พระไตรปิฎกเล่มที่ ๒๔ ภาษาบาลี อักษรไทย
พระสุตตันตปิฎกเล่มที่ ๑๖ สุตฺต. องฺ. (๕): ทสก-เอกาทสกนิปาตา

                   ชาณุสฺโสณิวคฺโค ทุติโย
     [๑๕๖]   เตน   โข   ปน   สมเยน   ชาณุสฺโสณิ   พฺราหฺมโณ
ตทหุโปสเถ   สีสนฺหาโต   นวํ   โขมยุคํ  นิวตฺโถ  อลฺลกุสมุฏฺฐึ  อาทาย
ภควโต  อวิทูเร  เอกมนฺตํ  ฐิโต  โหติ  ฯ อทฺทสา โข ภควา ชาณุสฺโสณึ
พฺราหฺมณํ   ตทหุโปสเถ   สีสนฺหาตํ   นวํ   โขมยุคํ  นิวตฺถํ  อลฺลกุสมุฏฺฐึ
อาทาย   เอกมนฺตํ   ฐิตํ   ทิสฺวาน   ชาณุสฺโสณึ   พฺราหฺมณํ  เอตทโวจ
กึ   นุ   ตฺวํ  พฺราหฺมณ  ตทหุโปสเถ  สีสนฺหาโต  นวํ  โขมยุคํ  นิวตฺโถ
อลฺลกุสมุฏฺฐึ  อาทาย  เอกมนฺตํ  ฐิโต  กึ นุ โข อชฺช พฺราหฺมณกุลสฺสาติ ฯ
ปจฺโจโรหณี โภ โคตม อชฺช พฺราหฺมณกุลสฺสาติ ฯ
     {๑๕๖.๑}   ยถากถํ   ปน   พฺราหฺมณ   พฺราหฺมณานํ  ปจฺโจโรหณี
โหตีติ   ฯ   อิธ  โภ  โคตม  พฺราหฺมณา  ตทหุโปสเถ  สีสนฺหาตา  นวํ
โขมยุคํ  นิวตฺถา  อลฺเลน  โคมเยน  ปฐวึ  โอปุญฺชิตฺวา  หริเตหิ  กุเสหิ
ปตฺถริตฺวา อนฺตรา จ เวลํ อนฺตรา จ อคฺยาคารํ เสยฺยํ กปฺเปนฺติ เต ตํ รตฺตึ
ติกฺขตฺตุํ   ปจฺจุฏฺฐาย   ปญฺชลิกา   อคฺคึ  นมสฺสนฺติ  ปจฺโจโรหาม  ภวนฺตํ
ปจฺโจโรหาม   ภวนฺตนฺติ   ปหุเตน   จ   สปฺปิเตเลน   นวนีเตน  อคฺคึ
สนฺตปฺเปนฺติ    ตสฺสา   จ   รตฺติยา   อจฺจเยน   ปณีเตน   ขาทนีเยน
โภชนีเยน  พฺราหฺมเณ  สนฺตปฺเปนฺติ  เอวํ  โข  โภ  โคตม  พฺราหฺมณานํ
ปจฺโจโรหณี   โหตีติ   อญฺญถา   โข   พฺราหฺมณานํ   ปจฺโจโรหณี  โหติ
อญฺญถา   จ   ปน   อริยสฺส   วินเย   ปจฺโจโรหณี   โหตีติ   ยถากถํ
ปน  โภ  โคตม  อริยสฺส  วินเย  ปจฺโจโรหณี  โหติ  สาธุ  วต เม ภวํ
โคตโม ตถา ธมฺมํ เทเสตุ ยถา อริยสฺส วินเย ปจฺโจโรหณี โหตีติ ฯ
     {๑๕๖.๒}   เตนหิ  พฺราหฺมณ สุณาหิ สาธุกํ มนสิกโรหิ ภาสิสฺสามีติ ฯ
เอวํ  โภติ  โข  ชาณุสฺโสณิ  พฺราหฺมโณ  ภควโต  ปจฺจสฺโสสิ  ฯ  ภควา
เอตทโวจ  อิธ  พฺราหฺมณ  อริยสาวโก  อิติ  ปฏิสญฺจิกฺขติ  ปาณาติปาตสฺส
โข   ปาปโก   วิปาโก  ทิฏฺเฐเจว  ธมฺเม  อภิสมฺปรายญฺจาติ  โส  อิติ
ปฏิสงฺขาย     ปาณาติปาตํ     ปชหติ     ปาณาติปาตา    ปจฺโจโรหติ
อทินฺนาทานสฺส  โข  ปาปโก  วิปาโก  ทิฏฺเฐเจว ธมฺเม อภิสมฺปรายญฺจาติ
โส   อิติ   ปฏิสงฺขาย   อทินฺนาทานํ  ปชหติ  อทินฺนาทานา  ปจฺโจโรหติ
กาเมสุ   มิจฺฉาจารสฺส   โข   ปาปโก   วิปาโก   ทิฏฺเฐเจว   ธมฺเม
อภิสมฺปรายญฺจาติ    โส    อิติ    ปฏิสงฺขาย    กาเมสุ    มิจฺฉาจารํ
ปชหติ กาเมสุ มิจฺฉาจารา ปจฺโจโรหติ
     {๑๕๖.๓}   มุสาวาทสฺส  โข  ปาปโก  วิปาโก  ทิฏฺเฐเจว  ธมฺเม
อภิสมฺปรายญฺจาติ   โส   อิติ   ปฏิสงฺขาย  มุสาวาทํ  ปชหติ  มุสาวาทา
ปจฺโจโรหติ   ปิสุณาย   วาจาย   โข   ปาปโก   วิปาโก   ทิฏฺเฐเจว
ธมฺเม   อภิสมฺปรายญฺจาติ   โส   อิติ   ปฏิสงฺขาย  ปิสุณํ  วาจํ  ปชหติ
ปิสุณาย   วาจาย  ปจฺโจโรหติ  ผรุสาย  วาจาย  โข  ปาปโก  วิปาโก
ทิฏฺเฐเจว   ธมฺเม  อภิสมฺปรายญฺจาติ  โส  อิติ  ปฏิสงฺขาย  ผรุสํ  วาจํ
ปชหติ   ผรุสาย   วาจาย   ปจฺโจโรหติ   สมฺผปฺปลาปสฺส  โข  ปาปโก
วิปาโก   ทิฏฺเฐเจว   ธมฺเม   อภิสมฺปรายญฺจาติ   โส  อิติ  ปฏิสงฺขาย
สมฺผปฺปลาปํ ปชหติ สมฺผปฺปลาปา ปจฺโจโรหติ
     {๑๕๖.๔}   อภิชฺฌาย   โข  ปาปโก  วิปาโก  ทิฏฺเฐเจว  ธมฺเม
อภิสมฺปรายญฺจาติ   โส   อิติ   ปฏิสงฺขาย   อภิชฺฌํ   ปชหติ   อภิชฺฌาย
ปจฺโจโรหติ   พฺยาปาทสฺส   โข   ปาปโก   วิปาโก  ทิฏฺเฐเจว  ธมฺเม
อภิสมฺปรายญฺจาติ   โส   อิติ   ปฏิสงฺขาย  พฺยาปาทํ  ปชหติ  พฺยาปาทา
ปจฺโจโรหติ   มิจฺฉาทิฏฺฐิยา   โข   ปาปโก  วิปาโก  ทิฏฺเฐเจว  ธมฺเม
อภิสมฺปรายญฺจาติ     โส    อิติ    ปฏิสงฺขาย    มิจฺฉาทิฏฺฐึ    ปชหติ
มิจฺฉาทิฏฺฐิยา   ปจฺโจโรหติ   เอวํ   โข   พฺราหฺมณ   อริยสฺส   วินเย
ปจฺโจโรหณี โหตีติ ฯ
     {๑๕๖.๕}   อญฺญถา  [๑]-  โภ  โคตม  พฺราหฺมณานํ  ปจฺโจโรหณี
โหติ  อญฺญถา  จ  ปน  อริยสฺส  วินเย  ปจฺโจโรหณี โหติ อิมิสฺสา จ โภ
โคตม    อริยสฺส   วินเย   ปจฺโจโรหณิยา   พฺราหฺมณานํ   ปจฺโจโรหณี
กลฺลํ   นาคฺฆติ   โสฬสึ   อภิกฺกนฺตํ   โภ   โคตม  ฯเปฯ  อุปาสกํ  มํ
ภวํ โคตโม ธาเรตุ อชฺชตคฺเค ปาณุเปตํ สรณงฺคตนฺติ ฯ
     [๑๕๗]   อริยํ  โว  ภิกฺขเว  ปจฺโจโรหณึ  เทสิสฺสามิ  ตํ  สุณาถ
สาธุกํ  มนสิกโรถ  ภาสิสฺสามีติ  ฯ  เอวํ  ภนฺเตติ  โข เต ภิกฺขู ภควโต
@เชิงอรรถ: ๑ ม. ยุ. โขสทฺโท ทิสฺสติ ฯ
ปจฺจสฺโสสุํ  ฯ  ภควา  เอตทโวจ  กตมา  จ  ภิกฺขเว อริยา ปจฺโจโรหณี
อิธ   ภิกฺขเว   อริยสาวโก   อิติ   ปฏิสญฺจิกฺขติ   ปาณาติปาตสฺส   โข
ปาปโก  วิปาโก  ทิฏฺเฐเจว  ธมฺเม  อภิสมฺปรายญฺจาติ โส อิติ ปฏิสงฺขาย
ปาณาติปาตํ    ปชหติ    ปาณาติปาตา    ปจฺโจโรหติ    อทินฺนาทานสฺส
โข   ปาปโก   วิปาโก  ทิฏฺเฐเจว  ธมฺเม  อภิสมฺปรายญฺจาติ  โส  อิติ
ปฏิสงฺขาย     อทินฺนาทานํ     ปชหติ     อทินฺนาทานา    ปจฺโจโรหติ
กาเมสุ   มิจฺฉาจารสฺส   โข   ปาปโก   วิปาโก   ทิฏฺเฐเจว   ธมฺเม
อภิสมฺปรายญฺจาติ    โส    อิติ    ปฏิสงฺขาย    กาเมสุ    มิจฺฉาจารํ
ปชหติ กาเมสุ มิจฺฉาจารา ปจฺโจโรหติ
     {๑๕๗.๑}   มุสาวาทสฺส  โข  ปาปโก  วิปาโก  ทิฏฺเฐเจว  ธมฺเม
อภิสมฺปรายญฺจาติ     โส     อิติ    ปฏิสงฺขาย    มุสาวาทํ    ปชหติ
มุสาวาทา  ปจฺโจโรหติ  ปิสุณาย  วาจาย  โข ปาปโก วิปาโก ทิฏฺเฐเจว
ธมฺเม   อภิสมฺปรายญฺจาติ   โส   อิติ   ปฏิสงฺขาย  ปิสุณํ  วาจํ  ปชหติ
ปิสุณาย   วาจาย  ปจฺโจโรหติ  ผรุสาย  วาจาย  โข  ปาปโก  วิปาโก
ทิฏฺเฐเจว   ธมฺเม  อภิสมฺปรายญฺจาติ  โส  อิติ  ปฏิสงฺขาย  ผรุสํ  วาจํ
ปชหติ   ผรุสาย   วาจาย   ปจฺโจโรหติ   สมฺผปฺปลาปสฺส  โข  ปาปโก
วิปาโก   ทิฏฺเฐเจว   ธมฺเม   อภิสมฺปรายญฺจาติ   โส  อิติ  ปฏิสงฺขาย
สมฺผปฺปลาปํ    ปชหติ    สมฺผปฺปลาปา    ปจฺโจโรหติ   อภิชฺฌาย   โข
ปาปโก   วิปาโก   ทิฏฺเฐเจว   ธมฺเม   อภิสมฺปรายญฺจาติ   โส   อิติ
ปฏิสงฺขาย    อภิชฺฌํ    ปชหติ    อภิชฺฌาย   ปจฺโจโรหติ   พฺยาปาทสฺส
โข   ปาปโก   วิปาโก  ทิฏฺเฐเจว  ธมฺเม  อภิสมฺปรายญฺจาติ  โส  อิติ
ปฏิสงฺขาย   พฺยาปาทํ   ปชหติ   พฺยาปาทา   ปจฺโจโรหติ  มิจฺฉาทิฏฺฐิยา
โข   ปาปโก   วิปาโก  ทิฏฺเฐเจว  ธมฺเม  อภิสมฺปรายญฺจาติ  โส  อิติ
ปฏิสงฺขาย    มิจฺฉาทิฏฺฐึ    ปชหติ    มิจฺฉาทิฏฺฐิยา   ปจฺโจโรหติ   อยํ
วุจฺจติ ภิกฺขเว อริยา ปจฺโจโรหณีติ ฯ
     [๑๕๘]   อถโข  สคารโว  พฺราหฺมโณ  เยน  ภควา  เตนุปสงฺกมิ
อุปสงฺกมิตฺวา   ภควตา   สทฺธึ   สมฺโมทิ   สมฺโมทนียํ   กถํ   สาราณียํ
วีติสาเรตฺวา   เอกมนฺตํ   นิสีทิ   เอกมนฺตํ   นิสินฺโน   โข   สคารโว
พฺราหฺมโณ   ภควนฺตํ   เอตทโวจ  กึ  นุ  โข  โภ  โคตม  โอริมํ  ตีรํ
กึ ปาริมํ ตีรนฺติ ฯ
     {๑๕๘.๑}   ปาณาติปาโต  โข  พฺราหฺมณ  โอริมํ  ตีรํ ปาณาติปาตา
เวรมณี    ปาริมํ    ตีรํ    อทินฺนาทานํ   โอริมํ   ตีรํ   อทินฺนาทานา
เวรมณี   ปาริมํ   ตีรํ   กาเมสุ   มิจฺฉาจาโร   โอริมํ   ตีรํ  กาเมสุ
มิจฺฉาจารา   เวรมณี   ปาริมํ  ตีรํ  มุสาวาโท  โอริมํ  ตีรํ  มุสาวาทา
เวรมณี   ปาริมํ   ตีรํ   ปิสุณา   วาจา  โอริมํ  ตีรํ  ปิสุณาย  วาจาย
เวรมณี   ปาริมํ   ตีรํ   ผรุสา   วาจา  โอริมํ  ตีรํ  ผรุสาย  วาจาย
เวรมณี    ปาริมํ    ตีรํ   สมฺผปฺปลาโป   โอริมํ   ตีรํ   สมฺผปฺปลาปา
เวรมณี   ปาริมํ   ตีรํ   อภิชฺฌา   โอริมํ   ตีรํ  อนภิชฺฌา  ปาริมํ  ตีรํ
พฺยาปาโท   โอริมํ   ตีรํ   อพฺยาปาโท  ปารมํ  ตีรํ  มิจฺฉาทิฏฺฐิ  โอริมํ
ตีรํ   สมฺมาทิฏฺฐิ   ปาริมํ   ตีรํ   อิทํ   โข   พฺราหฺมณ   โอริมํ   ตีรํ
อิทํ ปาริมํ ตีรนฺติ ฯ
     อปฺปกา เต มนุสฺเสสุ           เย ชนา ปารคามิโน
         อถายํ อิตรา ปชา            ตีรเมวานุธาวติ ฯ
         เย จ โข สมฺมทกฺขาเต     ธมฺเม ธมฺมานุวตฺติโน
         เต ชนา ปารเมสฺสนฺติ      มจฺจุเธยฺยํ สุทุตฺตรํ ฯ
         กณฺหํ ธมฺมํ วิปฺปหาย      สุกฺกํ ภาเวถ ปณฺฑิโต
         โอกา อโนกมาคมฺม       วิเวเก ยตฺถ ทูรมํ ฯ
         ตตฺราภิรติมิจฺเฉยฺย          หิตฺวา กาเม อกิญฺจโน
         ปริโยทเปยฺย อตฺตานํ      จิตฺตเกฺลเสหิ ปณฺฑิโต ฯ
         เยสํ สมฺโพธิยงฺเคสุ          สมฺมา จิตฺตํ สุภาวิตํ
         อาทานปฏินิสฺสคฺเค        อนุปาทาย เย รตา
         ขีณาสวา ชุติมนฺโต        เต โลเก ปรินิพฺพุตาติ ฯ
     [๑๕๙]   โอริมญฺจ  โว  ภิกฺขเว  ตีรํ  เทสิสฺสามิ  ปาริมญฺจ  ตีรํ
ตํ   สุณาถ   ฯเปฯ   กตมญฺจ   ภิกฺขเว   โอริมํ  ตีรํ  กตมญฺจ  ปาริมํ
ตีรํ   ปาณาติปาโต   โข   ภิกฺขเว  โอริมํ  ตีรํ  ปาณาติปาตา  เวรมณี
ปาริมํ   ตีรํ   อทินฺนาทานํ   โอริมํ  ตีรํ  อทินฺนาทานา  เวรมณี  ปาริมํ
ตีรํ   กาเมสุ   มิจฺฉาจาโร  โอริมํ  ตีรํ  กาเมสุ  มิจฺฉาจารา  เวรมณี
ปาริมํ   ตีรํ   มุสาวาโท   โอริมํ   ตีรํ   มุสาวาทา   เวรมณี  ปาริมํ
ตีรํ   ปิสุณา   วาจา   โอริมํ   ตีรํ  ปิสุณาย  วาจาย  เวรมณี  ปาริมํ
ตีรํ  ผรุสา  วาจา  โอริมํ  ตีรํ  ผรุสาย  วาจาย  เวรมณี  ปาริมํ  ตีรํ
สมฺผปฺปลาโป   โอริมํ  ตีรํ  สมฺผปฺปลาปา  เวรมณี  ปาริมํ  ตีรํ  อภิชฺฌา
โอริมํ  ตีรํ  อนภิชฺฌา  ปาริมํ  ตีรํ  พฺยาปาโท  โอริมํ  ตีรํ  อพฺยาปาโท
ปาริมํ   ตีรํ   มิจฺฉาทิฏฺฐิ   โอริมํ   ตีรํ   สมฺมาทิฏฺฐิ  ปาริมํ  ตีรํ  อิทํ
โข ภิกฺขเว โอริมํ ตีรํ อิทํ ปาริมํ ตีรนฺติ ฯ
         อปฺปกา เต มนุสฺเสสุ       เย ชนา ปารคามิโน
         อถายํ อิตรา ปชา            ตีรเมวานุธาวติ ฯ
         เย จ โข สมฺมทกฺขาเต     ธมฺเม ธมฺมานุวตฺติโน
         เต ชนา ปารเมสฺสนฺติ      มจฺจุเธยฺยํ สุทุตฺตรํ ฯ
         กณฺหํ ธมฺมํ วิปฺปหาย      สุกฺกํ ภาเวถ ปณฺฑิโต
         โอกา อโนกมาคมฺม       วิเวเก ยตฺถ ทูรมํ ฯ
         ตตฺราภิรติมิจฺเฉยฺย          หิตฺวา กาเม อกิญฺจโน
         ปริโยทเปยฺย อตฺตานํ      จิตฺตเกฺลเสหิ ปณฺฑิโต ฯ
         เยสํ สมฺโพธิยงฺเคสุ          สมฺมา จิตฺตํ สุภาวิตํ
         อาทานปฏินิสฺสคฺเค        อนุปาทาย เย รตา
         ขีณาสวา ชุติมนฺโต         เต โลเก ปรินิพฺพุตาติ ฯ
     [๑๖๐]   อธมฺโม  จ  ภิกฺขเว  เวทิตพฺโพ  อนตฺโถ  จ  ธมฺโม  จ
เวทิตพฺโพ    อตฺโถ    จ    อธมฺมญฺจ   วิทิตฺวา   อนตฺถญฺจ   ธมฺมญฺจ
วิทิตฺวา อตฺถญฺจ ยถา ธมฺโม ยถา อตฺโถ ตถา ปฏิปชฺชิตพฺพํ ฯ
     กตโม   จ   ภิกฺขเว   อธมฺโม   จ   อนตฺโถ  จ  ปาณาติปาโต
อทินฺนาทานํ  กาเมสุ  มิจฺฉาจาโร  มุสาวาโท  ปิสุณา วาจา ผรุสา วาจา
สมฺผปฺปลาโป   อภิชฺฌา   พฺยาปาโท   มิจฺฉาทิฏฺฐิ   อยํ  วุจฺจติ  ภิกฺขเว
อธมฺโม  จ  อนตฺโถ  จ  ฯ  กตโม  จ  ภิกฺขเว  ธมฺโม  จ  อตฺโถ  จ
ปาณาติปาตา   เวรมณี   อทินฺนาทานา   เวรมณี   กาเมสุ  มิจฺฉาจารา
เวรมณี  มุสาวาทา  เวรมณี  ปิสุณาย  วาจาย  เวรมณี  ผรุสาย วาจาย
เวรมณี   สมฺผปฺปลาปา   เวรมณี   อนภิชฺฌา   อพฺยาปาโท   สมฺมาทิฏฺฐิ
อยํ  วุจฺจติ  ภิกฺขเว  ธมฺโม  จ อตฺโถ จ ฯ อธมฺโม จ ภิกฺขเว เวทิตพฺโพ
อนตฺโถ   จ   ธมฺโม   จ   เวทิตพฺโพ   อตฺโถ  จ  อธมฺมญฺจ  วิทิตฺวา
อนตฺถญฺจ   ธมฺมญฺจ   วิทิตฺวา   อตฺถญฺจ   ยถา   ธมฺโม   ยถา  อตฺโถ
ตถา ปฏิปชฺชิตพฺพนฺติ อิติ ยนฺตํ วุตฺตํ อิทเมตํ ปฏิจฺจ วุตฺตนฺติ ฯ
     [๑๖๑]   อธมฺโม  จ  ภิกฺขเว  เวทิตพฺโพ  ธมฺโม  จ  อนตฺโถ  จ
เวทิตพฺโพ   อตฺโถ   จ  อธมฺมญฺจ  วิทิตฺวา  ธมฺมญฺจ  อนตฺถญฺจ  วิทิตฺวา
อตฺถญฺจ   ยถา   ธมฺโม   ยถา  อตฺโถ  ตถา  ปฏิปชฺชิตพฺพนฺติ  อิทมโวจ
ภควา อิทํ วตฺวาน สุคโต อุฏฺฐายาสนา วิหารํ ปาวิสิ ฯ
     {๑๖๑.๑}   อถโข  เตสํ  ภิกฺขูนํ  อจิรปกฺกนฺตสฺส ภควโต เอตทโหสิ
อิทํ  โข  โน  อาวุโส  ภควา  สงฺขิตฺเตน  อุทฺเทสํ อุทฺทิสิตฺวา วิตฺถาเรน
อตฺถํ   อวิภชิตฺวา   อุฏฺฐายาสนา  วิหารํ  ปวิฏฺโฐ  อธมฺโม  จ  ภิกฺขเว
เวทิตพฺโพ   ธมฺโม   จ   อนตฺโถ  จ  เวทิตพฺโพ  อตฺโถ  จ  อธมฺมญฺจ
วิทิตฺวา  ธมฺมญฺจ  อนตฺถญฺจ  วิทิตฺวา  อตฺถญฺจ  ยถา  ธมฺโม  ยถา อตฺโถ
ตถา  ปฏิปชฺชิตพฺพนฺติ  โก  นุ  โข  อิมสฺส  ภควตา สงฺขิตฺเตน อุทฺเทสสฺส
อุทฺทิฏฺฐสฺส   วิตฺถาเรน  อตฺถํ  อวิภตฺตสฺส  วิตฺถาเรน  อตฺถํ  วิภเชยฺยาติ
อถโข เตสํ ภิกฺขูนํ เอตทโหสิ
     {๑๖๑.๒}   อยํ  โข  อายสฺมา  มหากจฺจาโน  สตฺถุ เจว สํวณฺณิโต
สมฺภาวิโต  จ  วิญฺญูนํ  สพฺรหฺมจารีนํ  ปโหติ  อายสฺมา  ๑- มหากจฺจาโน
อิมสฺส   ภควตา   สงฺขิตฺเตน   อุทฺเทสสฺส  อุทฺทิฏฺฐสฺส  วิตฺถาเรน  อตฺถํ
อวิภตฺตสฺส  วิตฺถาเรน  อตฺถํ  วิภชิตุํ  ยนฺนูน มยํ เยนายสฺมา มหากจฺจาโน
เตนุปสงฺกเมยฺยาม   อุปสงฺกมิตฺวา   อายสฺมนฺตํ   มหากจฺจานํ   เอตมตฺถํ
ปุจฺเฉยฺยาม   ยถา  โน  อายสฺมา  มหากจฺจาโน  พฺยากริสฺสติ  ตถา  นํ
ธาเรสฺสามาติ  อถ  โข  เต ภิกฺขู เยนายสฺมา มหากจฺจาโน เตนุปสงฺกมึสุ
อุปสงฺกมิตฺวา   อายสฺมตา   มหากจฺจาเนน   สทฺธึ  สมฺโมทึสุ  สมฺโมทนียํ
กถํ   สาราณียํ  วีติสาเรตฺวา  เอกมนฺตํ  นิสีทึสุ  เอกมนฺตํ  นิสินฺนา  โข
เต ภิกฺขู อายสฺมนฺตํ มหากจฺจานํ เอตทโวจุํ
     {๑๖๑.๓}   อิทํ  โข  โน อาวุโส กจฺจาน ภควา สงฺขิตฺเตน อุทฺเทสํ
อุทฺทิสิตฺวา    วิตฺถาเรน    อตฺถํ    อวิภชิตฺวา   อุฏฺฐายาสนา   วิหารํ
ปวิฏฺโฐ  อธมฺโม  จ  ภิกฺขเว  เวทิตพฺโพ  ธมฺโม จ อนตฺโถ จ เวทิตพฺโพ
อตฺโถ    จ    อธมฺมญฺจ    วิทิตฺวา    ธมฺมญฺจ    อนตฺถญฺจ   วิทิตฺวา
อตฺถญฺจ   ยถา   ธมฺโม   ยถา   อตฺโถ   ตถา   ปฏิปชฺชิตพฺพนฺติ  เตสํ
โน   อาวุโส   อมฺหากํ   อจิรปกฺกนฺตสฺส  ภควโต  เอตทโหสิ  อิทํ  โข
โน   อาวุโส  ภควา  สงฺขิตฺเตน  อุทฺเทสํ  อุทฺทิสิตฺวา  วิตฺถาเรน  อตฺถํ
อวิภชิตฺวา  อุฏฺฐายาสนา  วิหารํ  ปวิฏฺโฐ  อธมฺโม  จ ภิกฺขเว เวทิตพฺโพ
ธมฺโม   จ   อนตฺโถ   จ   เวทิตพฺโพ   อตฺโถ  จ  อธมฺมญฺจ  วิทิตฺวา
ธมฺมญฺจ   อนตฺถญฺจ   วิทิตฺวา   อตฺถญฺจ   ยถา   ธมฺโม   ยถา  อตฺโถ
@เชิงอรรถ: ๑ ม. จายสฺมา ฯ
ตถา  ปฏิปชฺชิตพฺพนฺติ  โก  นุ  โข  อิมสฺส  ภควตา สงฺขิตฺเตน อุทฺเทสสฺส
อุทฺทิฏฺฐสฺส วิตฺถาเรน อตฺถํ อวิภตฺตสฺส วิตฺถาเรน อตฺถํ วิภเชยฺยาติ
     {๑๖๑.๔}   เตสํ  โน  อาวุโส อมฺหากํ เอตทโหสิ อยํ โข อายสฺมา
มหากจฺจาโน  สตฺถุ  เจว  สํวณฺณิโต  สมฺภาวิโต  จ  วิญฺญูนํ สพฺรหฺมจารีนํ
ปโหติ   อายสฺมา  มหากจฺจาโน  อิมสฺส  ภควตา  สงฺขิตฺเตน  อุทฺเทสสฺส
อุทฺทิฏฺฐสฺส  วิตฺถาเรน  อตฺถํ  อวิภตฺตสฺส  วิตฺถาเรน  อตฺถํ  วิภชิตุํ ยนฺนูน
มยํ    เยนายสฺมา    มหากจฺจาโน   เตนุปสงฺกเมยฺยาม   อุปสงฺกมิตฺวา
อายสฺมนฺตํ   มหากจฺจานํ   เอตมตฺถํ   ปุจฺเฉยฺยาม  ยถา  โน  อายสฺมา
มหากจฺจาโน   พฺยากริสฺสติ  ตถา  นํ  ธาเรสฺสามาติ  วิภชตายสฺมา  ๑-
มหากจฺจาโนติ เสยฺยถาปิ อาวุโส ปุริโส สารตฺถิโก สารคเวสี สารปริเยสนํ
จรมาโน  มหโต  รุกฺขสฺส  ติฏฺฐโต  สารวโต  อติกฺกมฺเมว  มูลํ อติกฺกมฺม
ขนฺธํ   สาขาปลาเส   สารํ   ปริเยสิตพฺพํ   มญฺเญยฺย   เอวํ  สมฺปทมิทํ
อายสฺมนฺตานํ  สตฺถริ  สมฺมุขีภูเต  ตํ  ภควนฺตํ  อติสิตฺวา  อเมฺห เอตมตฺถํ
ปฏิปุจฺฉิตพฺพํ  มญฺญถ  ๒-  โส  หิ  อาวุโส  ภควา  ชานํ  ชานาติ  ปสฺสํ
ปสฺสติ   จกฺขุภูโต   ญาณภูโต   ธมฺมภูโต   พฺรหฺมภูโต   วตฺตา  ปวตฺตา
อตฺถสฺส   นินฺเนตา   อมตสฺส   ทาตา   ธมฺมสามี  ตถาคโต  โส  เจว
ปเนตสฺส  กาโล  อโหสิ  ยํ  ตุเมฺห  ภควนฺตํเยว  อุปสงฺกมิตฺวา เอตมตฺถํ
ปุจฺเฉยฺยาถ ๓- ยถา โน ๔- ภควา พฺยากเรยฺย ตถา นํ ธาเรยฺยาถาติ
     {๑๖๑.๕}   อทฺธาวุโส  ๕- กจฺจาน ภควา ชานํ ชานาติ ปสฺสํ ปสฺสติ
จกฺขุภูโต  ญาณภูโต  ธมฺมภูโต  พฺรหฺมภูโต วตฺตา ปวตฺตา อตฺถสฺส นินฺเนตา
@เชิงอรรถ: ๑ โป. ม. วิภชตุ อายสฺมา ฯ ๒ โป. มญฺเญยฺยาถ ฯ ยุ. มญฺเญถ ฯ
@๓ ม. ปฏิปุจฺเฉยฺยาถ ฯ ๔ ม. โว. ฯ ๕ ม. อทฺธา อาวุโส ฯ
อมตสฺส  ทาตา  ธมฺมสามี  ตถาคโต  โส  เจว  ปเนตสฺส  กาโล อโหสิ
ยํ   มยํ   ภควนฺตํเยว  อุปสงฺกมิตฺวา  เอตมตฺถํ  ปุจฺเฉยฺยาม  ยถา  โน
ภควา   พฺยากเรยฺย   ตถา  นํ  ธาเรยฺยาม  อปิจายสฺมา  มหากจฺจาโน
สตฺถุเจว   สํวณฺณิโต   สมฺภาวิโต   จ   วิญฺญูนํ   สพฺรหฺมจารีนํ   ปโหติ
อายสฺมา  มหากจฺจาโน  อิมสฺส  ภควตา  สงฺขิตฺเตน อุทฺเทสสฺส อุทฺทิฏฺฐสฺส
วิตฺถาเรน   อตฺถํ   อวิภตฺตสฺส   วิตฺถาเรน  อตฺถํ  วิภชิตุํ  วิภชตายสฺมา
มหากจฺจาโน อครุกตฺวาติ ๑- ฯ
     {๑๖๑.๖}   เตนหาวุโส  สุณาถ  สาธุกํ  มนสิกโรถ  ภาสิสฺสามีติ ฯ
เอวมาวุโสติ  โข  เต  ภิกฺขู  อายสฺมโต  มหากจฺจานสฺส  ปจฺจสฺโสสุํ  ฯ
อายสฺมา   ๒-  มหากจฺจาโน  เอตทโวจ  ยํ  โข  โน  อาวุโส  ภควา
สงฺขิตฺเตน    อุทฺเทสํ    อุทฺทิสิตฺวา    วิตฺถาเรน    อตฺถํ   อวิภชิตฺวา
อุฏฺฐายาสนา   วิหารํ  ปวิฏฺโฐ  อธมฺโม  จ  ภิกฺขเว  เวทิตพฺโพ  ธมฺโม
จ   อนตฺโถ   จ   เวทิตพฺโพ   อตฺโถ  จ  อธมฺมญฺจ  วิทิตฺวา  ธมฺมญฺจ
อนตฺถญฺจ    วิทิตฺวา   อตฺถญฺจ   ยถา   ธมฺโม   ยถา   อตฺโถ   ตถา
ปฏิปชฺชิตพฺพนฺติ
     {๑๖๑.๗}   กตโม  จาวุโส  อธมฺโม  กตโม  จ  ธมฺโม  กตโม จ
อนตฺโถ    กตโม    จ    อตฺโถ    ปาณาติปาโต   อาวุโส   อธมฺโม
ปาณาติปาตา     เวรมณี    ธมฺโม    เย    จ    ปาณาติปาตปจฺจยา
อเนเก  ปาปกา  อกุสลา  ธมฺมา  สมฺภวนฺติ  อยํ  อนตฺโถ  ปาณาติปาตา
เวรมณีปจฺจยา   จ   อเนเก   กุสลา   ธมฺมา  ภาวนาปาริปูรึ  คจฺฉนฺติ
อยํ   อตฺโถ   ฯ  อทินฺนาทานํ  อาวุโส  อธมฺโม  อทินฺนาทานา  เวรมณี
ธมฺโม   เย   จ  อทินฺนาทานปจฺจยา  อเนเก  ปาปกา  อกุสลา  ธมฺมา
@เชิงอรรถ: ๑ โป. ม. อครุํ กริตฺวาติ ฯ ยุ. อครุกริตฺวา ฯ ๒ อถายสุมา ฯ
สมฺภวนฺติ   อยํ   อนตฺโถ   อทินฺนาทานา   เวรมณีปจฺจยา   จ  อเนเก
กุสลา   ธมฺมา   ภาวนาปาริปูรึ   คจฺฉนฺติ   อยํ   อตฺโถ   ฯ  กาเมสุ
มิจฺฉาจาโร  อาวุโส  อธมฺโม  กาเมสุ  มิจฺฉาจารา เวรมณี ธมฺโม เย จ
กาเมสุ   มิจฺฉาจารปจฺจยา  อเนเก  ปาปกา  อกุสลา  ธมฺมา  สมฺภวนฺติ
อยํ   อนตฺโถ  กาเมสุ  มิจฺฉาจารา  เวรมณีปจฺจยา  จ  อเนเก  กุสลา
ธมฺมา ภาวนาปาริปูรึ คจฺฉนฺติ อยํ อตฺโถ ฯ
     {๑๖๑.๘}   มุสาวาโท  อาวุโส  อธมฺโม  มุสาวาทา เวรมณี ธมฺโม
เย   จ   มุสาวาทปจฺจยา  อเนเก  ปาปกา  อกุสลา  ธมฺมา  สมฺภวนฺติ
อยํ   อนตฺโถ   มุสาวาทา   เวรมณีปจฺจยา  จ  อเนเก  กุสลา  ธมฺมา
ภาวนาปาริปูรึ  คจฺฉนฺติ  อยํ  อตฺโถ  ฯ  ปิสุณา  วาจา  อาวุโส อธมฺโม
ปิสุณาย  วาจาย  เวรมณี  ธมฺโม  เย  จ  ปิสุณา  วาจาปจฺจยา อเนเก
ปาปกา   อกุสลา   ธมฺมา   สมฺภวนฺติ   อยํ  อนตฺโถ  ปิสุณาย  วาจาย
เวรมณีปจฺจยา   จ   อเนเก   กุสลา   ธมฺมา  ภาวนาปาริปูรึ  คจฺฉนฺติ
อยํ  อตฺโถ  ฯ  ผรุสา  วาจา  อาวุโส  อธมฺโม ผรุสาย วาจาย เวรมณี
ธมฺโม   เย   จ   ผรุสวาจาปจฺจยา  อเนเก  ปาปกา  อกุสลา  ธมฺมา
สมฺภวนฺติ  อยํ  อนตฺโถ  ผรุสาย  วาจาย เวรมณีปจฺจยา จ อเนเก กุสลา
ธมฺมา   ภาวนาปาริปูรึ  คจฺฉนฺติ  อยํ  อตฺโถ  ฯ  สมฺผปฺปลาโป  อาวุโส
อธมฺโม   สมฺผปฺปลาปา   เวรมณี   ธมฺโม   เย  จ  สมฺผปฺปลาปปจฺจยา
อเนเก  ปาปกา  อกุสลา  ธมฺมา  สมฺภวนฺติ  อยํ  อนตฺโถ  สมฺผปฺปลาปา
เวรมณีปจฺจยา   จ   อเนเก   กุสลา   ธมฺมา  ภาวนาปาริปูรึ  คจฺฉนฺติ
อยํ อตฺโถ ฯ
     {๑๖๑.๙}   อภิชฺฌา   อาวุโส   อธมฺโม   อนภิชฺฌา  ธมฺโม  เย
จ   อภิชฺฌาปจฺจยา   อเนเก   ปาปกา  อกุสลา  ธมฺมา  สมฺภวนฺติ  อยํ
อนตฺโถ   อนภิชฺฌาปจฺจยา   จ   อเนเก  กุสลา  ธมฺมา  ภาวนาปาริปูรึ
คจฺฉนฺติ   อยํ   อตฺโถ   ฯ   พฺยาปาโท  อาวุโส  อธมฺโม  อพฺยาปาโท
ธมฺโม   เย   จ   พฺยาปาทปจฺจยา   อเนเก  ปาปกา  อกุสลา  ธมฺมา
สมฺภวนฺติ   อยํ   อนตฺโถ  อพฺยาปาทปจฺจยา  จ  อเนเก  กุสลา  ธมฺมา
ภาวนาปาริปูรึ   คจฺฉนฺติ   อยํ  อตฺโถ  ฯ  มิจฺฉาทิฏฺฐิ  อาวุโส  อธมฺโม
สมฺมาทิฏฺฐิ  ธมฺโม  เย  จ  มิจฺฉาทิฏฺฐิปจฺจยา  อเนเก  ปาปกา  อกุสลา
ธมฺมา    สมฺภวนฺติ    อยํ   อนตฺโถ   สมฺมาทิฏฺฐิปจฺจยา   จ   อเนเก
กุสลา ธมฺมา ภาวนาปาริปูรึ คจฺฉนฺติ อยํ อตฺโถ ฯ
     {๑๖๑.๑๐}   ยํ โข โน อาวุโส ภควา สงฺขิตฺเตน อุทฺเทสํ อุทฺทิสิตฺวา
วิตฺถาเรน  อตฺถํ  อวิภชิตฺวา  อุฏฺฐายาสนา  วิหารํ  ปวิฏฺโฐ  อธมฺโม  จ
ภิกฺขเว  เวทิตพฺโพ  ธมฺโม  จ  อนตฺโถ  จ เวทิตพฺโพ อตฺโถ จ อธมฺมญฺจ
วิทิตฺวา  ธมฺมญฺจ  อนตฺถญฺจ  วิทิตฺวา  อตฺถญฺจ  ยถา  ธมฺโม  ยถา อตฺโถ
ตถา  ปฏิปชฺชิตพฺพนฺติ  อิมสฺสปิ  ๑-  โข  อหํ  อาวุโส ภควตา สงฺขิตฺเตน
อุทฺเทสสฺส  อุทฺทิฏฺฐสฺส  วิตฺถาเรน  อตฺถํ  อวิภชิตฺวา เอวํ วิตฺถาเรน อตฺถํ
อาชานามิ  อากงฺขมานา  จปน  ตุเมฺห  อาวุโส ภควนฺตํเยว อุปสงฺกมิตฺวา
เอตมตฺถํ ปุจฺเฉยฺยาถ ยถา โน ๒- ภควา พฺยากเรยฺย ตถา นํ ธาเรยฺยาถาติ ฯ
     {๑๖๑.๑๑}   เอวมาวุโสติโข เต ภิกฺขู อายสฺมโต มหากจฺจานสฺส ภาสิตํ
อภินนฺทิตฺวา อนุโมทิตฺวา อุฏฺฐายาสนา เยน ภควา เตนุปสงฺกมึสุ อุปสงฺกมิตฺวา
@เชิงอรรถ: ๑ ม. ยุ. อิมสฺส ฯ ๒ ม. ยุ. โว ฯ
ภควนฺตํ   อภิวาเทตฺวา   เอกมนฺตํ   นิสีทึสุ   เอกมนฺตํ   นิสินฺนา   โข
เต  ภิกฺขู  ภควนฺตํ  เอตทโวจุํ  ยํ  โข  โน  ภนฺเต  ภควา  สงฺขิตฺเตน
อุทฺเทสํ    อุทฺทิสิตฺวา    วิตฺถาเรน   อตฺถํ   อวิภชิตฺวา   อุฏฺฐายาสนา
วิหารํ   ปวิฏฺโฐ   อธมฺโม  จ  ภิกฺขเว  เวทิตพฺโพ  ธมฺโม  จ  อนตฺโถ
จ   เวทิตพฺโพ   อตฺโถ   จ   อธมฺมญฺจ   วิทิตฺวา   ธมฺมญฺจ  อนตฺถญฺจ
วิทิตฺวา อตฺถญฺจ ยถา ธมฺโม ยถา อตฺโถ ตถา ปฏิปชฺชิตพฺพนฺติ
     {๑๖๑.๑๒}   เตสํ  โน  ภนฺเต  อมฺหากํ  อจิรปกฺกนฺตสฺส  ภควโต
เอตทโหสิ  อิทํ  โข  โน  อาวุโส  ภควา  สงฺขิตฺเตน อุทฺเทสํ อุทฺทิสิตฺวา
วิตฺถาเรน  อตฺถํ  อวิภชิตฺวา  อุฏฺฐายาสนา  วิหารํ  ปวิฏฺโฐ  อธมฺโม  จ
ภิกฺขเว  เวทิตพฺโพ  ธมฺโม  จ  อนตฺโถ  จ เวทิตพฺโพ อตฺโถ จ อธมฺมญฺจ
วิทิตฺวา  ธมฺมญฺจ  อนตฺถญฺจ  วิทิตฺวา  อตฺถญฺจ  ยถา  ธมฺโม  ยถา อตฺโถ
ตถา  ปฏิปชฺชิตพฺพนฺติ  โก  นุ  โข  อิมสฺส  ภควตา สงฺขิตฺเตน อุทฺเทสสฺส
อุทฺทิฏฺฐสฺส วิตฺถาเรน อตฺถํ วิภเชยฺยาติ
     {๑๖๑.๑๓}   เตสํ  โน  ภนฺเต อมฺหากํ เอตทโหสิ อยํ โข อายสฺมา
มหากจฺจาโน  สตฺถุ  เจว  สํวณฺณิโต  สมฺภาวิโต  จ  วิญฺญูนํ สพฺรหฺมจารีนํ
ปโหติ   อายสฺมา  มหากจฺจาโน  อิมสฺส  ภควตา  สงฺขิตฺเตน  อุทฺเทสสฺส
อุทฺทิฏฺฐสฺส  วิตฺถาเรน  อตฺถํ  อวิภตฺตสฺส  วิตฺถาเรน  อตฺถํ  วิภชิตุํ ยนฺนูน
มยํ  เยนายสฺมา  มหากจฺจาโน เตนุปสงฺกเมยฺยาม อุปสงฺกมิตฺวา อายสฺมนฺตํ
มหากจฺจานํ   เอตมตฺถํ  ปุจฺเฉยฺยาม  ยถา  โน  อายสฺมา  มหากจฺจาโน
พฺยากริสฺสติ   ตถา  นํ  ธาเรสฺสามาติ  อถโข  มยํ  ภนฺเต  เยนายสฺมา
มหากจฺจาโน   เตนุปสงฺกมิมฺหา   อุปสงฺกมิตฺวา   อายสฺมนฺตํ  มหากจฺจานํ
เอตมตฺถํ   ปุจฺฉิมฺหา  ๑-  เตสํ  โน  ภนฺเต  อายสฺมตา  มหากจฺจาเนน
อิเมหิ อากาเรหิ อิเมหิ ปเทหิ อิเมหิ พฺยญฺชเนหิ อตฺโถ สุวิภตฺโตติ ฯ
     {๑๖๑.๑๔}   สาธุ  สาธุ  ภิกฺขเว  ปณฺฑิโต  ภิกฺขเว  มหากจฺจาโน
มหาปญฺโญ  ภิกฺขเว  มหากจฺจาโน  มํ  เจปิ  ตุเมฺห ภิกฺขเว อุปสงฺกมิตฺวา
เอตมตฺถํ ปุจฺเฉยฺยาถ อหมฺปิเจตํ เอวเมว พฺยากเรยฺยํ ยถาตํ มหากจฺจาเนน
พฺยากตํ เอโสเจว ตสฺส ๒- อตฺโถ เอวญฺจ นํ ธาเรยฺยาถาติ ฯ
     [๑๖๒]   อธมฺโม จ ภิกฺขเว เวทิตพฺโพ ธมฺโม จ อนตฺโถ จ เวทิตพฺโพ
อตฺโถ   จ   อธมฺมญฺจ   วิทิตฺวา   ธมฺมญฺจ  อนตฺถญฺจ  วิทิตฺวา  อตฺถญฺจ
ยถา   ธมฺโม   ยถา  อตฺโถ  ตถา  ปฏิปชฺชิตพฺพนฺติ  กตโม  จ  ภิกฺขเว
อธมฺโม  กตโม  จ  ธมฺโม กตโม จ อนตฺโถ กตโม จ อตฺโถ ปาณาติปาโต
ภิกฺขเว  อธมฺโม  ปาณาติปาตา  เวรมณี  ธมฺโม เย จ ปาณาติปาตปจฺจยา
อเนเก  ปาปกา  อกุสลา  ธมฺมา  สมฺภวนฺติ  อยํ  อนตฺโถ  ปาณาติปาตา
เวรมณีปจฺจยา   จ   อเนเก   กุสลา   ธมฺมา  ภาวนาปาริปูรึ  คจฺฉนฺติ
อยํ อตฺโถ ฯ
     {๑๖๒.๑}   อทินฺนาทานํ  ภิกฺขเว  อธมฺโม  อทินฺนาทานา  เวรมณี
ธมฺโม  ...  กาเมสุ  มิจฺฉาจาโร  ภิกฺขเว  อธมฺโม กาเมสุ มิจฺฉาจารา
เวรมณี  ธมฺโม  ... มุสาวาโท ภิกฺขเว อธมฺโม มุสาวาทา เวรมณี ธมฺโม
...  ปิสุณา  วาจา  ภิกฺขเว อธมฺโม ปิสุณาย วาจาย เวรมณี ธมฺโม ...
ผรุสวาจา ภิกฺขเว อธมฺโม ผรุสาย วาจาย เวรมณี ธมฺโม ... สมฺผปฺปลาโป
@เชิงอรรถ: ๑ ม. อปุจฺฉิมฺหา ฯ ๒ โป. เอโสเจเวตสฺส ฯ
ภิกฺขเว  อธมฺโม  สมฺผปฺปลาปา  เวรมณี  ธมฺโม  ...  อภิชฺฌา  ภิกฺขเว
อธมฺโม  อนภิชฺฌา  ธมฺโม  ...  พฺยาปาโท  ภิกฺขเว อธมฺโม อพฺยาปาโท
ธมฺโม   ...  มิจฺฉาทิฏฺฐิ  ภิกฺขเว  อธมฺโม  สมฺมาทิฏฺฐิ  ธมฺโม  เย  จ
มิจฺฉาทิฏฺฐิปจฺจยา   อเนเก   ปาปกา   อกุสลา   ธมฺมา  สมฺภวนฺติ  อยํ
อนตฺโถ   สมฺมาทิฏฺฐิปจฺจยา   จ  อเนเก  กุสลา  ธมฺมา  ภาวนาปาริปูรึ
คจฺฉนฺติ   อยํ   อตฺโถ  ฯ  อธมฺโม  จ  ภิกฺขเว  เวทิตพฺโพ  ธมฺโม  จ
อนตฺโถ   จ   เวทิตพฺโพ   อตฺโถ   จ   อธมฺมญฺจ   วิทิตฺวา   ธมฺมญฺจ
อนตฺถญฺจ    วิทิตฺวา   อตฺถญฺจ   ยถา   ธมฺโม   ยถา   อตฺโถ   ตถา
ปฏิปชฺชิตพฺพนฺติ อิติ ยนฺตํ วุตฺตํ อิทเมตํ ปฏิจฺจ วุตฺตนฺติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๔ หน้าที่ ๒๖๗-๒๘๒.
http://84000.org/tipitaka/pitaka_item/pali_item_s.php?book=24&item=156&items=7&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=24&item=156&items=7&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=24&item=156&items=7&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=24&item=156&items=7&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=24&i=156
             สารบัญพระไตรปิฎกเล่มที่ ๒๔
http://84000.org/tipitaka/read/?index_24