พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                              ทสมํ อฏฺฐารสเถรีสหสฺสานมปทานํ (๓๐)
     [๑๗๐]   |๑๗๐.๔๒๐| อฏฺฐารสสหสฺสานิ   ภิกฺขุนี สากิยสมฺภวา
                          ยโสธรีปมุขานิ             สมฺพุทฺธํ อุปสงฺกมุํ ฯ
      |๑๗๐.๔๒๑| อฏฺฐารสสหสฺสานิ ๑-    สพฺพา โหนฺติ มหิทฺธิกา
                          วนฺทนฺติ มุนิโน ปาเท    อาโรเจนฺติ ยถาพลํ ฯ
      |๑๗๐.๔๒๒| ชาติ ขีณา ชรา พฺยาธิ    มรณญฺจ มหามุเน ๒-
                          อนาสวํ ปทํ สนฺตํ         อมตํ ยาม นายกํ ๓- ฯ
      |๑๗๐.๔๒๓| ขลิตญฺจ ปุเร อตฺถิ         สพฺพาสมฺปิ มหามุนิ
                          อปราธํ ปชานนฺติ          ขม อมฺหํ วินายก ฯ
      |๑๗๐.๔๒๔| อิทฺธิญฺจาปิ นิทสฺเสถ      มม สาสนการิกา
                          ปริสานญฺจ สพฺพาสํ      กงฺขํ ฉินฺทถ ยาวตา ฯ
      |๑๗๐.๔๒๕| ยโสธรา ๔- มหาวีร        มนาปา ปิยทสฺสนา
@เชิงอรรถ: ๑ โป. ยโสธราสหสฺสานิ ฯ ยุ. ยโสธรียสหสฺสานิ ฯ ๒ ม. ยุ. มหามุนิ ฯ
@๓ ม. ยุ. นายก ฯ ๔ ยุ. ยโสธรี ฯ
                          สพฺพา ตุยฺหํ มหาวีร     อคารสฺมึ ปชาปติ ฯ
      |๑๗๐.๔๒๖| ถีนํ สตสหสฺสานํ           นวุตีนํ ฉฬุตฺตริ
                          อคาเร เต มยํ วีร          ปาโมกฺขา สพฺพอิสฺสรา ฯ
      |๑๗๐.๔๒๗| รูปาจารคุณูเปตา           โยพฺพนฏฺฐา ปิยํวทา
                          สพฺพาโย ๑- อปจายนฺติ ๒-   เทวตา วิย มานุสา ฯ
      |๑๗๐.๔๒๘| อฏฺฐารสสหสฺสานิ         สพฺพา สากิยสมฺภวา
                          ยโสธรี ๓- สหสฺสานิ     ปาโมกฺขา อิสฺสรา ตทา ฯ
      |๑๗๐.๔๒๙| กามธาตุมติกฺกนฺตา ๔-  สณฺฐิตา รูปธาตุยา
                          รูเปน สทิสา นตฺถิ         สหสฺสานํ มหามุเน ๕- ฯ
      |๑๗๐.๔๓๐| สมฺพุทฺธํ อภิวาเทตฺวา    อิทฺธึ เทเสสุ สตฺถุโน
                          เนกา นานาวิธาการา    มหาอิทฺธีปิ ๖- ทสฺสยุํ ฯ
      |๑๗๐.๔๓๑| จกฺกวาฬสมํ กายํ          สีสํ อุตฺตรโต กุรุ
                          อุโภ ปกฺขา ทุเว ทีปา     ชมฺพูทีปํ สรีรโต ฯ
      |๑๗๐.๔๓๒| ทกฺขิณญฺจ สรํ ๗- ปิณฺฉํ  นานาสาขา ตุ ปตฺตกา
                          จนฺทญฺจ สุริยญฺจกฺขี     เมรุปพฺพตโต สิขํ ฯ
      |๑๗๐.๔๓๓| จกฺกวาฬคิรึ ตุณฺฑํ         ชมฺพูรุกฺขํ สมูลกํ
                          วีชมานา ๘- อุปาคนฺตฺวา  วนฺทนฺเต ๙- โลกนายกํ ฯ
      |๑๗๐.๔๓๔| หตฺถิวณฺณํ ตเถวสฺสํ       ปพฺพตํ ชลชนฺตทา ๑๐-
                          จนฺทญฺจ สุริยํ เมรุํ         สกฺกวณฺณญฺจ ทสฺสยุํ ฯ
@เชิงอรรถ: ๑ ม. ยุ. สพฺพา โน ฯ ๒ โป. อปสหนฺติ ฯ ๓ ม. ยโสธรา ฯ ยุ. ยโสวตี ฯ
@๔ ม. ...มติกฺกมฺม ฯ ๕ ม. ยุ. มหามุนิ ฯ อิโต ปรํ อีทิสเมว ฯ ๖ ยุ. มหาอิทฺธึ
@วิทสฺสยุํ ฯ ๗ โป. สสิรญฺจ ฯ ๘ โป. ยุ. วีชมานํ ฯ ๙ ม. ยุ. วนฺทนฺตี ฯ
@๑๐ ม. ชลธึ ตถา ฯ
      |๑๗๐.๔๓๕| ยโสธรา ๑- มยํ วีร         ปาเท วนฺทาม จกฺขุม
                          ตว จิรปฺปภาเวน ๒-      นิปฺผนฺนา นรนายก ฯ
      |๑๗๐.๔๓๖| อิทฺธีสุ จ วสี โหม          ทิพฺพาย โสตธาตุยา
                          เจโตปริยญาณสฺส        วสี โหม มหามุเน ฯ
      |๑๗๐.๔๓๗| ปุพฺเพนิวาสํ ชานาม      ทิพฺพจกฺขุํ วิโสธิตํ
                          สพฺพาสวปริกฺขีณา       นตฺถิ ทานิ ปุนพฺภโว ฯ
      |๑๗๐.๔๓๘| อตฺถธมฺมนิรุตฺตีสุ          ปฏิภาเณ ตเถว จ
                          ญาณํ อมฺหํ มหาวีร       อุปฺปนฺนํ ตว สนฺติเก ฯ
      |๑๗๐.๔๓๙| พุทฺธานํ ๓- โลกนาถานํ   สงฺคมํ โน นิทสฺสิตํ
                          อธิการา พหู อเมฺห       ตุยฺหตฺถาย มหามุเน ฯ
      |๑๗๐.๔๔๐| ยํ อมฺหํ ปุริมํ กมฺมํ         กุสลํ สรเส มุเน
                          ตุยฺหตฺถาย มหาวีร        ปุญฺญานุปจิตานิ ๔- โน ฯ
      |๑๗๐.๔๔๑| อภพฺพฏฺฐาเน วชฺเชตฺวา  วารยิมฺห ๕- อนาจรํ
                          ตุยฺหตฺถาย มหาวีร        สญฺจตฺตํ ๖- ชีวิตมฺปิ โน ฯ
      |๑๗๐.๔๔๒| เนกโกฏิสหสฺสานิ          ภิริยตฺถายทาสิ โน
                          น ตตฺถ วิมนา โหม       ตุยฺหตฺถาย มหามุเน ฯ
      |๑๗๐.๔๔๓| เนกโกฏิสหสฺสานิ         อุปการายทาสิ โน
                          น ตตฺถ วิมนา โหม       ตุยฺหตฺถาย มหามุเน ฯ
      |๑๗๐.๔๔๔| เนกโกฏิสหสฺสานิ          โภชนตฺถายทาสิ โน
                          น ตตฺถ วิมนา โหม       ตุยฺหตฺถาย มหามุเน ฯ
@เชิงอรรถ: ๑ ยุ. ยโสวณฺณา ฯ ๒ ยุ. วีรปฺปภาเวน ฯ ๓ ม. ยุ. ปุพฺพานํ ฯ อิโต ปรํ อีทิสเมว ฯ
@๔ โป. ปุญฺญํ อุปจิตํ มยา ฯ ๕ ยุ. ปาจยิมฺห อนาวรํ ฯ ๖ ม. ยุ. จตฺตานิ ชีวิตานิ
@โน ฯ
      |๑๗๐.๔๔๕| เนกโกฏิสหสฺสานิ          ชีวิตานิ จชิมฺหเส ๑-
                          ภยโมกฺขํ กริสฺสาม        ชีวิตานิ จชิมฺหเส ๒- ฯ
      |๑๗๐.๔๔๖| องฺคคเต อลงฺกาเร         วตฺเถ นานาวิเธ พหู
                          อิตฺถีภณฺเฑ น คุยฺหาม  ตุยฺหตฺถาย มหามุเน ฯ
      |๑๗๐.๔๔๗| ธนธญฺญปริจฺจาคํ          คามานิ นิคมานิ จ
                        เขตฺตํ ปุตฺตญฺจ ๓- ธีตญฺจ   ปริจตฺตํ มหามุเน ฯ
      |๑๗๐.๔๔๘| หตฺถิอสฺสํ ๔- ควญฺจาปิ  ทาสิโย ปริจาริกา
                          ตุยฺหตฺถาย มหาวีร        ปริจตฺตํ อสงฺขยํ ฯ
      |๑๗๐.๔๔๙| ยํ อเมฺห ปฏิมนฺเตสิ       ทานํ ทสฺสาม ยาจเก
                          วิมนํ โน น ปสฺสาม       ททโต ทานมุตฺตมํ ฯ
      |๑๗๐.๔๕๐| นานาวิธํ พหุํ ทุกฺขํ         สํสาเร จ พหุพฺพิเธ
                          ตุยฺหตฺถาย มหาวีร       อนุภุตฺตํ ๕- อสงฺขยํ ฯ
      |๑๗๐.๔๕๑| สุขํ ปตฺตานุโมทาม        น จ ทุกฺเขสุ ทุมฺมนา
                          สพฺพตฺถ ตุสิตา โหม      ตุยฺหตฺถาย มหามุเน ฯ
      |๑๗๐.๔๕๒| อนุมคฺเคน สมฺพุทฺโธ      ยํ ๖- ธมฺมํ อภินีหริ
                          อนุโภตฺวา สุขทุกฺขํ        ปตฺโต โพธึ มหามุเน ฯ
      |๑๗๐.๔๕๓| พฺรหฺมเทวญฺจ สมฺพุทฺธํ   โคตมํ โลกนายกํ
                          อญฺเญสํ โลกนาถานํ     สงฺคมนฺเตหิ โน พหุ ๗- ฯ
      |๑๗๐.๔๕๔| อธิการํ พหุ อมฺหํ ๘-      ตุยฺหตฺถาย มหามุเน
                         คเวสโต ๙- พุทฺธธมฺมํ ๑๐-   มยนฺเต ปริจาริกา ฯ
@เชิงอรรถ: ๑-๒ ยุ. จชิมฺห โน ฯ ๓ ม. ปุตฺตา จ ชีตา จ ปริจตฺตา ... ฯ ๔ ม. หตฺถีอสฺสา
@ควาจาปิ ฯ ๕ ยุ. ปริจตฺตํ ฯ ๖ ยุ. สทฺธมฺมํ ฯ ๗ ม. พหู ฯ ยุ. พหุํ ฯ
@๘ ม. ยุ. อเมฺห ฯ ๙ ยุ. คเวสนฺตา ฯ ๑๐ ม. พุทฺธธมฺเม ฯ
      |๑๗๐.๔๕๕| กปฺเป จ สตสหสฺเส        จตุโร จ อสงฺขเย
                          ทีปงฺกโร มหาวีโร          อุปฺปชฺชิ โลกนายโก ฯ
      |๑๗๐.๔๕๖| ปจฺจนฺตเทสวิสเย           นิมนฺเตตฺวา ตถาคตํ
                          ตสฺส อาคมนํ มคฺคํ        โสเธนฺติ ตุฏฺฐมานสา ฯ
      |๑๗๐.๔๕๗| เตน กาเลน โส อาสิ       สุเมโธ นาม พฺราหฺมโณ
                          มคฺคญฺจ ปฏิยาเทสิ      อายโต สพฺพทสฺสิโน ฯ
      |๑๗๐.๔๕๘| เตน กาเลน อหุมฺห ๑-   สพฺพา พฺราหฺมณสมฺภวา
                          ผลุกชาติปุปฺผานิ          อาหริมฺห สมาคมํ ฯ
      |๑๗๐.๔๕๙| ตสฺมึ โส สมเย พุทฺโธ     ทีปงฺกโร มหายโส
                          วิยากาสิ มหาวีโร         อิสิมุคฺคตมานสํ ฯ
      |๑๗๐.๔๖๐| จลติ รวติ ปฐวี ๒-          สงฺกมฺปติ สเทวเก
                          ตสฺส กมฺมํ ปกิตฺเตนฺโต   อิสิมุคฺคตมานสํ ฯ
      |๑๗๐.๔๖๑| เทวกญฺญา มนุสฺสา จ    มยญฺจาปิ ๓- สเทวกา
                          นานาปูชนิยํ ภณฺฑํ       ปูชยิตฺวาน ปตฺถยุํ ฯ
      |๑๗๐.๔๖๒| เตสํ พุทฺโธ วิยากาสิ       โชติทีปสนามโก
                          อชฺช เย ปตฺถิตา อตฺถิ    เต ภวิสฺสนฺติ สมฺมุขา ฯ
      |๑๗๐.๔๖๓| อปริเมยฺเย อิโต กปฺเป    ยํ โน พุทฺโธ วิยากริ
                          ตํ วาจํ อนุโมทนฺตี ๔-    เอวํการี อหุมฺห โน ฯ
      |๑๗๐.๔๖๔| ตสฺส กมฺมสฺส สุกตสฺส    ตตฺถ จิตฺตํ ปสาทยุํ
                          เทวมานุสกํ โยนึ           อนุโภตฺวา อสงฺขยํ ฯ
@เชิงอรรถ: ๑ โป. อาสุมฺห ฯ ยุ. อาสิมฺห ฯ ๒ ม. ยุ. ปุถวี ฯ ๓ โป. อเมฺหวาปิ สเทวตา ฯ
@ยุ. อเมฺหจาปิ ฯ ๔ โป. ยุ. อนุโมทนฺตา ฯ ม อนุโมเทนฺตา ฯ
      |๑๗๐.๔๖๕| สุขทุกฺเข อนุโภตฺวาน      เทเวสุ มานุเสสุ จ
                          ปจฺฉิเม ภวสมฺปตฺเต       ชาตามฺห สากิเย กุเล ฯ
      |๑๗๐.๔๖๖| รูปวตี โภควตี                ยสสีลวตี ตโต
                          สพฺพงฺคสมฺปทา โหม     กุเลสุ อติสกฺกตา ฯ
      |๑๗๐.๔๖๗| ลาภสิโลกสกฺการํ           โลกธมฺมสมาคมํ
                          จิตฺตญฺจ ทุกฺขิตํ นตฺถิ     วสาม อกุโตภยา ฯ
      |๑๗๐.๔๖๘| วุตฺตํ เหตํ ภควตา           รญฺโญ อนฺเตปุเร ตทา
                          ขตฺติยานํ ปุเร ตาสํ ๑-   อุปการญฺจ นิทฺทิสิ ฯ
      |๑๗๐.๔๖๙| อุปการา จ ยา นารี        ยา จ นารี สุเข ทุกฺเข
                          อตฺถกฺขายี จ ยา นารี    ยา จ นารีนุกมฺปิกา ฯ
      |๑๗๐.๔๗๐| ธมฺมญฺจเร สุจริตํ            น ตํ ทุจฺจริตํ จเร
                          ธมฺมจารี สุขํ เสติ          อสฺมึ โลเก ปรมฺหิ จ ฯ
      |๑๗๐.๔๗๑| อคารํ ปชหิตฺวาน ๒-      ปพฺพชิมฺหานคาริยํ
                          อฑฺฒมาเส อสมฺปตฺเต   จตุสจฺจํ ผุสิมฺห โน ฯ
      |๑๗๐.๔๗๒| จีวรํ ปิณฺฑปาตญฺจ        ปจฺจยํ สยนาสนํ
                          อุปเนนฺติ พหู อเมฺห       สาครสฺเสว อุมฺมิโย ฯ
      |๑๗๐.๔๗๓| กิเลสา ฌาปิตา มยฺหํ     ภวา สพฺเพ สมูหตา
                          นาคีว พนฺธนํ เฉตฺวา      วิหราม อนาสวา ฯ
      |๑๗๐.๔๗๔| สฺวาคตํ วต โน อาสิ        พุทฺธเสฏฺฐสฺส สนฺติเก
                          ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
@เชิงอรรถ: ๑ ม. ยุ. วีร ฯ ๒ ม. ยุ. วิชหิตฺวาน ฯ
      |๑๗๐.๔๗๕| ปฏิสมฺภิทา จตสฺโส        วิโมกฺขาปิจ อฏฺฐิเม
                          ฉฬภิญฺญา สจฺฉิกตา     กตํ พุทฺธสฺส สาสนํ ฯ
      |๑๗๐.๔๗๖| เอวํ พหุวิธํ ทุกฺขํ             สมฺปตฺติญฺจ ๑- พหุพฺพิธํ
                          วิสุทฺธภาวํ สมฺปตฺตา     ลภาม สพฺพสมฺปทา ฯ
      |๑๗๐.๔๗๗| ยา ททนฺติ สกตฺตานํ      ปุญฺญตฺถาย มเหสิโน
                          สหายสมฺปทา โหนฺติ     นิพฺพานํ ๒- ปทมสงฺขตํ ฯ
      |๑๗๐.๔๗๘| ปริกฺขีณํ อตีตญฺจ           ปจฺจุปฺปนฺนํ อนาคตํ
                          สพฺพกมฺมํปิ ๓- โน ขีณํ  ปาเท วนฺทาม จกฺขุมา ฯ
      |๑๗๐.๔๗๙| นิพฺพานาย วทนฺตีนํ       กึ โว วกฺขาม อุตฺตรึ
                         สตฺตสงฺขตทาโส ๔- โย   ปปฺโปถ อมตํปทนฺติ ฯ
             อิตฺถํ สุทํ ยโสธราปมุขานิ อฏฺฐารส ภิกฺขุนีสหสฺสานิ ภควโต สมฺมุขา
                                      อิมา คาถาโย อภาสิตฺถาติ ฯ
                               อฏฺฐารสเถรีสหสฺสานํ อปทานํ สมตฺตํ ฯ
                                                    อุทฺทานํ
                        กุณฺฑลา โคตมี เจว           ธมฺมทินฺนา จ สกุลา
                        วรนนฺทา จ โสณา จ          กาปิลานี ยโสธรา ฯ
                        ทสสหสฺสภิกฺขุนี                อฏฺฐารสสหสฺสกา
                        สตานิ เจว จตฺตาริ             อฏฺฐสตฺตติเมว จ ฯ
                                       กุณฺฑลเกสวคฺโค ๕- ตติโย ฯ
                                          ----------------------
@เชิงอรรถ: ๑ โป. ม. ยุ. สมฺปตฺตี จ พหุพิธา ฯ ๒ ม. นิพฺพานปทมสงฺขตํ ฯ ยุ.
@นิพฺพานมตสงฺขตํ ฯ ๓ ยุ. สจฺจํ กมฺมํปิ ... ฯ ๔ ม. สตฺตสงฺคตโทสํ หิ ฯ ยุ.
@สนฺตสงฺขตโทโส โย ฯ ๕ ม. กุณฺฑลเกสิวคฺโค ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๓๖๙-๓๗๕.
http://84000.org/tipitaka/pitaka_item/pali_item_s.php?book=33&item=170&items=1&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=33&item=170&items=1&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=170&items=1&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=170&items=1&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=170
             สารบัญพระไตรปิฎกเล่มที่ ๓๓
http://84000.org/tipitaka/read/?index_33