ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๑ ภาษาบาลี อักษรไทย พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค
                                             ยุคนทฺธวคฺเค สุญฺญกถา
     [๖๓๓]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม  ฯ  อถ  โข  อายสฺมา  อานนฺโท
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทิ   ฯ   เอกมนฺตํ   นิสินฺโน   โข   อายสฺมา  อานนฺโท
ภควนฺตํ    เอตทโวจ    สุญฺโญ    โลโก    สุญฺโญ   โลโกติ   ภนฺเต
@เชิงอรรถ: ๑-๒ ม. อยํ ปาโฐ นตฺถิ ฯ
วุจฺจติ   กิตฺตาวตา   นุ   โข   ภนฺเต   สุญฺโญ   โลโกติ  วุจฺจตีติ  ฯ
ยสฺมา   โข   อานนฺท   สุญฺญํ   อตฺเตน   วา  อตฺตนิเยน  วา  ตสฺมา
สุญฺโญ     โลโกติ    วุจฺจติ    กิญฺจานนฺท    สุญฺญํ    อตฺเตน    วา
อตฺตนิเยน  วา  จกฺขุํ  ๑-  โข  อานนฺท  สุญฺญํ  อตฺเตน  วา อตฺตนิเยน
วา    รูปา   สุญฺญา   อตฺเตน   วา   อตฺตนิเยน   วา   จกฺขุวิญฺญาณํ
สุญฺญํ    อตฺเตน    วา    อตฺตนิเยน    วา    จกฺขุสมฺผสฺโส   สุญฺโญ
อตฺเตน   วา   อตฺตนิเยน   วา   ยมฺปิทํ  จกฺขุสมฺผสฺสปจฺจยา  อุปฺปชฺชติ
เวทยิตํ    สุขํ    วา   ทุกฺขํ   วา   อทุกฺขมสุขํ   วา   ตมฺปิ   สุญฺญํ
อตฺเตน   วา   อตฺตนิเยน   วา   โสตํ   สุญฺญํ  ฯเปฯ  สทฺทา  สุญฺญา
ฆานํ    สุญฺญํ    คนฺธา    สุญฺญา    ชิวฺหา    สุญฺญา   รสา   สุญฺญา
กาโย    สุญฺโญ   โผฏฺฐพฺพา   สุญฺญา   มโน   สุญฺโญ   อตฺเตน   วา
อตฺตนิเยน    วา   ธมฺมา   สุญฺญา   อตฺเตน   วา   อตฺตนิเยน   วา
มโนวิญฺญาณํ    สุญฺญํ   อตฺเตน   วา   อตฺตนิเยน   วา   มโนสมฺผสฺโส
สุญฺโญ   อตฺเตน   วา   อตฺตนิเยน   วา   ยมฺปิทํ   มโนสมฺผสฺสปจฺจยา
อุปฺปชฺชติ   เวทยิตํ   สุขํ  วา  ทุกฺขํ  วา  อทุกฺขมสุขํ  วา  ตมฺปิ  สุญฺญํ
อตฺเตน   วา   อตฺตนิเยน   วา   ยสฺมา  โข  อานนฺท  สุญฺญํ  อตฺเตน
วา อตฺตนิเยน วา ตสฺมา สุญฺโญ โลโกติ วุจฺจตีติ ฯ
     [๖๓๔]   สุญฺญํ    สุญฺญํ    ๒-    สงฺขารสุญฺญํ    วิปริณามสุญฺญํ
อคฺคสุญฺญํ         ลกฺขณสุญฺญํ         วิกฺขมฺภนสุญฺญํ        ตทงฺคสุญฺญํ
สมุจฺเฉทสุญฺญํ ปฏิปฺปสฺสทฺธิสุญฺญํ นิสฺสรณสุญฺญํ
@เชิงอรรถ:  ม. จกฺขุ ฯ เอวมุปริปิ ฯ  ม. ยุ. สุญฺญสุญฺญํ ฯ เอวมุปริปิ ฯ
อชฺฌตฺตสุญฺญํ         พหิทฺธาสุญฺญํ        ทุภโตสุญฺญํ        สภาคสุญฺญํ
วิสภาคสุญฺญํ        เอสนาสุญฺญํ        ปริคฺคหสุญฺญํ       ปฏิลาภสุญฺญํ
ปฏิเวธสุญฺญํ         เอกตฺตสุญฺญํ        นานตฺตสุญฺญํ        ขนฺติสุญฺญํ
อธิฏฺฐานสุญฺญํ      ปริโยคาหนสุญฺญํ     สมฺปชานสฺส     ปวตฺตปริยาทานํ
สพฺพสุญฺญตานํ ปรมฏฺฐสุญฺญํ ฯ
     [๖๓๕]   กตมํ   สุญฺญํ   สุญฺญํ   ฯ   จกฺขุํ   สุญฺญํ  อตฺเตน  วา
อตฺตนิเยน   วา  นิจฺเจน  วา  ธุเวน  วา  สสฺสเตน  วา  อวิปริณาม-
ธมฺเมน   วา  โสตํ  สุญฺญํ  ฯเปฯ  ฆานํ  สุญฺญํ  ชิวฺหา  สุญฺญา  กาโย
สุญฺโญ   มโน   สุญฺโญ   อตฺเตน   วา   อตฺตนิเยน  วา  นิจฺเจน  วา
ธุเวน วา สสฺสเตน วา อวิปริณามธมฺเมน วา อิทํ สุญฺญํ สุญฺญํ ฯ
     [๖๓๖]   กตมํ  สงฺขารสุญฺญํ  ฯ  ตโย  สงฺขารา  ปุญฺญาภิสงฺขาโร
อปุญฺญาภิสงฺขาโร          อเนญฺชาภิสงฺขาโร         ปุญฺญาภิสงฺขาโร
อปุญฺญาภิสงฺขาเรน      จ      อเนญฺชาภิสงฺขาเรน     จ     สุญฺโญ
อปุญฺญาภิสงฺขาโร    ปุญฺญาภิสงฺขาเรน    จ    อเนญฺชาภิสงฺขาเรน   จ
สุญฺโญ   อเนญฺชาภิสงฺขาโร   ปุญฺญาภิสงฺขาเรน   จ   อปุญฺญาภิสงฺขาเรน
จ สุญฺโญ อิเม ตโย สงฺขารา ฯ
     {๖๓๖.๑}   อปเรปิ ตโย สงฺขารา กายสงฺขาโร วจีสงฺขาโร จิตฺตสงฺขาโร
กายสงฺขาโร   วจีสงฺขาเรน  จ  จิตฺตสงฺขาเรน  จ  สุญฺโญ  วจีสงฺขาโร
กายสงฺขาเรน  จ  จิตฺตสงฺขาเรน  จ  สุญฺโญ จิตฺตสงฺขาโร กายสงฺขาเรน
จ วจีสงฺขาเรน จ สุญฺโญ อิเม ตโย สงฺขารา ฯ
     {๖๓๖.๒}   อปเรปิ ตโย สงฺขารา อตีตา สงฺขารา อนาคตา สงฺขารา
ปจฺจุปฺปนฺนา   สงฺขารา   อตีตา  สงฺขารา  อนาคเตหิ  จ  ปจฺจุปฺปนฺเนหิ
จ   สงฺขาเรหิ   สุญฺญา  อนาคตา  สงฺขารา  อตีเตหิ  จ  ปจฺจุปฺปนฺเนหิ
จ   สงฺขาเรหิ   สุญฺญา  ปจฺจุปฺปนฺนา  สงฺขารา  อตีเตหิ  จ  อนาคเตหิ
จ สงฺขาเรหิ สุญฺญา อิเม ตโย สงฺขารา อิทํ สงฺขารสุญฺญํ ฯ
     [๖๓๗]   กตมํ   วิปริณามสุญฺญํ   ฯ   ชาตํ  รูปํ  สภาเวน  สุญฺญํ
วิคตํ   รูปํ   วิปริณตญฺเจว   สุญฺญญฺจ  ชาตา  เวทนา  สภาเวน  สุญฺญา
วิคตา   เวทนา   วิปริณตา   เจว   สุญฺญา  จ  ชาตา  สญฺญา  ชาตา
สงฺขารา   ชาตํ   วิญฺญาณํ  ชาตํ  จกฺขุํ  ฯเปฯ  ชาโต  ภโว  สภาเวน
สุญฺโญ วิคโต ภโว วิปริณโต เจว สุญฺโญ จ อิทํ วิปริณามสุญฺญํ ฯ
     [๖๓๘]   กตมํ   อคฺคสุญฺญํ   ฯ   อคฺคเมตํ  ปทํ  เสฏฺฐเมตํ  ปทํ
วิสิทฺธเมตํ     ปทํ     ยทิทํ    สพฺพสงฺขารสมโถ    สพฺพูปธิปฏินิสฺสคฺโค
ตณฺหกฺขโย วิราโค นิโรโธ นิพฺพานํ อิทํ อคฺคสุญฺญํ ฯ
     [๖๓๙]   กตมํ   ลกฺขณสุญฺญํ   ฯ   เทฺว  ลกฺขณานิ  พาลลกฺขณญฺจ
ปณฺฑิตลกฺขณญฺจ         พาลลกฺขณํ        ปณฺฑิตลกฺขเณน        สุญฺญํ
ปณฺฑิตลกฺขณํ    พาลลกฺขเณน    สุญฺญํ    ตีณิ   ลกฺขณานิ   อุปฺปาทลกฺขณํ
วยลกฺขณํ       ฐิตญฺญถตฺตลกฺขณํ       อุปฺปาทลกฺขณํ       วยลกฺขเณน
จ    ฐิตญฺญถตฺตลกฺขเณน    จ    สุญฺญํ    วยลกฺขณํ    อุปฺปาทลกฺขเณน
จ       ฐิตญฺญถตฺตลกฺขเณน       จ      สุญฺญํ      ฐิตญฺญถตฺตลกฺขณํ
อุปฺปาทลกฺขเณน   จ   วยลกฺขเณน   จ   สุญฺญํ   รูปสฺส   อุปฺปาทลกฺขณํ
วยลกฺขเณน     จ     ฐิตญฺญถตฺตลกฺขเณน     จ     สุญฺญํ     รูปสฺส
วยลกฺขณํ      อุปฺปาทลกฺขเณน      จ      ฐิตญฺญถตฺตลกฺขเณน     จ
สุญฺญํ    รูปสฺส    ฐิตญฺญถตฺตลกฺขณํ   อุปฺปาทลกฺขเณน   จ   วยลกฺขเณน
จ    สุญฺญํ    เวทนาย    สญฺญาย   สงฺขารานํ   วิญฺญาณสฺส   จกฺขุสฺส
ฯเปฯ    ชรามรณสฺส    อุปฺปาทลกฺขณํ   วยลกฺขเณน   จ   ฐิตญฺญถตฺต-
ลกฺขเณน    จ    สุญฺญํ    ชรามรณสฺส    วยลกฺขณํ   อุปฺปาทลกฺขเณน
จ    ฐิตญฺญถตฺตลกฺขเณน    จ    สุญฺญํ   ชรามรณสฺส   ฐิตญฺญถตฺตลกฺขณํ
อุปฺปาทลกฺขเณน จ วยลกฺขเณน จ สุญฺญํ อิทํ ลกฺขณสุญฺญํ ฯ
     [๖๔๐]   กตมํ   วิกฺขมฺภนสุญฺญํ   ฯ   เนกฺขมฺเมน   กามจฺฉนฺโท
วิกฺขมฺภิโต   เจว   สุญฺโญ   จ   อพฺยาปาเทน   พฺยาปาโท  วิกฺขมฺภิโต
เจว     สุญฺโญ     จ    อาโลกสญฺญาย    ถีนมิทฺธํ    วิกฺขมฺภิตญฺเจว
สุญฺญญฺจ      อวิกฺเขเปน      อุทฺธจฺจํ     วิกฺขมฺภิตญฺเจว     สุญฺญญฺจ
ธมฺมววตฺถาเนน   วิจิกิจฺฉา   วิกฺขมฺภิตา   เจว   สุญฺญา   จ   ญาเณน
อวิชฺชา   วิกขมฺภิตา   เจว   สุญฺญา   จ  ปามุชฺเชน  อรติ  วิกฺขมฺภิตา
เจว   สุญฺญา   จ   ปฐมชฺฌาเนน   นีวรณา   วิกฺขมฺภิตา  เจว  สุญฺญา
จ   ฯเปฯ   อรหตฺตมคฺเคน   สพฺพกิเลสา   วิกฺขมฺภิตา   เจว   สุญฺญา
จ อิทํ วิกฺขมฺภนสุญฺญํ ฯ
     [๖๔๑]   กตมํ    ตทงฺคสุญฺญํ    ฯ   เนกฺขมฺเมน   กามจฺฉนฺโท
ตทงฺคสุญฺโญ    อพฺยาปาเทน   พฺยาปาโท   ตทงฺคสุญฺโญ   อาโลกสญฺญาย
ถีนมิทฺธํ      ตทงฺคสุญฺญํ      อวิกฺเขเปน      อุทฺธจฺจํ     ตทงฺคสุญฺญํ
ธมฺมววตฺถาเนน     วิจิกิจฺฉา     ตทงฺคสุญฺญา     ญาเณน     อวิชฺชา
ตทงฺคสุญฺญา     ปามุชฺเชน     อรติ     ตทงฺคสุญฺญา     ปฐมชฺฌาเนน
นีวรณา    ตทงฺคสุญฺญา   ฯเปฯ   วิวฏฺฏนานุปสฺสนาย   สญฺโญคาภินิเวโส
ตทงฺคสุญฺโญ อิทํ ตทงฺคสุญฺญํ ฯ
     [๖๔๒]   กตมํ   สมุจฺเฉทสุญฺญํ   ฯ   เนกฺขมฺเมน   กามจฺฉนฺโท
สมุจฺฉินฺโน   เจว   สุญฺโญ   จ   อพฺยาปาเทน   พฺยาปาโท  สมุจฺฉินฺโน
เจว     สุญฺโญ     จ    อาโลกสญฺญาย    ถีนมิทฺธํ    สมุจฺฉินฺนญฺเจว
สุญฺญญฺจ      อวิกฺเขเปน      อุทฺธจฺจํ     สมุจฺฉินฺนญฺเจว     สุญฺญญฺจ
ธมฺมววตฺถาเนน   วิจิกิจฺฉา   สมุจฺฉินฺนา   เจว   สุญฺญา   จ   ญาเณน
อวิชฺชา   สมุจฺฉินฺนา   เจว   สุญฺญา   จ  ปามุชฺเชน  อรติ  สมุจฺฉินฺนา
เจว   สุญฺญา   จ   ปฐมชฺฌาเนน   นีวรณา   สมุจฺฉินฺนา  เจว  สุญฺญา
จ   ฯเปฯ   อรหตฺตมคฺเคน   สพฺพกิเลสา  สมุจฺฉินฺนา  เจว  สุญฺญา  จ
อิทํ สมุจฺเฉทสุญฺญํ ฯ
     [๖๔๓]   กตมํ   ปฏิปฺปสฺสทฺธิสุญฺญํ   ฯ   เนกฺขมฺเมน  กามจฺฉนฺโท
ปฏิปฺปสฺสทฺโธ   เจว  สุญฺโญ  จ  อพฺยาปาเทน  พฺยาปาโท  ปฏิปฺปสฺสทฺโธ
เจว    สุญฺโญ    จ    อาโลกสญฺญาย    ถีนมิทฺธํ    ปฏิปฺปสฺสทฺธญฺเจว
สุญฺญญฺจ         อวิกฺเขเปน        อุทฺธจฺจํ        ปฏิปฺปสฺสทฺธญฺเจว
สุญฺญญฺจ    ธมฺมววตฺถาเนน    วิจิกิจฺฉา   ปฏิปฺปสฺสทฺธา   เจว   สุญฺญา
จ   ญาเณน   อวิชฺชา   ปฏิปฺปสฺสทฺธา   เจว   สุญฺญา   จ  ปามุชฺเชน
อรติ    ปฏิปฺปสฺสทฺธา    เจว    สุญฺญา   จ   ปฐมชฺฌาเนน   นีวรณา
ปฏิปฺปสฺสทฺธา   เจว   สุญฺญา   จ   ฯเปฯ  อรหตฺตมคฺเคน  สพฺพกิเลสา
ปฏิปฺปสฺสทฺธา เจว สุญฺญา จ อิทํ ปฏิปฺปสฺสทฺธิสุญฺญํ ฯ
     [๖๔๔]   กตมํ    นิสฺสรณสุญฺญํ   ฯ   เนกฺขมฺเมน   กามจฺฉนฺโท
นิสฺสโฏ   เจว   สุญฺโญ   จ   อพฺยาปาเทน  พฺยาปาโท  นิสฺสโฏ  เจว
สุญฺโญ     จ     อาโลกสญฺญาย    ถีนมิทฺธํ    นิสฺสฏญฺเจว    สุญฺญญฺจ
อวิกฺเขเปน     อุทฺธจฺจํ     นิสฺสฏญฺเจว    สุญฺญญฺจ    ธมฺมววตฺถาเนน
วิจิกิจฺฉา   นิสฺสฏา   เจว   สุญฺญา   จ   ญาเณน   อวิชฺชา   นิสฺสฏา
เจว   สุญฺญา   จ   ปามุชฺเชน   อรติ   นิสฺสฏา   เจว   สุญฺญา   จ
ปฐมชฺฌาเนน  นีวรณา  นิสฺสฏา  เจว  สุญฺญา  จ  ฯเปฯ  อรหตฺตมคฺเคน
สพฺพกิเลสา นิสฺสฏา เจว สุญฺญา จ อิทํ นิสฺสรณสุญฺญํ ฯ
     [๖๔๕]   กตมํ    อชฺฌตฺตสุญฺญํ    ฯ    อชฺฌตฺตํ   จกฺขุ   สุญฺญํ
อตฺเตน  วา  อตฺตนิเยน  วา  นิจฺเจน  วา  ธุเวน  วา  สสฺสเตน  วา
อวิปริณามธมฺเมน    วา    อชฺฌตฺตํ    โสตํ   สุญฺญํ   ฯเปฯ   อชฺฌตฺตํ
ฆานํ    สุญฺญํ    อชฺฌตฺตํ   ชิวฺหา   สุญฺญา   อชฺฌตฺตํ   กาโย   สุญฺโญ
อชฺฌตฺตํ   มโน   สุญฺโญ   อตฺเตน   วา  อตฺตนิเยน  วา  นิจฺเจน  วา
ธุเวน วา สสฺสเตน วา อวิปริณามธมฺเมน วา อิทํ อชฺฌตฺตสุญฺญํ ฯ
     [๖๔๖]   กตมํ   พหิทฺธาสุญฺญํ   ฯ  พหิทฺธา  รูปา  สุญฺญา  ฯเปฯ
พหิทฺธา   ธมฺมา   สุญฺญา   อตฺเตน  วา  อตฺตนิเยน  วา  นิจฺเจน  วา
ธุเวน วา สสฺสเตน วา อวิปริณามธมฺเมน วา อิทํ พหิทฺธาสุญฺญํ ฯ
     [๖๔๗]   กตมํ   ทุภโตสุญฺญํ   ฯ   ยญฺจ  อชฺฌตฺตํ  จกฺขุํ  เย  จ
พหิทฺธา   รูปา   อุภยโต   ตํ   ๑-   สุญฺญา  อตฺเตน  วา  อตฺตนิเยน
วา   นิจฺเจน   วา  ธุเวน  วา  สสฺสเตน  วา  อวิปริณามธมฺเมน  วา
ยญฺจ    อชฺฌตฺตํ   โสตํ   เย   จ   พหิทฺธา   สทฺทา   ฯเปฯ   ยญฺจ
อชฺฌตฺตํ   ฆานํ  เย  จ  พหิทฺธา  คนฺธา  ยา  จ  อชฺฌตฺตํ  ชิวฺหา  เย
จ  พหิทฺธา  รสา  โย  จ  อชฺฌตฺตํ  กาโย  เย  จ  พหิทฺธา โผฏฺฐพฺพา
โย   จ   อชฺฌตฺตํ   มโน  เย  จ  พหิทฺธา  ธมฺมา  อุภยโต  ตํ  สุญฺญํ
อตฺเตน  วา  อตฺตนิเยน  วา  นิจฺเจน  วา  ธุเวน  วา  สสฺสเตน  วา
อวิปริณามธมฺเมน วา อิทํ ทุภโตสุญฺญํ ฯ
     [๖๔๘]   กตมํ   สภาคสุญฺญํ   ฯ   ฉ   อชฺฌตฺติกานิ   อายตนานิ
สภาคานิ   เจว   สุญฺญานิ   จ   ฉ   พาหิรานิ   อายตนานิ  สภาคานิ
เจว   สุญฺญานิ   จ   ฉ   วิญฺญาณกายา   สภาคา   เจว   สุญฺญา  จ
ฉ   ผสฺสกายา   สภาคา   เจว  สุญฺญา  จ  ฉ  เวทนากายา  สภาคา
@เชิงอรรถ:  สี. ม. อุภยเมตํ ฯ ยุ. อุภยํ เอตํ ฯ เอวมุปริปิ ฯ
เจว   สุญฺญา   จ   ฉ   สญฺญากายา   สภาคา   เจว  สุญฺญา  จ  ฉ
เจตนากายา สภาคา เจว สุญฺญา จ อิทํ สภาคสุญฺญํ ฯ
     [๖๔๙]   กตมํ   วิสภาคสุญฺญํ   ฯ   ฉ   อชฺฌตฺติกานิ  อายตนานิ
ฉหิ     พาหิรายตเนหิ     วิสภาคานิ    เจว    สุญฺญานิ    จ    ฉ
พาหิรายตนานิ    ฉหิ    วิญฺญาณกาเยหิ    วิสภาคานิ   เจว   สุญฺญานิ
จ   ฉ   วิญฺญาณกายา   ฉหิ   ผสฺสกาเยหิ   วิสภาคา   เจว   สุญฺญา
จ   ฉ   ผสฺสกายา   ฉหิ   เวทนากาเยหิ  วิสภาคา  เจว  สุญฺญา  จ
ฉ   เวทนากายา   ฉหิ   สญฺญากาเยหิ   วิสภาคา   เจว   สุญฺญา  จ
ฉ   สญฺญากายา   ฉหิ   เจตนากาเยหิ   วิสภาคา   เจว   สุญฺญา  จ
อิทํ วิสภาคสุญฺญํ ฯ
     [๖๕๐]   กตมํ   เอสนาสุญฺญํ   ฯ   เนกฺขมฺเมสนา  กามจฺฉนฺเทน
สุญฺญา    อพฺยาปาเทสนา    พฺยาปาเทน    สุญฺญา    อาโลกสญฺเญสนา
ถีนมิทฺเธน      สุญฺญา      อวิกฺเขเปสนา      อุทฺธจฺเจน     สุญฺญา
ธมฺมววตฺถาเนสนา     วิจิกิจฺฉาย     สุญฺญา    ญาเณสนา    อวิชฺชาย
สุญฺญา      ปามุชฺเชสนา      อรติยา     สุญฺญา     ปฐมชฺฌาเนสนา
นีวรเณหิ    สุญฺญา   ฯเปฯ   อรหตฺตมคฺเคสนา   สพฺพกิเลเสหิ   สุญฺญา
อิทํ เอสนาสุญฺญํ ฯ
     [๖๕๑]   กตมํ   ปริคฺคหสุญฺญํ  ฯ  เนกฺขมฺมปริคฺคโห  กามจฺฉนฺเทน
สุญฺโญ    อพฺยาปาทปริคฺคโห    พฺยาปาเทน    สุญฺโญ    อาโลกสญฺญา-
ปริคฺคโห     ถีนมิทฺเธน     สุญฺโญ    อวิกฺเขปปริคฺคโห    อุทฺธจฺเจน
สุญฺโญ    ธมฺมววตฺถานปริคฺคโห    วิจิกิจฺฉาย    สุญฺโญ    ญาณปริคฺคโห
อวิชฺชาย   สุญฺโญ   ปามุชฺชปริคฺคโห  อรติยา  สุญฺโญ  ปฐมชฺฌานปริคฺคโห
นีวรเณหิ   สุญฺโญ   ฯเปฯ   อรหตฺตมคฺคปริคฺคโห   สพฺพกิเลเสหิ  สุญฺโญ
อิทํ ปริคฺคหสุญฺญํ ฯ
     [๖๕๒]   กตมํ   ปฏิลาภสุญฺญํ  ฯ  เนกฺขมฺมปฏิลาโภ  กามจฺฉนฺเทน
สุญฺโญ    อพฺยาปาทปฏิลาโภ    พฺยาปาเทน    สุญฺโญ    อาโลกสญฺญา-
ปฏิลาโภ     ถีนมิทฺเธน     สุญฺโญ    อวิกฺเขปปฏิลาโภ    อุทฺธจฺเจน
สุญฺโญ    ธมฺมววตฺถานปฏิลาโภ    วิจิกิจฺฉาย    สุญฺโญ    ญาณปฏิลาโภ
อวิชฺชาย    สุญฺโญ    ปามุชฺชปฏิลาโภ   อรติยา   สุญฺโญ   ปฐมชฺฌาน-
ปฏิลาโภ     นีวรเณหิ     สุญฺโญ     ฯเปฯ     อรหตฺตมคฺคปฏิลาโภ
สพฺพกิเลเสหิ สุญฺโญ อิทํ ปฏิลาภสุญฺญํ ฯ
     [๖๕๓]   กตมํ   ปฏิเวธสุญฺญํ  ฯ  เนกฺขมฺมปฏิเวโธ  กามจฺฉนฺเทน
สุญฺโญ   อพฺยาปาทปฏิเวโธ   พฺยาปาเทน   สุญฺโญ  อาโลกสญฺญาปฏิเวโธ
ถีนมิทฺเธน   สุญฺโญ  อวิกฺเขปปฏิเวโธ  อุทฺธจฺเจน  สุญฺโญ  ธมฺมววตฺถาน-
ปฏิเวโธ    วิจิกิจฺฉาย    สุญฺโญ    ญาณปฏิเวโธ   อวิชฺชาย   สุญฺโญ
ปามุชฺชปฏิเวโธ    อรติยา    สุญฺโญ    ปฐมชฺฌานปฏิเวโธ    นีวรเณหิ
สุญฺโญ    ฯเปฯ    อรหตฺตมคฺคปฏิเวโธ    สพฺพกิเลเสหิ   สุญฺโญ   อิทํ
ปฏิเวธสุญฺญํ ฯ
     [๖๕๔]   กตมํ    เอกตฺตสุญฺญํ   นานตฺตสุญฺญํ   ฯ   กามจฺฉนฺโท
นานตฺตํ   เนกฺขมฺมํ   เอกตฺตํ   เนกฺขมฺเมกตฺตํ   เจตยโต  กามจฺฉนฺเทน
ฉนฺเทน     สุญฺญํ     พฺยาปาโท    นานตฺตํ    อพฺยาปาโท    เอกตฺตํ
อพฺยาปาเทกตฺตํ    เจตยโต    พฺยาปาเทน   สุญฺญํ   ถีนมิทฺธํ   นานตฺตํ
อาโลกสญฺญา    เอกตฺตํ    อาโลกสญฺเญกตฺตํ    เจตยโต    ถีนมิทฺเธน
สุญฺญํ   อุทฺธจฺจํ   นานตฺตํ   [๑]-  วิจิกิจฺฉา  นานตฺตํ  อวิชฺชา  นานตฺตํ
อรติ   นานตฺตํ   นีวรณา  นานตฺตํ  ปฐมชฺฌานํ  เอกตฺตํ  ปฐมชฺฌาเนกตฺตํ
เจตยโต    นีวรเณหิ    สุญฺญํ   ฯเปฯ   สพฺพกิเลสา   นานตฺตา   ๒-
อรหตฺตมคฺโค    เอกตฺตํ    อรหตฺตมคฺเคกตฺตํ   เจตยโต   สพฺพกิเลเสหิ
สุญฺญํ อิทํ เอกตฺตสุญฺญํ นานตฺตสุญฺญํ ฯ
     [๖๕๕]   กตมํ    ขนฺติสุญฺญํ   ฯ   เนกฺขมฺมขนฺติ   กามจฺฉนฺเทน
สุญฺญา     อพฺยาปาทขนฺติ    พฺยาปาเทน    สุญฺญา    อาโลกสญฺญาขนฺติ
ถีนมิทฺเธน   สุญฺญา   อวิกฺเขปขนฺติ  อุทฺธจฺเจน  สุญฺญา  ธมฺมววตฺถานขนฺติ
วิจิกิจฺฉาย    สุญฺญา    ญาณขนฺติ    อวิชฺชาย    สุญฺญา    ปามุชฺชขนฺติ
อรติยา     สุญฺญา     ปฐมชฺฌานขนฺติ    นีวรเณหิ    สุญฺญา    ฯเปฯ
อรหตฺตมคฺคขนฺติ สพฺพกิเลเสหิ สุญฺญา อิทํ ขนฺติสุญฺญํ ฯ
     [๖๕๖]   กตมํ  อธิฏฺฐานสุญฺญํ  ฯ  เนกฺขมฺมาธิฏฺฐานํ  กามจฺฉนฺเทน
สุญฺญํ    อพฺยาปาทาธิฏฺฐานํ    พฺยาปาเทน   สุญฺญํ   อาโลกสญฺญาธิฏฺฐานํ
ถีนมิทฺเธน      สุญฺญํ      อวิกฺเขปาธิฏฺฐานํ      อุทฺธจฺเจน     สุญฺญํ
ธมฺมววตฺถานาธิฏฺฐานํ       วิจิกิจฺฉาย       สุญฺญํ       ญาณาธิฏฺฐานํ
อวิชฺชาย       สุญฺญํ       ปามุชฺชาธิฏฺฐานํ       อรติยา      สุญฺญํ
@เชิงอรรถ:  ม. อวิกฺเขโป เอกตฺตํ อวิกฺเขเปกตฺตํ เจตยโต อุทฺธจฺเจน สุญฺญํ ฯ วิจิกิจฺฉา
@นานตฺตํ ธมฺมววตฺถานํ เอกตฺตํ ธมฺมววตฺถาเน เจตยโต วิจิกิจฺฉาย สุญฺญํ อวิชฺชา
@นานตฺตํ ญาณํ เอกตฺตํ ญาเณกตฺตํ เจตยโต อวิชฺชาย สุญฺญํ อรติ นานตฺตํ ปาโมชฺชํ
@เอกตฺตํ ปาโมชฺเชกตฺตํ เจตยโต อรติยา สุญฺญํ ฯ  ม. ยุ. นานตฺตํ ฯ
ปฐมชฺฌานาธิฏฺฐานํ    นีวรเณหิ    สุญฺญํ    ฯเปฯ   อรหตฺตมคฺคาธิฏฺฐานํ
สพฺพกิเลเสหิ สุญฺญํ อิทํ อธิฏฺฐานสุญฺญํ ฯ
     [๖๕๗]   กตมํ    ปริโยคาหนสุญฺญํ    ฯ    เนกฺขมฺมปริโยคาหนํ
กามจฺฉนฺเทน     สุญฺญํ    อพฺยาปาทปริโยคาหนํ    พฺยาปาเทน    สุญฺญํ
อาโลกสญฺญาปริโยคาหนํ     ถีนมิทฺเธน     สุญฺญํ    อวิกฺเขปปริโยคาหนํ
อุทฺธจฺเจน     สุญฺญํ     ธมฺมววตฺถานปริโยคาหนํ    วิจิกิจฺฉาย    สุญฺญํ
ญาณปริโยคาหนํ     อวิชฺชาย    สุญฺญํ    ปามุชฺชปริโยคาหนํ    อรติยา
สุญฺญํ      ปฐมชฺฌานปริโยคาหนํ      นีวรเณหิ      สุญฺญํ      ฯเปฯ
อรหตฺตมคฺคปริโยคาหนํ สพฺพกิเลเสหิ สุญฺญํ อิทํ ปริโยคาหนสุญฺญํ ฯ
     [๖๕๘]   กตมํ    สมฺปชานสฺส   ปวตฺตปริยาทานํ   สพฺพสุญฺญตานํ
ปรมฏฺฐสุญฺญํ    ฯ    สมฺปชาโน    เนกฺขมฺเมน   กามจฺฉนฺทสฺส   ปวตฺตํ
ปริยาทิยติ     อพฺยาปาเทน     พฺยาปาทสฺส     ปวตฺตํ     ปริยาทิยติ
อาโลกสญฺญาย     ถีนมิทฺธสฺส     ปวตฺตํ     ปริยาทิยติ    อวิกฺเขเปน
อุทฺธจฺจสฺส   ปวตฺตํ   ปริยาทิยติ   ธมฺมววตฺถาเนน   วิจิกิจฺฉาย   ปวตฺตํ
ปริยาทิยติ    ญาเณน    อวิชฺชาย    ปวตฺตํ    ปริยาทิยติ   ปามุชฺเชน
อรติยา    ปวตฺตํ    ปริยาทิยติ    ปฐมชฺฌาเนน    นีวรณานํ    ปวตฺตํ
ปริยาทิยติ   ฯเปฯ   อรหตฺตมคฺเคน   สพฺพกิเลสานํ   ปวตฺตํ  ปริยาทิยติ
อถ     วา    ปน    สมฺปชานสฺส    อนุปาทิเสสาย    นิพฺพานธาตุยา
ปรินิพฺพายนฺตสฺส     อิทญฺเจว     จกฺขุปวตฺตํ     ปริยาทิยติ    อญฺญญฺจ
จกฺขุปวตฺตํ     น     อุปฺปชฺชติ     อิทญฺเจว     โสตปวตฺตํ    ฯเปฯ
ฆานปวตฺตํ     ชิวฺหาปวตฺตํ     กายปวตฺตํ     มโนปวตฺตํ    ปริยาทิยติ
อญฺญญฺจ   มโนปวตฺตํ   น   อุปฺปชฺชติ  อิทํ  สมฺปชานสฺส  ปวตฺตปริยาทานํ
สพฺพสุญฺญตานํ ปรมฏฺฐสุญฺญนฺติ ฯ
                                                 สุญฺญกถา ฯ
                                                  --------
                                          ยุคนทฺธวคฺโค ทุติโย ฯ
                                               --------------
                                      ตสฺส วคฺคสฺส อุทฺทานํ ภวติ
                         ยุคนทฺธา ๑- สจฺจโพชฺฌงฺคา   เมตฺตา วิราคปญฺจมํ
                         ปฏิสมฺภิทา ธมฺมจกฺกํ             โลกุตฺตรพลา สุญฺญา ๒- เต ทสาติ ฯ
                         เอส นิกายวโร ฐปิโต อสโม     ทุติโย ปวโร วรมคฺโคติ ฯ
                                               -------------



             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๕๕๐-๕๖๒. http://84000.org/tipitaka/pitaka_item/pali_item_s.php?book=31&item=633&items=26&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=31&item=633&items=26&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=31&item=633&items=26&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=31&item=633&items=26&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=31&i=633              The Pali Atthakatha in Thai :- http://84000.org/tipitaka/atthapali/read_th.php?B=48&A=6246              The Pali Atthakatha in Roman :- http://84000.org/tipitaka/atthapali/read_rm.php?B=48&A=6246              สารบัญพระไตรปิฎกเล่มที่ ๓๑ http://84000.org/tipitaka/read/?index_31

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :