พระไตรปิฎกเล่มที่ ๓๒ ภาษาบาลี อักษรไทย
พระสุตตันตปิฎกเล่มที่ ๒๔ สุตฺต. ขุ. อปทานํ (๑)

                                  ฉตฺตึโส สทฺทสญฺญิกวคฺโค
                             ปฐมํ สทฺทสญฺญิกตฺเถราปทานํ (๓๕๑)
     [๓๕๓]   |๓๕๓.๑| มิคลุทฺโธ ปุเร อาสึ      อรญฺเญ กานเน อหํ
                       ตตฺถทฺทสาสึ สมฺพุทฺธํ       เทฺวสงฺฆปุรกฺขตํ ฯ
       |๓๕๓.๒| จตุสจฺจํ ปกาเสนฺตํ              อุทฺธรนฺตํ มหาชนํ
                      อสฺโสสึ มธุรํ วาจํ               กรวิกรุโทปมํ ฯ
       |๓๕๓.๓| พฺรหฺมสรสฺส มุนิโน             สิขิโน โลกพนฺธุโน
                      โฆเส จิตฺตํ ปสาเทตฺวา        ปตฺโตมฺหิ อาสวกฺขยํ ฯ
       |๓๕๓.๔| เอกตฺตึเส อิโต กปฺเป           ยํ กมฺมมกรึ ตทา
                      ทุคฺคตึ นาภิชานามิ            ปสาทสฺส อิทํ ผลํ ฯ
       |๓๕๓.๕| ปฏิสมฺภิทา จตสฺโส             วิโมกฺขาปิจ อฏฺฐิเม
                      ฉฬภิญฺญา สจฺฉิกตา          กตํ พุทฺธสฺส สาสนนฺติ ฯ
         อิตฺถํ สุทํ อายสฺมา สทฺทสญฺญิโก เถโร อิมา คาถาโย
อภาสิตฺถาติ  ฯ
                                   สทฺทสญฺญิกตฺเถรสฺส อปทานํ สมตฺตํ ฯ
                                   ทุติยํ ยวกลาปิยตฺเถราปทานํ (๓๕๒)
     [๓๕๔]   |๓๕๔.๖| นคเร อรุณวติยา         อาสึ ยวสิโก ตทา
                       ปนฺเถ ทิสฺวาน สมฺพุทฺธํ      ยวกลาปํ อปตฺถรึ ๑- ฯ
@เชิงอรรถ: ๑ ม. อสนฺถรึ ฯ
       |๓๕๔.๗| อนุกมฺปโก การุณิโก          สิขี โลกคฺคนายโก
                      มม สงฺกปฺปมญฺญาย         นิสีทิ ยวสนฺถเร ฯ
       |๓๕๔.๘| ทิสฺวา นิสินฺนํ วิมลํ             มหาฌายึ วินายกํ
                      ปาโมชฺชํ ชนยิตฺวาน          ตตฺถ กาลํ กโต อหํ ฯ
       |๓๕๔.๙| เอกตฺตึเส อิโต กปฺเป          ยํ กมฺมมกรึ ตทา
                      ทุคฺคตึ นาภิชานามิ           ยวตฺถเร อิทํ ผลํ ฯ
       |๓๕๔.๑๐| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ยวกลาปิโย เถโร อิมา คาถาโย
อภาสิตฺถาติ ฯ
                                ยวกลาปิยตฺเถรสฺส อปทานํ สมตฺตํ ฯ
                                  ตติยํ กึสุกปูชกตฺเถราปทานํ (๓๕๓)
     [๓๕๕]   |๓๕๕.๑๑| กึสุกํ ปุปฺผิตํ ทิสฺวา   ปคฺคเหตฺวาน อญฺชลึ
                         พุทฺธํ สริตฺวา สิทฺธตฺถํ      อากาเส อภิปูชยึ ฯ
       |๓๕๕.๑๒| จตุนวุเต อิโต กปฺเป         ยํ ปุปฺผมภิปูชยึ
                         ทุคฺคตึ นาภิชานามิ        พุทฺธปูชายิทํ ผลํ ฯ
       |๓๕๕.๑๓| ปฏิสมฺภิทา จตสฺโส         วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
         อิตฺถํ สุทํ อายสฺมา กึสุกปูชโก เถโร อิมา คาถาโย
อภาสิตฺถาติ ฯ
                                 กึสุกปูชกตฺเถรสฺส อปทานํ สมตฺตํ ฯ
                             จตุตฺถํ สโกฏกโกรณฺฑทายกตฺเถราปทานํ (๓๕๔)
     [๓๕๖]   |๓๕๖.๑๔| อกฺกนฺตญฺจ ปทํ ทิสฺวา    สิขิโน โลกพนฺธุโน
                         เอกํสํ อชินํ กตฺวา           ปทํ ๑- เสฏฺฐํ อวนฺทหํ ฯ
       |๓๕๖.๑๕| โกรณฺฑํ ปุปฺผิตํ ทิสฺวา      ปาทปํ ธรณีรุหํ
                         สโกฏกํ ๒- คเหตฺวาน      ปเท จกฺกํ อปูชยึ ฯ
       |๓๕๖.๑๖| เอกตฺตึเส อิโต กปฺเป        ยํ กมฺมมกรึ ตทา
                         ทุคฺคตึ นาภิชานามิ         พุทฺธปูชายิทํ ผลํ
       |๓๕๖.๑๗| ปฏิสมฺภิทา จตสฺโส          วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
         อิตฺถํ สุทํ อายสฺมา สโกฏกโกรณฺฑทายโก เถโร อิมา
คาถาโย อภาสิตฺถาติ ฯ
                          สโกฏกโกรณฺฑทายกตฺเถรสฺส อปทานํ สมตฺตํ ฯ
                             ปญฺจมํ ทณฺฑทายกตฺเถราปทานํ (๓๕๕)
     [๓๕๗]   |๓๕๗.๑๘| กานนํ วนโมคฺคยฺห  เวฬุํ เฉตฺวานหนฺตทา
                         อาลมฺพนํ คเหตฺวาน       สงฺฆสฺส อททํ อหํ ฯ
@เชิงอรรถ: ๑ ยุ. ปทเสยฺยํ ฯ ๒ ม. สโกสกํ ฯ
       |๓๕๗.๑๙| เตน จิตฺตปฺปสาเทน         สุพฺพเต ๑- อภิวาทิย
                         อาลมฺพนมฺปิ ทตฺวาน     ปกฺกามิ อุตฺตรามุโข ฯ
       |๓๕๗.๒๐| จตุนวุเต อิโต กปฺเป         ยํ ทณฺฑมททินฺตทา
                         ทุคฺคตึ นาภิชานามิ        ทณฺฑทานสฺสิทํ ผลํ ฯ
       |๓๕๗.๒๑| ปฏิสมฺภิทา จตสฺโส          วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ทณฺฑทายโก เถโร อิมา คาถาโย
อภาสิตฺถาติ ฯ
                               ทณฺฑทายกตฺเถรสฺส อปทานํ สมตฺตํ ฯ
                            ฉฏฺฐํ อมฺพยาคุทายกตฺเถราปทานํ (๓๕๖)
     [๓๕๘]   |๓๕๘.๒๒| สตรํสี นาม สมฺพุทฺโธ   สยมฺภู อปราชิโต
                         วุฏฺฐหิตฺวา สมาธิมฺหา     ภิกฺขาย มมุปาคมิ ฯ
       |๓๕๘.๒๓| ปจฺเจกพุทฺธํ ทิสฺวาน         อมฺพยาคุํ อทาปยึ ๒-
                         วิปฺปสนฺนมนนฺตสฺส         วิปฺปสนฺเนน เจตสา ฯ
       |๓๕๘.๒๔| จตุนวุเต อิโต กปฺเป          ยํ กมฺมมกรึ ตทา
                         ทุคฺคตึ นาภิชานามิ         อมฺพยาคุยิทํ ผลํ ฯ
       |๓๕๘.๒๕| ปฏิสมฺภิทา จตสฺโส          วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
@เชิงอรรถ: ๑ ยุ. สุขนฺเต ฯ ๒ ม. อทาสหํ ฯ
         อิตฺถํ สุทํ อายสฺมา อมฺพยาคุทายโก เถโร อิมา คาถาโย
อภาสิตฺถาติ ฯ
                            อมฺพยาคุทายกตฺเถรสฺส อปทานํ สมตฺตํ ฯ
                                 สตฺตมํ ปุฏกปูชกตฺเถราปทานํ (๓๕๗)
     [๓๕๙]   |๓๕๙.๒๖| ทิวาวิหารา นิกฺขนฺโต วิปสฺสี โลกนายโก
                         ภิกฺขาย วิจรนฺโต โส        มม สนฺติกมุปาคมิ ฯ
       |๓๕๙.๒๗| ตโต ปีติโต ๑- สุมโน        พุทฺธเสฏฺฐสฺส ตาทิโน
                         โลณสุปุฏกํ ทตฺวา           กปฺปํ สคฺคมฺหิ โมทหํ ฯ
       |๓๕๙.๒๘| เอกนวุเต อิโต กปฺเป         ยํ ปุฏกมทาสหํ ๒-
                         ทุคฺคตึ นาภิชานามิ         ปุฏกสฺส ๓- อิทํ ผลํ ฯ
       |๓๕๙.๒๙| ปฏิสมฺภิทา จตสฺโส           วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ปุฏกปูชโก ๔- เถโร อิมา คาถาโย
อภาสิตฺถาติ ฯ
                               ปุฏกปูชกตฺเถรสฺส อปทานํ สมตฺตํ ฯ
                             อฏฺฐมํ วจฺฉทายกตฺเถราปทานํ (๓๕๘)
     [๓๖๐]   |๓๖๐.๓๐| วิปสฺสิโน ภควโต       โลกเชฏฺฐสฺส ตาทิโน
                         เอกวจฺโฉ ๕- มยา ทินฺโน  ปสนฺเนน สปาณินา ฯ
@เชิงอรรถ: ๑ ม. ยุ. ปติโต ฯ ๒ โป. ปุถุกตมทาสหํ ฯ ยุ. สุปุฏกมทาสหํ ฯ
@๓ โป. ปุถุกตสฺส ฯ ยุ. สุปุฏกสฺส ฯ ๔ ม. ยุ. สุปุฏกปูชโก ฯ ๕ ม. เอกํ มญฺจํ
@มยา ทินฺนํ ฯ ยุ. ... สชฺฌํ ... ฯ
       |๓๖๐.๓๑| หตฺถิยานํ อสฺสยานํ         ทิพฺพยานํ สมชฺฌคํ
                         เตน วจฺฉกทาเนน ๑-     ปตฺโตมฺหิ อาสวกฺขยํ ฯ
       |๓๖๐.๓๒| เอกนวุเต อิโต กปฺเป        ยํ วจฺฉมททึ ๒- ตทา
                         ทุคฺคตึ นาภิชานามิ        วจฺฉทานสฺสิทํ ผลํ ฯ
       |๓๖๐.๓๓| ปฏิสมฺภิทา จตสฺโส          วิโมกฺขาปิจ อฏฺฐิเม
                         ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
         อิตฺถํ สุทํ อายสฺมา วจฺฉทายโก ๓- เถโร อิมา คาถาโย
อภาสิตฺถาติ ฯ
                                 วจฺฉทายกตฺเถรสฺส อปทานํ สมตฺตํ ฯ
                                  นวมํ สรณาคมนิยตฺเถราปทานํ (๓๕๙)
     [๓๖๑]   |๓๖๑.๓๔| อารุหิมฺหา ตทา นาวํ ภิกฺขุ จาชีวโก จหํ
                         นาวาย ภิชฺชมานาย        ภิกฺขุ เม สรณํ อทา ฯ
       |๓๖๑.๓๕| เอกตฺตึเส อิโต กปฺเป         ยญฺจ เม สรณํ อทา
                         ทุคฺคตึ นาภิชานามิ         สรณาคมเน ผลํ ฯ
       |๓๖๑.๓๖| ปฏิสมฺภิทา จตสฺโส           วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา สรณาคมนิโย เถโร อิมา คาถาโย
อภาสิตฺถาติ ฯ
                               สรณาคมนิยตฺเถรสฺส อปทานํ สมตฺตํ ฯ
@เชิงอรรถ: ๑ ม. มญฺจกทาเนน ฯ ยุ. สชฺฌกทาเนน ฯ ๒ ม. มญฺจมททึ ฯ ยุ. สชฺฌมททึ ฯ
@๓ ม. มญฺจทายโก ฯ ยุ. สชฺฌทายโก ฯ
                                ทสมํ ปิณฺฑปาติกตฺเถราปทานํ (๓๖๐)
     [๓๖๒]   |๓๖๒.๓๗| ติสฺโส นามาสิ สมฺพุทฺโธ     วิหาสิ ปวเน ๑- ตทา
                         ตุสิตาหิ อิธาคนฺตฺวา       ปิณฺฑปาตํ อทาสหํ ฯ
       |๓๖๒.๓๘| สมฺพุทฺธํ อภิวาเทตฺวา       ติสฺสํ นาม มหายสํ
                         สกํ จิตฺตํ ปสาเทตฺวา       ตุสิตํ อคมาสหํ ฯ
       |๓๖๒.๓๙| เทฺวนวุเต อิโต กปฺเป        ยํ ทานมททึ ตทา
                         ทุคฺคตึ นาภิชานามิ        ปิณฺฑปาตสฺสิทํ ผลํ ฯ
       |๓๖๒.๔๐| ปฏิสมฺภิทา จตสฺโส          วิโมกฺขาปิจ อฏฺฐิเม
                         ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
         อิตฺถํ สุทํ อายสฺมา ปิณฺฑปาติโก เถโร อิมา คาถาโย
อภาสิตฺถาติ ฯ
                                 ปิณฺฑปาติกตฺเถรสฺส อปทานํ สมตฺตํ ฯ
                                                   อุทฺทานํ
                           สทฺทสญฺญี ยวสิโก           กึสุโกรณฺฑปุปฺผิโย
                           อาลมฺพนมฺพยาคู จ          ปุฏกวจฺฉทายโก
                           สรณํ ปิณฺฑปาโต จ          คาถา ตาฬีสเมว จ ฯ
                                       สทฺทสญฺญิกวคฺโค ฉตฺตึโส ฯ
                                                  ---------
@เชิงอรรถ: ๑ ม. วิปิเน ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๔๓๙-๔๔๕.
http://84000.org/tipitaka/pitaka_item/pali_item_s.php?book=32&item=353&items=10&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=32&item=353&items=10&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=32&item=353&items=10&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=32&item=353&items=10&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=32&i=353
             สารบัญพระไตรปิฎกเล่มที่ ๓๒
http://84000.org/tipitaka/read/?index_32