสฺสิโต      สมาทปิโต     สมุตฺเตชิโต     สมฺปหํสิโต
อุฏฺฐายาสนา ภควนฺตํ อภิวาเทตฺวา ปทกฺขิณํ กตฺวา ปกฺกามิ ฯ
     [๗๓๒]   เตน   โข   ปน   สมเยน   ราชา  ปเสนทิ  โกสโล
อุปริปาสาทวรคโต  โหติ  ฯ  อทฺทสา  โข  ราชา  ปเสนทิ  โกสโล  ตํ
อุปาสกํ   รถิยาย   ๑-   ฉตฺตปาณึ   คจฺฉนฺตํ  ทิสฺวาน  ปกฺโกสาเปตฺวา
เอตทโวจ   ตฺวํ   กิร   อุปาสก  พหุสฺสุโต  อาคตาคโม  สาธุ  อุปาสก
อมฺหากํ   อิตฺถาคารํ   ธมฺมํ   วาเจหีติ   ฯ  ยมหํ  ๒-  เทว  ชานามิ
อยฺยานํ     วาหสา    อยฺยา    ว    เทวสฺส    อิตฺถาคารํ    ธมฺมํ
วาเจสฺสนฺตีติ    ฯ   อถโข   ราชา   ปเสนทิ   โกสโล   สจฺจํ   โข
อุปาสโก   อาหาติ   เยน   ภควา  เตนุปสงฺกมิ  อุปสงฺกมิตฺวา  ภควนฺตํ
@เชิงอรรถ:  ม. รถิกาย ฯ   สี. ยมฺปาหํ ฯ
อภิวาเทตฺวา   เอกมนฺตํ   นิสีทิ   ฯ   เอกมนฺตํ   นิสินฺโน  โข  ราชา
ปเสนทิ   โกสโล   ภควนฺตํ   เอตทโวจ   สาธุ   ภนฺเต  ภควา  เอกํ
ภิกฺขุํ   อาณาเปตุ   โย   อมฺหากํ   อิตฺถาคารํ   ธมฺมํ  วาเจสฺสตีติ  ฯ
อถโข   ภควา   ราชานํ   ปเสนทึ  โกสลํ  ธมฺมิยา  กถาย  สนฺทสฺเสสิ
สมาทเปสิ    สมุตฺเตเชสิ   สมฺปหํเสสิ   ฯ   อถโข   ราชา   ปเสนทิ
โกสโล   ภควตา   ธมฺมิยา  กถาย  สนฺทสฺสิโต  สมาทปิโต  สมุตฺเตชิโต
สมฺปหํสิโต    อุฏฺฐายาสนา   ภควนฺตํ   อภิวาเทตฺวา   ปทกฺขิณํ   กตฺวา
ปกฺกามิ    ฯ    อถโข    ภควา    อายสฺมนฺตํ   อานนฺทํ   อามนฺเตสิ
เตนหานนฺท  รญฺโญ  อิตฺถาคารํ  ธมฺมํ  วาเจหีติ  ฯ  เอวํ  ภนฺเตติ  โข
อายสฺมา   อานนฺโท   ภควโต   ปฏิสฺสุณิตฺวา   กาเลน  กาลํ  ปวิสิตฺวา
รญฺโญ   อิตฺถาคารํ   ธมฺมํ   วาเจสิ   ฯ   อถโข  อายสฺมา  อานนฺโท
ปุพฺพณฺหสมยํ      นิวาเสตฺวา     ปตฺตจีวรมาทาย     เยน     รญฺโญ
ปเสนทิสฺส โกสลสฺส นิเวสนํ เตนุปสงฺกมิ ฯ
     {๗๓๒.๑}   เตน  โข  ปน สมเยน ราชา ปเสนทิ โกสโล มลฺลิกาย
เทวิยา  สทฺธึ  สยนคโต  โหติ  ฯ  อทฺทสา  โข มลฺลิกา เทวี อายสฺมนฺตํ
อานนฺทํ   ทูรโต  ว  อาคจฺฉนฺตํ  ทิสฺวาน  สหสา  วุฏฺฐาสิ  ฯ  ปีตกมฏฺฐํ
ทุสฺสํ  ปภสฺสิตฺถ  ฯ  อถโข  อายสฺมา  อานนฺโท  ตโต  ว  ปฏินิวตฺติตฺวา
อารามํ  คนฺตฺวา  ภิกฺขูนํ  เอตมตฺถํ  อาโรเจสิ  ฯ เย เต ภิกฺขู อปฺปิจฺฉา
ฯเปฯ   เต   อุชฺฌายนฺติ   ขียนฺติ  วิปาเจนฺติ  กถํ  หิ  นาม  อายสฺมา
อานนฺโท   ปุพฺเพ   อปฺปฏิสํวิทิโต   รญฺโญ  อนฺเตปุรํ  ปวิสิสฺสตีติ  ฯเปฯ
สจฺจํ   กิร   ตฺวํ   อานนฺท   ปุพฺเพ   อปฺปฏิสํวิทิโต   รญฺโญ  อนฺเตปุรํ
ปวิสสีติ   ฯ   สจฺจํ  ภควาติ  ฯ  วิครหิ  พุทฺโธ  ภควา  กถํ  หิ  นาม
ตฺวํ    อานนฺท   ปุพฺเพ   อปฺปฏิสํวิทิโต   รญฺโญ   อนฺเตปุรํ   ปวิสิสฺสสิ
เนตํ    อานนฺท    อปฺปสนฺนานํ    วา    ปสาทาย    ปสนฺนานํ   วา
ภิยฺโยภาวาย ฯเปฯ วิครหิตฺวา ธมฺมึ กถํ กตฺวา ภิกฺขู อามนฺเตสิ ฯ
     [๗๓๓]   ทสยิเม  ๑-  ภิกฺขเว  อาทีนวา  ราชนฺเตปุรปฺปเวสเน ฯ
กตเม ทส ฯ
     {๗๓๓.๑}   อิธ  ภิกฺขเว ราชา มเหสิยา สทฺธึ สยนคโต ๒- โหติ ฯ
ตตฺถ  ภิกฺขุ  ปวิสติ  ฯ  มเหสี  วา  ภิกฺขุํ  ทิสฺวา  สิตํ  ปาตุกโรติ ภิกฺขุ
วา  มเหสึ  ทิสฺวา  สิตํ  ปาตุกโรติ  ฯ  ตตฺถ  รญฺโญ  เอวํ โหติ อทฺธา
อิเมสํ   กตํ   วา  กริสฺสนฺติ  วาติ  ฯ  อยํ  ภิกฺขเว  ปฐโม  อาทีนโว
ราชนฺเตปุรปฺปเวสเน ฯ
     {๗๓๓.๒}   ปุน   จปรํ   ภิกฺขเว   ราชา  พหุกิจฺโจ  พหุกรณีโย
อญฺญตรํ  อิตฺถึ  คนฺตฺวา  นสฺสรติ  ฯ  สา  เตน  คพฺภํ  คณฺหาติ  ๓-  ฯ
ตตฺถ   รญฺโญ  เอวํ  โหติ  น  โข  อิธ  อญฺโญ  โกจิ  ปวิสติ  อญฺญตฺร
ปพฺพชิเตน   สิยา   นุ   โข   ปพฺพชิตสฺส   กมฺมนฺติ   ฯ  อยํ  ภิกฺขเว
ทุติโย อาทีนโว  ราชนฺเตปุรปฺปเวสเน ฯ
     {๗๓๓.๓}   ปุน   จปรํ   ภิกฺขเว   รญฺโญ   อนฺเตปุเร  อญฺญตรํ
รตนํ   นสฺสติ   ฯ   ตตฺถ   รญฺโญ   เอวํ  โหติ  น  โข  อิธ  อญฺโญ
โกจิ    ปวิสติ    อญฺญตฺร   ปพฺพชิเตน   สิยา   นุ   โข   ปพฺพชิตสฺส
กมฺมนฺติ ฯ อยํ ภิกฺขเว ตติโย อาทีนโว ราชนฺเตปุรปฺปเวสเน ฯ
@เชิงอรรถ:  ม. ยุ. ทสิเม ฯ   ม. ยุ. นิสินฺโน ฯ   ม. ยุ. คณฺหิ ฯ
     {๗๓๓.๔}   ปุน   จปรํ   ภิกฺขเว  รญฺโญ  อนฺเตปุเร  อพฺภนฺตรา
คุยฺหมนฺตา   พหิทฺธา   สมฺเภทํ  คจฺฉนฺติ  ฯ  ตตฺถ  รญฺโญ  เอวํ  โหติ
น  โข  อิธ  อญฺโญ  โกจิ  ปวิสติ  อญฺญตฺร  ปพฺพชิเตน  สิยา  นุ  โข
ปพฺพชิตสฺส    กมฺมนฺติ    ฯ    อยํ    ภิกฺขเว    จตุตฺโถ   อาทีนโว
ราชนฺเตปุรปฺปเวสเน ฯ
     {๗๓๓.๕}   ปุน  จปรํ  ภิกฺขเว  รญฺโญ  อนฺเตปุเร ปุตฺโต วา ปิตรํ
ปตฺเถติ  ปิตา  วา  ปุตฺตํ  ปตฺเถติ  ฯ  เตสํ เอวํ โหติ น โข อิธ อญฺโญ
โกจิ  ปวิสติ  อญฺญตฺร  ปพฺพชิเตน  สิยา  นุ  โข  ปพฺพชิตสฺส  กมฺมนฺติ ฯ
อยํ ภิกฺขเว ปญฺจโม อาทีนโว ราชนฺเตปุรปฺปเวสเน ฯ
     {๗๓๓.๖}   ปุน  จปรํ  ภิกฺขเว  ราชา นีจฏฺฐานิยํ อุจฺเจ ฐาเน ๑-
ฐเปติ  ฯ  เยสนฺตํ  อมนาปํ  เตสํ  เอวํ  โหติ  ราชา  โข  ปพฺพชิเตน
สํสฏฺโฐ   สิยา   นุ  โข  ปพฺพชิตสฺส  กมฺมนฺติ  ฯ  อยํ  ภิกฺขเว  ฉฏฺโฐ
อาทีนโว ราชนฺเตปุรปฺปเวสเน ฯ
     {๗๓๓.๗}   ปุน  จปรํ  ภิกฺขเว  ราชา อุจฺจฏฺฐานิยํ นีเจ ฐาเน ๒-
ฐเปติ  ฯ  เยสนฺตํ  อมนาปํ  เตสํ  เอวํ  โหติ  ราชา  โข  ปพฺพชิเตน
สํสฏฺโฐ   สิยา  นุ  โข  ปพฺพชิตสฺส  กมฺมนฺติ  ฯ  อยํ  ภิกฺขเว  สตฺตโม
อาทีนโว ราชนฺเตปุรปฺปเวสเน ฯ
     {๗๓๓.๘}   ปุน  จปรํ  ภิกฺขเว  ราชา  อกาเล เสนํ อุยฺโยเชติ ฯ
เยสนฺตํ  อมนาปํ  เตสํ  เอวํ  โหติ  ราชา  โข ปพฺพชิเตน สํสฏฺโฐ สิยา
นุ   โข   ปพฺพชิตสฺส   กมฺมนฺติ   ฯ   อยํ  ภิกฺขเว  อฏฺฐโม  อาทีนโว
ราชนฺเตปุรปฺปเวสเน ฯ
@เชิงอรรถ:  ม. ยุ. อุจฺจฏฺฐาเน ฯ   ยุ. นีจฏฺฐาเน ฯ
     {๗๓๓.๙}   ปุน  จปรํ  ภิกฺขเว  ราชา  กาเล  เสนํ อุยฺโยเชตฺวา
อนฺตรามคฺคโต   นิวตฺตาเปติ   ฯ   เยสนฺตํ  อมนาปํ  เตสํ  เอวํ  โหติ
ราชา  โข  ปพฺพชิเตน  สํสฏฺโฐ  สิยา  นุ  โข  ปพฺพชิตสฺส  กมฺมนฺติ  ฯ
อยํ ภิกฺขเว นวโม อาทีนโว ราชนฺเตปุรปฺปเวสเน ฯ
     {๗๓๓.๑๐}   ปุน  จปรํ  ภิกฺขเว  [๑]-  ราชนฺเตปุรํ  หตฺถิสมฺมทฺทํ
อสฺสสมฺมทฺทํ    รถสมฺมทฺทํ    รชนิยานิ   ๒-   รูปสทฺทคนฺธรสโผฏฺฐพฺพานิ
ยานิ  น  ปพฺพชิตสฺส  สารุปฺปานิ  ฯ  อยํ  โข  ภิกฺขเว  ทสโม อาทีนโว
ราชนฺเตปุรปฺปเวสเน    ฯ    อิเม    โข   ภิกฺขเว   ทส   อาทีนวา
ราชนฺเตปุรปฺปเวสเนติ ฯ
     [๗๓๔]   อถโข   ภควา   อายสฺมนฺตํ   อานนฺทํ  อเนกปริยาเยน
วิครหิตฺวา   ทุพฺภรตาย   ทุปฺโปสตาย   ฯเปฯ   เอวญฺจ   ปน  ภิกฺขเว
อิมํ สิกฺขาปทํ อุทฺทิเสยฺยาถ
     {๗๓๔.๑}   โย  ปน  ภิกฺขุ  รญฺโญ  ขตฺติยสฺส  มุทฺธาภิสิตฺตสฺส  ๓-
อนิกฺขนฺตราชเก   อนิคฺคตรตนเก   ๔-   ปุพฺเพ   อปฺปฏิสํวิทิโต  อินฺทขีลํ
อติกฺกาเมยฺย ปาจิตฺติยนฺติ ฯ
     [๗๓๕]   โย   ปนาติ   โย   ยาทิโส   ฯเปฯ   ภิกฺขูติ  ฯเปฯ
อยํ   อิมสฺมึ   อตฺเถ   อธิปฺเปโต   ภิกฺขูติ   ฯ  ขตฺติโย  นาม  อุภโต
สุชาโต   โหติ   มาติโต   จ  ปิติโต  จ  สํสุทฺธคหณิโก  ยาว  สตฺตมา
ปิตามหยุคา    อกฺขิตฺโต   อนุปกุฏฺโฐ   ชาติวาเทน   ฯ   มุทฺธาภิสิตฺโต
@เชิงอรรถ:  ม. ยุ. รญฺโญ ฯ   ม. รชฺชนียานิ ฯ   มุทฺธาวสิตฺตสฺสาติปิ ปาโฐ ฯ โส
@ปน ปทภาชเนน น สเมติ ฯ   อนีภตรตนเกติปิ ปาโฐ ฯ โสปิ เตน น สเมติ ฯ
นาม   ขตฺติยาภิเสเกน   อภิสิตฺโต   โหติ  ฯ  อนิกฺขนฺตราชเกติ  ราชา
สยนีฆรา   ๑-  อนิกฺขนฺโต  โหติ  ฯ  อนิคฺคตรตนเกติ  มเหสี  สยนีฆรา
อนิกฺขนฺตา  โหติ  อุโภ  วา  อนิกฺขนฺตา  โหนฺติ  ฯ ปุพฺเพ อปฺปฏิสํวิทิโตติ
ปุพฺเพ   อนิมนฺติโต   ๒-   ฯ   อินฺทขีโล   นาม  สยนีฆรสฺส  อุมฺมาโร
วุจฺจติ   ฯ   สยนีฆรํ  นาม  ยตฺถ  กตฺถจิ  รญฺโญ  สยนํ  ปญฺญตฺตํ  โหติ
อนฺตมโส     สาณิปาการปริกฺขิตฺตํปิ    ฯ    อินฺทขีลํ    อติกฺกาเมยฺยาติ
ปฐมํ   ปาทํ   อุมฺมารํ  อติกฺกาเมติ  อาปตฺติ  ทุกฺกฏสฺส  ฯ  ทุติยํ  ปาทํ
อติกฺกาเมติ อาปตฺติ ปาจิตฺติยสฺส ฯ
     [๗๓๖]   อปฺปฏิสํวิทิเต   อปฺปฏิสํวิทิตสญฺญี   อินฺทขีลํ   อติกฺกาเมติ
อาปตฺติ   ปาจิตฺติยสฺส  ฯ  อปฺปฏิสํวิทิเต  เวมติโก  อินฺทขีลํ  อติกฺกาเมติ
อาปตฺติ    ปาจิตฺติยสฺส    ฯ    อปฺปฏิสํวิทิเต   ปฏิสํวิทิตสญฺญี   อินฺทขีลํ
อติกฺกาเมติ   อาปตฺติ   ปาจิตฺติยสฺส   ฯ   ปฏิสํวิทิเต   อปฺปฏิสํวิทิตสญฺญี
อาปตฺติ   ทุกฺกฏสฺส   ฯ   ปฏิสํวิทิเต   เวมติโก  อาปตฺติ  ทุกฺกฏสฺส  ฯ
ปฏิสํวิทิเต ปฏิสํวิทิตสญฺญี อนาปตฺติ ฯ
     [๗๓๗]   อนาปตฺติ  ปฏิสํวิทิเต  น  ขตฺติโย โหติ น ขตฺติยาภิเสเกน
อภิสิตฺโต   โหติ   ราชา   สยนีฆรา  นิกฺขนฺโต  โหติ  มเหสี  สยนีฆรา
นิกฺขนฺตา  โหติ  อุโภ  วา  สยนีฆรา  ๓-  นิกฺขนฺตา  โหนฺติ น สยนีฆเร
อุมฺมตฺตกสฺส อาทิกมฺมิกสฺสาติ ฯ
                         ปฐมสิกฺขาปทํ นิฏฺฐิตํ ฯ
                                   --------
@เชิงอรรถ:  ม. สยนิฆรา ฯ เอวมุปริปิ ฯ   ม. อนามนฺเตตฺวา ฯ   ม. อยํ ปาโฐ นตฺถิ ฯ
                              ทุติยสิกฺขาปทํ



             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๔๘๑-๔๘๘. http://84000.org/tipitaka/pitaka_item/pali_item_s.php?book=2&item=731&items=7&modeTY=2&mode=bracket              อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=2&item=731&items=7&modeTY=2              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=2&item=731&items=7&modeTY=2&mode=bracket              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=2&item=731&items=7&modeTY=2&mode=bracket              ศึกษาอรรถกถานี้ได้ที่ :- http://84000.org/tipitaka/attha/attha.php?b=2&i=731              The Pali Atthakatha in Thai :- http://84000.org/tipitaka/atthapali/read_th.php?B=2&A=10132              The Pali Atthakatha in Roman :- http://84000.org/tipitaka/atthapali/read_rm.php?B=2&A=10132              สารบัญพระไตรปิฎกเล่มที่ ๒ http://84000.org/tipitaka/read/?index_2

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :